تازيون خبرون

Daily Archives: April 29, 2016

جلسن جي مهم لاءِ نه ترقي ۽ خوشحالي جي سفر تي نڪتو آهيان: نواز شريف

مانسهرا (اين اين آءِ) وزيراعظم محمد نواز شريف چيو آهي ته پير ڪڍڻ وارا ملڪ جي ترقي واري راهه ۾ ايندا ته عوام کين ٻاهر ڪڍي اڇلائي ڇڏيندو، اسان ڌرڻن جي نه پر بيروزگاري جي خاتمي ۽ پاڪستان جي ترقي ۽ عوام جي خدمت واري اينجنڊا رکون ٿا، هن چيو ته ڪي پي ڪي ۾ تمام ترقياتي منصوبا هو پاڻ مڪمل ڪري رهيا آهن، هن سوال ڪيو ته نئون پاڪستان ڪيڏانهن ويو؟  رڳو زباني نعرا نٿا هڻو پر عملي طور تي ڪم ڪري رهيا آهيون، هن چيو ته پيٽروليم وزارت طرفان تيل جي اگهن ۾ اضافي جي سمري اماڻي وئي جنهن تي اسان معزرت ڪئي، جڏهن ته بجلي به اڍائي رپيا في يونٽ سستي ڪري رهيا آهيون، هن چيو ته اسان جا 5 سال پورا ٿيندا ته قوم کي خوشحال پاڪستان نظر ايندو، هن چيو ته لوڊشيڊنگ هميشه دفن ٿي ويندي ۽ منصوبو ايندڙ 2 سالن ۾ مڪمل ٿي ويندو،مانسهرا ۾ جلسي کي خطاب ڪندي وزيراعظم نواز شريف چيو ته مان ترقي جي سفر تي نڪتو آهيان، جلسن ۽ جلوسن جي مهم تي نه نڪتو آهيان، وزيراعظم چيو ته الله تعالي جي فضل وڪرم سان هو سڄي پاڪستان جي ترقي جي ايجنڊا رکن ٿا، عوام جي خوشحالي واري اينجنڊا سميت بيروزگاري جو خاتمو ڪرڻ چاهيون ٿا، وزيراعظم چيو ته ڌرڻا ايجنڊا سندس منشور جو حصو ناهي، جڏهن ته هو عوام ۽ پاڪستان جي ڪاميابي جي ايجنڊا رکن ٿا، هن چيو ته پاڪستان کي بهتر ملڪ بڻائڻ جو عزم ڪري نڪتا آهيون ۽ اڄ ان رستي تي هلي رهيا آهيون، هن چيو ته موٽر وي ٺهي رهيا آهن ۽ ان سان مون کي خوشي ٿي رهي آهي، وزيراعظم چيو ته برهان کان حويليان تائين موٽر وي تي پهريان کان ڪم شروع آهي ۽ ٻئي مرحلي ۾ حويليان کان ڇنڪاري موٽر وي شروع ڪيو پيو وڃي، ان موقعي تي ميان نواز شريف عوام کان سوال ڪيو ته برهان کان شنڪار تائين ڪيترا ڪلاڪ لڳن ٿا، جنهن تي ماڻهن 5 ۽ ڪجهه ماڻهن 8 ڪلاڪ ٻڌايو، وزيراعظم ان موقعي تي چيئرمين اين ايڇ اي کي اسٽيج تي سڏايو ۽ ان حوالي کان کائنس پڇيو، چيئرمين ٻڌايو ته برهان کان شنڪاري تائين موٽر مڪمل ٿيڻ کانپوءِ اهو فاصلو صرف ڏيڍ ڪلاڪ ۾ طئه ٿيندو، هن وڌيڪ چيو ته مانسهرا ۽ ايبٽ آباد موٽر سان ملايو ويندو ۽ اها موٽر وي خوشحالي جو پيغام هوندي. وزيراعظم چيو ته اسان صرف نعريبازي نٿا ڪريون پر عملي ڪم ڪري رهيا آهيون، برهان مان ايندڙ موٽر وي جو هيليڪاپٽر ذريعي سروي ڪيو ۽ ايندڙ سال اهو مڪمل ڪيو ويندو، شنڪاري تائين موٽر وي 2018 تائين مڪمل ٿي ويندو، هن چيو ته ڪي پي ڪي ۾ 1990 کان اڄ تائين جيترا به وڏا وڏا منصوبا آهن اهي ن ليگ جي حڪومت دوران مڪمل ڪيا ويا آهن. هن چيو ته پشاور کان اسلام آباد تائين موٽر وي اسان جي دور ۾ ٺاهي وئي ان کانپوءِ هزار موٽر وي تي ڪم هلي رهيو آهي، جل ڀل بالا ڪوٽ کان روڊ به اسان جي دور ۾ تعمير ڪيو ويو. نواز شريف چيو ته هتي زلزلي اچڻ کانپوءِ ڪنهن به ڪم نه ڪيو، يونيورسٽي کي 66 ڪروڙ رپيا پهريان ڏنا هاڻ هڪ سئو ڪروڙ جو اعلان ڪريان ٿو، اسان صرف بجلي جا ڪارخان ۽ روڊ نٿا ٺاهيون پر ٻارڙن جي تعليم لاءِ به تعليمي ادارا قائم ڪري رهيا آهيون، وزيراعظم چيو ته پاڪستان ۾ هاڻ نه رڳو بجلي ايندي پر اها سستي هوندي، بجلي جي في يونٽ جي قيمت ۾ اڍائي رپيا سستي ڪري رهيا آهيون، ان کان پهريان به سستي ڪئي وئي هئي.

 

ماحول جي تباهي جا پاڻ ذميوار آهيون، ايندڙ نسلن کي ذميداري جو مظاهرو ڪرڻو پوندو: وڏي وزير

ڪراچي (اي پي پي) سنڌ جي وڏي وزير سيد قائم علي شاهه چيو آهي ته ماحولياتي آلودگيءَ تي ڪڏهن ڌيان ئي ناهي ڏنو ويو ۽ جيڪڏهن موسمياتي تبديلين جي سببن کي پهريان ئي حل ڪيو وڃي ها ته اڄ اسان جو ماحول تمام بهتر هجي ها. اهڙن خيالن جو اظهار هن خميس ڏينهن  وزير اعليٰ هائوس ۾ موسمياتي تبديلين ۽ ماحولياتي مسئلن بابت منعقد ڪيل هڪ اعليٰ سطحي اجلاس کي خطاب ڪندي ڪيو. وڏي وزير چيو ته اسان پنهنجي صاف سٿري فضا کي تباهه ڪرڻ جا پاڻ ذميوار آهيون، ڇاڪاڻ ته ڪراچي جي سمنڊ ۾ صنعتي ۽ گهريلو گند / خراب مواد اڇلايو پيو وڃي ۽ حيدرآباد ۾ به ڦليلي ڪئنال کي به اهڙي ئيطريقي سان خراب ڪيو پيو وڃي. هن چيو ته اڄ سنڌ صوبو خاص طور تي صنعتي شهر ڪيترن ئي سنگين ماحولياتي مسئلن کي منهن ڏئي رهيا آهن. ڇاڪاڻ ته صنعتڪارن ماحولياتي تحفظ جي اُپائن تي عملدآمد ناهي ڪيو ۽ اسان کي نه رڳو پنهنجي لاءِ پر پنهنجي ٻارن ۽ ايندڙ نسلن لاءِ ذميواريءَ جو مظاهرو ڪرڻو پوندو. ان موقعي تي صوبائي وزير ماحوليات ڊاڪٽر سڪندر مينڌرو چيو ته آلودگيءَ جا ڪيترائي قسم آهن، اسان جون صنعتون ۽ گاڏيون فضا ۾ جيڪو دونهون ڇڏينديون آهن ان سان هوا ۾ آلودگي پيدا ٿيندي آهي پر جڏهن اهي ئي صنعتون بنا ڪنهن احتياتي تدبيرن جي خراب مواد ڪئنالن يا کليل ميدانن ۾ ڦٽو ڪندا آهن ته ان سان پاڻي جي آلودگي پيدا ٿيندي آهي ۽ ان ڪري زير زمين پاڻي به زهريلو ٿيندو آهي ۽ جڏهن ان زمين ۾ ڪو به فصل يا ميوو پوکبو آهي ته اهڙي قسم جي پاڻي يا زمين سبب اهو ميوو صحت لاءِ هاڃيڪار ٿي ويندو آهي. هن چيو ته مان ماحوليات جو وزير هئڻ باوجود بيوس آهيان ڇو جو پاڻي نيڪال ڪرڻ جو ڪم بلديات کاتي، صنعتن واري کاتي ۽ ساحلي علائقن جي زمين جنگلات کاتي جي دائري ۾ اچن پيون. مان رڳو خراب مادي / ڪچري کي ٺڪاڻي لڳائڻ جو ذميوار آهيان پر ان حوالي سان صنعتڪار سهڪار نه پيا ڪن ۽ صوبائي کاتن ۽ ادارن ۾  رابطن جو شديد فقدان آهي. ان تي وڏي وزير ڪاوڙ جو اظهار ڪندي چيو ته لاڳاپيل کاتن ۾ ويجهڙائي وارا رابطا هئڻ گهرجن. هن موسمياتي تبديلي، ماحوليات ۽ ساحلي پٽيءَ جي ترقيءَ جو کاتو قائم ڪرڻ جو فيصلو ڪيو ته جيئن ماحولياتي ۽ موسمياتي تبديلي جون سموريون ذميواريون هڪ ئي کاتي کي ڏنيون وڃن. هن سمورن لاڳاپيل ادارن کي ماحولياتي تحفظ واري اداري انوائرنمينٽل پروٽيڪشن ايجنسي (اِي پي اي) ۽ نئين قائم ڪيل اداري سان سهڪار ۽ ويجهڙائي وارا رابطا رکڻ جي هدايت ڪئي. اجلاس ۾ اهو فيصلو به ڪيو ويو ته ساحلي پٽيءَ تي ناريل جا وڻ لڳائڻ لاءِ ملائشيا کان مدد ورتي ويندي. وڏي وزير سيد قائم علي شاهه اِي پي اي کي هدايت ڪئي ته دونهون ڇڏيندڙ گاڏين خلاف ڪارروائيءَ، لياري ۽ ملير ندين ۾ صنعتي خراب مادي کي ٺڪاڻي لڳائڻ ۽ ان کي ڪراچي سمنڊ ۾ وهائڻ ۽ ڦليلي ڪئنال ۾ گهريلو ۽ صنعتي خراب مادي کي اڇلائڻ خلاف جامع حڪمت عملي جوڙي وڃي. ان موقعي تي ايڊيشنل چيف سيڪريٽري ترقيات محمد وسيم ٻڌايو ته 11 ارب رپين جي لاڳت سان پنجن يونٽن تي مشتمل هڪ ڪمبائنڊ افيولينٽ جي منظوري ڏني وئي آهي ۽ اهو منصوبو وفاقي پلاننگ ڪميشن ڏانهن منظوريءَ لاءِ موڪليو ويو آهي ۽ ان منصوبي سان سمنڊ ۾ ڇڏي ويندڙ صنعتي خراب مادي مان نقصان پهچائيندڙ ڪيميائي مواد کي ماحول دوست بڻايو ويندو. ِاي پي اي ڊائريڪٽر جنرل سنڌ جي وڏي وزير کي ماحولياتي ترقيءَ لاءِ کنيل قدمن بابت ٻڌايو ته انوائرنمينٽل ٽربيونل اسٽيٽ لائف بلڊنگ ۾ ڪم ڪرڻ شروع ڪري ڇڏيو آهي. وڏي وزير چيو ته شهر ۾ وڻن جي غير قانوني واڍي جون خبرون اينديون آهن انهن کي ڪنهن جي اجازت هوندي آهي؟ ۽ مقامي ادارا ۽ پوليس ان مامري تي ڇا ڪري رهي آهي؟ هن وڻن جي بنا سبب جي ڪٽائي تي لاڳاپيل ادارن کان پڇاڳاڇا ڪئي ۽ حڪم  ڪيو ته ان تي ضابطو آندو وڃي. اجلاس ۾ اهو به فيصلو ڪيو ويو ته وڻڪاري مهم شروع ڪئي وڃي ۽ وڻڪاري آسان ڪم نه آهي ڇاڪاڻ ته اوهان کي هر هڪ وڻ کي اپنائڻو ۽ ان جو خيال رکڻو آهي. اجلاس ۾ صوبائي وزير ماحوليات ڊاڪٽر سڪندر مينڌرو، ڄام مهتاب ڏهر، ڄام خان شورو، چيف سيڪريٽري سنڌ صديق ميمڻ، وڏي وزير جو پرنسپل سيڪريٽري علم الدين بلو، سينئر ميمبر بورڊ آف روينيو رضوان ميمڻ، سيڪريٽري هيلٿ سعيد منڱڻيجو، ناڻي وارو سيڪريٽري سهيل راجپوت، اي پي اي ڊائريڪٽر جنرل نعيم مغل سميت ٻين شرڪت ڪئي.

 

خورشيد شاهه جي دور ۾ حج ويلفيئر فنڊ مان 9 ڪروڙ رپين جا موبائيل فونز خريدڻ جو انڪشاف

اسلام آباد (بيورو) قومي اسيمبلي جي پبلڪ اڪائونٽس ڪميٽيءَ جي اجلاس ۾ سيد خورشيد شاهه جي مذهبي معاملن واري وزارت جي دور ۾ حج ويلفيئر فنڊ مان 9 ڪروڙ رپين جي موبائيل فونز خريد ڪرڻ جو انڪشاف ٿيو آهي، آڊٽ اختيارين ڪميٽي کي بريفنگ ڏيندي چيو آهي ته موبائيل فونز جي خريداري ۾ پيپرا رولز جي ڀڃڪڙي ڪئي وئي هئي.قومي اسيمبلي جي پبلڪ اڪائونٽس ڪميٽيءَ جو اجلاس نويد قمر جي صدارت هيٺ ٿيو، جنهن ۾ حج ويلفيئر فنڊ مان موبائيل فون جي خريداري وارن معاملن تي بريفنگ ڏني وئي. آڊٽ عملدارن ڪميٽي کي ٻڌايو ته 2012 ۾ 9 ڪروڙ رپين جون موبائيل فونز غير قانوني طور تي خريد ڪيون ويون. ڪميٽي کي ٻڌايو ويو ته موبائيل فونز جي خريداري لاءِ پيپرا رولز جي به ڀڃڪڙي ڪئي، ان لاءِ ڪي به ٽينڊر جاري نه ٿيا هئا. پي اي سي حج ويلفيئر فنڊ مان موبائيل فون خريدڻ تي ڪاوڙ جو اظهار  ڪندي چيو ته پيپرا رولز جي ڀڃڪڙيءَ جو ذميوار ڪير آهي.؟ ڪميٽي جي ميمبر شيخ رشيد چيو ته ان ڳالهه جو تعين ٿيڻ ضروري آهي ته ايتري وڏي رقم جون موبائيل فون خريد ڪري ڪنهن کي نوازيو ويو.؟ شيخ رشيد وڌيڪ چيو ته حج جي ادائيگي لاءِ موبائيل فون ضروري ناهي هوندي، موبائيل فونز جي خريداري ڪرپشن لاءِ ڪئي وئي، معاملو نيب يا ايف آءِ اي ڏانهن موڪليو وڃي. واضح رهي ته اجلاس جي صدارت خورشيد شاهه کي ڪرڻي هئي پر 2012 ۾ خورشيد شاهه جي وزارت واري دور جا معاملا اچڻ سبب ان اجلاس جي صدارت نه ڪئي.

 

وزيراعظم ۽ فضل رحمان وچ ۾ ملاقات، اپوزيشن جماعتن ۾ اتفاق راءِ پيدا ڪرڻ لاءِ ذميواري فضل رحمان حوالي

اسلام آباد (اين اين آءِ) وزيراعظم محمد نواز شريف پاناما ليڪس معاملي تي اپوزيشن جماعتن ۾ اتفاق راءِ پيدا ڪرڻ واري ذميواري مولانا فضل رحمان جي حوالي ڪئي آهي، ذريعن مطابق وزيراعظم نواز شريف سان مولانا فضل رحمان ملاقات ڪئي جنهن دوران پاناما ليڪس سميت سياسي صورتحال ۽ قومي معاملن تي خيالن جي ڏي وٺ ڪئي وئي، ٻنهي اڳواڻن اپوزيشن طرفان پيدا ٿيل سياسي بحران کي منهنن ڏيڻ لاءِ حڪمت عملي تي غور ويچار ڪيو ويو، نجي ٽي وي مطابق وزيراعظم پاناما معاملي تي اپوزيشن ۾ اتفاق راءِ جي ذميواري فضل رحمان کي ڏني آهي، جڏهن ته مولانا فضل رحمان ان معاملي تي وزيراعظم جي موقف جي تائيد ڪندي پنهنجي حمايت جي خاطري ڪرائي.

 

آصف زرداري پيپلز پارٽي پارليمينٽرين جو صدر ۽ بلاول پيٽرن چيف ٿي ويو

اسلام آباد (بيورو) اليڪشن ڪميشن سياسي پارٽين جي فهرست اپ ڊيٽ ڪري ڇڏي آهي، جنهن موجب اڳوڻو صدر آصف علي زرداري پيپلز پارٽي جو پارليمينٽرين صدر ۽ بلاول ڀٽو زرداري پيٽرن چيف ٿي ويو آهي، سڄي ملڪ مان سياسي پارٽين جو انگ 327 ٿي ويو آهي، خابرو ادارن موجب اليڪشن ڪميشن امين فهيم جي جاءِ تي آصف زرداري پاڪستان پيپلز پارٽي پارليمينٽرين جو صدر ٺهي ويو آهي، جڏهن ته بلاول ڀٽو زرداري پيٽرن چيف ٺهي ويو آهي.

 

آرمي چيف جو جهلم ويجهو جاري جنگي مشقن جو جائزو، فوجي جوانن جي آپريشنل تيارين تي اطمينان جو اظهار

راولپنڊي(اي پي پي) چيف آف آرمي اسٽاف جنرل راحيل شريف خميس ڏينهن جهلم لڳ ”دشمن جي حملي کي ناڪام بڻائڻ“ بابت فوجي مشقن جو معائنو ڪيو. انهيءَ جنگي مشق جو مقصد دشمن جي ڪنهن به امڪاني حملي کي آرٽلري، ايئر ۽ ڪومباٽ ايوي ايشن فائر پاورجي مربوط استعمال جي ذريعي اثرائتي نموني ناڪام بنائڻ جو مظاهرو ڪرڻ هو. آرمي چيف فوجي مشقن ۾ پاڪ فوج جي آپريشنل تيارين جي اعليٰ معيار تي اطمينان جو اظهار ڪيو ۽ حصو وٺندڙ فوجي جوانن جي پيشور حرفت جي واکاڻ ڪئي. ان کان اڳ 30 ڪور جي ڪمانڊر ليفٽيننٽ جنرل اڪرام الحق ۽ 8 ڊويزن جي جنرل آفيسر ڪمانڊنگ ميجر جنرل سرفراز ستار آرمي چيف جو استقبال ڪيو

 

پاڪستاني وزير اعظم جو نالو پاناما ليڪس مان ناهي ڪڍيو نه ئي معافي ورتي: سربراهه پاناما پيپرز

ڪراچي(اسٽاف رپورٽر) پاناما پيپرز جي سربراه جيرالڊ رائل هڪ ڀيرو وري پاناما ليڪس ۾ وزير اعظم نواز شريف جو نالو ڪڍڻ وارين خبرن کي رد ڪري ڇڏيو آهي. ڊائريڪٽر آءِ سي آءِ جي جيرالڊ رائل چيو آهي ته وزير اعظم نواز شريف جو نالو هٽائڻ جي خبر به غلط آهي. اسان  ڪنهن کان معافي  نه ورتي آهي. نجي ٽي وي چينل اي آر واءِ سان ڳالهائيندي جيرالڊ رائل چيو ته اسان پنهنجي وضاحت ۾ رڳو ايترو چيو ته وزير اعظم نواز شريف جي ٻارن جي نالي آف شور ڪمپنيون آهن. هن چيو ته پاناما پيپرز ۾ خبر ڇپجڻ کان اڳ پاڪستان جي وزير اعظم کي خبر هئي. جن جن جا نالا پاناما ليڪس ۾ آيا آهن انهن کي خط لکي موقف ڏيڻ جو چيو هو . هن چيو ته اسان نه معافي ورتي آهي نه معافي واري پريس رليز جاري ڪئي. اسان جي حڪومت به معافي وٺڻ جو نه چيو آهي.

 

قوم سوالن جا جواب گهري رهي آهي، وزير اعظم ۽ سندس اولاد کي حساب ڏيڻو پوندو: عمران خان

لاهور (اين اين آءِ) تحريڪ انصاف جي چيئرمين عمران خان چيو آهي ته وزيراعظم محمد نوازشريف وٽ هاڻ حڪومت ڪرڻ جو ڪوبه اخلاقي جواز ناهي رهيو هو جيستائين پانامه ليڪس معاملي تي قوم کي سچ نه ٻڌائيندو اوستائين مسئلن جي دلدل ۾ ڦاسندو رهندو هن چيو ته حڪومت شريف خاندان جي ڪرپشن لڪائڻ لاءِ عوامي ٽيڪس جي پئسي جو غير قانوني طور استعمال ڪري رهي آهي هن چيو ته نيب کي حڪومت طرفان ٽيڪس جي پئسن کي شريف فئملي جي ڪرپشن جي دفاع لاءِ استعمال ڪرڻ جو ايڪشن وٺڻ گهرجي هن اهڙن خيالن جو اظهار گذريل ڏينهن ميڊيا سان ڳالهائيندي ۽ سماجي رابطن جي ويب سائيٽ تي جاري ڪيل ٽوئٽ پيغام ۾ ڪيو عمران خان چيو ته پانامه ليڪس جي حوالي سان حڪمران قوم سان ڪوڙ مٿان ڪوڙ ڳالهائي رهيا آهن حڪمران شوڪت خانم جي حوالي سان به ڪوڙ ڳالهايو شوڪت خانم جا سمورا فنڊ واپس اچي چڪا هئا هن چيو ته پانامه ليڪس ۾ وزيراعظم نوازشريف ۽ سندس اولاد جا نالا آيا آهن. ان لاءِ کيس ٻڌائڻو پوندو ته قوم جو پئسو پرڏيهي ملڪن ۾ ڪيئن ويو. هن چيو ته ميفيئرز جا 4 فليٽ ڪٿان آيا ۽ حسن نواز ساڍا 600 ڪروڙ رپين جو فليٽ وڪرو ڪيو ته اها رقم سندس وٽ ڪٿان آئي جيڪڏهن وزيراعظم چاهي ته هن سوالن جو جواب پنجن منٽن ۾ ڏيئي سگهجي ٿو پر معاملي کي اينگهايو پيو وڃي عمران خان چيو ته پانامه ليڪس ۾ نالو اچڻ کان پوءِ وزيراعظم نوازشريف وٽ حڪومت ڪرڻ جو ڪوبه اخلاقي جواز ناهي رهيو هن چيو ته ٽيڪس چوري ڪرپشن ۽ اليڪشن ڪميشن سان گڏ فراڊ ڪرڻ جي حوالي سان تمام شاهد آڏو اچي چڪا آهن ۽ ان شاهدن جي روشني ۾ پوري قوم ۽ اپوزيشن ان ڳالهه تي متفق آهي ته اسان وزيراعظم کان تمام ڪيل ڪرپشن جو جواب چاهيون ٿا هن چيو ته پانامه ليڪس معاملي تي وزيراعظم نوازشريف قوم سان سچ نه ڳالهائيندو ته وڌيڪ معاملن جي ڄار ۾ ڦاسي پوندو.

 

خالد شميم جي وڊيو متحده خلاف سازش آهي: فاروق ستار

ڪراچي(اسٽاف رپورٽر) ايم ڪيو ايم اڳواڻ فاروق ستار چيو آهي ته خالد شميم جي وڊيو ايم ڪيو ايم خلاف سازش آهي، عوام ۽ متحده سربراهه کي هڪ ٻئي کان جدا ڪرڻ جو ڪوڙو الزام آهي، خابرو ادارن موجب خالد شميم جي وڊيو اچڻ کانپوءِ ميڊيا سان ڳالهائيندي فاروق ستار پاران وڊيو پيغام جي سخت لفظن ۾ مذمت ڪئي وئي، ان موقعي تي فاروق ستار جو چوڻ هو ته خالد شميم گرفتار آهي، جيلن ۾ وڊيو ڪيئن ٿيون ٺهن ان سوال کي به اٿاريو وڃي، سندس چوڻ هو ته ايم ڪيو ايم خلاف هاءِ پروفائل ڪيسن ۾ اهڙيون وڊيو سامهون آنديو ويون آهن، ڇا انصاف ۽ قانون جي نظام ۾ گرفتار ٿيل شخص جو بيان ميڊيا تي آڻي سگهجي ٿو، فاروق ستار چيو ته اهڙيو وڊيو عدالتن ۽ ججن لاءِ به چيلينج آهي.

 

اهم شخصيت غفار ذڪري کي مارڻ جو چيو، سندس چوڻ تي اهم فارم هائوس ۽ زمينن تي قبضا ڪيا: عذير بلوچ

ڪراچي(اسٽاف رپورٽر) لياري گينگ وار جي اهم ڪردار عذير بلوچ جاچ دوران اهم انڪشاف ڪيا آهن. سندس چوڻ آهي ته اهم شخصيت غفار ذڪري کي قتل ڪرڻ جو چيو. ان ئي شخصيت جي چوڻ تي قبضا ڪيا. عذير بلوچ موجب اهم شخصيت جي چوڻ باوجود غفار ذڪري کي قتل ڪرڻ کان انڪار ڪيو، سندس چوڻ تي اهم فارم هائوس ۽ زمينن تي قبضا

ڪيا.  جي آءِ ٽي موجب عذير بلوچ پنهنجي غير قانوني ڪاروبار لاءِ 4 اڪائونٽ کولرايا جن مان 3 هُن پنهنجي زال جي نالي تي کولرايا. عذير بلوچ جا يو اءِ اي ۾ 3  گاڏيون، 2 پلاٽ، ٻه گھر ۽ هڪ آفيس آهي. عذير بلوچ جا يو اي اي ۽ ايران ۾ 20 ڪروڙ رپين جا اثاثا آهن جن مان 15 لک رپيا بينڪن ۾ آهن. عذير بلوچ نثار مورائي لياري جي ڇوڪرن کي نوڪرين مان ڪڍيو. هن چيو ته لياري ۽ ٻين علائقن ۾ هر فيصلي تي 10 سيڪڙو حصو ملندو هو. لياري ۾ جوا جو هڪ اڏو منهنجو هو، هن چيو ته لياري ۾ تاجو اسان لاءِ ڀتو گڏ ڪندو هو جيڪو هن وقت پرڏيهه ڀڄي ويل آهي.