تازيون خبرون

Daily Archives: April 14, 2016

اقتصادي راهداري جو تعلق ڪراچي جي امن سان آهي، امن لاءِ هر حد تائين وينداسين: آرمي چيف

اسلام آباد(اي پي پي) چيف آف آرمي اسٽاف جنرل راحيل شريف اربع ڏينهن 5 ڪور هيڊڪوارٽر ڪراچي جو دورو ڪيو ۽ سيڪيورٽي جي حوالي سان گڏجاڻي جي صدارت ڪئي. اجلاس ۾ ڪور ڪمانڊر ڪراچي، انٽر سروسز انٽيليجنس (آءِ ايس آءِ) جي ڊائريڪٽر جنرل، ڊائريڪٽر جنرل ملٽري آپريشن، ڊائريڪٽر جنرل ملٽري انٽيليجنس، ڊائريڪٽر جنرل رينجرز سنڌ ۽ ٻين اعليٰ فوجي عملدارن شرڪت ڪئي. آرمي چيف کي اجلاس دوران ڪراچي ۾ جاري آپريشن ۽ انٽيليجنس بنياد تي جاري ڪارروائين بابت تفصيلي بريفنگ ڏني وئي. آرمي چيف ڪراچي ۾ جاري ڪارروائين جي ڪاميابي ۽ انٽيليجنس جي بنياد تي آپريشن ۾ ٿيل اڳڀرائي تي اطمينان جو اظهار ڪيو ۽ رينجرز ۽ ٻين قانون لاڳو ڪندڙ ادارن جي ڪارڪردگي ۽ آپريشن دوران ڏنل قربانين جي واکاڻ ڪئي. آرمي چيف ڪراچي ۾ امن بحال ڪرائڻ لاءِ جاري آپريشن ۾ ڪراچي واسين طرفان ڏنل حمايت تي پڻ تعريف ڪئي. جنرل راحيل شريف چيو ته ملڪ جي اقتصادي ترقي ۽ معاشي سرگرميون ڪراچي ۾ امن سان سلهاڙيل آهن. هن چيو ته دهشت کان پاڪ ۽ پرامن ڪراچي جاري آپريشن جو مک مقصد آهي ۽ ان مقصد کي حاصل ڪرڻ لاءِ هر ممڪن ڪوششون ڪيون پيون وڃن. ان کان اڳ اربع ڏينهن صبح جو آرمي چيف جنرل راحيل شريف الائيڊ آفيسرز جي ايئر وار ڪورس ۾ شرڪت ڪندڙن کي خطاب ڪيو. ان موقعي تي آرمي چيف عالمي توڙي علائقائي سيڪيورٽي صورتحال ۽ دهشتگردي خلاف جاري جنگ تي روشني وڌي.  هن ان عزم جو اظهار ڪيو ته دهشتگردي جي خلاف جنگ کي منطقي انجام تائين رسايو ويندو ۽ اهڙو ماحول پيدا ڪيو ويندو جنهن سان ملڪ ترقي جي دڳ تي هلي سگهي. ان موقعي تي آرمي چيف دهشتگردن خلاف ضرب عضب آپريشن ۾ پاڪستان ايئر فورس جي ڪردار ۽ ڪارڪردگي جي واکاڻ ڪئي.

 

جهنگ- فيصل آباد روڊ تي تيز رفتار بس ۽ ٽرالر ۾ ٽڪر، 19 مسافر اجل جو شڪار، 12 زخمي

لاهور(اي پي پي) جهنگ- فيصل آباد روڊ تي گذريل رات دير سان تيز رفتار بس ٽرالر سان ٽڪرائجي وئي جنهن جي نتيجي ۾ عورتن ۽ ٻارن سميت 19 مسافر اجل جو شڪار ٿي ويا، جڏهن ته 12 زخمي ٿي پيا. حادثي کانپوءِ بس ۽ ٽرالر ڊرائيور واقعي واري هنڌ تان فرار ٿي ويا. ٺيڪريوالا ٿاڻي جي انچاج انويسٽيگيشن ٻُڌايو ته رات جو اڍائي وڳي لاهور کان فيصل آباد رستي ليا ويندڙ مسافر بس تيز رفتاريءَ سبب اڏاسوهل پنيره ويجهو بهاولپور ويندڙ هڪ ٽرالر سان ٽڪرائجي وئي. حادثو ايڏو خوفناڪ هو جو ان ۾ 19 مسافر اجل جو شڪار، جڏهن ته 12 زخمي ٿي پيا. حادثي جو اطلاع ملندي ئي پوليس جي ٽيم واقعي واري هنڌ پهچي وئي پر بس ۽ ٽرالر جا ڊرائيور فرار ٿي چڪا هئا. پوليس اختيارين موجب ڊرائيور بس کي انتهائي تيز رفتاري سان هلائي رهيو هو ته اوچتو هڪ گڏهه گاڏو ان جي سامهون اچي ويو. ڊرائيور گڏهه گاڏي کي بچائڻ لاءِ ايمرجنسي بريڪ لڳايو پر بس ڪنٽرول کان ٻاهر ٿي ٽرالر سان ٽڪرائجي وئي. واقعي جو اطلاع ملندي ئي ريسڪيو 1122 جون ٽيمون پڻ حادثي واري هنڌ پهچي ويون ۽ اجل ٿيل شڪار ماڻهن جا لاش ۽ زخمين کي اسپتال منتقل ڪيو جتي 5 زخمين جي حالت ڳڻتي جوڳي ٻُڌائي پئي وڃي.

 

وفاقي حڪومت سنگين مسئلن ۾ ڦاٿل آهي: قائم علي شاهه

ٺٽو(ڊ_ر)وزير اعليٰ سنڌ سيد قائم علي شاه چيو آهي ته وفاقي حڪومت سنگين مسئلن ۾ ڦاٿل آهي ۽ وزير اعظم جو ملڪ کان ٻاهر وڃڻ سمجھ کان ٻاهر آهي. هن چيو ته پانامه ليڪس جھڙن سنگين مسئلن تي اخلاقيات ڪميٽي ٺهڻ نه گھرجي ان جي ضرورت ناهي ۽ پانامه ليڪس جي انڪوائري آزادانه ۽ منصفانه هئڻ گھرجي. وزير اعليٰ سنڌ چيو ته سنڌ حڪومت پاران تعليم ۽ صحت جي شعبي تي خاص توجه ڏني پئي وڃي ان ڏس ۾ وڏي انگ ۾ ڊاڪٽر پڻ مقرر ڪيا ويا آهن ان کان علاوه ٿر ۾ تقريبن 16ـ ماڻهن ۾ خوراڪ ۽ ڪڻڪ پڻ ورهائي وئي آهي. هن وڌيڪ چيو ته چائنه جي اقتصادي راهداري منصوبي ۾ ڪيٽي بندر کي پڻ شامل ڪيو وڃي ته جيئن هن پٺتي پيل علائقي کي ترقي ڏياري بهترين خطو بنائي سگھجي. اهڙن خيالن جواظهار اڄ هن ڪيٽي بندر تعلقي جي ڳوٺ محمد يوسف پيروزاڻي ۾ ايراني حڪومت جي مالي معاونت سان تعمير ڪيل 30ـ بسترن تي مشتمل الفارابي اسپتال جي افتتاحي تقريب بعد ميڊيا جي نمائندن سان ڳالهائيندي ڪيو. ان موقعي تي پ پ پ ضلعي ٺٽي ۽ سجاول جو صدر ارباب وزير احمد ميمڻ، سينيٽر سسئي پليجو، صوبائي وزير صنعت محمد علي ملڪاڻي، صوبائي وزير لوڪل گورنمينٽ سيد ناصر شاه، ڊويزنل ڪمشنر حيدرآباد قاضي شاهد پرويز، ڊي آءِ جي خادم رند، ڊپٽي ڪمشنر ٺٽو طاهر حسين سانگي کان علاوه مختلف کاتن جا اعلٰي عملدار ۽ پ پ پ اڳواڻ پڻ موجود هئا. وزير اعليٰ سنڌ سيد قائم علي شاه چيو ته سنڌ حڪومت پاران ٿر ۾ پڻ جديد اسپتالون قائم ڪيون وينديون ته جيئن اُتي جي عوام کي صحت جون بهترين سهولتون فراهم ٿي سگھن. ان کان اڳ وزير اعليٰ سنڌ اسپتال جي افتتاحي تقريب کي خطاب ڪندي چيو ته ايران ۽ پاڪستان جي دوستي تمام گھڻو پُراڻي آهي جڏهن ته ٻنهي ملڪن جا لاڳاپا مضبوط هئڻ سان گڏ مذهب ۽ ثقافت جي لحاظ کان پڻ هڪ جھڙا آهن. هن چيو ته هو ايراني حڪومت ۽ ايران جي ڪونسل جنرل ڊاڪٽر مهدي سبحاني جو شڪر گذار آهي جنهن ڏيڍ سال جي ٿورڙي عرصي ۾ 30ـ بسترن تي مشتمل جديد سهولتن سان آراسته اسپتال عوام کي تحفي طور ڏني آهي. هن چيو ته ايران پاران ان قسم جون ٻيون اسپتالون سنڌ خاص طور تي سنڌ جي پٺتي پيل علائقن ۾ قائم ڪيون ويون آهن جنهن تي هو پ پ پ چيئرمين بلاول ڀٽو زرداري ۽ ڪو چيئرمين آصف علي زرداري پاران شڪر گذار آهي. هن ايران جي ڪونسل جنرل سان مخاطب ٿيندي چيو ته هن قسم جون جديد سهولتن سان آراسته اسپتالون ٿر جي علائقن اسلامپور ۽ ننگر پارڪر ۾ پڻ قائم ڪن. هن چيو ته ايران جون پاڪستان ۾ سماجي خدمتون تعريف جوڳيون آهن ۽ اسان جي حڪومت پاران کين صوبي ۾ اسپتالن ۽ اسڪولن بابت آگاه ڪيو جنهن تي ايران پاران نواب شاه، خيرپور، لاڙڪاڻي، ٺٽي سيمت ٻين علائقن ۾ اسڪول پڻ تعمير ڪرايا ويا آهن ان کان علاوه ايران پاران سجاول ضلعي ۾ پڻ اسپتال ۽ اسڪول تعمير ڪرڻ لاءِ دلچسپي ڏيکاري وئي آهي جنهن لاءِ کين زمين ڏني ويندي ته جيئن سجاول ضلعي ۾ پڻ تعليم ۽ صحت کي فروغ ملي سگھي. هن چيو ته ايران جا اهڙي قسم جا قدم تعريف جي قابل آهن ۽ ان سان ايران ۽ پاڪستان خاص طور تي سنڌ سان لاڳاپن ۾ پڻ بهتري ايندي. وزير اعليٰ سنڌ وڌيڪ چيو ته ڪيٽي بندر ۾ 4ـ ايڪڙ ايراضي تي مشتمل الفارابي اسپتال عورتن ۽ ٻارڙن جي علاج لاءِ تعمير ڪئي وئي آهي جڏهن ته 2ـ ايڪڙ ايراضي اسڪول جي تعمير لاءِ رکي وئي آهي جنهن ته پڻ جلد ڪم شروع ڪيو ويندو. هن چيو ته پ پ پ جي چيئرمين بلاول ڀٽو زرداري ۽ ڪو چيئرمين آصف علي زرداري سنڌ ۾ تعليم ۽ صحت کي هٿي وٺرائڻ لاءِ خاص دلچسپي رکندي اولين ترجيح ڏين ٿا ۽ انهن جي بدولت سنڌ ۾ تعليم ۽ صحت جي بهتري لاءِ جدوجھد جاري آهي. هن چيو ته پرائمري اسڪولن کي پڻ بهتر ڪيو ويندو ۽ سهولتون ميسر ڪيون وينديون ان ڏس ۾ آمريڪا پڻ سهڪار ڪري رهيو آهي ۽ ان پاران سنڌ جي مختلف علائقن ۾ جديد اسڪول تعمير ڪرايا ويا آهن. هن چيو ته ڪيٽي بندر ۾ ترقياتي رٿائون شروع ڪري شهيد محترمه بينظير ڀٽو جو خواب پورو ڪيو ويندو ته جيئن هتان جي عوام کي روزگار جا موقعا فراهم ٿي سگھن. هن چيو ته اربين روپين جي لاڳت سان ٿر ۾ ڪوئلي ذريعي بجلي پيدا ڪرڻ جا منصوبه لڳايا پيا وڃن ته جيئن بيروزگاري ۽ بجلي جا مسئلا حل ٿي سگھن ان کان علاوه ڪيٽي بندر ۾ پڻ پاور پلانٽ لڳايو ويندو ۽ سئو سيڪڙو سستي بجلي عوام کي فراهم ڪنداسين. ان موقعي تي ايران جي ڪونسل جنرل ڊاڪٽر مهدي سبحاني تقريب کي خطاب ڪندي چيو ته ايران ۽ پاڪستان جي دوستي مذهبي ۽ تاريخي طور تي تمام پُراڻي آهي. هن چيو ته الفارابي اسپتال جو تحفو پُراڻي دوستي جو تسلسل آهي ۽ هي منصوبي اسان جي سپريم ليڊر آيت الله خامنائي جي حڪومتي ڏيڍ سال جي ٿورڙي عرصي ۾ تعمير ڪري سنڌ جي عوام کي تحفو پيش ڪيو آهي. هن چيو ته ستن مهينن ۾ ايراني حڪومت پاران سنڌ ۾ هي ٻي اسپتال عوام کي تحفي طور پيش ڪئي وئي آهي ان کان اڳ خيرپور ۾ جنوري ۾ ايران پاران تعمير ڪيل اسپتال سنڌ حڪومت کي ڏنو ويو جنهن سان تقريبن 17 هزار کان وڌيڪ ماڻهن کي علاج جون سهولتون ميسر ٿي رهيون آهن. هن چيو ته هنن سمورن منصوبن ۾ سنڌ حڪومت جو ڀرپور سهڪار رهيو خاص طور تي وزير اعليٰ سنڌ سيد قائم علي شاه جا ٿورائتا آهيون جن سمورن منصوبن جي تڪميل ۾ تعاون ڪيو. هن وڌيڪ چيو ته ايران پاڪستان جي سيڪورٽي، استحڪام ۽ ترقي ۾ خلوص ۽ سچائي سان گڏ آهي. ان موقعي تي سينيٽر سسئي پليجو، پ پ پ ضلعي ٺٽي ۽ سجاول جي صدر ارباب وزير ميمڻ پڻ تقريب کي خطاب ڪيو جڏهن ته ڊپٽي ڪمشنر ٺٽو طاهر حسين سانگي اسپتال بابت بريفنگ ڏيندي ٻڌايو ته الفارابي اسپتال 30ـ بسترن تي مشتمل آهي جيڪا 15ـ ڪروڙ روپين جي لاڳت سان تعمير ڪئي وئي آهي جنهن سان ڪيٽي بندر، ڳاڙهو، ٻگھاڻ ۽ آس پاس جي تقريبن 40ـ هزار کان وڌيڪ آبادي کي علاج معالج جون سهولتون فراهم ٿينديون جنهن ۾ آپريشن ٿيٽر، ليبارٽري، گائني وارڊ، ڊاڪٽرن ۽ عملي جي رهائش سميت سموريون جديد سهولتون ميسر آهن.

 

ملڪ ۾ امن امان جي حوالي سان سخت نظر رکي وڃي: نواز شريف

لاهور (اين اين آءِ) وزيراعظم محمد نوازشريف پنهنجي زال ڪلثوم نواز سان گڏ هڪ هفتي جي خانگي دوري تي لنڊن لاءِ روانو ٿي ويو روانگي کان اڳ وزيراعظم جي صدارت غير رسمي اجلاس ٿيو جنهن ۾ پانامه ليڪس سميت ملڪي سياسي صورتحال ۽ بين اهم معاملن تي ڳالهيون ڪيون ويون جڏهن ته وزيراعظم نوازشريف جو چوڻ هو ته هو علاج لاءِ لنڊن وڃي رهيو آهي جڏهن ته چئن پنجن ڏينهن ۾ واپس اچي ويندو تفيصل موجب وزيراعظم سندس زال ۽ پنهنجي اسٽاف جي ميمبرن سان گڏ خصوصي اڏام ۾ لنڊن لاءِ روانو ٿيو وزيراعظم هڪ هفتي جي خانگي دوري تي لنڊن ويو جتي هو پنهنجو طبي معائنو ڪرائيندو ۽ پوءِ وطن واپس ايندو ان کان اڳ وزيراعظم نوازشريف رائونڊ ۾ پنهنجي رهائشگاهه جاتي امره کان هيليڪاپٽر ذريعي لاهور ايئرپورٽ پهتو جتي روانگي کانا ڳ وزيراعظم نوازشريف جي صدارت هيٺ غير رسمي اجلاس ٿيو اجلاس ۾ شهبازشريف چوڌري نثار اسحاق ڊار سميت ٻيا اڳواڻ شامل ٿيا وزيراعظم جي صدارت ۾ ٿيل غير رسمي اجلاس ۾ پانامه ليڪس سميت ملڪي سياسي صورتحال ۽ ٻين اهم معاملن تي ڳالهيون ٿيون ان موقعي تي وزيراعظم نوازشريف ملڪ ۾ امن امان جي حوالي سان سخت نظر رکڻ جو حڪم ڏنو جڏهن ته هن سينيئر وزيرن پرنسپل سيڪريٽري ۽ چيف سيڪريٽري کي خصوصي هدايتون ڏنيون اولڊ ايئرپورٽ تي ڊاڪٽرن وزراعظم نوازشريف جو طبي معائنو ڪيو وزيراعطم جو چوڻ هو ته هو علاج لاءِ لنڊن وڃي رهي آهي جڏهن ته چئن پنجن ڏينهن ۾ وطن واپس اچي ويندو عمران خان به ايندڙ هڪ ٻن ڏينهن ۾ لنڊن لاءِ روانو ٿيندو جڏهن ته آصف زرداري پهريان ئي لنڊن ۾ موجود آهي ان کان سواءِ الطاف حسين به لنڊن ۾ ئي موجود آهي جڏهن ته ان جي وزيراعظم نوازشريف سان ملاقات جو ڪوئي امڪان نه آهي.

 

وزيراعظم طبي معائني لاءِ نه پر علاج لاءِ لنڊن ويل آهي، سندس واپسي جو فيصلو ڊاڪٽر ڪندا: چوڌري نثار

اسلام آباد (اين اين آءِ) وفاقي گهرو وزير چوڌري نثار علي خان چيو آهي ته وزيراعظم نواز شريف طبي معائني لاءِ نه پر علاج لاءِ پرڏيهه ويل آهي سندس واپس اچڻ جو فيصلو ڊاڪٽر ڪندا، پاناما ليڪس معاملو وزيراعظم جي پٽن جو آهي اهي ئي جواب ڏيندا حڪومت جو ڪوئي واسطو ناهي، حڪومت کي غير جمهوري طريقي سان هٽائڻ لاءِ سياسي راند کيڏي پئي وڃي، پاناما معاملي کي لڪائڻو هجي ها ته ججن سان رابطو نه ڪيون ها مخالف ڌر جي رويي جي ڪري  پنج ججن معذرت ڪئي آهي پيسو ٻاهر رکڻ وزيراعظم تي ناجائز آهي ته عمران خان جي آس پاس ماڻهو به شامل آهن سڀني جو احتساب ٿيڻ گهرجي، اپوزيشن ڀلائي چاهي ٿي ته ڪميٽي بڻائي معاملي جي جاچ ۾ مدد ڪري، عمران خان پنهنجي سياسي گيم کي پاناما ليڪس جو نالو نه ڏئي، گار گند ۽ الزامن سان مسئلو حل ٿيڻ وارو ناهي اپوزيشن جنهن اداري لاءِ چوندي انهيءَ کان جاچ ڪرائڻ لاءِ تيار آهيون ڀارتي جاسوس جو معاملو بيڪ گرائونڊ ۾ نه وڃڻ ڏينداسين، ريڊ زون ۾ جلسي تي پابندي آهي ڪنهن ٻئي هنڌ جلسو ڪرڻ تي ڳالهه ٿي سگهي ٿي. اربع تي پنجاب هائوس اسلام آباد ۾ پريس ڪانفرنس کي خطاب ڪندي گهرو وزير چيو ته مان پاڪستان حڪومت پاران واضح ڪرڻ چاهيان ٿو ته وزيراعظم نواز شريف اربع جي صبح لنڊن ويل آهي هو طبي معائني يا ڪنهن سان ملاقات ڪرڻ ناهي ويو پر هو علاج لاءِ ويل آهي وزيراعظم جي عادت آهي ته کيس ڪا به بيماري ٿيندي آهي ته هو ڪنهن کي ناهي ٻڌائيندو چند مخصوص ماڻهن لاءِ ڪنهن جو بيمار هئڻ به گناهه آهي پاڻ کي دانشور چوندڙ به ننڍڙين ڳالهين تي لهي پيا آهن هن چي وته ڪجهه سال اڳ هارٽ بيٽ جو پرابلم هيو ته ان هن جو علاج لنڊن مان ڪرايو هو ٻن ٽن مهينن کان کيس اهو مسئلو ٿي رهيو هو، هو آمريڪا جي دوري کانپوءِ لنڊن وڃڻ چاهي پيو اهو دورو ملتوي ٿي ويو جنهن کانپوءِ مون وزيراعظم کي ان ڳالهه تي قائل ڪيو ته هو طبي دوري بابت سڀني کي ٻڌائي وڃي سندس ڊاڪٽر سختي سان هدايت ڪئي ته هو ٽي ڏينهن آرام ڪري لنڊن اچي ۽ رستي ۾ به آرام ڪري ان ۾ ڪوئي شخص ٻڏل سياست کي زنده ڪرڻ جي ڪوشش نه ڪري ، جيئن ڊاڪٽرن کيس اجازت ڏني هو وطن واپس موٽي ايندو، ڪجهه ماڻهو گهٽيا ليول جي  سياست تي لهي پيا آهن جيڪڏهن ڪوئي بهانو ڪرڻو هيو ته هو ترڪي ۾ ٿيندڙ ميٽنگ کانپوءِ لنڊن وڃي پئي سگهيو پر سندس صحت کيس سفر جي اجازت نه ڏني صدر ممنون حسين ترڪي ويو مون کي ڪيترن ئي سياسي قدرن سان اختلاف به آهي ۽ افسوس به آهي ته اهي ماڻهو بيماري تي به مهڻا ڏيڻ ۽ ان کي اشو بنائڻ کان پاسو نه ٿا ڪن. هن چيو ته هي مسئلو وزيراعظم جي ٻن پٽن جو آهي هڪ حڪومتي وزير جي حيثيت سان منهنجو ڪوئي به تعلق ناهي پر حڪومتي ترجمان جي حيثيت سان واضح ڪيان ٿو ته هن معاملي جي سمورن معاملن جي جاچ ڪئي ويندي جنهن لاءِ وزيراعظم پهريان ئي ڪميشن ٺاهڻ جو اعلان ڪيو آحي هن چيو ته ڪجهه مخصوص ماڻهو مسئلو ميڊيا ٽرائل ذريعي حڪومت کي الزامن ذريعي اٿاري رهيا آهن پاناما پيپرز کي ڪيترن ئي ملڪن ڪوڙو قرار ڏنو پر پاڪستان جي وزيراعظم قوم کي خطاب ڪري ڪميشن ٺاهڻ جو اعلان ڪيو آئسلينڊ جو وزيراعظم به خود ان ۾ ملوث هيو جنهن تي هن استعيفيٰ ڏني هن چيو ته حڪومت ڪميشن ٺاهڻ لاءِ جسٽس ناصرالملڪ، جسٽس تصدق جيلاني، جسٽس امير الملڪ مينگل، جسٽس سائر علي ۽ جسٽس تنوير خان درخواست ڪئي وئي جن جي ديانتداري تي ڪنهن کي ڪوئي شق ناهي جيڪڏهن اسان کي معاملو لڪائڻو هجي ها ته ججن سان رابطو نه ڪيون ها ڪيترن ئي ججن معذرت ڪئي ۽ ڪنهن وقت گهري ورتو پوءِ سمورن ججن هڪ ٻئي پٺيان سبب ٻڌائڻ بنا انڪار ڪيو. اسان سپريم ڪورٽ جي اڳوڻي چيف جسٽس جي سربراهي ۾ ٻن وڌيڪ ججن تي ٻڌل ڪميشن بنائڻ چاهيوسين پوءِ فيصلو  ٿيو ته سپريم ڪورٽ جي هڪ ئي جج تي ٻڌل ڪميشن بڻايو وڃي اسان جي خواهش هئي ته سموري معاملي جي شفاف جاچ ٿئي ۽ قوم آڏو حقيقتون آڏو آنديون وڃن. هن چيو ته وڌيڪ اعليٰ ججن سان رابطو آهي پر انهيءَ دوران عمران خان جو بيان آڏو ته چوڌري نثار الله کي جوابده آهي الحمدالله مان الله تعاليٰ کي ئي جوابده آهيان عمران خان ايف آءِ اي کان جاچ ڪرائڻ جو مطالبو ڪيو ۽ پوءِ شعيب سڊل جو نالو ڏنو پر شعيب سڊل ايف آءِ اي جو آفيسر ناهي هو ريٽائرڊ ٿي چڪو آهي، هن چيو ته اعتزاز احسن پاڻ کي وڏو دانشور سمجهي ٿو هن ايف آءِ اي ۽ نيب کان وزيراعظم جي خاندان جي جاچ ڪرائڻ جو مطالبو ڪيو گهرو وزير چيو ته قاعدا ۽ ضابطا (ٽي او آر آرز) طئه ڪن اعتزاز احسن، عمران خان، شاهه محمود قريشي ۽ ٻيا ايف آءِ اي جي جنهن آفيسر جو نالو تجويز ڪندا اهو جاچ شروع ڪندو.

 

بلاول ڀٽو جي صدارت هيٺ پ پ جي ڪور ڪميٽي جو اجلاس، چئني صوبن ۾ صوبائي ۽ ماتحت تنظيمون ٽوڙڻ جو اعلان

اسلام آباد (اين اين آءِ) پ پ چئني صوبن ۾ صوبائي ۽ ماتحت تنظيمون ٽوڙڻ جو اعلان ڪندي فيصلو ڪيو آهي ته هر صوبي مان پنج پنج ميمبرن تي ٻڌل وقتي ڪميٽي جوڙي ويندي جيڪا نون عهديدارن جي چونڊجڻ تائين معاملا هلائيندي جڏهن ته پاناما پيپرز جي معاملي تي ٻه جدا جدا ڪميٽيون جوڙڻ جو فيصلو ڪيو ويو آهي، هڪ ڪميٽي اپوزيشن جماعتن سان رابطو جڏهن ته ٻي قانوني معاملن جو جائزو وٺندي قمرالزمان ڪائره چيو آهي ته قانوني معاملن تي قانوني وضاحت جي ضرورت آهي پ پ معاملن کي سنجيدگي سان کڻي هلڻ گهري ٿي. اربع تي بلاول هائوس ۾ پ پ جي ڪور ڪميٽي جو اجلاس بلاول ڀٽو جي صدارت ۾ ٿيو  اجلاس ۾ فريال ٽالپر، راجا پرويز اشرف، فاروق ايڇ نائيڪ، اعتزاز احسن، نير حسين بخاري، لطيف کوسا، شيري رحمان نويد قمر، جهانگير بدر، سليم مانڊي والا، رحمان ملڪ، قمرالزمان ڪائره، اعجاز جکراڻي ، جميل سومرو، رخسانه بنگش، فوزيه حبيب ۽ فرحت الله بابر شرڪت ڪئي. اجلاس ۾ ملڪي سياسي صورتحال تي ۽ پارٽي جي معاملن تي خيالن جي ڏي وٺ ڪئي وئي. اجلاس ۾ پ پ پي ٽي آءِ جي راءِ ونڊ ڌرڻي ۾ شامل نه ٿيڻ جو فيصلو ڪيو آهي اجلاس ۾ عمران خان جي راءِ ونڊ ڌرڻي جي مخالفت ڪئي وئي آهي ۽ ان ۾ شامل نه ٿيڻ جو فيصلو ڪيو ويو آهي اجلاس ۾ بلاول ڀٽو کي موجوده سياسي صورتحال ۽ پاناما معاملي تي بريفنگ ڏني وئي آهي جنهن کانپوءِ فيصلو ڪيو ويو آهي ته پاناما ليڪس جو معاملو سينيٽ ۽ قومي اسيمبلي ۾ اٿاريو ويندو پر عمران خان جي ڌرڻي ۾ شامل نه ٿيڻو پوندو. اجلاس ۾ ان ڳالهه تي به ڳالهايو ويو ته پاناما ليڪس جي معاملي تي حڪومت جو ساٿ ڏجي يا ان کي پنهنجي حالت تي ڇڏي ڏجي جڏهن ته پ پ جي ڪور ڪميٽي مشاورت جاري رکڻ جو فيصلو ڪيو آهي  پارٽي جي اڪثريت مسلم ليگ (ن) جي ٻيهر مدد سياسي خودڪشي جي برابر چيو آهي رحمان ملڪ، اسحاق ڊار سان ٿيندڙ ملاقات ۽ موجوده سياسي صورتحال ۾ مسلم ليگ (ن) جي مدد بابت ڪميٽي کي بريفنگ ڏني.

 

سپريم ڪورٽ ايان علي کي ٻاهرين ملڪ وڃڻ جي اجازت ڏئي ڇڏي، اي سي ايل مان نالو ڪڍڻ جو حڪم

اسلام آباد  (اين اين آءِ) سپريم ڪورٽ پرڏيهي ڪرنسي ٻاهرين ملڪ اسمگل ڪرڻ جي ڪيس جي ملزمه ماڊل ايان علي کي ٻاهر وڃڻ جي اجازت ڏيئي ڇڏي آهي جڏهن ته ايان علي جو نالو ايگزٽ ڪنٽرول لسٽ مان ڪڍڻ خلاف گهرو وزارت ۽ ڪسٽم انٽيليجنس پاران داخل درخواستون رد ڪري ڇڏيون آهن. گهرو وزارت کي ڪسٽم عملدارن پاران هي درخوستون سنڌ هاءِ ڪورٽ جي فيصلي جي خلاف داخل ڪيون ويون هيون جنهن ۾ سنڌ هاءِ ڪورٽ گذريل مهيني ايان علي جو نالو اي سي ايل مان ڪڍڻ جو حڪم ڏنو هو عدالت 6 اپريل تي انهن درخواستن جو فيصلو محفوظ ڪري ڇڏيو هو. سپريم ڪورٽ انهن درخواستن کي خارج ڪندي حڪم ڏنو ته ملزمه جي خلاف عدالتن ۾ التوا هيٺ ڪيس کي بنياد بڻائي ان جي چرپر تي پابندي عائد نٿي ڪري سگهجي.

 

ميان صاحب جي طبيعت خراب ٿي ويندي آهي ته قوم جي چوري ڪيل پئسي مان علاج ڪرائڻ لاءِ پرڏيهه ويندو آهي: عمران خان

لاهور (بيورو) پي ٽي آءِ سربراهه عمران خان چيو آهي ته ميان صاحب جي طبيعت خراب ٿي ويندي آهي ته قوم جي چوري ڪيل پئسي مان علاج ڪرائڻ لاءِ پرڏيهه ويندو آهي، ملڪ ۾ عوام جي تعليم ۽ علاج جي سهولت تي ڌيان نٿو ڏنو وڃي.لاهور ۾ تقريب کي خطاب ڪندي عمران خان چيو ته ليگي اڳواڻن پنهنجي ڪرپشن لڪائڻ لاءِ ملڪ جي سڀ کان وڏي خيراتي اداري کي نشانو بڻايو، جنهن کي وڻي اسان جا اڪائونٽس چيڪ ڪري سگهن ٿا.هن چيو ته ليگي اڳواڻ پنهنجا ڪرتوت لڪائڻ لاءِ شوڪت خانم اسپتال تي تنقيد ڪري رهيا آهن، جيڪڏهن حڪومت کي عوام جو واقعي ئي فڪر آهي ته پاناما ليڪس معاملي جي جاچ ڪرائي.عمران خان چيو ته مني لانڊرنگ ڪري آف شور ڪمپنين ۾ پيسو ڏنو ويندو آهي، عوام مٿان ڳرا ٽئڪس لڳائڻ ملڪ سان ناانصافي ڪرڻ آهي.پي ٽي آءِ سربراهه چيو ته پاناما ليڪس ذريعي ٿيل انڪشافن ۾ پاڪستان جي وزير اعظم جو نالو شامل هئڻ ملڪ سان ظلم آهي، عوام کي سجاڳ ٿيڻ گهرجي.

 

پاناما ليڪس معاملي تي حڪومت سان گڏ آهيون،پر جاچ ٿيڻ گهرجي: مولانا فضل الرحمان

اسلام آباد (بيورو)  جمعيت علماءِ اسلام جي سربراهه مولانا فضل الرحمان جو چوڻ آهي ته پاناما ليڪس تي وزيراعظم جو قوم کي خطاب ڪرڻ غلط فيصلو هيو .اتحادي هجڻ جي ڪري هو پاناما ليڪس معاملي تي حڪومت سان گڏ بيٺل آهن،پر معاملي جي جاچ به ٿيڻ کپي. پارليامينٽ هائوس ۾ ميڊيا سان ڳالھ ٻولھ ڪندي مولانا فضل الرحمان جو چوڻ هو ته ملڪ ۾ پاناما ليڪس جو طوفان آيل آهي جنهن مان ڪجھ ماڻهو کي سياسي فائدو پهچندو. ان جو چوڻ هو ته جيڪي پاڻ آف شور ڪمپنين جا حصا آهن اهي هن معاملي تي ڌرڻو به ڏيئي رهيا آهن. عمران خان جو قوم کي خطاب هڪ مذاق هيو، تحريڪ انصاف هڪ مذاق ٿي وئي آهي. ڇا قوم هن تي اعتماد ڪندي . هن جو وڌيڪ چوڻ هو ته نواز شريف کي پاناما ليڪس تي قوم سان خطاب جي بجائي پارليامينٽ ۾ اپوزيشن کي اعتماد ۾ وٺڻ کپي ها .حڪومت جو اتحادي هجڻ جي ڪري حڪومت سان گڏ بيٺا آهيون اهڙن عالمي الزامن جي درست جاچ ضرور ٿيڻ گهرجي.

 

نوازشريف طبي معائني لاءِ لنڊن ويو، ايجنڊا ۾ ڪائي ٻي شئي شامل نه آهي نه ئي ڪنهن سان ملاقات رٿيل آهي: رانا ثناءُالله

لاهور (اين اين آءِ) صوبائي وزير قانون رانا ثناءُالله خان چيو آهي ته وزيراعظم محمد نوازشريف طبي معائني لاءِ لنڊن ويل آهي ان جي ايجندا ۾ ڪائي ٻي شئي شامل نه آهي ۽ نه ئي ڪنهن سان ملاقات رٿيل آهي مال روڊ چوڪ ۽ ڊي چوڪ تي ڌرڻو سياست ۽ وزيراعظم جي گهر جو گهيرو الڳ شئي آهي جنهن ڏينهن عمران خان رائونڊ ڌرڻي لاءِ نڪرندو ان ڏينهن سياست جو جنازو نڪري ويندو آرمي چيف جو بيان واضح آهي ڀارتي ڳجهي ايجنسي را پاڪستان کي تباهي طرف ڌڪڻ چاهي ٿي اهڙن خيالن جو اظهار هن گذريل ڏينهن پنجاب اسيمبلي ۾ ميڊيا ان ڳالاهيئندي ڪيو رانا ثناءَالله چيو ته پانامه ليڪس سان فرانزڪ ڪميشن ٺهي يا ڪوئي ٻيو ٺهي ڪجهه نه ٿيندو عمران خان اسان تنهنجي ڌرڻي جا منتظر آهيون پنهنجي زبان تي قائم رهو ۽ 24 اپريل تي رائونڊ جو گهيرو ڪيو عمران خان جي پارٽي جو واڄو وڄي چڪو آهي ۽ ان جي سياست رائونڊ جي فصلن ۾ دفن ٿيندي ڇو ته هو پنجاب جي روايتن کان واقف نه آهي مال روڊ چوڪ ۽ ڊي چوڪ ۾ ڌرڻا سياست ۽ وزيراعظم جي گهر جو گهيرو الڳ شئي آهي سندس چوڻ هو ته عمران خان ڳالهائڻ دوران بهادر بڻجي ڳالهائي ٿو پر هو تڪليف ۽ ڏک ۾ ورتل آهي جنهن ڏينهن عمران خان رائونڊ ڌرڻي لاءِ نڪرندو ته سندس سياست جو جنازو نڪري ويندو.