تازيون خبرون

Daily Archives: May 10, 2016

ايندڙ فلم”او ڪي جانو“ ۾ بلڪل مختلف نظر اينديس:شرڌا ڪپور

ممبئي(شوبز نيوز)  بالي ووڊ اداڪارا شرڌا ڪپور چيو آهي ته هوءَ پنهنجي ايندڙ فلم”او ڪي جانو“ ۾ بلڪل مختلف نظر ايندي، هڪ انٽرويو ۾ شرڌا ڪپور چيو ته ”اوڪي جانو“ ۾ هوءَ اديتيا رائي ڪپور سان جوڙي ٺاهي رهي آهي،اسان ٻنهي کي پهرين به هڪ ٻئي سان ڪم ڪرڻ جو تجربو آهي، هن چيو ته فلم ۾ منهنجو ڪردار مزيدار آهي ۽ مان ان مان ڀرپور مزو ماڻڻ چاهيان ٿي، سندس چوڻ هو ته هدايتڪار شاد ڇڏهن  ان فلم لاءِ مون سان رابطو ڪيو ته مان شروع ۾ تيار نه هيس پر جڏهن مان ڪهاڻي ڏٺي ته لڳو ته اها فلم منهنجي ۽ اديتيا جي لاءِ ئي ٺهي آهي، شرڌا چيو ته مان ڪنهن به فلم لاءِ پنهنجي ڪردار جي حوالي سان وڏي جذباتي هوندي آهيان ۽ ڪلاڪن جا ڪلاڪ ويهي ان تي غور ڪندي آهيان.

فلمي ڪٽنب مان ايندڙ نون اداڪارن لاءِ بالي ووڊ خانداني ڪاروبار آهي:پراچي ڊيسائي

ممبئي(شوبز نيوز)بالي ووڊ اداڪارا پراچي ديسائي چيو آهي ته فلمي ڪٽنب مان ايندڙ نون اداڪارن لاءِ بالي ووڊ خانداني ڪاروبار آهي،هڪ انٽرويو ۾ پراچي چيو ته هن وقت ڪيترائي نوان اداڪار فلم انڊسٽري ۾ اچي رهيا آهن،جن مان ڪجهه جو هي خانداني ڪاروبار آهي، هن چيو ته انهن اداڪارن لاءِ فلمي پراجيڪٽ ائين ٺاهيا وڃن ٿا، ڄڻ پرين جي ڪهاڻي هجي..

عبدالقادر جي پٽ عثمان قادر جو ڏکڻ آفريقا طرفان انٽرنيشنل ڪرڪيٽ کيڏڻ جو فيصلو

لاهور(اسپورٽس نيوز) اڳوڻي ڪرڪيٽر  عبدالقادر جي پٽ عثمان قادر پي سي بي جي پاليسين کان تنگ ٿي ڏکڻ آفريقا جي ڪرڪيٽ ٽيم طرفان انٽرنيشنل ڪرڪيٽ کيڏڻ جو فيصلو ڪيو آهي. عثمان قادر جو چوڻ آهي ته پاڪستان ڪرڪيٽ بورڊ طرفان انڊر 19، اي ٽيم ۽ انڊر 23 ٽيم ۾ سڀ کان وڌيڪ وڪيٽون وٺڻ باوجود کيس نظرانداز ڪيو ويو. هن چيو ته هو پنهنجي ڪرڪيٽ کي تباهه نه ٿيڻ ڏيندو ۽ ڪيرير کي بچاڻ لاءِ هن ڏکڻ آفريقا جي ٽيم ڏانهن کيڏڻ جو فيصلو ڪري ورتو آهي. عثمان قادر وڌيڪ چيو ته انٽرنيشنل ڪرڪيٽ راند کيڏي هو پنهنجو ۽ پنهنجي خاندان جونالو روشن ڪرڻ چاهي ٿو. پاڪستان کيڏڻ جي تمام گهڻي خواهش هي پر ليجنڊ ڪرڪيٽر جو پٽ هڻ ڪري قومي ٽيم ۾ شموليت تمام گهڻي مشڪل ٿي رهي هي، جنهن ڪري عمران طاهر وانگر هو به ڏکڻ آفريقا جي ٽيم طرفان کيڏڻ لاءِ قدم کڻڻ تي مجبور ٿيو آهي.

 

هوريا ٽيڪايو ۽ جين جولين راجر ميڊرڊ اوپن ٽينس ٽورنامينٽ جو مينز ڊبلز ٽائيٽل کٽي ورتو

ميڊرڊ (اسپورٽس نيوز) رومانيا جو هورياٽيڪايو ۽ سندس ڪروشين جوڙي دارجين جولين راجر بهترين ڪارڪردگي سبب ميڊرڊ اوپن ٽينس ٽورنامينٽ جو مينز ڊبلز ٽائيٽل کٽي ورتو آهي. هن فائينل ۾ رومانيا جي فلورين مرجيا ۽ ڀارت جي روهن ڀوپنا تي ٻڌل جوڙي کي شڪست ڏني. ايسين جي گادي واري شهر ميڊرڊ م کيڏيل ميڊرڊ اوپن ٽينس ٽورنامينٽ ۾ مينز ڊبلز ايونٽ جي فائينل ۾ رومانيا جو هوريا ٽيڪايو ۽ سندس ڪروشين جوڙي دارجين جولين راجر شاندار ڪارڪردگي جو مظاهرو ڪيو.

 

احتساب يا سياسي راند؟: شفيق شاڪر

بدقسمتيء سان پاڪستان هن وقت سياسي طور تي جنهن داخلي بي يقيني ۽ ڇڪتاڻ واري بحران مان گذري رهيو آهي انهيء مان نڪرڻ جو في الحال ڪو رستو نظر نٿو اچي.پاناما ليڪس واري معاملي جتي هڪ طرف ملڪ جي سياسي پد ۾ گھڻو اضافو ڪري ڇڏو آهي اتي قومي اهميت جا ڪيترائي اهم معاملا پوئتي ڌڪجي ويا آهن.پنهن جو اقتدار،سياست ۽ دولت بچائڻ جي هن سموري راند ۾ ملڪ جا حڪمران ۽ سياستدان اها ڳالھ به وساري ويٺا آهن ته اهڙو ملڪ جنهن ۾ اندروني توڙي ٻاهرين دهشتگرديء جي خلاف هڪ فيصلائتي جنگ وڙهي پيئي وڃي،جتي غيرملڪي قوتن قدم قدم تي سازشن جو ڄار وڇائي رکيو آهي،جنهن ملڪ ۾ اٽڪل اڍائي ڪروڙ ٻار صحيح کاڌو نه ملڻ ڪري ميل نيوٽريشن جو شڪار آهن،جتي ٻهراڙين جون لکين عورتون ميٽرنٽيء جون سهوليتون نه هئڻ ڪري پري پري جي اسپتالن تائين پهچڻ کان پهرين رستي ۾ ئي مريو وڃن. جتي بي روزگاري ۽ مهانگائيء جي ڪري روزانو ڪيترا ئي جيو پنهن جن جگر جي ٽڪرن سميت آپگھات جي منزل جا راهي بڻيل آهن.زندگيء جي ٻين ضرورتن ۽ سهوليتن جو ته ذڪر ئي ڪهڙو، اڄ به ملڪ جي آباديء جي اڪثريت پيئڻ جي صاف پاڻيء جي سهوليت کان محروم آهي،ان ملڪ جا حڪمران،سياستدان ۽ عوامي نمائندا هڪ ٻئي جون ڳچيون پٽيندي،هڪ ٻئي تي الزامن جي برسات وسائيندي ۽ هڪ ٻئي کي گارين جا گل پارائيندي نظر اچن ٿا.

هي سڀ ڪجھ ڇا آهي؟ جنهن کي ڏسو سو پنهن جو پاڻ کي پاڪ ۽ پوتر ۽ ٻئي کي گندو ظاهر ڪرڻ جي مقابلي ۾ اخلاقيات جون سڀ حدون اورانگھڻ ۾ هٻڪ محسوس نٿو ڪري. جيڪر پاڪستان جي هاڻوڪي صورتحال کي چند لفظن ۾ بيان ڪجي ته اهڙو ملڪ جيڪو ڪجھ اشرافيا طرفان وڌيڪ طاقت ۽ دولت حاصل ڪرڻ ۽ انهيء کي هر قيمت تي محفوظ۽سلامت رکڻ جي راند جو مرڪز بڻيل آهي.سياست جنهن جو پهرئين ڏينهن کان ئي اسان جي ملڪ ۾ اهو تصور رهيو آهي ته ڪنهن به طرح، ڪهڙي به ذريعي اقتدار جي ڪرسيء تائين پهچڻ ۽ پوء هر طرح سان قوم جو خزانو خالي ڪرڻ! اها ئي راند گذريل ستر سالن دوران هلندي پيئي اچي ۽ اڄ به وڏي شان سان جاري آهي.ڪڏهن اهو تماشو احتساب ۽ قومي سلامتيء جي نالي تي نازل ٿيل آمريتن ۽ ڪڏهن عوامي ڀلائي ۽ سياسي آزادين جي نعري جي بنياد تي قائم ٿيندڙ نام نهاد جمهوري حڪومتن جي صورت ۾ اها راند ٿيندي رهي آهي.انهن سموريء راند ۽ تماشي ۾ جيڪا ڌر سڀ کان وڌيڪ متاثر ٿئي ٿي سو آهي ملڪ جو غريب عوام جنهن سان بار بار دوکو ڪيو وڃي ٿو،بار بار سندن اکين ۾ ڌوڙ وڌي وڃي ٿي.سوال ڪيو پيو وڃي ته آف شور ڪمپنين ۾ سيڙايل پئسو اوهان جو آهي يا نه؟ جواب اهو ٿو اچي ته ٻين سياستدانن جون به ته آف شور ڪمپنيون آهن. سوال ڪيو پيو وڃي ته انهن ڪمپنين ۾ سيڙايل پئسو ڪٿان آيو؟ جواب اهو ٿو اچي ته اسان ساري زندگي ديانتداريء سان ڌنڌو ڪيو آهي.

سوال ڪيو ٿو وڃي ته برطانيا ۾ اوهان جا فليٽ آهن يا نه؟ جواب اهوٿو اچي ته حڪومت خلاف سازش ڪئي پيئي وڃي.سوال ڪيو ٿو وڃي ته توهان پنهن جي ملڪيت جا تفصيل پارليامينٽ سامهون ظاهر ڇو نٿا ڪيو؟ جواب اهو ٿو ملي ته ڪجھ ڌرين کي موجوده حڪومت طرفان  غريب عوام جي لاء شروع ڪيل ترقياتي اسڪيمون نٿيون وڻن.هيء ڪهڙي لاجڪ ۽ ڪهڙو منطق آهي،سمجھ ۾ نٿو اچي.ان سموري بحران مان ٻاهر نڪرڻ جو هڪڙو ئي رستو ميان صاحب کي سندس ڏاهن ۽ بصيرت سان ڀريل وزيرن ۽ مشيرن بڌايو آهي سو اهو ته ” زبان بند ڪرايو پاليسي“ تي عمل ڪيو وڃي. ڪنهن کي لفافو،ڪنهن کي غيرملڪي دورن جو تحفو،ڪنهن کي وزارت ۽ مشيري ،ڪنهن کي ترقياتي اسڪيمن جي سوکڙي،ڪنهن کي ڪو سڻڀو سرڪاري عهدو.هن ملڪ ۾ قيمتون ته سدائين لڳنديون رهيون آهن ۽ وڏا وڏا ڦني خان به وڪبا رهيا آهن.اصولي سياست جا دعويدار هجن يا جمهوريت جي ديويء جا پرستار، انهن مان ڪوبه حقيقي احتساب نٿو چاهي،اهو مسئلو صرف حڪومت سان ناهي پر هن وقت جيڪي حڪومت جي ڪرپشن تي واويلا ڪري رهيا آهن انهن مان به مشڪل سان ڪو دل ۾ احتساب جي لاء راضي هجي.

پاناما ليڪس جو معاملو ڀلي اهم هجي پر ان تي هن وقت تائين صرف سياست ٿي رهي آهي.ڪي پنهن جي لاء حڪومت کان رعايتون وڌائڻ گھرن ٿا ته ڪي ڪرسيون خالي ٿيڻ جي صورت ۾انهن تي ٽپو ڏيئي ويهڻ گھرن ٿا ته ڪي عوام جو ڌيان پنهن جن ڪرتوتن کان هٽائڻ چاهين ٿا.انگريزيء جي چوڻيء مطابق؛

Everyone has one’s own axe to grind.” “يعني پٿر پرائو سور پنهن جا!

هي اجلاس،ڪميٽيون،ڪاروائيون،ڪميشنون.ٽي آر اوز،پنا،پيپر ۽ ڪاغذ صرف ماڻهن کي منجھائڻ ۽ وقت کي اڳتي ڌڪو ڏيڻ لاء آهن ته جيئن ڪيئن به ڪري نومبر جي نويد پهچي وڃي،ڪو گھر هليو وڃي پوء اهي ئي انڌيون اهي ئي جنڊ! ان خيال تي کل اچي ٿي ته هن هيڏي وڏي خواريء کان پوء ميان صاحب خود استعيفا ڏيئي گھر هليو ويندو.شايد طاقت ۽ دولت جو نشو اهڙي بي درد شيء آهي جو انسان جي بصارت توڙي بصيرت،عقل ۽ ادراڪ،اخلاقيات ۽ آدرش به کسيو وٺي.سو ميان ضاحب آخري وقت تائين ڪرسيء سان چنبڙيل رهندو ايستائين جو کيس ڪو کڻي ڪرسيء سميت ٻاهر ڦٽو نه ڪري.هن في الحال ان سڄي بحران جو جيڪو بهترين حل ڳولهي ڪڍيو ويوآهي سو آهي جلسا ڪرڻ جن جي ذريعي هو نه صرف پاڻ پر ٻين کان به اهڙي بازاري ٻولي ڳالهرائي رهيو آهي جنهن جو ملڪ جي وڏي ۾ وڏي انتظامي عهدي تي ويٺل هڪ عوامي ۽ جمهوري اڳواڻ کان تصور به نٿو ڪري سگھجي ته ٻئي طرف هو بين الاقوامي برادري ۽ پاڪستاني مقتدر حلقن کي اهو باور ڪرائي رهيو آهي ته پاڪستان جو عوام هن سان گڏ آهي.باقي رهي اپوزيشن ته ميان صاحب جي لاء اپوزيشن في الحال ڪو خطرو ناهي.هن کي جتان خطرو آهي اهو هو خوب سمجھي ٿو. جلسن ۾ سندس تند ۽ تيزلهجي جو نشانو اپوزيشن نه پر ڪي ٻيون ڌريون آهن جيڪي اڃا تائين وڏي صبر ۽ سهپ سان اهو سڀ تماشو ڏسي رهيون آهن پر جيڪر ميان صاحب کي اهو گمان آهي ته اهي هن سموري معاملي کان قطعي لاتعلق بڻجي وييون آهن ته اها سندس وڏي غلط فهمي ٿيندي.اهو صبر به ڪيستائين ٿيندو.حڪومت ۽ رياست جو پورو ڪار وهنوار مفلوج بنجي ويو آهي. سويلين ۽ مليٽري لاڳاپن ۾ شديد ڇڪتاڻ واري ڪيفيت ڏينهون ڏينهن وڌندي ٿي وڃي.نيب ۽ ٻين تحقيقات ادارن کي حڪومت طرفان ڪم کان روڪي ڇڏيو ويو آهي.حڪومتي وزيرن ۽ مشيرن جا غيرذميداراڻا بيان باه تي تيل جو ڪم ڪري رهيا آهن،سو معاملا گھڻي وقت تائين جيئن جو تيئن هلي نه سگھندا.                                                                                                   هڪ ڳالهه بهرحال ثابت ٿي چڪي آهي ته ڪرپشن جي حوالي سان حڪمرانن کان ويندي اپوزيشن تائين سڀ ڪنهن حقيقي احتسابي نظام جي قيام جي حق ۾ ناهن.پر ڇا هن دفعي به اهي سڀ معاملا ماضيء جيان دٻجي ويندا ۽ عوام طرفان احتساب جي شديد خواهش اتي ئي دم ٽوڙي ڇڏيندي؟ دهشتگرديء جي جنگ پنهن جي منطقي انجام تائين پهچڻ کان پهرين ختم ٿي ويندي؟.لڳي نٿو ته عسڪري قيادت جيڪا عوام سان هيڏي وڏي ڪمٽمينٽ ڪري ويٺي آهي ۽ جنهن جنگ ۾ هزارين فوجي ۽ قانون نافذ ڪندڙ ادارن جا ٻيا جوان پنهن جون جانيون قربان ڪري چڪا آهن،اهو سڀ ڪجھ ايئن اجايو لڙهي وڃڻ ڏنو ويندو،اهو اٽڪل ناممڪن لڳي ٿو.اهو ٽارگيٽ مڪمل ڪرڻ لاء انهن کي جيڪر ڪو آئيني رستو نه ڏنو ويو ته ڪجھ به ٿي سگھي ٿو جنهن جي ذميداري موجوده حڪمرانن ۽ سياستدانن تي ئي عائد ٿيندي. اهي جلسا جلوس ئي ڪنهن حڪومت جي مضبوطي ۽ مقبوليت جو پيمانو هجن ها ته 12 آڪٽوبر 2009ع کان پهرين به ان قسم جا جلسا ۽ ان قسم جي ئي زبان استعمال ٿي رهي هئي.شايد حڪمرانن اهو فيصلو ڪري ورتو آهي ته

” هم تو ڊوبين گي صنم، تم ڪو ڀي لي ڊوبين گي!“

 

 

جي سڀ تيار ته مان نه مڃان ڇاجي…؟

پاناما ليڪس معاملي تي هڪ طرف وزيراعظم نوازشريف واضح لفظن ۾ پنهنجو موقف اختيار ڪندي چيو آهي ته پاناما ليڪس جي معاملي تي سياسي جماعتن سان مشاورت ڪرڻ لاءِ تيار آهيون، اهو به واضح ڪيو آهي ته ڪنهن جي به ڊڪٽيشن کي قبول نه ڪندا، شريف ڀائرن جي وچ ۾ جاتي امرا ۾ ملاقات ٿي، جنهن ۾ ملڪ جي موجود سياسي صورتحال تي خيالن جي ڏي وٺ ڪئي پئي، ه پاناما ليڪس جي حوالي سان مخالف ڌر جي ٽرمز آف ريفرنس تي مشاورت ڪئي وئي، ان موقعي تي وزيراعظم پاناما ليڪس معاملي تي ٽي او آرز جي حوالي سان مخالفن سان ڳالهين تي آمادگي جو اظهار ڪيو، ۽ چيو  مون پاڻ کي ۽ پنهنجي خاندان کي احتساب سان پيش ڪري ڇڏيو آهي، جيڪڏهن مخالف ڌر پاناما ليڪس جي معاملي تي جاچ لاءِ سنجيده آهي ته حڪومت سان اها حڪومت سان ڳالهين لاءِ هڪ ڪميٽي جوڙي. ڪنهن جي ذاتي خواهشن خاطر ملڪ ۾ افراتفري ۽ انارڪي پيدا ڪرڻ نه ڏينداسين. ڪرپشن جي خاتمي لاءِ ڀرپور قدم کنيا آهن، بدعنواني جا بي بنياد الزام مڙهي جمهوري قدرن خلاف سازش ڪئي پئي وڃي، مخالف ڌر جي جماعتن سان هڪ ميز تي ويهي ڳالهائڻ لاءِ تيار آهيون. هميشه قوم جي ڀلائين لاءِ ڪم ڪيو آهي، مخالف ڌر جي جماعتن جي رويي سان عوام کي مايوس ٿيڻ نه ڏينداسين، اڳ به بنا ڪنهن فرق جي احتساب جا حامي رهياسين ۽ هاڻي به ان تي قائم آهيون.

وزير اعظم جي آڇ باوجود پاناما ليڪس جي جاچ لاءِ حڪومت طرفان پيش ڪيل ٽي او آرز مخالف ڌر جون جماعتون رد ڪري ڇڏيا آهن، مخالف ڌر جي جماعتن جيڪي ٽي او آرز پيش ڪيا هئا، حڪومت انهن کي بدنيتي تي مشتمل قرار ڏيندي رد ڪري ڇڏيو،  .پاناماليڪس ۾ جنهن به سياستدان جو نالو آهي، انهن جو احتساب ٿيڻ گهرجي وزيراعظم نواز شريف پارليامينٽ ۾ اچڻ کان ڊڄي ٿو، کيس پارليامينٽ ۾ اچي عوام کي اعتماد ۾ وٺي ميان صاحب اهو نه وساري ته کيس عوام ووٽ ڏئي چونڊيو آهي،  مخالف ڌر اڳواڻ سيد خورشيد احمد شاهه  پنهنجو موقف بيان ڪندي چيو  آهي ته هڪ ميز تي ويهي ڳاليهون ڪرڻ جمهوريت جو اصل حسن آهي، مخالف ڌر ڳالهين لاءِ تيار آهي پر حڪومت طرفان  هن وقت تائين ڪنهن به قسم جو رابطو ناهي ڪيو ويو  پاناما پيپرس ۾ جنهن به سياستدان جو نالو آهي، انهن جو احتساب ٿيڻ گهرجي اسان ته ائين ٿا چون ته جن سياستدانن قرض معاف ڪرايا آهن، انهن کي به احتساب واري عمل مان گذارڻ گهرجي  وزيراعظم نواز شريف پارليامينٽ ۾ اچڻ کان لوائي رهيو کيس ائين نه ڪرڻ گهرجي جنهن عوام کيس ووٽ ڏئي اڳتي آندو آهي، ان کي اعتماد ۾ وٺڻ وزيراعظم جو فرض آهي،

سوچڻ جي ڳالهه آها آهي ته هڪ طرف وزير اعظم ڳالهين لاءِ راضي هئڻ جو چئي رهيو آهي ۽ وري اپوزيشن سان رابطو ناهي ڪيو ويو، ٻئي طرف اپوزيشن اڳ ئي ڳالهين جي ميز تي وهيڻ لاءِ آتي آهي پر اها اميد رکيو ويٺي آهي ته حڪمرانن وٽان ڪو ڪانگل خط کڻي پهچي ته قدم اڳتي وڌايا وڃن، جيڪڏهن ٻئي ڌرين ڳالهين جي ميز تي ويهڻ لاءِ آتيون آهن ته مسئلو ڪهڙو آهي جو ڳالهيون نه پيون ٿين، سياست کي عبادت چوڻ واران دوڪانداري ڇو بڻائي ويٺا آهن، ملڪ ۾ اڳئي ٻيا مسئلا گهڻا آهن انهن کي حل ڪرڻ بجاءِ مسئلن جا ڀنڊار گڏ ڪرڻ جو مطلبو ڪهڙو آهي، سرڪار سڳوري ۽ اپوزيشن کي اپيل آهي ته خدارا ڪوئي ٻلي جي راند بند ڪري عوام کي سک جو ساهه کڻڻ ڏنو وڃي جيڪا توهان جي ذميواري به آهي.

 

اسان جو ڇوڪرو صادق خان: وسعت الله خان

ٻه ٽي ڏينهن اڳ برطانيا جي ڪيترن ئي هنڌن تي علائقائي اسيمبلين ۽  شهري ڪائونسلن جي چونڊ ٿي، پر پاڪستاني ميڊيا جي اک سان ڏٺو وڃي ته برطانيا ۾ صرف هڪ هنڌ ئي اليڪشن ٿي يعني لنڊن ۾ ۽ ان اليڪشن ۾ ڪنهن کٽيو؟ هڪ پاڪستاني مسلمان؟ ۽ هارايو ڪنهن؟ هڪ ارب پتي يهودي خاندان جي چشم و چراغ (هڪ چينل ته جوش ۾ عرب پتي جي پٽي هلائي ڇڏي)

پوءِ وري اهو بحث  شروع ٿيو ته صادق خاندان پنجابي آهي يا غير پنجابي- اها ڪنفيوزن ان لاءِ پکڙي ته صادق خان جو هڪ پراڻو انٽرويو جو ٽوٽو ڪنهن چينل هلائي ڇڏيو، جنهن ۾ هو پنهنجي ٽٽل ڦٽل اردو ۾ چئي رهيو آهي ته منهنجو خاندان ورهاست جي وقت ڀارت مان لڏپلاڻ ڪري پاڪستان آيو ۽ پوءِ اسان سٺ جي ڏهاڪي ۾ لنڊن ۾ اچي وياسين. منهنجا مائٽ ڪراچي ۾ به آهن ۽ فيصل آباد ۾ به رهن ٿا.

هڪ واندي صحافي سگريٽ جو ڪش هڻندي اک کُپائي چيو ته ”مان ته چوندو هئس ته پنهنجو مهاجر ٻچو آهي.“ …. ٻئي چئلينج ڪيو ته تون ڪيئن چئي سگهين ٿو؟ ڪراچي ۾ به هن جا مائٽ آهن ۽ فيصل آباد ۾ اڪثريت انهن جي آهي، جيڪي اوڀر پنجاب مان لڏي آيا هئا.

پر افسوس ته ڪالهه تائين صادق خاندان جي ڪنهن مائٽ کي فيصل آباد ۽ ڪراچي ۾ ڳولڻ جي ميڊيا کي ڪاميابي نه ملي ۽ هر چينل کي حسرت ئي رهي ته هو صادق خان جي ڪنهن ماسي جي پٽ يا نياڻي جي تلاش ڪري ”هن وقت توهان ڇا محسوس ڪري رهيا آهيو؟“ ٽائپ جهڙا سوال پڇي سينو تاڻي سگهي ته هي ايڪسليوسيو انٽرويو سڀ کان پهرين توهان تائين چنبيلي نيوز چينل پهچايو. اهو ڏسندي ۽ ٻڌندي مون کي باراڪ اوباما جي ماءُ اين ڊنهم ياد اچي وئي، جيڪا سن اسي جي ڏهاڪي ۾ ڪجهه عرصو ايشين ڊولپمينٽ بئنڪ جي مائيڪرو ڪريڊٽ ڊويزن جي اهلڪار طور تي گوجرانوالا ۾ هڪ پراجيڪٽ جي نگراني ڪندي رهي  ۽ ان عرصي ۾ اوباما به ان سان ملڻ لاءِ لاهور آيو، جڏهن اوباما صدر ٿيو ته سينٽرل پنجاب جا ڪيترائي ماڻهو وڏا خوش ٿيا ۽ چوندا رهيا ته ”اوباما پنهنجو گوجرانوالا جو ڇوڪرو آهي، شڪر الحمد الله، هاڻي ته پاڪستان جي امداد وڌندي.“

ڪالهه صبح منهنجي هڪ جوان مفتي دوست فون ڪري جڳائي ڇڏيو ”ٻڌو آهي توهان؟ صادق خان ماشاءَ الله پنج وقت نمازي ۽ تهجد گذار آهي ۽ هن حج به ڪيو آهي. آهستي آهستي لنڊن وانگر پوري اولهه اسلام جي حقانيت جو احساس ٿي ويندو ۽ اهو به ته مسلمان ڪيترا امن پسند ماڻهو آهن ۽ ڪجهه آڱرين تي ڳڻڻ جيترا“

مون جي جي ڪندي فون رکي ڇڏيو ۽ اها خواهش دل ۾ دٻائي ڇڏي ته مفتي صاحب کي ٻڌائي ڇڏيان ته صادق خان کي هڪ برطانوي امام مسجد ته مرتد به قرار ڏنو هو، ڇوته هن بيان ڏنو هو ته هم جنس پرستن جي مسئلن کي به انساني حقن جي آئيني ۾ ڏٺو ويندو. پنهنجي پنهنجي آئيني ۾ ڪنهن شخص کي قيد ڪرڻ ۾ نقصان اهو آهي ته وڏي تصوير نگاهه کان پري رهندي آهي. ڪاش ڪا پاڪستاني ميڊيا تي اهو بحث به کڻي سگهي ته سئو کان وڌيڪ قوميتن تي مشتمل پنجاسي لک آبادي واري بين الاقوامي وڏي نسلي، وڏي مذهبي تاريخي شهر لنڊن صادق کي 56.8 سيڪڙو ووٽن سان پنهنجو ميئر چونڊيو. جيڪڏهن مسلمان هجڻ جي ڪري کيس چونڊيو ويو آهي ته مسلمان ته لنڊن ۾ صرف ساڍا ٻارنهن سيڪڙو آهن. جيڪڏهن پاڪستان هجڻ سبب چونڊيو ويو آهي ته پاڪستاني ته لنڊن ۾ صرف پوڻا ٽي سيڪڙو آهن. هن جي مهم سمورن قوميتن گڏجي ڇو هلائي؟ اهڙو ڇا آهي ته هن کي شدت پسندي سان جوڙڻ جي سمورن ڪوششن جو ابتو اثر ٿيو ۽ صادق خان کان وڌيڪ ووٽ برطانيا ۾ اڄ تائين ڪنهن سياستدان کي ناهن مليا؟

اهي جيڪي هر وقت هر مسئلي جي جوڙين کي يهود و هندو و نصاريٰ جي تڪن ۾ تلاش ڪن ٿا، زيڪ گولڊ سمٿ جي شڪست جو ڪارڻ هاڻ پيش ڪندا؟ اُهي جيڪي چون ٿا ته اليڪشن پئسن جي راند آهي؟ هاڻ هڪ ارب پتي جي مقابلي ۾ هڪ بس ڊرائيور جي مڊل ڪلاس پٽ جي چونڊ فتح کي ڪنهن معاشي ۽ سماجي خاني ۾ فٽ ڪندا؟

ان جو مطلب اهو ٿيو ته جمهوريت جيڪڏهن هلندي رهي ته جمهوري رويا آهستي آهستي دل ۽ دماغ ۾ ويهي رهندا آهن ۽ انساني رويا نسلي، معاشي، علائقائي تعصبن کان مٿي اڀرڻ لڳن ٿا. صادق خان جي ڪاميابي پاڪستان جهڙين جمهوريتن کي هڪ وڏو چئلينج ڏنو آهي. جنهن ڏينهن ڪراچي جو ميئر ڪو سنيل شنڪر پاڪستاني هوندو، جنهن ڏينهن ڪوئي پيٽر جيڪب کلي مقابلي ۾ ڪنهن ارب پتي صنعتڪارکي هن جي ڳڙهه مان هارائيندو، سمجهي وٺو ته جمهوري سسٽم تعصبن ۽ عدم مساوات تي حاوي ٿيڻ لڳو آهي. جيستائين اهو نه ٿوٿئي، نٿو سکيو وڃي، تيستائين صادق خان کي پنهنجو ڇوڪرو چوندي خوش ٿي کوهه ۾ مطمئن رهڻ ۽ پنهنجي نظام ۽ اغيار جي تعصبن کي ٻڌڻ ۾ ڪو حرج ناهي.