تازيون خبرون

Daily Archives: April 5, 2016

پرڏيهه ۾ ملڪيتون لڪائيندڙ دنيا جي 12 موجوده ۽ اڳوڻن حڪمرانن جا پول پڌرا، عالمي سياست ۾ ٿرٿلو

اسلام آباد/لنڊن(م.ڊ)  پنهنجي ملڪيت يا ڪارو ناڻو پرڏيهه اماڻينندڙ دنيا جي 12 هاڻوڪن ۽ اڳوڻن سربراهن جي فهرست انٽرنيٽ تي جاري ٿي وئي آهي،جنهن ۾ پاڪستان جي وزيراعظم نواز شريف۽ سندس ڪٽنب به شامل آهي، اهڙي خبر سان عالمي سياست ۾ ٿرٿلو مچي ويو آهي، برطانوي ميڊيا مطابق هڪ جرمن اخبار صحافتي تاريخ جو سڀ کان وڏو راز فاش ڪرڻ جي دعويٰ ڪئي آهي، جنهن مطابق پانامينين قانون جا هڪ ڪروڙ 16 لک دستاويز انٽرنيٽ تي جاري ڪيا ويا آهن،جن ۾ دنيا جو اهو سچ وائکو ڪيو ويو آهي، جيڪو هن مهل تائين لڪل هو، جرمن اخبار جي دعويٰ آهي ته ان کي اهي دستاويز پانامينين لا فرم جي هڪ اڻڄاڻ ذريعي ڏنا، جنهن موٽ ۾ نه ڪو معاوضو ۽ نه ئي ڪا ٻي شيءِ گهري، جرمن اخبار مطابق هن انهن دستاويزن جي جاچ دوران دنيا جي 80 ملڪن جي 100 ميڊيا گروپن سان لاڳاپيل 400 صحافين کان ڄاڻ گڏ ڪئي ، جنهن کانپوءِ اها ڄاڻ صحافين جي عالمي تنظيم سان ونڊي وئي، انٽرنيٽ تي جاري ڪيل دستاويزن ۾ دنيا جي انهن 12 هاڻوڪن ۽ اڳوڻن حڪومتي سربراهن توڙي مختلف ملڪن جي 128 سياستدانن ۽ سرڪاري شخصيتن جا نالا ڏنا ويا آهن، جن پنهنجي ملڪيت پرڏيهه ۾ لڪائي آهي، دنيا جي امير ترين ماڻهن جي ڳجهن اثاثن جا تفصيل منظر عام تي اچي ويا آهن، برطانوي اخبار موجب پاناما ليڪس طرفان جاري ڪيل تفصيلن ۾   سڄي دنيا جي سياستدانن پنهنجا اثاثا ٻاهرين ملڪ لڪائي رکيا آهن،وزيراعظم نواز شريف  جو نالو به فهرست ۾ شامل آهي، جڏهن ته مريم نواز، حسين نواز ۽ حسن نواز جي اربين ڊالرن جي آف شور ڪمپني جي موجودگي جو انڪشاف پڻ ٿيو آهي، حسن نواز 6 ڪمپنين جو مالڪ آهي، ڀارتي اخبار انڊين ايڪسپريس    موجب شريف خاندان  جي 6 ڪمپنين لنڊن جي هائيڊ پارڪ ۾ ملڪيتون خريد ڪيون آهن، انهن  اهي ملڪيتون ڊوئسچي بئنڪ ۾ گروي رکرائي 7 ملين پائونڊ جو قرض به ورتو هو ۽ اسڪاٽ لينڊ يارڊ کان قرض وٺي 2 اپارٽمينٽ ورتا ويا.اخبار موجب  مريم نواز ۽ حسين نواز هڪ آف شور ڪمپني جا 5.5 ملين پائونڊ جا شيئر حسن نواز حوالي ڪيا،شريف خاندان پاڪستان جي امير ترين خاندانن ۾ شامل آهي، ان تي ڪرپشن،غيرقانوني اثاثن،ٽيڪس چوري،مني لانڊرنگ  جا الزام به لڳل آهن،حسين نواز، حسن نواز ۽ مريم صفدر انهن الزامن جا جواب انڊين ايڪسپريس کي نه ڏنا،نيسڪول لميٽڊ ۽ نيلسن هولڊنگز لميٽڊ 1993 ع ۾ قائم ڪيون ويون ، برطانوي اخبار موجب پاناما پيپرس ۾ هڪ ڪروڙ 75 لک دستاويز شامل آهن، روسي صدر ولاديمير پيوٽن به 2 ارب ڊالر کان وڌيڪ اثاثا ٻاهرين ملڪ لڪائي رکيا آهن، آمريڪا،،برطانيه ،چين،ڪئناڊا،ڀارت  ٿائيلينڊ ۽ ٻين ملڪن  جا اڳواڻ به شامل آهن،،آذربائيجان جي صدر ۽ سندس خاندان،ملائشيا جي وزيراعظم جي پٽ ۽ چيني وزيراعظم جي ڌيءَ ،برطانوي وزير اعظم جي والد،مصر جي صدر جنرل السيسي جا به ٻاهرين ملڪ اثاثا آهن ، اسپين جي بادشاهه جي ڀيڻ، گڏيل قومن جي اڳوڻي سيڪريٽري ڪوفي عنان جو پٽ به ڪرپشن ڪندڙن ۾ شامل آهي، سعودي شاهه جي لنڊن ۾ 34 ملين جي جائيداد موجود آهي، هوڏانهن پي ٽي آءِ چيئرمين عمران خان چيو آهي ته وڏو انڪشاف ٿيو آهي، نيب کان جاچ جو مطالبو ڪنداسين، نواز ۽ آصف علي زرداري جو پئسو ٻاهر پيل آهي،  نواز شريف کان  اثاثن جا تفصيل  ٻڌائڻ جو چونداسين، قومي اسيمبلي  ۾ به آواز اٿارينداسين

 

وزير اعظم جي شگر مل مان ”را“ جا ايجنٽ گرفتار ٿيا، ملڪ ۾ مشرف لاءِ ڌار نظام ۽ ڀُٽي لاءِ ڌار ڇو؟:بلاول ڀٽو زرداري

لاڙڪاڻو/ڳڙهي خدابخش ڀٽو(نمائندن وٽان ) پ پ چيئرمين بلاول ڀٽو زرداري چيو آهي ته وزير اعظم جي شگر مل مان ”را“ جا ايجنٽ گرفتار ٿيا، ملڪ ۾ مشرف لاءِ ڌار نظام ۽ ڀُٽي لاءِ ڌار ڇو آهي؟ وزير اعظم نواز شريف ٻڌائي ته آئين ٽوڙيندڙ مشرف کي ڇو ڇڏيو ويو؟ شهيد ذوالفقار علي ڀٽو کي ايٽم بم ٺاهڻ ۽ ملڪ کي آئين ڏيڻ جي سزا ڏني وئي. شهيد ذوالفقار علي ڀٽو جي  37 هين ورسي کي خطاب ڪندي بلاول ڀٽو زرداري چيو ته منهنجي پيءَ کي يارهن سال قيد ڇو رکيو ويو. منهنجي مامي ۽ ناني کي قتل ڇو ڪيو ويو؟ شهيد ذوالفقار علي ڀٽو جو ڏوهه اهو هو جو هن ملڪ کي آئين ڏنو، هُن وڏيرا شاهي کي ختم ڪيو، بي زمين هارين کي مفت زمين ڏني، شهيدن جي رت سبب اڄ پاڪستان جو چهرو روشن آهي. بلاول ڀٽو زرداري چيو ته الله ظالمن جو پردو کڻڻ وارو آهي. هن چيو ته شهيد ڀٽو جو سڀ کان وڏو ڏوهه اهو هو جو هُن ملڪ جو دفاع مضبوط ڪرڻ لاءِ ايٽم بم ڏنو.  هن چيو ته ميان صاحب! توهان ٻه ڀيرا ملڪ جو آئين ٽوڙيندڙ کي ڪيئن پرڏيهه وڃڻ ڏنو. هن چيو ته اسان عوام پڇي ٿو ته شهيد بينظير ڀٽو جي قتل جو جوابدار ڪيئن ڀڄي ويو. اسان مشرف کي صدارت تان هٽائي توهان حوالي ڪيو، ان کي ڇو ڇڏيو ويو؟ بلاول ڀٽو زرداري چيو ته عدالت پڇي ٿي ته مشرف جي واپسي جو جواب ڪير ڏيندو؟ هن چيو ته حڪمران چوندا هئا ته ڪستو ٽوڙي ڇڏيو آهي، پر  روزانو پنج ارب رپين جو قرض عوام جي نالي تي کائي رهيا آهن. ٽن سان ۾ ساڍا چار کرب رپيا قرض ورتا ويا. اڄ اها حالت آهي جو هر پيد اٿيندڙ ٻار لکين رپين جو قرضي آهي. وزير اعظم قرض لاهڻ جي آڙ ۾ قومي اثاثا وڪڻي ڇڏيا. هن چيو ته نوجوان روزگار لاءِ ڌڪا کائي رهيا آهن پر وزير اعظم کي پرڏيهي دورن کان فرصت ناهي. حڪمرانن قومي اثاثا دوستن ۾ ورهائي ڇڏيا. هي ڪهڙي حڪمراني آهي.هن چيو ته ملڪ ۾ مشرف لاءِ ڌار نظام ۽ ڀُٽي لاءِ ڌار ڇو آهي؟ بلاول ڀٽو وڌيڪ چيو ته بيگناهن جو رت وهائيندڙ ته ظالم آهن ئي پر انهن جو ساٿ ڏيندڙ ۽ انهن کي پناهه ڏيندڙ به اوترا ئي ڏوهي آهن. حڪمرانن جي غلط پاليسين جي ڪري لاهور ۾ اقبال پارڪ وارو واقعو پيش آيو. دنيا اسان کي شدت پسند ۽ انتها پسند سمجھي ٿي. پ پ چيئرمين جو چوڻ هو ته عوام پڇي ٿو ته نيشنل ايڪشن پلان تي ڪڏهن عمل ٿيندو؟ هن چيو ته حڪمرانن جي نيت ئي ناهي ته نيشنل ايڪشن پلان تي عمل ڪجي يا حڪمرانن کي نيشنل ايڪشن پلان تي عمل ڪرڻ جي سگھه ئي ناهي. هن چيو ته حڪومتي وزير نيشنل ايڪشن پلان تي عمل ڪرڻ نٿا ڏين، عمل ٿي رهيو هجي ها ته هزارين ماڻهو پنڊي کان اسلام آباد ۾ پارليامينٽ آڏو ويهي نفرت جوڳيون تقريرون ڪري سگھن ها. هن چيو ته سڄي دنيا گواهه آهي ته ڌرڻي وارن وزير اعظم، آرمي چيف، چيف جسٽس خلاف ڪهڙا گٿا لفظ ڳالهايا. هن چيو ته چوڌري نثار کي ڪنهن خلاف ڳالهائڻو هوندو آهي ته ٽي ٽي ڪلاڪ پريس ڪانفرنس ڪندو آهي، پر دهشتگردي خلاف هڪ منٽ به نه ڳالهائيندو آهي. هن چيو ته دهشتگردن لاءِ گھرو وزير رت جا ڳوڙها وهائيندو آهي پر منهنجو لاهور سڙي رهيو هو ته هو گم هو.  بلاول ڀٽو چيو ته اسين پنهنجي شهيد عوام جي رت جو حساب گھرون ٿا. هن چيو ته حڪومت ڪنفيوز آهي، حڪمرانن وٽ نه گھرو پاليسي آهي نه پرڏيهي پاليسي. هن چيو ته وزير اعظم جي شگر مل مان ”را“ جا ايجنٽ گرفتار ٿين ٿا. وزير اعظم قوم کي مايوس ڪيو. هن چيوته شهيدن جو اولاد آهيان، قسم کڻي چوان ٿو ته دهشتگردن سان وڙهندس. عوام منهنجي هٿ ۾ هٿ ڏئي. آئون واعدو ڪريان ٿو ته هن ملڪ کي ترقي پسند ۽ پر امن پاڪستان بڻائينداسين. اسان هن ملڪ مان دهشتگردي کي ختم ڪنداسين. اسين ڪشميرين سان گڏ هلڻ جو واعدو ڪريان ٿو.  پاڪستان پيپلز پارٽي جي باني شهيد ذوالفقار علي ڀٽو جي 37 هين ورسي اڄ وڏي عقيدت ۽ احترام سان ملهائي وئي، ان حوالي سان پ پ پ ضلعي لاڙڪاڻي پاران انتظام پورا ڪيا ويا هئا، جڏهن ته ورسي لاءِ ملڪ جي ڪنڊڪڙڇ کان هزارن جي انگ ۾ قافلا پڻ ڳڙهي خدابخش پهتا، ورسي جي مُک تقريب کي پاڪستان پيپلز پارٽي جو چيئرمين بلاول ڀٽو زرداري، سنڌ جو وڏو وزير سيد قائم علي شاهه، اسپيڪر سنڌ اسيمبلي آغا سراج دراني، سينيئر تعليم وارو صوبائي وزير نثار احمد کهڙو ۽ مرڪزي توڙي صوبائي اڳواڻ خطاب  ڪيو،  ورسي تقريبن جي شروعات صبح جي وقت ڳڙهي خدابخش ڀٽو ۾ قرآن خواني سان ٿي، جنهن کان پوءِ پارٽي جا مرڪزي، صوبائي اڳواڻ توڙي ڪارڪن پنهنجي قائد جي مزار تي حاضري ڀري گلن جون چادرون چاڙهي فاتح خواني ڪئي،  جلسي ۾ شهيد ذوالفقار علي ڀٽو جي زندگيءَ تي مقالا پيش ڪيا ويا. لاهور جي گلشن پارڪ ۾ پيش آيل واقعي کان پوءِ ڳڙهي خدابخش ڀٽو ۾ جلسي گاهه جي اندر ۽ ٻاهر سيڪيورٽي کي سخت ڪندي 6500 پوليس اهلڪار، 300 رينجرس، 1100 جانثارن سوڌو وومين پوليس سان گڏ ٽريفڪ اهلڪارن کي مقرر ڪيو ويو. ڳڙهي خدابخش ڀٽو ۾ شهيدن جي مزار تي ايندڙ ڪارڪنن کي واڪ ٿرو گيٽس مان گذاريو  ويو ۽ سي سي ٽي ڪيمرائون لڳايون ويون هيون جن جي ذريعي سيڪيورٽي جي مانيٽرنگ ڪئي پئي وئي. ورسي جي حوالي سان ضلعي جي سمورن داخلي ۽ خارجي روڊن تي پوليس جون پڪٽون قائم ڪيون ويون ۽ پارڪنگ جي حوالي سان جلسي گاهه ويجھو بنگل ديرو ڳڙهي خدا بخش روڊ ۽ پنجو ديرو روڊ تي ٻن 20 ۽ 15 ايڪڙن تي ايراضي مختص ڪئي وئي هئي. ڳڙهي خدا بخش ڀٽو جي جلسي گاهه ۾ شرڪت لاءِ ملڪ جي ڪنڊڪڙڇ کان ايندڙ پارٽي جي اڳواڻن توڙي ڪارڪنن لاءِ الڳ الڳ روٽ ٺاهيا ويا  هئا جنهن ۾ گلگت بلتستان، آزاد ڪشمير، خيبرپختونخواهه، پنجاب، گهوٽڪي۽ سکر کان ايندڙ قافلن لاءِ لکي غلام شاهه، مديجي پنجو ديرو ڳڙهي خدا بخش ڀٽو روڊ تان ڪارڪنن توڙي اڳواڻن جي آمد جو سلسلو پڻ جاري هو ڪارڪنن جي آمد لاءِ بلوچستان، جيڪب آباد، ڪنڌڪوٽ، ڪشمور، شڪارپور کان ايندڙ قافلن لاءِ ڳڙهي ياسين، رتوديرو روڊ، ڳڙهي خدا بخش ڀٽو روڊ، بلوچستان جي شهرن کان ايندڙ قمبر شهدادڪوٽ شهدادڪوٽ، رتوديرو روڊ، رتوديرو بنگل ديرو روڊ ۽ ڳڙهي خدا بخش توڙي بنگل ديرو روڊ، ڪراچي، حيدرآباد، ڄامشورو، ٺٽو، سانگهڙ، ميرپور خاص، عمر ڪوٽ، ٿرپارڪر، بدين، ٽنڊوالهيار، مٽياري ۽ دادو کان ايندڙ قافلن لاءِ سيوهڻ، دادو، لاڙڪاڻو، بنگل ديرو ڳڙهي خدا بخش ڀٽو روڊ کي مقرر ڪيو ويو هو،  پاڪستان پيپلز پارٽي پاران جلسي گاهه اندر ڪارڪنن لاءِ کاڌ خوراڪ جو بندوبست پڻ ڪيو ويو هو ۽ ان سلسلي ۾ ڪارڪنن کي بهتر سهولتون ڏيڻ لاءِ مختلف ڪمپنين سان رابطو ڪري کائڻ پيئڻ جي مختلف شين جا اسٽال برياني، جوس، چانهه، بسڪيٽ، بوتل فروٽ وغيره لڳايا ويا هئا ان سان گڏ 500 ليٽرن جون 50 ٽينڪون ٿڌي پاڻيءَ جون به لڳايون ويون هيون،  پنڊال جي اندر 2 وڏيون ميڊيڪل ڪيمپون پڻ لڳايون ويون ۽ 10 ايمبولينس ۾ ايمرجنسيءَ لاءِ موجود هيون، گڏوگڏ ايڇ آر سي ڳڙهي خدا بخش ڀٽو سميت بنگل ديرو، تعلقه اسپتال رتوديرو، نئون ديرو اسپتال سميت لاڙڪاڻي شهر جي سڀني اسپتالن ۽ ڳڙهي خدا بخش ڀٽو ڏانهن ايندڙ سڀني رستن تي موجود بيسڪ هيلٿ يونٽ ۽ آر ايڇ سي ۾ ايمرجنسي پڻ لڳائي وئي هئي. جلسي گاهه اندر اليڪٽرانڪ توڙي پرنٽ ميڊيا جي صحافين لاءِ پڻ بندوبست ڪيو ويو هيو.

 

آئين کي نه مڃيندڙن جا ڪي به بنيادي حق ناهن هوندا: چيف جسٽس

اسلام آباد(بيورو) سپريم ڪورٽ جي چيف جسٽس انور ظهير جمالي چيو آهي ته بنيادي حق رڳو انهن جا هوندا آهن، جيڪي آئين کي مڃيندا آهن ۽ جيڪي آئين کي ناهن مڃيندا، انهن جا بنيادي حق ناهن هوندا، فوجي عدالتن مان سزا مليل قيدين جي اپيلن جي ٻڌڻي چيف جسٽس انور ظهير جمالي جي اڳواڻي ۾ سپريم ڪورٽ جي 5 رڪني لارجر بينچ ڪئي، ٻڌڻي دوران جوابدارن جي وڪيل عاصما جهانگير جو موقف هو ته کين سندس اصيلن جي رڪارڊ تائين پهچ نه پئي ڏني وڃي،جيڪا انساني حقن جي ڀڃڪڙي آهي، هن چيو ته اسان وٽ اميد جي صورت ۾ سپريم ڪورٽ آخري فورم آهي، چيف جسٽس ريمارڪس ڏيندي چيو ته اسان جو ملڪ بدترين دهشتگردي جو شڪار آهي، هر ايندڙ ڏينهن پاڪ فوج جا جوان قربانيون ڏئي رهيا آهن، ماڻهن کي ميڙ سامهون بيهاري سزائون ڏنيون پيون وڃن، ملڪ ويڙهه جي حالت ۾ آهي،ان کان اکيون پوري نه ٿا سگهون، هن چيو ته اسان کي ڏسڻو آهي ته ملڪ سان سڀ کان وڌيڪ وفادار ڪير آهي، جيڪي آئين کي مڃيندا ئي ناهن، انهن جا حق ناهن هوندا، بنيادي حق رڳو انهن جا هوندا آهن، جيڪي آئين کي مڃيندا آهن،چيف جسٽس چيو ته اٽارني جنرل جو موقف ٻڌي رڪارڊ تائين پهچ جي حوالي سان ايندڙ ٻڌڻي تي فيصلو ڪيو ويندو ، جنهن کانپوءِ ڪيس جي وڌيڪ ڪارروائي اربع تائين روڪي وئي.001

 

انشاءِ الله قوم جي اميدن تي پورا لهنداسين: آرمي چيف

پبي (م.ڊ) آرمي چيف جنرل راحيل شريف چيو آهي ته انشاءِ الله اسان قوم جي اميدن تي پورا لهنداسين، خابرو ادارن موجب پبي ويجهون پاڪستان آرمي ٽيم اسپرٽ مقابلي جي پڄاڻي واري تقريب کي خطاب ڪندي آرمي چيف جو چوڻ هو ته مختلف علائقن ۾ ڪيترين ئي چيلينجن جو جواب ڏيڻ لاءِ پاڪستان آرمي کي جسماني ۽ ذهني طور تي بهترين ٿيڻو پوندو، سندس چوڻ هو ته وطن جي محبت ۽ قرباني جي جذبو پاڪ فوج کي دنيا جي بهترين فورسز ۾ شامل ڪري ڇڏيو آهي ۽ اهو ئي جذبو ڏکين حالتن کي منهن ڏيڻ جي همت ڏي ٿو.

 

پاناما دستاويزن ۾ نواز شريف ۽ شهباز شريف جي سچائي تي مهر لڳائي وئي، انهن جا ٻاهرين ملڪن ۾ اثاثا ناهن: پرويز رشيد

اسلام آباد (بيورو)  اطلاعات، نشريات ۽ قومي ورثي واري وفاقي وزير سينيٽر پرويز رشيد چيو آهي ته پاناما دستاويزن ۾ وزيراعظم محمد نواز شريف ۽ پنجاب جي وڏي وزير محمد شهباز شريف جي سچائي تي مهر لڳائي وئي آهي ته ان جا ٻاهرين ملڪن ۾ اثاثا ۽ ملڪيتون نه آهن، بي بنياد الزام هڻڻ وارا ان ڳالهه جو سرٽيفڪيٽ ڏيندا ته انهن جا ٻاهرين ملڪن رهندڙ رت جا رشتيدار پنهنجي تعليم ڇا چرچ جي چندي تي حاصل ڪري رهيا آهن، عمران خان بني گالا جي محل جي زمين جي معاملي کي چئلينج ڪري سگهجي ٿو، ڇاڪاڻ جو ان جي اڳوڻي گهرواري پاران عطيو ۽ ان جي فليٽ جي وڪري بابت ڪهاڻين ۾ ڪيترائي تڪرار ۽ جهول آهن، پاڪستان مسلم ليگ (ن) منفي سياست تي يقين ناهي رکندي ۽ نه ئي ملڪي سياست ۾ اهڙي روايتن کي فروغ ڏيڻ چاهي ٿي، اهڙن خيالن جو اظهار هن سومر ڏينهن ڪتاب ”اسلام آباد ٽريول گائيڊ“ جي مهورتي تقريب کانپوءِ ميڊيا سان ڳالهائيندي ڪيو. سينيٽر پرويز رشيد چيو ته عمران خان پاڪستان مسلم ليگ (ن) جي قيادت تي بي بنياد الزام هڻي رهيو آهي ۽ پاناما دستاويز پي ٽي آءِ جي چيئرمين کي ڪوڙو قرار ڏنو آهي، هن چيو ته هو نٿو چوي ته عمران خان سياست تان استعيفيٰ ڏي، تنهن هوندي به اسان غلط الزام هڻڻ تي کانئس معافي گهرڻ جو نه ٿا چئون پر گهٽ ۾ گهٽ شرمندگي جو اظهار ته ڪري، هڪ سوال جي جواب ۾ هن چيو ته وزيراعظم جي خاندان جا ماڻهو ڊگهي عرصي تائين ٻاهرين ملڪ رهيا آهن ۽ وزيراعظم جي پٽن کي ملڪ اچڻ کان زبردستي روڪيو ويو، ان لاءِ هن ٻاهرين ملڪ پنهنجو ڪاروبار شروع ڪيو ۽ اهو ڏوهه نه آهي، اهڙي طرح ٻاهرين ملڪ رهندڙ لکين پاڪستاني ٻين ملڪن ۾ پنهنجو ڪاروبار ڪندا آهن، هن چيو ته وزيراعظم جي پٽن وائيٽ مني کان پنهنجو ڪاروبار شروع ڪيو ۽ هو باقاعده ٽيڪس ادا ڪري رهيا آهن، هنن ڪو غير قانوني ڪم ناهي ڪيو، هن چيو ته بي بنياد الزام لڳايا ويا، ان ڳالهه جو سرٽيفڪيٽ ڏين ته سندن ٻاهرين ملڪ رهندڙ رت جا رشتيدار پنهنجي تعليم ڇا چرچ جي چندي تي حاصل ڪري رهيا آهن؟ هن چيو ته عمران خان کي ننڍڙي ڳالهه کي وڏو ڪرڻ جي عادت ڇڏي ڏيڻ گهرجي، اطلاعات ۽ نشريات واري وزير چيو ته شريف خاندان کي ماضي ۾ ڪيتريون ئي ناانصافيون ڏسڻيون پيون، ان جي والد 1939ع ۾ پنهنجو ڪاروبار شروع ڪيو، جڏهن اتفاق فائونڊري قومي ورثي ۾ ورتي وئي ته ان جي بدلي ۾ ان کي ڪو به معاوضو نه مليو، سينيٽر پرويز رشيد چيو ته 1999ع ۾ شريف خاندان کي زبردستي ملڪ کان ٻاهر موڪليو ويو ۽ ان جي ڪاروبار تي قبضو ڪيو ويو، سندس خانداني گهر کي اولڊ ايج هوم بڻايو ويو، انهن سببن جي بنياد تي وزيراعظم جي پٽن مجبورن ٻاهرين ملڪ پنهنجو ڪاروبار شروع ڪيو، وفاقي وزير چيو ته نواز شريف جو ٽريڪ رڪارڊ شفاف آهي، جيتوڻيڪ ان جي بدترين دشمنن به انهن تي ان جي اڳوڻي حڪومت جي دورن ۾ بدعنواني جو ڪو الزام ناهي هنيو، هن چيو ته محترمه بينظير ڀٽو جڏهن وزيراعظم هئي ته هن محمد نواز شريف جي خلاف بدعنواني جو ڪو به الزام نه لڳايو پر سياسي پوائنٽ اسڪورنگ جي لاءِ ذاتي ڪاروبار کي نشانو بڻايو، اهڙي طرح پرويز مشرف موٽر وي ٽيلي ڪام ۽ بئنڪنگ جي شعبي جي وڏن منصوبن ۾ سيڙپڪاري فنڊن جي استعمال ۾ گهپلن جو ڪوبه ڪيس داخل نه ڪري سگهيو، اطلاعات واري وزير چيو ته عمران خان جي بني گالا جي محل جي زمين جي معاملي کي چئلينج ڪري سگهجي ٿو، ڇاڪاڻ جو ان جي اڳوڻي گهرواري پاران عطئي ۽ سندس فليٽ جي وڪري بابت ڪهاڻين ۾ ڪيترائي تضاد آهن. 002

 

پنجاب ۾ حڪومت نالي ڪا شئي ناهي، اسان کي اقتدار نه خوشحالي کپي: خورشيد شاهه

لاڙڪاڻو(بيورو) پ پ اڳواڻن چيو آهي ته پنجاب ۾ حڪومت نالي ڪا شئي ناهي. هاري ۽ مزدور پيڙجي رهيو آهي پر انهن جو حال پڇڻ وارو ڪير به نه آهي. اسين عوام کي ڏکئي حال ۾ ڇڏي ڀڄڻ وارا  ناهيون. ڳڙهي خدابخش ڀٽو ۾ شهيد ذوالفقار علي ڀٽو جي ورسي تقريب کي خطاب ڪندي خورشيد شاهه چيو ته  هن ملڪ ۾ هاري، مزدور پيڙجي رهيو آهي، حڪمرانن جي ڪن تي جونءِ به نٿي چري. سندس چوڻ هو ته اسان عوام کي ڏکين حالتن ۾ ڇڏي ڀڄي وڃڻ وارا ناهيون. اسين اقتدار جا بکيا ناهيون، اسان کي حڪومت نه خوشحالي گھرجي.  خالي ڳالهيون ڪرڻ سان ڪير ليڊر نٿو بڻجي سگھي. ليڊر ٿيڻ لاءِ ڪشالا ڪٽڻا پوندا آهن، جيل ڀوڳڻو پوي ٿو. هن چيو ته بينظير ڀٽو سڄي ڄمار عوامي جدوجهد ۾ گذاري ڇڏي. هن چيو ته ڪجھه ماڻهو ميڊيا تي اچي پ پ خلاف واويلا ڪري رهيا آهن. پ پ خلاف سازشون ڪڏهن به ڪامياب نه ٿينديون. الله جي عدالت آهي ۽ الله سڀ ڪجھه ڏسي رهيو آهي.

 

پ پ خلاف اهي ماڻهو واويلا پيا ڪن جن کي ڦاٽڪ وارو به ڪونه سڃاڻي: وڏو وزير

ڳڙهي خدا بخش(رپورٽر) وڏي وزير سيد قائم علي شاهه چيو آهي ته سنڌ ۾ پ پ خلاف اهي ماڻهو جدوجهد ڪري رهيا آهن جن کي ڦاٽڪ وارو به ڪو نه سڃاڻي. ايندڙ عام چونڊن کان اڳ بلاول سڄي ملڪ ۾ ڇائنجي ويندو. سازشن کي ناڪامي ملندي. ڳڙهي خدابخش ڀُٽي ۾ شهيد ذوالفقار علي ڀٽي جي ورسي کي خطاب ڪندي وڏي وزير سيد قائم علي شاهه چيو ته ارڙهين ترميم کانپوءِ صوبن کي خودمختياري ملي پر مرڪز ان تي عمل نه ڪيو ڪري. هن چيو ته وفاق صوبن کي آئين ۾ ڏنل حق نه پيو ڏئي. وفاقي سرڪار آئين تي عمل ڪري. چئيني صوبن کي آئين تحت حق ملڻ گھرجن. پنهنجا حق ڇني وٺنداسين.وڏي وزير چيو ته ڌڪاريل ماڻهو پ پ خلاف ڳالهائي رهيا آهن. اهي جدوجهد جي ڳالهه ٿا ڪن. انهن کي ڦاٽڪ وارو به ڪونه سڃاڻي. هن چيو ته ٿر ۾ وڃي جلسو ڪندڙ پنهنجو قد بت ڏسي پوءِ ڳالهائين. ان موقعي تي پ پ پنجاب جي اڳوڻي صدر منظور وٽو خطاب ڪندي چيو ته منظور وٽو چيو ته پيپلزپارٽي قانون ٺاهيندڙن جي پارٽي آهي. ڀٽي صاحب ملڪ کي آئين ڏنو، جنهن ملڪ کي مضبوط ڪري ڇڏيو. هن چيو ته سازشن باوجود ڀٽي صاحب چونڊ کٽي، شهيد ڀٽو جي ڪابينا ۾ ڪو به اهڙو وزير نه هو جنهن تي ڪرپشن جو الزام هجي.

 

ڪي پي ڪي، گلگت ۽ آزاد ڪشمير ۾ برسات جون تباهڪاريون، فوتين جو انگ 76 ٿي ويو

پشاور(م.ڊ)  خيبر پختونخوا، گلگت بلتستان ۽ آزاد ڪشمير ۾ برساتن دوارن مختلف واقعن ۽ حادثن جي نتيجي ۾  عورتن ۽ ٻارڙن سوڌو فوتين جو انگ وڌي 76 ٿي ويو آهي، موسميات کاتي جو چوڻ آهي ته ڪي پي ڪي جي هيٺانهن علائقن ۾ اڃا وڌيڪ برسات ۽ جبلن تي برف وسڻ جو امڪان آهي، شانگلا ۾ برساتن دوران لينڊ سلائيڊنگ سبب 22 ڄڻا فوت ٿي ويا، جڏهن ته عام زندگي جو ڪاروهنوار ٺپ ٿي ويو آهي، قراقرم رستو، سوات روڊ ۽ ٻيا رابطي وارا رستا لينڊ سلائيڊنگ سبب پوري ريت بند ٿي ويا آهن، جڏهن ته ٻوڏ جي وهڪري ۾ مينگوره-سوات روڊ جو ڪجهه حصو پڻ لڙهي ويو، هوڏانهن غوربند مٽا اعواڻ واري علائقي ۾ پٿر ڪرڻ سبب گاڏي سوات درياهه ۾ ڪري پئي، جنهن جي نتيجي ۾ 5 ڄڻا ٻڏي فوت ٿي ويا، اهڙي ريت ليلونئي ۾ گهر تي مٽيءَ جي ڇپ ڪرڻ سبب 3، چڪيسر ۾ 3،مارين ۾ 3،رانيال ۾ 4،مارتونگ ۾ 2، پورن ۾ هڪ ۽ ڪانا ۾ به هڪ ڄڻو فوت ٿي ويا.  ٻئي طرف ڪوهستان: ڪوهستان جي علائقي ڪنديان ۾ 5 گهرن مٿان مٽيءَ جي ڇپ ڪري پئي، جنهن جي نتيجي ۾ 30 کان وڌيڪ ماڻهو دٻجي ويا، ڊي پي او ڪوهستان ٻڌايو ته ڪوهستان جي علائقي ڪنديان ۾ تيز برساتن سبب مٽيءَ جي هڪ وڏي ڇپ آبادي مٿان ڪري پئي، جنهن جي نتيجي ۾ 5 گهر دٻجي ويا، هن ٻڌايو ته مٽيءَ جي ڇپ ڪرڻ سبب رابطي وارو رستو بند ٿي ويو،جنهن ڪري امدادي ڪمن ۾ سخت ڏکيائين جو منهن ڏسڻو پيو، ڊي پي او ٻڌايو ته مٽيءَ جي ڍيرن هيٺان 30 ڄڻا دٻجي ويا آهن، جن کي ڪڍڻ جي ڪوشش ڪئي پئي وڃي، ڊي پي او ڪوهستان مطابق علائقي ۾ ڦاٿل 21 جاپاني سياحن کي محفوظ هنڌ تي پهچايو ويو آهي

 

ن ليگ جي حڪومت ۾ ننڍن صوبن کي حق نٿا ملي سگهن: مولابخش چانڊيو

لاڙڪاڻو (بيورو) مولابخش چانڊئي چيو آهي ته ن ليگ جي حڪومت ۾ ننڍن صوبن کي حق نٿا ملي سگهن. لاڙڪاڻي جي ڳڙهي خدا بخش ڀٽو واري علائقي ۾ شهيدن جي مزارن تي حاضري ڀرڻ بعد ميڊيا سان ڳالهائيندي مولابخش چانڊئي جو چوڻ هو ته ن ليگ جي سياست هڪ علائقي تائين محدود آهي، ان ڪري هو ننڍن صوبن کي حق ڏيڻ نٿا چاهن.هن چيو ته سنڌ ۾ گورنر راڄ جو مطالبو ڪندڙ جمهوري ناهن، گرينڊ الائنس جي عمرڪوٽ واري جلسي ۾ روحاني جماعت جا ماڻهو هئا.سندس چوڻ هو ته اڳوڻو صدر آصف علي زرداري طبيعت خراب هجڻ ڪري پرڏيهه ۾ ترسيل آهي، جڏهن ته ورسي ۾ پ پ چيئرمين بلاول ڀٽو زرداري خطاب ڪندو.مولابخش چانڊئي چيو ته بلاول ڀٽو زرداري، قوم سان اهم معاملن بابت ڳالهائيندو، جنهن جي کيس سموري ڄاڻ آهي.هن چيو ته پرويز مشرف کي پرڏيهه وڃڻ جي اجازت حڪومت ڏني، جنهن بابت عدالت واضح ڪري چڪي آهي.سڌ سماءَ واري صلاحڪار چيو ته جلسي ۾ وڏي انگ ۾ عوام شرڪت ڪندو.

 

سرفراز مرچنٽ ايف آءِ اي وٽ بيان رڪارڊ ڪرائڻ لاءِ پاڪستان پهچي ويو

اسلام آباد (بيورو)  متحده جي لانڊرنگ ڪيس ۾ سرفراز مرچنٽ بيان رڪارڊ ڪرائڻ لاءِ پاڪستان پهچي ويو آهي ۽ پاڻ سان گڏ ڪجهه ڪاغذ به کڻي آيو آهي، مقامي ميڊيا مطابق سرفراز مرچنٽ ايف آءِ اي سامهون پنهنجو بيان رڪارڊ ڪرائيندو ۽ پنهنجي سان گڏ آندل ڪاغذ به شاهدي طور پيش ڪندو، سرفراز مرچنٽ جي آمد جي اطلاع تي ڊائريڪٽر ايف آءِ اي مظهر ڪاڪاخيل ٻڌايو ته سرفراز مرچنٽ طرفان اڃا تائين ڪو به رابطو ناهي ڪيو ويو