تازيون خبرون

Daily Archives: April 15, 2016

سمجهه ۾ نه ٿو اچي ته مون تي الزام ڪهڙا آهن؟ صبر جو ناجائز فائدو نه ورتو وڃي: نواز شريف

لنڊن(م.ڊ)  وزيراعظم نواز شريف چيو آهي ته اسان 2014ع ۾ ڌرڻي وارو تماشو وڏي دل سان برداشت ڪيو، تنهن ڪري هاڻ حڪومت جي صبر جو ناجائز فائدو نه ورتو وڃي، لنڊن پهچڻ تي ميڊيا سان ڳالهائيندي وزيراعظم چيو ته مان چيڪ اپ لاءِ لنڊن آيو آهيان، جڏهن ته پاناماليڪس بابت مون قوم کي خطاب ۾ پنهنجي خيالن جو اظهار ڪيو هو، چوڌري نثار به حڪومت جو موقف سٺي نموني بيان ڪري ڇڏيو آهي، هن چيو ته مونکي سمجهه ۾ نه ٿو اچي ته مون تي ڪهڙا الزام آهن ۽ قانون جي ڪهڙي ڀڃڪڙي ٿي آهي؟ اهڙو ڪوبه ڪم ناهي ٿيو، اسان قوم جي خدمت محنت ۽ ايمانداري سان ڪري رهيا آهيون ۽ چاهيون ٿا ته ترقي جي رفتار تيز ڪئي وڃي،سندس چوڻ هو ته چيڪ اپ کانپوءِ ٻيڻي رفتار سان ڪم ڪري پاڪستان جا مسئلا حل ڪنداسين، وزيراعظم چيو ته هڪ صاحب هر گهڙي موقعي جي ڳولا ۾ رهي ٿو ۽ ملڪي ترقي ۾ هٿ ونڊائڻ بدران حڪومت کي ڪنهن نه ڪنهن طريقي سان پريشان ڪرڻ جي ڪوشش ڪندو رهي ٿو، هن چيو ته 2014ع واري ڌرڻي ۾ به سڀني ڏٺو ته ان شخص پاڪستان جي ترقي جو رستو روڪڻ جي ڪوشش ڪئي پر اسان جمهوري روايتن کي اڳتي وڌائڻ لاءِ صبر ۽ تحمل سان سڀ ڪجهه برداشت ڪيو، وزيراعظم چيو ته هڪ صاحب پنهنجي مقصد ۾ پهرين به ڪامياب نه ٿيو ۽ هاڻ پنهنجي ارادن ۾ ڪامياب نه ٿي سگهندو، سندس چوڻ هو ته اسان مخالف ڌر ۾ رهندي ڪڏهن به اسعيفائن يا حڪومت ڊاهڻ جي سياست نه ڪئي، مان خورشيد شاهه کي ياد ڏيارڻ ٿو چاهيان ته مان کيس چيو هو ته جيڪڏهن پيپلز پارٽي جي حڪومت ڪارڪردگي ڏيکاريندي ته مان پاڻ ان کي سپورٽ ڪندس، ملڪ کي اڳتي وٺي وڃڻ لاءِ اسان کي گڏجي هلڻٻو پوندو ۽ اجائي وڳوڙ پکيڙيندڙن کي به اها ڳالهه جلد سمجهه ۾ اچي ويندي، وزيراعظم نواز شريف چيو ته پيپلز پارٽي جي رائيونڊ ڌرڻي ۾ شامل نه ٿيڻ واري فيصلي جو قدر ڪيان ٿو ۽ جيڪڏهن اهو ئي رويو رهيو ته پاڪستان جي ترقي جو رستو روڪڻ ڏکيو ٿي ويندو، هڪ ماڻهو اهڙيون حرڪتون ڪري پاڻ کي اڪيلو ڪري رهيو آهي،نواز شريف چيو ته آصف زرداري سان سندن سٺو تعلق رهيو آهي پر اڄ ان تعلق جي نه ياد ٿي اچي ۽ نه ئي اسان کي ان جي ضرورت آهي.

 

نواز شريف تي جڏهن ڏکيو وقت ايندو آهي ته پ پ قيادت کي منٿون ڪندو آهي: وڏو وزير

سيوهڻ (رپورٽر) ڀان سيدآباد ويجهو ڳوٺ سيد مراد علي شاهه واهڙ ۾ سنڌ جي اڳوڻي وڏي وزير سيد عبدالله شاهه مرحوم جي سالياني نائين ورسي تقريب منعقد ڪئي وئي، ان موقعي تي خطاب ڪندي وڏي وزير سيد قائم علي شاهه چيو ته سيد عبدالله شاهه هڪ بهترين ايڊمنسٽريٽر ۽ نهايت ئي محبتي ماڻهو هو، جيڪو هر ماڻهو غريب توڙي امير کي هڪ نظر سان ڏسندو هو. هن سندس نائين ورسي جي موقعي تي کيس خراج تحسين پيش ڪندي چيو ته سيد عبدالله شاهه هڪ جرئت مند وزير اعليٰ هو ۽ سنڌ ليول تي ڪوبه معاملو ٿيندو هو ته ان کي همت ۽ حوصلي سان حل ڪندو هو. هن چيو ته سنڌ ۾ اهڙو ضلعو ۽ تعلقو نه هو جتي هو نه ويو هجي ۽ اتي وڃي ماڻهن جا برابري جي بنياد مسئلا ٻڌي حل ڪندو هو. هن چيو ته سيد عبدالله شاهه شهيد ذوالفقار علي ڀٽو جي نقش قدم تي هلي ڪم ڪيو، جنهن ڪري مان سندس عظمت کي سلام پيش ڪيان ٿو. سيد قائم علي شاهه وڌيڪ چيو ته پاناما ليڪس معاملي جي شفاف جاچ ٿيڻ گهرجي ۽ چيو ته نواز شريف تي جڏهن ڏکيو ايندو آهي ته پ پ قيادت کي منٿون ڪندو آهي، جڏهن ته آصف علي زرداري جمهوريت کي زنده رکيو آهي. هن چيو ته بارداڻي جي منصافانه ورهاست ٿي رهي آهي ۽ سنڌ ۾ ڪٿي ڪٿي بارداڻي جون شڪايتون آهن جيڪي جلد حل ٿي وينديون. ورسي تقريب کي آجياڻو خطاب ڪندي سنڌ جي ناڻي ۽ آبپاشي واري سينيئر صوبائي وزير سيد مراد علي شاهه چيو ته سندس والد سيد عبدالله شاهه سنڌ جي عوام جي جنهن نموني خدمت ڪئي ان جو مثال ڪٿي به نه ٿو ملي ۽ مان سندس نائين ورسي تي آيل سمورن مهمانن ۽ هزارين جي تعداد ۾ آيل مهمانن کي ڀليڪار ڪيان ٿو. صوبائي وزير صحت ڄام مهتاب حسين ڏهر ڳالهائيندي چيو ته عبدالله شاهه وڏ وزارت جي دور ۾ سنڌ مان دهشتگردي جو خاتمو آندو، پاڻ هڪ معتبر شخصيت جو مالڪ هو ۽ سنڌ دوست انسان هو. هن چيو ته پ پ هميشه سنڌ جي وحدانيت خلاف ٿيندڙ سازشن کي ناڪام بڻايو آهي. هن چيو ته پ پ پ چئرمين بلاول ڀٽو بهادر ليڊر آهي اهو پنهنجي امڙ شهيد راڻي جي مشن تي هلندي ورڪرن جي سار لهندو. تعليم واري سينيئر صوبائي وزير نثار احمد کهڙو چيو ته سيد عبدالله شاهه ڏکين حالتن ۾ وزير اعليٰ رهيو ۽ هڪ دٻ دٻي وارو شخص هو، اڄ ماڻهن کان پنهنجا وسري ويا آهن پر سيد عبدالله شاهه لاءِ اڄ به اکيون آليون آهن. ايم پي اي غلام قادر چانڊيو ڳالهائيندي چيو ته سيد مراد علي شاهه کي واڌايون پيش ڪيان ٿو، جيڪو هر سال وانگر پنهنجي والد مرحوم سيد عبدالله شاهه جي ياد ۾ جلسو منعقد ڪري ٿو. هن چيو ته سيد عبدالله شاهه 3 سالن جي دور حڪومت ۾ بهترين ڪم ڪيو جيڪو ڪم 5 سالن کان به وڌيڪ هو ۽ سيد عبدالله شاهه سنڌ ۽ ملڪ لاءِ جيترو ڪم ڪيو جنهن تي کيس قوم ياد ڪري رهي آهي. هن چيو ته سنڌ ۽ پ پ خلاف هميشه سازشون ٿينديون رهن ٿيون جيڪي اسان ناڪام بڻايون آهن ۽ چيو ته 2018ع پ پ جي حاڪميت جو سال آهي. ايم پي اي ڊاڪٽر سڪندر شورو خطاب ڪندي چيو ته ضلعي ڄامشوري جو عوام خوشنصيب آهي جنهن کي سيد عبدالله شاهه جهڙو بهادر ليڊر مليو، سيد عبدالله شاهه هڪ تاريخ آهي ۽ پاڻ هر وقت پ پ جو ساٿ ڏنو. هن چيو ته سيد عبدالله شاهه هڪ اصولي سياستدان هو جنهن سنڌ جي ترقي ۽ خوشحالي لاءِ ڀرپور جدوجهد ڪئي ۽ عبدالله شاهه هڪ شخص جو نالو نه پر هڪ اداري جو نالو آهي. ان موقعي تي ورسي تقريبن ۾ صوبائي گهرو وزير سهيل انور سيال، صوبائي وزير بلديات ڄام خان شورو، ايم پي اي فياض ٻٽ، امداد پتافي، پير مجيب الحق، صوبائي وزير ايڪسائيز گيانچند ايسراڻي، ايم اين اي عمران ظفر لغاري، صوبائي وزير خوراڪ ناصر شاهه، علي محمد ولهاري،ايم پي اي سيد سردار شاهه، ايم پي اي فقير داد کوسو، ايم پي اي ڊاڪٽر سهراب سرڪي، رئيس امان الله شاهاڻي، سيد حاجن شاهه، اڳوڻو ايم پي اي سيد آصف علي شاهه، سردار سڪندر علي راهپوٽو،ڪمشنر حيدرآباد قاضي شاهد پرويز، ڪمشنر ڪراچي سيد آصف حيدرشاهه، ڊي سي ڄامشورو منور علي مهيسر، محمد صالح شمن راهپوٽو، راجا غلام سرور راهپوٽو، پير شفيق احمد ويهڙائي سميت هزارين ماڻهن شرڪت ڪئي. جڏهن ته ورسي تقريب جي شروعات کان اڳ صوبائي وزير سيد مراد علي شاهه پنهنجي والد سيد عبدالله شاهه جي مزار تي حاضري ڀري گلن جي چادر چاڙهي فاتح خواني ڪئي.

 

پ پ جا سمورا اڳواڻ عذير بلوچ کان مدد وٺندا هئا: عبدالقادر پٽيل جو رينجرز اڳيان اعتراف

ڪراچي (اين اين آءِ) رينجرز پ پ جي اڳواڻ عبدالقادر پٽيل کي 5 ڪلاڪ پڇا ڳاڇا کانپوءِ رينجرز هيڊ ڪوارٽر کان ميٺا رام سيل منتقل ڪري ڇڏيو آهي، عبدالقادر پٽيل کي 90 ڏينهن لاءِ ريمانڊ ۾ رکڻ جو امڪان آهي، ذريعن مطابق رينجرز جي گهرائڻ تي خميس تي پ پ جو اڳواڻ عبدالقادر پٽيل رينجرز هيڊ ڪوارٽر پهتو، قادر پٽيل کي عذير بلوچ اڳيان ويهاري جاچ ڪئي وئي، عذير بلوچ کي ڏسي قادر پٽيل ڪنڌ هيٺ ڪيو، جاچ ڪندڙ جاچ دوران سوال ڪيا ته ان جي اوچتو طبيعت خراب ٿي وئي ۽ هو مٿي ۾ سور ۽ بلٽ پريشر جي دانهن ڪندو رهيو، جاچ ڪندڙن جي سوالن جي دوران هو مسلسل پاڻي پيئندو رهيو جنهن کانپوءِ جاچ روڪڻي پئي، عبدالقادر پٽيل رينجرز کي بيان ڏيندي چيو آهي ته پ پ جا سمورا اڳواڻ عذير بلوڇ کان مدد وٺندا هئا، رينجرز سوال ڪيو ته عذير بلوچ کي ڪڏهن کان ۽ ڪيئن سڃاڻو ٿا، قادر پٽيل چيو ته عذير بلوچ سان ويجها لاڳاپا آهن، جاچ آفيسر چيو ته عذير بلوچ قتل، اغوا ۾ اوهان جو ۽ پ پ اڳواڻن جو نالو ورتو آهي، ڇا اوهان ان کي ملڪ مان ڀڄائڻ ۾ مدد ڪئي جنهن تي قادر پٽيل چيو ته عذير بلوچ ايراني پاسپورٽ تي ملڪ مان ڪيئن فرار ٿيو ان جي خبر ناهي، رينجرز پڇا ڪئي ته خالد شهنشا ۽ ٻين جي قتل ۾ ڪير ملوث آهي جنهن تي هن چيو ته ذوالفقار مرزا سمورا معاملا ڏسندو هو، منهنجا عذير بلوچ سان ويجها لاڳاپا آهن پر خالد شهنشا جي قتل جي خبر ناهي، عبدالقادر پٽيل کان جاچ دوران انڪشاف ٿيو ته پي آءِ اي جي ملازم ۽ پيپلز يوٿ جي صدر عامر کي سهيل ڏاڏا گروپ گلستان جوهر ۾ قتل ڪيو هو، رينجرز سوال ڪيو ته هاڪس بي ۽ بلديا ٽائون ۾ چائنا ڪٽينگ ۾ ڪير ڪير ملوث آهي، قادر پٽيل کان ڪي پي ٽي جي سرڪاري زمين وڪرو ڪرڻ بابت به سوال ڪيا ويا، قادر پٽيل ٻڌايو ته سمورا معاملا ڊفينس فيز 8 جي بنگلي ۾ طئه ٿيندا هئا، اتي ڪجهه سياسي اڳواڻن سميت گينگ وار جا اڳواڻ به هوندا هئا، رينجرز ان کان پڇا ڪئي ته عذير بلوچ ۽ ٻيا جوابدار شهر ۾ چرپر لاءِ اوهان جي گاڏي استعمال ڪندا هئا، جنهن تي قادر پٽيل چيو ته مون کي ڪا خبر ناهي، مون ڪڏهن ائين ناهي ڪيو، قادر پٽيل کان سوال ڪيو ويو ته عذير بلوچ جي چوڻ تي ڪهڙن ڪهڙن پوليس آفيسرن کي مقرر ڪرايو ۽ اهي پوليس آفيسر ڪهڙا آهن جيڪي گينگ وار کان پيسا وٺن ٿا، جنهن تي هن چيو ته مون کي ڪنهن پوليس آفيسر مقرر نه ڪرايو، ان وقت جو گهرو وزير سمورا معاملا ڏسندو هو ۽ اهڙي ڪنهن آفيسر کي نٿو سڃاڻا جيڪو گينگ وار کان پيسا وٺندو هجي. جاچ آفيسرن مني لانڊرنگ بابت پڇا ڪئي ته ڪروڙين رپيا اوهان جي مائٽن جي اڪائونٽ ۾ لنڊن منتقل ڪيا ويا جنهن تي هن مٿي ۾ سور ۽ بلڊ پريشر جي دانهن ڪئي، ان موقعي تي رينجرز جو هڪ ڊاڪٽر به موجود هو، قادر پٽيل جي طبيعت وڌيڪ خراب ٿيڻ تي وڌيڪ جاچ روڪڻي پئي.

 

لڳي ٿو ته مڪاني چونڊن ۾ مرضي جا نتيجا نه اچڻ تي قانون تبديل ڪيو ويو: چيف جسٽس

اسلام آباد (اين اين آءِ) سپريم ڪورٽ سنڌ ۾ ميئر ۽ ڊپٽي ميئرز جي چونڊ بابت پاڪستان پيپلزپارٽي ۽ سنڌ حڪومت جي درخواستن تي فيصلو محفوظ ڪري ورتو خميس تي چيف جسٽس انور ظهير جمالي جي سربراهي ۾ ٽه رڪني بئنچ درخواستن جي ٻڌڻي ڪئي فاروق ايڇ نائڪ عدالت کي ٻڌايو ته مخصوص سيٽون پارٽي لست جي بنياد تي مڪمل ڪرڻ لاءِ پ پ پ ۽ ايم ڪيو ايم جو اتفاق ٿيو پارٽي لسٽ تي چونڊن لاءِ سنڌ لوڪل گورنمنيٽ ايڪٽ جو سيڪشن 18 بحال ڪرڻو پوندو فاروق ايڇ نائب چيو ته هاڻي صرف ميئر، ڊپٽي ميئرز، چيئرمين ۽ ڊپٽي چيئرمين جي چونڊن جو معاملو باقي آهي ان موقعي تي چيف جسٽس انور ظهير جمالي چيو ته ايئن لڳي ٿو ته مقاني چونڊن ۾ مرضي جا نتيجا نه اچڻ تي قانون تبديل ڪيو ويو ڇا حڪومت چونڊن جو مرحولو شروع ٿيڻ کان پوءِ قانون ۾ ترميم ڪري سگهي ٿي. فاروق ايڇ نائڪ چيو ته سنڌ هاءِ ڪورٽ جو جيڪڏهن فيصلو رد ڪيو وڃي ته ڪنهن سان زيادتي نه ٿيندي اڃا ميئر ۽ ڊپٽي ميئر جي چونڊن جو شيڊول جاري ناهي ٿيو شو آف هينڊ چونڊن سان هارس ٽريڊنگ ختم ٿيندي ڳجهي راءِ شماري سان هال سينيت جون چونڊن جهڙو ٿيندو چيف جسٽس چيو ته ايم ڪيو ايم ۽ مسلم ليگ فنڪشنل کي اعتراض هو تڏهن ئي هو عدالت آيا فيصلو محفوظ ڪندي چيف جسٽس چيو ته سپريم ڪورٽ 15 اپريل تي هن معاملي تي مختصر فيصلو جاري ڪندي.

 

انتهاپسندي وڏو خطرو آهي ان کي منهن ڏيڻ لاءِ گڏيل حڪمت عملي جي ضرورت آهي: ممنون حسين/احمر دائود

استمبول (اين اين آءِ) صدر ممنون حسين ۽ ترڪ وزيراعظم احمر دائود اولو ٻنهي ملڪن وچ ۾ دفاع معيشت توانائي انفرااسٽريڪچر سائنس ۽ ٽيڪنالوجي سميت ڪيترن ئي شعبن ۾ تعاون تي اعتماد ٿي آهي ٻنهي ملڪن وچ ۾ اعتماد اسلامي تعاون تنظيم جي پهرين اجلاس جي موقعي تي سائيڊ لائين ملاقات ۾ سامهون آيو ٻنهي اڳواڻن ان عزم جو ذاتي اظهار ڪيو ته انتهاپسندي وڏو خطرو آهي جنهن کي منهن ڏيڻ لاءِ گڏيل حڪمت عملي جي ضرورت آهي ان ڏس ۾ اسلامي ملڪن کي ڳالهين جي ذريعي پنهنجا اختلاف ختم ڪرڻ گهرجن ٻنهي اڳواڻن چيو ته پاڪستان ۽ ترڪي نهايت پرجوش برادراڻا لاڳاپا آهن جيڪي ٻين قومن لاءِ مثالي حيثيت رکن ٿا جيڪي اڃا وڌيڪ وڌايا ويندا هن چيو ته عالمي علائقائي معاملن ۾ ٻنهي ملڪن وچ ۾ مڪمل اتفاق راءِ آهي ۽ اهي بين الاقوامي فورمن تي هڪ ٻئي سان ڀرپور تعاون ڪن ٿا صدر او آءِ سي ڪشمير رابطا گروپ ۾ فعال ڪردار تي ترڪي جو شڪريو ادا ڪيو.

 

وزير اعظم جا صلاحڪار ماضي جيان کيس نه ڇڏيندا، پ پ بيڪ ڊور ڊپلوميسي جو حصو نه ٿيندي: مولابخش چانڊيو

ڪراچي (اين اين آءِ) مولابخش چانڊيو خميس جي صبح لنڊن مان ڪراچي پهچي ويو آهي مولابخش چانڊيو جي لنڊن ۾ پاڪستان پيپلزپارٽي پارليمينٽرين جي صدر آصف زرداري سان ملاقات ٿي آهي وطن واپسي کان پوءِ جاري هڪ پڌرنامي ۾ موالابخش چانڊيو چيو ته آصف زرداري سان ملاقات ۾ پارٽي جا تنظيمي معاملا انفارميشن کاتي جي ڪارڪردگي ۽ گڏيل دلچسپي جي ٻين معاملن تي خيالن جي ڏي وٺ ڪئي ويئي آهي هن چيو ته ڪرپشن جي معاملي تي بيڪ ڊور ڊپلوميسي ڇو ٿيندي پ پ پ ڪرپشن تي ڪنهن بيڪ ڊور ڊپلوميسي جو حصو نه بڻجندي هن چيو ته وزيراعظم جا صلاحڪار ماضي وانگر کيس نه ڇڏيندا وفاقي حڪومت پنهنجي غلطين جي ڪري پريشان آهي. اسان جا ٻه وزيراعظم وزارت وڃي سگهن ٿا ته ميان صاحب ڇو نٿو وڃي سگهي.

 

آرمي چيف آپريشن ضرب عضب ۾ بهادري جو مظاهرو ڪندڙ آفيسرن ۽ جوانن کي ايوارڊن سان نوازي ڇڏيو

اسلام آباد(اي پي پي) چيف آف آرمي اسٽاف جنرل راحيل شريف خميس ڏينهن دهشتگردن خلاف جاري آپريشن ضرب عضب ۾ بهادري ۽ دليري جو مظاهرو ڪندڙ فوجي آفيسرن ۽ جوانن ۾ گيلنٽري ايوارڊ ورهايا. ان ڏس ۾ جي ايڇ ڪيو ۾ هڪ پروقار تقريب ٿي جنهن ۾ آرمي چيف ضرب عضب جي شهيدن جي وارثن ۽ غازين کي مختلف ايوارڊن سان نوازيو ويو. 35 آفيسرن ۽ جوانن کي تمغه بسالت ۽ 35 آفيسرن ۽ جوانن کي ستاره امتياز (ملٽري) جي اعزازن سان نوازيو ويو. 5 آفيسرن ۽ جوانن کي گڏيل قومن جو ميڊل ڏنو ويو. شهيدن آفيسرن ۽ جوانن جا ميڊل ۽ ايوارڊ سندن خاندان جي ڀاتين وصول ڪيا. آرمي چيف ان موقعي تي شهيدن جي وارثن سان ڪجهه وقت گذاريو ۽ ساڻن خيالن جي ڏي وٺ ڪئي.

 

اپوزيشن جماعتن جو وڏو اتحاد ٺهندو، پ پ ۽ پي ٽي آءِ هڪ ٻئي جي ويجهو اينديون: اعتزاز احسن

اسلام آباد (اين اين آءِ) سينيٽ ۾ مخالف ڌر اڳواڻ اعتزاز احسن چيو آهي ته ايندڙ سياست ۾ سياسي منظر مختلف هوندو، اپوزيشن جماعتن جو وڏو اتحاد ٺهندو، پ پ ۽ پي ٽي آءِ هڪ ٻئي جي ويجهو اينديون، پنهنجي چيمبر ۾ صحافي سان ڳالهائيندي هن چيو ته ن ليگ جي ڪري ميثاق جمهوريت ختم ٿيو، هي پنهنجي پاليسين سبب اڪيلي ٿي وئي آهي، ن ليگ لاءِ صورتحال وڌيڪ سخت ٿيندي، مخالف پارٽين جو مختلف معاملن تي موقف هڪ ئي آهي، هن چيو ته پاناما ليڪس تي ٻين اپوزيشن پارٽين سان مشاورت جلد مڪمل ڪئي ويندي، پهرين ڏينهن کان موقف آهي ته پاناما ليڪس معاملي جو انٽر نيشنل فرم کان آڊٽ ڪرايو وڃي، هن چيو ته وزيراعظم ملاقات جي خواهش ڏيکاري هئي، آصف زرداري سان منهنجي ڳالهه ٻولهه ٿي هئي ۽ مون کيس چيو ته وزيراعظم سان ملاقات نه ڪريو، آصف زرداري واضح ڪيو آهي ته هو وزيراعظم سان ملاقات نه ڪندو.

 

20 سالن کان حڪمرانن جي احتساب لاءِ ڪوشان آهيان، لڳي ٿو ته الله تعاليٰ کي پاڪستاني قوم تي رحم اچي ويو آهي: عمران خان

لاهور (اين اين آءِ) پي ٽي آءِ جي چيئرمين عمران خان چيو آهي ته 20 سالن کان ڪوشش ڪري رهيو آهيان ته حڪمرانن جو احتساب ٿئي ۽ لڳي ٿو ته الله تعاليٰ کي پاڪستاني قوم تي ترس اچي ويو آهي لنڊن دوري ۾ آڊٽ جي حوالي سان تجربو رکندڙ انٽرنيشنل فرمن سان ملاقاتون به طئي آهن خبر پئي آهي ته چوڌري نثار به ساڳئي اڏام ۾ لنڊن روانو ٿي رهيو آهي جيڪڏهن نوازشريف بيمار آهي ته دعا آهي ته الله تعاليٰ کيس تڪليف ختم ڪري ۽ صحت عطا ڪري اهڙنخ يالن جو اظهار هن لاهور کان لنڊن روانگي کان اڳ ميڊيا سان ڳالهه ٻولهه ڪندي ڪيو عمران خان چيو ته ان سان گڏ جهانگير خان ترين ۽ عبدالحليم خان به لنڊن روانا ٿي رهيا آهن جتي آبشور ڪمپنين جي آڊٽ جي حوالي سان تجربو رکندڙ انٽرنيشنل فرمن سان ملاقاتون رٿيل آهن هن چوڌري نثار بابت ساڳي اڏام ۾ روانو ٿيڻ بابت سوال جي جواب ۾ چيو ته مون کي ميڊيا ٻڌايو آهي پر هو ڇو وڃي رهيو آهي مون کي ان جي ڪا خبر نه آهي جيتري قدر نوازشريف جي لنڊن روانو ٿيڻ جو سوال آهي ته مان ڪنهن شڪ جو اظهار نه ڪندس جيڪڏهن هو بيمار آهي ته الله تعاليٰ کيس صحتياب ڪري هن چيو ته پانامه ليڪس جي آڏو اچڻ کان پوءِ سڄي دنيا ۾ جاچ ٿي رهي آهي جمهوريت ۾ حڪمران جوابدار هوندا آهن دنيا ۾ ڪٿي ايئن ناهي ٿيندو ته اپوزيشن کي چيو وڃي ته عوام به ايئن ئي آهيو پر پنهنجي مٿان لڳل الزامن جو جواب ڏنو وڃي ٿو هن چيو ته مان پاڪستان جو شاندار مستقبل ڏسي رهيو آهيان 20 سالن کان ڪوشش ڪري رهيو آهيان ته حڪمرانن جو احتساب ٿئي ۽ لڳي ٿو ته الله تعاليٰ کي پاڪستاني قوم تي ترس اچي ويو آهي ۽ ان ۾ اپوزيشن يا ڪنهن ٻئي جو هٿ نه آهي.

 

راجن پور ۾ 8 ضلعن جي بهادر پوليس کي ڇوٽو گينگ جي ڏوهارين پوئتي ڌڪي ڇڏيو، 5 اهلڪارن جا لاش پوليس حوالي، آپريشن معطل

راجن پور (اين اين آءِ) 8 ضلعن جي بهادر پوليس ڇوٽو گينگ کي نه پڪڙي سگهي، راجن پور جي علائقي ڪچا جمال ۾ 7 اهلڪارن جي شهادت ۽ 24 اهلڪارن جي اغوا کانپوءِ ڇوٽو گينگ خلاف خميس تي ٻئي ڏينهن به آپريشن ملتوي، ڳالهين کانپوءِ ڇوٽو گينگ 5 اهلڪارن جي لاش پتڻ جي هنڌ وٽ پوليس جي حوالي ڪيا، جنهن ۾ ايس ايڇ او حنيف غوري، شڪيل، اجمل، طارق ۽ امان الله جا لاش شامل آهن، 4 زخمي اهلڪارن کي به ڇڏي ڏنو جن کي شيخ زيد اسپتال داخل ڪيو ويو، 24 يرغمالي اهلڪارن جا نالا ظاهر ٿي ويا، انهن ۾ اسد الله فياض، ريحان، شفيق، الطاف، منير، مظهر، اختر، ڪليم، غلام دستگير شامل آهن، الاهي بخش، راشد، علمدار، محمد سجاد، سراج، نعيم، مجاهد، رفيق، صديق، لياقت، عبدالمجيد، افتخار، عاصم به اڃاتائين يرغمال آهن، ٻئي پاسي پوليس جو چوڻ آهي ته آپريشن ۾ 3 ڌاڙيل مارجي ويا آهن، انهن ۾ ڇوٽو جو ويجهو ساٿي ڦلو پٺاني، مجيد سيکاني ۽ بگي بقراني شامل آهن، ڪچي جي علائقي ۾ آپريشن ضرب عضب سبب اتر وزيرستان آيل دهشتگردن پناهه ورتي آهي جنهن جي شهيد ايس ايڇ او حنيف غوري تصديق ڪئي هئي، ڇوٽو گينگ ۾ 80 کان سئو ڏوهاري آهن جن وٽ ڀارتي هٿيار اينٽي ڪرافٽ گنون به موجود آهن.