تازيون خبرون

Daily Archives: April 5, 2016

نوابشاهه: شهيد ڀٽو جي جيالن جي ڪار اونڌي، 5 ڪارڪن فوت

ڪراچي/نوابشاهه(نمائندن وٽان)قاضي احمد لڳ ٺٽي واسي پيپلز پارٽي جي جيالن سان روڊ حادثو،5 ڄڻا فوت.شهيد ذوالفقار علي ڀٽو جي 37 هين ورسي تي ٺتي مان گڙهي خدا بخش ويندڙن سان  قاضي احمد لڳ ڪار تيزرفتارهجڻ سبب  ريڻ شاخ ۾ ڪري پئي،جنهن جي نتيجي ۾ 5 ڄڻا فوت ٿي ويا.فوتين جي سڃاڻپ  ٺٽو،ميرپور شاڪرو واسي عبدالرحمان تنيو ۽ ٻين طور ٿي آهي فوتين جا لاش ڪڍي اسپتال پهچايا ويا آهن. پاڪستان پيپلزپارٽي جي چيئرمين بلاول ڀٽو زرداريءَ ٺٽي کان شهيد ذوالفقار علي ڀٽو جي ورسي ۾ شرڪت لاءِ ڳڙهي خدا بخش ويندڙ پ پ ڪارڪنن جي ڪار قاضي احمد لڳ حادثي جو شڪار ٿيڻ جي نتيجي ۾ 5 پ پ ڪارڪنن جي فوت ٿيڻ تي انتهائي ڏک ۽ افسوس جو اظهار ڪيو آهي. ٺٽي ضلعي جي لقمان ڳوٺ جي رهواسي پ پ ڪارڪنن جي ڪار قاضي احمد لڳ حادثي جو شڪار ٿيڻ بعد ڪلٽي ٿي شاخ ۾ ڪري پئي جنهن جي نتيجي ۾ يو سي ٻهارا جو چيئرمين  عبدالطيف سومرو سميت حاجي موريو سومرو، ابوبڪر سومرو، عبدالرحمان تنيو۽ پوڙهو خان فوت ٿي ويا. واضح رهي ته شهيد ذوالفقار علي ڀٽو سان عقيدت طور ملڪ جي ڏورانهن علائقن مان لکين ماڻهوهر سال ورسي واري پروگرام ۾ شرڪت لاءِ ڳڙهي خدابخش ڀٽو ايندا آهن. چيئرمين بلاول ڀٽو زرداري چيو ته پارٽي ڪارڪنن جي فوت ٿيڻ واري خبر ٻڌڻ تي آئون ڏک ۾ ورتل آهيان. پيپلزپارٽي جي چيئرمين حادثي ۾ فوت ٿيل ڪارڪنن جي پونئرن سان همدردي جو اظهار ڪندي دعا ڪئي ته الله تعاليٰ فوت ٿيلن کي جنت الفردوس ۾ جاءِ ڏي ۽ سوڳوار پونئرن کي صبر ۽ جميل جي توفيق عطا فرمائي. سنڌ جي وڏي وزير سيد قائم علي شاهه قاضي احمد ويجهو روڊ حادثي ۾ انساني جانين جي ضايع ٿيڻ تي ڏک ۽ افسوس جو اظهار ڪندي سندن گهرڀاتين سان دلي تعزيت ڪئي آهي. سي ايم هائوس مان جاري بيان موجب قاضي احمد ڀرسان روڊ حادثي ۾ پيپلز پارٽي جا 5 ڪارڪن فوت ٿي ويا ۽ ان تي وڏي وزير پنهنجي گهري ڏک جو اظهار ڪندي فوتي ڪارڪنن جي وارثن سان ڏک ونڊيندي چيو ته پارٽي کين اڪيلو نه ڇڏيندي. سنڌ جي وڏي وزير طرفان ڊي سي نوابشاهه گهنور لغاري کي هدايت ڪئي وئي ته هُو ورڊ حادثي ۾ فوت ٿيل پنجن ئي پيپلز پارٽي ڪارڪنن جا مڙهه ٺٽي موڪلڻ جا انتظام ڪري ۽ ڊي سي ٺٽي کي به هدايت ڪئي وئي ته هُو شهيد ڪارڪنن جي تدفين ۾ ڀرپور سهڪار ڪري.

 

پريانڪا مضبوط ذهن جي مالڪ،هن ڪڏهن به آپگهات جي ڪوشش ناهي ڪئي:امڙ

ممبئي (شوبز نيوز) بالي ووڊ اداڪاره پريانڪا چوپڙا جي ماءُ چيو آهي ته سندس ڌيءَ جي آپگهات ڪرڻ جي ڪوشش واري خبر بلڪل بي بنياد آهي، اڳوڻي مينيجر دشمني ۾ ڪوڙ ڳالهايو آهي، هن چيو ته جاجو پنهنجي بيان تي معافي گهري نه ته هو جيل ويندو، پريانڪا جي ماءُ ٽوئٽر تي پريانڪا جي اڳوڻي مينيجر جاجو خلاف بيان ڏيندي چيو آهي ته جاجو جو پريانڪا بابت اهو چوڻ ته هن ڪيترائي ڀيرا آپگهات جي ڪوشش ڪئي ۽ مان کيس بچايو، بلڪل غلط آهي، ڇو ته سندس ڌيءَ شروع کان ئي مضبوط ذهن جي مالڪ آهي ۽ دنيا جي سامهون فخر سان هلڻ ڄاڻي ٿي، 33 سالن جي پريانڪا جي ماءُ چيو ته جاجو جا پريانڪا سان ڪيترن ئي معاملن تي اختلاف هلندڙ آهن،جنهن سبب هن ڪوڙ ڳالهايو آهي، انهي جي ڪري هو جيل جي هوا پڻ کائي چڪو آهي،پريانڪا ڪجهه سال پهرين جاجو کي نوڪري مان ڪڍي ڇڏيو هو ۽ هن پريانڪا خلاف پئسا ادا نه ڪرڻ جو ڪيس داخل ڪيو هو پر پريانڪا جي ماءُ جي شڪايت تي کيس 67 ڏينهن جيل ۾ پڻ وڌو ويو.

سني ليون کي شاهه رخ خان سان گڏ فلم ۾ ڪم ڪرڻ تي فخر

ممبئي (شوبز نيوز) بالي ووڊ جي بولڊ اداڪارا سني ليون فلم رئيس ۾ پهريون ڀيرو بالي ووڊ ڪنگ شاهه رخ خان سان گڏ آئثم سانگ ۾ جلوا ڏيکاريندي، جنهن جي شوٽنگ دوران هن شاهه رخ سان ڪم ڪرڻ واري تجربي کي يقيين نه اچڻ جوڳو قرار ڏنو آهي، هڪ انٽرويو ۾ سني ليون جو چوڻ هو ته شاهه رخ خان سان گڏ فلم ۾ ڪرڻ بلڪل ائين آهي، جيئن ڪو خواب سچ ثابت ٿيندو آهي، هن چيو ته اهو تجربو مون لاءِ يقين نه اچڻ جوڳو ۽ فخر جي ڳالهه آهي، سني ليون چيو ته گاني جي شوٽنگ دوران هوءَ شاهه رخ خان جي سامهون تمام گهڻي پريساني جو شڪار به رهي.

محسن خان کي چيف سليڪٽر ۽ وڪيٽ ڪيپر سرفراز احمد کي ٽي ٽوئنٽي ڪپتان بڻائڻ جو فيصلو

لاهور (اسپورٽس نيوز) فيصلي جو وقت اچي ويو،ورلڊ ٽي ٽوئنٽي ۽ ايشيا ڪپ ۾ ناڪامي جي ذميدارن خلاف آپريشن ڪلين اپ ڪرڻ جو اعلان اڄ ٿي رهيو آهي.ذريعن مطابق محسن خان کي چيف سليڪٽر ۽ وڪيٽ ڪيپر سرفراز احمد کي ٽي ٽوئنٽي ڪپتان بڻائڻ جو حتمي فيصلو ٿي ويو،جڏهن ته قانون مطابق ٻين عهدن جي لاءِ به اڄ ميڊيا ذريعي اشتهار ڏنا ويندا.مستقبل ۾ عالمي مقابلن ۾ وڏين ناڪامين کان بچڻ لاءِ ۽ ملڪي ڪرڪيٽ جو ڍانچو صحيح ڪرڻ خاطر ڊگهي عرصي تائين منصوبي تي به روشني وڌي ويندي.جڏهن ته شاهد آفريدي عالمي ورلڊ ڪپ ۾ ناڪامي جي مڃيندي پاڻ مُرادو ڪرڪيٽ ڇڏڻ جو فيصلو ڪري ڇڏيو جڏهن ته رانديگر جي حيثيت ۾ راند جاري رکڻ جو سنگل ڏنو آهي ۽ ڪرڪيٽ بورڊ به اهڙي فيصلي جي آجيان ڪئي آهي.

4 اپريل، هڪ ناقابل فراموش ڏينهن: بشير رياض

4 اپريل 1979ع پاڪستان جي پهرين چونڊيل وزيراعظم شهيد ذوالفقار علي ڀٽو جي عدالتي قتل جو ڏينهن آهي،4-3 تحت ورهايل فيصلوعدالتي تاريخ ۽ آمريت جي دور جو هڪ شرمناڪ باب آهي،هڪ آمرشخصي اقتدار۽ ٻاهرين قوتن جو ڇاڙتو بنجي قائد عوام کي عبرتناڪ مثال بنائڻ لاءِ کيس ڪال ڪوٺڙين ۾ اذيت جو نشانو بنايوپر بيشمار اذيتون ۽ ظلم سندس همت ۽ عزم کي ٽوڙي نه سگهيو، هن هڪ ظالم حڪمران سان اصولن تي سمجهوتو نه ڪيو،ضياءَ جي آمريت خلاف سينو تاڻي مصيبتون، اذيتون ۽ ظلم برداشت ڪيا، تشدد به ان جي پختي عزم کي شڪست نه ڏئي سگهيو،شهيد ذوالفقار علي ڀٽو بي مثال بهادري سان پنهنجي ان قول کي سچ ثابت ڪيوته جيڪڏهن پاڪستان ۽ ان جي عوام لاءِ قرباني ڏيڻ جي ضرورت پئي ته هو پنهنجي جان به قربان ڪري ڇڏيندو۽ هڪ سڌي رستي تي هلندڙ انسان وانگر پنهنجي قول جي صداقت سان سچائي جي هڪ نه وسامندڙ شمع روشن ڪري ويو.

پاڪستان جي پهرئين چونڊيل وزيراعظم ذوالفقار علي ڀٽو جي عدالتي قتل خلاف پوري دنيا ۾ شديد ردعمل ٿيو،دنيا جي هر ننڍي وڏي اڳواڻ ، معروف توڙي غير معروف عالمي شخصيتن ۽ ۽ عالمي اخبارن ان جي سخت مذمت ڪئي ، اهو هڪ عالمگير احتجاج هو۽ شهيد ذوالفقار علي ڀٽو عالمي تاريخ ۾ هڪ اهڙو نقش ڇڏي ويو آهي جو اڄ به پوري دنيا ۾ پاڪستاني کيس ياد ڪندا آهن ۽ خراج عقيدت پيش ڪندا آهن، ڊڪٽيٽر ضياءُ اهڙو ظالماڻو سلوڪ ان قومي اڳواڻ سان ڪيو جنهن جي خدمتن جي پوري دنيا معترف آهي، شهيد ذوالفقار علي ڀٽو 1971ع ۾ تباه ٿيل پاڪستان جي ڏور سنڀالي ملڪ جي يڪجهتي ۽ سالميت کي برقرار رکڻ جو جيڪو ڪارنامو سر انجام ڏنو اهو پاڪستان جي المناڪ تاريخ جو هڪ بي مثال باب آهي، ڍاڪا ساغي کانپوءِ جيڪي طاقتون پاڪستان جي وجود کان انڪاري بنجي ويون هيون ۽ ان جا ٽڪرا ڇڙوڇڙ جي توقع ڪيو ويٺيون هيون پر شهيد ذوالفقار علي ڀٽو انهن قوتن جي سمورن اندازن کي غلط ثابت ڪري ڏيکاريو۽ هڪ اهڙي حڪمت عملي اختيار ڪئي جنهن ڪري بنگلاديش جي تحريڪ انجام تي پهچڻ سان پاڪستان وڌيڪ امڪاني خطرن کان بلڪل محفوظ رهيو، سندس انهي دورانديشيءَ جي ڪري پاڪستان جي عوام انهي عدم تحفط واري احساس مان ڇوٽڪارو حاصل ڪري ورتو، اها حقيقت پنهنجي جاءِ تي به اهم آهي ته 1973ع تائين پاڪستان جو عوام ان موجهاري جو شڪار رهيو ته پاڪستان جو ڇا ٿيندو؟ آيا پاڪستان پنهنجي وجود کي برقرار رکندي خودمختياري جو تحفط ڪري سگهندو؟ ملڪ اندر انهيءَ مايوسي واري احساس جي ڪري پرڏيهه ۾ به اهو تاثر نمايان هو ته الله نه ڪري بنگلاديش جو قيام پاڪستان جي هڪ ملڪ طور خاتمي جو سبب ته بنجندو، ان وقت صورتحال به اهڙي هئي ۽ مختلف نعرن سان ملڪ جي يڪجهتي تي جيڪا يلغار ڪئي پئي وئي ان سان غير ملڪي مبصرن جا اندازا انهن شڪن ۽ شبهن جو عڪس هو ته اوڀر پاڪستان جي الڳ ٿيڻ بعد باقي پاڪستان مختلف قوميتن ۾ ورهائجي ويندو،پرڏيهي علحدگي جون تحريڪون به پاڪستان جي بدخواهن جا بُرا ارادا رکڻ وارين قوتن کي حوصلو فراهم ڪري رهيون هيون ۽ اهي قوتون جن پاڪستان کي ٻه ٽڪرا ڪرڻ لاءِ بنگلاديش جي تحريڪ جي ڪاميابي کي ممڪن بنايو هو انهن به ٻين عليحدگي پسند تحريڪن کي هوا ڏيڻ شروع ڪري ڇڏي هئي ۽ اهڙي طرح ٻاهرين دنيا ۾ پاڪستان جو وجود ڄڻ لٽڪيل رهجي ويو هو پر اهو سمورو ڪريڊٽ شهيد ذوالفقار علي ڀٽو ڏانهن وڃي ٿو جنهن ڏينهن رات جي محنت ۽ جفاڪشي سان نه صرف اهڙي خطرناڪ صورتحال کان بچڻ لاءِ پاڪستان جي بقا لاءِ ضروري قدم کنيا پر سندس ڪوششن سان پرڏيهه ۾ پاڪستان جي ساک بحال ٿي ۽ ان جو وقار به بلند ٿيو.

1971ع  ۾ پاڪستان ٽٽڻ واري الميي سبب ملڪ جي عالمي ساک جهڙي ريت ختم ٿي چڪي هئي ان ۾ خوشگوار تبديلي آئي ۽ شڪست کاڌل قوم جي عزم کي تازو ۽ نئون حوالو ڏيئي عالمي برادري ۾ ان کي جائز مقام ڏيارڻ جي ڪري ذوالفقار علي ڀٽوکي هڪ ذهين ۽ مدبر اڳواڻ طور تسليم ڪيو ويو ۽ هو عالمي سياست جو هڪ اهم موضوع بنجي ويو، ڏيهه اندر سڌارن ۽ پرڏيهه ۾ پاڪستان جي مفاد ۾ بهترين قدم کڻڻ جي ڪري ذوالفقار علي ڀٽو ٽين دنيا جي ملڪن جي اڳواڻن ۾ هڪ ممتاز ۽ منفرد مقام حاصل ڪري ورتو،ان ڏس ۾ نيويارڪ جي مشهور اخبار روازني وال اسٽريٽ جرنل  جي هڪ مضمون جو حوالو به مناسب لڳي ٿو، ان اخبار پنهنجي 8 ڊسمبر 1973ع واري اشاعت ۾ وزيراعظم ڀٽو جي صلاحيتن ۽ ڪارنامن جو اعتراف ڪندي لکيو ته” پاڪستاني قوم هاڻي گهڻي جنگ کانپوءِ وارن زخمن مان صحتياب ٿيندي نظر اچي رهي آهي،قوم پنهنجي تمام ٿوري عالمي ڪردار کي وڏي حقيقت پسندي سان ڏسڻ شروع ڪيو آهي، وزيراعظم ڀٽو، جنهن کي هاڻي هر هنڌ هڪ انتهائي مدبر سياسدان مڃيو وڃي ٿو ان هڪ آئين ۽ ٻيا جمهوري ادارا جوڙيا آهن،هاڻي مسٽر ڀٽو عوامي حمايت سان مصروف عمل آهي۽ پاڪستان هندستان کان ڳالهين جي ميز تي ويهي اٽڪل ٻه سال پراڻي اعصابي جنگ کٽي ورتي ۽ هن بغير رعايتن جي پنهنجا سمورا جنگي قيدي واپس ڪرايا جنهن تي هندستان اٽڪي بيٺل هو، پاڪستان پنهنجي ٻن عطيم طاقتور اتحادين چين ۽ آمريڪا سان نه صرف لاڳاپا قائم ڪيا آهن پر کين مستحڪم بنايو ۽ پوءِ انهن ئي امداد ڏيندڙن جو منظور نطر بنجي ويو،هاڻي پاڪستان ننڍي کنڊ ۾ سڀ کان وڌيڪ صحتمند ۽ اميد افزا ڏسڻ ۾ اچڻ لڳو آهي ۽ پاڪستانين کي جنگ کانپوءِ احساس خود ترسي ۽ دل شڪستگي ماڻ ٻاهر ڪڍڻ جو سهرو به اول ۽ آخر وزيراعظم ڀٽو کي وڃي ٿو، مسٽر ڀٽو مسلسل سرگرمي ۽ شخصيت جي زور تي اڪيلي سر اهو ڪارنامو سرانجام ڏنو آهي، هندستان سان ڳالهين کانپوءِ پاڪستان هڪ اهڙي سمجهوتي جي لاءِ نڪتو آهي جنهن مان بلڪل ويجهو اهو ڏسڻ ۾ اچي رهيو آهي ته جهڙوڪ پاڪستان هند-پاڪ جنگ کٽي هجي“.

1974ع ۾ لاهور ۾ اسلامي سربراهي ڪانفرنس ڪوٺائي ذوالفقار علي ڀٽو اسلامي ملڪن جي وچ ۾ نئين مثبت اتحاد ۽ اشتراڪ جي لاءِ عظيم ڪارنامو سرانجام ڏنو،انهيءَ ڪانفرنس سان اسلامي اتحاد جي هڪ نئين دور جي شروعات ٿي، خود ان ڪانفرنس پاڪستان جي وجود جي باري ۾ دشمن قوتن طرفان پکيڙيل پروپيگنڊه کي ڪوڙو ثابت ڪيو ڇاڪاڻ ته جيڪي قوتون پاڪستان جي ختم ٿيڻ جون اڳڪٿيون ڪري رهيون هيون اهڙي صورتحال ۾ اسلامي دنيا پاڪستان تي پنهنجو اعتماد ۽ يقين جو اظهار ڪري انهن قوتن جي خوابن کي پورو نه ڪرڻ جو اعلان ڪري ڇڏيو هو، جيتوڻيڪ ذوالفقار علي ڀٽو جي انهي سهڪار کي پرڏيهي دنيا ۾ سندس ذات ۽ تدبر سان ڀيٽيو ويو. آمريڪا جي روزاني اخبار ڪرسچين سائنس مانيٽر12 آڪٽوبر 1974ع واري اشاعت ۾ پاڪستان جي صورتحال جو تجزيو ڪندي ذوالفقار علي ڀٽو کي خراج تحسين پيش ڪيو ته مسٽر ڀٽو اهو شخص آهي جنهن پاڪستان کي 1971ع جي زوال بعد ڌُٻڻ مان ٻاهر ڪڍيو، 1971ع ۾ هندستان جي هٿان شڪست کائڻ کانپوءِ وزيراعظم 90 هزار جنگي قيدين کي واپس آندو، جنگي ڏوهن جا ڪيس ختم ڪرايا ۽ ملڪ جي حاڪميت ۽ استحڪام کي نقصان ڏيڻ کانسواءِ 5 هزار چورس ميل جو قبضو ڪيل علائقو به خالي ڪرايو،وزيراعظم ڀٽو جي قيادت ۾ پاڪستان ايران ۽ ٿائيليند جي وچ ۾ ڏکڻ ايشيا جي سڀ کان صحتمند ۽ خوشحال قوم طورسامهو اچي چڪو آهي، صرف ٽن سالن جي مختصر عرصي ۾ مسٽر ڀٽو پنهنجي عوام جي قومي غيرت کي بحال ڪرايو آهي ، هاڻي پاڪستاني پنهنجو پاڻ تي اعتماد محسوس ڪرڻ لڳا آهن ۽ جيئن ته لاهور جي اسلامي سربراهي ڪانفرنس اهو واضح ڪيو ته وچ اوڀر جا مسلمان هڪ نئين سڃاڻپ سان روشناس ٿيا آهن،ڀٽو جو سڀ کان وڏو ڪارنامو اهو ئي آهي ته هن  پاڪستان جي بقا ۽ وحدت تي ذرو به نشان نه اچڻ ڏنو ۽ پاڪستان کي عالم اسلام جو هڪ اهم ترين ملڪ بنائي ڇڏيو. 4-اپريل پاڪستان جي تاريخ جو هڪ نه وسرندڙ ڏينهن آهي، قائد عوام جي شهادت کي 37 سال گذري چڪا آهن ۽ ان سان گڏ اڃا تائين ساڻس ٿيل عدالتي نا انصافي اڄ به انصاف جي گهرجائو بڻيل آهي، وقت جي فرعون شهيد ذوالفقار علي ڀٽو کي صفحه هستي سان مِٽائڻ چاهيو پر هو تاريخ ۽ عوام جي دلين ۾ هميشه زنده رهندو، شهيد ذوالفقار علي ڀٽو جي عظيم قرباني ۾ ملڪ ۽ قوم جي لاءِ اهو .ي پيغام آهي ته ڏيهه توڙي پرڏيهه ۾ سمورا هم وطن سندس مشن، پاڪستان جي بقا، جمهوريت ۽ ملڪ ۽ قوم جي ترقي ۽ خوشحالي لاءِ پنهنجو پاڻ کي وقف ڪري ڇڏين.

******

 

خانزادي جو قتل ۽ اسان جي عورت: سجاد ظهير

سنڌ ۾ عورتون ڪيتري ڏاڍ جو شڪار آهن، انهن جي واقعن جون ڪيتريون ئي ڪهاڻيون اسان جي سماج ۾ ملن ٿيون. هڪڙا واقعا اهڙا به آهن جيڪي رپورٽ ٿيڻ کان پهرين دٻجي وڃن ٿا يا هٿ وٺي دٻايا وڃن ٿا. ڪجهه اهڙا واقعا جيڪي اسان جي سماج جا چار ئي پاسا لوڏي ۽ ڌوڏي وجهن ٿا. جن کي پڙهندي فقط مذمت يا ٻه منٽن جي خاموشي کان سواءِ ڪجهه نه ڪرڻ جي سگهه ساري ويهي رهندا آهيون. اهڙو ئي واقعو جيڪو ڪجهه ڏهاڙا پهرين پيش آيو آهي، مڙس شادي جي پهرين رات زال کي ڪارو ڪري ماريو آهي، اها جيڪا ڳاڙهو جوڙو پائي هڪ نئين زندگي جي شروعات ڪرڻ لاءِ نڪتي هُئي، اها عورت پهرين رات مڙس هٿان ڪارنهن بدلي ماري وئي، هيءُ قصو انهي خانزادي جو آهي جيڪا شادي جي پهرين رات پنهنجي مڙس جي هٿن ۾ محبتن بجاءِ گُهٽن جو کاڄ بڻجي زندگي جي جنگ هارائي ويٺي. مقتول خانزادي جي قتل جي ايف آءِ آر داخل ٿي چڪي آهي، اسان سڀ ڄاڻون ٿا ته هيءُ فرياد به بي داد قتل وانگي دٻجي سگهي ٿي، هيءُ واقعو سنڌ جي انهي دنگ جو واقعو آهي، جتي سنڌ جي سرحد بلوچستان جي حدن سان ملي ٿي، اسان مان ڪيترن ئي ماڻهن جي سوچ اها هوندي ته اهڙن واقعن تي بلوچستان جي قبيلائي سوچ جو اثر آهي. جتوڻيڪ اهو هڪ لٻاڙي دليل آهي يا قانون لاڳو ڪندڙ ادارا پنهنجي جند آجي ڪرڻ لاءِ ان قاتل کي ئي اڻ سڌي طرح هڪ موقعو جوڙي ڏيڻ جو سبب آهن. جيڪڏهن ڏوهن کي نسلن ۽ قبيلن جي بنيادن تي ڏسڻو آهي ته پوءِ هيءُ عدالتون بند ٿيڻ گهرجن. اسان جو اهو عمل هڪ خانزادي نه پر مسقبل جي ڪيترين ئي خانزادين جون زندگيون ٻوڙي سگهي ٿو. هيءُ واقعو ڪو پهريون واقعو نه آهي اسان جو اخبارون ۽ خانگي چئنل انهن خبرن سان ڀريل آهن. منهنجي ڄاڻ موجب عورتن واري بل کان پوءِ  هيءُ ايڏو وڏو پهريون واقعو آهي. انهي واقعي ۽ سماج ۾ عورتن جي سوال کي سمجهڻ جي پڻ ضرورت آهي.

جاگيرداري وارو هيءُ معاشرو هڪ اهڙو ڏاڍ آهي، جتي غريب سان ڏاڍ جا بيشمار واقعا ايترو جلدي نظر ڪين ٿا اچن. وچولي طبق جا ماڻهو، دستڪار، ڪارخانيدار پورهيت، ڪلارڪن ۽ گهٽ پگهار تي ڪم ڪندڙ ملازمن جا ڇڙوڇڙ خاندانَ غريب آهن، سٺي وقت ۾ کين ڏکي حالتن کي منهن ڏيئڻو پوي ٿو، مشڪل سان هوءُ پهنجون گهرجون يا ضرورتون پوريون ڪري سگهندا آهن. انهن ۾ ڪيتريون عورتون پڻ آهن جيڪي غلامي واري زندگي ۾ ڀوڳي پورهيو ڪندي پنهنجي خاندان کي پالين ٿيون. ڏٺو وڃي ته عورت سماج جي تبديلي جو اهم ڏاڪو آهي، دنيا جي عوامي بغاوتن ۾وڌي چڙهي پنهنجو ڪردار ادا ڪيو آهي. عورتن پنهنجو رت ست ڏئي سماجي اڻبرابري کي ختم ڪرڻ لاءِ مختلف تحريڪن ۽ مورچن تي وڙهنديون رهيون آهن. عورت اسان جي سماج ۾ مختلف طريقن سان ڪيترن ئي نون توڙي جديد استحصالي روين جوشڪار آهي، عورتون پنهنجي حق لاءِ پوءِ به آواز اٿارينديون اچن پيون، ڪيترن ئي مورچن تي ويڙهه ذريعي پنهنجي اصولن تي قائم رهيون آهن، تاريخ ۾ عورت جي جدوجهد جا ڪيترا ئي مثال ملن ٿا. انهن تي لکڻ ۽ سکڻ جي ضرورت آهي.

عورتن سان زيادتين جا مختلف واقعا رپورٽ ٿين ٿا. اخبارن، سماجي ادارن ۽ ٿاڻن جي روز نامچن جو جائزو ورتو وڃي ته معلوم ٿي وڃي ٿو. پاڪستان پيپلز پارٽي جي سال 2008 ع کان پوءِ جڙيل حڪومت وقت ڪيسن جو تعدادا لڳ ڀڳ 2 هزار هو. جيڪو اڳ تي هلي پ پ حڪومت سال 2008 جي دوران وڌيو،ان سال ۾ لڳ 2400 واقعا رجسٽرد ٿيا. 2009ع ۾2620 اقعا پيش آيا. پاڪستان پيپلز پارٽي جي عوامي حڪومت ۾ عورتون قتل ٿينديون رهيون، سال 2010 ع دوران غيرت جي نالي ۾ 433 عورتون ڪاريون ڪري ماريون ويو، ساڳي سال عورتن تي تشدد جي حوالي سان 2838 واقعا رجسٽرڊ ٿيا.  اهڙين مقتول عورتن ۾ ڪيتريون ئي نابالغ ۽ بي سمجهه پڻ هيون. سال2011ع ۾ 265 عورتن کي غيرت جي نالي ۾ قتل ڪيو ويو. جڏهن ته 2012 ع ۾ 316 ۽ 2013 ع دوران 121 عورتون ماريو ويون، عورتن سان پيش ايندڙ اهڙن واقعن نارين ۾ هڪ ڊپ جي ڪيفيت کي جنم ڏنو آهي.

سنڌي سماج ۾ عورت پنهنجو ڪردار ادا ڪرڻ لاءِ جڏهن به ٻاهر نڪتي آهي ته ان کي اهو روايتي ڊپ سامهون آيو آهي جنهن ڪري هوءَ پنهنجي ڪردار کي نڀائڻ کان اڳ به سوچي ٿي ۽ جڏهن هن اهڙو ڪردار نڀايو آهي ته سندس سامهون معاشري جون رنڊڪون ضرور سامهون آيون آهن، پوءِ به سنڌ جي عورت پنهنجي وجود ۾ وڙهندي رهي آهي، اڄ به سنڌ جي مختلف شهرن ۾ عورتون سياسي، سماجي ۽ ادبي فورمن تي پنهنجي بقا جي جنگ وڙهي رهيون آهن.

عورتن هميشه هر وقت ڀرپور ڪردار ادا ڪيو آهي. عورتن جي جدوجهد جي هڪ الڳ اهميت آهي ان کي نظر انداز نه ڪرڻ گهرجي، انهن کي برابر حق ڏيڻ گهرجن. ڪنهن به فرد کي ڪنهن جي قتل ڪرڻ جو ڪو به حق نه آهي جيڪڏهن عورت نه هجي ها ته هي دنيا خوبصورتيءَ سان ڀريل نه هجي ها ڇو ته عورت ماءُ ۽ ڀيڻ جهڙي رشتي جو مهور آهي. عورتن جي حقن جو تحفظ ڪيو وڃي ۽ ان لاءِ سٺا قانون آندا وڃن، جنهن جو پورائو هن دفعي سرڪار پاران عورتن واري بل جي صورت ڪجهه سطح تي نظر آيو آهي عورتن پنهنجي جدجهد سان هڪ نئين تاريخ رقم ڪئي آهي سال 2014ع کان وٺي حال ۾ جيڪڏهن 2016 ع تي نظر وجهجي ته عورتن تي تشدد جي واقعن ۾ واڌ آئي آهي. قانون لاڳو ڪندڙ ادارا فقط ڪارروائي تائين محدود آهن، جيتوڻيڪ انهي تي عملي قدم کڻڻ جي ضرورت آهي

خانزادي جو قتل اڄ جي عورت کي هڪ دفعو ٻيهر سوچڻ تي مجبور ڪري ٿو، عورتن تي تشدد خلاف ڪڌين رسمن تي ٿيندڙ پي ايڇ ڊي جون ٿيسز يا اسيمبلي جا بل ڪهڙي اهميت رکن ٿا، جتي خانزادي پهرين رات پنهنجي ور هٿان ڪاري ٿي ماري وڃي. هيءُ هڪ پڻ اڄ جو سوال آهي ته عورتن جي تحريڪ کي وڌيڪ سگهاروبڻائڻو پوندو. عورتن کي گهريلو ڪم جي مشين بڻائڻ بجاءِ انهن کي آزاد ڪيو وڃي، انهن کي انقلابي نظرياتي بڻايو وڃي. خانزدي جيڪا هاڻي موٽي نه ايندي پر ڪارو ڪاري جي ڏوهاري کي مليل سزا ڪيترين ئي خانزادين کي محفوظ بڻائي وجهندي. سپريم ڪورٽ ۽ سنڌ حڪومت کي پنهنجو ڪردار ادا ڪرڻو پوندو.

 

گلگت ۽ ڪي پي ڪي بارشن جي نشاني تي

گلگت بلتستان ۽ خيبر پختونخوا ۾ برسات تباهي آڻي ڇڏي آهي، مختلف جاين تي ڇتون ڪرڻ  ۽ ٻين حادثن ۾ 41 ڄڻا فوت ٿي ويا ۽ ڪيترائي زخمي ٿيا، ميڊيا رپورٽن مطابق گلگت بلتستان ۾ تيز برسات سبب چلاس ۾ گهر جي ڇت ڪري پئي، جنهن جي نتيجي ۾ هڪ ئي ڪٽنب جا 4 ڀاتي فوت ٿي ويا ۽ 2 زخمي ٿي پيا، فوتين ۾ پيءُ، سندس پٽ ۽ ٻه نياڻيون شامل آهن، ان کانسواءِ چترال جي علائقي ٺينڪ شين ۾ گهر تي جابلو ڇپ ڪرڻ سبب 5 ڄڻا زخمي ٿي پيا، جڏهن ته لينڊ سلائيڊنگ سبب قراقرم رستو ڪيترن ئي هنڌن تان بند ٿي ويو آهي، سوات ۾ تيز برساتن جي نتيجي ۾ ٻن عورتن سوڌو 3 ڄڻا ٻوڏ جي وهڪري ۾ لڙهي ويا، ندي نالن ۾ ٻوڏ اچي وئي آهي، تيز برساتن بحرين ۾ پڻ تباهي آندي آهي ۽ رابطا پل ٻوڏ جي وهڪري ۾ لڙهي وئي، برساتن سبب سوات درياءَ ۾ مٿانهين درجي جي ٻوڏ آهي، جڏهن ته پشاور ۾ رات جو تيز برساتن سبب رستا ۽ گهٽيون ڍنڍن ۾ تبديل ٿي ويون، چارسده ۾ به شبقدر جي ڳوٺ چلماري ۾ گهر جي ڇت ڪرڻ سبب هڪ ٻارڙو دٻجي فوت ٿي ويو، جڏهن ته سندس امڙ ۽ ڀاءُ زخمي ٿي پيا، بالاڪوٽ جي ڳوٺ ڦاگل ڪاغان ۾ پڻ گهر جي ڇت ڪرڻ سبب هڪ ڄڻو حياتي وڃائي ويٺو، شانگلا ۾ جابلو ڇپ ڪرڻ سب 2 گهر تباهه ٿي ويا، جڏهن  ته ان واقعي ۾ 3 ڄڻا فوت ٿي ويا. ڪوهستان جي علائقي پالس ۾ وڄ ڪرڻ سبب هڪ ئي خاندان جا 5 ڀارتي فوت ۽ 2 ڄڻا زخمي ٿي پيا، بٽگرام ۾ گهر جي ڇت ڪرڻ سبب عورت سميت 2 ڄڻا فوت ٿي ويا، شانگله ۾ پهاڙي ڇپ ڪرڻ سبب 2 گهر مڪمل طور تباهه ٿي ويا، جنهن ۾ 10 ماڻهو دٻجي فوت ٿي ويا.

وزيراعظم نوازشريف گلگت بلتستان ۽ ڪي پي ڪي ۾ برساتن سبب ٿيل جاني نقصان تي افسوس جو اظهار ڪيو آهي، هن لاڳاپيل عملدارن کي امدادي ڪارروائين ۽ متاثرن کي طبي امداد فراهم ڪرڻ جي هدايت ڪئي آهي آچر تي هتي وزيراعظم آفيس مان جاري ڪيل بيان مطابق وزيراعظم محمد نواز شريف نيشنل ڊزاسٽر اٿارٽي ۽ بين لاڳاپيل عملدارن کي بروقت امدادي ڪارروائيون خاص ڪري متاثرن کي طبي امداد، کاڌ خوراڪ ۽ پناهه ڏيڻ ۽ لاڳاپيل عملدارن کي ان ڏس ۾ کين اڳڀرائي کان بروقت آگاهه ڪرڻ جي هدايت ڪئي. هوڏانهن موسميات کاتي پاران مالاڪنڊ، هزاره ڊويزن، گلگت بلتستان، آزاد ڪشمير، اسلام آباد ۽ پشاور سميت مختلف اترين علائقن ۾ برسات ۽ پهاڙي علائقن ۾ برفباري جو امڪان آهي.