تازيون خبرون

Daily Archives: April 12, 2016

ڊي چوڪ تي جلسو ڪرڻ نه ڏنو ويندو، ايف آءِ اي کان جاچ جو مطالبو اپوزيشن جو هو: چوڌري نثار

اسلام آباد (بيورو) وفاقي گهرو وزير چوڌري نثار چيو آهي ته پاناما ليڪس معاملي تي ايف آءِ اي کان جاچ ڪرائڻ جو مطالبو اپوزيشن ڪيو هو، عوام جي آگاهي لاءِ گڏجي پاناما ليڪس معاملي کي پنهنجي انجام تائين پهچائڻو پوندو، خابرو ادارن موجب اسلام آباد ۾ پريس ڪانفرنس ڪندي چوڌري نثار جو چوڻ هو ته پاناما پيپرز تي ايف آءِ اي کي ان لاءِ متحرڪ نه ڪيو ڇو جو خبر هئي ته ٻيهر الزام لڳي ويندو، ايف آءِ اي آفيسر جي چونڊ جو فيصلو عمران خان تي ڇڏيان ٿو، عمران خان ايف آءِ اي جي جهڙي به آفيسر جو چوندو ان کان تحقيق ڪرائينداسين، سندس چوڻ هو ته ڊي چوڪ ۽ ايف نائين پارڪ جلسن، جلوسن ۽ ڌرڻن لاءِ استعمال نه ٿيندو، فيصلو ڪري چُڪا آهيون ته ڊي چوڪ تي جلسو ڪرڻ نه ڏنو ويندو، هڪ ارب رپيا ڌرڻي دوران سيڪيورٽي تي خرچ ٿيو هو، جلسن لاءِ پورو پاڪستان آهي، دار الحڪومت بند ڪرڻ جو سلسو بند ٿيڻ کپي، اسلام آباد ۾ ڪنهن به جاءِ تي جلسي جلوسن تي پابندي لاڳو ڪري ڇڏي آهي، هر ايندڙ ڏينهن اسلام آباد جو سيل رهڻ دنيا لاءِ سٺو پيغام نه آهي، اسلام آباد کانپوءِ ٻين شهرن ۾ به جلسا جلوس ڪري سگهجن ٿا، چوڌري نثار چيو ته الزامن، جلسن ۽ ڌرڻن کان پاسو ڪيو وڃي، اسلام آباد ۾ فون سروس بند ڪرڻ سان تڪليف ٿيندي آهي، اچو ته سڀئي گڏجي اسلام آباد کي امن جو شهر ٺاهيون، جيڪڏهن جلسو ڪيو ويو ته اسان کي جيڪا ڪارروائي ڪرڻي پئي ڪنداسين، چوڌري نثار جو چوڻ هو ته نواز شريف لنڊن ۾ ڪو به فليٽ ناهي لڪايو، اتي سياسي ميٽنگون ٿيندو آهن، مسلم ليگ ن تي تنقيد ڪندڙ پهرين پنهنجو گريبان ڏسن، پاڪستاني عوام ان ماڻهن تي نظر وجهي جيڪي منهن سان ٻه ڳالهيون ڪن ٿا.

 

صدائين پهريون حملو آئين تي ٿيو ۽ آئين ئي سڀني جي ڪم آيو، آرٽيڪل 6 پ پ جو تير آهي: وڏو وزير

ڪراچي (اي پي پي) وزير اعليٰ سنڌ سيد قائم علي شاهه چيو آهي ته آصف علي زرداري جي حڪمت عملي سبب پرويز مشرف کي ايوان مان ٻاهر ڪڍيو ويو. سينيٽ جي چيئرمين رضا رباني ڪاوڙ م چيو ته آئين جو آرٽيڪل 6 ختم ڪيو وڃي، اهو آرٽيڪل پيپلز پارٽي جو تير آهي جيڪو ان وقت هلندو آهي جڏهن آئين کي مسخ ڪرڻ جي ڪوشش ڪئي ويندي آهي. اهڙو اظهار هن ڪالهه سومر ڏينهن سنڌ اسيمبلي جي اجلاس ۾ (يوم دستور ) جي حوالي سان پيش ڪيل قرارداد تي ڳالهائيندي ڪيو. وڏي وزير چيو ته سڀ کان وڌيڪ اهميت آئين جي هوندي آهي، آئين ناهي ته ملڪ ناهي، 1973 جي آئين کان اڳ ٻه آئين ٺهيا هئا پر اهي 2، 2 سال به نه هلي سگهيا، هي 1973 جو آئين شهيد ذوالفقار علي ڀٽو جو ڪارنامو آهي، جو هي آئين  ان وقت به سڀني سياسي پارٽين کي قابل قبول هو ۽ اڄ به سڀني کي قبول آهي. هن چيو ته 1973 جو آئين ايترو سولائي سان نه جڙيو هو، هي آئين ان وقت ٺهيو هو جڏهن اڌ پاڪستان هليو ويو، شهيد ڀٽو چيو هو ته ٽڪرا گڏ ڪري پاڪستان کي اسلام جو قلعو بنايو ويندو. هن چيو ته شهيد ڀٽو حڪومت سنڀاليندي ئي اهو واضح ڪيو هو ته هو مارشل لا نٿو چاهي ۽ آئين جي تحت ملڪ هلائڻ چاهي ٿو، ان ڪري هن ڪجهه وقت جي لاءِ 1972 جو عبوري آئين به ڏنو هو.  وڏي وزير چيو ته آئين ٺاهڻ لاءِ جيڪا 29 رڪني ڪميٽي جوڙي وئي هئي مان ان جو مميبر هيس ۽ مان به 1973 واري آئين تي صحيح ڪرڻ وارن ۾ شامل هئس. هن چيو ته اسان جو آئين ڀارت کان بهتر آهي، هن ۾ اختيار هيٺئين سطح تي صوبن  ۾ ورهايا ويا آهن، هي آئين اسلامي به آهي ته جمهوري به آهي، وفاقي به آهي ته پارلياماني به آهي، اهڙو آئين تمام گهٽ ملڪن ۾ آهي. هن چيو ته 1973 جي آئين ۾ صوبائي خودمختياري ڏني وئي پر بعد ۾ آصف علي زرداري 18هين ترميم جي ذريعي ان خود مختياري ۾ واڌارو ڪيو. هن چيو ته 2008ع ۾ ماڻهن اسان تي الزام هنيو ته اسان جي وزيرن فوجي آمر پرويز مشرف کان حلف ڇو ورتو، اها آصف علي زرداري جي حڪمت عملي هئي ته هن پرويز مشرف کي ملڪ مان ڪڍيو. آصف علي زرداري چوندو هو ته اسيمبليون ۽ حڪومت قائم ٿي وڃي ته پرويز مشرف 6 مهينا به نه رهندو. هن چيو ته 1973 جي آئين ۾ بنيادي حقن جي ضمانت ڏني وئي آهي، امير ۽ غريب ۾ ڪو به فرق نه رکيو ويو آهي، سڀني کي برابري جي بنياد تي موقعا فراهم ڪيا ويا آهن ۽ سڀني سان برابري جي سلوڪ جي ضمانت ڏني وئي آهي. هن چيو ته شهيد ڀٽو کان وٺي اڄ تائين ان آئين تي عمل ٿي رهيو آهي، آمرن ان آئين کي معطل ڪيو ۽ اسان ان کي بحال ڪرائڻ لاءِ ڊگهي جدوجهد ڪئي. هن چيو ته آئين جي تحفظ خاطر سڀ کان وڌيڪ قرباني شهيد ڀٽو ڏني. هن چيو ته آئين تي عمل در آمد ڪندي شهيد محترمه بينظير ڀٽو (روزگار سڀني جي لاءِ)  جو نعرو لڳايو، عدالت ۾ ان جي خلاف ڪيس داخل ٿيو، جج هن کان پڇيو ته ڇا توهان ماڻهن کي روزگار ڏنو آهي ته شهيد راڻي محترمه بينظير ڀٽو چيو ته هن کي ٻيهر موقعو مليو ته هو ٻيهر روزگار ڏيندي. هن چيو ته آئين جي مطابق ئي ملڪ هلندو آهي، عدليا به آئين جي تحت ئي ڪم ڪري رهي آهي ۽ فوجي آمر به پنهنجي اقتدار جي لاءِ عدليا سان رجوع ڪندا آهن. هن چيو ته اسان آئين جو احترام ڪيون ٿا ۽ ڪندا رهنداسين ۽ ان تي عمل ڪيون ٿا ۽ ڪندا رهنداسين.

 

پي آءِ اي پبلڪ لميٽيڊ ڪمپني بڻجي وئي،پارليامينٽ منظوري ڏئي ڇڏي

اسلام آباد(بيورو) پارليامينٽ جي گڏيل اجلاس ۾ پاڪستان انٽرنيشنل ايئر لائن کي پبلڪ لميٽيڊ ڪمپني بڻائڻ وارو بل اتفاق راءِ سان منظور ڪري ورتو.قومي اسيمبلي جي اسپيڪر سردار اياز صادق جي صدرت هيٺ ٿيندڙ گڏيل اجلاس دوران قانون واري وفاقي وزير زاهد حامد پي آءِ ئي کي پبلڪ لميٽيڊ ڪمپني بڻائڻ جو بل ايوان ۾ پيش ڪيو،جنهن کي سڀني ميمبرن گڏيل طور تي مظور ڪري ورتو.ان کان پهرين پارليامنيٽ ۾ اميگريشن آرڊيننس بل 2016ع به منظور ڪيو ويو،جنهن کي سينيٽر غوث محمد خان پيش ڪيو،جڏهن ته سول سرونٽس بل 2016ع کي به اتفاق راءِ سان منظور ڪيو ويو.جيڪو پيپلز پارٽي جي سينيٽر سعيد غني پيش ڪيو.

 

عوامي مسئلن لاءِ منصوبابندي سان ڪم شروع ڪيو ويندو: صدر ممنون حسين

اسلام آباد (بيورو) صدر ممنون حسين چيو آهي ته عوامي مسئلن لاءِ منصوبا بندي سان ڪم شروع ڪيو ويندو، خابرو ادارن موجب صدر ممنون حسين سان اسلام آباد ۾ ميئر شيخ انصر ملاقات ڪئي، ان موقعي تي صدر ممنون حسين جو چوڻ هو ته اسلام آباد جي مسئلن جي حل لاءِ محنت سان ڪم ڪرڻ جي ضرورت آهي، عوام جي مسئلن کي ٻڌي رهيا آهيون، جڏهن ته انهن مسئلن لاءِ منصوبابندي سان ڪم شروع ڪيو ويندو.

 

آرمي چيف سان آمريڪي نمائندي جي ملاقات، خطي جي سيڪيورٽي تي ڳالهيون

راولپنڊي (م.ڊ) آرمي چيف جنرل راحيل شريف سان آمريڪي خاص نمائندي رچرڊاولسن ملاقات ڪئي آهي، ملاقات دوران خطي ۾ سيڪيورٽي صورتحال تي ڳالهه ٻولهه ڪئي وئي، آءِ پي ايس آر پاران جاري ڪيل بيان ۾ چيو ويو آهي ته ملاقات ۾ افغانستان جي سيڪيورٽي معاملن تي خيالن جي ڏي وٺ ڪئي وئي، ان موقعي تي آمريڪي نمائندي رچرڊاولسن دهشتگردي خلاف پاڪ فوج جي ڪوشش جي به ساراهه ڪئي.

 

هوائي فوج دهشتگردن جي چيلهه چٻِي ڪري ڇڏي آهي: خواجه آصف

ڪراچي (اسٽاف رپورٽر)بچاءُ واري وفاقي وزير خواجا آصف چيو آهي ته هوائي فوج دهشدتگردن جي چيلهه چٻِي ڪري ڇڏي آهي، پاڪستان پرامن ملڪ آهي، پاڙيسرين سان سٺا لڳاپا چاهي ٿو، هوائي فوج جي ايئر چيف مارشل سهيل امان چيو آهي ته سيڪنڊ اسڪوارڊرن ملڪي دفاع ۾ هميشه اهم ڪردار ادا ڪيو آهي، خطي ۾ دفاعي توازن انتهائي ضروري آهي.ڪراچي ۾ پي اي ايف مسرور تي هوائي فوج جي سيڪنڊ اسڪواڊرن جي اپگريڊيشن تقريب واري تقريب ٿي، جنهن ۾ بچاءُ واري وفاقي وزير خواجا آصف ۽ هوائي فوج جي ايئر چيف مارشل سهيل امان شرڪت ڪئي. تقريب کي خطاب ڪندي بچاءُ واري وفاقي وزير خواجا آصف چيو ته هوائي فوج دهشتگردي خلاف جنگ ۾ اهم ڪردار ادا ڪيو آهي، اڄوڪو ڏينهن هوائي فوج جي تاريخ ۾ سنگ ميل جي حيثيت رکي ٿو. هن چيو ته پاڪستان پرامن ملڪ آهي، پنهنجي پاڙيسرين سان بهتر لاڳاپا چاهي ٿو، هوائي فوج دهشتگردن جي چيلهه چٻِي ڪري ڇڏي آهي. ايئر چيف مارشل سهيل تقريب کي خطاب ڪندي چيو ته بهترين ڪارڪردگي لاءِ هوائي فوج جو سيڪنڊ اسڪواڊرن تعريف جوڳو آهي، پاڪ فوج جو هر جوان ملڪي دفاع لاءِ جان ڏيڻ لاءِ تيار آهي. هن چيو ته خطي اندر دفاعي توازن انتهائي ضروري آهي، دهشتگردن خلاف آپريشن آخري مرحلي ۾ آهي.

 

جنهن معاملي سبب  پارليامينٽ تي ڪارا ڪڪر ڇائنجي ويا آهن اهو انتهائي سنگين آهي: اعتزاز احسن

اسلام آباد (بيورو) قومي اسيمبلي جي اسپيڪر سردار اياز صادق پارليامينٽ جي گڏيل اجلاس دوران پيپلز پارٽي جي سينيٽر چوڌري اعتزازاحسن کي پاناما ليڪس تي ڳالهائڻ کان روڪي ڇڏيو.رپورٽ مطابق پارليامينٽ جو گڏيل اجلاس شروٿ ٿيو ته اعتزاز احسن پاناما ليڪس تي ڳالهائيندي چيو ته جنهن معاملي سبب  پارليامينٽ تي ڪارا ڪڪر ڇائنجي ويا آهن اهو انتهائي سنگين آهي،صبح کان شام تائين جنهن معاملي تي ڳالهايو وڃي ٿو اهو معاملو ملڪ جي وزيراعظم تي سندس ڪٽنب سان سلهاڙيل آهي.جڏهن قومي اسيمبلي جي اسپيڪر اعتزاز احسن کي ڳالهائڻ کان رڪڻ جي ڪوشش ڪئي ۽ چيو ته پانامالڪيس تي قومي اسيمبلي ۾ ٻه ڏينهن بحث ٿي چڪو آهي ان لاءِ جيڪڏههن اعتزاز احسن ڳالهائڻ چاهي ٿو ته سينيٽ ۾ وڃي ڳالهائي.

پي ٽي آءِ جون انٽرا پارٽي چونڊون ملتوي، حڪومت کي ڳاهين جي آڇ، ڏڦيڙ نٿا چاهيون، چوڌري نثار سان ملاقات لاءِ تيار آهيان: عمران خان

اسلام آباد(بيورو) پاڪستان تحريڪ انصاف جي چيئرمين عمران انٽرا پارٽي چونڊون ملتوي ڪرڻ جو اعلان ڪري ڇڏيو آهي. سندس چوڻ آهي ته پارٽي جي تاسيس جي جلسي ۾ اڳتي جو لائحه عمل جاري ڪنداسين. اسلام آباد ۾ ميڊيا سان ڳالهائيندي پي ٽي آءِ سربراهه عمران خان چيو ته پاناماليڪس جي ڪري انٽرا پارٽي اليڪشن ملتوي ڪري رهيا آهيون، پارٽي چونڊن لاءِ ميمبر سازي جاري رهندي. هن چيو ته ايف نائن پارڪ ۾ جلسو ضرور ڪنداسين. ڏڦيڙ نٿا چاهيون، ڳالهين لاءِ تيار آهيون. چوڌري نثار سان ملاقات لاءِ تيار آهيان. هن چيو ته رائيونڊ مارچ لاءِ سياسي پارٽين ۽ وڪيلن سميت سڀني کي گڏ ڪنداسين. 24 اپريل تي ايف نائن پارڪ ۾ وڏو سياسي جلسو ڪرڻ وڃي رهيا آهيون. ڊي چوڪ سان خاص لڳائو آهي پر حڪومت سان ڏڦيڙ نٿا چاهيون. حڪومت جي ڪري ڊي چوڪ ڇڏيو پر ايف نائن پارڪ ضرور وينداسين  ٿي سگھي ٿو 24 اپريل کانپوءِ اي پي سي گھرايان. عمران خان وڌيڪ چيو ته پاناما ليڪس پارٽي جو نه ملڪ جو اشو آهي. هي عالمي اشو به آهي ان ڪري يوڪرائين جي وزير اعظم جي وڪيٽ به وئي. ڪرغزستان جي وزيرا عظم به استعيفا ڏني. هن چيو ته پارٽين ۾ جمهوريت جي عادت ناهي. پاناما ليڪس خلاف احتجاج هاڻي سولو فلائٽ نه هوندي. رائيونڊ مارچ جي ٽن هفتن کانپوءِ پارٽي چونڊون ڪرائينداسين.

 

سنڌ سرڪار جي غائب 66 گاڏين مان 35 جوپتو لڳايو ويو، 31 جي ڳولا جاري: نثار کهڙي جو اعتراف

ڪراچي (اي پي پي) سنڌ حڪومت ان ڳالهه جو اعتراف ڪيو آهي ته سنڌ حڪومت جون ڪجهه گاڏيون غائب آهن، انهن جي باري ۾ جاچ ڪئي پئي وڃي ته اهي ڪٿي آهن. اهڙو اعتراف سينيئر ۽ پارلياماني معاملن واري وزير نثار احمد کهڙو ڪالهه سنڌ اسيمبلي جي اجلاس ۾ پاڪستان تحريڪ انصاف جي ميمبر ڊاڪٽر سيما ضياءُ جي ڌيان ڇڪائڻ واري نوٽيس تي بيان ڏيندي ڪيو. نثار کهڙو اعتراف ڪيو ته سنڌ حڪومت جون 66 گاڏيون غائب هنيون انهن مان 35 گاڏين جي خبر پئجي وئي آهي ۽ اهي واپس ورتيون ويون آهن، باقي 31 گاڏين جي ڳولا ڪئي پئي وڃي ته اهي ڪٿي ۽ ڪنهن وٽ آهن. هن چيو ته سرڪاري آفيسن جون بدليون ٿي وڃن ٿيون، انهن مان ڪي افيسر وفاقي هوندا آهن، اهي واپس هليا ويندا آهن، انهن وٽ جيڪي گاڏيون هونديون آهن، اهي واپس ناهن ڪيون وينديون ان جي ڪري گاڏين جو مسئلو پيدا ٿيندو آهي. هن چيو ته 82 اهڙيون گاڏيون به واپس ڪيون ويون آهن، جيڪي ڪجهه آفيسرن وٽ غير قانوني طور تي هنيون. ڊاڪٽر سيما ضياءُ پنهنجي ڌيان ڇڪائڻ واري نوٽيس ۾ چيو هو ته اهي غائب ٿيل گاڏيون غلط مقصدن جي لاءِ به استعمال ٿي سگهن ٿيون.

 

سيوهڻ ۽ ٽنڊو آدم لڳ روڊ حادثا، 6 ڄڻا اجل جو شڪار، 14 زخمي

سيوهڻ شريف/ٽنڊو آدم(نمائندن وٽان) ٽنڊو آدم ويجهو مسافر وين ۽ ٽرڪ جي ٽڪر ۾ 5 ڄڻا اجل جو شڪار ۽ 7 ڄڻا زخمي ٿي پيا. خبر موجب سومر ڏينهن ٽنڊو آدم ويجهو الحاج سليمان روشن اسپتال وٽ منجهند جو 4 وڳي ڌاري حيدرآباد کان سانگهڙ ويندڙ مسافر وين روڊ ٽُٽل هئڻ سبب سامهون ايندڙ ٽرڪ سان ٽڪرائجي وئي، جنهن جي نتيجي ۾ 3 ڄڻا ٿڏي تي فوت ۽ 8 سخت زخمي ٿي پيا. جڏهن ته هڪ زخمي اسپتال ۾ فوت ٿي ويو، زخمين کي فوري طور تي وين مان ڪڍي تعلقه اسپتال ٽنڊو آدم ۽ الحاج سليمان روشن اسپتال سميت شهر جي ٻين اسپتالن ڏانهن منتقل ڪيو ويو. حادثي جو ٻُڌي وڏي انگ ۾ شهري حادثي واري هنڌ ۽ اسپتال پهچي ويا، جڏهن ته فوتين جو انگ وڌڻ جو امڪان ظاهر ڪيو پيو وڃي. فوتين ۾ سانگهڙ جو رهواسي جاويد اڪرم ۽ ٻيا شامل آهن. جڏهن ته زخمين ۾ سانگهڙ جي ڳوٺ الطاف رند جو رهواسي مختيار احمد ولد محمد يوسف، سانگهڙ جو رهواسي عبدالمجيد لنجواڻي ۽ حيدرآباد جو رهواسي رحمت علي جت سميت ٻيا شامل آهن. ٻئي طرف سيوهڻ شريف ڀرسان انڊس هاءِ وي روڊ تي حادثو پيش: تيزرفتار وين ٽائر اچانڪ برسٽ ٿيڻ سبب ڪلٽي ٿي پئي: نتيجي ۾ 8 ڄڻا شديد زخمي، هڪ ڄڻو فوت: زخمين کي تعلقه اسپتال سيوهڻ پهچايو ويو: خبر موجب سيوهڻ شريف ڀرسان لڪي شاهه صدر لڳ مين انڊس هاءِ وي روڊ تي تيزرفتار وين ٽائر اچانڪ برسٽ ٿيڻ سبب ڪلٽي ٿي پئي جنهن جي نتيجي ۾ هڪ ئي خاندان جا 8 ڄڻا شديد زخمي، 22 سالا ذيشان ولد قادر بخش ڳورڙ واقعي واري هنڌ تي ئي فوت ٿي پيو، آسپاس جي رهواسين سمورن زخمين ۽ فوتي شخص جي لاش کي تعلقه اسپتال سيوهڻ پهچايو جتي زخمين کي طبي امداد ڏني وئي، زخمين ۾ سهيل احمد ڳورڙ، اسد ڳورڙ، يار محمد ڳورڙ، سليم ڳورڙ، گلشير ڳورڙ، طارق ڳورڙ، خالد ڳورڙ ۽ مسمات ثنا ڳورڙ سميت ٻار به شامل آهن، زخمين سنڌ پريس ڪلب سيوهڻ جي صحافين کي تفصيل ٻڌائيندي چيو ته هو ڪوٽڙي کان دادو وڃي رهيا هئا ته ساڻن گاڏي سان حادثو پيش آيو.