تازيون خبرون

Daily Archives: April 25, 2016

عمران خان جو ڪميشن کان پوئتي هٽڻ نواز شريف جي اخلاقي فتح آهي: پرويز رشيد

اسلام آباد (اين اين آءِ) سڌ سماءَ جي وفاقي وزير پرويز رشيد چيو آهي ته سپريم ڪورٽ جي ججن تي ٻڌل ڪميشن بڻائڻ جو مطالبو ڪندڙ عمران جي پيرن هيٺان زمين سرڪڻ شروع ٿي وئي آهي، عمران خان پنهنجي سياست ۽ ڌرڻا فن فيئر جا خرچ برداشت ڪندڙ ساٿين جي ڏوهن ۾ ملوث هجڻ سبب عدالتي ڪميشن جي مخالفت ڪري رهيو آهي، عمران خان ۽ سندس ساٿين کي خبر آهي ته عدالتي ڪميشن جي 4 ڏينهن جاچ ۾ انهن جا سمورا پول کلي ويندا، جيڪڏهن ڪا به جماعت ٽي آر اوز ۾ وڌيڪ ڪجهه شامل ڪرائڻ چاهي ٿي ته هو ان لاءِ به تيار آهن، هن چيو ته عمران خان کي ڀڃڻ نه ڏنو ويندو، مسلم ليگ ن جي قيادت 3 ڀيرا ڪڙي احتساب مان گذري آهي، هاڻ عمران خان ۽ سندس ساٿين کي پهريون ڀيرو ان مان گذرڻو پوندو، کيس اٽي ۽ دال جي قيمتن جي خبر پئجي ويندي، پرويز رشيد چيو ته وزيراعظم نواز شريف ڪا به عوامي رابطا مهم شروع نه ڪري رهيو آهي پر وزيراعظم پاڪ چين اقتصادي راهداري منصوبي جي سلسلي ۾ منصوبن جو سنگ بنياد رکڻ آهي، هن چيو ته عمران خان گوشوارن ۾ جيترو ٽيڪس ظاهر ڪري ٿو ان سان ته بني گالا جي 370 ڪينال جي گهر جو بل به پورو نٿو ٿئي، ماروي ميمڻ کي چوندس ته کيس بيت المال مان ڪچن هلائڻ لاءِ امداد ڏني وڃي، اهڙن خيالن جو اظهار هن لاهور پريس ڪلب ۾ بئريسٽر ظفر الله سان گڏ پريس ڪانفرنس ڪندي ڪيو، پرويز رشيد چيو ته پاناما پيپرز ۾ وزيراعظم جو ذاتي طور تي ڪو به حوالو درج ناهي، سندس خاندان جي جن ماڻهن جو آف شور ڪمپني جي حوالي سان نالو آيو آهي ان تي به پاناما پيپرز ۾ ڪا به اهڙي ڳالهه درج ناهي جيڪا پاڪستان ڪنهن به قانون جي خلاف ورزي ڪندڙ هجي. هن چيو ته پهريان ڪميشن کي رٽائرڊ ججن تي مشتمل هئڻ هو ۽ ان جو سبب اهو ته 2014 ۾ جڏهن سپريم ڪورٽ جي چيف جسٽس ناصر الملڪ جي سربراهي ۾ عدالتي ڪميشن بنايو ويو هو جنهن ۾ 2 حاضر معزز جج به شامل هئا انهن تي به عمران خان طرفان گند اڇلايو ويو، الزام هنيا ويا، ان کانپوءِ پاڪستان جي قانون برادري جي راءِ هئي ته هاڻ حاضر سروس ججن کي ان امتحان ۾ وجهڻ نه گهرجي، ڇاڪاڻ ته جوڊيشل ڪميشن جي ڪارروائي مڪمل ٿيڻ کانپوءِ انهن ججز کي عدليه ۾ ڪم ڪرڻو هجي ٿو ۽ جيڪڏهن سندن مٿان گند اڇلايو وڃي ته انهن کي عدليه جا فرائض انجام ڏيڻ ۾ ڏکيائي ٿئي ٿي. ڪو به حاضر سروس ڪو ڏوهي به حاضر سروس جج تي عمران خان جي الزامن کي ورجائي سگهي ٿو ان لاءِ احتياط ڪيو ويو آهي ان معاملي کي رٽائرڊ ججز جي حوالي ڪيو وڃي ۽ ان لاءِ انتهائي نيڪ نالا ۽ باڪردار رٽائرڊ ججز جا نالا تجويز ڪيا آهن پر عمران خان جي رويي ان ڪم کي ڏکيو بڻائي ڇڏيو آهي، هن چيو ته اسان چيلينج قبول ڪيو آهي ۽ چيلينج کي اهو ئي قبول ڪري ٿو جنهن جو دامن صاف ۽ دل ۾ سچائي ۽ ڪا به کوٽ نه هجي جيڪڏهن اسان جي ضمير تي ڪو ٻوجهه هجي ها ته پاڻ کي احتساب لاءِ پيش نه ڪريون هان، هن چيو ته بينظير ڀٽو شهيد کي جڏهن پهريون ڀيرو وزارت عظميٰ جي ذميواري ملي هئي ان وقت مسلم ليگ ن جي قيادت جو احتساب ڪيو ويو ۽ ان کانپوءِ ٻيهر بينظير ڀٽو شهيد کي وزارت عظميٰ ملي تڏهن به احتساب ڪيو ويو، ٽيون ڀيرو جنرل پرويز مشرف احتساب ڪيو پر هڪ رتي جي برابر به بدعنواني ثابت نٿي ۽ سرڪاري وسلين کي استعمال ڪرڻ جو به ثابت نه ٿي سگهيو، پرويز رشيد چيو ته پاناما پيپرز ۾ سندن مٿان الزام ناهن لڳا پر اخلاقي ذميواري سمجهندي عدالتي ڪميشن جي قيام لاءِ خط لکيو ويو آهي، هن چيو ته ان لاءِ جامع ٽي آر اوز آهن، عمران خان سپريم ڪورٽ جي ججز تي ٻڌل ڪميشن بڻائڻ جو مطالبو ڪيو جڏهن عدالتي ڪميشن لاءِ عملي قدم کنيا ويا ته عمران خان جي پيرن هيٺان زمين سرڪڻ شروع ٿي وئي ڇاڪاڻ ته سندس دل ۾ چور هو، جڏهن ته هن ابتي پير ڀڃڻ شروع ڪري ڇڏيو آهي، وفاقي وزير چيو ته عمران خان کي معلوم آهي ته سياست ۾ جيڪي ماڻهو سندس خرچ برداشت ڪن ٿا اهي ٽيڪس چوري ۾ ملوث آهن، غير قانوني طور تي دولت گڏ ڪرڻ ۾ به ملوث آهن. هن چيو ته سندن بليڪ مني آهي جنهن سان فن فيئر منعقد ڪيا پيا وڃن پر 126 ڏينهن جو فن فيئر ٿيو ۽ 24 اپريل تي اسلام آباد ۾ پتلي تماشو ٿي رهيو آهي اهو پيسو انهن ئي ماڻهن جو آهي. پرويز رشيد چيو ته عمران خان جي ساڄي ۽ کاٻي پاسي کان موجود ماڻهن خلاف عدالتن جا فيصلا موجود آهن، ان جو اي او آءِ بي ڪيس سامهون آيو ۽ پيسا واپس ڪيا ويا، قبرستان جي زمين تي قبضن جا الزام لڳا آهن. سڌ سماءَ جي وفاقي وزير چيو ته عمران خان پنهنجي ضمير جي ٻوجهه ۾ دٻيل آهي جڏهن ڪميشن جاچ ڪندو ته 3 چئن ڏينهن ۾ سمورا پول کلي ويندا، بينڪن کان قرض معاف ڪرائي هڙپ ڪرڻ، پرڏيهي ملڪن ۾ جائيداد حاصل ڪرڻ وارا معاملا سامهون ايندا، ان جي ڪري کين ٽي آر اوز ناقابل قبول آهن. هن چيو ته عمران خان گوشوارن ۾ جيترو ٽيڪس ظاهر ڪري ٿو ان سان بني گالا جي 370 ڪينال جي گهر جو بل به پورو نٿو ٿئي، ماروي ميمڻ کي چوندس ته عمران خان کي گهر جو بل ۽ سندس ڪچن جو خرچ هلائڻ لاءِ بينظير انڪم سپورٽ پروگرام ۽ بيت المال مان مدد ڪئي وڃي، ڇاڪاڻ ته سندس آمدني جو ڪو ذريعو ناهي جنهن سان سندس گهر جو چلهو هلي سگهي، هن چيو ته خان صاحب جو ڪهڙو ڪاروبار آهي کين اڄ تائين ان جي نالي جي خبر ناهي، سندس آمدني جي ذريعن بابت ڄاڻ ناهي پر بينڪ ڊفالٽر ۽ ٽيڪس چوري ڪندڙن لاءِ ٽي آر اوز جو ذڪر آيو آهي ته هو ڪاوڙ ۾ اچي ويو آهي. هن چيو ته عمران خان پنهنجي جماعت جي هڪ رڪن اڪبر ايس احمد اليڪشن ڪميشن ۾ ڪيس داخل ڪيو آهي ته عمران خان دنيا مان چندو گڏ ڪري ٿو ۽ ان جو غلط استعمال ڪري ٿو، خرچ وڌيڪ آهن ۽ چندو گهٽ ٿئي ٿو ڇاڪاڻ ته ڳالهه نڪتي آهي ته پري پري تائين ويندي. هن چيو ته عمران خان ڀڃڻ نه ڏنو ويندو. پرويز رشيد چيو ته هو ڪنهن کي ڊيڄارڻ نٿا چاهين ۽ نه ئي وري ڪنهن کان ڊڄي رهيا آهن، عمران خان جو مطالبو هو ته پاناما معاملي تي عدالتي ڪميشن جوڙيو وڃي جيڪو اسان بڻائي ڇڏيو آهي، هن چيو ته ٽي آر اوز جي حوالي سان وزيراعظم نواز شريف ڪميٽي بڻائي هئي جنهن مڙني جماعتن سان رابطا ڪيا آهن، ٽي آر اوز جي حوالي سان جيڪي عوام جي ميڊيا ذريعي راءِ آئي هئي ان بابت ئي بڻايو ويو آهي، جيڪڏهن ڪو رهجي ويو آهي ته اهو ٻڌائي ان کي به شامل ڪيو ويندو، هن چيو ته عمران خان جو خيال هو ته ڪميشن نه ٺهندو پر اسان کيس پڪڙي ورتو آهي جنهن بعد هاڻ هن هيلا بهانا ڪرڻ شروع ڪري ڇڏيا آهن، ان سموري معاملي ۾شهباز شريف ۽ سندس خاندان جا ماڻهو منظر عام تان غائب هجڻ واري سوال جي جواب ۾ پرويز رشيد چيو ته ڪو به پڪچر کان آئوٽ ناهي، شهباز شريف جون تقريرون هر روز ٻڌون ٿا، هڪ سوال جي جواب ۾ چيو ته 2013 ۾ چيو پيو ويو ته پاڪستان ڊفالٽر ٿي ويندو، اسان حڪومت سنڀالڻ سان ئي فوري طور آءِ ايم ايف جي قرض جي قسط ڏني، نواز شريف جي قيادت ۾ نه صرف پاڪستان کي ڊفالٽر ٿيڻ کان بچائي پر اقتصادي راهداري جي نالي سان تاريخ جي سڀ کان وڏي سيڙپڪاري کڻي آياسين، عمران خان پهريان چيو ته سي پيڪ جو ڪو به وجود ناهي وري چيو ته چين جو صدر پاڪستان نه ايندو، پر اسان سندس سازشن کي ناڪام بڻايو ۽ سيڙپڪاري آڻڻ ۾ ڪاميابي حاصل ڪئي، هن چيو ته حڪومت جنهن رفتار سان ڪم ڪيو ان جي چين به تعريف ڪئي آهي، ان جي منصوبي جي تڪميل ڏانهن وڌي رهيا آهيون، تمام گهڻن هنڌن جو تعين ڪيو آهي، هن چيو ته مخالفن کي فڪر آهي ته جيڪڏهن اهو مڪمل ٿيو ته انهن جو ڇا ٿيندو ان لاءِ نواز شريف جي حڪومت جو رستو روڪيو. هن چيو ته وزيراعظم هائوس مان ڪا پريس رليز جاري ناهي ٿي ته وزيراعظم عوامي رابطا مهم شروع ڪري رهيو آهي پر وزيراعظم کي سي پيڪ منصوبن جو افتتاح ڪرڻ ۽ تقريبن کي خطاب ڪرڻ آهي.

 

پ پ ڪنهن اداڪار کان نٿي ڊڄي، عمران خان ڀلي سنڌ اچڻ جو شوق پورو ڪري وٺي: مولابخش چانڊيو

ڪراچي(اسٽاف رپورٽر) سُڌ سماءُ بابت وڏي وزير جي صلاحڪار مولا بخش چانڊيي چيو آهي ته پ پ ڪنهن اداڪار کان نٿي ڊڄي، عمران خان ڀلي سنڌ اچڻ جو شوق پورو ڪري وٺي. پي ٽي آءِ سربراهه عمران خان پاران 26 ڪرپشن خلاف سنڌ کان تحريڪ شروع ڪرڻ واري اعلان تي رد عمل ڏيندي صوبائي صلاحڪار مولابخش چانڊيي چيو ته پيپلزپارٽي نه ڪڏهن ڪنهن سياسي اداڪار کان ڊڄندي آهي نه ئي هاڻي ڊڄندي. هن چيو ته رائيونڊ ويندي ويندي ڪنهن عمران خان جو رخ موڙي ڇڏيو؟  لڳي ٿو ته عمران خان ۽ چوڌري نثار جي گڏيل سفر جو ڦل ملڻ شروع ٿي ويو آهي. هن چيو ته عمران خان کي سنڌ اچڻو آهي ته سنڌ اچڻ جو شوق ڀلي پورو ڪري وٺي.

 

اسحاق ڊار ٻئين ٽه ماهي لاءِ صوبن کي 2،214،5 ملين رپين جي مراعاتي گرانٽ جاري ڪرڻ جي منظوري ڏئي ڇڏي

اسلام آباد(اي پي پي)  ناڻي واري وفاقي وزير اسحاق ڊار هلندڙ سال آڪٽوبر کان ڊسمبر جي ٻئين ٽه ماهي لاءِ صوبن وچ ۾ فوري ورڇ لاءِ 2،214.5 ملين رپين جي مراعاتي گرانٽ جاري ڪرڻ جي منظوري ڏئي ڇڏي آهي. آچر تي هتي جاري بيان مطابق صوبن کي جنهن ٽه ماهي گرانٽ جي منظوري ڏني وئي آهي ان مان پنجاب صوبي کي 576.6 ملين رپيا، سنڌ کي 440.7 ملين رپيا ۽ خيبرپختونخوا کي 411.3 ملين رپيا ملندا. واضح رهي ته گڏيل مفادن واري ڪائونسل 31 جولاءِ تي اهو فيصلو  ڪيو هو ته صوبن کي ان ڳالهه جياجازت ڏني ويندي ته اهي پنهنجي سرپلس تي ريٽ آف ريٽرن تازي ٽي بل ريٽ تي واپس ڪندا جن جي واپسي گهٽ ۾ گهٽ 3 مهينا هوندي. فيصلي مطابق صوبن کي اها مراعاتي گرانٽ ٽه ماهي بنيادن تي جاري ڪئي ويندي.

 

پ پ جو جناح دور کان هن وقت تائين مالي بيضابطگين جي جاچ ڪميشن جي قيام جو مطالبو

ڪراچي (اين اين آءِ) پاڪستان پيپلز پارٽي جي چيئرمين بلاول ڀٽو زرداري چيو آهي ته وزيراعظم نواز شريف قوم کان ڇا لڪائي رهيو آهي، جاري ڪيل ٽوئيٽ پيغام ۾ بلاول ڀٽو زرداري پيپلز لائير فورم اوڪاڙه کي هارين ۽ آبادگارن کي قانوني مدد فراهم ڪرڻ جي هدايت ڪئي آهي.  ٽوئيٽ پيغام ۾ هن وڌيڪ چيو ته وزيراعظم ميان نواز شريف قوم کان ڇا لڪائي رهيو آهي، پاناما ليڪس معاملي تي جاچ بدران جناح جي دور کان وٺي هن وقت تائين مالي بيضابطگين جي ڪميشن جو قيام چاهيون ٿا، بلاول ڀٽو زرداري چيو ته ڪميشن جي قيام بدران نواز شريف سپريم ڪورٽ کان 1947 کان وٺي اڄ تائين مالي معاملن جي درخواست ڪئي آهي، ٻڌايو وڃي ته هو پاڪستاني قوم کان ڇا لڪائڻ چاهي ٿو.

 

نيو سرڪٽ هائوس خيرپور جي تعميراتي ڪم کي معياري بڻائيندي وقت سر مڪمل ڪيو وڃي: قائم علي شاهه

ڪراچي( اي پي پي )سنڌ جي وڏي وزير سيد قائم علي شاهه آچر ڏهاڙي خيرپور پهچي نيو سرڪٽ هائوس جي تعميراتي ڪم جو تفصيلي معائنو ڪيو ۽ هدايت ڪئي ته ڪم کي معياري بڻائيندي وقت سر مڪمل ڪيو وڃي. ان موقعي تي ڪمشنر سکر ڊويزن محمد عباس بلوچ ۽ پراونشل بلڊنگ جي عملدارن پاران وزيراعليٰ سنڌ کي سرڪٽ هائوس جي ڪم بابت بريفنگ ڏيندي ٻڌايو ويو ته 124 ملين جي لاڳت واري اسڪيم جو 95 سيڪڙو ڪم مڪمل ٿي چڪو آهي، جنهن ۾ 16 ڪمرا، 2 ڊرائنگ روم، هڪ ڊائننگ روم، ڪچن ۽ 2 آفيسون شامل آهن، جڏهن ته فرنيچر ڪجهه ڏينهن اندر پهچي ويندو. اِن کان اڳ وزيراعليٰ سنڌ سيد قائم علي شاهه ٺيڙهيءَ ۾ قاضي عزيز الرحمان سان سندس ڏاڏيءَ ۽ خليل الرحمان ميمڻ سان سندس ڀائٽي جي وفات تي ڌار ڌار عذرخواهي ڪئي ۽ فاتح پڙهي. بعد ۾ وڏي وزير خيرپور جي هڪ شادي هال ۾ پ پ پ اڳواڻ مرحوم حاجي ڪوڙو خان موريجو جي پٽن خالد محمود ۽ طارق احمد موريجو جي شادي تقريب ۾ شرڪت ڪئي. ان موقعي تي ڊپٽي ڪمشنر خيرپور فياض احمد جتوئي، ايس ايس پي خيرپور پير محمد شاهه، ڊاڪٽر يارمحمد ڦلپوٽو، لعل بخش منگي، نظرمحمد ڳاهو، مظهر خان، علي شير مڪول، پير سيد بچل شاهه، غلام حسين مغل ۽ ٻيا پڻ موجود هئا. ا

 

حڪومت احتساب جي قانون ۾ ترميم تي غور ڪري رهي آهي: خواجه آصف

سيال ڪوٽ (اين اين آءِ) دفاع واري وفاقي وزير خواجه آصف چيو آهي ته حڪومت احتساب جي قانون ۾ ترميم تي غور ڪري رهي آهي، تحريڪ انصاف جي جلسي ۾ شاهراهه دستور وانگر ناچ گانا ۽ ڊسڪو هوندو، پي ٽي آءِ جي يوم تاسيس جي حوالي سان ميڊيا سان ڳالهائيندي هن چيو ته وزيراعظم محمد نواز شريف سڀ کان پهريان پاڻ کي احتساب لاءِ پيش ڪيو آهي، پاناما ليڪس معاملي تي عدالتي ڪميشن لاءِ سپريم ڪورٽ کي خط لکي مطالبو پورو ڪيو ويو آهي پر ان باوجود به تماشو لڳايو پيو وڃي، هن چيو ته اسلام آباد جي ايف نائين پارڪ ۾ اڄ ناچ، ڳائڻ، تماشو ۽ ڊسڪو ٿيندو جهڙي طرح 126 ڏينهن شاهراهه دستور تي هنيل ڌرڻي ۾ ٿيو هو، جنهن بعد ماڻهو واپس گهر هلايا ويا هئا، جماعت اسلامي جي ڪرپشن خلاف لاهور ۾ هنيل ڌرڻي جي حوالي سان هن چيو ته پرويز مشرف 17 هين ترميم ذريعي جمهوريت تي ڪاري ضرب هنئين ۽ لاهور ۾ ڌرڻو هڻندڙن 17 هين ترميم جي موقعي تي پرويز مشرف جو ڀرپور ساٿ ڏنو، هن چيو ته جماعت اسلامي جو اڳواڻ مولانا موديدي ڪمال جي شخصيت هو، دعا آهي ته الله سندس پيروڪارن کي به ان جهڙو بڻائي.

 

عمران خان وزيراعظم جي اعلانيل عدالتي ڪميشن کي به رد ڪري ڇڏيو، تحريڪ هلائڻ جو اعلان

اسلام آباد(بيورو) پاڪستان تحريڪ انصاف جي سربراهه عمران خان 26 اپريل کان سنڌ ۾ ڪرپشن خلاف تحريڪ شروع ڪرڻ جو اعلان ڪندي چيو آهي ته ميان صاحب وٽ وزير اعظم رهڻ جو جواز ناهي بچيو، نواز شريف کي وڃڻو ئي پوندو، اميد ته نواز شريف رائيونڊ مارچ کان اڳ فيصلو ڪري وٺندو. . اسلام آباد ۾ ايف نائن چوڪ تي پي ٽي آءِ جي تاسيس واري جلسي کي خطاب ڪندي عمران خان چيو تهادارا ڪمزور ٿي ويا آهن، ڪرپشن ختم ڪرڻ لاءِ سياست ۾ آيس، سياست ۾ 20 سال ٿي ويا پر لڳي ٿو هاڻي پارٽي شروع ڪئي آهي. عزت ڏيڻ تي قوم جو ٿورائتو آهيان. هن چيو ته انگلينڊ سان ڪرڪيٽ کيڏڻ ويس ته سينئرن چيو ته انگريزن کان نٿا کٽي سگهون. اسان جي دور ۾ پاڪستان جي هاڪي ٽيم کي دنيا ۾ عزت سان ڏٺو ويندو هو. اسڪوائش ٽيم ۾ جهانگير خان ۽ جان شير خان نالو ڪمايو، اڄ اهي سڀئي رانديون تباهه آهن، ڇو جو اسان جا ادارا مضبوط ناهن. عمران خنا چيو ته پرڏيهه ۾ هئس ته ادارا مضبوط ڏسندو هئس. مون وٽ الله جو ڏنو سڀ ڪجهه هو، سوچڻ جي ڳالهه آهي ته مونکي سياست ۾ اچڻ جي ڪهڙي ضرورت هئي. مون ڪڏهن سياست ۾ اچڻ جو سوچيو ئي نه هو، پنهنجون پراڻيون تقريرون ڏسي شرمائجي ويندو آهيان. ٻئي طرف پريس ڪانفرنس ڪندي تحريڪ انصاف جي سربراهه عمران خان وزيراعظم جي اعلانيل عدالتي ڪميشن کي به رد ڪري ڇڏيو آهي سندس چوڻ آهي ته ڪميشن جا ٽرمس آف ريفرنس عوام کي دوکو ڏيڻ برابر آهي.اسلام آباد ۾ پريس ڪانفرنس ڪندي عمران خان چيو ته نواز شريف پاران ڪميشن جوڙڻ جو اعلان مذاق آهي.هن چيو ته نواز شريف ڪنهن خوش فهمي ۾ نه رهي ۽ نه ئي پاناما معاملي کي دٻائڻ جي ڪوشش ڪري، هاڻ وٽن رائيونڊ واري رستي کانسواءِ ٻيو ڪو رستو نه هوندو.هن چيو ته آمريڪا ۾ ٽيڪس چور جيل ويندا آهن، پاڪستان ۾ عدالتي ڪميشن جي جاچ 5 سالن ۾ به ختم نه ٿيندي.عمران خان چيو ته نواز شريف جو نالو اچي چڪو آهي، پر هو پاڻ کي بي ڏوهي قرار ڏي ٿو، ثابت ٿيو ته وزيراعظم احتساب کان ڊڄي ٿو.تحريڪ انصاف جي سربراه چيو ته پهريان وزيراعظم ۽ بعد ۾ ٻين جو احتساب ٿئي، جاچ لاءِ عالمي فرانزڪ ٽيمن جي مدد ورتي وڃي.عمران خان چيو ته وزيراعظم نواز شريف جي تقرير ٻڌي محسوس ٿيو ته  ڪجهه لڪائي رهيو آهي، جڏهن ته اخلاقي طور  هو حڪومت ڪرڻ جو جواز وڃائي ويٺو آهي.سندس چوڻ هو ته نواز شريف جا جيڪڏهن هٿ صاف آهن ته پوءِ کيس 1990 کان 2013 تائين پنهنجا اثاثا ظاهر ڪرڻ گهرجن.عمران خان چيو ته نواز شريف خلاف ڪنهن به قسم جي ڪا سازش نه ٿي رهي آهي، هو رڳو جاچ چاهين ٿا.تحريڪ انصاف جي سربراهه چيو ته جيڪڏهن 4 تڪ کوليا وڃن ها ته کين ڌرڻو هڻڻ جي ضرورت نه پوي ها.هن چيو ته ملڪ ڌرڻن نه پر ڪرپشن ۽ ٽيڪس چوري سبب تباهه ٿئي پيو.عمران خان چيو ته 24 اپريل تي مستقبل جي حڪمت عملي جو اعلان ڪيو ويندو ۽ جيڪڏهن پاناماليڪس معاملي جي شفاف جاچ نه ٿي ته هو روڊن تي نڪرندا.

 

جماعت اسلامي پاران پهرين مئي کان ڪرپشن خلاف ملڪ گير احتجاج جو اعلان

مردان/ لاهور(اين اين آءِ/م.ڊ) جماعت اسلامي جي امير سراج الحق پهرين مئي کان ڪرپشن خلاف ملڪ گير احتجاج جو اعلان ڪندي چيو آهي ته ملڪ ۾ جمهوريت جي نالي تي دوکو ٿي رهيو آهي. پاڪستان ۾ ماڻهو ٻار وڪرو ڪرڻ تي مجبور آهن، معصوم ٻارڙن کان به پورهيو ڪرايو ويندو آهي. لاهور ۾ جلسي کي خطاب ڪندي جماعت اسلامي جي سربراهه جو چوڻ هو ته اڌ آبادي پيئڻ جي صاف پاڻي کان محروم آهي. 2 ڪروڙ ٻار غربت سبب تعليم کان محروم آهن نوجوابن بيروزگاري جي ڪري ڊگريون ساڙڻ تي مجبور آهن هن چيو ته هي داڻو هتي ٿا چڳن ۽ آنو وري ٻئي ڪٿي ٿا ڏين. 68 سان کان مڪ ۾ احتساب جي نالي تي دوکو ٿي رهيو آهي. پهرين مئي کان ملڪ گير احتجاج ڪيو ويندو.002جماعت اسلام جي امير سراج الحق چيو آهي ته جماعت اسلامي عدالتي ڪميشن لاءِ حڪومتي ضابطڪار کي رد ڪري ٿي، هن چيو ته اپوزيشن ليڊر خورشيد شاهه جاچ ڪميشن لاءِ پاڻ چيف جسٽس کي خط لکي ۽ ڪميشن جو ضابطڪار گڏيل صلاح مشوري سان بڻايو وڃي، مردان کان لاهور روانگي کان اڳ ميڊيا سان ڳالهائيندي سراج الحق چيو ته هو اعتراف ڪري ٿو ته اپوزيشن ۾ به ڪرپٽ عنصر موجود آهن پر پاناما ليڪس تي وزيراعظم ۽ ان جي خاندان تي لڳايل الزمن جي جاچ ڪرائي وڃي. هن چيو ته هن اهم موڙ تي اپوزيشن پاڻ کي ورهائڻ کان بچائي، وقت اچي ويو آهي ته سياسي جماعتون پنهنجن صفن ۾ موجود ڪرپٽ عنصرن کي ٻاهر ڪڍن. سراج الحق جو چوڻ هو ته جماعت اسلامي اقتدار ۾ اچي ڦر لٽ ڪيل دولت جو حساب وٺندي ۽ اسان چوراهن ۽ چوڪن تي ڦر لٽ ڪندڙن جو احتساب ڪنداسين. هڪ سوال جي جواب ۾ هن چيو ته عوام کي به ڪرپٽ سياسي عنصرن جو سماجي بائيڪاٽ ڪرڻ گهرجي.

 

  ملڪ اهڙي موڙ تي بيٺو آهي جيڪو نازڪ دور جو ليڪو پار ڪري چڪو آهي: مصطفيٰ ڪمال

ڪراچي (اسٽاف رپورٽر) پاڪ سر زمين پارٽي جي سربراهه مصطفيٰ ڪمال چيو آهي ته اڄوڪو ڏينهن تاريخي آهي، جنهن کي تاريخدان سونهري لفظن ۾ لکندا. ڪراچي ۾ جناح باغ ۾ جلسي کي خطاب ڪندي مصطفيٰ ڪمال چيو ته ايندڙ وقت جا ماڻهو پڙهندا ته سندن وڏڙن فرعونن آڏو حق جو آواز بلند ڪيو، هن چيو ته هن چيو ته دنيا ۾ شايد ئي ڪا پارٽي ٺهي هجي،جنهن ٽيهن ڏينهن م لکين ماڻهو گڏ ڪري رڪارڊ جوڙيو آهي. هن چيو ته تاريخ ۾ شايد ئي ڪو اهڙو جلسو ٿيو هجي جو لکين ماڻهن جو جلسو ڪندڙ پارٽي جي جلسي ۾ ان جو جھنڊو نه هجي. هن چيو ته پاڪستان اڄ جنهن دور مان گذري رهيو آهي اهو نازڪ دور وارو ليڪو لتاڙي چڪو آهي.

 

ڪراچي ۾ ٻيهر ٽارگيٽ ڪلرن جو راڄ،عورت سوڌو 5 ڄڻا قتل،6 زخمي

ڪراچي (اسٽاف رپورٽر) فائرنگ جي مختلف واقعن ۾ عورت سميت 5 ڄڻا مارجي ويا، جڏهن ته 6 ڄڻا زخمي ٿي پيا.گارڊن ۾ هٿياربندن دڪان تي فائرنگ ڪئي، جنهن جي نتيجي ۾ هڪ ڄڻو مارجي ويو. ڊفينس فيز 5 ،خيابان بدر ۾ ڪار تي فائرنگ ۾ هڪ عورت مارجي وئي، جڏهن ته هڪ ڄڻو زخمي ٿي پيو.پوليس موجب، مارجي ويل عورت جي سڃاڻپ چاند بي بي طور ٿي وئي آهي.لياري ۾ فائرنگ جي ٻن مختلف واقعن جي نتيجي ۾ هڪ ڄڻو مارجي ويو، جڏهن ته گارڊن ۾ پڻ فائرنگ دوران 2 ڄڻا اجل جو شڪار بڻجي ويا.فائرنگ جي واقعي ۾ 4 ڄڻا زخمي ٿي پيا، جن کي اسپتال نيو ويو.ڊفينس فيز ٽو ۽ ملير ٻڪرا پڙي ويجهو فائرنگ ۾ 2 ڄڻا زخمي ٿي پيا.پوليس جو چوڻ آهي ته ملير ۾ فائرنگ جو واقعو ٻن ڌرين ۾ دشمني تان پيش آيو