تازيون خبرون

Daily Archives: April 21, 2016

اٽلي هٿياربند فوجن جي سربراهه جي پاڪ فوج جي سربراهه جنرل راحيل شريف سان ملاقات

راولپنڊي (اين اين آءِ) آرمي چيف جنرل راحيل شريف سان اٽلي جي فوج جي چيف آف ڊفينس جنرل اسٽاف جنرل لاڍيو گرازيانو ملاقات ڪئي جنهن ۾ علائقائي سيڪيورٽي صورتحال ۽ ٻنهي ملڪن وچ ۾ دفاعي تعاون کي وڌيڪ هٿيڏيڻ سميت گڏيل دلچسپي جي معاملن تي ڳالهيون ڪيون ويون آربع تي آءِ ايس پي آر مطابق اٽلي جي فوج جي چيف آف ڊفينس، جنرل اسٽاف جنرل لاڍيو گرازيانو اربع تي چيف آف آرمي اسٽاف جنرل راحيل شريف سان جي ايڇ ڪيو ۾ ملاقات ڪئي ملاقات دوران علائقائي سيڪيورٽي صورتحال ۽ ٻنهي ملڪن وچ ۾ دفاعي تعاون کي هٿي ڏيڻ سميت باهمي دلچسپي جا معاملا غور هيٺ آندا ويا اٽلي جي فوج جي چيف آف جنرل اسٽاف آپريشن ضرب عضب ۾ حاصل ڪاميابيون ۽ علائقائي سيڪيورٽي لاءِ پاڪستان جي ڪوششن کي ساراهيو.

 

منشيات جي اثرائتي خاتمي لاءِ عالمي ڪوششن ۽ ڀرپور سهڪار جي ضرورت آهي:چوڌري نثار

نيو يارڪ(اي پي پي) گهرو معاملن واري وزير چوڌري نثار علي خان هر قسم جي منشيات جي لعنت کي اثرائتي نموني ختم ڪرڻ لاءِ بين الاقوامي ڪوششن ۽ ڀرپور سهڪار کي وڌائڻ جي ضرورت تي زور ڀريندي چيو آهي ته پاڪستان منشيات جي لعنت کي منهن ڏيڻ لاءِ مضبوط ۽ جامع قانوني پاليسي ۽ انتظامي ڍانچو جوڙي ورتو آهي، پيداواري ملڪن، ٽرانزٽ ملڪن ۽ متاثر ملڪن ۾منشيات جي محرڪ مختلف نوعيت جا آهن تنهن ڪري ٻن ملڪن يا خطن ۾ هڪ جهڙو ماحول ناهي هوندي ۽ سڀني لاءِ هڪ جهڙو حل نه نه ٿو ٿي سگهي، منشيات جي برائي جو مقابلو ڪرڻ لاءِ بين الاقوامي برادري کي وڌيڪ ڪوششون ڪرڻيون پونديون. اهڙن خيالن جو اظهار هن گذريل ڏينهن نيو يارڪ ۾ منشيات جي مسئلي بابت گڏيل قومن جي اداري جي جنرل اسيمبلي جي خصوصي سيشن کي خطاب ڪندي ڪيو. هن چيو ته هن پر وقار اجتماع کي منشيات جي عالمي مسئلي تي خطاب سندس لاءِ اعزاز آهي، اسان منشيات جي موتمار اثرن جي سلسلي ۾ عالمي تحفظات کان واقف آهيون ۽ ان جي ساراهه ڪريون ٿا ۽ ان جي مڪمل حمايت ڪريون ٿا. چوڌري نثار علي خان چيو ته پاڪستان جي جاگرافيائي بيهڪ جي ڪري اسان کي گهڻ رخا چئلينج رپيش آهن. ان بيهڪ اسان کي نشيدار شين ۽ آفيم جي شڪار ۽ منشيات جي ٽرانزٽ ملڪ جهڙن مسئلن ۾ مبتلا ڪيو آهي، اسان کي ان ڳالهه تي فخر آهي ته اسان گذريل ٽيم سالن کان دنيا کي منشيات جي 1.86 ارب ڊوزز کان محفوظ بڻايو آهي، گذريل سال اسان 42 ٽن غير قانوني منشيات پڪڙي، عالمي سطح تي منشيات جي روڪٿام ۽ ان ڪم ۾ حصو ڏيندڙ ملڪن ۾ اسان پهرين نمبر تي آهيون ۽ اسان پنهنجن سرحدن جي ٻاهران پوري دنيا مان 25 ٽن غير قانوني منشيات پڪڙي پنهنجو ڪردار ادا ڪيو. هن چيو ته منشيات جي گهرج ۾ گهتٽائي، منشيات جي علاج ۽منشيات متاثر ماڻهن جي بحالي اسان جي پهرين ترجيح آهي.گذريل ڪيترن ئي سالن کان اسان منشيات کان پاڪ معاشري جي ڪوشش ڪري رهيا آهيون نه اهڙي معاشري جي تي منشيات برداشت ڪئي وڃي ٿي. هن ان ڳالهه تي زور ڀريو ته موجوده يو اين ڊرگ ڪنٽرول ڪنوينشنز کي منشيات جي روڪٿام جي عالمي حڪمت عملي جوڙڻ لاءِ بنيادي رهنما اصولن جي مخزن طور استعمال ڪيو وڃي.

 

سڄي قوم دهشتگردي جي لعنت ختم ڪرڻ لاءِ متحد آهي: پرويز رشيد

اسلام آباد (بيورو) وفاقي وزير پرويز رشيد چيو آهي ته سڄي قوم دهشتگردي جي لعنت ختم ڪرڻ لاءِ متحد ڀيٺي آهي، بزدلاڻين ڪاررواين سان اسان جي عزم کي ڪمزور نٿو ڪري سگهجي، خابرو ادارن موجب پرويز رشيد جو ڪراچي ۾ پوليو ورڪرن جي حفاظت ڪندڙ پوليس اهلڪارن تي حملي جي سخت لفظن ۾ مذمت ڪندي چوڻ هو ته ملڪ مان آخري دهشتگرد جي خاتمي تائين سک جو ساهه نه کڻنداسين، شهرين جي سِر جو تحفظ ڪرڻ لاءِ ڪنهن به قرباني کان نه لوائينداسين.

 

اسحاق ڊار جي خورشيد شاهه سان رٿيل ملاقات ملتوي، فون تي رابطو، پاناماليڪس ڪميشن بابت مشاورت

اسلام آباد(بيورو) ناڻي واري وفاقي وزير اسحاق ڊار جي پاناماليڪس ڪميشن جي حوالي سان مخالف ڌر جي اڳواڻ سيد خورشيد شاهه سان اڄ رٿيل ملاقات روڪي وئي، جنهن کانپوءِ ٻنهي اڳواڻن ٽيليفون تي رابطو ڪري صلاح مشورا ڪيا، ذريعن مطابق خورشيد شاهه سوڌو پ پ اڳواڻن سان اسحاق ڊارجي اڄ رٿيل ملاقات سينيٽ ۾ پيپلز پارٽي سان لاڳاپيل مخالف ڌر جي اڳواڻ سينيٽر اعتزاز احسن جي غير حاضري سبب روڪي وئي، جنهن کانپوءِ اسحاق ڊار مخالف ڌر جي اڳواڻ سيد خورشِد شاهه سان ٽيليفون تي رابطو ڪيو،ذريعن مطابق ٻنهي اڳواڻن ۾ ٽيليفون تي رابطي دوران پاناماليڪس جي جاچ جي حوالي سان ڪميشن بابت صلاح مشورا ڪيا ويا، فون تي رابطي دوران ڳالهائيندي سيد خورشيد شاهه وفاقي وزير کي ڪميشن بابت مخالف ڌر جي موقف بابت ٻڌايو، خورشِيد شاهه جو چوڻ هو ته پاناماليڪس بابت جڙندڙ جاچ ڪميشن جي ٽي آر اوز جو بنياد فرانزڪ آڊيٽر هجڻ گهرجي، هن چيو ته حڪومت جاچ ڪميشن جوڙڻ لاءِ سپريم ڪورٽ جي چيف جسٽس کي خط لکي، جيڪڏهن چيف جسٽس انڪار ڪري ته پوءِ پارليامينٽ جي جاچ ڪاميٽي جوڙي وڃي، خورشيِد شاهه، اسحاق ڊارکي چيو ته هو ڄاڻايل معاملي تي مخالف ڌر جو موقف حڪومت تائين پهچائي، جنهن کانپوءِ کين جواب ڏنو وڃي.001

 

پوليو ورڪرز کي سيڪيورٽي فراهم ڪندڙ پوليس اهلڪارن تي حملو هڪ بزدلاڻي ڪارروائي آهي: وڏو وزير

ڪراچي(اسٽاف رپورٽر)  سنڌ جي وڏي وزير سيد قائم علي شاهه چيو آهي ته پوليو ورڪرز کي سيڪيورٽي فراهم ڪندڙ پوليس اهلڪارن تي حملو هڪ بزدلاڻي ڪارروائي آهي. هن ڊي جي رينجرز ۽ آءِ جي پوليس سنڌ کي دهشتگردن جن ستن پوليس اهلڪارن کي قتل ڪيو انهن خلاف سخت آپريشن ڪري انهن کي ڪيفرڪردار تي پهچائڻ جي هدايت ڪئي. هن اها ڳالهه اڄ اربع ڏينهن اورنگي ٽائون واقعي جنهن ۾ دهشتگردن ستن پوليس اهلڪارن جيڪي پوليو ورڪرز کي سيڪيورٽي فراهم ڪري رهيا هئا کي قتل ڪرڻ واري واقعي جي فورن بعد منعقده هڪ اعليٰ سطحي اجلاس جي صدارت ڪندي ڪئي. اجلاس ۾ صوبائي گهرو وزير سهيل انور سيال، ڊي جي رينجرز ميجر جنرل بلال اڪبر، وڏي وزير جي پرنسپل سيڪريٽري علم الدين بلو، آءِ جي پوليس سنڌ اي ڊي خواجه، ايڊيشنل آءِ جي ڪراچي مشتاق مهر شرڪت ڪئي. آءِ جي پوليس اي ڊي خواجه وڏي وزير کي بريفنگ ڏيندي ٻڌايو ته هُو ان واقعي کان پوءِ ترت اتي پهتو ۽ شهيد ٿيل پوليس اهلڪارن جي مڙهن کي عباسي شهيد اسپتال منتقل ڪرايو. ڊي جي رينجرز به اتي پهتو. پوليس ۽ رينجرز علائقي جو گهيراءُ ڪري پوليس اهلڪارن جي قتل ۾ ملوث دهشتگردن کي گرفتار ڪرڻ لاءِ آپريشن جي شروعات ڪئي. هن چيو ته اهو حملو اصل ۾ پوليس اهلڪارن تي ڪيو ويو نه ڪي پوليو ورڪرز تي. هنن پوليس اهلڪارن جي مٿي ۾ گوليو هيون. ڪنهن به پوليو ورڪر تي حملو نه ڪيو جنهن سان اهو ظاهر پيو ٿي ته حملو اصل ۾ پوليس خلاف هيو. ڊي جي رينجرز ميجر جنرل بلال اڪبر به وڏي وزير کي واقعي واري هنڌ جي دوري ۽ پنهنجي جاچ بابت آگاهه ڪيو. وڏي وزير ڊي جي رينجرز ۽ آءِ جي پوليس کي هدايت ڪئي ته پوليس اهلڪارن جي قتل ۾ ملوث حملو ڪندڙن جي گرفتاريءَ لاءِ پنهنجن سمورن دستياب وسيلن کي استعمال ۾ آڻن. هن چيو ته هو حملو ڪندڙن بابت اطلاع ڏيندڙن لاءِ 5 ملين رپين جي انعام جي منظوري ڏئي رهيو آهي. هن مارجي ويل هر هڪ اهلڪارن لاءِ ويهه ويهه لک رپيا ۽ سندن وارثن لاءِ کين قابليت مطابق ٻه ملازمتون ڏيڻ جو به اعلان ڪيو آهي. هن آءِ جي پوليس سنڌ کي هدايت ڪئي ته مارجي ويل پوليس اهلڪارن جون پگهارون سندن رٽائرمينٽ واري مدي تائين جاري رکيون وڃن ۽ انهن کي اڃا به پنهنجي سروس فورس جو حصو سمجهيو وڃي ۽ اهڙي ريت انهن جو پگهارون جاري رکيون وڃن ۽ ان ۾ سالياني واڌ به اهڙي ريت ڪئي وڃي جيئن ٻين ملازمن جي پگهار ۾ ڪئي ويندي آهي ۽ انهن کي اهي سموريون پگهارن وارا فائدا ڏنا وڃن جيڪي حڪومت اعلان ڪندي آهي. وڏي وزير آءِ جي پوليس کي هدايت ڪئي ته مارجي ويل پوليس اهلڪارن جي مڙهن کي انهن جي لاڳاپيل آبائي علائقن ڏانهن موڪلڻ لاءِ سمورا جوڳا انتظام ۽ سهولتون فراهم ڪيون وڃن. وڏي وزير چيو ته پوليس اهلڪار جن فرض ڏيندي پنهنجين جانين جو نذرانو پيش ڪيو انهن جي قربانين کي فراموش نه ڪيو ويندو.

 

سنڌ پوليس سدائين دهشتگردن سان مُهاڏو اٽڪايو آهي: مولابخش چانڊيو

ڪراچي(اسٽاف رپورٽر)  صوبائي وزير مولابخش چانڊيي چيو آهي ته سنڌ پوليس سدائين دهشتگردن سان مُهاڏو اٽڪايو آهي، جڏهن ته سدائين قربانيون به ڏنيون آهن، خابرو ادارن موجب مولابخش چانڊيي جو ڪراچي ۾ پوليو ورڪرن جي حفاظت ڪندڙ پوليس اهلڪارن تي حملي جي سخت لفظن ۾ مذمت ڪندي چوڻ هو ته واقعي ۾ ملوث دهشتگردن کي جلد گرفتار ڪيو ويندو، جڏهن ته دهشتگردن کي سخت مان سخت سزا ڏني ويندي، سندس چوڻ هو ته سنڌ پوليس دهشتگردن سان مُهاڏو اٽڪائيندي رهي آهي، جڏهن ته سدائين نشان تي به رهي آهي.

 

ڪراچي ۾ پوليس اهلڪارن جي شهادت تي افسوس آهي: عمران خان

اسلام آباد (بيورو) عمران خان چيو آهي ته پاناما ليڪس جي جاچ لاءِ هو رڳو چيف جسٽس جي سربراهي ۾ عدالتي ڪميشن قبول ڪنداسين. تحريڪ انصاف جي سربراهه عمران خان چيو آهي ته پاناما ليڪس جي جاچ لاءِ هو رڳو چيف جسٽس جي سربراهي ۾ عدالتي ڪميشن قبول ڪندا، پارلياماني ڪاميٽين اڳ ڇا ڪيو جو هاڻ ڪجهه ڪنديون.اسلام آباد ۾ ميڊيا سان ڳالهائيندي عمران خان چيو ته هن وقت ملڪ جو سڀ کان وڏو مسئلو ڪرپشن آهي.هن چيو ته قومي ايڪشن پلان تي مڪمل عمل ڪرڻو پوندو، ڪراچي ۾ 7 پوليس اهلڪارن جي شهادت تي کين ڏک پهتو آهي.عمران خان چيو ته هڪ سال ۾ دهشتگردي گهٽ ضرور ٿي آهي، پر هو جنگ اڃا نه کٽيا آهن.سندس چوڻ هو ته ملڪ ۾ امن لاءِ سمورن هٿياربند جٿن خلاف ڪارروائي ٿيڻ گهرجي.هڪ سوال جي جواب ۾ عمران خان چيو ته سنڌ ۽ پنجاب پوليس ۾ ميرٽ کي تباهه ڪيو ويو آهي.هن چيو ته پنجاب پوليس ۾ غلط ڀرتيون ٿيون آهن، ان ڪري صوبي جي پوليس جي حالت خراب آهي.عمران خان چيو ته پنجاب پوليس جو اهو حال آهي جو اها ڌاڙيلن جي هڪ ٽولي خلاف به اثرائتي ڪارروائي نه ڪري سگهي. –