تازيون خبرون

Daily Archives: April 7, 2016

ميانوالي ۾ بس ۽ ڪنٽينر ۾ ٽڪر،15 مسافر فوت،21 زخمي

ميانوالي(اي پي پي) ميانوالي کان اٽڪل 35 ڪلوميٽر پري هنوئي پوليس ٿاڻي جي حد ۾ مسافر بس ۽ ٽريڪٽر  ٽرالي وچ ۾ آمهون سامهون ٽڪر جي نتيجي ۾ 15 ڄڻا موقعي تي  اجل جو شڪار ۽ 20 کان وڌيڪ زخمي ٿي پيا.  پوليس مطابق  مسافر بس ڪوٽ ادو  کان راولپنڊي وڃي رهي هئي ته سامهون ايندڙ ٽريڪٽر ٽرالي سان ٽڪرائجي وئي جنهن جي نتيجي ۾ 15 ڄڻا موقعي تي ئي اجل جو شڪار  ۽ 20 کان وڌيڪ زخمي ٿي پيا. لاش ۽ زخمين کي ڊسٽرڪٽ هيڊ ڪوارٽر اسپتال ميانوالي منتقل ڪيو ويو جتي انتظاميه طرفان ايمرجنسي لاڳو ڪئي وئي. اسپتال جي ذريعن ٻڌايو ته ٽن زخمين جي حالت ڳڻتي جوڳي آهي جڏهن ته ٻين جي حالت خطري کان ٻاهر آهي. ڊي پي او ميانوالي صادق اي ڊوگر حادثي واري هنڌ پهچي امدادي ڪاررواين جي نگراني ڪئي. ضلعي حڪومت جي ذريعن مطابق پنجاب جي وڏي وزير محمد شهباز شريف زخمين کي علاج جو بهترين سهولتون مهيا ڪرڻ جي هدايت ڪئي آهي

 

آخري دهشتگرد جي خاتمي تائين ٽارگيٽيڊ آپريشن جاري رهندو : وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته آخري دهشتگرد جي خاتمي تائين ٽارگيٽيڊ آپريشن جاري رهندو ۽ رينجرز ۽ سنڌ پوليس جي وڏي ڪاميابي آهي ته شهر ۾ امن جو قيام ممڪن ٿيو آهي ۽ هاڻ اسان ديرپا امن امان لاءِ ڪوشان آهيون. اهڙن خيالن جو اظهار هن اڄ اربع ڏينهن ڊائريڪٽر جنرل رينجرز ميجر جنرل بلال اڪبر سان وزيراعليٰ هائوس ۾ ملاقات جي دوران ڪيو. ان ملاقات دوران ڊي جي رينجرز ميجر جنرل بلال اڪبر سنڌ جي وڏي وزير دهشتگردن خلاف ٽارگيٽيڊ آپريش، لياري آپريشن ۽ شهر ۾ امن امان جي صورتحال جي حوالي سان بريفنگ ڏني. سنڌ جي وڏي وزير شهر ۾ امن مان جي بحاليءَ جي حوالي سان رينجرز جي ڪوششن جي واکاڻ ڪئي ۽ چيو ته هاڻ ان امن امان جي فضا کي برقرار رکڻ ئي اصل چيلنج آهي. وڏي وزير وڌيڪ چيو ته ان ۾ ڪو شڪ ناهي ته اسان جي قانون لاڳو ڪندڙ ادارن حساس ادارن جي سهڪار سان شهر جي مختلف علائقن مان دهشتگرديءَ جي خاتمي جي حوالي سان زبردست ڪاميابيون حاصل ڪيو آهن. سنڌ جي وڏي وزير ڊي جي رينجرز کي سڀاڻي خميس ڏينهن (7 اپريل) تي ڪراچي جي اين اي 245 ۽ پي ايس 115 ۾ ٿيندڙ ننڍي چونڊن جي موقعي تي امن امان جي صورتحال کي يقيني بڻائڻ جي هدايت ڪئي.

 

پاناما ليڪس معاملي بابت عدالتي جاچ ڪميشن لاءِ سپريم ڪورٽ ۽ هائيڪورٽن جي رٽائرڊ ججن جي فهرست وزيراعظم حوالي

اسلام آباد (بيورو) پاناما ليڪس جي معاملي تي جاچ لاءِ قانون واري وزارت سپريم ڪورٽ ۽ هائيڪورٽ جي رٽائرڊ ججن جا نالا وزيراعظم نواز شريف ڏانهن اماڻي ڇڏيا، ذريعن مطابق وزيراعظم نواز شريف پاران پاناما ليڪس ۾ سندس ڪٽنب تي ڳجهي طريقي سان ملڪيت ٺاهڻ وارن انڪشافن کانپوءِ اعلانيل عدالتي جاچ ڪميشن لاءِ قانون واري وزارت سپريم ڪورٽ ۽ چئني هائيڪورٽن جي رٽائرڊ ججن جي هڪ فهرست کيس اماڻي ڇڏي آهي، ذريعن جو چوڻ آهي ته وزيراعظم نواز شريف جي صدارت ۾ اڄ اهم اجلاس ٿيندو، جنهن ۾ عدالتي ڪميشن لاءِ سپريم ڪورٽ جي هڪ ۽ هائيڪورٽ جي ٻن رٽائرڊ ججن جا نالا شامل ڪرڻ جو امڪان آهي، جڏهن ته پي سي او هيٺ قسم کڻندڙ جج ان ڪميشن ۾ شامل نه ڪيا ويندا، ذريعن مطابق وزيراعظم نواز شريف پاران ڪميشن لاءِ ججن جي منظُوري کانپوءِ جاچ لاءِ ان جا شرط شروط ۽ قاعدا توڙي ضابطا طئه ڪيا ويندا، ان ڳاله جا چٽا امڪان آهن ته وزيراعظم نواز شريف جو پٽ حسين نواز پاڻ ڪميشن سامهون پيش ٿي سعودي عرب ۾ پنهنجي اسٽيل ملز ۽ ٻي ملڪيت بابت بيان قلمبند ڪرائي.

قلات ۾ فورسز جو آپريشن، 15 دهشتگرد مارڻ جي دعويٰ

ڪوئيٽا(م.ڊ) بلوچستان جي علائقي قلات ۾ قانون لاڳو ڪندڙ ادارن جي آپريشن ۾ پندرهن دهشتگرد مارجي ويا ۽ ڪيترائي زخمي ٿي پيا. سرڪاري ذريعن جو چوڻ آهي ته قلات ۾ جوهان واري علائقي ۾ سيڪيورٽي فورسز سرچ آپريشن ڪيو. آپريشن دوران دهشتگردن سان مقابلو ٿي پيو، جنهن جي نتيجي ۾ 15 دهشتگرد مارجي ويا ۽ ڪيترائي زخمي ٿي پيا. آپريشن دوران فورسز دهشتگردن جي ٻن ٺڪاڻن کي به تباهه ڪري ڇڏيو. سرڪاري ذريعن جو چوڻ آهي ته مارجي ويل دهشتگردن وٽان وڏي انگ ۾ هٿيار ۽ بارود هٿ آيو آهي.

 

جن کي انڪوائري ڪميشن تي اعتماد ناهي اهي سپريم ڪورٽ ۾ وڃن: خواجه آصف

اسلام آباد(بيورو) بچاءُ بابت وفاقي وزير خواجه آصف چيو آهي ته پاناما ليڪس جي انڪشافن تي ٺهندڙ انڪوائري ڪميشن تي اعتماد ناهي اهي سپريم ڪورٽ ۾ وڃن. نجي ٽي وي چينل جيو نيوز جي پروگرام ڪيپيٽل ٽاڪ ۾ ڳالهائيندي وفاقي وزير خواجه آصف چيو ته سپريم ڪورٽ تي اڄ به اٽل اعتماد آهي، الله خير ڪندو، سڀاڻي اسيملي اجلاس ۾ خبر پئجي ويندي. هن چيو ته پاناما ليڪس ۾ محترمه بينظير ڀٽو ۽ رحمان ملڪ جا نالا به شامل آهن، پيپلزپارٽي جي سڄي ڄڃ پاناما پيپرز ۾ آهي. جن جو نالو پاناما پيپر ۾ ناهي مخالفن کي اهي نالا نظر نه پيا اچن. خواجه آصف وڌيڪ چيو ته عمران خان 3 سال پهريان منهنجي خاف عزت کي ڇيهو رسائڻ جي دعويٰ داخل ڪئي هئي. جن کي دولت لڪائڻي هوندي آهي اهي پنهنجي نالي تي نه وڪيل جي نالي تي اثاثا ٺاهين ٿا. هن چيو ته گدون ۾ ڪمپني جو ٺاهڻ به آف شور ڪمپني جهڙو آهي.

 

امن امان جي حوالي سان ايف سي قدر جوڳيون خدمتون ۽ قربانيون ڏنيون آهنۡ: چوڌري نثار

اسلام آباد (اي پي پي) گهرو معاملن واري وفاقي وزير چوڌري نثار علي خان غيرملڪي جاسوس جي گرفتاري تي ايف سي بلوچستان جي ڪارڪردگي کي واکاڻيو آهي. اربع ڏينهن گهرو وزارت طرفان جاري بيان موجب گهرو وزير چيو ته صوبي ۾ امن امان جي حوالي سان ايف سي قدر جوڳيون خدمتون ۽ قربانيون ڏنيون آهن. جن کي سڄي قوم قدر سان ڏسي ٿي. آءِ جي ايف سي جي نالي تي پنهنجي پيغام ۾ گهرو وزير چيو ته حڪومت ايف سي بلوچستان جي ڪارڪردگي کي واکاڻي ٿي.

 

پاناما ليڪس:لاهور هائيڪورٽ ۾ وزيراعظم نواز شريف کي نااهل قرار ڏيڻ لاءِ درخواست ٻڌڻي لاءِ منظور

لاهور (م.ڊ) لاهور هائيڪورٽ پاناما ليڪس جي بنياد تي وزيراعظم نواز شريف کي نااهل قرار ڏيڻ لاءِ داخل ڪيل درخواست ٻڌڻي لاءِ منظور ڪري ورتي، تحريڪ انصاف لائرز فورم جي صدر گوهر نواز سڌو پاناما ليڪس جي بنياد تي وزيراعظم نواز شريف کي نااهل قرار ڏيڻ لاءِ لاهور هائيڪورٽ ۾ درخواست داخل ڪئي، درخواست ۾ موقف ڏنو ويو ته سياستدانن ملڪي ناڻو لٽي پرڏيهه ۾ ملڪيت ٺاهي آهي، پاناما ليڪس جي ڪاغذن جي بنياد تي اهڙن سياستدانن کي نااهل قرار ڏنو وڃي ۽ انهن خلاف مني لانڊرنگ جو ڪيس داخل ڪيو وڃي، هائيڪورٽ جي رجسٽرار آفيس طرفان درخواست ۾ وزيراعظم کي ڌر بڻائڻ تي اعتراض واريو ويو، رجسٽرار آفيس جي اهڙي اعتراض خلاف پٽيشنر سڌي ريت هائيڪورٽ سان رابطو ڪيو، جنهن آفيس جو اعتراض ختم ڪندي درخواست شروعاتي ٻڌڻي لاءِ منظور ڪري ورتي، لاهور هائيڪورٽ رجسٽرار آفيس کي هدايت ڪئي آهي ته درخواست جي ٻڌڻي لاءِ تاريخ مقرر ڪئي وڃي.001

 

پاناما ليڪس تي ٻيهر ڊي چوڪ ياد پيو اچي پر ٿي سگهي ٿو هن ڀيري ڊگهو عرصو ڌرڻي جي ضرورت نه پوي:عمران خان

پشاور(م.ڊ)  پاڪستان تحريڪ انصاف جي چيئرمين عمران خان چيو آهي ته پاناما ليڪس تي کيس ٻيهر ڊي چوڪ ياد اچي رهيو آهي ۽ ٿي سگهي ٿو ته هن ڀيري ڊگهي عرصي تان ڌرڻي جي ضرورت نه پوي، پشاور ۾ پريس ڪانفرنس ڪندي عمران خان چيو ته پاناما ليڪس ۾ جيڪي ڪجهه منظرِ عام تي آيو آهي اها ته اڃا شروعات آهي، اڃا ته هڪ ڪروڙ دستاويز سامهون اچڻ باقي آهن، جنهن ۾ ڪيترائي ماڻهو سامهون ايندا، جيڪي ڊنل آهن ڇاڪاڻ ته آف شور ڪمپنيون مني لانڊرنگ ۽ ٽئڪس چوري لاءِ ئي ٺاهيون وينديون آهن، هن چيو ته ڀارت ۾ سپريم ڪورٽ پاناما ليڪس تي جاچ لاءِ ڪاميٽي جوڙي 25اپريل تائين رپورٽ پيش ڪرڻ جو وقت ڏنو آهي، سندس چوڻ هو ته معصوم شڪل ٺاهي قوم کي دوکو نٿو ڏئي سگهجي، هاڻ نواز شريف کي قوم سان سچ ڳالهائڻو پوندو، اسان اهو معاملو دٻائڻ نه ڏينداسين ۽ اهو معاملو قومي اسيمبلي ۾ اٿارينداسين، عمران خان چيو ته اسان چاهيون ٿا ته خيبرپختونخواهه پوليس سياسي دٻاءُ کان مٿانهي ٿي قانون مطابق ڪارروائي ڪري، جنهن لاءِ سان نئون پوليس ايڪٽ آڻي رهيا آهيون، هن چيو ته نئين ايڪٽ تحت هيٺئين سطح تائين اداري ۾ احتساب يقيني بڻايو ويندو ۽ پوليس کي مقررين ۽ بدلين ذريعي بليڪ ميل نه ڪري سگهبو.

 

عالمي سطح تي ڦاهين ۾ اضافو خطرناڪ آهي : ايمنسٽي انٽرنيشنل

لنڊن (اي پي پي) انساني حقن جي عالمي تنظيم ايمنسٽي انٽرنيشنل چيو آهي ته 2015ع ۾ گهٽ ۾ گهٽ 1634 ماڻهن کي ڦاهي ڏني وئي جيڪا ان کان اڳ سال جي مقابلي ۾ 50 سيڪڙو کان پڻ گهٽ آهي. برطانوي نشرياتي اداري موجب ايمنسٽي موجب دنيا ۾ ڏنل ڦاهين ۾ ايران، سعودي عرب ۽ پاڪستان جو حصو 89 سيڪڙو آهي. تنظيم جو چوڻ آهي ته ان رپورٽ ۾ چين ۾ ڏنل ڦاهي جو ذڪر ناهي. ۽ امڪان آهي ته مجموعي طور هزارن ۾ اضافو هجي ڇو ته چين ۾ ڦاهين جي رڪارڊ کي ڳجهو رکيو ويندو آهي. ايمنسٽي موجب چين هيستائين ڦاهي ڏيندڙ ملڪن ۾ پهرين نمبر تي آهي. اندازي موجب 2015ع ۾ هزارين ماڻهن کي موت جي سزا ڏني وئي جڏهن ته ٻين هزارن کي موت جي سزا ٻڌائي وئي پر ايمنسٽي موجب اهڙا اشارا مليا آهن ته چين ۾ تازن سالن ۾ موت جي سزا ڏيڻ ۾ گهٽتائي ٿي آهي. پر موت جي سزا کي ڳجهو رکڻ سبب يقيني طور تي ان جي تصديق ڪرڻ ممڪن ناهي. تنظيم موجب ايران ۾ گذريل سال 977 ماڻهن کي ڦاهي ڏني وئي ۽ انهن مان اڪثريت کي منشيات سان متعلق ڏوهن ڪري ڦاهي ڏني وئي آهي. پاڪستان ۾ 326 ماڻهن کي ڦاهي ڏيڻ واري سزا تي عمل ڪيو ويو ۽ اهو ملڪي تاريخ ۾ هڪ سال ۾ ڏنل سڀ کان وڌيڪ ڦاهيون آهن. سعودي عرب ۾ 2014ع جي ڀيٽ ۾ 2015ع ۾ موت جي سزا ڏيڻ ۾ 76 سيڪڙو اضافو ٿيو ۽ 158 ماڻهن کي موت جي سزا ڏني وئي. سعودي عرب ۾اڪثر سسي ڌڙ کان ڌار ڪئي ويندي آهي جڏهن ته اڪثر کي فائرنگ اسڪواڊ ذريعي عمل ڪندا آهن ۽ اڪثر ڪري لاشن کي عوامي هنڌن تي پڻ ڏيکاريو ويو آهي. ايمنسٽي جو چوڻ آهي ته ڊسمبر 2014ع ۾ شهرين جي ڦاهي تي قانوني مهلت کان هٽي ڪري پاڪستان ۾ حڪومت جي منظوري سان ڦاهي ڏيڻ جو دور شروع ٿي ويو آهي. موت جي سزا ڏيندڙ پنجن وڏن ملڪن ۾ پنجون وڏو ملڪ آمريڪا آهي. جتي 2015ع ۾ 28 ماڻهن کي موت جي سزا ٻڌائي وئي ۽ اها تعداد 1999 کان پوءِ سڀ کان گهٽ آهي. ايمنسٽي جي سيڪريٽري جنرل سليل شيٽي چيو آهي ته ڦاهين ۾ گذريل سال اضافو انتهائي پريشاني جوڳو رهيو. گذريل سال 25 سالن وچ ۾ ڪڏهن به سڄي دنيا ۾ حڪومتن ايتريون ڦاهيون نه ڏينون هونديون.

 

ايان علي جو نالو اي سي ايل مان ڪڍڻ خلاف حڪومتي درخواست تي فيصلو محفوظ ڪري ڇڏيو

اسلام آباد (بيورو)  سپريم ڪورٽ، سپر ماڊل ايان علي جو نالو اي سي ايل مان ڪڍڻ خلاف حڪومت جي درخواست تي فيصلو محفوظ ڪري ورتو ، وڪيل لطيف کوسا دليل ڏيندي چيو آهي ته ايان علي مان ملڪي سلامتي کي خطرو ناهي، سندس پرڏيهه وڃڻ سان ڪو طوفان نه ايندو.جسٽس اعجاز افضل جي سربراهي ۾ سپريم ڪورٽ جي ٽـَي رڪني بينچ سپر ماڊل ايان علي جو نالو اي سي ايل مان ڪڍڻ خلاف حڪومتي جي درخواست جي ٻڌڻي ڪئي. ڪسٽمز جي وڪيل دليل ڏيندي چيو ته ايان علي وٽان 5 کان 6 لک ڊالر آمريڪي ڪرنسي هٿ آئي، هن ڪيس ۾ سمورا ثبوت موجود آهن. هن  چيو ته شاهدن کي گهرائي هڪ مهيني اندر جاچ مڪمل ٿي سگهي ٿي، چاهيون ٿا ته ايان علي کي پرڏيهه وڃڻ جي اجازت ڏيڻ بدران جاچ ۾ شامل ٿيڻ جو چيو وڃي. ايان علي جي وڪيل لطيف کوسا دليل ڏيندي چيو ته وفاقي گهرو وزير چوڌري نثار چئي چڪو آهي ته ڪسٽمز جي چوڻ تي ايان علي جو نالو اي سي ايل ۾ شامل ڪيو ويو،  ايان جو نالو اي سي ايل جي قانون جي زمري ۾ نٿو اچي، جيڪڏهن اهو ثابت ٿي وڃي ته ايان علي کي جيڪا وڻي سزا ڏني وڃي. عدالت ريمارڪس ڏنا ته ڪنهن جي ٻاهر وڃڻ جو اختيار حڪومت وٽ هئڻ گهرجي، جيستائين ڏوهه ثابت نه ٿئي، تيستائين جوابدار کي ملڪ اندر ۽ ٻاهر وڃڻ جي سفر کان روڪي نٿو سگهجي. لطيف کوسا دليل ڏنا ته ايان علي جي ٻاهر وڃڻ سان ملڪ ۾ ڪو به طوفان نه ايندو ۽ نه ئي ان مان ملڪي سلامتي کي خطرو آهي. عدالت وڪيلن جا دليل ٻڌڻ کانپوءِ درخواست تي فيصلو محفوظ ڪري ورتو.