تازيون خبرون

Daily Archives: April 23, 2016

جيڪولين فرنينڊس فلم جڙوان 2 ۾ ورون ڌون جي هيروئن بڻبي

ممبئي (شوبز نيوز) بالي ووڊ اداڪاره جيڪولين فرنينڊس هدايتڪار ساجد ناديه والا جي نئين فلم جڙوان 2 ۾ هڪ ڀيرو ٻيهر ورون ڌون جي هيروئن بڻبي، ڀارتي ميڊيا مطابق جيڪولين فرنينڊس جيڪا فلم ڊي شوم ۾ ورون ڌون جي هيروئن بڻجي چڪي آهي، هاڻي نئين ايندڙ فلم جڙوان 2 ۾ هڪ ڀيرو ٻيهر ورون ڌون سان گڏ اداڪاري جا جلوه ڏيکاريندي، فلم جي عڪسبندي جلد شروع ٿيندي، اها فلم 1997ع جي سپر هٽ فلم ”جڙوان“ جي سيڪوئل فلم هوندي، جنهن ۾ مرڪزي ڪردار سلمان خان نڀائيندو.

 

سلمان خان جي نئين فلم ”ڌوم 4” جي هيروئن اداڪاره وني ڪپور هوندي

ممبئي(شوبز نيوز)  بالي ووڊاداڪار سلمان خان جي نئين فلم ”ڌوم 4” جي هيروئن اداڪاره وني ڪپور هوندي. بالي ووڊ جي سڌ سماءَ وارن ذريعن مطابق دبنگ خان جيڪو ”ڌوم 4” ۾ ولن بڻجندو، جي هيروئن وني ڪپور هوندي. اها يقيني طور تي مداحن لاءِ  نئين جوڙي هوندي. فلم جو هدايتڪار وجي ڪرشنا اچاره آهي. فلم جي شوٽنگ جلد شروع ٿي ويندي.ا

 

آل ڪراچي سيد نوابشاهه ميموريل فٽبال ٽورنامينٽ جو شاندار آغاز، ڪمشنر شاهه فيصل ولي پاران افتتاح

ڪراچي (اسپورٽس نيوز) آل ڪراچي سيد نوابشاهه ميموريل فٽبال ٽورنامينٽ جو شاندار آغاز، ڪمشنر شاهه فيصل ولي پاران افتتاح ڪيو ويو ، افتتاحي ميچ ۾ نيشنل بينڪ ۽ ميزبان اسامه اسپورٽس هڪٻئي جي مقابلي ۾ برتري حاصل ڪرڻ ۾ ناڪام، مقابلو برابري تي ختم ٿيو جڏهن ته ڪمشنر ولي محمد بلوچ جو چوڻ هيو ته منفي سرگرمين جي خاتمي لاءِ راندين جي ميدانن کي آباد ۽ ضلعي ڪورنگي کي صحت مند سرگرمين جو مرڪز بڻايو ويندو

 

سريش رائنا ٽي-20 ڪيريئر جون 6 هزار رنسون مڪمل ڪندڙ ڀارت جو پهريون ۽ دنيا جو پنجون بيٽسمين بڻجي ويو

راجڪوٽ(اسپورٽس نيوز)  گجرات لائينز جو ڪپتان ۽ ڀارتي بيٽسمين سريش رائنا ٽي-20 ڪيريئر جون 6 هزار رنسون مڪمل ڪري ورتيون، هو اهو اعزاز ماڻيندڙ ڀارت جو پهريون ۽ دنيا جو پنجون بيٽسمين بڻجي ويو.  رائنا هلندڙ انڊين پريميئر ليگ ۾ سن رائزرز حيدرآباد خلاف ميچ ۾ اهو ڪارنامو انجام ڏنو، گيل 8840 رنسن سان پهرين، هوج 6998 رنسن سان ٻئين، ميڪ ڪولم 6384 رنسن سان ٽئين ۽ ڊيوڊ وارنر چوٿين نمبر تي موجود آهي. گذريل ڏينهن حيدرآباد خلاف ميچ لاءِ رائنا جڏهن ميدان ۾ لٿو ته کيس 6 هزار رنسون مڪمل ڪرڻ لاءِ وڌيڪ 2 رنسن جي ضرورت هئي. هن اننگز جون شروعاتي 2 رنسون ٺاهي 6 هزار رنسون مڪمل ڪيون. رائنا 231 ميچون کيڏي اهو اعزازحاصل ڪيو. هن 3 سينچريون ٺاهي ورتيون آهن.

 

ڪرپشن کان پاڪ سماج وارو تصور: واحد پارس هيسباڻي

چيف آف آرمي اسٽاف جنرل راحيل شريف ڪرپشن جي الزام ۾ پاڪ فوج جي 11 آفيسرن کي برطرف ڪري ڇڏيو آهي. ميڊيا رپورٽن مطابق برطرف ٿيندڙن ۾ هڪ ليفٽيننٽ جنرل، 5 برگيڊيئر، 3 ڪرنل ۽ هڪ ميجر سميت ٻيا آفيسر شامل آهن. 3 ڏينهن اڳ آرمي چيف ڪوهاٽ ۾ سنگل ريجمينٽ سينٽر جي دوري دوران ٿيل تقريب ۾ ڪرپشن جي خاتمي جي حوالي سان جيڪا ڳالهه ڪئي هئي، جنهن ۾ هن چيو هو ته ملڪ ۾ ان وقت تائين پائيدار امن ۽ استحڪام نٿو ٿي سگهي، جيستائين ڪرپشن جو خاتمو نٿو ٿي وڃي، هر سطح تي بنا فرق جي احتساب لازمي آهي، ڪرپشن جي خاتمي لاءِ هر ڪوشش جي حمايت ڪنداسين. تازو قدم ان ئي سوچ جو تسلسل محسوس ٿي رهيو آهي. آرمي چيف پنهنجي ڊپارٽمينٽ ۾ هن قسم جي ڪارروائي ڪري ڄڻ ته پنهنجي ڪيل ڳالهه تي عمل جي شروعات به ڪري ڇڏي آهي.

اِها حقيقت آهي ته ڪرپشن اسان جي پوري سماج کي اڏوهي جيان کائي کوکلو ڪري ڇڏيو آهي. توهان جتي به وڃو، پوءِ اُهو سرڪاري ادارو هجي يا غير سرڪاري، پر ڪرپشن توهان کي هر هنڌ عام جام نظر ايندي. توهان جو ڪم ڀلي ڪيترو به جائز ڇو نه هجي، پر اُهو ايستائين نٿو ٿئي جيستائين توهان پنهنجي کيسي ۾ هٿ نٿا هڻو. هتي ڪرپشن ايتري ته عام ٿي وئي آهي جو ان ۾ ملوث عنصرن کي ڪنهن به قسم جي ڪابه شرمندگي نٿي ٿئي، بلڪه اهي وڌ کان وڌ مال ٺاهڻ لاءِ مقابلي ۾ لٿل آهن. پنهنجو ملڪ وسيلن سان مالامال هجڻ جي باوجود بک ۽ بدحالي جا جيڪي منظر پيش ڪري رهيو آهي، اهو ان ڪرپشن جي ڪري ئي آهي. هڪڙا ڪجهه به نه ڪرڻ باوجود عاليشان بنگلن ۾ رهي رهيا آهن ۽ عاليشان گاڏين ۾ گهمي رهيا آهن ۽ ٻيا صبح کان رات تائين محنت مزدوري ڪرڻ باوجود ٻن ويلن جي ماني لاءِ پريشان آهن، اِهو سڀ ڪجهه اِن ڪرپشن جو ئي ڪمال آهي، جيڪا اسان وٽ انتها درجي تي پهتل آهي. ان کان وڌيڪ الميو ٻيو ڪهڙو ٿي سگهي ٿو جو هتي فوتي سرٽيفڪيٽ به ڏهڙي کانسواءِ نٿو ملي. ماڻهو غربت جي لڪير کان به هيٺ زندگي گذاري رهيا آهن ۽ انهن جي دانهن ۽ ڪوڪن جو ڪوبه درمان نٿو ٿئي.

آرمي چيف جي اِها ڳالهه بلڪل به صحيح آهي ته ملڪ ۾ ان وقت تائين پائيدار امن ۽ استحڪام قائم نٿو ٿي سگهي، جيستائين ڪرپشن جو خاتمو نٿو ٿي وڃي. پوليس ٿاڻي کان وٺي انصاف جي گهرن تائين پاڻ وٽ جيڪو ڪجهه ٿي رهيو آهي، ان تي ڪاڳر ڪارا ڪرڻ جي ضرورت ان ڪري به ناهي جو اسين اِهو سمورو ماحول پنهنجي اکين سان ڏسي رهيا آهيون. ڏيتي ليتي جي بنياد تي ڏوهاري عنصر شهپر وٽي گهمي رهيا آهن ۽ انهن کي ڪابه پرواهه نه آهي، پوليس وارا انهن سان گڏجي چانهيون پي رهيا آهن ۽ دعوتون کائي رهيا آهن. اهڙي صورتحال ۾ امن جي اميد ڪٿان ڪري سگهجي ٿي، ڪرپشن اسان جي محافظن کي ايترو ته بي حس ڪري ڇڏيو آهي جو ڪنهن به مجبور جي دانهن ۽ ڪوڪ جو انهن تي ڪوبه اثر نٿو ٿئي. جيڪڏهن ڪرپشن کي ٻنجو اچي ٿو ۽ زندگيءَ جي سڀني شعبن ۾ ڪم ڪندڙ ماڻهو ايمانداريءَ سان پنهنجا فرض سرانجام ڏين ٿا ته سماج ۾ موجود سمورين براين جو خاتمو اچي سگهي ٿو ۽ اِهو سڀ ڪجهه ناممڪن نه آهي. جيڪڏهن انتظاميه پنهنجي تي اچي ٿي ته ڏوهارين لاءِ لڪڻ جي جاءِ به نه ٿي بچي، ان جو اندازو دهشتگردن ۽ ڏوهارين خلاف شروع ٿيل آپريشن مان لڳائي سگهجي ٿو. ڪراچي ۾ ڪالهه تائين جيڪي منظر هئا اُهي اسين پنهنجي اکين سان ڏسي رهيا هئاسين، درجن ڏيڍ ماڻهو ٽارگيٽ ڪلنگ ۾ مارجڻ ته عام معمول جي ڳالهه هئي، پر ڪڏهن ڪڏهن اِهو انگ سؤ سوا تائين به پهچندو هو ۽ پاڻ وارا حڪمران ان سموري صورتحال کي ان دليل ذريعي جسٽيفاءِ ڪرڻ جي ڪوشش ڪندا هئا ته ڪراچي ڪروڙن جي آبادي رکندڙ شهر آهي، اتي جيڪڏهن درجن ڏيڍ ماڻهو روزانو مارجن ٿا ته ان تي پريشان ٿيڻ جي ضرورت نه آهي، ان کان وڌيڪ روين جي بي حسي جو ٻيو ڪهڙو مثال ٿي سگهي ٿو. هاڻ جڏهن آپريشن کانپوءِ روزانو هڪ ماڻهو به ٽارگيٽ ڪلنگ ۾ نٿو مارجي ته اُها ڪروڙن جي آبادي واري جسٽيفڪيشن ڪيڏانهن وئي؟ اصل ڳالهه سنجيدگي جي آهي، جيڪڏهن اها ناهي ته بهانا کوڙ آهن. اصل ڳالهه نيڪ نيتيءَ سان پنهنجي ڪردار جي ادائگيءَ جي آهي، جيڪڏهن اها نيڪ نيتي عمل ۾ اچي ٿي ته ڪجهه به ناممڪن نه آهي.

اهو سچ آهي ته اسان وٽ جيڪڏهن ڪرپشن جو هي ڪڌو ڪاروبار پنهنجي پڄاڻيءَ تي پهچي وڃي ته عوام جون ڪيتريون ئي پريشان ختم ٿي سگهن ٿيون، پر هي ڪڌو ڪاروبار رڳو ڳالهيون ڪرڻ سان ختم نٿو ٿي سگهي، ان لاءِ سخت قسم جي ڪارروائين جي پڻ ضرورت آهي. پنهنجي پرائي جي فرق کانسواءِ جيڪڏهن ايمانداريءَ سان ڪارروائيءَ جو سلسلو شروع ٿي وڃي ته ضرور ڪرپشن تي ڪنٽرول ٿي سگهي ٿو. اسان جي ادارن جي تباهيءَ جو هڪڙو وڏو سبب ڪرپشن به آهي، جيڪا انهن جي ڪارڪردگيءَ کي سخت متاثر ڪري رهي آهي، جڏهن ادارن ۾ ڪم ڪندڙ ماڻهن جو مقصد ئي مال ڪمائڻ رهجي وڃي ته اُهي پنهنجي فرضن جي ادائيگي ڪٿان ڪري سگهندا. هاڻي وقت اچي ويو آهي ته ان عمل جي رستا روڪ ڪريون، جيستائين هر سطح تي بنا فرق جي احتساب نه ٿيندو ايستائين ڪنهن کي به وزن جي خبر نه پوندي ۽ غلط ڪاري واري عمل کي روڪي نه سگهبو. غلط عمل ڪير به ڪري، ان کي هر صورت ۾ سزا ملڻ گهرجي.

هي ڪرپشن ڪندڙ ملڪي خزاني سان گڏ عوام جي کيسن کي جهڙي انداز ۾ لٽي رهيا آهن، انهن جي رستا روڪ ڪرڻ گهرجي، سندن خلاف جامع ڪارروائي نه ٿيڻ جو ئي نتيجو آهي جو اهي بنا ڪنهن خوف خطري جي پنهنجا عمل ڪري رهيا آهن. ترقياتي اسڪيمن کان وٺي عوامي فلاح ۽ بهبود جي مختلف معاملن تائين هي جيڪو ڪرپشن وارو سلسلو هلندڙ آهي، ان ڪم جي سڄي معيار کي تباهه ڪري ڇڏيو آهي، جيڪڏهن ڪنهن روڊ جي تعمير لاءِ آيل هڪ ڪروڙن رپين مان 80 لک پنهنجي کيسن ۾ وڌا وڃن ۽ باقي 20 لکن مان ڪم ڪرايو وڃي ته اُن ڪم جي ڪوالٽي ڇا هوندي، اِهو اندازو لڳائڻ ڏکيو ڪونهي. ان جا ڪيترائي مثال اسان جي سامهون آهن.

هڪڙو دور هو جڏهن سرڪاري عمارتون پنهنجي سؤ سالن جي ڄمار مڪمل ڪرڻ باوجود ساڳي مضبوطيءَ سان قائم هونديون هيون، جيڪي عمارتون هينئر تائين به موجود آهن ۽ ٻيو اهڙو دور آهي جنهن ۾ ڪابه نئين عمارت 5 سال به جٽاءُ نٿي ڪري ته اِهو سڀ ڪجهه اِن ڪرپشن جو ئي ڪمال آهي. ائين به ناهي ته ڪرپشن ڪا هينئر اوچتو ئي اوچتو ظاهر ٿي آهي، اِهو سلسلو سالن صدين کان هلي رهيو آهي. سرڪاري خزاني ۾ هٿڙي هڻڻ وارو سلسلو پراڻو آهي، پر ان جي اها انتها اڳ اهڙي نه هئي جيئن هينئر نظر اچي رهي آهي. ان سلسلي ۾ هڪڙي صحافي دوست جو تبصرو ڏاڍو دلچسپ هو ته اڳ ۾ ٻه يا ٽي پرسنٽ پنهنجو فائدو رکيو ويندو هو، پر هاڻي اهو 70 کان 80 سيڪڙو تائين پهچي ويو آهي. ڪٿي ڪٿي ته سؤ سيڪڙو مال بنا خرچ ٿيڻ جي پنهنجي کيسي ۾ وڌو ويندو آهي. اهڙي صورتحال ۾ ڪم جي ڪوالٽي اهڙي نه هوندي ته ڪهڙي هوندي! پنهنجي آس پاس نظر ڊوڙائينداسين ته اسان کي انتهائي حيران ۽ پريشان ڪندڙ منظر نظر ايندا، ان کان وڌيڪ ظلم ٻيو ڪهڙو ٿي سگهي ٿو جو بئنڪن اڳيان بينظير انڪم سپورٽ پروگرام جي هزار 15 سؤ واري رقم وٺڻ لاءِ بيٺل مسڪين عورتن کي به بخش نٿو ڪيو وڃي. ايجنٽ مافيا انهن کي به ٻنهي هٿن سان ڦري رهي آهي ۽ انهن جي مرضيءَ کانسواءِ بئنڪن اندر ڪنهن کي به داخل ٿيڻ جي اجازت نه ٿي ملي، انتظار ۾ سڄو سڄو ڏينهن بيهي پوڙهيون عورتون بيهوش ٿي وڃن ٿيون، گرمي ۾ انهن جو حال برو ٿي وڃي ٿو، پر انهن جي حال تي ڪنهن کي به رحم نٿو اچي، اِهو منظر رڳو ايستائين ختم نٿو ٿئي، پر مجموعي طور تي جيڏانهن به نظر ڊوڙائيندا اوهان کي ڪرپشن ڪندڙ مافيا سرعام سرگرم نظر ايندي ۽ ڏيتي ليتي کانسواءِ ڪوبه ڪم ٿيندي نظر نه ايندو. جيستائين ان سموري سلسلي کي سچائي ۽ سنجيدگيءَ سان ٻنجو نه ايندو، ايستائين بهتريءَ جي ڪابه اميد نٿي ڪري سگهجي، ايستائين رليف جي ڪابه اميد نٿي ڪري سگهجي، ايستائين ترقي ۽ خوشحاليءَ جي ڪابه اميد نٿي ڪري سگهجي. ڪرپشن کان پاڪ سماج وارو تصور خبر ناهي ڪڏهن عملي شڪل وٺندو.

*****

 

سخت گرمي کان بچڻ لاءِ سنڌ حڪومت پاران حڪمت عملي تيار…: امداد علي ڪريو

جيتوڻيڪ گرمي، سردي، بهار ۽ خزان جون مندون انسان جي جياپي لاءِ ضروري هجن ٿيون ۽ خاص طور زرعي پيداواري عمل ۾ به وڏو رول ادا ڪن ٿيون، پر ڪنهن شئي جو حد کان وڌي وڃڻ به هاڃيڪار ثابت ٿئي ٿو. پوءِ چاهي اها موسم هجي يا ٻي ڪا به شئي. انگريزي ۾ چوندا آهن ته exess of every thing is bad گذريل پنجن ستن سالن کان ڏکڻ ايشيا جي ملڪن ۽ خاص طور بحر ۽ هند وارن علائقن ۾ گرمي جي پد ۾ روز به روز اضافو ٿيندو پيو وڃي، جنهن جو مثال سال 2010 ۾ ڀارت جي گجرات ۽ ٻين علائقن ۾ سخت گرمي سبب هزارين انسان موت جو کاڄ بڻجي ويا هئا ۽ اهڙي طرح گذريل ٻن ٽن سالن کان سنڌ جي وڏن شهرن جهڙوڪ ڪراچي ۽ ٻين جاين تي به سخت گرمي ڪري ماڻهو موت جو شڪار ٿيا.

حقيقت ۾ اهڙيون سخت گرميون ماضي بعيد ۾ به اينديون رهيون آهن پر انهن انسان ذات کي ايڏو نقصان نه ڏنو هو جيڪو اڄ ڏئي رهيون آهن، جنهن جو سبب اسان جي وڏن شهرن ۾ آبادين ۾ حد کان وڌيڪ اضافو، رهڻي ڪهڻي جي طرز ۾ تبديلي ۽ گرمي کان بي بيخبري لاپرواهي به آهي.

گذريل ٻن ٽن سالن کان اڳ حڪومت لاءِ هي هڪ نئون چئلينج ٿي اڀريو آهي. مونکي ياد آهي ته گذريل سال به جڏهن مان سنڌ جي وڏي وزير سان پريس سيڪريٽري جي عهدي تي ڪم ڪري رهيو هئس ته سنڌ جي وڏي وزير سيد قائم علي شاهه جي حڪم تي ئي صرف سرڪاري ادارا نه، پر پاڪستان پيپلز پارٽي جي عهديدارن پڻ ڪراچي سميت سموري سنڌ ۾ گرمي کان بچڻ لاءِ مختلف هنڌن تي هيٽ اسٽروڪ سينٽر امدادي مرڪز کوليا هئا ۽ لڳو لڳ سڀني اسپتالن ۾ هنگامي حالت لاڳو ڪري گرمي کان سٽيل ماڻهن کي طبي امداد فراهم ڪرڻ جو زبردست بندوبست ڪيو ويو هو، جنهن سان هزارن ماڻهن جي جانين کي بچايو ويو هو. سبڌ جي وڏي وزير سيد قائم علي شاهه پڻ اسپتالن جا هنگامي دورا ڪيا هئا. مريضن کي طبي امداد جي نگراني ڪئي هئي ۽ اهو به ياد اٿم ته جناح اسپتال ڪراچي ۾ ساڻس دوري وقت ڪجهه نيم بيهوشي مونکي به ٿئي هئي. هن وقت به موسميات کاتي اڳڪٿي ڪئي آهي ته ايندڙ يعني مئي مهيني ۾ سخت گرمي جون 2 وڏيون  لهرون اينديون، جنهن کان بچاءُ جا اپاءُ ضروري کنيا وڃن.

موسميات کاتي جي اڳڪٿي ۽ ماضي جي صورتحال کي سامهون رکندي سنڌ جي چيف سيڪريٽري جناب محمد صديق ميمڻ اپريل 19 تاريخ تي سنڌ سيڪريٽريٽ ۾ هڪ اهم اجلاس سڏايو ۽ صدارت ڪئي، جنهن ۾ گرمي کان ماڻهن کي بچائڻ لاءِ هڪ جامع حڪمت عملي جوڙي وئي. اجلاس ۾ سنڌ صحت کاتي جي سيڪريٽري، سڀني ڊويزنل ڪمشنرن، ڪي ايم سي، ڪي اليڪٽرڪ، پي ڊي ايم اي، موسميات کاتو، جناح اسپتال، سول اسپتال، سنڌ پوليس ۽ ٻين ادارن جي اعليٰ نمائندن شرڪت ڪئي ۽ خوب بحث مباحثي ۾ حصو ورتو. اجلاس ۾ چيف سيڪريٽري سنڌ جناب محمد صديق ميمڻ بحث کان پوءِ جن اهم فيصلن جو اعلان ڪيو تن ۾ هيٺ ڄاڻايل فيصلا اهم  آهن:

(1)              شهرن ۾ مختلف هنڌن تي هيٽ اسٽروڪ امدادي مرڪز قائم ڪرڻ. اهي مرڪز خاص طور ماڻهن جي عام واهپي وارن هنڌن، ريلوي اسٽيشنن، مارڪيٽن، بس اڏن وٽ قائم ڪيا ويندا

(2)              جتي برف، پاڻي ۽ طبي عملو مقرر هوندو

(3)              سڀني اسپتالن ۾ اسپيشل وارڊ قائم ڪري اتي هنگامي حالت لاڳو ڪري وڌيڪ اسٽاف  ۽ دوائن جو بندوبست ڪيو ويندو

(4)              گرمي جي انتهائي وقت ۾ لوڊشيڊنگ نه ڪرڻ ۽ لاڳاپيل ڪمپنين کي هدايتون جاري ڪيون.

(5)              اسڪولن جو وقت تبديل ڪري صبح جو سوير اسڪول کولي منجهند جو گرمي جي انتهائي ٽائيم کان اڳ بند ڪرڻ تي غور ڪرڻ

(6)              وڏي عمر جي ماڻهن کي احتياطي تبديرون اپنائڻ لاءِ مذهبي اسڪالرن کان مدد وٺڻ

(7)              آباد ۽ صنعتي ادارن سان رابطو ڪري مزدورن جي ڪم جي وقت ۾ گهٽتائي ۽ انهن جي گرمي کان بچاءُ جا پاءُ وٺڻ جي هدايت

(8)              صوبي جي سينٽرل جيلن، ضلعي جيلن ۽ جوڊيشل لاڪ اپن ۾ گنجائش کان وڌيڪ قيدين ۾ گهٽتائي ڪري اتي گرمي کان بچاءُ جا اپاءُ وٺڻ

(9)              ٿرپارڪر ضلعي ۾ فور ويل 4×4 گاڏيون ڏئي ماڻهن کي گرمي کان ريليف ۾ مدد ڪرڻ/ صحت جون سهولتون فراهم ڪرڻ

(10)          اسپتالن ۾ مڙني طبي سهولتون فراهم ڪرڻ سان گڏ اتي مريضن ۽ ڊاڪٽرن کي ماڻهن جي رش کان محفوظ رکڻ ۽ انهن جي حفاظت ڪرڻ

(11)          ۽ سڀ کان اهم ۽ وڏو فيصلو اهو ڪيو ويو ته ماڻهن کي گرمي کان بچڻ لاءِ آگاهي ڏيڻ لاءِ اطلاعات کاتي پاران پي ڊي ايم اي، ڪي اليڪٽرڪ ۽ صحت کاتي جي مشاورت سان پرنٽ ۽ اليڪٽرانڪ ميڊيا ۾ هڪ تشهيري مهم هلائڻ آهي.

گڏوگڏ اهو به فيصلو ڪيو ويو ته لاڳاپيل ادارن کي سفارش ڪئي وڃي ته سڀني سرڪاري اسڪولن ۽ اسپتالن ٻهراڙين ۾ طبي مرڪزن کي مستقبل قريب ۾ سولر انرجي تي منتقل ڪيو وڃي ته جيئن اڳتي اهڙي صورتحال کي سولائي سان منهن ڏئي سگهجي. گڏجاڻي ۾ ماضي جو رڪارڊ پيش ڪندي اهو به ٻڌايو ويو ته گذريل ٻن سالن ۾ گرمي سبب فوت ٿيلن جو 60 سيڪڙو اهي ماڻهو آهن جيڪي وڏي عمر وارا، مريض ۽ پنهنجن پنهنجن گهرن ۾ فوت ٿيا هئا، جنهن جو مطلب اهو آهي ته گهڻ مار عمارتن ۾ر هندڙ اهي ماڻهو، بجلي جي لوڊشيڊنگ سبب گهٽ ۽ ٻوسٽ ۾ فوت ٿيا هوندا. لحاظا تجويز ڏني وئي ته ايندڙ گرمين ۾ ماڻهن کي کلي هوا مهيا ڪرڻ لاءِ بجلي جي فراهمي کان علاوه سڀني مسجدن جا دروازا 24 ڪلاڪ کليل رکيا ويندا ۽ سڀني بجلي جي ادارن گرمي جي انتهائي عرصي دوران لوڊشيڊنبگ نه ڪرڻ جي هدايت ڪئي وئي. ان کان علاوه فلاحي ادارن، رضاڪارن ۽ ايمبولينس جي ڊرائيورن کي پڻ تربيت ڏيڻ جو فيصلو ڪيو ويو آهي ته هو ڪنهن به هنگامي صورتحال ۾ ڪنهن به هڪ صحت واري اداري / اسپتال تي رش نه ڪن بلڪ مريض کي گهٽ دٻاءُ واري اسپتال ڏانهن منتقل ڪن.

اجلاس کي خطاب ڪندي سنڌ جي چيف سيڪريٽري محمد صديق ميمڻ مٿي ڄاڻايل فيصلا ٻڌائيندي سڀني آفيسرن تي زور ڀريو ته هو ماڻهن جون جانيون بچائڻ جهڙي اهم فرض ۾ ڪابه ڪوتاهي نه ڪن. هن مختلف ادارن پاران فنڊن جو ذڪر ڪندي چيو ته ماڻهن جي جان بچائڻ لاءِ کين هر ممڪن مالي مدد ڪئي ويندي. ميمڻ صاحب خاص طور ٿر جي ماڻهن کي گرمي کان بچاءُ لاءِ اپاءُ وٺڻ لاءِ ڪمشنر ميرپورخاص کي فور ويل 4×4 گاڏيون، دوائون ۽ ڊاڪٽر مهيا ڪرڻ جو يقين ڏياريو. هن چيو ته جيڪڏهن ماڻهن کي گرمي کان احتياطي تدبيرون اختيار ڪرڻ جي صحيح آگاهي ڏني وڃي ته نه صرف باقي آپريشنل خرچ بچي سگهن ٿا پر ماڻهن جي نقصانن کي به گهٽ کان گهٽ ڪري سگهجي ٿو. هن صوبي اندر سڀني ڊويزنل ڪمشنرن کي هدايت ڪئي ته هو اڄ جي گڏجاڻي جي حوالي سان پنهنجي پنهنجي حڪمت عملي جو ٻيهر جائزو وٺي ان کي ناقابل شڪست پلان تيار ڪن. هن ان سان گڏ سڀني فلاحي ادارن، رضاڪارن کي هر وقت حاضر رهڻ جي اپيل ڪئي ۽ گڏوگڏ ماڻهن کي به اپيل ڪئي ته هو احتياطي تدبيرون پاڻ به اختيار ڪن ۽ ٻين کي به ڪرائين. هن ڪنهن به هنگامي صورتحال ۾ ماڻهن کي اسپتالن اندر رش، ڀيڙ نه ڪرڻ جي صلاح ڏني ۽ سنڌ پوليس کي ڊاڪٽرن ۽ ٻئي عملي جي تحفظ لاءِ قدم کڻڻ جي به هدايت ڪئي.

 

 

چئو ڌيءِ کي ته ڪن ڪري نهن…

پاڪ فوج جي سربراهه جنرل راحيل شريف پنهنجي ڪيل ڳالهين کي عملي جامعو پهرائڻ شروع ڪري ڇڏيو آهي، آرمي چيف جنرل راحيل شريف ڪجهه ڏينهن پهرين ملڪ جي مڙني ادارن مان ڪرپشن ناسور کي پاڙان ڪڍڻ جو عزم ڪيو هو ۽ چيو هو ته پاڪ فوج ملڪ کي ڪرپشن کان پاڪ ڪندي. پاڪستان آرمي جي سربراهه انهيءَ ڳالهه کي عملي جامو پڻ پارائي ڇڏيو، 13 فوجي آفيسرن کي ڪرپشن جي الزام هيٺ هٽائي ڇڏيو. هٽايل فوجي آفيسرن ۾ هڪ ليفٽيننٽ جنرل، هڪ ميجر جنرل ۽ 5 بريگيڊيئر شامل آهن. ذريعن جو چوڻ آهي ته ڪرپشن جي الزام ۾ هٽايل سمورن فوجي آفيسرن  کان مڙني مراعتون ۽ سرڪاري اعزاز تڪڙو ئي واپس ورتا ويندا، سندن سروس به ختم ٿي سگهي ٿي. ڪرپشن الزام ۾ برطرف ٿيل ميجر جنرل اعجاز شاهد خلاف جاچ جي شروعات ان وقت ٿي جڏهن ان جي پٽ هڪ اسپورٽس ڪار خريد ڪئي هئي، جنهن کي چيڪ ڪرڻ لاءِ ميجر جنرل اعجاز شاهد پاڪ فوج جي ٻن آفيسرن کي چيو، اسپورٽس ڪار جي چڪاس  وٺڻ دوران حادثو پيش آيو، جنهن ۾ ڪرنل شڪيل ۽ ميجر ياسر شهيد ٿي ويا، ٻنهي آفيسرن جي شهادت تي سندن گهر وارن آرمي چيف جنرل راحيل شريف کي درخواست ڏني هئي، جنهن ۾ سوال ڪيو ويو هو ته ميجر رينڪ آفيسر جي پٽ وٽ نئين اسپورٽس ڪار ڪهڙي طرح ۽ ڪٿان اچي سگهي ٿي، ان درخواست کانپوءِ فوج اندروني طور تي ميجر جنرل اعجاز شاهد خلاف جاچ جي شروعات ڪئي، ان جاچ جو دائرو وسيع ڪندي ميجر جنرل اعجاز شاهد سان گڏوگڏ ايف سي ۾ مقرر ٻين آفيسرن خلاف به جاچ ڪئي وئي، جنهن ۾ ليفٽيننٽ جنرل عبيدالله به شامل هو، جاچ کانپوءِ انهن آفيسرن خلاف ڪرپشن جا ڪيس سامهون آيا، ڪرپشن الزام ۾ عهدن تان فارغ ڪيل فوجي آفيسرن ۾ ليفٽيننٽ جنرل عبيدالله خٽڪ، ميجر جنرل اعجاز شاهد، برگيڊيئر اسد، برگيڊيئر صيف الله، برگيڊيئر عامر، برگيڊيئر حيدر، 3 ڪرنل ۽ ميجر نجيب شامل آهن، انهن کان سموريون مراعتون واپس ورتيون ويون آهن، برطرف آفيسر بلوچستان ايف سي ۾ مقرر هئا، ليفٽيننٽ جنرل عبيدالله خٽڪ ۽ ميجر جنرل اعجاز شاهد، آءِ جي بلوچستان فرنٽيئر ڪور جي عهدي تي مقرر رهي چڪا آهن،

پاڪ آرمي ۾ احتساب جو عمل شروع ٿي چڪو آهي، هاڻي اهي ماڻهو به ڪَنَ ڪَنِ جن ملڪ ناڻي کي مال غنيمت سمجهي پئي لٽيو آهي، يقنين انهن جو آرمي چيف جي کنيل قدمن بعد ننڊون ته حرام ٿي ويون هونديون، عوام پاڪ فوج جي سپهه سلار کان اهو مطالبو ڪري ٿو ته جئين پاڪ فوج ۾ احتساب شروع ڪيو ويو آهي ائين ئي ملڪ جي هر اداري کي ڊراءِ ڪلين ڪيو وڃي جنهن ۾ ڪپرپٽ ماڻهو ويٺل آهن.