تازيون خبرون

Daily Archives: May 12, 2016

سنجي ليلا ڀنسالي اداڪار شاهه رخ خان کي فلم جي آڇ ڪري ڇڏي

ممبئي (شوبز نيوز) بالي ووڊ هدايتڪار سنجي ليلا ڀنسالي اداڪار شاهه رخ خان کي پنهنجي نئين فلم ۾ ڪردار جي آڇ ڪري ڇڏي. بالي ووڊ سڌ سماءَ وارن ذريعن موجب بالي ووڊ هدايتڪار سنجي ليلا ڀنسالي اداڪار شاهه رخ خان کي پنهنجي نئين فلم، جنهن جو نالو اڃا ناهي رکيو ويو ۾ ڪردار جي آڇ ڪري ڇڏي آهي. ذريعن موجب اداڪار شاهه رخ خان ان آڇ تي سوچڻ لاءِ وقت گهريو آهي ۽ سنجي هاڻي سندس هاڪاري جواب جو منتظر آهي. واضح رهي ته سنجي ۽ شاه رخ خان 2002ع ۾ سپرهٽ فلم ديوداس م گڏ ڪم ڪري چڪا آهن.

 

عاليه ڀٽ ۽ شرڌا ڪپور ۾ وڇوٽيون وڌي ويون

ممبئي(شوبز نيوز) بالي ووڊ اداڪاره عاليه ڀٽ ۽ اداڪاره شرڌا ڪپور ۾ وڇوٽيون وڌي ويون. بالي ووڊ جي سڌ سماءَ وارن ذريعن مطابق بالي ووڊ اداڪارائن عاليه ڀٽ ۽ شرڌا ڪپور جيڪي اڳ ۾ هر تقريب ۾ هڪ ٻئي جون تعريفون ڪندي نه ٿڪجنديون هيون، ۾ اختلاف چوٽ ڇڙهي ويا آهن. هاڻي ٻئي هڪ ٻئي سان ڳالهائڻ به پسند نه ٿيون ڪن. ذريعن مطابق اداڪاره شرڌا ڪپور عاليه ڀٽ جي بواءِ فرينڊ سڌارٿ ملهوترا سان فلم ”ايڪ ولن” بعد هڪ ٻئي فلم سائن ڪري رهي آهي، شرڌا ۽ سڌارٿ ملهوترا وچ ۾ فلم ”ايڪ ولن” دوران ڪافي ويجهڙائپ ٿي وئي هئي تنهن ڪري هاڻي عاليه سڌارٿ ۽ شرڌا جي ٻيهر گڏ فلم ۾ اچڻ سبب پريشان نظر اچي ٿي ۽ شرڌا کان ڪاوڙيل آهي

 

سليڪشن ڪميٽي جي ميمبرن احمد شهزاد کي تربيتي ڪئمپ جو حصو بنائڻ جي مخالفت ڪري ڇڏي

لاهور (اسپورٽس نيوز) قومي ڪرڪيٽ ٽيم جي سليڪشن ڪميٽي جي ميمبرن اوپننگ رانديگر احمد شهزاد کي انگلينڊ جي دوري لاءِ تربيتي ڪئمپ ۾ حصو بنائڻ جي مخالفت ڪئي آهي ذريعن موجب اوپننگ رانديگر احمد شهزاد پي سي بي کي خط ذريعي مستقبل ۾ ڊسيپلين جي خلاف ورزي نه ڪرڻ جي خاطري ڪرائي آهي پر سليڪٽرز جو موقف آهي ته ڊراپ ڪيل ٽيسٽ ڪرڪيٽر کي ٻيهر ڪئمپ ۾ گهرائڻ سان غلط مثال قائم ٿيندو. احمد شهزاد تي ڊسيپلين جي خلاف ورزي ڪرڻ تي ٻاهر ڪڍيو ويو ان لاءِ ان کي ڪئمپ جو حصو نٿو بڻائي سگهجي.

 

رانديگرن لاءِ نئين ڊزائين جا هيلمٽ پائڻ ضروري آهي: آسٽريلوي ڪرڪيٽ عملدار

سڊني (اسپورٽس نيوز) آسٽريليا ڪرڪيٽ عملدارن چيو آهي ته رانديگرن کي فاسٽ ۽ ميڊيم بالنگ دوران نئين ڊزائين جا هيلمٽ پائڻ لازمي هوندو اهو فيصلو رانديگر فلپ هيويز جي موت کان پوءِ ڪرڪيٽ جي حفاظتي قدمن جي جاچ جو حڪم ڏنو ويو آهي نون قانونن مطابق آسٽريليا ۾ کيڏي ويندڙ ڊوميسٽم مئچن ۾ رانديگرن کي برطانوي معيار جا هيلمٽ پائڻا پوندا. رانديگرن کي اهي هيلمٽ تربيت دوران به پائڻا پوندا وڪيٽ ڀرسان وڪيٽ ڪيپرن کي رانديگر جي 7 ڪلوميٽر جي فاصلي تي بيهندڙ فيلڊرن کي به هيلمٽ لازمي طور تي پائڻا پوندا 25 ساله آسٽريلوي بيٽس مين فلپ هيويز کي ڳچي ۾ بائونسر لڳڻ کان پوءِ فوري طور تي اسپتال منتقل ڪيو ويو جتي هو ٻن ڏينهن کان پوءِ فوت ٿي ويو.

 

احتساب هاڻ نه ٿيو ته ڪڏهن ٿيندو؟؛ وصعت الله خان

اها ڳالهه صحيح آهي ته ڪنهن به ترقي پذير ملڪ وانگر پاڪستان کي به لاقانونيت، دهشتگردي، اقتصادي زبون حالي، علائقائي عدم تحفظ، پسماندگي، غربت ۽ جڳهين جي وڌندڙ خليج، تعليم، عدم مساوات، بيماري، هر سطح تي تشدد، ناقص انصاف، طبقاتي لاهن چاڙهن، صحت ۽ تعليم جي غير معياري رسائي سميت هر طرح جا سنگين مسئلا درپيش آهن، پر اُميد جي هڪ روشني هاڻ به باقي آهي.

هر ڊاڪٽر، نرس، انجنيئر، آرڪيٽيڪٽ، ڪالم نگار، ايڊيٽر، مذهبي اسڪالر، امام مسجد، دانشور، صحافي، اينڪر، ٽيچر، مورخ، محقق، شاعر،  اديب، سائنسدان، اداڪار، ريڙهي وارو، مزدور، هاري، زميندار، وڏيرو، خان، سردار، چوڪيدار، پوليس وارو، رينجرز ۽ ايف جو سنتري. ننڍي کان اعليٰ تمام معزز جج، سفارتڪار، ڪلرڪس، بيوروڪريٽ، بينڪر، عورت، مرد، شاگرد ۽ شاگردياڻيون، حجم، بهشتي، قصائي، مهاڻو، اسٽيٽ ايجنٽ، لينڊ ڊويلپر، جلاوطن، وطن ڇڏيندڙ، دنيا ڇڏيندڙ، ڪنگلو، ارب پتي، ميمبر پارليامينٽ، ڪونسلر، ووٽر، پير، مريد.

ان کان وڌيڪ ضرورت هڪ به پلاٽ، هڪ بيگ به فالتو زرعي ايراضي ۽ منافعو بخش پوسٽنگز تي ٻه  حرف اماڻڻ واري، پيشه واراڻي ذميدارين تي پورو ڌيان، آئين ۽ قانون ۽ سويلين بالادستي تي يقين رکندڙ ڪيترائي حاضر ۽ رٽائرڊ جرنيل.

وڌيڪ سرڪاري انتظامي اداري بشمول پلي بارگين تي يقين رکندڙ نيب، حساس ادارا، جهادي تنظيمن، هٿياربند مليشائون بشمول تحريڪ طالبان پاڪستان، فلاحي اين جي اوز بشمول ستار ايڌي، ديني مدرسا بشمول لال مسجد واري مولانا عبدالعزيز، سماجي ۽ ادبي تنظيمون.

وڌيڪ سمورن سياسي پارٽين بشمول الحاج آصف زرداري جي پيپلزپارٽي، ٽوپين ۽ گهر جو خرچو کڻندڙ مولانا فضل الرحمان جي جميعت علماءِ اسلام، ڀتاخوري جي دشمن متحده قومي موومينٽ، عدليه جي حرمت تي انڌو يقين رکندڙ پرويز مشرف جي آل پاڪستان مسلم ليگ، ڪوآپريٽو سوسائٽين جي هٿان اربين روپيا لٽيندڙ ۽ عام ماڻهن کي پائي پائي واپس ڪندڙ چوڌري برادران جي مسلم ليگ (ق)، سيلف ميڊ اسفند يار ولي خان جي عوامي نيشنل پارٽي، ارب پتي ڪاروبارين جي چنبي مان آزاد عمران خان جي تحريڪ انصاف،  والد مرحوم جي پينشن تي گذارو ڪندڙ اعجاز الحق جي مسلم ليگ، پنهنجو هڪ هڪ پئسو پاڪستان ۾ ڪمائڻ ۽ هتي رکڻ جي قائل شريف برادران جي مسلم ليگ نواز.

هر رسا گير، نوسر باز، ڪار لفٽر، چور، ڌاڙيل بشمول غلام رسول ڇوٽو، پاٿاريدار، دهشتگرد، سهولتڪار، قاتل، اسمگلر، مخبر، ڀتاخور، چائنا ڪٽر، ٽارگيٽ ڪلر، اشتهاري، نشائي، منشيات فروش، جعلي عامل، سفارشي استاد، ملاوٽ خور، حرام خور، دلال، جسم فروش، لينڊ مافيا جا سرڪاري ۽ ذاتي اهلڪار ۽ هيومن ٽريفڪر سميت ڪنهن کان به پڇي وٺو ته ڇا پاڪستان ۾ بلاامتياز احتساب ٿيڻ گهرجي؟ سمورا چوندا ته بنا دير سڀني جو ۽ فوري ٿيڻ گهرجي.

جيڪڏهن سمورا اهڙي طرح بنا فرق جي احتساب ۽ ڪرپشن جي خاتمي جي لاءِ ثابت قدم رهيا ته هڪ نه هڪ ڏينهن ڪرپشن فري صحتمند پاڪستان جو چوڌاري ضرور پراڏو ٿيندو.

دير ضرور آهي، انڌير ناهي.

ان بابت خوشخبري اها آهي ته سائنسدانن جي بقول سج گهٽ ۾ گهٽ اڳين ڏيڍ ارب سال اهڙي آب و تاب سان چمڪندو رهندو. ان لاءِ پريشان ٿيڻ نه گهرجي.

 

ماضيء جو آئينو؛ ”مڇيء جو شڪار ۽ يهودين جون اٽڪلون.“: شفيق شاڪر

حضرت موسيٰ عليه السلام جي دور کان گھڻو پوء يهودين جي هڪ جماعت بحر ڪلزم جي ڪناري آباد ٿي ويئي هئي.جيئن ته اهي سامونڊي ڪنارن تي رهندڙ هئا تنهن ڪري مڇي انهن جو قدرتي شڪار هو.جيڪا نه صرف انهن جي وڻندڙ وندر هئي پر سندن گذر سفر جو ذريعو پڻ. انهن ماڻهن کي هفتي جا ڇهه ڏيننهن شڪار ڪرڻ جي مذهبي طور تي اجازت هئي باقي ڇنڇر جو ڏينهن انهن جي لاء عبادت جو ڏينهن مقرر ڪيل هو.دلچسپ ڳالهه اها جو شڪار وارا ڇهه ئي ڏينهن عام طور تي مڇيون پاڻيء جي اندر غائب رهڻ لڳيون باقي منع ڪيل يعني ڇنڇر جي ڏينهن سمنڊ جي پاڻيء جي سطڃ تي ننڍين وڏين مڇين جو ميلو مچي ويندو هو.اصل ۾ ان معاملي ۾ انهن جي لاء خدا تعاليٰ جي پاران هڪ قسم جي آزمائش هئي.

ڪجھ عرصي تائين ته يهودي ان معاملي کي صبر سان ڏسندا رهيا پر نيٺ رهي نه سگھيا.انهن مان ڪجھ شرارتي ماڻهن اهڙيون اٽڪلون ڪيون جن مان اهو به ظاهر نه ٿئي ته اهي ڪو خدا جي حڪم جي صاف خلاف ورزي ڪري رهيا آهن پر گھڻي تعداد ۾ مڇيون به پڪڙي سگھن.سو انهن اهڙو طريقو اختيار ڪيو جو جمعي جي شام جو سمند ڪناري وڃي ننڍيون ننڍيون کڏون ۽ کوٻا کوٽي ڇڏينداهئا ۽ سمنڊ مان ڪجھ ڪسيون ڪڍي ڇڏيندا هئا ته جيئن ڇنڇر تي جيئن ئي گھڻيون مڇيون پاڻيء جي سطح تي اچن ته اهي انهن ڪسين وسيلي سندن کوٽيل کڏن کوٻن ۾ پهچي وڃن جن کي هو ايندڙ ڏينهن تي آرام سان شڪار ڪري وٺن.اهي پنهن جي ان چالاڪيء تي ڏاڍو خوش هئا.قوم جي ڪيترن ئي نيڪ مردن کين نصيحت ڪئي ته اهي ان نموني سان خدا جي حڪم جي خلاف ورزي نه ڪن پر اهي اهڙا ڍيٽ هئا جو پنهن جن انهن ڪريل حرڪتن تي پڇتائڻ بدران چوڻ لڳا ته خدا ته اسان کي رڳو ڇنڇر جي ڏينهن شڪار کان منع ڪئي آهي.اسان ڇنڇر ڏينهن نه پر آچر جي ڏينهن شڪار ڪندا آهيون جيڪو جائز آهي!

اصل ۾ اهي خدا جي حڪمن تي  سچائيء سان عمل ڪرڻ نه گھرندا هئا جنهن ڪري هنن مختلف حيلن ۽ بهانن سان غلط کي صحيح ۽ صحيح کي غلط چوڻ جو رويو اختيار ڪيو هو.اهي پاڻ ته دوکي ۾ پيل هئا پر قوم جي ٻين ماڻهن کي به گمراه ڪرڻ جي هر ممڪن ڪوشش ڪري رهيا هئا. آخر حالت اها وڃي بيٺي جو بستيء جي نيڪ ماڻهن به نه رڳو انهن کي گناه تي روڪڻ ٽوڪڻ ڇڏي ڏنو پر ڳوٺ جي هڪ وڏي اڪثريت آهستي آهستي انهن سان ان ڏوه ۾ شامل ٿي ويئي.ان ڳوٺ جي ڀرسان موجود هڪ ٻئي ڳوٺ جي نيڪ ماڻهن جي هڪ ٽولي ان ڳوٺ ۾ اچي ماڻهن کي خدا جي ان صاف نافرمانيء کان باز اچڻ جي نصيحت ڪئي پر جڏهن اکين تي نفساني خواهشن ۽ دل تي هوس جا پردا چڙهي وڃن ته ڪنهن به خيرخيواه جي نصيحت کان ڪن ٻوڙا ٿي ويندا آهن،سو هن قوم جي به اهائي حالت هئي،ڪنهن به نصيحت جو انهن تي ڪوبه اثر نه ٿيو.

آخر نصيحت ڪندر نيڪوڪار جماعت جا ٻه حصا ٿي ويا.هڪڙي ٻئي کي چيو ته هنن ماڻهن کي نصيحت ڪرڻ اجائي آهي،اهي ڪنهن به نموني سمجھڻ وارن مان ناهن.ڇو ته جيڪر اهي گناه کي گناه سمجھي ڪن ها ته اها اميد هئي ته شايد اهي ڪنهن وقت پنهن جي گناه کان توبه ڪري وٺن ها پر جڏهن اهي مختلف شرعي حيلا بهانا ٺاهي پنهن جن بدعملين تي پردو وجھڻ گھرن ٿا ته هاڻي اسان کي ڊپ ٿي پيو آهي ته هنن ماڻهن تي جلد ڪو خدا جو عذاب اچڻ وارو آهي يا اهي ٻي ڪنهن وڏي آفت ۾ گرفتار ثيڻ وارا آهن.انهيء ڪري هاڻي جيترو ٿي سگھي هنن کان پري رهجي.

نيڪوڪار جماعت جي ٻئي حصي جو چوڻ هو ته اسان هنن کي آخر تائين نصيحت ڪندا ۽ کين نافرمانيء کان روڪيندا رهنداسين ته جيئن قيامت جي ڏينهن الٰله سائين اسان کي هن ڏوه م نه پڪڙي ته اوهان هنن کي آخر تائين نافرمانيء کان روڪڻ جي ڪوشش ڇو نه ڪئي؟ ۽ اهو به ته اسان بلڪل مايوس ناهيون ٿي سگھي ٿو ته ڪنهن نه ڪنهن مرحلي تي هنن کي ڪا نصيحت فائدو ڏئي ۽ هي خدا جي عذاب کان بچي وڃن.

بهرحال جيڪا جماعت خدا جي حڪمن جي نافرمانيء تي سندرو ٻڌي بيٺي هئي ۽ بار بار جي نصيحت باوجود پنهن جو رويو بدلائڻ لاء تيار نه ٿي ان جي ابتڙ اهي نهايت ئي بيپرواهيء سان خدا جي حڪمن جو مذاق اڏائڻ لڳا.تڏهن اوچتو ئي اوچتو قدرت جو هنٽر حرڪت ۾ آيو،جيئن ئي هڪ صبح جو اهي ننڊ مان جاڳيا ته سندن چهرا بدلجي خنزيرن ۽ باندرن وارا بڻجي چڪا هئا ته جيئن ايندڙ دنيا تائين ماڻهو عبرت حاصل ڪن ته خدا جي حڪمن جي نافرماني،سندس مرضيء سان بغاوت ۽ سندس قانونن جو مذاق اڏائن وارن جو انجام ڇا ٿيو!انهن کان اشرف المخلوقات جي پوشاڪ کسي کين هميشه لاء ذليل ۽ خوار بڻائي حيوانن ۾ تبديل ڪري ڇڏيو ويو.جنهن بستيء تي اهو حادثو گذريو هو ان جو نالو ” ايلا“ ۽ اها بحر ڪلزم جي ڪناري سان آباد هئي.ايئن سمجھو ته جيڪر مصر جو ڪو رهاڪو مڪي شريف جي سفر تي نڪري ته اها بستي سندس رستي ۾ ايندي هئي.

 

 

پاناما ليڪس شو

هڪ اهڙو مُلڪ جنهن مٿان کربين رپين جو قرض هُجي، جنهن جا ايندڙ ڪئين نسل قرضن جي ڌٻڻ ۾ گهيريل هجن، اُن مُلڪ جا سياستدان، واپاري توڻي ڪامورا ٽيڪس بچائي، ٻاهرين مُلڪن ۾ آف شور ڪمپنيون جوڙي سيڙپڪاري ڪن، اِها انتهائي شرم جوڳي ڳالهه آهي. ايستائين جو مُلڪ جو وزيراعظم، جيڪو دنيا جي ٻين سرمائيدارن کي ته مُلڪ ۾اچي سيڙپ ڪرڻ جون صلاحون ڏئي ٿو، کين منتون ڪري ٿو، پر پنهنجي اولاد جو سرمايو مُلڪ ۾ آڻڻ لاءِ تيار ناهي. انهيءَ کي قول ۽ فعل ۾ تضاد نه چئجي ته ٻيو ڇا چئجي؟ هتي حيرت ته اُن عوام تي آهي، جيڪو هن مُلڪ اندر سڀ کان وڏو اسٽيڪ هولڊر آهي، اُهو هن مامري ۾ بلڪل ٻاهرين ٻني تي بيٺل آهي. عوام کي اِهو سوچڻ گهرجي ته آخر ڇا ڳالهه آهي جو جن ماڻهن کي اُهي ووٽ ڏئي ايوانن تائين پهچائين ٿا، اهي ته رات پيٽ ۾ امير کان امير تر ٿي وڃن ٿا، پر مُلڪ توڻي عوام ڏينهون ڏينهن پوئتي پوندو ٿو وڃي. جيستائين عوام ۾ اهڙي ڪنهن پُڇاڻي جو شعور نه ايندو، تيستائين لُٽڻ وارا مُلڪ کي ائين ئي لُٽيندا ۽ ڦريندا رهندا.

پاناما ليڪس واري مامري تي رُڳو حڪومت ئي نه پر مخالف ڌر به ٺڙڳ ٺڳيءَ کان ڪم وٺي رهي آهي. جيڪڏهن مخالف ڌر سنجيده هُجي ها ته هيستائين هر اُن شخص جو گهيراءُ ٿي چُڪو هُجي ها، جنهن جي نالي تي آف شور ڪمپنيون ظاهر ٿيون آهن ۽ اُهي عوامي ڪٽهڙي ۾ پنهنجين آف شور ڪمپنين جا تفصيل پڻ اچي ٻُڌائين ها ته ڪيتري سرمائي جي سيڙپ ڪئي وئي، اُهو سرمايو ڪهڙن ذريعن مان ڪمايو ويو ۽ اُن تي ٽيڪس ادا ڪيو ويو يا نه!؟ پر نه؛ مخالف ڌر وارن جيئن ئي پنهنجا هٿ ڍرا ڇڏيا ته حڪمرانن سياڻپ ڪري معاملي کي اينگهائڻ لاءِ جاچ ڪميشن يا ڪميٽين جو اعلان ڪري ڇڏيو. اِها ڳالهه ڪنهن کي معلوم ناهي ته اسان وٽ جاچ ڪميشن جي رپورٽ ورهين تائين عام آڏو ناهي اچي سگهندي. بلڪه اسان وٽ ڪميشنن جو اعلان ئي اِن نيت سان ڪيو ويندو آهي ته جيئن مامري کي ڪجهه وقت لاءِ ٿڌو ڪري سگهجي. هن ڀيري به اسان کي اهڙو ئي ڪجهه ڏسڻ ۾ اچي رهيو آهي. ڇا اِها حيرت جوڳي ڳالهه ناهي ته ڪالهه تائين جنهن وزيراعظم کي مُلڪ ۾ ترسڻ جو وقت نه هو، تنهن وقت کان اڳ نون منصوبن جو افتتاح ڪرڻ شروع ڪري ڏنو آهي ۽ انهن افتتاحي تقريبن دوران جيڪا ٻولي ڳالهائي وڃي ٿي، تنهن کي ڪنهن به ريت جمهوري نٿو ڪوٺي سگهجي.

ٿيڻ ته اِئين گهربو هو ته وزيراعظم مهڙ ۾ ئي سندس اولاد جي نالي تي ظاهر ٿيل آف شور ڪمپنين جي وضاحت پارليامينٽ يا عوام آڏو پيش ڪري ها ته ڪهڙيءَ ريت سندس اولاد اُهي آف شور ڪمپنيون جوڙيون، ڪٿان پئسو آيو، ڪٿي اُنهن جو ٽئڪس ادا ڪيو ويو ۽ آخر سندس اولاد کي آف شور ڪمپنين جو لاچار ڇو پيش آيو؟ جيڪڏهن اِئين ڪيو وڃي ها ته اڄ وڏي اعتماد سان سرڪار اُنهن چار سؤ ماڻهن جو احتساب ڪري پئي سگهي، جن جا نالا پاناما ليڪس جي ٻي قسط ۾ آيا آهن. پر جڏهن سرڪار سموريون صلاحيتون پنهنجا پانڌ بچائڻ تي لڳائيندي هُجي ته پوءِ اُن مان باقي ٻين جي احتساب جي ڪهڙي اُميد ڪري سگهجي ٿي؟ بهرحال پنجاهه کرب رپيا تمام وڏي رقم آهي، جيڪڏهن اُها ڪنهن به ريت مُلڪ ۾ آندي وڃي ٿي ۽ اُن مان هتي سيڙپڪاري ڪئي وڃي ٿي ته اُن جا پاڪستان جي صورتحال تي تمام بهتر اثر پوندا. تنهن ڪري سرڪار توڻي مخالف ڌر کي گڏجي ڪو قانون پاس ڪرڻ سميت اهڙو لائحه عمل جوڙڻ گهرجي، جنهن سان ٽئڪس بچائيندڙن جو احتساب به ممڪن ٿي سگهي ته ٻين مُلڪن ۾ رکيل رقم به واپس اچي سگهي.