تازيون خبرون

Daily Archives: April 20, 2016

پنهنجن پرستارن کي ڏسي پنهنجي قدر ۽ قيمت جو اندازو ٿي وڃي ٿو: شرڌا ڪپور

ممبئي (شوبز نيوز) بالي ووڊ اداڪاره شرڌا ڪپور جو چوڻ آهي ته پنهنجن پرستارن کي ڏسي مون کي پنهنجي قدر ۽ قيمت جو اندازو ٿي وڃي ٿو ڀارتي ميڊيا موجب شرڌا ڪپور جو پنهنجي هڪ انٽرويو ۾ چوڻ هو ته اوهان هن فلم انڊسٽري ۾ جتي بيٺا آهيو ان کان سڀ کان بهتر اندازو ٺيٽر ۾ ماڻهن جي تاثر سان ٿئي ٿو مان جڏهن به ماڻهن سان ملندي اهيان ته ان شئي تي گهڻو غور ڪندي آهيان سندس چوڻ هو ته جڏهن مان سفر ڪندي آهيان ته ماڻهو مون وٽ ايندا آهن ۽ جڏهن گهر کان ٻاهر نڪرندي آهيان ته ماڻهو منهنجو انتظار ڪندا آهن پنهنجن پرستان کي ڏسي مون کي پنهنجي قدر ۽ قيمت جو اندازو ٿي وڃي ٿو.

 

بالي ووڊ جي خوبصورت اداڪاره ديويا دتا پنهنجي نئين فلم ارادا ۾ منفرد انداز ۾ نظر ايندي

ممبئي (شوبز نيوز) بالي ووڊ جي خوبصورت اداڪاره ديويا دتا پنهنجي نئين فلم ارادا ۾ منفرد انداز ۾ نظر ايندي جنهن ۾ مشهور اداڪار نصيرالدين شاهه ۽ ارشد وارثي به خاص ڪردار ادا ڪري رهيا آهن اداڪاره ديويا دتا فلم م هڪ انڊين سياستدان رمن ديپ جو ڪردار ادا ڪري رهي آهي جيڪو پاڪستان جي اڳوڻي پرڏيهي وزير حنا رباني کر کان متاٿر ٿئي ٿي ان حُاليس ان هڪ انٽرويو ۾ ديويا دتا چيو ته فلم ۾ ان جو هي انداز ڄاڻي واڻي ناهي اختيار ڪيو پر ان جو لباس ۽ گيٽ اپ جي حنا رباني کر سان ايتري هڪجهڙائي آهي جو سڀني گهڻو پسند ڪيو هن ٻڌايو ته جڏهن هو ان گيٽ اپ ۾ سيٽ تي پهتي ته سڀ حيران هئا سڀني فيصلو ڪيو ته مان ان هڪجهڙائي کي برقرار رکان ڇو ته شوقينن پاران ان جو بهتر ريسپانس اچڻ جي اميد آهي.

 

ويسٽ انڊيز ڪرڪيٽ ٽيم جو دونهيدار بيٽنگ ڪرس گيل پيءُ بڻجي ويو

جميڪا)اسپورٽس نيوز) ويسٽ انڊيز ڪرڪيٽ ٽيم جو دونهيدار بيٽنگ ڪرس گيل پيءُ بڻجي ويو. ڪرس گيل ڀارت ۾ جاري آءِ پي ايل جي نائين ايڊيشن ۾ رائل چئلينجرز بينگلور ٽيم جي نمائندگي ڪري رهيو آهي. ان حوالي سان سندس ساٿي رانديگر سرفراز خان ان ڳالهه جي تصديق ڪندي چيو ته ڪرس گيل جي گهرواري نتاشا بيرج پنهنجي پهرين پٽ کي جنم ڏنو آهي، جنهن سبب گيل پنهنجي گهرڀاتين سان وقت گذارڻ لاءِ ويسٽ انڊيز روانو ٿي ويو آهي ۽ هو آءِ پي ايل جون ايندڙ 2 ميچون نه کيڏي سگهندو.

پاڪستان ڪپ کيڏندڙ نوجوانن کي گهڻو ڪجهه سکڻ جو موقعو ملندو: محمد عرفان

لاهور (سپورٽس نيوز) ملڪي ڪرڪيٽ ٽيم جي قدآور فاسٽ بالر محمد عرفان چيو آهي ته پاڪستان ڪپ ۾ شرڪت ڪندڙ نوجوانن کي سينيئر رانديگرن مان سکڻ جو موقعو ملندو. صحافين سان ڳالهائيندي محمد عرفان جو چوڻ هو ته اسلام آباد جي ٽيم جو ڪامبينيشن سٺو آهي. ٽيم ۾ موجود اڌ کان وڌيڪ رانديگر پي ايس ايل ۾ اسلام آباد طرفان کيڏي چڪا آهن.

 

آف شور ڪمپنين ۾ جڪڙيل پاڪستانين لاءِ نجات جو دڳ ڪهڙو آهي!؟: نسيم بخاري

پاناما ليڪس ۾ پت وائکي ٿيڻ کانپوءِ هونئن ته نشاني تي آيل اڍائي سؤ (250) پاڪستانين ۾ ڦڙڦوٽ پئجي وئي آهي، پر ان معاملي جو سڀ کان گهڻو اثر (ن) ليگ تي ٿيو آهي، جيڪا ردعمل ۾ به تمام پويان رڪارڊ ٽوڙي وئي آهي. حڪومت پاران انڪوائري ڪميشن جي حوالن کانپوءِ جنهن شخص جي اڳواڻي ۾ ان جي جوڙڻ جا بيان اچي ويا آهن، ان رٽائرڊ جسٽس سرمد جلال عثماني تي مخالف ڌر کي سخت اعتراض آهن، جنهن جو چوڻ آهي ته سرمد عثماني جي گهرواري جا (ن) ليگ سان ويجهڙائيءَ وارا واسطا آهن، ان ڪري ان جو مڙس اڻ ڌريو رهي نه سگهندو. سرڪار انڪوائري ڪميشن واري معاملي تي لچڪ ڏيکارڻ لاءِ تاثر ته ڏئي رهي آهي، پر ان ڏس ۾ جنهن اطمينان جوڳي تحرڪ جي ضرورت آهي سو ڏسڻ ۾ نه ٿو اچي. مخالف ڌر جو مطالبو آهي ته حزب اختلاف مان انڪوائري ڪميشن جو سربراهه مقرر ڪيو وڃي. اهو مطالبو به درست نه ٿو لڳي، ڇو ته جيڪڏهن مخالف ڌر جو ماڻهو انڪوائري ڪميشن جو اڳواڻ هوندو ته ظاهر آهي ان جي ايجنڊا به حزب اختلاف واري هوندي. هونئن اسان وٽ هاڻ مخالف ڌر رڳو فارملٽي جي حد تائين مخالف ڌر هوندي آهي، باقي حال مڙئي ان جا به پورا هوندا آهن جو حڪمران پارٽي سان ساز باز ڪري مڙئي وقت کي پئي ڌڪو ڏيندي آهي. ان ڪري حزب اختلاف مان ڪنهن ٻوٽي ٻارڻ جي حوالي سان وڏي جدوجهد يا احتجاج جي اميد نه ٿي ڪري سگهجي.

تحريڪ انصاف ان حوالي سان ڏهن ئي آڱرين جا زور لڳائيندي ته شريف خاندان جو گهيرو تنگ ڪجي ۽ ان کي گهر ڀيڙو ڪيو وڃي. تحريڪ انصاف ان حوالي سان اڳ به ڌرڻا هڻي چڪي آهي، پر اها پنهنجي مقصد ۾ ڪامياب نه ٿي آهي. هاڻ به پراڻي خواب جي ساڀيان لاءِ هو نتِ نين حڪمت عملين سان اڳيان اچي رهي آهي، ڏسڻو اهو آهي ته وقت ۽ حالتون کيس ڪهڙي موٽ ڏين ٿا.

ميان نواز شريف به چيڪ اپ کانپوءِ صحتياب ٿي وطن ڏانهن وريو آهي. هن قوم جا ٿورا مڃيا آهن. الله جو شڪر ادا ڪيو آهي، پر ميان صاحب کي اهو ڪير سمجهائي ته قوم کي سندس صحت جي حوالي سان ڪابه اڻ تڻ نه هئي، قوم هن جي لاءِ ڪنهن ڳڻتي ۾ ڪونه ورتل هئي. سچ ته اهو آهي ته قوم هن سان ڪاوڙيل آهي، ڇو ته هن کي پاناما ليڪس پاران پنهنجي خاندان جي پَتِ وائکي ٿيڻ کانپوءِ اهڙن معاملن جي روڪٿام ۽ انهن جو توازن قائم ڪرڻ لاءِ باقاعده هڪ قانون سازيءَ واري مهم شروع ڪرڻ کپندي هئي، جيڪا ان سڄي ڀونچال جو تَتُ آڏو آڻي ها، اها کوج لڳائي ها ۽ معاملي کي توڙ تائين پهچائي ها.

جيئن ان ڏس ۾ سڀ کان پهرين شروعات فرانس ڪئي آهي، فرانس قانون سازي ڪري به ڇڏي آهي، جنهن ۾ هاڻ آف شور ڪمپنين جي مالڪن کي 7 سال قيد ۽ 15 لک يورو ڏنڊ ڏيڻو پوندو. جرمني، برطانيه، نيوزيلينڊ ۽ اسپين ۾ به قانون سازي ٿي رهي آهي، پر پاڪستان ۾ گذريل پندرنهن ويهن ڏينهن کان رڳو لٻاڙون لڳي رهيون آهن. اهو پاڪستان جنهن ۾ ڏهاڪو سال اڳ آف شوز ڪمپنين جي فرم جي فرمائش تي شوڪت عزيز، وزيراعظم مقرر ٿيو، ڏسندي ئي ڏسندي سرمائيڪاري به وڌي، خوشحاليءَ جون خبرون به اچڻ لڳيون ۽ پوءِ وري جڏهن آف شور ڪمپنين واري فرم اکيون ڦيري ڇڏيون ته وزيراعظم به هليو ويو ته سرمائيدار به هليا ويا. پاڪستان آف شور ڪمپنين ۽ انهن کي هلائيندڙ فرمن ۾ باقاعده يرغمال ٿي چڪو آهي، جڪڙجي چڪو آهي، اهي آف شور ڪمپنيون ۽ انهن کي هلائيندڙ فرمن جا ئي پئسا هئا، جن افغانستان ۾ جنگ جي لاءِ پاڪستان تي ڊالرن جا مينهن وسايا ۽ ان کانپوءِ يا ان کان اڳ ۾ اهڙن معاملن ۾ اهڙي سيڙپڪاري جا پاڻ وٽ ڪيترائي انيڪ مثال موجود آهن. ميان نواز شريف ۽ ان جي اولاد هن وقت جنهن ڏچي ۾ آهي، اهو ڏچو ٻين سان گڏوگڏ هنن خود پاڻ به پيدا ڪيو آهي. ڇو ته هنن جي بيانن ۾ وڏا تضاد نظر اچي رهيا آهن. ميان نواز شريف جي پٽ حَسن نواز جو چوڻ آهي ته سعودي عرب ۾ هن پنهنجي ڪاروبار کي ختم ڪري يا اتي موجود پنهنجي فيڪٽري وڪڻي لنڊن ۾ فليٽ ورتا، پر حقيقت اها آهي ته پارڪ لينڊ فليٽس 94-1993ع ۾ خريد ڪيا ويا هئا. جيڪڏهن ته حسين نواز 2006ع ۾ پنهنجي رقم جدي مان لنڊن ٽرانسفر ڪئي هئي ته پوءِ سوال اهو پيدا ٿئي ٿو ته ٻارنهن سال اڳ خريد ڪيل فليٽن واري رقم ڪٿان آئي؟ ۽ جيڪڏهن اهي فليٽ سندس ئي هئا ته 2006ع ۾ ڪنهن جي لاءِ آف شور ڪمپنيون بڻايون ويون.

ميان نواز شريف جي خاندان جو تاريخي جائزو اهو ٻڌائي ٿو ته سندن وڏن وقت جي ڪهڙين بي رحمين کي برداشت ڪيو آهي. غربت جي ڪهڙي گهاڻي ۾ ڪيئن پيڙهيا آهن. سندس ڏاڏو حڪيم رمضان ڪيئن لاهور ۾ ريلوي روڊ تي لوهه جو ڪاروبار ڪندو هو، ڪيئن اها ساڳئي ڪرت ميان صاحب جي بابا کي به اختيار ڪرڻي پئي، ڪيئن هن کي اسڪول ۽ ڪاليجن ۾ غربت سبب فيس معاف ڪرائڻ لاءِ جتن ڪرڻا پيا ۽ هو پنهنجي اسڪول جو پهريون شاگرد هوندو هو، جنهن کي مزدوري ڪرڻ سبب استادن هوم ورڪ کان آجو قرار ڏنو هو، تيئن هن اوڌر تي هڪ مسواڙي بٺي خريد ڪئي ۽ ڪهڙن ڏکن ڏوجهرن سان ان کي اڳتي وڌايو، ان کان اڳ هن کي غربت سبب تعليم اڌ ۾ ڇڏڻي پئي، هن حاجي دين محمد جي فيڪٽري تي چوڏهن آنا پگهار تي منشي گيري به ڪئي. هن 1937ع ۾ ڀائرن سان گڏجي حاجي فيروز کان 360 روپين ۾ بٺي خريد ڪئي ۽ 13 روپيه مسواڙ تي هڪ احاطو ورتو ۽ 500 روپيه قرض کڻي اتفاق فائونڊري جو بنياد وڌو. شريف ڀائرن جي بابا کي ماڻهو ميان چوڻ لڳا، جنهن کانپوءِ ان سڄي خاندان ۾ ميان جو لقب ضروري ٿي ويو، جيڪو اڄ ڏينهن تائين جاري آهي، ان خاندان جي فردن پڪ سان محنت ڪئي هوندي. ڪي ايماندار پورهيت به هوندا، پر اهو سڄو سلسلو جيڪڏهن شخصي جاکوڙ ۽ جدوجهد جو نتيجو هو ته ان کي آف شور ڪمپنين ۾ پناهه وٺڻ جي ڪهڙي ضرورت هئي. ٽيڪس بچائڻ لاءِ ۽ پنهنجي ناجائز ڪمائي کي جائز بڻائڻ لاءِ ڪي اصول پرست ۽ ايماندار ماڻهو تحرڪ نه وٺندا آهن. پڪ سان اهو ڪم اُهي ماڻهو ڪندا آهن، جن جو پئسو محنت سان ڪمايل ناهي هوندو ۽ هاڻ اها ڳالهه ڪا لڪيل ڍڪيل نه رهي آهي. پاناما ليڪس شريف خاندان کي اهڙي قطار ۾ بيهاري ڇڏيو آهي.

”موزيڪ فانسيڪا اينڊڪو“ جا دنيا ۾ 50 کان وڌيڪ دفتر آهن، جنهن جا 500 کان وڌيڪ مستقل، وڏي ساک پت رکندڙ وڪيل آهن. هاڻي انهن جي ڪلائينٽن ۽ شيئر هولڊرز ۾ منشيات فروش، اسمگلر ۽ مافيائون ئي ناهن، پر دنيا جهان جا سياستدان حڪمران، صحافي، بيورو ڪريٽس، جج، جرنيل ۽ ميڊيا هائوسز جا مالڪان به شام ٿي ويا آهن، جيڪي هڪ مخصوص هنڌ تي گڏجي ڪري هڪٻئي سان ملي وڃن ٿا ۽ هڪٻئي جي مفادن جو تحفظ ڪن ٿا.

مٿئين فرم هلي رهي هئي، اوچتو هن جي گذريل سال ڊيٽا چوري ٿي وئي. ڪمپني جي مين سرور کان هڪ ڪروڙ پنجاهه لک ڪاغذات نڪتا، جيڪي جرمني جي شهر ميونخ مان شايع ٿيندڙ اخبار زيتوشي زائتونگ پهتا، جنهن سڄي معاملي کي دنيا جي 76 ملڪن جي تحقيقي رپورٽنگ ڪندڙ صحافي سان ونڊيو ورڇيو. باقاعده ڪيٽيگري وائيز لسٽون ٺاهيون ويون، جنهن کانپوءِ عالمي سطح تي انڪشافن جو هڪ اهڙو ڀونچال آيو، جنهن دنيا جي مشهور ۽ بااثر ماڻهن جي ڀنڀور کي باهه لڳائي ڇڏي. باهه به اهڙي جنهن جا ڀڀڙ وسامڻ جو ارادو ئي نه ٿا رکن، وڌندا ئي پيا وڃن ۽ پنهنجي تاءَ سان گهڻن کي ساڙي رک ڪري رهيا آهن، جن جي لپيٽ ۾ شريف خاندان به اچي ويو آهي. ميان نواز شريف جي ٻن پٽن حسن نواز ۽ حسين نواز ۽ ڌيءُ مريم نواز سان گڏوگڏ پنجاب جي وزيراعليٰ شهباز شريف جي گهرواري تهمينه دراني ۽ ڀيڻيوي توڙي حمزه شريف جا نالا به اچي وڃن ٿا.

شريف خاندان پاناما ليڪس واري معاملي تي هوش کان ڪم وٺي ها ته اڄ اهڙي ٻائيتال ۾ نه هجي ها. هنن جوش کان ڪم ورتو، جذباتي ٿي ويا، ان ڪري ردعمل به اوترو ئي شيد آڏو آيو. هو جيڪڏهن ٿڌي دل دماغ سان پنهنجين غلطين جي اعترافن سان گڏ جڳ جهان آڏو اچن ها ۽ ٻاهرين سيڙپڪاري کي پاڪستان ۾ کڻي اچي سرمائيڪاري ڪرڻ وارا اعلان ڪن ها، گڏوگڏ پاناما ليڪس کانپوءِ معاملو پارليامينٽ ۾ کڻي اچي اتي انهن جي رستا روڪ لاءِ قانون سازيءَ وارو خيال به عملي طور تي آڏو آڻن ها ته تيزيءَ سان ڪرندڙ سندن ساک وري شهرتن جي شاهرائن تي ڊوڙڻ شروع ڪري ها ۽ هنن جي وڌندڙ مقبوليت ۽ قبوليل سچ کي سامهون رکندي ٻين به ڪيترن اناپرست انسانن جي ڦوڪڻي مان هوا نڪري وڃي ها، اهي به سماجي ۽ اخلاقي دٻاءُ ۾ اچي ٻاهر لڳايل سرمائي کي پاڪستان کڻي اچي سيڙپ ڪرڻ جا سانباهه ڪن ها. پر اهو ان ڪري نه ٿي سگهيو جو شريف خاندان پنهنجي هٺ ۽ هوڏ تان نه لٿو ۽ اڃا تائين به هو پنهنجي زد تي برقرار آهي. جيڪڏهن اها ئي روش رهي ته ٿي سگهي ٿو ته اهڙين حڪمت عملين جي نتيجي ۾ هنن کان اهڙيون غلطيون ٿين جو کين اقتدار تان هٿ کڻڻا پئجي نه وڃن.

naseembukhari44@gmail.com

 

کَريا به پنهنجا، ٻَريا به پنهنجا… !!: سعيد ا حمد مڱريو

کريل، بگڙيل، خراب لڇڻن وارا ، ٻريا  بيمار،  ڪسا هجن يا لانوان پنهنجا وري به پنهنجا آهن. قومن جي اندر انيڪ قسمن جون بيماريون هونديون آهن ڪاهل ، سست ، لڙاڪا مطلب هر قوم پنهنجي پنهنجي جاگرافيات جي ڪري طبيعتن به اينئن ئي هونديون آهن ، ڪمزوري، بزدلي يا بي عقلي انسان جون ڪمزوريون آهن، پر غداري انسان جو شعوري عمل هوندو آهي،  قوم جي غدار کي توهان معاف نه ڪندا آهيو  ڇو جو غداري وارو عمل هڪ شعوري عمل هوندو آ پر سست ۽ ڪاهل رهڻ ايهو عمل هڪ فطري آ پوءِ جيڪڏهن ڪنهن قوم جو ليڊر پنهنجي قوم کي  سست يا ڪاهل چوي ته ان سان ان قوم جي تذليل سان گڏو گڏ قوم سان مذاق به هوندي آ . قومن ۽ ملڪ ۾ اسان جي سنڌ دنيا جي تاريخ ۾ هڪ قديم ليکي وڃي ٿي ، جنهن ۾ ڪيتريون ئي قومون آيون ۽ ويون ، حاڪم به رهيون ته محڪوم به . انهن ڇا ڪيو ؟ زندگي ڪهڙي نموني بسر ڪيائون ؟ ڪهڙا ڪارناما سرانجام ڏنائون ؟ اسان جي لاءِ ڇا ڇڏي ويا ؟ ايها  سڀ ڄاڻ سنڌ جي تاريخ جي مطالعي سان ملندي ته هي قوم ڪيتري ڪاهل رهي آهي يا ڪيتري محنتي . سنڌ جي  تاريخ تي ٿوري نظر ڦيرايون ته هن خطي کي انگريز سامراج ڪجهه مخصوص ماڻهن جي هٿن ۾ ڏئي ڪري هن کي آزاد ڪيو انگريز سامراج جي نظر ۾ هندستاني ۽ سنڌي نا اهل هئا. جڏهن هندستان کان پاڪستان کي آزادي ملي ته پوءِ هن خطي ۾ سنڌين کي ڪاهل ، سست چيو ويو . هن دور ۾ ئي سنڌين کي پنهنجن ليڊرن مختلف نالن سان لقب ڏنا جيئن لياقت علي سنڌين کي گڏهه هڪلڻ واري قوم سڏيو ،  جنرل ضيا جي وقت ۾ سنڌي ”سٺا پاڪستاني“ نه هئا، جنرل پرويز مشرف جي وقت ۾، سنڌي ”نااهل“ سڏيا ويا. سنڌ جي نامور سياسي ماڻهون جو چوڻ ته سنڌي نوجوان وڃي ڇولا کپائين ، ڇولا کپائڻ ڪو عيب نه آهي پر قوم جي ماڻهن سان ايها پڻ مذاق آهي ، تازو ڪيترن ئي ليکڪن لاءِ سرٻاٽ ٿي رهيا آهن ته اهي پنهنجي لکڻين ۾ سنڌين جي لاءِ ”مثبت“ ناهن  . هن قوم جي مٿان جهالت جا ٺپا هنيا ويا آهن جيڪي وقت سان گڏ نظر اچن ٿا . مان سمجهان ٿو ته ! جيڪڏهن ڪو تنقيدي نظر سان مون کي  سست ، جاهل  چوي ٿو ايهو منهنجي سکڻ جي لاءِ هڪ بهتر عمل آ پوءِ مون کي  پنهنجي مثبت سوچ سان ان  تنقيدي لفظن  تي غور ۽ ويچار ڪرڻ کپندو ، ۽ پنهنجن عملن تي نطر ثاني ڪرڻي پوندي . ڇو جو جيستائين تنقيدي جائزو نه ورتو ويندو تيستائين پنهنجي  اصلاح ممڪن ئي نه ٿي ٿي سگهي ۽ تيستائين  منهنجي اٿڻي ويهڻي ۾ به ڪا تبديلي  نه ٿي اچي سگهي ،  ان جي لاءِ تنقيد کي برداش ڪرڻو ئي پوي ته ايهو بهتر آ . پر جيڪڏهن ڪو مون کان کائڻ ، پيئڻ جيئڻ جا سڀ اختيارات کسي ۽ پوءِ مون کي چوي ته هاڻي زنده رهي ڏيکار ته پوءِ اهڙي حال ۾ منهنجو جيئڻ ڏاڍو ڏکيو ٿي سگهندو منهنجي جيئڻ جا سهارا کسي ڪري منهنجي وجود کي نااهل چوي منهنجي نسل کي سست چوي ته مان ايهو سمجهندس ته مون سان ايها هڪ مذاق آهي. جڏهن ته اسان کان جيئڻ جا سهارا کسجي چڪا آهن،

سنڌي قوم بک بدحالي جي رستي کان گذر ڪري رهي آهي جنهن کي پيٽ ڀرڻ جي لاءِ انهن ئي پيرن ، ميرن ، سردارن ، وڏيرن جي ڌر تي اچڻون ٿو پوي جيڪي هن دور جا فرعون آهن . ڇو جو اسان مجبور آهيون بي سهارا آهيون پيٽ ڀرڻ خاطر انهن ئي دروازن تي وڃڻون ٿو پوي جيڪي دولت ، ملڪيت سان ڀريا پيا آهن جن کي وقت جي سامراج هڪ مظبوط مال ملڪيت جو قلعو بڻائي ڇڏيو آهي . پر سنڌين  جي هڪ تاريخ رهي آ ته جڏهن هن قوم مٿان ظلم ۽ ذلتن جي اوڙاهن ۾ ڦٽي ڪيو ويو ، تڏهن هي قوم هميشه نئين حوصلي سان اُٿي بيهي رهي هئي . سيدن، ميرن، پيرن، ڪولهين، ڀيلن، ڪلهوڙن، سمن، سومرن، چانڊين، ٽالپرن ۽ جنرل هوش محمد شيدي تائين سنڌي ماءُ جي هر باضمير ۽ باغيرت ڄائي، ٻين مان مزاحمت ۽ تبديليءَ جي توقع رکڻ بدران پاڻ ميدان ۾ لهي مقابلو ڪيو .پوءِ اڄ ڇو سنڌ جو سوچيندڙ حلقو رڳو مطالبن، تبصرن ۽ تنقيدن تائين محدود آهي ؟؟  مطالبن ۽ تنقيدي سوچ کان ايهو بهتر آهي ته سنڌ جي سياسي نظام کي مظبوط ڪيون ، سنڌ جي سياست مٿان جن جو  ڪنٽرول آهي ان ڪنٽرول کي ختم ڪرڻ جي لاءِ هڪ ٿي ۽ سندرو ٻڌي ميدان ۾ لهون ، نوجوان نسل کي سياسي جدوجهد جي ترغيب ڏيون ته اهي ميدان ۾ نڪري اچن سندرا ٻڌي ڪري پنهنجن حقن  وٺڻ جي لاءِ جدوجهد ڪن . اسان رڳو مطالبا ڪنداسين ۽ پنهنجي قوم کي هڪ سست ، جاهل چوندا رهنداسين ته پوءِ ڌاريا ڪنهن رحم جي نظر سان نه ڏسندا ، ڇو جو اهي اجل کان ئي اسان کي سست هئڻ جو طعنو هڻندا ٿا اچن  . ان کان ايهو بهتر آهي ته اسان جو سوچيندڙ ماڻهون الزام هڻن بجاءِ هن قوم کي بچائڻ جي لاءِ  مناسب رويو  اختيار رکي ،  ته جيئن  سنڌ کي  پهچندڙ نقصان کان بچائي سگهجي . سياسي  عمل سان پنهنجون پاليسيون ٺاهيون وڃن ، شهرن ۽ ٻهراڙين ۾ تعليم، صحت، روزگار ۽ امن امان جي باري ۾ دنيا جي مختلف فورمن تي صاف ۽ سڌي ڳالهه رکون ۽ وقت جي سامراج سان مهاڏو اٽڪائي قوم جو ساٿ ڏيون ، سنڌ جي مٿان جيڪي به خطرا لامارا پيا ڏين، ان جي باري ۾ اسان جي سوچ ۽ رويا تبديل هئڻ کپن الزامن کان نڪري ڪري قوم جي ڀلائي جي لاءِ جاکوڙي ڪردار اختيار ڪيون  ، جڪڏهن اڄ اسان قوم جي سستي تي سوچڻ ويٺاسين ته  ائين نه ٿي جيئن  اسان جي پوين نسلن خبرداري مان هٿ ڪڍي ڇڏيو هيو ۽ اهي  بي خبري ۽ لاپرواهي ۾ رهيا هئا ، پوءِ ياد رکجو ته ! اهو ساڳيو رويو جيئن هيئنر هن دور ۾ اسان رکيوسين ته پوءِ اسان جا لاهه ئي نڪري ويندا . هن وقت پنهنجو سوچيندڙ ماڻهن، ليکڪن ، ڪامورن ۽ سياستدانن جو ئي ڪم آ جيڪي ان معاشري کي پنهنجي سٺي سوچ ۽ عمل سان  پنهنجي قوم کي تبديل ڪري سگهن ٿا جيڪڏهن رڳو اهي تبصرا، تنقيدون ۽ تبرا ڪندا رهندا ، ته پوءِ هن قوم جي مٿان جيڪو نا اهلي وارو ٺپو لڳل آ اهو ڪڏهن به ختم نه ٿو ڪوئي  ڪري سگهي ، اسان کي هاڻي ايهو ثابت ڪرڻو آهي ته اسان  بدحالي ۾ رهي ڪري به ڪجهه ڪيون وقت سان مقابلو ڪري ايهو ثابت ڪيون ته اسان هڪ محنتي قوم آهيون جيڪڏهن  نشي جي پنڪيءَ ۾ رهياسين ته پوءِ  ڌرتي جي تباهيءَ جو سبب اسان پاڻ ئي هونداسين پنهنجن ذهنن کي سجاڳ رکڻ کپي .  بحراحال سماج خراب ٿئي يا سماجي نظام، ان جي خراب ٿيڻ کان پهرين ان خرابي کي ٺيڪ ڪرڻ لاءِ هردم خبرداري کان ڪم وٺڻ گهرجي بجاءِ جو ان معاشري ۾ رهندڙ قوم کي نااهل يا سست چون ، قوم کي همٿائيڻ جي ضرورت آ جيئن چوندا آهن ته  اولاد جي کري خراب ٿي ته  والدين انهن کي پنهنجي گهرن مان نه ڪڍندا آهن ايستائين جو اوري پاڙي وارن کي به ان اولاد جون اڇايون  پيا بيان ڪندا رهندا  ته اسان جي اولاد سٺي آ .

قوم جا دانشور ، ليکڪ ، ليڊر قوم جا رکوالا هوندا آهن انهن جي اصلاح ڪندڙ هوندا آهن نه ڪي انهن جا عيب اگهاڙا ڪري قوم جي تذليل ڪئي وڃي جيئن چوڻي آهي ته  “کَريا به پنهنجا، ٻَريا به پنهنجا “ جيڪڏهن قوم جي ڪردار ڪشي ڪبي ته ان جو اثر قوم جي مٿان هڪ  مايوس ڪن ٿي سگهي ٿو ، ڪسا هجن يا لانوان پنهنجا وري به پنهنجا آهن .

 

 

مان نه مڃان هاڻي نه هلندي….

لنڊن کان وطن واپسي لاءِ ايئرپورٽ طرف روانگي جي موقعي تي ميڊيا سان ڳالهائيندي وزيراعظم نواز شريف چيو آهي ته پاڪستانين جي اڪثريت ڌرڻا نه ٿي چاهي، پر بدقسمتي سان 1990ع واري ڏهاڪي جي ”مان نه مڃان“ واري سياست ٻيهر شروع ٿي وئي آهي، جيڪا دفن ٿي وئي هئي ۽ هاڻي اها ملڪ ۾ نه هلندي، پاناماليڪس منهنجي ذات تي ڪوبه الزام ناهي مڙهيو، پر ان کانپوءِ به اسان چاهيون ٿا ته جاچ ڪميشن ضرور ٺهي، هن چيو ته منهنجي خيال ۾ ڪميشن ٺهي ويندي، چوڌري نثار علي خان کيس ٻڌايو ته ڪميشن لاءِ ڪنهن ڪنهن  سان رابطو ڪيو ويو، وزيراعظم چيو ته منهنجو طبي معائنو ٿيو ۽ خدا جو شڪر آهي ته منهنجي طبيعت ٺيڪ آهي، پاڪستان جي ترقي ۽ خوشحالي اسان جو مشن آهي، پاڪستانين جي اڪثريت ملڪ ۾ امن ۽ سڪون چاهي ٿي پر دنيا جي قومن ۽ ترقي جي ڊوڙ ۾ اسان پوئتي رهجي ويا آهيون، ڪيترن ئي ماڻهن کي منهنجي لنڊن پهچڻ تي سازش نظر اچي رهي هئي، پر آئون طبي چڪاس لاءِ لنڊن ويو هئس، منهنجي لنڊن وڃڻ تي اڳڪٿيون ڪندڙن کان ئي پڇيو وڃي ته انهن ائين ڇو ڪيو، 1972ع کان اسان جو خاندان مشڪلاتن جو شڪار رهيو، اسان جي ڪيترائي ڪارخانا ذوالفقار علي ڀٽو اقتدار ۾ اچڻ بعد قومي ورثو قرار ڏنا هئا. اسان جڏهن باقي دنيا جو مقابلو ڪري رهيا آهيون ته ملڪ ۾ موجود ماڻهن کي اسان جون ڄنگهون نه ڇڪڻ گهرجن،

پاناما ليڪس بابت جاچ ڪميشن جي حوالي سان  نواز شريف چيو ته جڏهن ڌرڻا لڳا هئا ته انهن جي پڄاڻي تي طئه ٿيو هو ته اهو معاملو سپريم ڪورٽ حوالي ڪيو وڃي، جڏهن ته پاناما ليڪس جي حوالي سان به سپريم ڪورٽ جي راءِ سڀني جي سامهون آهي، هن چيو ته ڌانڌلين جو گوڙ ڪندڙن اسپيڪر جي چونڊ وارا نتيجا ٻيهر به نه مڃيا، جيڪو نه ٿيڻ گهرجي، اسان ڌرڻن جي سياست نه ٿا چاهيون، انشاءُ الله ملڪ ترقي ڪندو ۽ حالتون وڌيڪ بهتر ٿي وينديون، ملڪ ۾ 90ع واري سياست نه ٿيڻ گهرجي ۽ پاڪستان ۾ رهندڙن کي پاڪستان جون ڄنگهون نه ڇڪڻ گهرجن، ملڪ ۾ ڪجهه اهڙا سياستدان موجود آهن، جيڪي اڃا بالغ ناهن ٿيا ۽ هو 90ع واري سياست ڪري رهيا آهن، الله ڪري انهن کي به پاڪستان جي ترقي ايتري پياري ٿي وڃي، جيتري مون ۽ ٻين پاڪستانين کي آهي.

 

عوام ڌرڻا سياست نٿو چاهي، مان نه مڃان واري پاليسي دفن ٿي چڪي: نوازشريف

لنڊن (اين اين آءِ) وزيراعظم محمد نوازشريف چيو آهي ته پاڪستاني عوام ڌرڻا سياست نٿي چاهي مان نه مڃان واري ڳالهه نه هلندي 1972 کان اسان جو ڪٽنب پريشانين ۽ مشڪلاتن جو شڪار رهيو پانامه ليڪس جي حوالي سان جلد ڪميشن بڻجي ويندو لنڊن کان پاڪستان روانگي جي موقعي تي ميڊيا سان ڳالهائيندي نوازشريف چيو ته الله تعالي ٰ جي فضل ۽ ڪرم ۽ قوم جي دعائن سان هاڻي بهتر آهيان ۽ مان پاڪستان وڃي رهيو آهيان وزيراعظم چيو ته اسان جو مقصد ملڪ جي خوشحالي عوام جي گهڻائي احتجاج جي سياست جي حامي نه آهي عوام ڪنهن کي ملڪي ترقي ۾ رنڊڪ بڻجڻ نه ڏيندو وزيراعظم چيو ته پانامه ليڪس تي مون تي ڪوئي الزام ناهي لڳو پانامه ليڪس جي معاملي تي ڪميسن جلد ٺهندو جڏهن ته سيلاب جي نالي تي چندو گڏ ڪندڙن جو حساب ٿيڻ گهرجي وزيراعظم چيو ته اسان جو خاندان 1972 کان پريشانين ۽ مسئلن جو شڪار آهي ذوالفقارعلي ڀٽو اسان جي صنعتن کي قومي تحويل ۾ ورتو ڪميشن کي انهن شين جو به جائزو وٺڻ گهرجي وزيراعظم چيو ته پاڪستان ۾ عوام جي گهڻائي ملڪ ۾ امن سلامتي ۽ ترقي گهري ٿي هاڻي مان نه مڃان واري ڳالهه نه هلندي ڇو ته ان کي 90 جي ڏهاڪي ۾ دفن ڪري چڪا آهيون وزيراعظم چيو ته چوڌري نثارعلي خان ڪميشن لاءِ رابطن بابت ٻڌايو ته هن چيو ته پهريان به ڌرڻن تي معاملي سپريم ڪورٽ اماڻيو هو جنهن تي سپريم ڪورٽ هڪ فيصلو ڏنو جنهن کي ڌرڻن وارن تسليم نه ڪيو اهڙي طرح اسپيڪر سردار اياز صادق جيڪو ضمني چونڊن ۾ ٻيهر منتخب ٿيو ان جي چونڊ کي به اهڙن ماڻهن تسليم نه ڪيو هن چيو ته ملڪ ۾ ڪجهه اهڙا سياستدان آهن جيڪي هن وقت تائين بالغ نه ٿيا آهن ۽ اهي 90 جي ڏهاڪي واري سياست ڪري رهيا آهن خدا ڪري کين به پاڪستان جي ترقي ايتري عزيز هجي جيتري مون کي ۽ ٻين پاڪستانين کي آهي وزيراعظم چيو ته ڪيترن ئي ماڻهن کي منهنجي لنڊن ۾ اچڻ ۾ سازش نظر اچي رهي هئي پر مان چيڪ اپ لاءِ آيس جيڪو مڪمل ٿي ويو ۽ هاڻي واپس پنهنجي وطن وڃي رهيو آهيان منهنجي لنڊن اچڻ کان پوءِ اڳڪٿيون ڪندڙن کان سوال ڪيو وڃي ته انهن ايئن ڇو ڪيو هڪ سوال جي جواب ۾ وزيراعظم چيو ته پاڪستان وڃي رهيو آهيان جنهن کان پوءِ سمورا افواهه ختم ٿي ويندا.

 

پاڪستان جي سالميت ۽ خوشحالي لاءِ سڀني جو احتساب ضروري آهي: آرمي چيف

راولپنڊي (اين اين آءِ) چيف آف آرمي اسٽار جنرل راحيل شريف چيو آهي ته ڪرپشن جي لعنت ختم ٿيڻ تائين دهشتگردي ۽ انتهاپسندي خلاف جنگ جٽادار امن ۽ استحڪام نٿي آڻي سگهي پاڪستان جي سالميت ۽ خوشحالي لاءِ سڀني جو احتساب ضروري اهي فوج ان سلسلي ۾ ٿيندڙ هر بامقصد ڪوشش جي مڪمل حمايت ڪندي آءِ ايس پي آر موجب راحيل شريف اڱاري تي سگنل ريجمينٽل سينٽر ڪوهاٽ جو دورو ڪيو ان موقعي تي ڪوٺايل تقريب دوران ميجر جنرل سهيل احمد زيدي کي سگنل ان چيف جا بيچ لڳائي ڪور آف سگنل جي ڪرنل ڪمانڊنٽ جون باضابطه ذميواريون ڏنيون ويون ان موقعي تي آفيسرن جوانن ۽ شهيدن جي خاندانن سان ڳالهائيندي پاڪ فوج جي سربراهه چيو ته آپريشن ضرب عضب ۾ مواصلاتي مدد جي حوالي سان سنگل ڪور جو غير معمولي ڪردار واکاڻ جوڳو آهي هن دهستگردن کي شڪست ڏيڻ ۽ کين پناهه گاهن مان ڪڍڻ لاءِ سيڪيورٽي فورسز جي اهلڪارن ۽ سويلين پاران ڏنل قربانين کي ساراهيو.

 

جمهوري نظام ختم ٿيڻ نه گهرجي، آئين ۽ عوام جي مينڊيٽ جو احترام ضروري آهي: وڏو وزير

ڪراچي (اسٽاف رپورٽر)سنڌ جي وڏي وزير سيد قائم علي شاهه چيو آهي ته ڇوٽو گينگ جي سنڌ ۾ داخلا روڪڻ لاءِ سرحدون سيل ڪيون آهن، سنڌ ۾ به ڌاڙيلن خلاف آپريشن ڪري امن بحال ڪرايو ويندو، خابرو ادارن موجب جيڪب آباد ۾ ميڊيا سان ڳالهائيندي وڏي وزير جو چوڻ هو ته رينجرز کي وڌيڪ اختيار ڏيڻ بابت فيصلو پارٽي قيادت ڪندي، سندس چوڻ هو ته ارڙهين ترميم باوجود وفاق سنڌ جا حق کائي ويٺو آهي، وزير اعظم سان شڪايت باوجود وفاق هٺ ڌرمي تان نٿو لهي، ارڙهين ترميم کانپوءِجيڪي کاتا سنڌ حڪومت وٽ هجڻ گهرجن ها، اهي وفاق وٽ آهن، وڏي وزير چيو ته ڇوٽو گينگ جي امڪاني داخلا روڪڻ لاءِ پنجاب سان لڳندڙ سرحد سيل ڪري چوڪسي وڌائي ڇڏي آهي.ملڪ جي ترقي لاءِ جمهوري نظام ضروري آهي، جيڪو ڪنهن به صورت ۾ ختم نه ٿيڻ گهرجي، خابرو ادارن موجب ڪراچي ۾ ميڊيا سان ڳالهائيندي سيد قائم علي شاهه جو چوڻ هو ته اهڙو ماحول نه آهي جو اسيمبليون ٽوڙيون وڃن، حڪومت کي پنج سالن جو مدو پورو ڪرڻ کپي، آئين ۽ عوام جي مينڊيٽ جو احترام ڪيون ٿا، سندس چوڻ هو ته مڪاني نظام جو عمل عدالتي حڪم موجب مڪمل ڪيو ويندو ۽ قانون ۾ ميئر ۽ ڊپٽي ميئر جا جيڪي اختيار آهن اهي ضرور ڏنا ويندا.  سنڌ جي وڏي وزير سيد قائم علي شاهه چيو آهي ته پاڪستان جو عوام موجوده اسيمبلين کي پنجن سالن لاءِ مينڊيٽ ڏنو آهي ۽ ان مينڊيٽ جو سڀني کي احترام ڪرڻ گهرجي. ۽ اسيمبلي کي تحليل ڪرڻ واري تجويز بابت بي بنياد افواهن ۾ ڪنهن به قسم جي صداقت نه آهي. اها ڳالهه اڄ هن نيشنل هاءِ وي اين-5 روڊ جناح ٽرمينل کان قائد آباد فلاءِ اوو جي گرائونڊ بريڪنگ تقريب کان پوءِ ميڊيا سان ڳالهائيندي ڪئي. ان موقعي تي وڏي وزير سان گڏ مڪاني ادارن وارو وزير ڄام خان شورو، وڏي وزير جو خاص معاون وقار مهدي، وڏي وزير جو پوليٽيڪل ڪوآرڊينيٽر صديق ابو ڀائي، ايڊمنسٽريٽر ڪراچي ۽ ٻيا موجود هئا. انهيءَ موقعي تي هڪ سوال جي جواب ۾ سنڌ جي وڏي وزير چيو ته پاناما ليڪس جي آزاداڻي جاچ لازمي هئڻ گهرجي پر ان جو مطلب هرگز ايئن نه آهي ته جمهوري نظام کي نقصان پهچايو وڃي. هن چيو ته پاڪستان جي ماڻهن جمهوريت لاءِ وڏيون قربانيون ڏنيون آهن انڪري اسان ڪنهن کي به ان نظام کي ڊي ريل ڪرڻ جي اجازت نه ڏينداسين. هڪ ٻيو سوال ته نئين مينڊيٽ لاءِ اسيمبلين کي تحليل ڪرڻ جي تجويز آهي جي جواب ۾ هن چيو ته اهو بلڪل بي بنياد ۽ من گڙت آهي. هن چيو ته ڪجهه عنصر جمهويت کي سبوتاڙ ڪرڻ چاهين ٿا پر اهي مذموم عناصر ڪڏهن به پنهنجي عزائم ۾ ڪامياب نه ٿي سگهندا. سنڌ جي وڏي وزير هڪ سوال جي جواب ۾ ٻڌايو ته مڪاني ادارن جي ناظمن جي حوالي سان سپريم ڪورٽ جي فيصلي جي روشني ۾ ٻن مهينن جي مدت ۾ سموري قانون سازي به ڪئي ويندي ۽ ٻه مهين واري عرصي ۾ مڪاني نظام کي فعال ڪيو ويندو. انهيءَ کان اڳ سنڌ جي وڏي وزير مڪاني ادارن واري صوبائي وزير ڄام خان شورو سان گڏ نيشنل هاءِ وي اين-5 روڊ جناح ٽرمينل کان قائدآباد جيڪو ٽن ڪلو ميٽرن تي ٻڌل آهي جي بحالي/ٻيهر تعمير جو سنگ بنياد رکيو. ان منصوبي جي لاڳت 785.217 ملين رپيا آهي ۽ اهو هڪ سال جي مدت ۾ مڪمل ٿيندو. ان جو ڪانٽريڪٽ ايف ڊبليو او کي ڏنو ويو آهي. نيشنل هاءِ وي (اين-5) ڪراچي جي هڪ وڏي هاءِ وي آهي جيڪا ٺٽي/حيدرآبادکي شاهراه فيصل نزد جناح ٽرمينل کي ملائي پئي. ان روڊ تي نه رڳو ٺٽي ۽ حيدرآباد لاءِ ڪمرشل ۽ پبلڪ ٽرانسپورٽ روان دوان هوندي آهي بلڪه ڪراچي جي اوڀر واري حصي تي اهم ۽ وڏا صنعتي سيڪٽر به واقع آهن جنهن ۾ پورٽ قاسم، ايڪسپو پروسيسنگ زون، ڪراچي اسٽيل ملز، لانڍي ۽ بن قاسم انڊسٽريل ايريا کي ڪراچي پورٽ ۽ پورٽ قاسم سان ملائيندي آهي. سنڌ جي وڏي وزير وڌيڪ چيو ته اهو تاثر ڏنهو پيو وڃي ته حڪومت نوان روڊ ته تعمير ڪرائي پئي پر پراڻن روڊن کي نظر انداز ڪري رهي آهي جيڪو سچ نه آهي. هن چيو ته اسان پراڻن روڊن جي بحاليءَ لاءِ به ڪم ڪري رهيا آهيون ۽ اهو اين-5 پروجيڪٽ ان جو ئي حصو آهي.