تازيون خبرون

Daily Archives: May 4, 2016

”صفا اڪيلي آهيان“ شرڌا ڪپور، اديتيا سان لاڳاپن جون خبرون رد ڪري ڇڏيون

ممبئي (شوبز نيوز) بالي ووڊ جي ڪامياب اداڪارا شرڌا ڪپور اداڪارا اديتيا رائي ڪپور سان لاڳاپن وارين خبرن کي بي بنياد قرار ڏيندي رد ڪري ڇڏيو آهي، فلم ”عاشقي 2“ ذريعي شهرت جي اوچاين کي ڇهندڙ شرڌا ڪپور ۽ اديتيا رائي ڪپور جي حوالي سان مختلف متضاد ڳالهيون گردش ڪري رهيون هيون ۽ امڪان ڏيکاريو پئي ويو ته ٻئي فلم”اوڪي جانو“ ۾ گڏ نظر ايندا ، ان حوالي سان شرڌا ڪپور اداڪارا اديتيا سان گڏ فلم ۾ اچڻ جي تصديق پر ساڻس ڪنهن به قسم جي تعلق جي ترديد ڪئي آهي،هڪ انٽرويو ۾ شرڌا ڪپور چيو ته مان بلڪل اڪيلي آهيان ۽ اديتيا سان اهڙو ڪوبه تعلق ناهي، جيڪو ڳنڍيو پيو وڃي، هن چيو ته ” عاشقي 2“ کانپوءِ ماڻهو اسان ٻنهي کي هڪ ڀيرو وري فلم ۾ گڏ ڏسڻ پيا چاهين، جنهن لاءِ اسان ”اوڪي جانو“ ۾ گڏ ڪم ڪري رهيا آهيون، شرڌا ڪپور جو چوڻ هو ته ”اوڪي جانو“بلڪل مختلف فلم آهي، جنهن ۾ مذاق جو به ڪجهه عنصر شامل آهي.

 

ٻولي يا علائقو اهميت نه ٿو رکي،هر فلم ۾ ڪم ڪري مزو ايندو آهي: ايشوريا راٰءِ

ممبئي (شوبز نيوز) بالي وڊ اداڪارا ايشوريا راءِ بچن چيو آهي ته هوءَ ٻولي ۽ علائقي وارو تاثر رد ڪري ٿي ۽ کيس هر قسم جي فلم ۾ ڪم ڪرڻ ۾ مزو ايندو آهي،اڳوڻي سونهن راڻي نه رڳو بالي ووڊ پر هالي ووڊ جي فلمن ۾ به ڪم ڪري وڏي مڃتا ماڻي چڪي آهي، ان حوالي سان هڪ انٽرويو دوران جڏهن ايشوريا کان پڇيو ويو ته ڇا هالي وڊ فلمساز به هاڻ بالي ووڊ اداڪارائن کي ڪاسٽ ڪرڻ  لاءِ در کولي رهيا آهن؟ هن جواب ڏنو ته منهنجو شروع کان وٺي اهو ئي خيال رهيو آهي ته سينيما کي مقامي نه هجڻ گهرجي، هر پيشيور ماڻهو کي هر قسم جي فلم ڪرڻ کپي، هن چيو ته هن سدائين مختلف ڪردار ڪرڻ چاهيا آهن ۽ ان جي جهلڪ سندس فلمن ۾ به نظر اچي ٿي، 42 ورهين جي ايشوريا رائي بچن چيو ته مان پهرين ئي فلم ۾ ڪم ڪرڻ جي حامي ان ڪري ڀري هئي جو مونکي هن شعبي ۾ هر حال ۾ اچڻو هو، جنهن لاءِ مون وٽ ٻولي يا علائقو ڪابه اهميت نه ٿو رکي، ايشوريا جي ايندڙ فلم سربجيت آهي،جڏهن ته هوءَ اي دل هي مشڪل ۾ به ڪم ڪري رهي آهي.

 

پاڪستان ڪرڪيٽ ٽيم جي هيڊ ڪوچ لاءِ آسٽريليا جي اسٽورٽ لاڪا جو نالو سامهون اچي ويو

لاهور (اسپورٽس نيوز) پاڪستان ڪرڪيٽ ٽيم جي مين هيڊ ڪوچ لاءِ آسٽريليا جي اسٽورٽ لاڪا جو نالو سامهون اچي ويو آهي جڏهن ته پاڪستان ڪرڪيٽ بورڊ جلد ئي 18 لک رپيا پگهار ۽ ٻن سالن جو ڪانٽريڪٽ پيش ڪندو. پي سي بي جي ذريعن موجب چيئرمين شهريارخان ساٿين سان مشاورت کان پوءِ آسٽريليا جي اڳوڻي بيٽسمين اسٽورٽ لاڪا کي قومي ٽيم جي هيٺ ڪوچ لاءِ فائينل ڪري ورتو آهي پي سي بي جلد اسٽورٽ لاڪا سان رابطو ڪري ان کي قومي ٽيم جي هيڊ ڪوچ جي عهدي لاءِ آڇ ڪندو. اسٽورٽ لاڪا سيپٽمبر تائين آسٽريلوي ٽيم جي بيٽنگ ڪوچ لاءِمعاهدو ڪري چڪو آهي جڏهن ته هن پاڪستاني ٽي جي ڪوچ جي عهدي لاءِ به پنهنجي درخوست جمع ڪرائي هئي جيڪا پي سي بي طرفان قبول ڪيو ويو آهي. ذريعن موجب پي سي بي غير ملڪي قوچ لاءِ 18 لک رپيا ماهوار پگهار ۽ ٻيو پئڪيج مختص ڪيو آهي واضح رهي ته آسٽريليا سان تعلق رکندڙ اسٽيورلا 18 آڪٽوبر 1968 ۾ پيدا ٿيو کاٻي هٿ سان بيٽنگ ڪندڙ اسٽيورڊ ميڊيم فاسٽ بالنگ به ڪندو آهي.

 

پاڪستاني ڄائو برطانوي باڪسر عامر خان 7 مئي تي ايلواريز خلاف رنگ ۾ لهندو

لنڊن (اسپورٽس نيوز) پاڪستاني ڄائو برطانوي باڪسر عامر خان 7 مئي تي لاس ويگاس جي هنڌ تي سائول ايلواريز خلاف ڊبليو ڊي سي ورلڊ مڊل ويٽ ٽائيٽل جي لاءِ رنگ ۾ لهندو. 29 سالن جو عامر خان گذريل سال مئي ۾ نيويارڪ ۾ ٿيل فائيٽ ۾ ڪرس الجيري کي هارايو هو ۽ ان کان پوءِ هو ٻه ڀيرا رنگ ۾ نه لٿو آهي ٻئي پاسي ايلواريز گذريل سال نومبر ۾ حريف باڪسر کي شڪست ڏيئي ٽائيٽل کٽڻ جو اعزاز حاصل ڪيو ايلواريز 48 مقابلن مان 46 مقابلن ۾ سوڀ حاصل ڪئي آهي جڏهن ته هڪ ۾ کيس شڪست جو منهن ڏسڻو پيو عامر خان جو چوڻ آهي ته منهنجو مقصد هميشه وڏن ۽ بهترين باڪسرز سان مقابلو ڪرڻ هجي ٿو اهو ئي سبب آهي جو مون کي ان وڏي باڪسر سان مقابلو ڪرڻ تي خوشي آهي.

 

آمريت کي دعوت ڏيندڙ هڪ طرفو احتساب ۽ سياسي ٽڪراءُ: جاويد ابڙو

ملڪ جي موجوده سياسي صورتحال ۾ محسوس ائين ٿي رهيو آهي ته مخالف ڌر جون جماعتون بظاهر ته متحد آهن، پر انهن ۾ اندروني طور تي ڪي اهڙا نقطا به موجود آهن، جن تي ضرور ڪي اختلاف آهن، اهو ئي سبب آهي جو هن وقت مسلم ليگ (ن) اڪيلي نظر ته اچي ٿي، پر تنهن هوندي به مخالف ڌر کان زور لڳي رهي آهي، سياسي حلقن جو خيال آهي ته پاناما ليڪس جي معاملي تي متفقه ٽي او آرز جي راهه ۾ وزريراعظم نوازشريف جي استعيفيٰ وڏي رنڊڪ آهي، تحريڪ انصاف، پيپلزپارٽي، جماعت اسلامي ۽ مسلم ليگ (ق) چاهين ٿيون ته وزيراعظم  پهرين استعيفيٰ ڏئي ۽ پوءِ جاچ جو مرحلو شروع ڪيو وڃي. ان جو مطلب اهو ٿيو ته هاڻي مخالف ڌر جو سمورو ڌيان وزيراعظم جي استعيفيٰ تي آهي، ان ئي سلسلي ۾ هڪ ڏينهن اڳ اسلام آباد ۾ پيپلزپارٽي جي سينيٽر چوڌري اعتزاز احسن جي رهائشگاهه تي ٿيل اجلاس ۾ مخالف ڌر جي جماعتن وزيراعظم کان استعيفيٰ جي مطالبي تي ئي گهڻو زور ڏنو، اجلاس ۾ وزيراعظم جي استعيفيٰ، چيف جسٽس جي سربراهي ۾ ڪميشن جي مطالبي ۽ پاناما ليڪس جي جاچ لاءِ انٽرنيشنل آڊٽ فرم جون خدمتون حاصل ڪرڻ تي اتفاق ڪيو ويو، ان موقعي تي مخالف ڌر جي جماعتن جو چوڻ هو ته وزيراعظم نوازشريف خلاف پاناما ليڪس جي معاملي تي جاچ 6 کان 8 هفتن ۾ مڪمل ڪئي وڃي. ساڳئي وقت پيپلزپارٽي جي چيئرمين بلاول ڀٽو زرداري جي صدارت هيٺ زرداري هائوس اسلام آباد ۾ پارٽي جي سينئر اڳواڻن جو اجلاس ٿيو، جنهن ۾ پ پ جي تيار ڪيل ٽي او آرز جو مسودو پيش ڪيو ويو ۽ چيو ويو ته پاناما ليڪس جي جاچ لاءِ انڪوائري ڪميشن 1956ع جي قانون تحت نه پر صدارتي آرڊيننس ذريعي جوڙي وڃي ۽ ان کي پارلياماني تحفظ به ڏنو وڃي، پيپلزپارٽي پاران اهو پڻ مطالبو ڪيو ويو ته ڪميشن سڀ کان پهرين وزيراعظم جي خاندان جي معاملن جي جاچ ڪري ۽ ڪميشن کي جاچ لاءِ ٽائيم فريم به ڏنو وڃي. جڏهن ته مخالف ڌر جون جماعتون عدالتي ڪميشن جي حوالي سان سپريم ڪورٽ جي چيف جسٽس کي لکيل خط جي جواب جون منتظر آهن، پر ان اجلاس جي پڄاڻي تائين چيف جسٽس طرفان ڪوبه جواب نه اچڻ تي فيصلو ڪيو ويو ته مخالف ڌر جو اجلاس ٻيهر سڏايو ويندو.

مخالف ڌر جي جماعتن پاران وزيراعظم نوازشريف کان استعيفيٰ جو مطالبو پنهنجي جاءِ تي، پر سوال اهو آهي ته انهيءَ گهُر جو مثبت جواب اچڻ جا امڪان ڪنهن حد تائين آهن؟ حڪومتي حلقن طرفان جاري ٿيندڙ بيانن مان اهو ئي تاثر ملي رهيو آهي ته وزيراعظم آڏو سندس استعيفيٰ جي مطالبي جي ڪابه اهميت ناهي، ڇوته کيس اهو چڱي ريت اندازو آهي ته مخالف ڌر جون جماعتون چيف ايگزيڪٽو جي استعيفيٰ جي مطالبي تي اتفاق پيدا نٿيون ڪري سگهن، جيڪڏهن انهن وچ ۾ اتفاق ٿي به ويو ته پارليامينٽ ۾ کين ايتري اڪثريت حاصل ناهي جو هو مسلم ليگ (ن) کي پارلياماني رستو اختيار ڪرڻ کانسواءِ اقتدار کان ڌار ڪري سگهن، سولن لفظن ۾ کڻي ائين چئجي ته مخالف ڌر جي جماعتن وٽ ايترا ميمبر ناهن جو هُو پارليامينٽ اندر وزيراعظم نوازشريف کي ڪنهن وڏي مشڪل ۾ وجهي سگهن. اهو به ٻڌايو پيو وڃي ته مخالف ڌر جي جن اڳواڻن وزيراعظم جي استعيفيٰ جي مخالفت ڪئي آهي، اهي ڪنهن نه ڪنهن طرح جي يو آءِ (ف) جي سربراهه مولانا فضل الرحمان جي اثر هيٺ آهن ۽ مولانا فضل الرحمان ڪڏهن به نه چاهيندو ته وزيراعظم نوازشريف کي اقتدار کان الڳ ڪيو وڃي.

تحريڪ انصاف جي سربراهه عمران خان ٻه ڏهاڙا اڳ لاهور ۾ جلسي دوران خطاب دوران جيڪو جارحاڻو انداز اختيار ڪيو، اهو يقينن اسلام آباد ۾ ڌرڻن وارن ڏينهن کان به گهڻو تلخ هو، ڏٺو وڃي ته هن وقت سياستدانن وچ ۾ جيڪا بليم گيم ۾ شدت اچي چڪي آهي، سا ڪنهن به ريت جمهوري قدرن ۽ ان کي هٿي ڏيڻ لاءِ فائديمند ثابت نٿي ٿي سگهي ۽ نه وري سياسي طور تي موسم کي ايترو گرمائڻ مناسب آهي جو ڪجهه سالن کان هلندڙ جمهوري تسلسل ۾ ڪا رڪاوٽ پيدا ٿي وڃي ۽ پوءِ جمهوريت جي دعويدارن کي ئي ان لاءِ هٿ هڻڻا پئجي وڃن. عجيب صورتحال آهي ته مسلم ليگ (ن) سڀني جي احتساب جو نعرو ته لڳائي رهي آهي، پر قومي اسيمبلي ۾ گذريل ڪجهه عرصي کان التويٰ ۾ پيل احتساب واري بل تي ڌيان ڇو نٿو ڏنو وڃي ته جيئن هڪ مستقل، آزاد، خودمختيار، اڻ ڌريو ۽ بااختيار احتساب جو ادارو قائم ٿي وڃي، جيڪو مستقل بنيادن تي ۽ سياسي انتقامي ڪارروائين کان هٽي ڪري پنهنجو فرض ادا ڪندو رهي.

حڪومت جي هر قدم تي اختلاف ڪرڻ ته مخالف ڌر جو ڪم هوندو آهي، پر ان جو هرگز اهو مطلب نه هئڻ گهرجي ته حڪومت جي ڪنهن به اهڙي نقطي تي ايتري حد تائين اعتراض ڪرڻ جو ڌريون هڪٻئي خلاف انتقام تي لهي اچن جو اختلاف جي ان شدت ۾ پارليامينٽ جي حيثيت ۽ اهميت به وسري وڃي ته پوءِ يقينن حڪومت توڙي مخالف ڌر جي اختلافن جو انجام بهتر نه نڪرندو. جيستائين پيپلزپارٽي جي چيئرمين بلاول ڀٽو زرداري پاران ڪجهه ڏينهن اڳ ڪوٽلي (آزاد ڪشمير) ۾ نواز سرڪار خلاف جنهن انداز ۾ جارحاڻو خطاب ڪيو ويو، اهو شايد ان سياسي جماعت لاءِ ضروري هجي ته جيئن پ پ فرينڊلي اپوزيشن واري طعني کان پاڻ کي بچائي سگهي، ڇوته اپوزيشن ليڊر خورشيد شاهه ۽ قمر الزمان ڪائره جيڪي بيان ڏين ٿا، ان مان اهو ئي واضح ٿي رهيو آهي ته هو مفاهمت واري پاليسي جا حامي آهن ۽ ٻئي سينئر سياستدان پارٽي چيئرمين بلاول ڀٽو جي بيانن جي حمايت ته ڪن ٿا، پر گڏوگڏ جمهوريت، جمهوري ادارن ۽ موجوده حڪومت کي هٽائڻ جي حوالي سان ڊيموڪريٽ آهن.

بهرحال، اختلافن کي ايتري حد تائين نه وٺي وڃڻ گهرجي جو مفاهمت به ٽڪراءُ ۾ تبديل ٿي وڃي ۽ ان جو نتيجو جمهوريت کي مضبوط ڪرڻ بدران آمريت واري صورت ۾ نڪري اچي.  ان ڳالهه کان انڪار ناهي ته اڳوڻي صدر آصف علي زرداري، اڳوڻي وزيراعظم سيد يوسف رضا گيلاني ۽ راجا پرويز اشرف تي ڪرپشن جا ڪيس آهن ۽ پ پ جي ٻين ڪيترن ئي بااثر شخصيتن تي سنگين الزام لڳل آهن، جيڪي عدالتن ۾ ڀوڳي به رهيا آهن، پر اهم ڳالهه اها به آهي ته پيپلزپارٽي ۾ به ڪيئي اهڙا اڳواڻ به موجود آهن، جيڪي احتساب گهرن ٿا، ساڳي ريت اهو مطالبو درست آهي ته پ پ وانگر مسلم ليگ (ن) جو به احتساب ٿيڻ گهرجي، جيڪڏهن احتساب رڳو هڪ طرفو ٿي رهيو آهي ته اهو عمل ڪنهن به صورت ۾ منصفاڻو نٿو ڳڻائي سگهجي.

هن وقت مخالف ڌر جي سياسي حملن ۽ حڪومت جي جوابي بيانن سان موسم ڪافي گرم ٿيندي نظر اچي ٿي، ان صورتحال ۾ ڪنهن به ڌر کي جمهوري رستو ڇڏي ڪري اهڙي واٽ اختيار ڪرڻ کان پاسو ڪرڻ گهرجي، جنهن سان نه رڳو جمهوريت پر پارليامينٽ لاءِ خطرو پيدا ٿئي. ان ڪري بهتر عمل اهو ئي آهي ته سياسي گرمي پد کي گهٽائڻ جي ڪوشش ڪئي وڃي، جيڪڏهن الزام بازي جي سهاري تي سياست ڪرڻي آهي ته اهو عمل ٻنهي حڪومت ۽ مخالف ڌر لاءِ چڱو ثابت نه ٿيندو، جيڪي به ڌريون جمهوريت جون حامي آهن، تن کي هر قدم ۽ هر فيصلي تي اها ئي سوچ اختيار ڪرڻي پوندي ته قيام پاڪستان کان وٺي هن وقت تائين ملڪ ۾ جمهوريت کان وڌيڪ آمريت پلجندي رهي آهي، جيڪڏهن آئين، پارليامينٽ جي بالادستي، جمهوري قدرن ۽ اخلاقيات کي نظرانداز ڪري اقتدار خاطر صبر ۽ تحمل جو دامن ڇڏي غير جمهوري رستو اختيار ڪيو ويو ته اهو فيصلو نه رڳو جمهوريت پر هن ملڪ جي ترقي ۽ خوشحالي لاءِ به نقصانڪار ثابت ٿيندو، ان ڪري چونڊيل نمائندن کي ڪنهن به فيصلي لاءِ رستن تي اچڻ بجاءِ پارليامينٽ جي فورم کي استعمال ڪرڻ گهرجي، اسين اهو نٿا چئون ته احتجاج ڪرڻ جائز عمل ناهي، يقينن اهو هر شخص ۽ سياسي جماعت جو جمهوري ۽ آئيني حق آهي، پر جيڪڏهن احتجاج ڪندڙ عوام جا چونڊيل نمائنده آهن ته انهن کي عوام جي ڏنل مينڊيٽ جو احترام ڪرڻو پوندو ۽ ساهه مُٺ ۾ بند ڪندڙ هن گرميءَ ۾ عوام جو امتحان وٺڻ کان پاسو ڪيو وڃي ته جيئن ملڪي نظام ۽ ڪارونهوار معمول تي اچي سگهي.

javed_abro@hotmail.com

 

سوال گڏيل مخالف ڌر جي اثرائتي ڪردار جو آهي: نسيم بخاري

جيتوڻيڪ لڳي ائين رهيو آهي ته مخالف ڌر جا سمورا همراهه ۽ سياسي پارٽيون پاناما ليڪس واري معاملي تي حڪومت خلاف هڪ آواز ٿي گڏيل حڪمت عملي سان آڏو ايندا، پر اهو خواب ساڀيائن کان رٺل سپنو ئي ثابت ٿيندو. ڇوته مخالف ڌر جي هر پارٽيءَ جي سوچ ويچار جو پنهنجو انداز آهي، انهن ۾ سياسي انائن جو به وڏو مرض آهي ۽ اهي هڪٻئي کان برتر هئڻ واري بيماري ۾ به مبتلا آهن. ان ڪري هو ڪيتري به گڏيل حڪمت عملي واري هام هڻن، پر ان دڳ تي هنن جو هلڻ انتهائي ڏکيو ۽ ناممڪن لڳي رهيو آهي. حڪومت جا ته هنن جيڪي ڪوٽ ڪيرايا، سي ڪيرايا پر هنن جا هٿ خود هڪٻئي جي ڳچين ۾ پوڻ نه شروع ٿي وڃن.

مثال طور تي جمعيت علماءِ اسلام جي اڳواڻ مولانا فضل الرحمان جو اهو بيان ان ڏس ۾ ابتدائي فشري وارو ثابت ٿي سگهي ٿي، جنهن ۾ چيو ويو آهي ته پاناما ليڪس تي احتجاج ڪندڙ يهودين جا ايجنٽ آهن. آف شور ڪمپنين تي احتجاج ڪندڙ ۽ ڌرڻا هڻندڙ پاڻ به آف شور ڪمپنين جا مالڪ آهن. مولانا اهو به چيو آهي ته عمران خان ٻڌائي ته هن لنڊن جي ميئر جي چونڊ ۾ مسلمان جي مقابلي ۾ پنهنجي يهودي ساٿي جي حمايت ڇو ڪئي هئي؟

تحريڪ انصاف جي اهم اڳواڻ جهانگير ترين جو چوڻ آهي ته هن گذريل پنجن سالن ۾ 27 ڪروڙ رپيا ٽيڪس ادا ڪيو آهي، جنهن جي ڀيٽ ۾ ميان برادران 20 سيڪڙو به ٽيڪس ادا نه ڪيو آهي. ٻي ۽ اهم بنيادي ڳالهه اها آهي ته هن جي ڪمائي حلال جي آهي ۽ ميان برادران حرام ڪمايو آهي. جهانگير ترين پنهنجي اولاد جي به ٻاهرين ملڪن ۾ ملڪيتن ۽ گهرن جي موجودگيءَ جو به اعتراف ڪري ٿو، پر هن جو چوڻ آهي ته سندس ضمير مطمئن آهي ۽ هن پنهنجي پورهئي سان ملڪ ۾ 70 ارب روپين جي سيڙپ ڪاري ڪئي آهي.

پاناما ليڪس چيمپرز جي انڪشافن کانپوءِ هاڻ اهي مطالبا به تيزيءَ سان آڏو اچي رهيا آهن، جنهن ۾ سوئس بئنڪن ۾ رقمون رکرائيندڙن ۽ ٻاهرين ملڪن ۾ ڪاروبار ڪندڙن تي اخلاقي طور تي پنهنجا پئسا ملڪ ۾ آڻي سيڙپڪاري ڪرڻ لاءِ دٻاءُ وڌندو پيو وڃي.

حزب اختلاف سرڪار جا ٽي آر اوز رد ڪري ڇڏيا آهن ۽ واضح لفظن ۾ ٻڌائي ڇڏيو آهي ته جيڪڏهن انهن جي آڌار تي چيف جسٽس ڪارروائي ڪندو ته اها کين قبول نه هوندي، ان ڪري سرڪار جي فرمائش تي نه پر حزب اختلاف جي ٽي آر اوز تي انڪوائري ڪميشن کي عمل ڪرڻو پوندو.

مٿين ڳالهه اڳيان باهه پويان پاڻي واري آهي، ڏسڻو اهو آهي ته ان آزمائشي گهڙين ۾ انڪوائري ڪميشن جو سربراهه ڪيئن ٿو پنهنجو پانڌ آجو رکي سگهي، اهو ان معاملي تي ڪو اثرائتو ڪردار ادا ڪري ٿو يا معذرت ڪري ڇڏي ٿو، اهو ايندڙ وقت کي طئي ڪرڻو آهي. اسان وٽ مخالف ڌر گذريل اٺن سالن کان رڳو نالي ماتر مخالف ڌر رهي آهي، ڇوته مخالف ڌر جو سڀ کان وڏو عنصر پيپلز پارٽي آهي ۽ پيپلز پارٽي پنهنجي دؤر ۾ جيڪا ڪِرت جاري رکي اها به ان کي ياد آهي، ان ڪري اها طئي ٿيل فارمولي تحت نواز ليگ جو گهيراءُ نه ٿي ڪري سگهي، ها باقي داٻي ۽ دهمان لاءِ بلاول ڀٽو زرداري ٻه ٽي ڀڀڪيون هنيون ته خير آهي.

ڪشمير ۾ ميان نواز شريف تي بلاول ڀٽو زرداري جي ڪيل ڪاوڙ ۽ ڪڍيل باهه واري ڀڙڪي کانپوءِ هاڻ سائين قائم علي شاهه، سائين خورشيد شاهه، قمر زمان ڪائره ۽ جيالن جي وڏي پلٽون بلاول جي تاعيد ۽ حق ۾ ڳالهائڻ شروع ڪري ڇڏيو آهي، جنهن کي مسلم ليگ (ن) ذهني طور نابالغ ۽ ٻار سمجهي ٿي ۽ جنهن جي بيان تي ڪو تبصرو ڪرڻ به مناسب نه ٿي سمجهي. مسلم ليگ (ن) جو چوڻ آهي ته ٻارن سان ليکا نه ڪبا آهن، ها باقي جيڪڏهن بلاول جي پيءُ ڪو بيان ڏنو ته ان تي ردعمل ظاهر ڪبو ۽ ڀرپور تبصرو ڪبو.اڳوڻو صدر آصف علي زرداري في الحال چپ جو روزو رکيو ويٺو آهي، بلاول ڀٽو جي ڀڀڪي ۽ آصف علي زرداري جي خاموشي مسلم ليگ (ن) سان ڪنهن اندروني بارگيننگ وارو تاثر پيدا ڪري رهي آهي،  ان حوالي سان جيڪڏهن ڪا ڪامياب اڳڀرائي آڏو آڻي ته آصف علي زرداري اينڊ ڪمپني جمهوريت کي بچائڻ لاءِ ميان برادران جي به اڳين صف ۾ هوندي. تحريڪ انصاف سان پيپلز پارٽي جو مزاج ملي ئي نه ٿو، اهي وقتي طور تي جيڪڏهن گڏجي ويٺا به ته بعد ۾ وڙهندا، ڇوته تحريڪ انصاف جو اڳواڻ ڪرپشن فري سوسائٽي جي هام هڻي ٿو، اهو ڪيئن ممڪن ٿيندو ته هو ان معاملي تي پيپلز پارٽيءَ سان ڪا مفاهمت ڪندو.

اها ڳالهه پيپلز پارٽي به سمجهي ٿي ته جيڪڏهن تحريڪ انصاف کي ڪو چانس مليو ته اها موقعو ملندي جيالن جي به جهڙتي وٺڻ شروع ڪندي، ان ڪري تحريڪ انصاف مان پ پ کي ڪنهن تحفظ ملڻ جي ڪا پڪ ناهي. پيپلزپارٽي جي ڪرپشن ۽ ڪڌن ڪرتوتن تي تحريڪ انصاف جيڪڏهن مصلحتي طور تي ڪک رکيا ته خود ان معاملي تي ميان نواز شريف جي مسلم ليگ (ن) ٻڙڌڪ مچائيندي، ان ڪري اهو نه ٿو لڳي ته پيپلز پارٽي ۽ تحريڪ انصاف حزب اختلاف جي مورچي تان گهڻو وقت گڏجي جٽاءُ ڪري سگهنديون.

پيپلز پارٽي ۽ مسلم ليگ (ن) کي گذريل اٺن سالن جي تجربي ٻنهي پارٽين کي هڪٻئي کان نه رڳو چڱي نموني عاشته ڪيو آهي، پر هنن کي پنهنجي عين ثوابن جي به پروڙ پئجي وئي آهي، ان ڪري ڪنهن ٻئي تجربي ڪرڻ جي معاملي ۾ ٻئي پارٽيون سؤ ڀيرا سوچينديون، تنهن ڪري توقع اها پئي ڪئي وڃي ته هڪٻئي مان جان ڇڏائڻ جي چڪر وارو تاثر ڏيڻ باوجود اهي ٻئي هڪٻئي جي مجبوري ۽ ضرورت ثابت ٿينديون اينديون.

پيپلز پارٽي ۽ مسلم ليگ (ن) ٻنهي جو حڪمرانيءَ وارو رڪارڊ ڪو ساراهه جوڳو نه رهيو آهي، انهن ٻنهي مان ڪنهن جي به حڪومت ۾ کير جون نديون نه وهيون آهن، نه مهانگائي کي مات آئي آهي نه وري بيروزگاريءَ جو باب بند ٿيو آهي، نه ڪا خوشحالي ٿي آهي، نه ئي ملڪ ڪا ترقي ڪئي آهي. هتي اڄ به صحت جون سهولتون اڻلڀ، بجلي غائب، گئس گم ۽ تعليم تباهه لڳي پئي آهي. سفري سهولتون ناهن، روڊ رستا ٽٽل ڦٽل آهن، ڪي به سماجي ڀلائي وارا ادارا سماج جي لاءِ آڪسيجن ثابت نه ٿا ٿين، عوام جو ڪو تحفظ ناهي، خلق لٽي، اجهي ۽ اٽي کان محروم آهي، ٻنهي پارٽين ٽي ٽي ڀيرا اقتداري منصب ماڻيا آهن، پر پوءِ به اڄ 20 سال اڳ واري ئي اوندهه آهي، اڃا هنن کي وقت کپي، اڃا هو مهلت گهرن پيا، انهن ٻنهي پارٽين مان عوام تنگ ٿي چڪو آهي، ان ڪري اهو طئي آهي ته انهن ٻنهي مان ڪابه سياسي ڌُر ڪنهن کي به گڏ کڻي هلي ته اها به سواليه نشان بڻجي ويندي.

ملڪ ۾ پردي پويان معاملا ٺاهيندڙ ۽ بگاڙيندڙ نهايت سنجيدگيءَ سان ان خيال تي ويچاري رهيا آهن ته ڪا اهڙي ڌر اڳيان آڻجي، جيڪا عوام لاءِ به قابل قبول هجي ۽ هنن جي به هٿ وس هجي. ان ڏس ۾ تحريڪ انصاف جو نالو زور شور سان کڄي رهيو آهي. تحريڪ انصاف پاڻ کي متحرڪ ڪرڻ ۽ خلق جي ويساهه کڻڻ جي ڏس ۾ وسان نه گهٽائي رهي آهي.

لاهور ۾ ٿيل تاريخي جلسي ان جو حوصلو وڌايو آهي، عمران خان ايندڙ آچر تي فيصل آباد ۾ پڙاءُ ڪرڻ جو اعلان ڪري ڇڏيو آهي. پاناما ليڪس واري معاملي تي الزام ثابت ٿيڻ جي صورت ۾ هو نواز شريف کي گهر نه پر جيل موڪلڻ جا ارادا رکي ٿو، ڏسڻو اهو آهي ته الزام ثابت به ٿين ٿا يا نه! الزام جي ثابتي لاءِ انڪوائري ڪميشن ڪهڙا جوهر ٿي ڏيکاري ۽ اها مخالف ڌر جو ڪيترو اعتماد ٿي حاصل ڪري، اهو سوال پڻ تمام وڏي اهميت وارو آهي، اسان وٽ انڪوائري ڪميشنون پنهنجي جاچ جي حوالي سان ”ڪنٽرولڊ“ ڏٺيون ويون آهن، ان جا دائرا محدود هوندا آهن، انهن وٽ وسيلن جو ڏڪر هوندو آهي ۽ سڀ کان وڏي ۽ اهم ڳالهه ته هنن وٽ وقت جي تنگي به هوندي آهي. سال گذري ويندا آهن، پر فيڪٽ اينڊ فائنڊنگ ڪميٽي ڪابه لاڀ حاصل ڪري نه سگهندي آهي، اهو ئي سبب آهي ته ماضي جي اهڙن تلخ تجربن سبب پاڪستان بابت جڳ جهان ۾ اهو تاثر ڏاڍي تيزيءَ سان مضبوط ٿيندي ڏٺو ويو آهي ته ڪنهن به معاملي کي دٻائڻ جو آسان طريقو جاچ ڪرائڻ جو اعلان آهي، نه جاچ ٿيندي نه ئي ڪنهن کي سزا ملندي، خلق به خوش ته سياستدان ۽ حڪمران به صحافين جا سوال به بند.

جنهن کانپوءِ جڏهن پڇندو ته ٺهه پهه اهو هڪ ئي جواب ڏيندو ته هو ڳالهائي ته سگهي ٿو، پر ان ڪري نه ٿو ڳالهائي ته جاچ هلندڙ آهي ۽ ڪٿي هن جي گفتگو سان هن جاچ متاثر ٿيڻ جو ڪو جواز نه پيدا ٿي پوي.

اسان وٽ ايف آءِ اي، نيب، ايف بي آر ۽ ٻيا ادارا ايترا آزاد ۽ خودمختيار ناهن جو حڪمرانن کي پگهر ڏياري ڇڏين، ان ڪري ضرورت ان ڳالهه جي آهي ته اڳ ۾ ادارن کي اهليت جي آڌار تي مضبوط بڻائجي، کين ڀرپور اختيار ۽ سهولتون ڏجن، انهن ۾ ناجائز سياسي مداخلتن جا در بند ڪجن، تڏهن ئي وڃي اهو ڪو ٻوٽو ٻاري سگهندا. ادارا ان ڪري مضبوط ۽ شفاف نه آهن، ڇوته حڪمرانن کي پنهنجو بچاءُ ڳولڻو هوندو آهي ۽ ادارن کي پنهنجو غلام بڻائڻو پوندو آهي.

 

ڪاڙهه ۽ لوڊشيدنگ

گرمي ۽ لوڊشيڊنگ هڪ ٻئي جي لاءِ لازم ۽ ملزوم بڻيل آهن. هڪ ڪاڙهي جهڙي گرمي، ٻيو بجلي بند، عوام جي زندگي زهر نه ٿيندي، سندن جيئڻ جنجالُ نه ٿيندو ته ٻيو ڇا ٿيندو. پاڪستان جو شمار انهن ملڪن ۾ ٿئي ٿو جيڪي قدرتي وسيلن سان مالا مال ملڪ آهن، يعني رب تعاليٰ اسان کي چئني مندن پاڻي، جبلن، ٿر، ميون، اناج، معدني وسيلن مطلب ته هر قسم جي نعمتن سان نوازيو آهي، جيڪي وسيلا اسان کي ميسر آهن، تن کي ڏسندي اسان وٽ نه ته توانائيءَ جو بحران هئڻ گهرجي، نه ئي غذائي قلت ۽ نه ئي وري بيروزگاري يا ٻيو ڪو مسئلو، پر بدقسمتيءَ سان اهي سڀ مسئلا اڄ به پاڪستان کي لڳل آهن، ۽ انهن جي حل لاءِ ڪابه سنجيده ڪوشش اڄ تائين ٿيندي نظر نه آئي آهي. ٺلهي نعريبازي ۽ اليڪشني نعرن جي حد تائين ته چئي سگهجي ٿو ته سياسي ڌرين توانائي بحران حل ڪرڻ جي ڏيکاءَ خاطر ڪا ڪوشش ڪئي به هجي پر عملي طرح ان سلسلي ۾ ڪاريءَ وارا ڪک نظر ايندا. پاڪستان ۾ سنڌ ۽ بلوچستان جي لڳ ڀڳ 600 ڪلو ميٽرن تي مشتمل سامونڊي پٽي آهي، جتي جي سنجيده ڪوششون ورتوين وڃن ها ته هزارين ميگا واٽ هوا مان بجلي پيدا ٿي پئي سگهي، جنهن کي ونڊ انرجي سڏجي ٿو. هالينڊ پاڪستان کان ننڍو ملڪ آهي، اتي جي سرڪار پنهنجي ملڪ ۽ قوم سان جيئن ته سچي ۽ سنجيده آهي، تنهن ڪري اتي 50 هزار ميگاواٽ بجلي هوا مان پيدا ڪئي وڃي ٿي، اتان جي سرڪار ملڪي توانائيءَ جون ضرورتون پوريون ڪرڻ ۽ عوام کي سستي اگهه تي بجلي ڏيڻ کانپوءِ جيڪا بجلي بچي ٿي سا اوڙي پاڙي جي ملڪن ۾ وڪڻي پئسو ڪمائي ٿي ۽ اهو پئسو وري ملڪ اندر صحت، تعليم ۽ بنيادي ڍانچي جي ترقيءَ تي خرچ ڪري ٿي. اسان وٽ سمنڊ ۽ ڊگهي سامونڊي پٽي هوندي به اسان اڃا تائين هوا مان بجلي پيدا ڪرڻ جي تجربن ۾ ئي پورا آهيون. نه رڳو ايترو سنڌ ۾ ٿر جي علائقي ۾ هڪ سئو 75 ارب ٽن ڪوئلي جا ذخيرا موجود آهن. اهو ڪوئلو، جتي ٿر ۾، جي سنڌ ۾ يا ايئن کڻي چئجي ته جي پاڪستان ۾ نه پر ڪنهن ٻئي ملڪ ۾ هجي ها ته ان مان هن وقت تائين الائجي ڪيترا لک ميگا واٽ بجلي پيدا ٿي چڪي هجي ها، نه رڳو بجلي پيدا ٿي چڪي هجي ها پر جنهن هنڌان اهو ڪوئلو نڪري ها، اتي جي ماڻهن جي زندگي ۽ رهڻي ڪهڻيءَ ۾ به وڏي انقلابي تبديلي به اچي چڪي هجي ها، پر ان جي ڀيٽ ۾ ڪوئلي جا هي ججها ذخيرا سنڌ جي جنهن تر ۾ آهن، اتي جي ماڻهن جي زندگيءَ ۾ ڪا انقلابي تبديلي جيڪا آئي سان ته ٺهيو ويتر اتان جا ٻار غذائي قلت سبب موت جي منهن ۾ آيل آهن ۽ هر سال سوڪهڙي جي مند ۾ هتان جي مارو ماڻهن طرفان پنهنجو مالُ متاعُ ڪاهي بئراجي علائقن ڏانهن لڏڻ ڄڻ ته سندن قسمت ۾ لکجي چڪو آهي. نه رڳو ايترو پر اسان جي ملڪ خاص ڪري سنڌ، پنجاب ۽ بلوچستان جا اڪثر علائقا سخت گرم علائقا ليکجن ٿا، جتي سيارو ٽي چار مهينا ۽ باقي سڄو سال ماڻهو مار گرمي هجي ٿي، يعني سج جي اهڙي تپش مان به ججهي بجلي تيار ڪري سگهجي ٿي، جنهن کي شمسي توانائي به سڏين ٿا، ٻيو ته پاڻيءَ مان به بجلي پيدا ڪرڻ جا وسيلا موجود آهن. اسان وٽ جيڪا به بجلي پيدا ٿئي ٿي سا پاڻيءَ مان ئي ٿئي ٿي، جنهن مان ملڪي گهرج پوري نه ٿي ٿئي. بجليءَ جي ملڪ اندر هونئن ئي کوٽ آهي، پر گرمين جي مند ۾ اها ويتري وڌي عوام جي عذابن کي ٻيڻو ڪري ڇڏي ٿي. حڪومت کي عوام جي اهنجن جو خيال ڪرڻ گهرجي.