تازيون خبرون

Daily Archives: May 12, 2016

وفاقي حڪومت جو پرڏيهه فرار ٿيلن کي انٽرپول ذريعي واپس آڻڻ جو اعلان

اسلام آباد(بيورو) وفاقي گھرو وزارت سمورن اشتهاري ڏوهارين جا نالا اي سي ايل ۾ وجھڻ جو فيصلو ڪري ورتوآهي. چوڌري نثار علي خان جو چوڻ آهي ته پرڏيهه فرار ٿيل ڏوهارين جي گرفتاري لاءِ انٽرپول سان رابطو ڪيو ويندو، بنگلاديش ۾ جماعت اسلامي اڳواڻن کي ڦاهين جي سخت مذمت ڪندي هُن چيو ته بنگلاديش ۾ جماعت اسلامي سان غير انساني سلوڪ ٿي رهيو آهي. جماعت اسلامي اڳواڻن کي پاڪستان سان وفادري جي سزا ڏني پئي وڃي. دنيا ڇو خاموش آهي. پنهنجي بيان ۾ وفاقي گھرو وزير چوڌري نثار جو چوڻ هو ته بنگلاديش ۾ عالمي قانون جي ڀڃڪڙي ٿي رهي آهي، وزير اغظم گڏيل مشاورت سان پاليسي ٺاهڻ جو حڪم ڏنو آهي. هن چيو ته ايف آءِ اي ۽ پوليس 18 سئو اشتهاري گرفتار ڪيا آهن، پرڏيهه ۾ موجود اشتهارين جي گرفتاري لاءِ انٽرپول سان رابطو ڪيو ويندو. سندس چوڻ هو ته اڳوڻن وزيراعظمن يوسف رضا گيلاني ۽ راجا پرويز اشرف جا نالا 3 سال اڳ اي سي ايل ۾ وڌا ويا هئا، اهي نالا نيب جي درخواست تي وڌا ويا.  گھرو وزارت موجب لنڊن ۾ مني لانڊرنگ ۽ ڊاڪٽر عمران فاروق قتل ڪيس ۾ اڳڀرائي ٿي رهي آهي، اسڪاٽ لينڊ يارڊ جي ٻه رڪني ٽيم هلندڙ هفتي پاڪستان ايندي.

 

اپوزيشن پاناما ليڪس معاملي تي وزير اعظم لاءِ 7 سوال تيار ڪري ڇڏيا

اسلام آباد (بيورو) اپوزيشن پاناما ليڪس معاملي تي وزير اعظم لاءِ ست سوال تيار ڪري ڇڏيا آهن، جن جا جواب جمعي جي ڏينهن ٿيندڙ اسيمبلي اجلاس ۾ طلب ڪيا ويندا، خابرو ادارن موجب اپوزيشن پارٽين جو گڏيل اجلاس اعتزاز احسن جي صدارت ۾ ٿيو، اجلاس کانپوءِ شاهه محمود قريشي سان گڏ ميڊيا سان ڳالهائيندي اعتزاز احسن جو چوڻ هو ته وزير اعظم جي سهولت لاءِ سئولا سوال تيار ڪيا آهن، جيڪي پهرين ئي ٻڌائي رهيا آهيون، جيئن جمعي تي وزير اعظم پارليمينٽ ۾ اچي ته سرپرائيز نه ٿي، اعتزاز احسن وزير اعظم کان پڇيو ته هو مي فيئر فليٽن بابت وضاحت ڏي، وزير اعظم پارليمينٽ ۾ 16 ۽ 16 اي، 17 ۽ 17 اي مي فيئر فليٽن بابت وضاحت ڏي ۽ ٻڌائي ته کيس، سندس گهر وارن ۽ ويجهن کي مي فيئر فليٽن ۾ ڪهڙي دلچسپي آهي، جڏهن ته ان فليٽن جي خريداري لاءِ ادا ڪيل پئسن تي ڪيترو ٽيڪس ادا ڪيو ويو، اهي ڪڏهن خريد ڪيا ويا ۽ خريداري جا ذريعا ڪهڙا آهن، سندس چوڻ هو ته جيڪڏهن وزير اعظم جي ملڪيت نه آهي ته پوءِ انهن بيانن جي وضاحت ڪري جيڪي مختلف وقتن ۾ ان فليٽن بابت ڇپيا، وزير اعظم ٻڌائي ته 10 اپريل 2000ع تي برطانيا جي اخبار گارڊين ۾ شائع ٿيندڙ ڪلثوم نواز جي بيان بابت ڇا چوندو، جنهن ۾ هُن فليٽن جي ملڪيت قبول ڪئي آهي، برطانوي اخبار انڊيپينڊنٽ ۾ 19 آڪٽوبر 1998ع ۾ شائع ٿيندڙ خبر هئي ته وزير اعظم جو خاندان نيسڪول ۽ نيسڪون جا مالڪ ٻڌايا ويا، ان خبر جي ڇا حيثيت آهي، گهرو معاملن واري وفاقي وزير چوڌري نثار بيان ڏنو هو ته وزير اعظم اهي فليٽ 1993ع ۾ خريد ڪيا ها، اعتزاز احسن سوال ڪيو ته وزير اعظم 1985ع کان 2016ع تائين پرڏيهه ۾ ٺاهيل ملڪيت، اڪائونٽن ۽ آف شور ڪمپنين بابت ٻڌائي ۽ ان لاءِ رقم ڪهڙي ذريعن کان حاصل ٿي ۽ ڪهڙي ريت پرڏيهه منتقل ڪي وئي، ان جي به وضاحت ڪري، پارليمينٽ اجلاس دوران وزير اعظم ۽ سندس گهر وارن جي جمع ڪرايل ٽيڪس جي تفصيل به ٻڌائي وڃي، سندس چوڻ هو ته وزير اعظم ان ست سوالن جي تياري ڪري اچي، جمعي جي ڏينهن ايندڙ وزير اعظم کي سرپرائيز نٿا ڏيڻ چاهيون.

 

بلاول انهن جو دوست بڻجي ويو آهي جن ان جي والده کي ڏک رسايو: پرويز رشيد

اسلام آباد (اين اين آءِ) اطلاعات ۽ نشريات جي وفاقي وزير پرويز رشيد چيو آهي ته بلاول انهن جو دوست بڻجي ويو آهي جن ان جي ماءُ کي ڏک رسايو ۽ هو جنهن جو دوست بڻيو آهي ان جيئي ٻولي استعمال ڪري رهيو آهي وزيراعظم نوازشريف پانامه پيپرز جي باري ۾ پارليامينٽ ۾ حقيقتون پيش ڪندو جڏهن ته ڪيترائي ماڻهو سياسي فائدا حاصل ڪرڻ لاءِ بيهوده طريقا استعمال ڪري رهيا آهن هن چيو ته بلاول ڀٽو زرداري سياسي طور تي نابالغ ۽ ملڪ جي سياسي تاريخ کان اڻڄاڻ آهي پرويز رشيد چيو ته قومي احتساب بيورو هڪ خومختيار ادارو آهي ڪوبه شخص ان جي ڪارروائي ۾ مداخلت نٿو ڪري سگهي ميڊيا سان ڳالهائيندي پرويز رشيد چيو ته بلاول ڀٽو زرداري پاڪستان جي سياست پاڪستان جي تاريخ کان اڻ واقف آهي ايتري حد تائين جو سندس والده محترمه ۽ ان جو نانو به تاريخ کان اڻواقف هئا ان لاءِ ان جي ڳالهين کي وڌيڪ اهميت نٿا ڏيون. هن چيو ۽ ان جي زبان استعمال ڪري رهيو آهي ان لاءِ بلاول جي ڳالهه هڪ ڪن کان ٻڌي ٻئي ڪن کان ڪڍي ڇڏيندا آهيون. هن چيو ته وزيراعظم نوازشريف جو نالو پانامه پيپرز ۾ نه آهي پر هن پاڻ کي احتساب لاءِ پيش ڪيو آهي.

 

هڪ ڪن کان ٻڌي ٻئي مان ڪڍڻ جي عادي حڪمرانن ملڪ کي بحرانن ۾ وجهي ڇڏيو : چانڊيو

ڪراچي (اسٽاف رپورٽر)  سنڌ جي وڏي وزير جي اطلاعات واري مشير مولانا بخش چانڊيو اطلاعات واري وفاقي وزير پرويز رشيد جي بيان تي رد عمل جو اظهار ڪندي چيو آهي ته هڪ ڪن کان  ٻڌي ٻئي ڪن مان ڪڍي ڇڏڻ جي عادت حڪمرانن ملڪ کي بحرانن ۾ وجهي ڇڏيو آهي، اربع ڏينهن جاري ڪيل بيان ۾ هن چيو ته  شهيد بينطير ڀٽو کي سڀ کان وڌيڪ اذيتون نواز شريف جي دور ۾ ڏنيون ويون، شهيد بينظير ڀٽو تي ڪوڙا ڪيس ٺاهيا ويا  ۽ هن کي سموري ملڪ جي عدالتن ۾ چڪر لڳارايا هي اهو نواز شريف هيو جنهن آصف علي زرداري کي سينيٽر بڻجڻ جي باوجود سينيٽر جو حلف کڻڻ کان روڪي رکيو، ۽ آصف علي زرداري نواز شريف جي ٺاهيل ڪيسن ۾ ڊگهو عرصو جيل ڪاٽيو، هن چيو ته ججن کي ٽيلفون ڪري ڪيس کي ڊگهو ڪرايو ، پ پ خلاف سڀ کان وڌيڪ انتقامي ڪارروايون نواز شريف جي دورن ۾ ٿيون ۽ اڄ به پ پ خلاف سياسي انتقام جو سلسلو جاري آهي، ٻن اڳوڻن وزيراعظمن جو نالا ئي سي ايل ۾ شامل ڪرڻ ان سلسلي جي ڪڙي آهي.

 

نواز شريف جو نالو پانامه ليڪس ۾ ناهي، حسن نواز جي 99 19۽ 2016 ۾ ڏنل بيانن ۾ ڪو تضاد نه آهي: طلال چوڌري

اسلام آباد (بيورو) پاڪستان مسلم ليگ ن جي اڳواڻ طلال چوڌري سينيٽر اعتزاز احسن پاران وزير اعظم لاءِ جاري ڪيل سوال نامي جا جواب ڏئي ڇڏيا آهن، پريس ڪانفرنس کي خطاب ڪندي طلال چوڌري جو چوڻ هو ته وزير اعظم جي پُٽ حسين نواز خانگي ٽي وي نيوز چينل جي پروگرام ۾ واضح چيو ته مي فيئر فليٽ سعودي عرب ۾ مل وڪرڻ مان حاصل ٿيندڙ رقم سان 2006ع ۾ خريد ڪيا، جيڪي سندن ملڪ جي قانون موجب خريد ڪيا ويا، سندس چوڻ هو ته حسن نواز 1999ع ۾ جيڪو بيان ڏنو هو ان موجب اهي فليٽ رينٽ تي هئا ۽ ان جي 16 سالن کانپوءِ 2016ع ۾ حسين نواز جيڪو انٽرويو ڏنو آهي، ان موجب اهي فليٽ 2006ع ۾ خريد ڪيا ويا، انهن ٻنهي بيانن ۾ ڪوبه تضاد نه آهي، طلال چوڌري چيو ته نواز شريف جو نالو ڪيس ۾ آهي ئي نه، وزير اعظم جي نالي تي ڪابه آف شور ڪمپني نه آهي، جيڪا ڪمپني سندس پُٽن جي نالي آهي ان کي اهي پهرين ئي ظاهر ڪري چُڪا آهن، سندس چوڻ هو ته نواز شريف جي ڪمائي ۽ سندس اثاثا سڀني جي سامهون آهن، جيڪي ملڪي قانون موجب آهن، سڄي ملڪيت ۽ ڪاروبار جا ٽيڪس قانون موجب ادا ڪيا ويا آهن.

 

قومي اسيمبلي جو اجلاس، بنگلاديش ۾ جماعت اسلامي جي امير کي ڦاسي ڏيڻ خلاف مذمتي قرارداد منظور

اسلام آباد (اين اين آءِ) قومي اسيمبلي بنگلاديش ۾ جماعت اسلامي جي اڳوڻي امير مولانا مطيع الرحمان نظامي کي ڦاسي ڏيڻ خلاف متفقه طور تي مذمت واري قرارداد منظور ڪئي ويئي جڏهن ته ايصال ثواب لاءِ دعا به ڪئي ويئي. اسپيڪر جي چوڻ تي صاحبزاده طارق الله، مطيع الرحمان جي ايصال ثواب لاءِ دعا ڪرائي تنهن کان پوءِ جماعت اسلامي جي پارلياماني معاملن واري ليڊر طارق الله چيو ته بنگلاديش ۾ 6 ڄڻن کي شهيد ڪيو ويو آهي ۽ اهو ظلم آهي اسان سڀني کي ان جي مذمت ڪرڻ گهرجي هن چيو ته 1971 ۾ جيڪو ڪجهه ٿيو پوري قوم ان کان آگاهه آهي جن ماڻهن پاڪستان سان محبت جي ڪري متحده پاڪستان جي حمايت ڪئي انهن سان اهڙو ظلم ڪيو پيو وڃي هن چيو ته 45 سالن کان پوءِ اهم اڳواڻن سان اها ناانصافي آهي ۽ ان مسئلي تي  گڏيل طور قرارداد منظور ڪئي وڃي. هن چيو ته بنگلاديش ۾ پاڪستان جو ساٿ ڏيندڙ هزارين ماڻهن هن وقت به جيلن ۾ آهن اسان کي بنگلاديش جي سفير کي پرڏيهي آفيس طلب ڪري احتجاج ڪرڻ گهرجي. اعجاز جکراڻي چيو ته بنگلاديش ۾ وڏو افسوسناڪ واقعو ٿيو آهي شائسته پرويز ملڪ چيو ته 1974 ۾ پاڪستان ۽ بنگلاديش وچ ۾ هڪ معاهدو ٿيو هو ته پاڪستان جي تقسيم جي حوالي سان معاملن ۾ شريڪ ڪنهن کي به سزا نه ڏني ويندي بنگلاديش ان معاهدي جي خلاف ورزي ڪئي آهي مخدوم شاهه محمود قريشي چيو ته بنگلاديش 1974 جي معاهدي جي خلاف ورزي ڪئي آهي ۽ اهو ظلم آهي ان حوالي سان مذمتي قرارداد منظور ٿيڻ گهرجي جنهن کان پوءِ قومي اسيمبلي بنگلاديش ۾ جماعت اسلامي جي اڳوڻي امير مولانا مطيع الرحمان نظامي کي ڦاسي ڏيڻ خلاف مذمتي قرارداد متفقه طور تي منظور ڪري ورتي. جڏهن ته اها قرارداد دفاع واري وفاقي وزير رانا تجوير حسين پيش ڪئي جنهن ۾ چيو ويو آهي ته قومي اسيمبلي جو ايوان بزرگ بنگلاديشي سياسي اڳوڻي وزير مولانا معيع الرحمان نظامي کي بنگلاديش حڪومت پاران ڦاسي ڏيڻ تي سخت ڳڻتي جو اظهار ڪيون ٿا. ان کان اڳ محمود خان اچڪزئي تجويز ڏني ته اڳوڻي پرڏيهي وزير شاهه محمود قريشي ۽ ٻين سينيئر پارليمينٽرين جو وفد بنگلاديش روانو ڪيو وڃي اسپيڪر چيو ته پرڏيهي کاتو ۽ سينيئر پارليمينٽرين وچ ۾ ميٽنگ جو بندوبست ڪيو ويندو جنهن ۾ محمود خان اچڪزئي ۽ شائسته پرويز ملڪ به شامل هوندا جڏهن ته صرف قرارداد منظور سان ڪوبه فائدو نه ٿيندو.

 

پيپلز پارٽي جي سٺي ڏينهن جو دور شروع ٿي چُڪو آهي: بلاول ڀٽو زرداري

لاهور (م.ڊ) پاڪستان پيپلز پارٽي جي سربراهه بلاول ڀٽو زرداري چيو آهي ته پيپلز پارٽي جي سٺي ڏينهن جو دور شروع ٿي چُڪو آهي، پاڪستان ۽ پاڪستانين لاءِ اڄ سٺو ڏينهن آهي، خابرو ادارن موجب بلاول ڀٽو زرداري علي حيدر گيلاني سان ملاقات ڪئي، ان موقعي تي سندس چوڻ هو ته اڄ پنهنجي ڀاءُ  علي حيدر گيلاني سان ملڻ لاهور آيو آهيان، هن سال ٻه خوش خبريون مليون آهن، بلاول ڀٽو زرداري چيو ته وزير اعظم نواز شريف قومي اسيمبلي ۾ اچي رهيو آهي ۽ اپوزيشن جي سوالن جا جواب ڏيندو.

 

اڳوڻي وزيراعظم يوسف رضا گيلاني جو مغوي پٽ گهر پهچي ويو، شاندار استقبال، گهر ڀاتي خوشي مان لڙڪ نه روڪي سگهيا

لاهور(اي پي پي) اڳوڻي وزيراعظم سيد يوسف رضا گيلاني جو مغوي پٽ علي حيدر گيلاني 3 سال افغانستان ۾ يرغمال رهڻ بعد اربع تي پنهنجي گهر پهچي ويو. وزيراعظم محمد نواز شريف علي حيدر گيلاني کي ڏيهه واپس آڻڻ لاءِ خصوصي جهاز ڪابل موڪليو هو. گيلاني ڪٽنب جي ڀاتين علي حيدر گيلاني جو ايئر پورٽ تي استقبال ڪيو. ان موقعي تي ڪٽنب جا ڀاتي خوشي وچان لڙڪ نه روڪي سگهيا. وزيراعظم محمد نواز شريف ۽ سرحد پار جي ڪيترن ئي سياسي اڳواڻن علي حيدر گيلاني جي بازيابي ۽ حفاظت سان گهر پهچڻ تي گيلاني ڪٽنب کي مبارڪون پيش ڪيون آهن. علي حيدر گيلاني کي 9 مئي 2013ع تي سندس اباڻي شهر ملتان مان اليڪشن مهم ۾ شرڪت دوران اغوا ڪيو ويو هو ۽ کيس سومر 10مئي تي افغانستان جي پڪتيا صوبي ۾ القاعده سان لاڳاپيل گروپ خلاف آپريشن دوان بازياب ڪرايو ويو. پرڏيهي آفيس مطابق علي حيدر گيلاني کي ڪابل ۾ واقع افغانستان جي دفاع واري وزارت ۾ افغان اختيارين طرفان پاڪستان جي سفير ابرار حسين جي حوالي ڪيو ويو جنهن بعد کيس لاهور روانگي لاءِ ايئر پورٽ تان هيلي ڪاپٽر ذريعي روانو ڪيو ويو. وزيراعظم محمد نواز شريف طرفان موڪليل خصوصي جهاز اڳ ۾ ئي صبح جو 9 وڳي ڪابل لاءِ روانو ٿي چڪو هو جنهن ۾ علي حيدر گيلاني جو ڀاءُ ۽ پرڏيهي معاملن واري وزارت جو پروٽوڪول آفيسر ويٺل هئا. ڪابل ۾ پاڪستان جو سفير ابرار حسين پرڏيهي صلاحڪار سرتاج عزيز کي علي حيدر گيلاني جي بازيابي لاءِ امريڪي ۽ افغان فوج طرفان شروع ڪيل آپريشن بابت آگاهه ڪندو رهيو. پرڏيهي آفيس مطابق پاڪستاني قيادت افغانستان نيشنل آرمي ۽ نيٽو فورسز طرفان علي حيدر گيلاني جي حفاظت سان بازيابي ۽ کيس فوري طور تي پاڪستان اماڻڻ لاءِ ڪيل ڪوششن جي دل جي گهراين سان واکاڻ ڪئي آهي. پرڏيهي آفيس مطابق پاڪستان اميدظاهر ڪئي آهي ته ٽئي ملڪ خطي مان دهشتگردي جي خاتمي لاءِ گڏجي ڪم ڪري سگهن ٿا. دهشتگردن کي حڪومتن کي يرغمال بڻائڻ جي اجازت نه ڏني ويندي.

 

سنگين غداري ڪيس: پرويز مشرف اشتهاري قرار، اثاثن جا تفصيل طلب

اسلام آباد(بيورو) خصوصي عدالت سنگين غداري ڪيس ۾ اڳوڻي صدر پرويز مشرف کي اشتهاري قرار ڏيندي سندس جائيداد جي تفصيل گهري ورتي آهي. ميڊيا رپورٽ موجب سنگين غداري ڪيس جي ٻڌڻي دوران پرويز مشرف جي ضمانتي راشد قريشي، جوائنٽ گهرو سيڪريٽري مبارڪ، گهرو سيڪريٽري عارف خان، ڊائريڪٽر ايف آءِ اي مقصود الحسن خصوصي عدالت جي روبرو پيش ٿيا. ٻڌڻي دوران عدالت جي پڇاڻي تي ڊائريڪٽر ايف آءِ اي ٻڌايو ته ايف آءِ اي جي ٽيم مشرف جي اسلام آباد ۽ ڪراچي واري گهر به وئي هئي تنهن هوندي هو ٻه سال اڳ ڪراچي آيو جنهن کان پوءِ 18 مارچ تي هو اُتان هليو ويو. پرويز مشرف پرڏيهه وڃي چڪو آهي ۽ ان ڪري عدالت ۾ پيش ناهي ٿي سگهيو. عدالت جي وري وري طلب ڪرڻ باوجود پرويز مشرف جي پيش نه ٿيڻ تي کيس اشتهاري قرار ڏيندي هڪ اردو ۽ هڪ انگريزي اخبار ۾ اشتهار شايع ڪرائڻ جو حڪم ڏنو ۽ چيو ته اشتهار عدالت جي نوٽس بورڊ ۽ پرويز مشرف جي گهرن جي ٻاهران لڳايا وڃن جڏهن ته عدالت جوابدار جي اثاثن جي تفصيل به گهري ورتي آهي.

 

ڪرپشن ملڪ کي اُڏوهي جيان کائي رهي آهي، بادشاهه جو احتساب ڪنداسين: عمران خان

بنون (م.ڊ) پاڪستان تحريڪ انصاف جي سربراهه عمران خان چيو آهي ته ڪرپشن هن ملڪ کي اُڏوهي جيان کائي رهي آهي، ڪرپشن جو مقابلو ڪري ڪرپشن جي بادشاهه نواز شريف جو احتساب ڪنداسين، جلسي کي خطاب ڪندي عمران خان جو چوڻ  هو ته ڪجهه ڏينهن اڳ نواز شريف انهي جڳهه تي جلسو ڪري رهيو هو، مولانا فضل الرحمان ۽ اڪرم دراني للڪاريو ته بنون اچي ويس، الله پاڪستان کي تقدير مٽائڻ جو موقعو ڏنو آهي، جيڪڏهن اسان سچ ۽ حق تي بيهه وڃون ته پوءِ نئون پاڪستان ٺاهي سگهنداسين، نواز شريف هاڻ وقت اچي ويو آهي ته قوم سان سچ ڳالهايو، نواز شريف اوهان جا ڪيترا اثاثا آهن ۽ ڪٿي آهن، اسان اوهان کان سچ پڇُڻ چاهيون ٿا، سندس چوڻ هو ته پي آءِ اي دنيا جي ٽاپ ايئرلائين هئي، پاڪستان جي ڊگري سڄي دنيا ۾ مڃي ويندي هئي، پاناما ليڪس معاملي تي نواز شريف قوم کي جواب ڏي، قوم غريب ۽ نواز شريف امير ٿي ويو آهي، 8 سالن ۾ نواز شريف 3 فيڪٽرين مان 28 فيڪٽريون ٺاهي ڇڏيو، توهان اقتدار ۾ ڪرپشن ۽ ڪاروبار وڌائڻ آيا آهيو، نواز شريف ٽيڪس ناهي ڏيندو مني لانڊرنگ ڪندو آهي، مٿان کان احتساب شروع ٿيندو.