تازيون خبرون

Daily Archives: April 22, 2016

ڪرپشن الزام، آرمي چيف پاڪ فوج جي 11 آفيسرن کي برطرف ڪري ڇڏيو

راولپنڊي(م.ڊ) آرمي چيف جنرل راحيل شريف پاڪ فوج جي 11 آفيسرن کي ڪرپشن جي الزامن تي برطرف ڪري ڇڏيو آهي، برطرف ٿيندڙن ۾ پاڪ فوج جا 2 جوان به شامل اهن، برطرف ڪيلن آفيسرن فرنٽيئر ڪانسٽيبلري ۾ خدمتون انجام ڏنيون اهن، فارغ ڪيلن ۾ هڪ ليفٽيننٽ جنرل ۽ هڪ ميجر جنرل شامل آهي، طرف ڪيلن ۾ ليفٽيننٽ جنرل عبيد الله خٽڪ، ميجر جنرل اعجاز شاهد شامل آهي، 5 برگيڊيئ ر، 3 ڪرنل ۽ هڪ ميجر به ڪرپشن جي الزام ۾ برطرف ٿيو آهي، برطرف ٿيلن ۾ برگيڊيئر حيدر، برگيڊيئر اسد، برگيڊيئر سيف الله، برگيڊيئر عامر، ڪرنل حيدر ۽ ميجر نجيب شامل آهي، برطرف آفيسرن جون تمام مراعتون واپس ورتيون ويون آهن، واضح رهي ته گذريل ڏينهن آرمي چيف بنا فرق جي احتساب جي ڳالهه ڪئي هئي.

 

ملڪ کي اونداهه مان ڪڍڻ وارو عمل جاري رکنداسين: نواز شريف

اسلام آباد (اين اين آءِ) وزيراعظم محمد نوازشريف چيو آهي ته قومي پاڪستان جي اقتصادي ترقي ۽ خوشحالي تي متحد آهي ڪنهن کي تعمير ۽ ترقي ۾ رنڊڪ وجهڻ جي اجازت نه ڏيندي عدم استحڪام پيدا ڪري عوام جي ترقي ۽ خوشحالي جو رستو روڪيندڙ ڪالهه به ناڪام ٿيا هئا ۽ آئينده به ڪامياب نه ٿيندا ماضي ۾ به سخت کان سخت انتقامي احتساب مان ڪامياب ٿي نڪتو آهيان اسان جو دامن صاف آهي خوشي آهي پاڪستان پهريون ڀيرو قدرت پاران عطا ڪيل ڪوئلي جي کاڻين مان بجلي پيدا ڪرڻ ۾ ڪامياب ٿيندو هو خميس تي وزيراعظم هائوس ۾ وفاقي وزيرن صلاحڪارن ۽ معاون خاص جي هڪ خصوصي اجلاس کي خطاب ڪري رهيو هو وزيراعظم چيو ته سڄي دنيا پاڪستان ۾ جاري تعمير ۽ ترقي، معيشت جي بحالي، توانائي جي وڏن وڏن منصوبن انفرااسٽريڪچر ۽ پاڪ چين اقتصادي راهداري جي منصوبن جي شفافيت جي ڪائل آهي اسان ڪيترائي منصوبا اولين لاڳت جي ڪاٿن کان اٽڪل اڌ قيمت ۾ مڪمل ڪيا اسان جو مقصد واضح آهي ۽ اهو اهو آهي ته اسان پاڪستان کي مسئلن کي ڌٻڻ ۾ ڪاڊڻ چاهيون ٿا جيڪي سالن کان پاڪستان جي پچر نٿا ڇڏين ۽ جنهن سبب اسان ٻين قومن کان گهڻو پوئتي رهني ويا آهن اسان اقتدار بدران هميشه قدرن کي ترجيحي ڏني ۽ سمورن قومي معاملن ۾ ٻين جماعتن جي مشاورت سان فيصلا ڪيا وزيراعظم چيو ته انشاءالله 2018 تائين توانائي جا بيشتر منصوبا ايتري پيداوار ڏيڻ لڳندا جو ملڪ لوڊشيڊنگ مان نجات حاصل ڪري وٺندو هن چيو ته الله جي فضل سان اسان جو دامن صاف آهي اسان ماضي ۾ به سخت کان سخت انتقامي احتساب مان ڪامياب ٿي نڪتا آهيون وزيراعظم چيو ته قوم پاڪستان جي اقتصادي ترقي ۽ خوشحالي تي متحد آهي. وزيراعظم ڪابينه جي ميمبرن ۽ پوري قوم جو شڪريو اداڪيو ته انهن هن جي صحتيابي لاءِ دعائون ڪيون ۽ ان جي خيريت معلوم ڪئي وزيراعظم پنهنجي بيماري ۽ علاج جي حوالي سان ڪابينه جي دوستن کي آگاهه ڪيو اجلاس ۾ ڪابينه جي ميمبرن موجوده صورتحال تي خيالن جو اظهار ڪيو ۽ چيو ته موجوده حالتن مان ڪجهه سياسي عنصر فائدو وٺن جي ڪوشش ڪري رهيا آهن جنهن جو مقصد بي يقيني پکيڙي حڪومت جو ڌيان اقتصادي ايجنڊا کان هٽائڻ آهي. وزيرن وڌيڪ چيو ته موجوده پروپيگنڊا جو نشانو وزيراعظم جي ذات يا ان جو خاندان نه پر ملڪ جو سياسي استحڪام ۽ ترقي جو عمل آهي. ان موقعي تي اتحادي جماعتن سان تعلق رکندڙ وزيرن وزيراعظم کي پنهنجي جماعتن ۽ قيادت پاران ڀرپور حمايت جو يقين ڏياريو.

 

وزير اعظم هڪ ارب 96 ڪروڙ ۽ عمران خان 4 ڪروڙ 54 لک رپين جا مالڪ آهن: انگ اکر جاري

اسلام آباد (بيورو) اليڪشن ڪميشن پارليمينٽ جي ميمبرن جي مالي سال 2014-15 جي اثاثن جا تفصيل جاري ڪري ڇڏيا آهن، جن ۾ ٻڌايو ويو آهي ته وزير اعظم نواز شريف هڪ ارب 96 ڪروڙ جڏهن ته عمران خان 4 ڪروڙ 54 لک رپين جو مالڪ آهي، اليڪشن ڪميشن پاران جاري ڪيل تفصيل موجب وزير اعظم ۽ عمران خان جي پرڏيهه ۾ ڪابه ملڪيت نه آهي، وزير اعظم هڪ ارب 96 ڪروڙ رپيا جڏهن ته عمران خان 4 ڪروڙ 54 لک رپين جا مالڪ آهن، وزير اعظم جي اپر مال جي ملڪيت جي موجوده قيمت 25 ڪروڙ رپيا آهن ۽ سندس مخلتف زرعي اراضي جي ماليت هڪ ارب 7 ڪروڙ رپين کان وڌيڪ آهي، وزير اعظم جي زرعي اراضي تحفي ۽ وراثت ۾ مليل آهي، سندس گهر واري ڪلثوم نواز جي هال روڊ تي ملڪيت جي قيمت 10 ڪروڙ رپيا آهي، جڏهن ته وزير اعظم جي پُٽ حسين نواز 21 ڪروڙ 56 لک رپيا پرڏيهه مان موڪليا، ٻئي پاسي تحريڪ انصاف جي سربراهه جي اثاثن جي تفصيل موجب عمران خان جو ڏيهه توڙي پرڏيهه ۾ ڪوبه ڪاروبار نه آهي ۽ سندس بني گالا جي گهر جي قيمت 75 ڪروڙ رپيا آهي، جنهن بابت هُن ٻڌايو آهي ته هيءَ گهر سندس اڳوڻي گهر واري کيس تعفي ۾ ڏنو هو، عمران خان جي پاڪستان ۾ موجود ملڪيت جي قيمت 3 ڪروڙ 31 لک رپيا آهي ۽ سندس پرڏيهه ۾ ڪابه ملڪيت موجود نه آهي.

 

سياستدانن،بيوروڪريٽن،فوج ۽ ٽيڪس چورن سوڌو سڀني جو احتساب ٿيڻ گهرجي: خورشيد شاهه

لاهور(بيورو)  قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته سياستدانن، بيورڪريٽن، فوج ۽ ٽيڪس چورن سوڌو سڀني جو احتساب ٿيڻ گهرجي، لاهور ۾ ميڊيا سان ڳالهائيندي خورشيد شاهه چيو ته قوم سوال ٿي ڪري ته آف شور ڪمپنينن لاءِ ايترو پئسو ڪٿان آيو؟ ڇا ڪنهن حاتم طائي رقم اوڌر ڏني؟ هن هڪ ڀيرو وري مطالبو ڪيو ته پاناما ليڪس جي جاچ لاءِ وزيراعطم،سپريم ڪورٽ جي چيف جسٽس کي خط لکي، سندس چوڻ هو ته جاچ ڪميشن ۾ عالمي آڊيٽرن کي به شامل ڪيو وڃي،جنهن کانپوءِ هر شيءِ جي آڊٽ ڪرائي وڃي ته ڪيترا پئسا پاڪستان کان ٻاهر ويا ۽ ڪيتري ٽيڪس ڏني وئي؟جيڪڏهن اها رقم قانوني طريقي سان وئي آهي ته ان جي به وضاحت ڪئي وڃي، مخالف ڌر جي اڳواڻ چيو ته ڪنهن به سياسي پارٽي پاناما جو معاملو ناهي اٿاريو، اهو عالمي اسڪينڊل آهي، جنهن تي اسان سڀني کي گڏجي ويهڻ گهرجي، هن چيو ته لڳي ٿو ته ميان صاحب جي ڪٽنب کي ڏيڍ مهينو پهرين ئي پاناماليڪس جي خبر پئجي وئي هئي، سيد خورشيد شاهه چيو ته ٽن سالن ۾ بجلي جي بندش ختم ڪرڻ جا نعرا هنيا ويا پر ٽن سالن ۾ لوڊشيڊنگ ناهي گهٽي، اٽلندو بجلي جا اگهه وڌي ويا آهن، هن چيو ته حڪومت ٻين ملڪن کي پاڪستان ۾ سيڙپڪاري جي دعوت ڏئي ٿي، ماڻهو پڇي سگهن ٿا ته وزيراعظم جي قول ۽ فعل ۾ تضاد ڇو آهي؟ مخالف ڌر جي اڳوان پنجاب حڪومت تي ڇوهه ڇنڊيندي چيو ته هي ماڻهو پنجاب جو ٻيڙو ٻوڙي رهيا آهن

 

وڏي وزير چيف سيڪريٽري کان روينيو رڪارڊ جي ڪپيوٽرائيزيشن جي رپورٽ طلب ڪري ورتي

ڪراچي (اين اين آءِ) سنڌ جي وڏي وزير سيد قائم علي شاهه، چيف سيڪريٽري سنڌ محمد صديق ميمڻ اربع تي سپريم ڪورٽ ۾ روينيو رڪارڊ جي ڪمپيوٽرائيزيشن بابت ٻڌڻي هيٺ ڪيس بابت بريفنگ ڏيندي ٻڌايو ته هو ڪالهه پاڻ سپريم ڪورٽ ۾ موجود هو، جتي روينيو رڪارڊ جي ڪمپيوٽرائيزيشن ڪيس جي ٻڌڻي دوران سپريم ڪورٽ ڪاوڙ جو اظهار ڪندي چيو ته پراجيڪٽ کي 4 سال گذري چڪا آهن پر ان تي ڪم اڃاتائين مڪمل نه ٿي سگهيو آهي، چيف سيڪريٽري ٻڌايو ته سپريم ڪورٽ ريمارڪس ڏيندي چيو ته جيستائين روينيو بورڊ جو لاڳاپيل ميمبر مسٽر شاهه (ذوالفقار شاهه) ڪمپيوٽرائيزيشن جي ڪم ۾ شامل رهندو ان وقت تائين روينيو رڪارڊ جي ڪمپيوٽرائيزيشن مڪمل نٿي ٿي سگهي، ان تي قائم علي شاهه صديق ميمڻ کي هدايت ڪئي ته هو خود پاڻ بورڊ آف روينيو پاران ٿيندڙ روينيو رڪارڊ جي ڪمپيوٽرائيزيشن جي ڪم جو جائزو وٺي کيس فوري رپورٽ پيش ڪري.

 

پاناما ليڪس سخت سياسي مخالفن کي ويجھو آڻي ڇڏيو، شيخ رشيد جي بلاول سان ملاقات

راولپنڊي(م.ڊ) پاناما ليڪس معاملي سخت سياسي مخالفن کي ويجھو آڻي ڇڏيو آهي. ميڊيا رپورٽن موجب پيپلزپارٽي جي چيئرميبن ڀلاول ڀٽو زرداري سان عوامي ليگ جي سربراهه شيخ رشيد ملاقات ڪئي آهي. ٻنهي اڳواڻن وچ ۾ ملاقات دوران پاناما ليڪس سميت مختلف معاملن تي خيالن جي ڏي وٺ ڪئي وئي. ان موقعي تي پ پ چيئرمين بلاول ڀٽو زرداري چيوته سمورين جاين تي احتساب ٿيڻ گھرجي. ڪرپشن جي خاتمي لاءِ احتساب ضروري آهي. شيخ رشيد بلاول سان ملاقات کانپوءِ بيان ڏيندي ميڊيا کي ٻڌايو ته عوامي ماڻهو آهيون، هميشه ملڻ جي خواهش رهندي آهي. هن چيو ته بلاول ڀٽو زرداري سان ملاقات سٺي رهي.

 

پاناما ليڪس: 48 ڪلاڪن اندر ڪميشن جي قيام جو اعلان متوقع، حڪومت شفاف جاچ چاهي ٿي: چوڌري نثار

نيو يارڪ(اي پي پي)  گهرو وزير چوڌري نثار علي خان چيو آهي ته حڪومت پاناما پيپرز جي شفاف جاچ چاهي ٿي ۽ ان مقصد لاءِ ڪميشن قائم ڪرڻ طرف اڳڀرائي ڪئي وئي آهي، ايندڙ 48 ڪلاڪن ۾ ڪميشن جي قيام جو اعلان متوقع آهي. سلامتي ڪائونسل جي مستقل ميمبرن برطانيه، چين، فرانس، روس ۽ امريڪا جي نمائندن ۽ ايراني حڪومت کي پاڪستان ۾ ڀارتي ڳجهي اداري جي آفيسر جي گرفتاري ۽ سرگرمين بابت آگاهه ڪيو ويو آهي. امريڪا ۾ رهندڙ پاڪستاني صحافين سان گڏيل قومن  جي اداري ۾ پاڪستان جي سفير مليحه لوڌي جي رهائش گاهه تي ڳالهين دوران گهرو وزير پانامه ليڪس بابت سوالن جي جواب ۾ چيو ته  ڪجهه چڙ ڏياريندڙ بيانن سان اهڙو ماحول پيدا ڪيو ويو ته سپريم ڪورٽ جي ٻن ريٽائرڊ ججن ڪميشن جي سربراهي ۾  آڇ قبول ڪرڻ کان معذرت  ڪري ورتي. هن چيو ته سياسي پارٽين ۽ ماڻهن طرفان جڊيشل ڪميشن ۽پارليامينٽ کان جاچ جا مختلف مطالبا سامهون آيا، هاڻي ان سلسلي ۾ ڪافي اڳڀرائي  ٿي آهي جنهن جو  هاڪاري نتيجو نڪرندو. گهرو وزير چيو ته وزيراعظم محمد نواز شريف پاناما پيپرز جي انڪشافن بابت سڀ کان اڳ ۾ رد عمل ڏنو ۽ هن پاڻ قوم کي خطاب ۾ جڊيشل ڪميشن جي قيام جي تجويز ڏني.

 

پاناما ليڪس جي جاچ انٽرنيشنل فرانزڪ آڊٽ ڪمپني کان ڪرائي وڃي: اعتزاز احسن

لاهور (م.ڊ) پاڪستان پيپلز پارٽي جي اڳواڻ سينيٽر اعتزاز احسن چيو آهي ته پاناما ليڪس جي جاچ انٽرنيشنل فرانزڪ آڊٽ ڪمپني کان ڪرائي وڃي، اها ڪمپني پارليماني ڪميٽي يا چيف جسٽس کي رپورٽ ڪري، خابرو ادارن موجب ميڊيا سان ڳالهائيندي اعتزاز احسن جو چوڻ هو ته اتفاق فائونڊيشن کي به آڊٽ ڪيو وڃي، جاچ جي شروعات وزير اعظم ۽ سندس خاندان کان ڪئي وڃي، ڇو ته وزير اعظم جي ٻارن اربين رپين جي ملڪيت جي ميڊيا تي تصديق ڪري ڇڏي آهي، اهي اثاثا قوم آڏو ڇو نه رکيا ويا، سندس چوڻ هو ته قوم پريشان آهي حڪومت ان بابت معاملن کي حل ڪري.

 

سنڌ حڪومت تي آڱريون کڻڻ بجاءِ عوام کي تڪڙي انصاف جي فراهمي لاءِ قدم کنيا وڃن: نثار کهڙو

ڪراچي(اي پي پي) پاڪستان پيپلز پارٽي سنڌ جي ڪوآرڊينيشن ڪميٽيءَ روينيو ريڪارڊ ڪمپيوٽرائيزڊ ٿيڻ تي سنڌ جي وڏي وزير ۽ سندس روينيو ٽيم کي خراج تحسين پيش ڪيو آهي. ڪوآرڊينيشن ڪميٽيءَ جي سربراهه نثار احمد کهڙو چيو آهي ته سنڌ حڪومت تي آڱريون کڻڻ بدران عدالت عوام کي تڪڙي انصاف جي  فراهميءَ لاءِ  قدم کڻي. هن چيو ته آئين سان غداريءَ جي جوابدار پرويز مشرف کي ملڪ کان ٻاهر وڃڻ جي اجازت ڏني وئي ۽ اڄ عوام چئي رهيو آهي ته آئين سان غداريءَ جي جوابدار جي ٻاهرين ملڪ راونگي وفاقي حڪومت ۽ عدالت جي ڪري ممڪن ٿي. هن چيو ته اها عدالت ئي هئي جنهن ماضيءَ ۾ مارشلائن کي تحفظ ڏنو ۽ بعد ۾ عوام کان معافي ورتي. هن چيو ته سنڌ حڪومت روينيو ريڪارڊ کي ڪمپيوٽرائيزڊ ڪرڻ جي عمل کي چيلينج سمجهي مقرر مدي اندر روينيو  ريڪارڊ ڪمپيوٽرائيزڊ ڪيو آهي، جيڪو سنڌ حڪومت جو تاريخي عمل آهي ۽ جنهن جو ڪريڊٽ سنڌ جي وڏي وزير ڏانهن وڃي ٿو.

 

آرمي چيف جو فيصلو حڪومت لاءِ واضح پيغام آهي: سراج الحق

لاهور (م.ڊ) جماعت اسلامي جي امير سراج الحق چيو آهي ته آرمي چيف جنرل راحيل شريف جو ڪرپشن الزام ۾ فوجي آفيسرن کي معطل ڪرڻ جو فيصلو حڪومت لاءِ واضح پيغام آهي، ٻين ادارن کي به اهڙي ريت ڪم ڪرڻ گهرجي، خانگي ٽي وي نيوز چينل سان ڳالهه ٻولهه ڪندي سراج الحق جو چوڻ هو ته ڪرپشن ۽ پاڪستان گڏ گڏ نٿا هلي سگهن، آرمي چيف جي فيصلي سان خوش آهيون، سندس چوڻ هو ته حڪومت پاناما ليڪس تي ڪميشن ٺاهڻ واري معاملي تي به منجهيل آهي، جج کي ڳچي کان پڪڙي سربراهه نٿو ٺاهي سگهجي.