تازيون خبرون

Daily Archives: April 21, 2016

سلمان خان منهنجو وڃايل اعتماد بحال ڪرڻ ۾ تمام گهڻي مدد ڪئي نه ته مان پراڻو قصو بڻجي وڃان هاۡ: جيڪو لين فرنينڊس

ممبئي (شوبز نيوز)  بالي ووڊ جي سريلنڪن ڄائي اداڪاره جيڪولين فرنينڊس چيو آهي ته اداڪار سلمان خان تحفا قبول ناهي ڪندو، ڪو وڌيڪ زور ڀري ته پنهنجي قائم ڪيل خيراتي اداري لاءِ چندي طور گهري وٺندو آهي. ذريعن مطابق جيڪولين سلمان جي عادتن بابت ڳالهائيندي چيو ته سلمان ڪنهن کان تحفا قبول ناهي ڪندو ۽ ڪو وڌيڪ زور ڀري ته کيس بيسنگ هيومن فائونڊيشن لاءِ ڪجهه ڏيڻ جو چوندو آهي. هن چيو ته سلمان انسان طور تمام گهڻو شاندار آهي،هن منهنجو وڃايل اعتماد بحال ڪرڻ ۾ منهنجي تمام گهڻي مدد ڪئي نه ته مان پراڻو قصو بڻجي وڃان ها،م جيڪولين چيو ته سلمان مون کي پاڻ تي اعتماد ڪرڻ سيکاريو ۽ هو مولاءِ اڳتي وڌڻ جي تحريڪ وانگر آهي.

 

ڪمرشل ۽ آرٽ فلمن جو حصو بڻجي ڌار سڃاڻ ٺاهڻ چاهيان ٿي:آمنا الياس

لاهور(شوبز نيوز)  پاڪستاني ماڊل ۽ اداڪارا آمنا الياس چيو آهي ته هوءَ ڪمرشل ۽ آرٽ فلمن جو حصو بڻجي پنهنجي ڌار سڃاڻ ٺاهڻ چاهي ٿي، هڪ انٽرويو ۾ آمنا الياس چيو ته هر دور جون پنهنجون ڪي ضررورتون هونديون آهن، پاڪستاني فلمن جي ماضي جو جيئن ئي ذڪر اچي ٿو ته اهڙن ڪيترن ئي اداڪارن جي ڳالهه ٿيڻ شروع ٿئي ٿي، جن پنهنجي جاندار ۽ حقيقت جي بلڪل ويجهو اداڪاري سان ماڻهن جي دلين تي راڄ ڪيو، سندس چوڻ هو ته جيڪڏهن فيشن جي ڳالهه ڪئي وڃي ته جڏهن مان فيشن جي دنيا ۾ قدم رکيو ته وڏا وڏا نالا ماڊلنگ تي راڄ ڪري رهيا هئا پر پنهنجي مختلف انداز سبب مونکي وڏي موٽ ملي، آمنا الياس چيو ته پاڪستان فلم انڊسٽري جو نئون دور شروع ٿي چڪو آهي.

 

پي سي ايل ۾ ڇهين ٽيم جو واڌارو ڪرڻ تي غور ڪري رهيا آهيون: نجم سيٺي

ڪراچي (اسپورٽس نيوز)پاڪستان سپر ليگ(پي ايس ايل)جي چيئرمين نجم سيٺي چيو آهي ته ليگ ۾ ڇهين ٽيم جو واڌارو ڪرڻ جو سوچي رهيا آهيون،جڏهن ته ليگ جي ٻئي سيزن جي شروعات فيبروري 2017ع ۾ دبئي ۽ شارجا ۾ ٿيندي.ميڊيا سان ڳالهائيندي نجم سيٺي جو چوڻ هو ته پاڪستان ڪرڪيٽ بورد اختياريون ۽ مان پاڻ دبئي ۽ شارجا ڪرڪيٽ اسٽيڊيم جي انتظاميا سان ملاقاتون ڪري  آخري شڪل ڏينداسين.پي سي بي ايگزيڪيٽو ڪميٽي جي سربراهه ۽ پي ايس ايل جي چيئرمين جو چوڻهو ته پي سي ايل جي ٻئي ايڊيشن ۾ ڇهين ٽيم جو واڌارو به ڪري سگهون ٿا،پر انهيءَ کي 5 ٽيمن جي فرنچائيز مالڪن ۽ رانديگرن کان راءِ پڻ ورتي ويندي.

 

مشتاق احمد کي قومي ٽيم جو عارضي هيڊ ڪوچ بڻائڻ جو فيصلو

لاهور (اسپورٽس نيوز) نيشنل ڪرڪيٽ اڪيڊمي جي ڪوچ مشتاق احمد کي قومي ٽيم جو عارضي طور هيڊ ڪوچ جي اضافي چارج ڏيڻ جو فيصلو ڪيو ويو آهي.ميڊيا رپورٽ مطابق وقار يونس جي استعيفيٰ کانپوءِ قومي ٽيم جي هيڊ ڪوچ جو عهدو خالي هيو ۽ انهي حوالي سان پي سي بي جا ملڪي ۽ پرڏيهي اڳوڻن ٽيسٽ توڙي ون ڊي رانديگرن سان ڳالهيون جاري آهن.ذريعن کان اهو به معلوم ٿيو آهي ته جيڪڏهن انگلينڊ جي دوري لاءِ ڪوچ نه مليو ته مشتاق احمد کي عارضي(وقتي)هيڊ ڪوچ مقرر ڪري کيس ٽيم سان گڏ انگلينڊ موڪيلو ويندو.

 

آرمي چيف جو بيان ڪنهن لاء “خطرو” آهي؟: شفيق شاڪر

آرمي چيف جنرل راحيل شريف چيو آهي ته  “ هر سطح تي احتساب لازمي آهي، ڪرپشن جي خاتمي تائين ملڪ ۾ امن امان جو قيام ممڪن ناهي، دهشتگردي خلاف جنگ ۾ قوم جي مڪمل حمايت حاصل آهي، هر سطح تي احتساب جو عمل لازمي آهي، ڇوته ڪرپشن جي خاتمي تائين امن امان جو قيام ۽ خوشحالي ممڪن ناهي ڪرپشن جي لعنت کي پاڙان پٽي ڦٽو ڪرڻ کانسوءِ ملڪ ۾ مستقل امن قائم نٿو ٿي سگهي، ان مقصد کي حاصل ڪرڻ لاءِ پاڪ فوج مڪمل سهڪار ڪندي،  بنا فرق جي سڀني جو احتساب پاڪستان جي يڪجهتي، سالميت ۽ خوشحالي لاءِ ضروري آهي، قوم جي تعاون سان اسان دهشتگردي ۽ ڪرپشن جو خاتمو ڪري دم پٽينداسين.”

اهو آهي پاڪستان جي فوجي سربراه جو اهو بيان جنهن تي ڪيترائي  “جمهوريت پسند” سياستدان ،دانشور ۽ صحافي چڙيل نظر اچن ٿا ۽ هنن جي نظر ۾ ان بيان سان هڪ ڀيرو وري “جمهوريت” خطري ۾ پئجي ويئي آهي.اهي پاڪستاني عوام کي سمجھائڻ جي ڪوششش ڪري رهيا آهن ته آئين مطابق فوجي قيادت کي ان قسم جا غيرجمهوري بيان ڏيڻ جو اختيار ڪونهي. ٻئي طرف وفاقي وزير “عمرانيات” پرويز رشيد جو اهو بيان به سامهون آيو آهي ته ڪرپشن جو خاتمو صرف جمهوري عمل جي جاري رهڻ سان ئي ڳنڍيل آهي ۽ ڪرپشن جي آڙ ۾ ڪنهن کي به سياست ڪرڻ جي اجازت نه ڏني ويندي..هن قوم کي اها خوشخبري به ٻڌائي ته ٽرانسپيرينسي انٽرنيشنل جي رپورٽ موجب ملڪ ۾ دهشتگردي ۽ ڪرپشن ۾ گهٽتائي آئي آهي.

ٽيون بيان “تازوبيماريء مان صحتياب ٿيل” وزيراعظم نواز شريف جوآهي جنهن چيو ته پاڪستانين جي اڪثريت ڌرڻا نه ٿي چاهي، پر بدقسمتي سان 1990ع واري ڏهاڪي جي ”مان نه مڃان“ واري سياست ٻيهر شروع ٿي وئي آهي . وزيراعظم چيو ته پاناماليڪس منهنجي ذات تي ڪوبه الزام ناهي مڙهيو، پر ان کانپوءِ به اسان چاهيون ٿا ته جاچ ڪميشن ضرور ٺهي، هن چيو ته ملڪ ۾ موجود ماڻهن کي اسان جون ڄنگهون نه ڇڪڻ گهرجن، ، ملڪ ۾ ڪجهه اهڙا سياستدان موجود آهن، جيڪي اڃا بالغ ناهن ٿيا. الله ڪري انهن کي به پاڪستان جي ترقي ايتري پياري ٿي وڃي، جيتري مون ۽ ٻين پاڪستانين کي آهي.

هن سڄي صورتحال ۾ پاڪستان جو عوام اهو سمجھڻ کان عاجز آهي ته آخر آرمي چيف جي بيان ۾ اهڙي ڪهڙي ڳالھ آهي جنهن سان جمهوريت کي خطرو لاحق ٿي ويو آهي! ۽ اها ڪهڙي سازش آهي جنهن جا چوٻول چوڌاريء ٻڌڻ ۾ پيا اچن.

پورو ملڪ ڪرپشن ۽ دهشتگرديء ۾ ورتل آهي اها ڳالھ جيڪر جنرل صاحب ڪري ٿو ته اها ساڳي ڳالھ پوري پاڪستاني قوم به ڪري رهي آهي.دهشتگردن کي ڪرپشن ذريعي ڪمايل پئسي مان مالي سهڪار ملي رهيو آهي،جيستائين انهن جي مالي سهڪار جي اها لائين نٿي ڪٽي وڃي،ملڪ مان دهشتگرديء جو مڪمل خاتمو نه ٿي سگھندو.اها ڪهڙي نه سمجھ ۾ ايندڙ حقيقت آهي،پورو عوام اها ئي ڳالھ بار بار ڪري رهيو آهي.بنان متڀيڌ ۽ فرق جي سڀني جو احتساب هئڻ گھرجي،انهيء تي چڙڻ يا انهيء کي جمهوريت جي لاء خطرو قرار ڏيڻ جي خبر ناهي ڪهڙي منطق آهي.سڀ سڄاڻ ڌريون ۽ عوام گذريل ڪيتري عرصي کان اهو مطالبو ڪري رهيا آهن ته احتساب منصفاڻو،شفاف ،اڻ ڌريو ۽ بنان ڪنهن فرق جي هئڻ گھرجي.جڏهن احتساب جي عمل لاء“ اڪراس دي بورڊ ”جو لفظ استعمال ڪيو وڃي ٿو ته ان جو مطلب اهو آهي ته زندگيء جي هر شعبي سان تعلق رکندڙ ڪرپٽ عناصر جو احتساب ٿيڻ گھرجي جن ۾ سياستدانن سان گڏ جنرل،صحافي،مذهبي جماعتون،اين جي اوز، جج،وڪيل،آفيسر، واپاري۽ ڪارخانيدار انهيء ۾ شامل آهن هاڻي.جڏهن به انهيء احتساب جي لاء ڪٿان ڪو آواز يا صلاح اچي ٿي ته ان وقت جمهوريت کي خطرو لاڳو ٿي وڃي ٿو. مسئلو رڳو اهو ناهي جو ڪرپشن جي خلاف ڪنهن موثر احتسابي عمل جي خلاف رڳو ڪرپٽ سياستدان ئي “جمهوريت جي خلاف سازش” جون رڙيون ڪن ٿا پر هتي ته پوري سياسي ڪرپٽ مافيا آهي جنهن ۾  ڪجھ وڪيل، صحافي،اينڪرز۽ اين جي او اڳواڻ وغيره به شامل آهن جن کي خوف آهي ته جيڪر ملڪ ۾ هڪ دفعو حقيقي احتساب جو ڪو نظام عمل ۾ اچي ويو ته پوء انهن سڀني جي پارسائيء جو ڀانڊو ڦاٽي پوندو ان ڪري اهي سڀ گڏجي ان احتسابي عمل خلاف مزاحمت ڪرڻ لڳن ٿا.انهيء مزاحمت جي لاء جيئن ته وٽن ٻيو ڪو جواز موجود ناهي ان ڪري جمهوريت جمهوريت ڪرڻ لڳن ٿا.جنهن آئين جون انهن کي اهي شقون هروقت ڍنڍوري پٽڻ لاء ياد رهن ٿيون جن ۾ فوج ڪنهن جمهوري حڪومت جي معاملن ۾ مداخلت نه ٿي ڪري سگھي اتي آئين جون اهي شقون انهن کي ياد ڇو نٿيون رهن جن ۾ عوام جي بنيادي حقن جو حڪومتن کي ئي تحفظ ڪرڻو آهي، شهرين جي عزت،جان ۽ مال جي حفاظت به وقت جي حڪومت جي ذميداري آهي .ماڻهن کي زندگيء جون بنيادي سهوليتون فراهم ڪرڻ به حڪومت جي اولين فرضن ۾ شامل آهي.جڏهن اپوزيشن ۽ اها نام نهاد سول سوسائٽي وقت جي ڪنهن سياسي حڪومت تي پنهن جي ڪارڪردگي بهتر بنائڻ لاء ڪو حقيقي دٻاء وجھڻ بدران پنهن جا ذاتي مفاد حاصل ڪرڻ لڳي وڃي، مڪ مڪائو جي بازار گرم هجي،حڪمرانن جي بدديانتيء،ڪرپشن ۽ ڦرلٽ تي سڀ چپ سبيو ويٺا هجن.سياسي بيانبازين کان سواء عملي ميدان ۾ ٻيو ڪجھ نظر نه ايندو هجي ته پوء عوام ڪنهن مان اميدون رکي، ڪنهن ڏانهن انصاف ۽ تحفظ لاء نهاري ؟

پاناما ليڪس واري معاملي تي آخر حڪومت کي ايڏي گوٿناٿ ڪرڻ جي ڪهڙي ضرورت هئي؟ پهرئين ڏينهن ئي سپريم ڪورٽ جي معزز چيف جسٽس جي سربراهيء ۾ هڪ تحقيقاتي ڪميشن قائم ڪري وٺي ها ته معاملو ان حد تائين نه پهچي ها..حڪمرانن وٽ عقل ۽ حقيقت شناسي هجي ها ته جنرل راحيل شريف جون روڊن تي لڳل وڏيون تصويرون ۽ سوشل ميڊيا تي سندس تعريف ڏسي ۽ پڙهي هيستائين سڀ ڪجھ سمجھي وڃن ها ته عوام آخر سياسي حڪومت کان ايترو مايوس ڇو ٿيو آهي. ڪجھ پنهن جي افعالن ۽ پرڪارن جو جائزو وٺڻ گھربو هو ته سڄي ملڪ کي انهن جنهن جنگ جي ميدان ۽ قتل عام جي بازار ۾ تبديل ڪري ڇڏيو هو انهيء جي ذميداريء کان آخر اهي سول حڪومتون پاڻ کي ڪيئن ٿيون آجو ڪري سگھن.هر سياسي پارٽي ء جي هڪ دهشتگرد ونگ،ڏوهارين جا حڪمرانن سان لاڳاپا،گھر گھر ۾ لاش،رستن تي نڪرڻ موت کي دعوت ڏيڻ،اهي سڀ شيون اڃا ڪلھ جي ڳالھ آهي.سپريم ڪورٽ هڻي هڻي بيهي رهي،عوام مطالبا ڪندي ڪندي ٿڪجي پيو،بين الاقوامي برادري رڙيون ڪندي ڪندي لاچار ٿي ويئي پر سياسي حڪمرانن جي ڪن تي جونء به نه سري.آخر اهو ڪم جيڪو سول حڪومتن کي ڪرڻو هو سوبه فوج کي ڪرڻو پيو.اڄ جڏهن دهشتگردي،ڀتاخوري،ٽارگيٽ ڪلنگ يا ٻين ڏوهن ۾ واضح ڪمي آئي آهي ته ان جو ڪريڊٽ به فوج ڏانهن ئي وڃي ٿو ۽ هاڻي جڏهن فوجي سربراه دهشتگرديء جي مستقل خاتمي جي راه ۾ هڪ حقيقي رڪاوٽ يعني دهشتگردن جي مالي سپورٽ جيڪا اڃا تائين جاري آهي ان جي خاتمي جي لاء ڪرپشن ۽ معاشي دهشتگردن خلاف ڀرپور ڪاروائيء طرف قوم ۽ وقت جي حڪمرانن جو ڌيان ڇڪائي رهيو آهي ته هر طرف کان “جمهوريت بچايو” جو صدائون بلند ٿي وڃن ٿيون.

جمهوريت کي غيرسياسي قوتن يا ادارن کان ڪوبه خطرو ناهي بلڪه جمهوريت کي اڄ به انهن سياستدانن کان ئي خطرو آهي جيڪي عوام کي صرف جمهوريت جا لالي پوپ ڏيکارڻ جي پاليسيء تي قائم رهندي، حقيقي جمهوريت قائم ڪرڻ جي لاء اڄ به بلڪل تيار ناهن.ٻيو ڪجھ ته اهي نام نهاد جمهوري حڪمران عوام کي نه ڏيئي سگھيا پر قانون نافذ ڪندڙ جوانن جي هيترين قربانين کان پوء ملڪ ۾ جيڪو امن بحال ٿيو آهي اهي ان امن کي هڪ ڀيرو وري پنهن جن سياسي ۽ معاشي مفادن جي لاء داء تي لڳائڻ لاء آتا نظر اچن ٿا.انهن کي سمجھڻ گھرجي ته امن تباه ڪندڙ ڪنهن به سازش جو هاڻي عوام حصو نه بڻبو.هي آخر ڪهڙي بيمار جمهوريت آهي جيڪا اڃا تائين آئي سي يو ۾ داخل آهي ۽ هروقت اوهان کي اهو خوف آهي ته ڪو ان جي آڪسيجن بند ڪري کيس مرحوم بنائي ڇڏي.

فوج جي ماضيء جي ڪردار جي ڳالھ ڪندا ته پوء ماضي ته سياستدانن جو به ڪو قابل مثال نه رهيو آهي.ڪير بوٽ وارن کي ماضيء ۾ سڏيندو رهيو ۽ ڪير انهن جي وزارتن ۾شامل ٿيندو رهيو،ڪير ٻين سياستدانن جي خلاف انتقامي ڪاروائيون ڪندو رهيو،ڪير ورديء وارن کي ورديء ۾ ست دفعا چونڊڻ تي فخريا انداز ۾ اعلان ڪندو رهيو.جنرل ايوب کان ويندي مشرف تائين ڪير ڪير انهن جا تخت سجائيندا ۽ درٻارون صاف ڪندا رهيا.اهي سڀ قصا تاريخ ۾ محفوظ آهن.بوٽن وارن کي قبضو ڪرڻو هوندو آهي ته پوء اهي سٺيون ۽ سچيون صلاحون نه ڏيندا آهن ۽ نه ئي انهن جي اچڻ کي اوهان جي هيء لولي لنگڙي مڪاراڻي جمهوريت ئي روڪي سگھي ٿي.عوام کي جمهوريت جي خوبصورت ديويء جي مورت پنهن جي من ۾ سجائي ان جي پوڄا ناهي ڪرڻي،عوام کي سٺي حڪمراني کپي،سندن بنيادي مسئلن جو حل کپي،امن امان کپي جيڪي شيون انهن کي صرف ان ڪري نه ملي سگھيون آهن جو جن کي چونڊي انهن ايوانن تائين پهچايو اهي صرف پئسو ڪمائڻ ۾ لڳي ويا ۽ جمهوريت توڙي عوام انهن کي صرف تڏهن ياد اچي ٿو جڏهن اهي پنهن جن ئي ڪارن ڪرتوتن سبب ڪنهن ڪن ۾ ڦاسن ٿا يا وري کين اليڪشن ۾ عوام جي ووٽ جي ضرورت پوي ٿي.

فوجي سربراه جو تازو بيان ان اشرافيا جي ڀلي پسند وٽان نه هجي پر حقيقيت اها آهي ته عوام سمجھي ٿو ته جنرل راحيل شريف عوام جي دلي جذبن ۽ خواهشن جي ترجماني ڪئي آهي.باقي ڪنهن حڪومت جو وڃڻ يا ڪنهن حڪمران جو احتساب ٿيڻ دنيا جي جمهوريتن ۾ عام روٽين آهي پر پاڪستان ۾ جمهوريت کي خطري جو راڳ ان وقت آلاپيو ويندو آهي جڏهن حڪمرانن کي سندن نااهليون ٻڌايون وينديون آهن. اسان جي ملڪ جا نام نهاد جمهوري حڪمران پنهن جي پاڇي کان خوف کائي رهيا آهن .آرمي چيف جو هاڻوڪو بيان جمهوريت کي ختم ڪرڻ لاء نه پر جمهوريت کي اڳتي وڌائڻ لاء به ته سمجھي سگھججي ٿو.جيڪر اڄ به اسان جا سياسي حڪمران ڪنهن سنجيدگيء جو مظاهرو ڪن ته ملڪ ۾ مارشل لا جو ڪو امڪان نظر نٿو اچي.

******

 

 

تعليم جي تباهي ۾ گوسڙو ماسترن جو ڪردار : هريش ڪمار مالهي  

اها به هڪ حقيقت آهي ته سنڌ ڪجهه مخصوص قوتن جي  قبضي ۾ رهي آهي سنڌ جو جاگيردار جنهن ڪڏهن به سنڌ جي عام ماڻهو لاءِ ڪم نه ڪيو ۽ هڪ منظم طريقي سان عام ماڻهو کي تعليم جي زيور کان پري رکيو ۽ پنهنجي ڪمداري کان اڳتي وڌڻ جوموقعو ئي نه ڏنو انهيءِ ڪم ۾  بالا آفيسر ۽ اسان جا  گوسڙوماستر به برابر جا شريڪ رهيا آهن اهو جاگيردار طبقو ئي شروع کان وٺي اقتدار تي قابض رهيو آهي جنهن سدائين عوامي ڀلائي بدران پنهنجا ذاتي مفاد حاصل ڪيا آهن پنهنجن کي ئي نوازيو آهي انهيءِ جاگيردار طبقي سنڌ ۾ ڌارين جي وڌ ۾ وڌ آبادڪاري ۾ ڪردارادا ڪري سنڌين کان لساني ۽ اقليت ۾ تبديل ڪرڻ  ۾ ڪا ڪمي  نه ڇڏي. اهو ئي سبب آهي جو اڄ سنڌ ۾ ايتري ته ڌاري آبادڪاري وڌي وئي آهي جو ڌرتي ڌڻي مانيءِ ڳڀي لاءِ به در در جا ڌڪا کائن ٿا گذريل ٻوڏن ۽ ڏڪار ۾ اها صورتحال اوهان سڀنيءِ ڏٺي جنهن دوران هزارين خاندان دربدر ٿيا پر کين ڪٿي به اجهو  ميسر ٿي  نه سگهيو ۽ اهي دربدري واري حالت ۾ ئي ڪيترا ڏينهن ذندگي گذاريندا رهيا ، جمهوريت جو دستور آهي ته سڀني ماڻهن کي برابري جي بنياد تي حق ڏنا وڃن پر اسان وٽ جمهوريت هوندي به صورتحال اها آهي جو هتي زميني حقيقتون جمهوري اصولن ۽ جمهوري قدرن جي ابتر آهن نه چاهندي به لکڻو ٿو پوي ته اسان وٽ جمهوريت ڪڏهن به اهو ناهي چاهيو ته سڀ انسان حقيقت ۾ برابر هجن ۽ بنا ڪنهن شڪ جي  سڀني کي هڪ جهڙي تعليم ۽ زندگيءِ جون سڀ سهولتون هڪ جهڙيون ملن ، اسان جي ملڪ ۾ عام ماڻهو کي ووٽ ڏيڻ جو بنيادي حق حاصل آهي بکئي ماڻهو لاءِ ووٽ جو حق ڪهڙي ڪم جو اصل اقتدار نه انهن وٽ رهيو آهي جيڪي انهن جي غربت مان فائدو وٺي رهيا آهن ۽ غريبن کي خوشحالي جا خواب ڏيکاري انهن جي ووٽ سان پنهنجا پيٽ ڀريندا رهيا آهن، پارليامينٽ ۾ ويٺل غريب عوام جي ووٽن تي چونڊجي آيل هجي يا ڌانڌلي ڪري آيل هجي پر ڪردار سڀني جو هڪ جهڙو ئي رهيو آهي جڏهن ته هو پنهنجا ئي قانون ٺاهي ٿو فقط پنهنجي ئي سهولتن جي لاءِ عوامي ڀلائي لاءِ ڪنهن به قسم جو ڪم ڪرڻ لاءِ تيار ناهي هوندو جيڪڏهن اها ئي صورتحال آهي ته هن سماج ۾ ڪا به برابري قائم ٿي نه سگهندي ، ڪجهه ڏينهن اڳ مون هڪ ڪالم لکيو هو جنهن ۾ سامارو  روڊ   جا  مسئلا  حڪمرانن ۽  عام ماڻهن جي سامهون آندا هئا پر هن ڪالم کي پڙهي ڪجهه دوستن مونکي حوصلو ڏنو پر ڪجهه اهڙا به ماڻهو ۽ گوسڙو ماستر هئا جن  منهنجي ڳالهه کي سمجهڻ بدران هن ڪالم جو غلط رخ  ورتو ۽  هن ڪالم ۾ لکيل ڪجهه مسئلا پنهنجي زندگي جو حصو سمجهي ان ڪالم تي ڪاوڙ جو اظهار ڪيو جيڪا اها ڳالهه منهجي سمجهه ۾ نه آئي ته مون ڪالم  ۾ ڪم چور ۽ گوسڙو ماسترن کي سمجهائڻ لاءِ لکيو هو پر انهن هن ڳالهه کي اشو بڻائي ڇڏيو.

ٿيڻ ته ائين کپندو هويو ته منهنجو ڪالم پڙهي گوسڙو ماسترن کي ٻارڙن تي توجه ۽ ڪجهه محنت ڪن ها ، ٻارڙن جي مستقبل کي تباهه ڪرڻ کان توبه ڪري معافي گهرن ها  پر ٿيو ان جي بلڪل ابتڙ جئين هميشه کان ٿيندو رهيو آ ” چون ٿا ته چور جي مٿي ۾ چڙي  “  سو سچ ثابت ٿيو  ۽ جيڪي ماستر ڪم چور آهن ۽ سڄو ڏينهن ٽنگ جي  مٿي ٽنگ رکي سگريٽ جا شوٽا هڻن ٿا ۽ ٻارڙن کي پڙهائڻ جي لاءِ ٺٺيو (َآنگوٺو) تن منهجي ڪالم تي رد عمل ظاهر شروع ڪيو ۽ ٻه ٽي گوسڙو ماسترن جا نالا کڻي چوڻ لڳا ته اگر اهي گوسڙو ماستر اهو ڪالم پڙهي وٺن ها ته ڪم خراب ٿي وڃي آ. مونکي خوشي آهي ته انهيءِ ڪالم  تي ردعمل ڪم چور ۽ گوسڙو ماسترن ڪيو ، آئون انهن ماسترن ۽ بالا آفيسرن کان گذارش ڪرڻ  ڇاهيندس ته منهنجي گذريل ڪالم ۾ ڪا غلط ڳالهه لکيل هئي جو مونکي اهيءِ گوسڙو ماستر وڏيون معيارو ڏيڻ لڳا ته هي ڇوڪرو اسان جي اسڪول ۾ پڙهي ويو آهي ۽ اسان جي خلاف پيو لکي ، آئون انهن ماسترن سان گذارش ڪرڻ چاهيان ٿو ته توهان جيڪا ٻه ٽي ماسترن جا نالا کڻي مونکا مخاطب ٿيا  انهن  ڪڏهن مون سميت  ڪنهن  ٻار کي  الف ۽ ب  پڙهايو؟  مونکي حيرت ان ڳالهه جي آهي ته انهن ماسترن سان گڏ ڪلارڪ ، هيڊ کان وٺي  بالا آفيسر پڻ شامل آهن جيڪي خود ان ڳالهه ته هوندا آهن ته جيڪو به اسان  جي خلاف ڳالهائيندو تن کي ماٺ ڪرايو ويندو ، اهيءِ ڪم چور گوسڙو ماستر ڪلارڪن کي رشوت ڏيندا آهن، ڪلارڪ هيڊ کي رشوت ڏيندا آهن ، هيڊ وري بالا آفيسر کي مال کارائي ٿو ۽ بالا آفيسر وري اعلي آفيسر کي ته جئين انهن سڀني جي خلاف ڪا به ڪنهن به قسم جي ڪو ڪاروائي نه ٿي سگهي.آخر ڪيستائين اهڙن عنصرن کي برداهشت ڪنداسين  ۽ آخر اهي ڪيستائين تعليم جو ٻيڙو ٻوڙي غريب ماڻهن جي ٻارڙن جو مستقبل روليندا ، آخر ڪيستائين اهي در در تي  ڌڪا ٿاٻا کائيندا ، ڇا ڪنهن آفيسر ۾ احساس نالي جي ڪا شئي آهي جيڪي انهن تي رحم ڪن ، ڇا اهي سورن صدمن جي لاءِ پيدا ٿيا آهن ؟ ڇا تعليم انهن جو حق نا آهي ؟  ڇا ماسترن جي ذميواري نه آهي ته اهيءِ پنهنجي  پگهارن کي حلال ڪن ؟ ڇا اهو اعلي انتظاميا جي زميواري نه آهي ته اهي ڪم چور ۽ گوسڙو ماسترن تي قدم کڻي انهن کي ڊيوٽي جو پابند  بڻائن ؟

 

 

ڪراچي وري دهشتگردن جي نشاني تي

ڪراچي جي پاڪستان بازار ٿاڻي جي حد اورنگي ٽائون جي علائقي بنگلا بازار ۽ ڊسڪو موڙ ڀرسان چئن موٽر سائيڪلن تي سوار اڻڄاتل  8 هٿيار بندن پوليو ٽيمن جي سيڪيورٽي لاءِ مقرر پوليس تي ٻن ڌار ڌار  حملن جي نتيجي 7 اهلڪار شهيد ٿي ويا، واقعي بعد علائقي ۾ خوف حراس ڇائجي ويو، اطلاع ملندي پوليس ۽ رينجرز جي وڏي نفري پهچي علائقي جو گهيراءُ ڪري ڏنو، شهيد ٿي ويل پوليس اهلڪارن جا لاش  ضروري ڪارروائي لاءِ عباسي شهيد اسپتال پهچايا ويا.  جتي سندن سڃاڻپ وزير احمد، غلام رسول، دائم الدين، غلام حسين ، رستم ۽ محمد اسماعيل طور ٿي.شهيد اهلڪارن ۾ ٻن جو تعلق گهوٽڪي ۽ هڪ جو تعلق شهدادڪوٽ سان ٻڌايو پيو وڃي. پوليس اهلڪارن تي حملي کان پوءِ اورنگي ٽائون ۾ پوليو جي مهم کي فوري طور تي روڪيو ويو. سنڌ جي وڏي وزير سيد قائم علي شاهه واقعي جو نوٽيس وٺندي آءِ جي سنڌ اي ڊي خواجا کان رپورٽ طلب ڪري ورتي.

وڏي وزير جو چوڻ هو ته بزدل دهشتگرد قوم کي معذور بڻائڻ چاهين ٿا پر سندن خواهش پوري ٿيڻ نه ڏني ويندي. سهيل انور سيال جو چوڻ هو ته واقعو سڪيورٽي ليپس نه هو، پوليس اهلڪارن پنهنجون جانيون ڏئي پوليو رضاڪارن کي بچايو آهي. حملو اوچتو ٿيو، پوليس اهلڪارن کي پاڻ سنڀالڻ جو موقعو به نه مليو. ڊي آءِ جي ويسٽ فيروز شاهه  موجب ته چئن موٽرسائيڪلز تي سوار 8 هٿياربندن پهرين موبائيل ۾ سوار چئن اهلڪارن تي فائرنگ ڪئي ۽ بعد ۾ ٽن پيادل اهلڪارن کي به نشانو بڻايو، ٻنهي حملن ۾ نائين ايم ايم پسٽل استعمال ڪيا ويا، شهيد اهلڪارن مان ٽن جو تعلق گهوٽڪي ۽ ٽن جو شهدادپور سان آهي، دهشتگردن جي حملي ۾ شهيد ٿي ويل پوليس اهلڪارن ۾ وزير علي چاچڙ، دائم چاچڙ ۽ غلام رسول ميمڻ جو تعلق گهوٽڪي سان  آهي،  محمد اسماعيل جو تعلق ڪراچي سان ۽ غازي خان جو تعلق شهدادپور سان ٻڌايو وڃي پيو. فرانزڪ ٽيمن واقعي واري هنڌ جو دورو ڪيو ۽ رينجرز ڳولاڪندڙ ڪتن جي مدد سان واقعي جو جائزو ورتو.  پوليس ۽ رينجرز اورنگي ۾ پوليو ٽيمن تي حملي جي گڏيل جاچ ڪرڻ جو فيصلو ڪيو ويو آهي

 

ڪراچي: پوليو ٽيم تي حملو، دهشتگردن 7 خاندان اجاڙي ڇڏيا

ڪراچي(اي پي پي)  اورنگي ٽائون جي علائقي بنگله بازار ۾  پوليو رضاڪارن جي حفاظت لاءِ مقرر پوليس اهلڪارن تي فائرنگ ۾ 7 اهلڪار شهيد ٿي ويا. تفصيل مطابق اربع تي اورنگي ٽائون پاڪستان بازار ٿاڻي جي حد بنگله بازار ۾ پوليو رضاڪارن جي حفاظت تي مقرر اهلڪارن تي اڻ ڄاتل ماڻهن فائرنگ ڪئي جنهن جي نتيجي ۾ 7 پوليس اهلڪار شهيد ٿي ويا. لاشن کي عباسي شهيد اسپتال منتقل ڪيو ويو آهي. ايس ايچ او پاڪستان بازار ٿاڻي  سب انسپيڪٽر سرفراز مطابق فائرنگ جا 2 واقعا پيش آيا، پهرين واقعي ۾ اورنگي ٽائون ۾ پوليو مهم دوران پوليو جي ٽيم جي حفاظت تي مقرر پوليس موبائل تي اڻ ڄاتل هٿياربندن فائرنگ ڪري 4 پوليس اهلڪارن کي شهيد ڪري ڇڏيو جڏهن ته ٻئي واقعي ۾ بنگله بازار ۾ پيادل اهلڪارن تي اڻڄاتل هٿياربند ماڻهن فائرنگ ڪري 3 اهلڪارن کي شهيد ڪري ڇڏيو. واقعي بعد شهيد اهلڪارن جي لاشن کي عباسي شهيد اسپتال منتقل ڪيو ويو آهي جڏهن ته پوليس موقعي تي پهچي جاچ شروع ڪري ڇڏي آهي.ٻئي طرف سنڌ جي انسپيڪٽر جنرل پوليس اي ڊي خواجه ڪراچي جي علائقي اورنگي ٽائون ۾ اربع ڏينهن دهشتگردن جي فائرنگ ۾ شهيد ٿيل 7 پوليس اهلڪارن جي وارثن لاءِ 20 – 20 لک معاوضي ۽ سندن ڪٽنب جي 2 – 2 ڀاتين کي روزگار ڏيڻ جو اعلان ڪيو آهي. آءِ جي سنڌ دهشتگردن بابت معلومات ڏيندڙ کي 50 لک رپيا انعام ڏيڻ جو پڻ اعلان ڪيو. آءِ جي سنڌ اهڙو اعلان گذريل ڏينهن واردات واري هنڌ جي دوري دوران ميڊيا سان ڳالهائيندي ڪيو. دهشتگردن جي فائرنگ ۾ شهادت ماڻيندڙ اهلڪارن ۾ رستم، اسماعيل، وزير احمد، غلام رسول، دائم الدين، غازي خان ۽ ياسين شامل آهن. سمورا پوليس اهلڪار پوليو مهم ۾ مصروف ٽيمن جي حفاظت لاءِ مقرر ٿيل هئا. پوليس ذريعن مطابق 3 پوليس اهلڪار موٽرسائيڪل سوار هٿياربندن جي فائرنگ ۾ بنگله بازار جي علائقي ۾ شهيدٿي ويا جڏهن ته 4 پوليس اهلڪارن کي هڪ دڪان جي ٻاهران فائرنگ ڪري شهيد ڪيو ويو. هٿياربند واردات بعد فرار ٿي ويا. رينجرز سنڌ جي ڊائريڪٽر جنرل ميجر جنرل بلال اڪبر واقعي واري هنڌ پهچي ويو ۽ عوام کي اپيل ڪئي ته واقعي ۾ ملوث جوابدارن بابت ڪو به اطلاع هجي ته رينجرز ۽ پوليس کي ڏنو وڃي. هن چيو ته رينجرز ۽ پوليس واقعي جي گڏيل طور تي جاچ ڪندا.

 

ڪراچي ۾ پوليس اهلڪارن تي حملن جي مذمت، بزدلاڻيون ڪارروايون قوم جي عزم کي ڪمزور نه ٿيون ڪري سگهن: صدر/وزير اعظم

اسلام آباد (بيورو)  صدر ممنون حسين ۽ وزيراعظم نواز شريف اربع ڏينهن ڪراچي ۾ پوليس اهلڪارن تي حملن جي سخت مذمت ڪئي آهي جن ۾ قيمتي جانين جو زيان ٿيو آهي. صدر پوليس فورس جي بهادري کي ساراهيندي چيو ته اهڙي قسم جون بزدلاڻيون ڪارروايون دهشتگردن ۽ ڏوهاري عنصرن جي خاتمي جي لاءِ قوم جي عزم کي ڪمزور نه ٿيون ڪري سگهن. هن چيو ته ڪراچي ۾ امن جي مڪمل بحالي تائين اهڙي قسم جي عنصرن جي خلاف سخت قدم کنيو ويندو. هن شهيد ٿيندڙ پوليس اهلڪارن جي گهرڀاتين سان تعزيت ڪندي چيو ته دهشتگردي جي خلاف سندن قربانيون رائيگان نه وينديون. پاڪستان جي هر شهري جي جان ۽ مال جو هر قيمت تي تحفظ ڪيو ويندو. صدر شهيد ٿيندڙن جي درجن جي بلندي جي لاءِ دعا پڻ ڪئي.

 

مسٽر شاهه جي هوندي سنڌ جون حالتون بهتر نه ٿينديون: سپريم ڪورٽ

اسلام آباد(اي پي پي)سپريم ڪورٽ جي جج جسٽس امير هاني مسلم لينڊ ڪمپيوٽرائيزيشن بابت ڪيس جي ٻڌڻي دوران ريمارڪس ڏنا آهن ته جيستائين مسٽر شاهه رهندو، سنڌ جون حالتون بهتر نه ٿينديون، سپريم ڪورٽ ۾ لينڊ ڪمپيوٽرائيزيشن بابت ڪيس جي ٻڌڻي ٿي، جنهن دوران عدالت پنجاب، بلوچستان ۽ خيبرپختونخوا جي لينڊ ڪمپيوٽرائيزيشن تي اطمينان ڏيکاريو، جڏهن ته سنڌ ۾ زمينن جا معاملا ڪمپيوٽرائزڊ نه ٿيڻ تي سخت ڪاوڙ جو اظهار ڪيو، ان موقعي تي چيف جسٽس ريمارڪس ڏنا ته سنڌ ۾ عدالتي حڪمن کي انتظامي معاملن ۾ منجهايو وڃي ٿو، جسٽس امير هاني مسلم ريمارڪس ڏيندي چيو ته جيڪڏهن نيت هجي ها ته سنڌ ۾ به زمينن جو رڪارڊ ڪمپيوٽرائيزڊ ڪيو ويو هجي ها، 5 سالن ۾ هڪ ضلعي جو رڪارڊ به ڪمپيوٽرائيزڊ ناهي ٿيو ۽ ان عرصي دوران هڪ شڪايت تي به انڪوائري يا انسپيڪشن ناهي ڪئي وئي، هن وڏي وزير سيد قائم علي شاهه ڏانهن اشارو ڪندي چيو ته جيستائين مسٽر شاهه رهندو، تيستائين سنڌ جون حالتون صحيح نه ٿينديون، سپريم ڪورٽ سنڌ روينيو ڊپارٽمينٽ کان لينڊ ڪمپيوٽرائيزيشن بابت اڳڀرائي جي رپورٽ ٻن مهينن اندر گهرائيندي ڪيس جي ايندڙ ٻڌڻي ڪراچي ۾ ڪرڻ جو فيصلو ڪيو آهي.