تازيون خبرون

Daily Archives: April 19, 2016

پاناما ليڪس معاملو: حڪومت جو مخالف ڌر پارٽين کي اعتماد ۾ وٺڻ جو فيصلو

اسلام آباد(بيورو) وزيراعظم هائوس ۾ ناڻي واري وفاقي وزير اسحاق ڊار جي صدارت هيٺ (ن) ليگ اڳواڻن ۽ وفاقي وزيرن جو اهم اجلاس ٿيو،  جلاس ۾ پاناما ليڪس معاملي تي مشاورت ڪئي وئي، .ميڊيا رپوٽ مطابق اجلاس ۾ وفاقي وزير پرويز رشيد، خواجا سعد رفيق، احسن اقبال ۽ ٻيا شريڪ ٿيا،  ذريعن موجب اجلاس ۾ پاناما ليڪس معاملي تي جاچ ڪميشن ۽ ٻين معاملن تي اهم ڳالهه ٻولهه ئي وئي، اجلاس دوران جسٽس ريٽائريڊ سرمد جلال عثماني  کي جاچ ڪيمٽي جو سربراهه بڻائڻ جي معاملي ۽ جسٽس پاران سامهون ايندڙ شرطن تي گڏيل خيالن جو اظهار ڪيو ويو، ذريعن جي دعوي! آهي ته حڪومت پاناما ليڪس معاملي تي ڀرپور مشاورت شروع ڪري ڇڏي آهي. حڪومت مخالف ڌر ۽ ٻين پارٽين جي پارلياماني ليڊرن کي اعتماد ۾ وٺڻ جو فيصلو ڪري ورتو آهي. ذريعن جي حوالي سان ٻڌايو پيو وڃي ته حڪومت معاملي تي مخالف ڌر جي پارٽين سميت سمورين سياسي پارٽين سان ڳالهيون ڪري انهن کي اعتماد ۾ وٺندي. پاناما ليڪس جي جاچ لاءِ سمورن معاملن کي قطعي شڪل وزير اعظم نواز شريف جي وطن واپسي تي ڏني ويندي، جڏهن ته معاملي تي سپريم ڪورٽ بار ايسو سي ايشن ۽ پاڪستان بار ڪائونسل سان به مشاورت ڪئي ويندي.

 

پوري ملڪ ۾ڪومبنگ آپريشن جو اعلان، وڏي پئماني تي آپريشن ٿيندو: آرمي چيف

راولپنڊي (مانيٽرنگ ڊيسڪ)آرمي چيف جنرل راحيل شريف سڄي ملڪ ۾ ڪومبنگ آپريشن شروع ڪرڻ جو اعلان ڪري ڇڏيو آهي.  ڪومبنگ آپريشن جتي ٿيندو وڏي پيماني تي ٿيندو. آپريشن دوران دهشتگردي جي اطلاع تي سڄو علائقو سيل ڪيو يوندو. ڪومبنگ آپريشن ذريعي سڄي ملڪ ۾ دهشتگردن جو پيڇو ڪيو ويندو،  پاڪ فوج جي جوانن جي قربانين کي قدر کي نظر ڏسي ٿي، جلد ملڪ مان دهشتگردي جو خاتمو ڪيو ويندو. آرمي چيف جنرل راحيل شريف فاٽا سميت ٻين علائقن مان دهشتگردن جا ٿاڪ ختم ڪرڻ جي هدايت ڪندي چيو آهي ته قوم پاڪ فوج جي جوانن جي قربانين کي قدر کي نظر ڏسي ٿي، جلد ملڪ مان دهشتگردي جو خاتمو ڪيو ويندو.آءِ ايس پي آر موجب آرمي چيف جنرل راحيل شريف اتروزيرستان جي شوال واري علائقي جو دورو ڪيو.پاڪ فوج جي ترجمان موجب آرمي چيف جنرل راحيل شريف اتروزيرستان جو دورو ڪري جوانن سان ملاقات ڪئي.آءِ ايس پي آر موجب دوري دوران آرمي چيف کي ضرب عضب آپريشن جي آخري مرحلي بابت بريفنگ ڏني وئي.بريفنگ دوران آرمي چيف کي ٻڌايو ويو ته هيل تائين 800 ڪلوميٽر علائقو ڪليئر ڪرايو ويو آهي.آرمي چيف شوال ۾ دهشتگردن خلاف وڏي پيماني تي سرچ آپريشن شروع ڪرڻ جي هدايت ڪئي.ان موقعي تي آرمي چيف جو چوڻ هو ته فاٽا کان ٻاهر وڏي پيماني تي آپريشن شروع ڪري دهشتگردن ۽ سندن مددگارن جو ڳٺ جوڙ ختم ڪيو وڃي.جنرل راحيل شريف چيو ته قوم پاڪ فوج جي جوانن جي قربانين کي قدر جي نگاهه سان ڏسي ٿي.هن چيو ته پوري قوم پاڪ فوج سان ڪلهو ڪلهي ۾ ملائي گڏ بيٺل آهي.جنرل راحيل شريف چيو ته دهشتگردن کي پاڙان پٽي ملڪ ۾ امن قائم ڪيو ويندو.

 

پاناما ليڪس معاملو: پ پ پاران رٽائرڊ ججن جي جاچ قبول نه ڪرڻ جو اعلان

ملير(ناز شر) اطلاعات کاتي جي صوبائي صلاحڪار مولابخش چانڊيو چيو آهي ته پاناما ليڪس جي معاملي تي رٽائرڊ ججن جي جاچ قبول نه ڪئي ويندي. سپريم ڪورٽ جي چيف جسٽس کان جاچ ڪرائي وڃي، سنڌ جي وزير اعظم ۽ پنجاب جي مخصوص علائقن سان تعلق رکندر وزير اعظم ۽ وزيرن لاءِ الڳ الڳ قانون جوڙيو ويو آهي، لاهور سانحي ملڪ جي ڀتين کي لوڏي ڇڏيو آهي. 3 ڏينهن حڪومت سڪتي ۾ هئي، جنرل راحيل شريف آپريشن شروع ڪرايو، 3 ڏينهن تائين حڪومت کي خبر ئي نه هئي. اهڙن خيالن جو اظهار هن ملير پريس ڪلب ۾ شهيد بينظير ڀٽو آڊيٽوريم جو سنگ بنياد رکڻ واري تقريب  کي خطاب ڪندي ۽ صحافين سان ڳالهائيندي ڪيو. مولا بخش چانڊيو چيو ته پيپلز پارٽي جو آزاد صحافت ۾ وڏو ڪردار آهي. اسان جو صحافت سان اڻٽٽ رشتو آهي. صحافت جو سوسائٽي ۾ اهم ڪردار آهي، پاڪستان ۾ صحافي وڏي مشڪل سان صحافت ڪن ٿا. هن ملڪ ۾ سچ لکڻ ۽ ڳالهائڻ ڏکيو آهي. جيڪو سچ لکي ٿو ان کي وڏي قيمت ادا ڪرڻي پوي ٿي. ڪيترائي صحافي حق ۽ سچ لکندي شهيد ڪيا ويا آهن. هن چيو ته پيپلز پارٽي هر وقت صحافين سان گڏ ڪٽهڙي ۾ بيهڻ لاءِ تيار آهي. هن شهباز شريف ڏاهن اشارو ڪندي چيو ته ڪالهه جيڪي ڪرپشن جي ڳالهه ڪري رهيا هئا اڄ خاموش آهن. ڇا اهي نواز شريف ۽ ڀائٽي خلاف هڪ لفظ به نه ٿو ڳالهائي سگهي. شهباز شريف سميت سموري ڪابينا کي نانگ سنگهي ويو آهي. نواز شريف پٽ جي ڪرپشن سبب ملڪ ڇڏي ويو آهي. ٻڌايو وڃي ته ڪمپنين ۽ پيسن بابت عوام کي حقيقت کان آگاهه ڪيو وڃي. لڪڻ نه گهرجي. هاڻ نواز شريف بچي نه سگهندو. هن چيو ته هڪ ڇوٽو سموري پنجاب کي لوڏي ڇڏيو آهي سنڌ پوليس خلاف ڳالهائيندڙ  پنجاب ۾ هڪ ڇوٽو آڏو بيوس بڻيل آهن. هن چيو ته پنجاب ۾ آپريشن ڪرڻ نه پيو ڏنو وڃي. لاهور جي سانحي ملڪ جي ڀتين کي لوڏي ڇڏيو آهي. ٽن ڏينهن تائين حڪومت سڪتي ۾ هئي. جنرل راحيل شريف پنجاب ۾ آپريشن شروع ڪرايو. ٽن ڏينهن تائين پنجاب حڪومت بيخبر هئي. مولا بخش چانڊيو چيو ته بيماري جو بهانو ڪري ٻاهرين ملڪ ويندڙ نواز شريف هڪ ڏينهن اسپتال ۾ داخل ٿيو، ٻئي ڏينهن تي شاپنگ پيو ڪري عوام کي بيوقوف نه بڻايو وڃي. پاناما ليڪس متعلق غير جانبدار تحقيقات ڪرائي وڃي. سٽنگ ججن کان فيصلا ڪرايا وڃن ٿا. رٽائرڊ جج ڪهڙو فيصلو ڏيندا. هن چيو ته رٽائرڊ ججن جو فيصلو قبول نه ڪيو ويندو. سپريم ڪورٽ جي چيف جسٽس کان جاچ ڪرائي وڃي. هن چيو ته بحران کي جيئن قوم چوي ٿي تئين حل ڪيو وڃي. هن چيو ته اسان جي ٻن وزير اعظمن کي عدالت گهرايو ۽ جيڪو فيصلو ڏنو قبول ڪيوسين، نواز شريف کي به عدالت ۾ وڃڻ گهرجي سنڌ سان تعلق  رکندڙ وزير اعظم ۽ پنجاب جي وزير اعظم خاص ڪري پنجاب جي مخصوص علائقن جي وزيرن لاءِ الڳ الڳ قانون جوڙيو ويو آهي. هن وڌيڪ چيو ته اسين جمهوريت جو تسلسل چاهيون ٿا. جمهوريت لاءِ ذوالفقار علي ڀٽو جيل ۽ ڦاهين جا ڦندا ڏٺا. مشرف آئين ٽوڙيو پر ان کي ٻاهر وڃڻ ڏنو ويو. سپريم ڪورٽ کي مداخلت ڪرڻ گهرجي. ملڪ جي وقار جو مسئلو آهي سمورن ادارن کي چوان ٿو انصاف جو بول بالا ڪن ۽ پي پي کي ڀت سان نه لڳايو وڃي. هن چيو ته بلاول ڀٽو سموري ملڪ جي تنظيم جي باڊي توڙي تاريخي ڪم ڪيو آهي. هاڻ ڪارڪنن کي ويلڪم ويلڪم بلاول ڀٽو جون ريليون ڪڍيون وڃن ۽ پروگرام ڪيا وڃن. تقريب کي پي پي اڳواڻن نذير ڀٽو، عديل اختر شيخ، ملير پريس ڪلب جي صدر طارق پٺاڻ ۽ ٻين پڻ خطاب ڪيو.ان کان اڳ صوبائي صلاحڪار مولابخش چانڊيو ملير پريس ڪلب ۾ شهيد بينظير ڀٽو آڊيٽوريم هال جو پيڙهه جو پٿر رکيو.

 

پاڪستان ۽ ماريشيس جو تعليم، صحت ۽ واپار جي شعبن ۾ لاڳاپا وڌائڻ تي اتفاق

اسلام آباد (اين اين آءِ) صدر ممنون حسين ۽ ماريشيس جي صدر ڊاڪٽر امينه فردوس وچ ۾ تعليم صحت ۽ واپار جي شعبن ۾ لاڳاپا وڌائڻ تي اتفاق ٿيو هي اتفاق صدر ممنون حسين ۽ ماريشس جي صدر ڊاڪٽر امينه فردوس وچ ۾ ايوان صدر ۾ ون آن ون ۽ وفد جي سطح تي ملاقات ۾ طئي ٿيو صدر چيو ته پاڪستان ماريشس سان ٻطرفو لاڳاپن کي خاص اهميت ڏي ٿو ۽ پاڪستان ۽ ماريشس جا خوشگوار پراڻا آهن هن چيو ته هاڻي انهن لاڳاپن کي وڌيڪ مضبوط ڪرڻ لاءِ معاشي ۽ تجارتي لاڳاپا وڌائڻ جي ضرورت آهي ٻنهي ملڪن وچ ۾ موجوده تجارتي هجم صلاحيت کان گهٽ ان ڏس ۾ بنهي ملڪن وچ ۾ فري ٽريڊ معاهدو ٿيڻ گهرجي ته جيئن ٻطرفو واپار وڌي سگهجي صدر ممنون حسين چيو ته فيڊريشن آف پاڪستان چيمبرز ۽ ماريشس چيمبر وچ ۾ اداراجاتي سطح تي لاڳاپا فائديمند آهن هن چيو ته پاڪستان ۽ ماريشس وچ ۾ سڌي طرح فضائي رابطا شروع ٿيڻ گهرجن ته جيئن واپار سياحت ۽ عوامي سطح تي رابطن کي وڌيڪ مضبوط ڪري سگهجي. صدر مهمان صدر جي اعزاز ۾ مانجهاندو ڏنو جنهن ۾ صدر آزاد ڪشمير سردار محمد يعقوب گورنر پنجاب رفيق رجوانا انوشا رحمان طارق فاطمي ۽ اعليٰ عملدارن شرڪت ڪئي مهمان صدر ڊاڪٽر آمنه فردوس تجويز ڏني ته ماريشس ۾ هفتو پاڪستان ملهائڻ گهرجي جنهن ۾ پاڪستاني ثقافت معاشرت ۽ شين جي نمائش ڪئي وڃي صدر مهمان صدر صدر ممنون حسين جو شاندار استقبال تي شڪريو ادا ڪيو ۽ کيس ماريشس جي دوري جي دعوت ڏني جيڪا صدر قبول ڪئي.

 

وزير اعظم ۽ ان جي خاندان تي الزام آهن، ڪميشن جو سربراهه سرڪاري ڌر مان نه هجڻ گھرجي: خورشيد شاهه

اسلام آباد(بيورو) مخالف ڌر پاناما ليڪس معاملي تي پارلياماني ڪميشن جوڙڻ جي گھر ڪندي ان جو سربراهه اپوزيشن مان کڻڻ جو مطالبو ڪري ڇڏيو آهي. سيد خورشيد شاهه چيو آهي ته وزير اعظم ۽ ان جي خاندان تي الزام آهن، ان ڪري ڪميشن جو سربراهه سرڪاري ڌر مان نه هجڻ گھرجي پر مخالف ڌر مان کنيو وڃي. پنهنجي بيان ۾ سيد خورشيد شاهه چيو ته  جسٽس سرمد جلال عثماني هڪ بهترين جج رهيو آهي پر ن ليگ سان لاڳاپيل آهي، ان جو نالو ڪميشن لاءِ قبول ناهي. هن چيو ته مخالف ڌر ڪنهن به حڪومتي شخصيت کي ڪميشن سربراهه طور قبول نه ڪندي. هن چيو ته  رضا رباني تڪراري ناهي ۽ موزون شخصيت آهي ان ڪري سندس نالو تجويز ڪيو.

 

 پ پ پاران نيب آرڊيننس ڪارو قانون قرار، آءِ ايس آءِ حڪومتون ڪيرائڻ ۾ ملوث ناهي: خواجه آصف

اسلام آباد(بيورو) سينيٽ واپڊا ملازمن کي بجلي مفت فراهم ڪرڻ وارو ٺهراءُ رد ڪري ڇڏيو آهي. ٺهراءَ  ايم ڪيوا يم جي طاهر مشهدي پيش ڪيو هو. سينيٽ جو اجلاس چيئرمين رضا رباني جي صدارت ۾ ٿيو. اجلاس ۾ نيب آرڊيننس تي بحث ڪرايو ويو. جڏهن ته واپڊا ملازمن کي مفت بجلي فراهمي جو ٺهراءُ پيش ڪيو ويو سو رد ٿي ويو. اجلاس ۾ ڳالهائيندي پاڻي ۽ بجلي واري وزير خواجه آصف چيو ته 2018ع تائين لوڊشيڊنگ ختم ٿي ويندي. هن چيو ته آءِ ايس آءِ حڪومت ڪيرائڻ ۾ ملوث ناهي. وزير اعظم نواز شريف هلندڙ هفتي جي آخر ۾ وطن واپس اچي ويندو. اجلاس ۾ نيب آرڊيننس تي بحث ڪندي پ پ سينيٽر فاروق ايڇ نائڪ نيب آرڊيننس کي ڪارو قانون قرار ڏئي ڇڏيو. هن چيو ته نيب آرڊيننس پرويز مشرف ٺاهيو هو. ان جو بنياد ڪيرايو ويو آهي پر اسٽرڪچر اڃا باقي آهي. هن چيو ته ايمرجنسي تحت آرڊينس ٺهيو، سا ختم ٿي وئي پر آرڊيننس اڃا موجود آهي. نيب چيئرمين وٽ اڻ کٽ اختيار آهن. جن جو غلط استعمال ڪيو ويندو آهي. فاروق ايڇ نائڪ وڌيڪ چيو ته نيب آرڊيننس هڪ ڪارو قانون آهي، اسان جي حڪومت ۽ هاڻوڪي حڪومت به هن ڪاري قانون کي تبدي ڪرڻ ۾ ناڪام ٿي ويون. ڪجھه قوتون هن آرڊيننس ۾ ترميم يا ان کي ختم ڪرڻ نٿيون ڏين. ان موقعي تي حڪومتي سينيٽرن نيب آرڊيننس جو بچاءُ ڪيو. قانون واري وزير زاهد حامد چيو ته نيب هن وقت تائين 275ارب رپيا اوڳاڙيا آهن. هيل تائين 6 هزار انڪوائرين مان 91 سيڪڙو اڪلائي ڇڏيون آهن. بحث سهڙيندي قانون واري وزير زاهد حامد چيو ته پلي بارگين ذريعي 11 ارب رپيا واپس ڪرايا ويا. رضاڪاراڻي طور واپس ڪيل رقم 21 ارب رپيا آهن. بينڪ ڊيفالٽرن 122 ارب رپيا جمع ڪرايا. هن چيو ته نيب گذريل ٻن سالن ۾ قانون ۽ ضابطي ۾ سڌارا ڪيا آهن. هاڻي هڪ آفيسر بدران سڄي ٽيم جاچ ڪندي آهي. هن چيو ته 2 مهينن ۾ درخواست تي ڪيس جي تياري مڪمل ڪئيويندي آهي، چئن مهينن ۾ انڪوائري ۽ ايندڙ چئن مهينن ۾ جاچ مڪمل ٿي ويندي آهي. هن چيو ته نيب قانون جوڙي ڇڏيو آهي، ڪنهن به ڪيس جو 10 مهينن ۾ ريفرنس تيار ڪيو ويندو آهي. هن چيو ته فاروق ايڇ نائڪ نيب قانون ۾ بهتري لاءِ سٺيون تجويزون ڏنيون آهن. ان سان اتفاق ڪيون ٿا.

 

ڪراچي ۾ بدامني جي واقعن ۾ غير قانوني طور رهندڙ پرڏيهي رهواسي به ملوث آهن: رينجرز ترجمان

ڪراچي (اين اين آءِ) پاڪستان رينجرز سنڌ چيو آهي ته ڪراچي ۾ بدامني جي واقعن ۾ غير قانوني طور تي رهندڙ پرڏيهي رهواسي به ملوث آهن ترجمان رينجرز پاران جاري ڪيل پڌرنامي مطابق رينجرز ڪراچي ۾ بدامني ۾ ملوث پرڏيهي رهواسين جي خلاف ڪارروائي شروع ڪري ڇڏي آهي هن چيو ته رينجرز اهڙن امن دشمنن کي چٿڻ شروع ڪري ڇڏيو آهي رينجرز عوام کي گذارش ڪئي ته اهو پنهنجي ڀرپاسي ۾ غير قانوني طور رهندڙ پرڏيهي رهواسين جو اطلاع ويجهي رينجرز پوسٽ، رينجرز هيلپ لائين 1101 تي ڏي.

 

قوم جا اربين رپيا ڦر ڪندڙن کي به عدالتن ۾ آندو وڃي: قادر پٽيل

ڪراچي (اسٽاف رپورٽر) عبدالقادر پٽيل چيو آهي ته پارٽي ۾ سندس ڪو به عهدو نه آهي، کيس هٽايو ويو هو.  عدالت ۾ پيش ٿي هن محب وطني جو مثال قائم ڪيو آهي.ڪراچي جي دهشتگردي ٽوڙ عدالت ۾ پيش ٿيڻ بعد ميڊيا سان ڳالهائيندي عبدالقادر پٽيل چيو ته ماڻهو پڇي رهيا آهن ته پانامه ليڪس وارن کان به پڇاڻو ڪيو ويندو؟هن چيو ته قوم جا اربين رپيا ڦر ڪندڙن کي به عدالتن ۾ آندو وڃي.عبدالقادر پٽيل چيو ته هو ست سمنڊ پار کان واپس آيو آهي، جاچ ۾ به مڪمل سهڪار ڪري پيو.سندس چوڻ هو ته کيس رينجرز گهرايو، اتي به ويو، هو عدالت ۾ به پيش ٿيو آهي.عبدالقادر پٽيل چيو ته پاڪستان واپس اچي هن محب وطن شهري هجڻ جو ثبوت ڏنو، پاڻ کان ٿيل جاچ بابت هو ڪجهه به نه ٿو ٻڌائي سگهي.

 

عمران فاروق قتل ڪيس: محسن علي مک جوابدار، معظم علي ۽ خالد شميم سهولتڪار آهن، عبوري چالان عدالت ۾ پيش

اسلام آباد (اين اين آءِ) وفاقي جاچ اداري ايف آءِ اي ايم ڪيو ايم جي سينيئر اڳواڻ ڊاڪٽر عمران فاروق جي قتل جي ڪيس ۾ هڪ دفعو ٻيهر عبوري چالان لاڳاپيل عدالت ۾ پيش ڪري ڇڏيو آهي جنهن موجب محسن علي کي مک جوابدار معظم علي ۽ خالد شميم کي سهولتڪار قرار ڏنو ويو آهي جڏهن ته اسلام آباد جي دهشتگردي ٽوڙ عدالت عمران فاروق جي قتل جي ڪيس ۾ هڪ دفعو ٻيهر عبوري چالان لاڳاپيل عدالت ۾ پيش ڪري ڇڏيو. جنهن مطابق محسن علي کي مک جوابدار جڏهن ته معظم علي ۽ خالد شميم کي سهولتڪار قرار ڏنو ويو آهي جوبدار هن ڪيس ۾ لاڳاپيل عدالت ۾ ضمانت جي درخواست داخل ڪئي هئي جنهن ۾ موقف اختيار ڪيو ويو هو ته ان جي موڪل کي فقط شڪ جي بنياد تي هن ڪيس ۾ گرفتار ڪيو ويو آهي ان جو ان سان ڪوئي تعلق نه آهي ايم ڪيو ايم جي اڳواڻ ڊاڪٽر عمران فاروق جي قتل جي ڪيس جي جاچ ٽيم ۾ شامل هڪ اهلڪار مطابق جوابدار معظم علي ڪارگو سروس ۾ ڪليئرنگ ڪمپني جو مالڪ هو جنهن پنهنجي ڪمپني جي نالي تي ٻين ٻن جوابدارن محسن علي ۽ ڪاشف جا ويزا لڳايا هئا عدالت ۾ پيش ڪيل عبوري چالان ۾ گرفتار ٽنهي جوابدارن جا اقبالي بيان شامل آهن جنهن ۾ ايف آءِ اي جي اهلڪار مطابق جوابدار ان ڏوهه جو اعتراف به ڪيو آهي ايف آءِ اي اهلڪار مطابق جوابدار خالد شميم ڪراچي واٽر بورڊ ۾ سرماري ملازم آهي ۽ کيس مبينه طور تي اها ذميواري ڏني ويئي هئي ته جيئن ئي محسن علي ۽ ڪاشف خان لنڊن کان ڪراچي اچن ته کين ايئرپورٽ تي ئي ماريو وڃي جڏهن ته پاڪستان جي ڳجهن ادارن اها سازش ناڪام بڻائي ڇڏي محسن علي ۽ ڪاشف تي الزام آهي ته انهن لنڊن وڃي ڊاڪٽر عمران فاروق کي قتل ڪيو هو عمران فاروق 16 سيپتمبر 2010 تي لنڊن ۾ پنهنجي گهر ٻاهران هڪ قاتلاڻي حملي ۾ مارجي ويو هو.

 

حڪمران منهنجي خلاف احتجاج ڪرائي بليڪ ميل ڪري رهيا آهن پر ڊڄڻ وارو ناهيان: عمران خان

لنڊن (م.ڊ)  پاڪستان تحريڪ انصاف جي سربراهه عمران خان چيو آهي ته حڪمرانن کي موقعو ڏيون ٿا ته پاناما ليڪس تي عدالتي ڪميشن ٺاهي. ادارا مضبوط ٿي ويا ته ملڪ ترقي ڪندو. برمنگھم ۾ جلسي کي خطاب ڪندي عمران خان چيو ته وزير اعظم نواز شريف جواب ڏيڻ بدران شوڪت خانم کي نشانو بڻائي رهيو آهي. جن قومن وٽ نظريو ناهي هو

ندو اهي تباهه ٿي وينديون آهن. هن چيو ته عدل ۽ انصاف جي ڪري مسمانن ست سئو سال حڪومت ڪئي. برطانيا جي سالياني جي ڊي پي 50 مسلمان ملڪ جي برابر آهي. هن حضرت عمر جو مثال ڏيندي چيو ته حضرت عمر کان ڪپڙي جي باري ۾ پڇيو ويو ته ڪٿان آيو آهي ته هُن جواب ۾ اهو نه چيو هو ته تون ٻڌاءِ تو ڪٿان آندو. هُن ان ڳالهه جو صحيح جواب ڏنو . حڪمرانن پاناما ليڪس جو جواب ڏيڻ بدران شوڪت خانم کي نشانو بڻائي ڇڏيو. عمران خان وڌيڪ چيو ته اسان ادارا مضبوط ڪري ڇڏيا ته ملڪ کي ترقي کان ڪير نٿو رڪي سگھي. جمهوريت ۾ حڪمران جوبده هوندا آهن. جج انهن حڪمرانن جو انصاف ڪندو. حڪمرانن کي موقعو ڏيون ٿا ته چيف جسٽس جي سربراهي ۾ ڪميشن ٺاهي. هن چيو ته حڪمرانن منهنجي خلاف احتجاج ڪرايو، گو عمران گو جا نعرا هڻايا، ڇا آئون وزير اعظم آهيان جو اهي نعرا هڻايا ويا. هن چيو ته مونکي بليڪ ميل ڪيو پيو وڃي پر مان ڊڄڻ وارو ناهيان.