تازيون خبرون

Daily Archives: April 30, 2016

ٽائيگر شيروف ۽ شرڌا ڪپور جي ايڪشن رومانوي فلم ”باغي“ رليزٿي وئي

ممبئي (شوبز نيوز)بالي ووڊ اسٽار ٽائيگر شيروف ۽ اداڪاره شرڌا ڪپور جي نئين ايڪشن ۽ رومانوي فلم ”باغي“ رليز ڪئي وئي آهي، هالي ووڊ فلمي پنڊتن فلم جي رليز ٿيڻ کان پهرين ان کي 2016ع جي سپرهٽ فلم قرار ڏنو آهي،سندن چوڻ هو ته اها فلم 100 ڪروڙ جي ڪلب ۾ شامل ٿيڻ جي ڀرپور صلاحيت رکي ٿي. سوشل ميڊيا تي فلم جي گانن کي ڏسندڙن تمام گهڻو پسند ڪيو آهي، ٻئي پاسي فلم جي هيرو ٽائيگر چاهيندڙن خاطر پاڙيسري ملڪ جي فلمن ۾ ڪم جو معاوضو گهٽ وٺڻ جو اعلان ڪيو آهي.

 

ريچا چڍا پراڊڪشن جي شعبي ۾ به قدم رکي ڇڏيو. فلم ” خون آلي چٺي“ پروڊيوس ڪندي

ممبئي (شوبز نيوز) انسان جڏهن ڪجهه بهتر ڪرڻ چاهيندو آهي ته مختلف شيون سندس سامهون اينديون آهن، اهڙو ئي ڪجهه بالي ووڊ اداڪارا ريچا چڍا سان ٿيو آهي، جيڪا هاڻ فلم پراڊڪشن جي شعبي ۾ به قدم رکي رهي آهي، ڀارتي ميڊيا مطابق ريچا چڍا جلد فلم ” خون آلي چٺي“ پروڊيوس ڪندي، جيڪا هڪ پنجابي فلم آهي، اهان هاڻ انگريزي ۾ ڊب ٿيندي، جنهن  جو مطلب آهي رت سان لکيل خط،فلم جي ڪهاڻي 80ع جي پڇاڙي ۽ 90ع واري ڏهاڪي جي شروع ۾ پيدا ٿيل خالستان تحريڪ تي ٻڌل آهي، جنهن ۾ دهشتگردي ۽ عام ماڻهن تي رياستي ظلم ڏيکاريو ويو آهي، ان حوالي سان ريچا جو چوڻ هو ته مونکي خوشي آهي ته مان هاڻ پروڊيوسر طور به سامهون اينديس، منهنجي هوشيار دوست رپيندر سنگهه بهترين فلم ٺاهي آهي، جنهن ۾ ڀارتي پنجاب ۾ 90ع واري ڏهاڪي جي خالستان تحريڪ جي واقعن کي اڀاريو ويو آهي، جيڪا ان وقت تمام گهڻي تيز هئي، هن چيو ته خون آلي چٺي بهترين ۽ مضبوط ڪهاڻي واري مختصر پنجابي فلم آهي،ريچا چيو ته اسان کي اميد آهي ته ان فلم کي ايندڙ سالن دوران فلمي ميلن ۾ وڏي جاءِ ملندي.

 

ٽيم فاسٽ بالنگ جي شعبي ۾ شديد بحران جو شڪار آهي، وسيم اڪرم جي سرپرستي ۾ ڪئمپ لڳائڻو پيو: عاقب جاويد

لاهور (اين اين آءِ) دنيا جي بهترين فاسٽ بالرز لاءِ مشهور پاڪستاني ٽيم هن وقت فاسٽ بالنگ جي شعبي ۾ شديد بحران جو شڪار آهي نون فاسٽ بالرن کي تلاش ڪرڻ لاءِ اڳوڻي ڪپتان وسيم اڪرم جي نگراني هيٺ ڪئمپ لڳائڻو پيو پاڪستان ڪرڪيٽ ٽيم جي هيڊ ڪوچ لاءِ درخواست ڏيندڙ اڳوڻو فاسٽ بالر عاقب جاويد هڪ ڏنل انٽرويو ۾ چيو ته سٺا فاسٽ بالر پيدا ڪرڻ لاءِ ماحول جو بهتر هجڻ ضروري آهي عاقب جاويد چيو ته ڪوچ طور تي مون اهو سکيو ته فاسٽ بالر لاءِ ٽي شيون انتهائي اهم آهن جنهن ۾ رفتار، جسامت ۽ غير معمولي صلاحيت سميت انفراديت ضروري آهي ۽ اها جديد ڪرڪيٽ جي ضرورت آهي. هن چيو ته ڪيريئر دوران ٽيم ۾ وقار يونس، وسيم اڪرم، عمران خان جي موجودگي ۾ منهنجي زندگي تمام مشڪل هئي مان ڄاڻان پيو ته مان واحد ماڻهو آهيان جنهن کي تبديل ڪري سگهجي ٿو.

 

پاڪستان ۽ انگلينڊ وچ ۾ ٽيسٽ، ون ڊي ۽ ٽي 20 سيريز پوائنٽن جي بنياد تي کيڏڻ تي اتفاق ٿي ويو

لاهور(اسپورٽس نيوز) پاڪستان ۽ انگلينڊ وچ ۾ ٽيسٽ، ون ڊي ۽ ٽي 20 سيريز پوائنٽن جي بنياد تي کيڏڻ تي اتفاق ٿي ويو آهي، ذريعن مطابق پاڪستان ۽ انگلينڊ وچ ۾ شيڊولڊ سيريز پوائنٽن جي بنياد تي کيڏي ويندي، ڊگهي فارميٽ يعني ٽيسٽ ميچز جون 4 پوائنٽ هونديون، جڏهن ته ون ڊي ۽ مختصر فارميٽ يعني ٽي 20 ميچز جون 2، 2 پوائنٽون رکيون ويون آهن. ذريعن جو چوڻ آهي ته ميچ برابر ٿيڻ جي صورت ۾ پوائنٽون اڌ اڌ هونديون. پوائنٽن جي بنياد تي سيريز کيڏڻ سان ڪا به سيريز برابري تي ختم نه ٿيندي.

 

تعليم جي سڌاري لاءِ جذبي ۽ جنون جي ضرورت: ماجد مقصود

سنڌ جي تعليم جي سينئر وزير نثار احمد کهڙي ڪتابي ميلي جي هڪ تقريب ۾ خطاب ڪندي چيو ته سنڌ ۾ تعليم جي بهتري لاءِ اسان کي هڪ جذبي ۽ جنون جي ضرورت آهي. مان سمجهان ٿو ته هي هڪ بهترين پيغام آهي، ڇو ته سنڌ جي تعليم جي حوالي سان جيڪا تباهي ۽ بربادي ٿي آهي، ان کي رڳو حڪومت ٺيڪ نٿي ڪري سگهي؛ عوام جو ساٿ انتهائي ضروري آهي. سنڌ ۾ هن وقت 60 لک ٻار اسڪولن کان ٻاهر آهن، ان جو سبب رڳو اسڪول نه هئڻ يا گهوسٽ ملازم نه آهن، پر ان جا ٻيا به ڪيترائي سبب آهن، جن تي اسان کي سوچڻ کپي. جيئن سنڌ ۾ جتي اسڪول کليل آهن ۽ استاد به موجود آهن، اتي به ٻار اسڪولن ۾ نٿا اچن. اسين چئون ٿا ته اسڪولن ۾ سهولتون گهٽ آهن، پر جتي سڀ سهولتون آهن، انهي آبادي ۾ به اوهان کي 60 سيڪڙو ٻار اسڪول ۾ نٿا ملن. چئون ٿا ته وڏيرا اسڪول نٿا هلائڻ ڏين، پر جتي وڏيرا اسڪول هلائڻ لاءِ پاڻ ڪوششون پيا ڪن اتي به ٻار نٿا اچن. وري ڪجهه دوست چون ٿا ته حڪومت بجيٽ نٿي رکي ۽ اسڪولن کي پئسا نٿا ملن، پر مان اهڙا ڪيترائي اسڪول وزٽ ڪري چڪو آهيان جن جي اڪائونٽس ۾ پئسا موجود آهن پر اُهي پئسا استاد ۽ ڳوٺ جو چڱو مڙس اسڪول تي خرچ نٿا ڪن ۽ انهن ۾ جهڳڙو هوندو آهي ته پئسا هو پنهنجي ذاتي ڪم لاءِ استعمال ڪن. اسان وٽ هر ماڻهو رڳو وڏا وڏا بحث ٿو ڪري پر سنڌ جي تعليم جي حوالي سان حقيقي مسئلن جي نشاندهي نٿو ڪري.

سنڌ جي تعليم ڪنهن غيبي هٿ سبب تباهه نه ٿي آهي، اچو ته تسليم ڪيون اسان پاڻ اُن جا ذميوار آهيون. اسان تعليم کي ملڪ ۾ ٻين ادارن جي ڪرپشن سان ڀيٽ ڪري ويهي رهياسين ته ذميوار حڪمران آهن، تسليم ٿا ڪيون ته ذميوار حڪمران آهن. معنيٰ ته اسان جيڪي سنڌ سان عشق جا دعويدار آهيون، ان جي ڪا ذميواري ڪانهي، سڀاڻي حڪمران ايم ڪيم ايم سان گڏجي سنڌ ورهائي ڇڏيندا ته اسان خاموش ٿي ويهي رهنداسين ته حڪمران ذميوار آهن، اسان ڇا ڪيون. مان نٿو سمجهان ته اسان ائين ڪنداسين، تنهنڪري جيڪي ماڻهو سنڌ جي تعليم تباهه ڪري رهيا آهن، اُهي سنڌ وڪڻي رهيا آهن، انهن جو هر سطح تي گهيراءُ ٿيڻ کپي پر بدقسمتي سان ائين نه پيو ٿئي.

سنڌ جي ماڻهن تاريخ ۾ وڏيون غلطيون ڪيون آهن ۽ اسين سنڌ واسي اڄ ان جا نتيجا ڏسي رهيا آهيون، اسان ڌارين کي قبول ڪيو، اڄ حالتون اسان جي سامهون آهن. اوهان رڳو پاڪستان کان اڳ جي تاريخ پڙهو ته اسان ڇا هئاسين ۽ اڄ اسين ڪٿي بيٺا آهيون. مان سمجهان ٿو اڄ جيڪڏهن اسان تعليم جي معاملي تي سنجيده نه ٿياسين ته اها به تاريخ ۾ وڏي غلطي هوندي ۽ اسان جو ايندڙ نسل ڀوڳيندو. هڪ ته سنڌ ۾ نوڪريون آهن ئي ڪونه، ٻيو وري جيڪي آهن اتي سنڌ جي ماڻهن کي نااهل سمجهي ٻاهر جا ماڻهو رکيا ويندا آهن ۽ ادارن ۾ غير سنڌي ماڻهن کي ڌڪاريو ويندو ۽ جيڪي ڌاريا هوندا، انهن جي ترجيح سنڌ جا مفاد هرگز نه هوندا ۽ مون کي لڳي ٿو اهو وقت پري ناهي جڏهن سنڌ جي ادارن ۾ اوهان کي رڳو ڌاريا ملندا.

جيئن ته سنڌي معاشرو تمام وڏن تضادن جو شڪار آهي ۽ ان ڪري اسان مجموعي طور تي قومي مفادن لاءِ نٿا وڙهون، اسان جي نااتفاقي جو ڌاريو ماڻهو پورو پورو فائدو ٿو وٺي. جيئن اسان جي معاشري ۾ ٻه شاعر، ٻه اديب ٻه قومپرست پاڻ ۾ نٿا ٺهن، اهڙي طرح سنڌ جي آفيسرن جو به اهو حال آهي. ڇو ته اُهي به انهيءَ معاشري جو حصو آهن. وزير مشير ۽ سيڪٽريز کان ويندي اسان جي پوري تعليم يافتا طبقي جو ساڳيو حال آهي، تنهنڪري ضرورت ان ڳالهه جي آهي ته اسان کي پنهنجي قومي مفادن تي ڪنهن ننڍي ۾ ننڍي ايجنڊا تي هڪ ٿيڻو پوندو. ٻي صورت ۾ دير گهڻي ٿي ويندي ۽ اسين وڏو نقصان ڪري ويهي رهنداسين.

توهان جيڪڏهن ڊپٽي ڪمشنر يا ڪمشنر جا اختيار پڙهو ته اوهان کي خبر پئجي ويندي ته اُهي سنڌ جي تعليم جي بهتري لاءِ ڪيڏو اهم ڪردار ادا ڪري سگهن ٿا. ڇا اُهي سنڌ ڄاوا نه آهن، ڇا هو پنهنجي ضلعي جا اسڪول نٿا کولرائي سگهن، جيڪڏهن حڪمران ڪرپٽ آهن ته اسين به سڀ جا سڀ ڪرپٽ ٿي وڃون ۽ ڇا اسان جا ضمير مري ويا آهن. مان رڳو ڪمشنر يا ڊپٽي ڪمشنر جي ڳالهه نٿو ڪيان، ڇا تعليم کاتي جا آفيسر چاهن ته اسڪول جو استاد غير حاضر ٿي سگهي ٿو؟ ڇا انهن جي ڪا ذميواري نه آهي، اسان جا رائٽر به رڳو حڪمرانن تي لکن ٿا پر سنڌ جي بيورو ڪريسي تي نٿا لکن، جيڪا پاڻ سليڪٽو تنقيد آهي، تنقيد ٿيڻ کپي ته معاشري جي سڀني ذميوارن تي ٿيڻ کپي، جيڪي پنهنجي ذميواري نه پيا نڀائين.

ڪجهه دوست سمجهن ٿا ته سڄو معاشرو ڪرپٽ آهي، تنهنڪري اسان اڪيلا ڪجهه نٿا ڪري سگهون ۽ پوءِ اُهي ڪرپٽ معاشري جو حصو ٿي ويندا آهن. مان سمجهان ٿو ته اها ايپروچ ئي غلط آهي ته اسين اڪيلا ڪجهه نٿا ڪري سگهون؟ ڇا اسان جا ڪمشنر، ڊپٽي ڪمشنر ڪجهه نٿا ڪري سگهن؟ ۽ جيڪي ادارن جا سربراهه آهن ڇا اُهي ڪجهه نٿا ڪري سگهن؟ ڇا وائيس چانسلر يونيورسٽي جي ماحول کي بهتر نٿو ڪري سگهي؟ ڇا ڪنهن ڪئمپس اسڪول جو هيڊ پنهنجي اسڪول جي اسٽاف کي پابند نٿو ڪري سگهي؟ ڇا ڪو پرنسيپل پنهنجي ڪاليج جا ريگيولر ڪلاس نٿو هلائي سگهي، جيڪا هنن سڀني آفيسرن جي ذميواري آهي.

مان اڄ وري ڪجهه آفيسرن جي تعريف ڪرڻ چاهيندس جيڪي پنهنجي ادارن ۾ اُهو ڪم ڪري رهيا آهن جن جو مون مٿي ذڪر ڪيو آهي. سانگهڙ ضلعي جو ڊپٽي ڪمشنر عمر عثمان بلو جنهن پنهنجي ضلعي ۾ تعليمي حوالي سان انقلابي ڪم ڪيا آهن، جڏهن ته سانگهڙ ضلعو پوري سنڌ ۾ تعليم جي حوالي سان پٺ تي پيل آهي، ان ضلعي ۾ صحت ۽ صفائي جي حوالي سان به جام ڪم ڪيا آهن، پر تعليم جي حوالي سان هن پنهنجو اثرائتو ڪردار ادا ڪيو آهي. هن 150 بند پيل اسڪول کولرايا آهن، پاڻ ريگيولر اسڪولن جا وزٽ ڪن ٿا، ضلعي ليول تي جيڪا ڪرپشن هئي، ان جو خاتمو آندو اٿن ۽ پاڻ ڏينهن رات ڪوشش ڪري رهيا آهن، ضلعي جي ترقي جي لاءِ ڪي ڪم ڪري سگهجن.

اهڙا سنڌ ۾ ٻيا به آفيسر هوندا جيڪي پنهنجو ڪم تمام گهڻي ايمانداري سان ڪري رهيا آهن، پر بدقسمتي سان انهن جو تعداد تمام گهٽ آهن، اسان وٽ اهڙا آفيسرز پڻ آهن جيڪي ڪاغذ کي هٿ لائڻ به پنهنجي توهين سمجهندا آهن، جيڪڏهن ڪو خط ايندو اٿن ان کي آستانا پائي پوءِ کوليندا آهن ۽ اُهي وڏن وڏن ضلعن ۽ ڊويزنن جا آفيسرز آهن، پوءِ انهن کان اسان ڪهڙي اميد ڪيون ته اُهي سنڌ ۾ بند پيل اسڪول کولرائيندا.

مان پوئين هفتي ڪراچي ۾ قائداعظم اسڪول جو وزٽ ڪيو، جيڪو اسڪول گڏاپ ۾ آهي ۽ 1988ع ۾ ٺهيو، جڏهن ته اُهو علائقو هڪ جهنگل هو پر اسڪول کي آفندي فيملي جي هڪ شخصيت نثار آفندي ٺهرايو. مان ان اسڪول جي هاسٽل ۾ رهيس، استادن ۽ شاگردن کان اسڪول جي باري ۾ خبر چار ورتم. هن اسڪول ۾ انٽر تائين تعليم ڏني ويندي آهي ۽ پرائيويٽ اسڪول آهي جنهن کي سنڌ مدرسته الاسلام هلائي ٿو، جنهن جي تمام مناسب في آهي، جتي استادن ۽ شاگردن لاءِ هاسٽلز پڻ آهن ۽ سنڌي آبادي جا غريب شاگرد اتي پڙهن ٿا. اوهان جڏهن هن اسڪول جي بلڊنگ ڏسندؤ ته اوهان کي بيحد خوشي ٿيندي، انتهائي خوبصورت نموني سان ٺهيل آهي. هن بلڊنگ کي ڪنهن ڪئنيڊين آرڪيٽيڪٽ ٺاهيو هو، ان ڪري اتي جا ماڻهو ان کي ڪئنيڊين بلڊنگ چون ٿا، تمام گهڻي هوادار، تمام وڏا ڪلاس رومس ۽ جديد ڪمپيوٽر ليب ۽ مختلف راندين لاءِ ميدان آهن. سڄي اسڪول جي بلڊنگ ۽ ايريا 200 ايڪڙ تي مشتمل آهي. مان اسڪول ۾ اهو سوچي رهيو هئس ته سنڌ ۾ ڪيترا وڏيرا آهن، جيڪي اهڙي قسم جا اسڪول پنهنجي ضلعي ۾ ٺهرائي سگهن ٿا پر اُهي ڇو نٿا ٺهرائين؟

سنڌ جو وڏيرو به تاريخ ۾ مرڻ ٿو چاهي پر اهڙا ڪم نٿو ڪرڻ چاهي، جنهن سان هو تاريخ ۾ زنده رهي، جيئن نثار آفندي تاريخ ۾ هميشه زنده رهندو. سنڌ جا هزارين شاگرد ان جي اسڪول ۾ پڙهندا ۽ ان جو ذڪر ڪندا رهندا.

مان پنهنجي ڪالم ذريعي سنڌ جي سڀني امير وڏيرن کي عرض ٿو ڪريان ته اُهي پنهنجن پنهنجن علائقن ۾ اهڙا وڏا اسڪول کولين ۽ سنڌ جي تعليم جي حوالي سان سنڌ سنوارين، مان يقين سان چوان ٿو ته هو تاريخ ۾ زنده رهندا ۽ اهڙن ماڻهن لاءِ ته استاد بخاري چيو هو ته، ”مون کي تاريخ ۽ تقدير ڏني پڪ آ، جو سنڌ سنواري اُهو جيئندو رهندو“.سنڌ جي تعليم لاءِ ڪم ڪرڻ سنڌ سنوارڻ آهي، تنهنڪري اچو ته ان جذبي ۽ جنون سان تعليم لاءِ ڪم ڪيون، جنهن جو ذڪر تعليم جي سينئر وزير ڪيو آ.

majidmaqsod@hotmail.com

 

 

 

ڌرتيء سان وفاڪنهن جي،  جفا ڪنهن جي!: شفيق شاڪر

پنهن جي ديس ،پنهن جي ڌرتي ۽ پنهن جي مٽيء جي سڳنڌ ئي پنهن جي آهي.اها ڌرتي جنهن جي کک مان ماڻهو جنم ورتو،جنهن جي هنج ۾ ٻاراتڻي جا ٻول ٻوليا،جنهن جي سيني جي پچايل هن ڪڻڪ کاڌي،جنهن جي ٿڻن جي هن ٿڃ پيتي ۽ جنهن مٽيء جي گود ۾هن کي قيامت تائين ابدي ننڊ سمهڻو آهي.ان مٽي جو هڳاء هانء کي ڪيئن نه محسوس ٿيندو هوندو،ان جي سينڌ جي سرهاڻ سريڙ کي ڪيئن نه سرهو ڪندي هوندي.ان جي ۾محبت ڀري ممتا جي وسيع چادر ڪيئن نه انسان جي اندر ساڻس وفا،عقيدت ۽ قربانيء جي جذبن جون مست ڇوليون بيدار ڪندي هوندي. پر انهيء ئي ڌرتيء جي سيج تي اهڙا  هزارين بدنصيب به براجمان ملندا جيڪي جنهن ڌرتيء جي کک مان جنم وٺندا آهن انهيء ئي جي ئي سيني تي مڱ ڏريندا آهن.جنهن پاڻيء مان پنهن جي اڃ اجھائيندا آهن انهيء ۾ ئي پيشاب ڪندا آهن.جنهن ٿالهيء ۾ کائيندا آهن انهيء ۾ ئي ڇيد ڪندا آهن.انهن نڪ جي ڏاڍن ۾ ڪهڙو ضمير تلاش ڪجي جو اهي ته پنهن جي ماتا کي ئي نٿا سڃاڻن.پنهن جي جنم ڀوميء کي نٿا بخشين.اهي سچ پچ سڃيا آهن جن وٽ تاريخ يا ڌرتي واسين کي ڏيڻ لاء ڪجھ به ڪونهي.صرف مفادن جون مشينون،کاڌي جون کڏون،پئسو ڪٺو ڪندڙ روبوٽ،بي اصولين جا ڀنڊار.ڌرتي واسين کي ساڻن سدائين شڪايتون رهن ٿيون ته اهي اسان سان سچا ناهن،اهي سچا ٿي به ڪيئن ٿا سگھن جڏهن جو اهي ڌرتيء سان ئي سچا ناهن!اهي گهمندڙ ڦرندڙ زنده لاش جن کي ڌرتي صدين کان پنهن جي سيني تي کڻي گھمائيندي وتي.اهي نه رڳو خودغرض ، مطلب پرست ۽ لوڀي آهن پر نهايت ئي ڪند ذهن،تنگ نظر ۽ اٺ وانگر صرف چند قدم ئي اڳيان ڏسندڙ آهن.اهي کوھ جي ڏيڏر جيان پنهن جي ذات جي کول جا قيدي آهن.انهن کي آزداديء جي مفهوم جو پتو ئي ڪهڙو جو اهي پنهن جن حقير ۽ غيرپائيدار خواهشن جا غلام ۽ نه کٽندڙ حسرتن ۽ ارمانن جا مقبرا آهن.اهي اهڙي مخلوق آهن جيڪي زنده هوندي به مئل ۽ پنهن جي ئي ساھ جي سوڙه ۾ ورتل آهن. ڪنهن روشن خيال،وسيع النظر ۽ ڪشاده دل معاشري جي ويجھو انهن جو گذر ٿيو ئي ناهي.انهن جو پنهن جو سماج ۽ پنهن جي دنيا آهي جتي هر شيء کي  مال،ملڪيت، اختيار، استحصال ۽ استڪبار جي ڪسوٽيء تي پرکيو وڃي ٿو،انهن جو سماج اڄ به دنيا ۾ ايندڙ تيزيء سان مثبت تبديلين کان بيگانو آهي،انهن جي سوچ اڄ به انسانيت جي عظيم آدرشن ۽ اصولن کان وانجھيل آهي.خوشفهمي اها جو اهو طبقو پنهن جو پاڻ کي دنيا جو مهذب،سڌريل ۽ عزتدار طبقو سمجھندو آيو آهي.پر انهن جي اندر ۽ سوچن جي گدلاڻ خود انهن جي سرهاڻ سنگھڻ واري حس ئي بيڪار بنائي ڇڏي آهي.انهن کي غلطفهمي آهي ته هي جا خلق سندن اختيار۽ دولت جي ڏاڍ تي انسانن کي غلام بنائي رکڻ لاء وڇايل سندن مسنند جي عزت ڪري ٿي سو اها مخلوق انهن سان محبت به ڪري ٿي!چند لمحن لاء ئي سهي پر وٽانئن اهي سڀ اختياري اوزار ۽ ظلم جا هٿيار کسيا وڃن ته پتو پئجي ويندو ته خلق خدا انهن سان واقعي ڪيتري محبت ڪري ٿي! انهن کي اها سڀ خبر آهي تڏهن ته اهي هڪ گھڙيء لاء به اهي ڪرسيون،مسنندون،سيجون ۽ گاديون ڇڏڻ لاء تيار ناهن، سڀني الزامن، خوارين ۽ بدنامين باوجود اهي هر قيمت تي اختيار ۽ دولت جي ديويء سان چنبڙيل رهڻ چاهين ٿا. جواهي ايترا ته بي پهچ ۽ لاچار آهن جو ان سهاري سواء هڪ قدم به هلي نٿا سگھن.

بئي طرف اهي ڌرتيء ڄاوا جن ڌرتيء تي حق حلال جي محنت ۽ مزدوري ڪندي پنهن جون زندگيون گذاري ڇڏيون،روزگار جي مجبورين سبب وطن ڇڏي پرديس وڃڻو به پيو ته اتي به محنت ڪيائون،رزق روزي ڪمايائون پر پنهن جي ڌرتيء جي درد کان هڪ گھڙي به غافل نه ٿيا.پنهن جي پگھر پسيني سان پورهيو ڪري جيڪو پئسو ڪمايائون اهوبه وطن موڪليندا رهيا.وطن جا اهي پورهيت ۽ هاري تن جي عظمت کي سلام ڇونه ڪجي،جيڪي هروقت ڌرتيء جي جان ۾ جان وجھندا  ٿا.رهن زندگيء جو هڪ ڊگھو ۽ دشوار سفر،ڏک ڏولاوا،رکو سکو ڀور جيڪو مليو سو شڪر ڪري کائي ڇڏيائون.پنهن جن هٿن سان پوکيل اناج مان پنهن جو ڪو گدام نه ڀريائون،سندن سخت هٿن جي ترين تي پيل زخمن جا نشان اهو قسم کائي گواهي ڏيئي رهيا آهن ته بکن ۽ ڏکن جي سمورين انتهائن هوندي به انهن جو پنهن جي ڌرتي سان روح جو رشتو ۽ نينهن جو ناتو آهي.

اهي ڳڀرو جوان  به هن ڌرتيء جا اهڙا دلير پٽ آهن جيڪي پنهن جي ڌرتيء کي هر بدامني ۽ بدمعاشيء کان بچائڻ لاء جان هٿ تي رکي دليريء سان وڙهندا ٿا رهن،اهي ان وقت جاڳندا آهن جڏهن ٻيا ڌرتي واسي ٿڪي ٽٽي مزيدار ننڊ ۾ مسحور هوندا آهن بلڪل اهڙيء طرح جيئن ماء جي ممتا جو جذبو هر وقت جاڳيل رهي ٿو.اهي استاد،ڊاڪٽر،اديب،صحافي،وڪيل،ڪامورا ۽ سياستدان به پنهن جي ڌرتي ماء جا حلالي فرزند آهن جن کي ڪوبه مفاد،لالچ يا خوف ڌرتيء سان دولاب جي لاء هرگز اڀاري نٿو سگھي،اهي ئي هن ڌرتيء جي سونهن ۽ هن ڌرتيء جي محفوظ مستقبل جي ضمانت آهن.

ٻئي طرف هن ئي ڌرتيء تي ڄاول حڪمرانن،عملدارن ۽ واپارين جو پنهن جي ڌرتيء سان محبت ۽ وفا جو اهو حال آهي جو انهن مان گھڻا هن ڌرتيء کي پنهن جي لاء يا ته ۾محفوظ ئي نٿا سمجھن يا وري هن ڌرتيء کي پنهن جي رهڻ جي قابل ئي نٿاڀانئين.هن ملڪ مان ڪيتريون وڏيون رعايتون، اختيار، اعزاز ۽ ملڪيتون حاصل ڪرڻ باوجود اهي اڄ به هن ڌرتيء ۽ ڌرتي ڌڻين لاء بيگانا آهن. سندن ڪاروبار،محل،ملڪيتون ۽ خاندان ملڪ کان ٻاهر آهن،ايستائين جو سندن سياست جا مرڪز به ملڪ کان ٻاهر آهن.شايد پنهنجي ڌرتيء جي مٽي انهن مان تنگ آهي!

*****

 

پانامه ليڪس معاملو۽ تيل جا اگهه برقرار رکڻ جو اعلان

وزيراعظم پيٽروليم شين جي اگهن ۾ واڌ واري سمري رد ڪري ڇڏي، بجلي به اڍائي رپيا سستي ڪرڻ جو اعلان ڪري ڇڏيو آهي، مانسهره ۾ عوام کي خطاب ڪندي وزيراعظم نواز شريف چيو ته مون کي پيٽروليم شين جا اگهه وڌائڻ جي سفارش ڪئي وئي هئي، جنهن کي مون رد ڪري ڇڏيو، هلندڙ مهيني تيل جي اگهن ۾ ڪنهن به قسم جي واڌ نه ڪئي ويندي، وزيراعظم اعلان ڪيو ته بجلي جا اگهه به سستا ڪرڻ جي هدايت ڪري ڇڏي آهي، بجلي اگهن ۾ اڍائي رپيا في يونٽ گهٽتائي ڪئي ويندي، پيٽروليم شين ۾ واڌ نه ڪرڻ سان حڪومت کي 8 ارب رپين جو خسارو ٿيندو، جنهن کي خوشي سان قبول ڪرڻ لاءِ تيار آهيان، آئون جلسن جلوسن لاءِ نه پر پاڪستان جي ترقي جي سفر تي نڪتو آهيان، اسان ڌرڻن جي نه پر ملڪ جي ترقي، ڪاميابي ۽ خوشحالي جي ايجنڊا رکون ٿا، پاڪستان کي دنيا جو بهترين ملڪ بڻائڻ جو عزم ڪري رکيو آهي، اسان نعرا ناهيون لڳرائي رهيا پر عملي طور تي ڪم ڪري رهيا آهيون، پاڪستان هن وقت ترقي جي رستي تي هلي رهيو آهي، مهانگائي جو جن بوتل ۾ بند ڪري ڇڏيو آهي، ملڪ هن وقت معاشي ٽيڪ آف جي پوزيشن ۾ اچي ويو آهي، دهشتگردي ختم ٿي رهي آهي، 2018ع انشاالله لوڊشيڊنگ جي خاتمي جو سال هوندو، پاڪستان جي ترقي جي ايجنڊا سبوتاز ڪرڻ جي اجازت نه ڏينداسين، خيبرپختونخواهه ۾ حڪومت نه هجڻ باوجود وڏا منصوبا مسلم ليگ ن جي حڪومت بڻايا آهن، حويليان کان شنڪياري تائين موٽر وي به شروع ٿي رهي آهي برهان کان شنڪياري تائين جو سفر هاڻي ڏيڍ ڪلاڪ ۾ طئي ٿيندو، جنهن لاءِ ان کان اڳ سفر طئي ڪرڻ ۾ 5 ڪلاڪ لڳندا هئا، شنڪياري موٽر وي 2018ع تائين مڪمل ٿي ويندو، مانسهره ٽن ترقياتي رٿائن جو بنياد رکيو، مانسهره ۽ هزارا لاءِ گيس جي فراهمي سميت ڪيترن ئي ترقياتي رٿائن ۽ هزارا يونيورسٽي کي هڪ ارب رپيا ڏيڻ جو پڻ اعلان ڪيو.

مونکي چيو ويو ته پيٽروليم مصنوعات جون قيمتون دنيا ۾ وڌڻ سبب پاڪستان ۾ به پيٽروليم مصنوعات جي قيمتن ۾ اضافو ڪيو وڃي. مون کي سفارش ڪئي وئي هئي ته پيٽرول جي قيمت ۾ 3 روپيا، ايڇ او بي سي ۾ 3 روپيا 25 پئسا، ڊيزل 4 روپيا 41 پئسا ۽ گاسليٽ جي قيمت ۾ به اضافي جي سفارش ڪئي وئي هئي، پر مون اها سمري رد ڪري ڇڏي آهي. پيٽروليم مصنوعات جي قيمتن ۾ اضافي جي سمري تي لاڳاپيل عملدارن کي ٻڌايو آهي ته آئون ڍڍيال ۽ شنڪياري جلسو ڪرڻ وڃي رهيو اهيان ۽ هي وڏي عجيب ڳالهه هوندي ته هتان آئون جلسو ختم ڪري نڪران هتي پيٽرول مصنوعات جون قيمتون وڌڻ جي خبر اچي وڃي،

ڪجهه ڏينهن کان پاناما ليڪس معاملو زور شور سان جاري آهي جنهن جي زور تي اپوزيشن سميت اهي پارٽيون به ميدان ۾ لٿل   آهن جن وٽ يوسي جي به سيٽ ناهي، وزير اعظم خلاف گهيرو تنگ ٿيندو پيو وڃي ۽ عين ان موقعي تي وزير اعظم جو تيل جا اگهه نه وڌائڻ ان ڳالهه طرف واضح اشارو آهي ته پاناما ليڪ معاملي وزير اعظم کي منجهائي ڇڏيو آهي ان ڪري هو عوام ۾ پنهنجي ساک کي برقرار رکڻ خاطر اهڙو قدم نه پيو کڻن گهري جنهن سان اپوزيشن بعد عوام به سندس جي خلاف ٿي وڃي، ان ڪري ئي وزير اعظم تيل جا اگهه وڌائڻ جي سمري به رد ڪري ڇڏي آهي جئين عوام پنهنجي روز مرهه جي معمول ۾ مشغول رهي ۽ پانامه ليڪس معاملي ۾ نه پوي.