تازيون خبرون

Daily Archives: April 7, 2016

ڪاليج دور ۾ تمام  گهڻي ٿلهي ۽ بي ڊولي هيس:زرين خان

ممبئي (شوبز نيوز)  بالي ووڊ اداڪارا زرين خان انڪشاف ڪيو آهي ته هوءَ ڪاليج واري دور ۾ تمام  گهڻي ٿلهي ۽ بي ڊولي هئي ،ڪاليج جون سڀ ڇوڪريون ۽ ڪلاس فيلوز مون تي ٽوڪون ڪندا هئا، مونکي سندن اهو ورتاءُ بلڪل به نه وڻندو هو، هڪ انٽرويو ۾ زرين خان چيو ته مان بالي ووڊ ۾ ڪم ڪرڻ جو سوچي به نه سگهندي هيس، سندس چوڻ هو ته منهنجي جواني جون تصويرون ڏسي ڪير به اهو نه ٿو چئي سگهي ته مان هاڻ جيڪا آهيان، اها ئي هيس،

هن چيو ته تعليم پوري ڪرڻ کانپوءِ مان پاڻ تي ڌيان ڏيڻ شروع ڪيو۽ پاڻ کي وڻندڙ بڻائڻ جو پڪو پهه ڪيو، اداڪارا چيو ته مان پنهنجي کاڌ خوراڪ ٺيڪ ڪرڻ سان گڏ ورزش به شروع ڪئي ۽ ڪجهه ئي عرصي ۾ پنهنجو وزن ايترو گهٽائي ڇڏيو جو منهنجون اهي ئي سهيليون منهنجي سونهن جا راڳ ڳائڻ لڳيون، زرين خان چيو ته جڏهن مان پاڻ کي وڻندڙ بڻايو ته سڀ منهنجا ديوانا ٿي ويا.

 

ارجن ڪپور،اٿيا شيٺي سان افيئرواريون خبرون رد ڪري ڇڏيون

ممبئي (شوبز نيوز)  بالي ووڊ اداڪار ارجن ڪپور سينيئر اداڪار سنيل شيٺي جي ڌيءُ اداڪارا اٿيا شيٺي سان افيئرواريون خبرون رد ڪري ڇڏيون آهن، ڀارتي ميڊيا مطابق هڪ انٽرويو ۾ ارجن ڪپور چيو ته اٿيا سان سندس اهڙا ڪي به لاڳاپا آهن، جن جو ذڪر ڪيو پيو وڃي، اهڙيون خبرون بي بنياد، من گهڙت ۽ ڪوڙيون آهن، هن چيو ته اهڙين اجائي ڳالهين سان ٻن ماڻهن جي دل آزاري ٿئي ٿي، جڏهن ته حقيقت ۾ ان جو پري پري تائين ڪو پيرو ئي ناهي هوندو، هن چيو ته اٿيا شيٺي سندس ڀيڻ جي سهيلي آهي ۽ ان حوالي سان ساڻس منهنجي ٿوري گهڻي ڄاڻ سڃاڻ آهي، جنهن کي ماڻهو وڌائي پيش ڪن ٿا، ارجن ڪپور چيو ته اهڙيون بي بنياد ڳالهيون منهنجي ۽ اٿيا جي والدين توڙي ڪيريئر تي ناڪاري اثر وجهي سگهن ٿيون.001

 

وومين ورلڊ ٽي ٽوئنٽي اليون ۾ پاڪستاني رانديگرياڻي انعم امين شامل

دبئي + لاهور (اسپورٽس نيوز) تازو مين ۽ وومين ٽي ٽوئنٽي ميگا ايونٽن کان پوءِ آءِ سي سي ورلڊ ٽي ٽوئنٽي اليون جو اعلان ڪيو آهي، جنهن تحت مردن جي ٽيم ۾ ته ڪو به پاڪستاني رانديگر جڳهه ناهي ٺاهي سگهيو پر عورتن جي ٽيم ۾ پاڪستاني رانديگرياڻي انعم امين کي شامل ڪيو ويو آهي. عورتن جي ورلڊ ٽي ٽوئنٽي اليون جي اڳواڻي ويسٽ انڊيز جي ڪپتان اسٽيفني ٽيلر حوالي ڪئي وئي آهي، جڏهن ته ٻين رانديگرياڻين ۾ نيوزيلينڊ جون 4، آسٽريليا، انگلينڊ ۽ ويسٽ انڊيز جون 2-2، جڏهن ته پاڪستان ۽ ڏکڻ آفريڪا جي هڪ، هڪ رانديگرياڻي شامل آهي. وومين ورلڊ ٽي ٽوئنٽي اليون ۾ ڀارت جي ڪنهن به رانديگرياڻي کي شامل ناهي ڪيو ويو.

 

سرفراز جي حمايت ڪيان ٿو، ڪجهه ڏينهن ۾ سڀ ٻڌائي ڇڏيندس: محمد حفيظ

لاهور (اسپورٽس نيوز) ملڪي ٽيم جي اوپننگ بيٽسمين محمد حفيظ چيو آهي ته ٽيم جي خراب ڪارڪردگي جو مان به ذميوار آهيان پر هاڻ گڏجي ٽيم کي بلندين تائين پهچائينداسين. هن چيو ته مان سرفراز احمد کي ڪپتان مقرر ڪرڻ جي حمايت ڪيان ٿو، خراب ڪارڪردگي جو ذميوار رڳو هڪ رانديگر کي نٿو چئي سگهجي. صحافين سان ڳالهائيندي محمد حفيظ جو وڌيڪ چوڻ هو ته ميگا ايونٽ ۾ منهنجي ڪارڪردگي به خراب رهي پر ڪنهن هڪ رانديگر کي ذميوار نٿو چئي سگهجي. هن چيو ته مان سدائين سچ ڳالهائيندو آهيان، ڪجهه ڏينهن ۾ سڀ ٻڌائي ڇڏيندس. هن چيو ته اسان ٽيم کي گڏجي بلندين تائين پهچائينداسين. سرفراز احمد کي ڪپتان مقرر ڪرڻ جي حمايت ٿو ڪيان ۽ کيس ٽيم جي اڳواڻي ملڻ تي مبارڪ ڏيان ٿو. محمد حفيظ چيو ته مان ڪجهه ڏينهن ۾ سڀ ڪجهه سچ ٻڌائي ڇڏيندس.

 

حيدرآباد جو امن ۽ مبينا پوليس مقابلا: مختيار برفت

اهو قصو ڪو گهڻو پراڻو نه آهي، جڏهن سنڌ بدامني جي باهه ۾ ٻري رهي هئي. ان وقت ماڻهو ان ماحول کي لکئي جو ليک سمجهي قبول ڪري رهيا هئا. اهوئي سبب هيو جو ماڻهو ڦرجڻ کان پوءِ به ٿاڻن جو رخ ان ڪري نه ڪندا هيا جو کين خبر هئي ته اتان ڪجهه ورڻو ئي نه آهي. روائتي پوليس جا دلاسا ۽ نصيحتون نصيب ٿينديون هيون. حيدرآباد به ائين هيو، جيئن سنڌ جا ٻيا ضلعا! ماڻهن اهو سمجهوتو ڪري ورتو هو ته اهي ڏوهي سرگرميون ختم ٿيڻيون نه آهن پر پوءِ الاءِ ڪٿان واءُ وريو جو اوچتو ڏوهارين جي خلاف وٺ پڪڙ شروع ٿي ويئي؛ نه صرف وٺ پڪڙ پر ڏوهارين سان اهڙي حالت ڪئي ويئي جو هڪڙا معذور ٿي ويا، ٻين ٽڪيٽون ڪٽرايون ۽ جيڪي بااثر ماڻهن جا ماڻهو هئا اهي توبهه تائب ٿي ويا. باقي جيڪي پوليس آفيسرن جا کاٽائو پٽ هئا، انهن پيش ٿي پاڻ کي جيل حوالي ڪرائي جيئدان ورتو ۽ ڏسندي ئي ڏسندي سنڌ اهڙي پُرامن ٿي وئي جو ماڻهن کي ڏندين آڱريون اچي ويون. ساڳي گهاٽ تان شينهن ۽ ٻڪري پاڻي پيئڻ لڳا. پوليس جا ڀوتار آفيسر ٻنهي هٿن سان پيسا گڏ ڪرڻ لڳا. هنن جي در تي اهي گاڏيون پهچي ويون جيڪي وڏن ڀوتارن وٽ هجن ٿيون. 9 گريڊ جو ايس ايڇ او ڪک پتيءَ مان لک پتي بنجي ويو. هن جو لائف اسٽائيل تبديل ٿي ويو.

اڙيو ٿڙيو ڪو چور هٿ آيو ته سائين ايس ايڇ او ان جي ٽنگ تي هٿيار تاڻي ورتو!! نه ويندين، گوڏو ته سمجهه ويو پر خير گهر حياتيءَ جو! ۽ پوءِ ڳجهي ڊيل ….همراهه وڃي گهر کپائي پاڻ بچائي … اهو حال هن وقت سڄي ضلعي جو آهي جنهن جي خبر آفيسرن کي به آهي پر چئي ڪير؟ حيدرآباد جتي ڪافي عرصي کان امن ايترو قائم ٿيل هيو جو ڪابه وڏي واردات ممڪن نه هئي پر موٽر سائيڪلن جون چوريون ۽ ڦر هلنديون رهن ٿيون. رڪارڊ موجب روزانه 2 کان 5 تائين چوريءَ جون وارداتون معمول بڻيل آهن، اتي ٻه ڏينهن اڳ ڪروڙن جي ڦر جو واقعو پيش آيو آهي. حيدرآباد جي سٽيزن ڪالوني ۾سعودي جي ڪنهن همراهه جي گهر مان هٿياربند گهڙي ڪروڙن جو سون ۽ روڪ رقم ڦر ڪئي آهي. اهڙي واردات کان پوءِ پوليس جي ايڪسپرٽ آفيسرن کي ڪم سان لڳايو ويو هوندو، کين چيو ويو هوندو ته سالن کان ايس ايڇ او لڳل آهيو، اسان کي خبر آهي ته توهان ڇا ڇا گڏ ڪيو آهي، پر ان تي بحث نه ٿا ڪيون بس هن واردات ۾ ملوث ماڻهو کپن … ۽ جيڪر ڪنهن ايس ايڇ او ڪا خوشخبري ڏئي وڌي ته سمجهو ته ان جا لک ٿورا، پر ڦٽي انهن جي جيڪي زنده به گرفتار ٿيا پر هوندا نه حيات !!پوليس جي اهڙين ڪاررواين جي عوام توڙي ميڊيا ان ڪري سپورٽ پئي ڪئي جو سنڌ امن جي گهرجائو رهي آهي.

حيدرآباد، جيڪا ڪنهن دؤر ۾ اي ڊي خواجه جي انتظام هيٺ به رهي آهي، سندس دور ۾ به پوليس مقابلا ٿيا هيا. رڪارڊ موجب 12 ڏوهاري مارجي ويا هئا، جيڪي نامي گرامي هئا. اڳ پوليس مقابلو ميڊيا جي لاءِ انتهائي اهم هوندو هو. ڇو ته پوليس مقابلو ڪا ننڍي خبر نه هوندي هئي، اُن ۾ ڏوهارين سان گڏ پوليس اهلڪار به متاثر ٿيندا هئا ۽ ميڊيا ان خبر کي انتهائي نمايان ان ڪري رکندي هئي جو پوليس مقابلا سچا هوندا هئا پر موجوده پوليس حيدرآباد ۾ شروع ۾ مقابله ڪيا انهن کي ميڊيا نمايان ڪوريج ڏني پر هاڻ اهي مقابلا پنهنجي افاديت وڃائي رهيا آهن.

نجي ڪچهرين ۾ اڪثر اها ڳالهه ڪئي وڃي ٿي ته امن صرف حيدرآباد ۾ ئي نه ٿيو آهي پر سڄي سنڌ ۾ مجموعي طور تي امن قائم آهي، ان ۾ اسان جي انٽيليجنس ادارن جو وڏو ڪردار آهي. ڇو ته انٽيليجنس ادارن جو ڪم ۽ پوليس جي ڪم ۾ فرق هو پر جيئن ئي انهن ادارن کي ڏوهارين جي خلاف ڪاررواين جا حڪم مليا، انهن ادارن پوليس سان گڏجي ڏوهارين جي خلاف جيڪي ٽارگيٽ آپريشن ڪيا، جنهن جي نتيجي ۾ هن وقت سنڌ پرامن بڻيل آهي. ان ڪري اهو چوڻ ته ڪنهن هڪ پوليس آفيسر هجڻ سان امن ٿيو آهي ته اها به ناانصافي آهي. ڇو ته گڏيل ۽ ٽيم ورڪ سبب سنڌ پرامن بڻي آهي پر مڃجي کڻي ته ان ۾ پوليس جو ڪردار به آهي پر پوليس ته اتي اڳ به موجود هئي، اهي ئي آفيسر اڳ به هئا نه صرف ايترو پر عهدن تي به هئا پوءِ به سنڌ ڀوڳي رهي هئي، ماڻهو ڦرجي رهيا هئا، ماڻهن کي ملڪيتن کان محروم ڪيو پئي ويو پر هن ڀيري چيو وڃي ٿو ته انٽيليجنس ادارن کي خاص حڪم ٿيا هئا ته هاڻ گهڻو ٿيو ۽ پوءِ اسان ڏٺو ته ڪيئن امن ٿي ويو ۽ ماڻهو به سمجهن ٿا ته اهو امن ڪنهن ڪرايو. ڇو ته  تمام وڏو عرصو ماڻهو ڏوهارين جي رحم ڪرم تي هئا، پوليس جا آفيسر ماڻهن کي ڏس پتو ڏيندا هئا ته فلاڻي ڏوهاري يا پاٿاريدار سان رابطو ڪيو ته توهان جو مسئلو حل ٿي ويندو پر هاڻ ائين نه آهي، پاٿاريدار توڙي ڏوهاري لڪڻ ۾ پورا آهن، ان ۾ ڪردار جنهن جو به آهي پر ساراهه جوڳو آهي، جو سنڌ سڪون ۾ آهي. هاڻ ضرورت ان ڳالهه جي آهي ته پوليسنگ کي بهتر ڪيو وڃي، جنهن جي اميد اي ڊي خواجه کان وڌيڪ سنڌ ٻيو ڪنهن مان ڪري سگهي ٿي؟

burfat1@hotmail.com

 

 

پاناما ليڪس انڪشافن بعد وزير اعظم جو ڪميشن جوڙڻ جو اعلان

وڪي ليڪس بعد هاڻي پاناما ليڪس مختلف ملڪن جي سياستدانن جون ننڊون ڦٽائي ڇڏيو آهي، الزامن جي جواب ۾ وزيراعظم نوازشريف پاران پاناما ليڪس جي معاملي تي هڪ اعليٰ سطحي جوڊيشل ڪميشن قائم ڪرڻ جو اعلان ڪري ڇڏيو آهي قوم کي خطاب ڪندي  وزير اعظم محمد نواز شريف جو چوڻ آهي ته جوڊيشل ڪميشن سپريم ڪورٽ جي رٽائرڊ جج جي سربراهي ۾ قائم ڪيو ويندو، هن الزامن جي ترديد ڪندي چيو ته سياسي مقصدن لاءِ منهنجي خاندان کي نشانو بڻايو پيو وڃي، زندگي ۾ پهريون ڀيرو ذاتي وضاحت لاءِ پيش ٿيو آهيان،

مختلف وقتن تي اتفاق فائونڊيشن کي ختم ڪرڻ جي ڪوشش ڪرڻ جي باوجود پنهنجي مٿان بقايائون پورا 6 ارب سمورا قرض ادا ڪيا ۽ اسان جي خاندان قرض معاف نه ڪرايو ۽ نه مارڪ اپ، هاڻي اسان مٿان ڪنهن بينڪ جي هڪ پائي به ناهي، حڪومت ۾ رهندي ڪڏهن ڪاروبار کي شامل نه ڪيو، وزيراعظم مطابق ساٿين جي مشورو هو ته منهنجي مٿان ڪو الزام ناهي ۽ منهنجا پٽ عاقل و بالغ آهن ان لاءِ مون کي ان معاملي تي وضاحت جي ضرورت ناهي.

هوڏانهن  پناما لِيڪس جي انڪشافن کانپوءِ نيب آف شور ڪمپنين جي مالڪن خلاف ڪارروائي جو فيصلو ڪري ورتو،  ميڊيا ۾ آيل خبرن موجب  نيب جو موقف آهي ته پنامالِيڪس جي انڪشافن کي نظر انداز نٿو ڪري سگهجي.

برطانوي خابرو اداري پنامالِڪس جي ڇرڪائيندڙ انڪشافن کانپوءِ پاڪستان، ڀارت ۽ ٻين ملڪن ۾ ٿرٿلو متل آهي، اڪثر ملڪن ۾ ڪارروائيون به شروع ٿي چڪيون آهن. پنامالِڪس جي انڪشافن جو پاڪستان ۾ به قومي احتساب بيورو پاران سختي سان نوٽيس ورتو ويو آهي.نيب پرڏيهه ۾ غير قانوني اثاثا ٺاهيندڙ ۽ آف شور ڪمپنين جي مالڪن خلاف ڪارروائي جو فيصلو ڪري ورتو آهي.

اڳ وڪي ليڪس پوري دنيا ۾ ٿرٿلو مچائي چڪي آهي هاڻي وري پامانا ليڪس جا انڪشافن بعد مختلف ملڪن ۾ مظاهرا به ڪيا پيا وڃڻ ته ڪٿي وزير اعظم توڙي صدر انڪشافن بعد پنهنجي عهدن تان استعيفائون پيا ڏين، پاڪستان م وزير اعظم جوڊيشل ڪميشن جوڙڻ جو اعلان ڪيو آهي ته وري نيب به جاڳي پئي  آهي هاڻي وقت ٻڌائيندو ته موجوده اعلانن تي ڪيتري قدر عمل ٿيندو ڇو جو عوام ڄاڻي ٿو ته اهڙا اعلان ڪري صرف مدو ورتو ويندو آهي جئين اهڙن معاملن جو آهستي آهستي اثر ختم ٿي وڃي ۽ ڪو نئون معاملون جنم وٺي جئين اعلانن کي ردي جي ٽوڪري حوالي ڪري اڳتي پير وڌايو وڃي.