تازيون خبرون

Daily Archives: May 11, 2016

سياسي ۽ عسڪري قيادت جي ملاقات، ملڪي سلامتي خاطر پاناماليڪس معاملو جلد حل ڪيو وڃي: آرمي چيف

اسلام آباد (بيورو) وزيراعظم نواز شريف سان پاڪ فوج جي سربراهه جنرل راحيل شريف اهم ملاقات ڪئي آهي،جنهن ۾ ڪومبنگ آپريشن ۽ پاناماليڪس سوڌو اهم معاملن تي خيالن جي ڏي وٺ ڪئي وئي، ذريعن مطابق وزيراعظم هائوس ۾ ٻنهي وڏن ۾ ٿيل ملاقات دوران ملڪي سلامتي، آپريشن ضرب عضب ۽ ٻيا معاملا پڻ غور هيٺ آيا، آرمي چيف جنرل راحيل شريف ملاقات دوران وزيراعظم نواز شريف سان پاناماليڪس جي اثرن جي حوالي سان به ڳالهه ٻولهه ڪئي، آرمي چيف جو چوڻ هو ته ملڪي سلامتي لاءِ ضروري آهي ته پاناماليڪس جو مسئلو جلد حل ڪيو وڃي، ڇاڪاڻ ته ان جا اثر ملڪي سلامتي ۽ سيڪيورٽي چيلينجز تي پئجي رهيا آهن.

وزيراعظم ايوان آڏو جوابداه آهي، رڳو حاضري ڪافي ناهي مخالف ڌر کي مطمئن به ڪرڻو پوندو: مخالف ڌر

اسلام آباد (بيورو)  مخالف ڌر جي پارٽين پاناماليڪس جي معاملي تي قومي اسيمبلي ۾ وزيراعظم کان وضاحت وٺڻ لاءِ سوالنامو تيار ڪرڻ جو فيصلو ڪيو آهي، ذريعن مطابق حڪومت طرفان وزيراعظم جي جمعي تي ايوان ۾ اچڻ واري اعلان کانپوءِ مخالف ڌر جي پارٽين سوالنامو تيار ڪرڻ جو فيصلو ڪيو آهي،گڏيل مخالف ڌر جو چوڻ آهي ته وزيراعظم ايوان آڏو جوابداه آهي، تنهن ڪري پاناماليڪس جي معاملي تي رڳو ايوان ۾ حاضري ڪافي ناهي پر کيس مخالف ڌر جي پارٽين کي مطمئن به ڪرڻو پوندو، قومي اسيمبلي ۾ مخالف ڌر جي اڳواڻ سيد خورشيد احمد شاهه چيو آهي ته اسان وزيراعظم کي موقعو ڏنو آهي ته هو ايوان ۾ اچي ۽ پاناماپيپرز ۾ پنهنجي ڪٽنب تي لڳايل الزامن جي وضاحت ڪري، مخالف ڌر ساڻس جنگ نه پر جواب چاهي ٿي،پارليامينٽ هائوس ٻاهران ميڊيا سان ڳالهائيندي خورشيد شاهه چيو ته هڪ ڀيرو وري پاناماليڪس ۾ 250 پاڪستانين جا نالا آيا اهن،وزيراعظم اڪيلو الزامن جي گهيري ۾ ناهي، هو ايوان ۾ اچي پاناماليڪس سوڌو 1985ع کان وٺي هن مهل تائين پنهنجي ملڪيت جا تفصيل ٻڌائي، هن چيو ته سڀني مسئلن جو حل پارليامينٽ ۾ موجود آهي،مخالف ڌر پارليامينٽ ذريعي پاناماليڪس معاملي جو حل چاهي ٿي، خورشيد شاهه اعلان ڪيو ته وزيراعظم جي قومي اسيمبلي ۾ اچڻ تائين مخالف ڌر بائڪاٽ جاري رکندي، هاڻ جڏهن نواز شريف ايوان ۾ ايندو ته پوءِ ئي مخالف ڌر جون پارٽيون به اجلاس ۾ شامل ٿينديون، ٻئي طرف ان سلسلي ۾ پارليامينٽ هائوس ٻاهران ميڊيا سان ڳالهائيندي تحريڪ انصاف جي اڳواڻ جهانگير ترين چيو ته اپوزيشن پارٽين فيصلو ڪيو آهي ته وزيراعظم جي رڳو ايوان ۾ حاضري مان مطمئن نه ٿبو پر وزيراعظم کان سوالن جي صورت ۾  پاناماليڪس جي معاملي تي وضاحت گهرڻ جو فيصلو ڪيو ويو آهي، جيڪي گڏيل صلاح مشوري سان سڀاڻي تائين تيار ڪيا ويندا، هن چيو ته سوالنامي ۾ وزيراعظم کان پڇيو ويندو ته سندس ڪٽنب طرفان پاناما منتقل ڪيل رقم تي ڪيتري ٽيڪس ڀري وئي ۽ پاناما ۾ ڪيتري سيڙپڪاري ڪئي وئي؟ پئسا ڪٿان آيا ۽ ڪيئن اماڻيا ويا؟ذريعن مطابق اپوزيشن ليڊر خورشيد شاهه سڀاڻي اسلام آباد ۾ موجود نه هوندو، جنهن ڪري تحريڪ انصاف جو سينيئر اڳواڻ مخدوم شاهه محمود قريشي اهو سوالنامو پيش ڪندو.

 

7224 ماڻهن کي ماريندڙ  848 ٽارگيٽ ڪلر گرفتار ڪيا آهن: رينجرز رپورٽ

ڪراچي (اين اين آءِ) دهشتگردي ٽوڙ جي خاص عدالت ڏيڍ سئو کان وڌيڪ ماڻهن جي ٽارگيٽ ڪلنگ ۾ ملوث هڪ سياسي جماعت جي 3 جوابدارن کي 90 ڏينهن رينجرز حوالي ڪيو ويو آهي، پاڪستان رينجرز گذريل ڏينهن جوابدار فراز قريشي، آصف ۽ جان کي دهشتگردي ٽوڙ جي خاص عدالت ۾ پيش ڪيو، رينجرز جي وڪيل عدالت کي ٻڌايو ته جوابدارن جو تعلق ايم ڪيو ايم جي عسڪري ونگ سان آهي، جاچ دوران جوابدار فراز قريشي 120، آصف 13 ۽ جان محمد 27 ڄڻڻ کي قتل ڪرڻ جو اعتراف ڪيو آهي جنهن سبب جوابدارن کان وڌيڪ جاچ ڪرڻي آهي جنهن بعد عدالت جوابدارن کي 90 ڏينهن لاءِ رينجرز حوالي ڪري ڇڏيو.

 

وزيراعظم نواز شريف جي نه اچڻ تي مخالف ڌر پارٽين ٻئي ڏينهن به قومي اسيمبلي جو بائڪاٽ ڪري ڇڏيو

اسلام آباد (بيورو)  وزيراعظم نواز شريف پاران قومي اسيمبلي جي اجلاس ۾ نه اچڻ تي مخالف ڌر جي پارٽين ٻئي ڏينهن به اجلاس مان واڪ آئوٽ ڪيو، قومي اسيمبلي جو اجلاس اسپيڪر اياز صادق جي صدارت هيٺ شروع ٿيو ته مخالف ڌر جي پارٽين پاران وزيراعظم نواز شريف جي اچڻ جو مطالبو ڪيو ويو، جنهن تي سڌسماءَ واري وفاقي وزير پرويز رشيد چيو ته وزيراعظم جمعي تي ايوان ۾ ايندو ۽ مخالف ڌر جي اٿاريل سوالن جا جواب ڏيندو، پرويز رشيد جي اهڙي خاطري تي مخالف ڌر جي اڳواڻ سيد خورشيد شاهه چيو ته اڄ به اڍائي سو پاڪستانين جا نالا پاناماليڪس ۾ آيا آهن،هن چيو ته وزيراعظم کي ايوان تي اعتماد هجڻ گهرجي، کيس ڀڄڻ وارو رستو نه وٺڻ گهرجي، سندس چوڻ هو ته سڌسماءَ واري وزير سٺي ڳالهه ٻڌائي آهي، اسان به جمعي تي ئي اينداسين ۽ اڄ سينيٽ ۾ به اها ئي حڪمت عملي اختيار ڪئي ويندي، مخالف ڌر جي اڳواڻ جي بيان کانپوءِ اپوزيشن ۾ شامل پارٽين جا ميمبر قومي اسيمبلي جي اجلاس جو بائڪاٽ ڪري واڪ آئوٽ ڪري ويا.

سنڌ حڪومت ايس سي يو جي سي جي ملازمن جي پگهارن ۽ پينشن لاءِ 381 ملين روپين جي منظوري ڏئي ڇڏي

ڪراچي (اسٽاف رپورٽر) صوبي  ۾ پيشنرن جي حالت کي ڏسندي سنڌ جي وڏي وزير سيد قائم علي شاهه سنڌ ڪائونسل يونيفائيڊ گريڊس سروس (ايس سي يو جي سي) جي ملازمن جي پگهارن ۽ پينشن لاءِ 381 ملين رپين جي منظوري ڏئي ڇڏي آهي. اهو فيصلو اڄ هن وزير اعليٰ هائوس ۾ صوبائي بلديات کاتي جي رٿيل اجلاس جي صدارت ڪندي ڪيو. اجلاس ۾ ناڻي ۽ توانائيءَ وارو صوبائي وزير سيد مراد علي شاهه، بلديات وارو وزير ڄام خان شورو، وقتي چيف سيڪريٽري رضوان ميمڻ، وڏي وزير جو پرنسپل سيڪريٽري علم الدين بلو، سيڪريٽري لوڪل گورنمينٽ نور محمد لغاري ۽ ناڻي وارو سيڪريٽري سهيل راجپوت شريڪ هئا. بلديات واري صوبائي وزير ڄام خان شورو چيو ته وڏي وزير سيد قائم علي شاهه 2014ع ۾ سنڌ لوڪل گورنمينٽ بورڊ (ايس ايل جي بي) جي سالياني شيئرز ۾ اضافو ڪيو ۽ اها رقم 140 ملين رپين مان وڌائي 250 ملين ساليانو ڪري ڇڏي، جيڪا بورڊ جي مالي خرچ پورا ڪرڻ لاءِ ڪافي نه آهي. هن چيو ته نومبر 2013ع ۽ ان کان پوءِ رٽائرڊ ٿيندڙ پينشنرز اڃا تائين پنهنجي گريجوئيٽيءَ وٺڻ لاءِ انتظار ڪري رهيا آهن ۽ انهن مسئلن سبب ايس ايل جي بي هڪ هزار کان وڌيڪ پينشنرز کي موجوده ريٽس ۽ جولاءِ 2014ع جي 10 سيڪڙو واري اضافي جي حساب سان پينشن جاري ناهي ڪري سگهيو. صوبائي وزير وڌيڪ ٻڌايو ته پينشنرز جو انگ هاڻي ٻارنهن سئو تائين ٿي ويو آهي جنهن ۾ فيلمي پينشن 50 سيڪڙو کان وڌي 70 سيڪڙو، ميڊيڪل الائونس 2010ع واري 20 سيڪڙو کان وڌي 25 سيڪڙو، رهائشي الائونس 7 سيڪڙو ۽ اهڙي قسم جي ٻين الائونسن ۾ واڌ جي ڪري بورڊ جي مالي خرچ ۾ وڏو اضافو ٿيو آهي. وڏي وزير چيو ته اها وڏي ڏکوئيندڙ ڳالهه آهي ته ايس ايل جي بي پگهارون ۽ پينشن ادا نه ٿو ڪري سگهي. پينشنرز کي انهن جو پگهارون ۽ ٻيا فائدا ضرور ڏنا وڃن ۽ مون لاءِ اها ڳالهه اچرج جوڳي آهي ته انهن مان ڪيترائي پينشنر پنهنجي گريجوئيٽي حاصل ڪرڻ جا منتظر آهن. سيڪٽري بلديات اجلاس کي ٻڌايو ته هن بورڊ جي سمورن خرچن بابت ڪاٿو لڳايو آهي ۽ 3067 رٽائرڊ ملازمن جي پينشن جا 305 ملين رپيا ٿين ٿا، جڏهن ته ان کانسواءِ بورڊ جا ٻيا خرچ پورا ڪرڻ ناڪافي آهن. ناڻي واري سيڪريٽري سهيل راجپوت ٻڌايو ته ساليانو 312 ملين رپيا بورڊ کي پينشن جي مد ۾ ڏنا ويندا آهن جڏهن ته 69.6 ملين رپيا بورڊ جي ٻين خرچن لاءِ ڪافي آهن. ان موقعي تي ناڻي واري وزير سيد مراد علي شاهه چيو ته هن “ايس ايل جي بي” جي خرچن ۽ مطالبن جو جائزو ورتو آهي ۽ پينشن ۽ مينٽيننس جو ڪل خرچ 381.8 ملين رپيا ساليانو ٿئي ٿو. هن چيو ته 15-2014ع ۽ 2016ع ۾ پينشن ۾ واڌ ۽ گريجوئيٽي جي مد ۾ 132 ملين رپين جي ادائگيون ضروري تصديق بعد جاري ڪيون وينديون. وڏي وزير پينشنرن جي حالت کي ڏسندي 381.8 ملين رپيا جاري ڪرڻ جي منظوري ڏئي ڇڏي ۽ بلديات کاتي کي هدايت ڪئي ته پينشنرن کي صحيح طور تي ادائگي کي يقيني بڻايو وڃي.

 

اڳوڻي وزيراعظم يوسف رضا گيلاني جو اغوا ٿي ويل پٽ علي حيدر گيلاني افغانستان مان بازياب

اسلام آباد(اي پي پي) پرڏيهي کاتي جي ترجمان اڳوڻي وزيراعظم سيد يوسف رضا گيلاني جي اغوا ٿيل پٽ علي حيدر گيلاني جي افغانستان جي علائقي غزني ۾ آمريڪا ۽ افغان فورسز جي گڏيل ڪارروائي دوران بازيابي جي تصديق ڪري ڇڏي آهي. پرڏيهي کاتي طرفان جاري ڪيل بيان ۾ چيو ويو آهي ته افغان نيشنل سيڪيورٽي ايڊوائزر محمد حنيف اتمار پرڏيهي معاملن بابت وزيراعظم جي صلاحڪار سرتاج عزيز کي ٽيليفون ڪري علي حيدر گيلاني جي بازيابي جو اطلاع ڏنو. بيان ۾ چيو ويو آهي ته آمريڪا ۽ افغان سيڪيورٽي فورسز جي گڏيل آپريشن دوران اڳوڻي وزيراعظم سيد يوسف رضاگيلاني جي پٽ سيد علي حيدر گيلاني کي بازياب ڪرايو ويو آهي. بيان ۾ چيو ويو آهي ته علي حيدر گيلاني جي پاڪستان منتقلي جي ڪارروائي سندس طبي معائني بعد فوري طور تي ڪئي ويندي.

 

آفتاب احمد ڪيس ۾ 4 رينجرز اهلڪار گرفتار

ڪراچي (اسٽاف رپورٽر) ايم ڪيو ايم اڳواڻ ڊاڪٽر فاروق ستار جي ڪو آرڊينيٽر آفتاب احمد قتل ڪيس ۾ مبينا تشدد ۾ ملوث رينجرز اهلڪارن کي گرفتار ڪيو ويو آهي. ميڊيا رپورٽن ۾ رينجرز ذريعن جي حوالي سان ڄاڻايو ويو آهي ته آفتاب احمد قتل ڪيس ۾ سنڌ رينجرز جا چار اهلڪار گرفتار ڪيا ويا آهن. مبينا تشدد ۾ ملوث اهلڪارن کي رينجرز گرفتار ڪيو. چئني اهلڪارن جي گرفتاري جاچ مڪمل ٿيڻ کانپوءِ ڪئي وئي آهي. رينجرز اختيارين جو چوڻ آهي ته واقعي ۾ قاعدن ۽ ضابطن جي ڀڃڪڙي سامهون آئي آهي واقعو افسوس جوڳو آهي، جنهن جي وڌيڪ جاچ ٿيندي. رينجرز ذريعن جو چوڻ آهي ته ضرورت پوڻ تي رينجرز اهلڪارن جو وڌيڪ رمانڊ به ورتو ويندو.

 

ن ليگ جي حڪومت آخري پساهن ۾ آهي، پاناما ليڪس معاملي تي ميان صاحب کي جواب ڏيڻو پوندو: بلاول ڀٽو زرداري

باغ  (اين اين آءِ) پاڪستان پيپلز پارٽي جي چيئرمين بلاول ڀٽو زرداري چيو آهي ته مسلم ليگ ن جي حڪومت آخري پساهن ۾ آهي، ميان صاحب کي پاناما ليڪس معاملي تي جواب ڏيڻو پوندو، پنجاب جو وڏو وزير، هائوس جي ڇوٽو گينگ جو خاتمو ڪري ان جي لٽ مار کي ختم ڪرڻُو پوندو، سوڊان ۾ ريفرنڊم ٿي سگهي ٿو ته پوءِ ڪشمير ۾ ڇو نٿو ٿي سگهي، علي حيدر گيلاني کي آزادي ملي آهي، انشاالله ڪشميرين کي به آزادي ڏيارينداسين، ڀارتي وزيراعظم نريندر مودي جي هٿن تي گجرات جي مسلمانن جو خون آهي، مودي کي دنيا جا ڪيترائي ملڪ دهشتگرد سمجهن ٿا ۽ کيس ويزا به نٿا ڏين، هن چيو ته ميان صاحب مودي کي دوست بڻايو، ميان صاحب پرڏيهي پاليسي جو حليو به بگاڙي ڇڏيو آهي، بلوچستان ۾ را جا ايجنٽ گرفتار ٿين ٿا ته نواز شريف ڪو به ايڪشن نٿو وٺي، عوام جي حمايت حاصل رهي ته عوام کي حڪمرانن مان نجات ڏيارينداسين، جلسي عام کي خطاب ڪندي بلاول ڀٽو چيو ته پنجاب حڪومت جي گڊ گورننس جا پول ڇوٽو گينگ کولي ڇڏيا آهن، پنجاب جي وڏي وزير هائوس جي ڇوٽو گينگ جو خاتمو ڪري ۽ سندن لٽ مار کي ختم ڪرڻو پوندو، تخت رائيونڊ جي نالي وارين پاليسين سبب پاڪستان ۾ غربت وڌي رهي آهي، ميان صاحب منهنجو مطالبو مڃيو ۽ گهر هلايا وڃو، هن چيو ته سرڪس جي شير جي راند ختم ڪندس ڇاڪاڻ ته مان ان جو پٽ آهيان جنهن جي نالي چيو وڃي ٿو ته هو شيرن جو شڪاري زرداري، پاناما ليڪس تي اوهان جي ڪيمپ مان ايندڙ مختلف بيان ۽ هڪ کانپوءِ هڪ ڪوڙ اوهان جي ڪيس کي ڪمزور ڪري اوهان کي مشڪلات ۾ وجهي ڇڏيو آهي، اوهان عوام اڳيان جوابده آهي پر اوهان نه اسيمبلي ۾ اچو ٿا نه ئي وري اپوزيشن کي جواب ڏيو ٿا، نواز شريف منهنجو مطالبو مڃي ته هو گهر هليو وڃي، چيف منسٽر هائوس ۾ ويٺل ڇوٽو گينگ جو به خاتمو ڪرڻو پوندو، هن چيو ته پاناما ليڪس جي جاچ پنهنجي جاءِ تي آهي پر مان نيب ۽ ايف آءِ اي سيمت تمام ادارن کان سوال ڪريان ٿو ته اوهان حڪومت جي مخالفن خلاف ته فوري طور جاچ شروع ڪريو ٿا پر 5 سئو ارب رپين جا گردشي قرض اسحاق ڊار جي مني لانڊرنگ جي اقبالي بيان، ندي پور منصوبو، ايل اين جي اسڪينڊل جي جاچ ڪير ڪندو؟ نيب قومي احتساب بيورو آهي يا ن ليگ بيورو آهي، هن چيو ته اسان جو قافلو اڄ باغ پهتو آهي ۽ هي اهو باغ آهي جيڪو 2005 جي زلزلي ۾ اجڙي ويو هو ۽ ان کي ٻيهر باغ بڻائڻ ۾ پ پ جو ڪردار اهم هو، هن اليڪشن تي ڪشمير جي دارومدار آهي، هن چيو ته ميان نواز شريف ڀارت نوازي ۾ ايترو اڳتي وڌي ويو جو هن حريت اڳواڻن سان به ملاقات ڪرڻ گوارا نه سمجهيو، هن ڪشمير واري معاملي تي پاڪستان جي موقف کي مذاق بڻائي ڇڏيو آهي، ميان صاحب اوهان مودي کي پنهنجي دوستي جو اهڙو سرٽيفڪيٽ ڏنو آهي جيڪو مسلمانن جي سڀ کان وڏي طاقت طرفان سڀ کان وڏو سول ايوارڊ ملي رهيو آهي، هن چيو ته نواز شريف پنهنجي سالگره جو ڪيڪ مودي جي هٿن سان ڪٽرايو ان کي اهو ڇو ياد ناهي ته مودي جي دور ۾ ڪشميرين مٿان ظلم عروج تي هو، وزيراعظم را جي ايجنٽ سان ملاقاتون ڪري رهيو آهي، بلوچستان ۾ را جا ايجنٽ گرفتار ٿين ٿا ته نواز شريف ان تي ڪو به ايڪشن نٿو وٺي، بلاول ڀٽو چيو ته نواز شريف جي حڪومت آبادگارن جي حقن جي تحفظ ۾ ناڪام ٿي چڪي آهي، ان جي پاليسين سبب آبادگار ۽ هاري احتجاج ڪرڻ تي مجبور آهن. پ پ چيئرمين چيو ته آزاد ڪشمير جي اليڪشن اهم ۽ تاريخي آهي جيڪڏهن ن ليگ کٽي وئي ته ائين لڳندو ته وزيراعظم نواز شريف کي ڀارتي هم منصب نريندر مودي جي دوستي حمايت ڪئي آهي، ان موقعي تي هن نعرو لڳايو شيرن جو شڪاري زرداري، شيرن جو شڪاري زرداري، هن چيو ته حڪومت 3 سالن ۾ ڪشمير تي بيان بازي کانسواءِ ٻيو ڪجهه به ناهي ڪيو ۽ نه ئي وري ڪو منصوبو شروع ڪيو آهي، ڪا به يونيورسٽي ڪا به اسپتال تعمير نه ڪئي وئي آهي.

 

نيب ۽ رينجرز جو لينڊ ڊپارٽمينٽ جي آفيس تي ڇاپو، گلستان جوهر اسڪيم جو رڪارڊ ضبط

ڪراچي (اسٽاف رپورٽر) ڪراچي ۾ نيب ۽ رينجرز اهلڪارن لينڊ ڊپارٽمينٽ جي آفيس تي ڇاپو هڻي رڪارڊ ضبط ڪري ورتو. ميڊيا رپورٽن موجب ڪراچي ۾ سوڪ سينٽر وٽ نيب ۽ رينجرز اهلڪارن ڪي ڊي اي لينڊ ڊپارٽمينٽ جي آفيس ۾ ڇاپو هنيو. ڇاپي دوران اهلڪار  ڊپارٽمينٽ جو رڪارڊ پاڻ سان گڏ کڻي ويا. ٻڌايو پيو وڃي ته نيب ۽ رينجرز اهلڪار گلستان جوهر اسيڪم 36 جو سمورو رڪارڊ کڻي ويا آهن.

 

ڪرپشن ۾ ملوث تمام شخصيتن کي انصاف جي ڪٽهڙي ۾ آندو وڃي: جلال محمود شاهه

ڪراچي (اين اين آءِ) سنڌ يونائيٽيڊ پارٽي جي صدر جلال محمود شاهه چيو آهي ته ملڪ کي موجوده بحران مان ڪڍڻ لاءِ سخت احتساب ۽ ڪرپشن ۾ ملوث مڙني ماڻهن کي بنا ڪنهن فرق جي انصاف جي ڪٽهڙي ۾ آندو وڃي، گذريل ڏينهن حيدر منزل تي پارٽي جي سينٽرل ايگزيڪيوٽو ڪميٽي اجلاس کانپوءِ پريس ڪانفرنس ڪندي ڪيو، هن چيو ته پ پ هڪ طرف پاناما ليڪس معاملي تي مسلم ليگ ن تي الزام هڻي رهي آهي پر ان سان گڏ سياسي سوديبازي ذريعي فائدا حاصل ڪرڻ جي ڪوشش ڪري رهي آهي، حقيقت ۾ پ پ ۽ مسلم ليگ ن ڪرپشن معاملي تي هڪٻئي جو عملي طور دفاع ڪري رهيون آهن، هن چيو ته ملڪ ۾ موجوده ڪرپشن جو سيلاب سياسي، اخلاقيات کي لوڙهي ڇڏيو آهي، مسلم ليگ جي حڪومتن مٿانهين سطح تي ڪرپشن ڪنديون رهيون آهن، جڏهن ته پ پ هيٺ ۽ مٿي ڪرپشن ڪري بدنام ٿي چڪي آهي، هن چيو ته ڊاڪٽر عاصم حسين 662 ارب رپين جي ڪرپشن جو الزام آهي، حقيقت ۾ ڪرپشن ته لکن ۽ ڪروڙن ۾ ٿيندي آهي، جڏهن ته 662 ارب رپين جي ڪرپشن ڪجهه صوبن جي بجيٽ برابر آهي، بلوچستان ۾ اڳوڻي فنانس سيڪريٽري مشتاق رئيساڻي جي گرفتار ۽ 50 ڪروڙ کان وڌيڪ رقم هٿ اچڻ بهترين قدم آهي، جيڪڏهن سنڌ ۾ به ڪرپٽ سياستدانن ۽ عملدارن جي گهرن جي تلاشي ورتي وڃي ته شايد ان کان وڌيڪ دولت ملي سگهي ٿي، جلال محمود شاهه چيو ته پ پ ۽ مسلم ليگ ڪنٽرولڊ جمهوريت جي پيداوار آهن ۽ ڪرپشن سبب طاقتور بڻيون آهن، ٻنهي پارٽي جا اڳواڻ ڪرپشن کي جائز سمجهن ٿا. هن چيو ته ملڪ جو هر هڪ فرد هڪ لک 20 هزار رپين جو قرضي آهي، ٿر ۾ غذا ۽ دوائون نه ملڻ سبب معصوم ٻارڙا مري رهيا آهن، سنڌ ۾ 50 سيڪڙو ٻار اسڪولن کان ٻاهر آهن، جڏهن ته عام ماڻهو کي پيئڻ جو صاف پاڻي ميسر نه آهي، هن چيو ته ملڪ کي ايماندار سياسي جماعتن ۽ اڳواڻن کي هڪ پيج تي آڻڻ جي ضرورت آهي، ملڪ ۾ موجوده بحران جو حل اهو آهي ته سخت کان سخت احتساب شروع ڪيو وڃي ۽ ڪرپشن ۾ ملوث سمورن ماڻهن کي قانون جي ڪٽهڙي ۾ آندو وڃي.