تازيون خبرون

Daily Archives: April 2, 2016

بولڊ لفظ ناهي وڻندو، پاڻ کي بولڊ اداڪارا قرار ڏيڻ تي منجهيل آهيان: تارا اليشا

ممبئي (شوبز نيوز) بالي ووڊ اداڪارا تارا اليشا بيري چيو آهي ته کيس بولڊ وارو لفظ پسند ناهي ۽ هوءَ پاڻ کي بولڊ اداڪارا قرار ڏيڻ جي حوالي سان مونجهاري جو شڪار آهي، تارا جي ايندڙ فلم وڪرم ڀٽ جي لو گيمز آهي، ممبئي ۾ فلم جي مشهوري مهم جي سلسلي ۾ پريس ڪانفرنس ڪندي تارا اليشا چيو ته لو گيمز اهڙي فلم آهي، جنهن ۾ حقيقت ڏيکاري وئي آهي، جڏهن ته مونکي لفظ بولڊ ناهي وڻندو، فلم ۾ پنهنجي ڪردار جي تياري جي حوالي سان سوال جي جواب ۾ تارا چيو ته وڪرم سر جي رهنمائي کانسواءِ مان اهو نه ڪري سگهان ها، هن چيو ته فلم دوران مونکي زخم رسيو پر مان ايتري ته جوش ۾ هيس جو ان جي خبر ئي نه پئي، جنهن کانپوءِ وڪرم سر آيو ۽ چيو ته سور محسوس ڪرڻ کان ڪڏهن به نه ڊڄجان، سندس ان صلاح مونکي وڏي همت ڏني، هڪ سوال جي جواب ۾ تارا جو چوڻ هوته فلمن ۾ ڪرڻ کان پهرين مان پنهنجو پاڻ ڳولڻ کان ڊنل هيس پر جڏهن مان کليل نمموني پنهنجي سامهون آيس ته مونکي لڳو ته مان گهڻو ڪجهه ڪري سگهان ٿي.

 

رنوير ۽ مان هڪجهڙا آهيون، گڏ ڪم ڪيون ته باهه ٻاري ڇڏينداسين:رتيڪا سنگهه

ممبئي:بالي ووڊ فلم سالا خڙوس ذريعي شهرت ماڻيندڙ اداڪارا رتيڪا سنگه چيو آهي ته رنوير سان سندس جوڙي ميچ ڪري ٿي،ڇو ته اسان ٻئي تمام گهڻا تيز آهيون، مارشل ارٽسٽ مان اداڪارا بڻيل رتيڪا هڪ انٽرويو ۾ چيو ته مونکي رنوير سنگه ۽ رنبير ڪپور ٻئي وڻڻدا آهن پر مان سمجهان ٿي ته رنوير ۽ مون ۾ تمام گهڻي هڪجهڙائي آهي،جيڪڏهن اسان فلم ۾ گڏ ڪم ڪيون ته اها تمام گهڻي ڪامياب ٿي سگهي ٿي،سندس چوڻ هو ته بالي وڊ جي موجوده نسل ۾ عاليا ڀٽ سڀني کان بهترين ۽ هوشيار اداڪارا آهي، 22 ورهين جي رتيڪا سنگهه چيو ته مان تازو ئي فلم ڪپور اينڊ سنز ڏٺي آهي، جنهن ۾ عاليا ڪمال جي اداڪاري ڪئي آهي،سندس اداڪاري سبب ائين لڳي ئي نه پيو ته اها ڪا فلم آهي پر ائين پئي لڳو ته ته عاليا ڀٽ حقيقي زندگي ۾ ڳالهائي رهي آهي، اهو سڀ ڪجهه سندس ٽيلينٽ ظاهر ڪري ٿو.001

 

سرفرازاحمد کي ٽي ٽوئنٽي ٽيم جوڪپتان بڻائڻ جو فيصلو ٿي ويو

لاهور (اسپورٽس نيوز) ٽي ٽونئنٽي ورلڊ ڪپ ۾ ناڪامي کانپوءِ پاڪستان ڪرڪيٽ بورڊ ۽ ٽيم اندر وڏيون تبديليون اچڻ جو امڪان ظاهر ڪيو پيو وڃي،جڏهن ته ٽي ٽوئنٽي ڪپتان شاهد آفريدي کي هٽائي سندس جاءِ تي نوجوان بيٽسمين وڪيٽ ڪيپر سرفراز احمد کي مقرر ڪرڻ جو فيصلو ڪيو ويو آهي.جڏهن ته چيو پيو وڃي ته ٽي ٽوئنٽي ڪپتان شاهد آفريدي جو اڃا ڪوبه واضح فيصلو سامهون ناهي آيو ان لاءِ سرفراز احمد جي ڪپتاني جو فيصلو ڪجهه ڏينهن دير جو شڪار ٿي سگهي ٿو.003

 

ويسٽ انڊيز ۽ انگلينڊ جي وچ ۾ دنيا جي مختلف گرائونڊز تي ٿيندڙ ٽي 20 ميچز ۾ کٽڻ جي حوالي سان ڪاري آنڌي اڳتي

لاهور(اسپورٽس نيوز) ٽي 20 ورلڊ ڪپ جي فائنل ۾ پهچڻ لاءِ ويسٽ انڊيز ۽ انگلينڊ جي وچ ۾ دنيا جي مختلف گرائونڊز تي ٿيندڙ ٽي 20 ميچز ۾ کٽڻ جي حوالي سان ويسٽ انڊيز جي ٽيم جا چانس وڌيڪ آهن. ٻنهي ٽيمن وچ ۾ 2007ع کان 2016ع تائين 13 ٽي 20 ميچز کيڏيا ويا، جنهن ۾ انگيلنڊ جي ٽيم چئن ۾ ڪاميابي حاصل ڪئي ۽ 9 ۾ شڪست ٿي. ڀارت جي سرزمين تي ٻنهي ٽيمن وچ ۾ صرف هڪ ميچ کيڏي وئي جنهن ۾ ويسٽ انڊيز جي ٽيم ڪاميابي حاصل ڪئي. انگلينڊ ۾ ٻنهي ٽيمن وچ ۾ 6 ٽي 20 ميچز ٿيا جنهن ۾ انگلينڊ جي ٽيم 3 کٽيا ۽ 4 هاريا. واضح رهي ته انگلينڊ ۽ ويسٽ انڊيز جي ٽيمن وچ ۾ ٽي 20 ورلڊ ڪپ جو فائنل ميچ 3 اپريل تي ايڊن گارڊن ڪلڪته ۾ پاڪستاني وقت مطابق شام ساڍي ڇهي وڳي کيڏيو ويندو. ويسٽ انڊيز جي ٽيم ڀارت کي سيمي فائنل ۾ 7 وڪيٽن تائين هارائي فائنل لاءِ ڪواليفائي ڪيو. جڏهن ته انگلينڊ نيوزيلينڊ جي ٽيم کي سيمي فائنل ۾7 وڪيٽن تان هارايو.

 

حڪومتي ڌر ايترو منجھيل ڇو آهي؟: شفيق شاڪر

نون ليگ حڪومت جنهن جو سربراه 1999ع ۾ پاڪستان ۾ فوجي مداخلت بعد گھڻن تجزيا نگارن جي نزديڪ  هڪ اينٽي اسٽيبلشمينٽ، جمهوري ۽ اصولي سياستدان جي طور تي اڀريو هو،جنهن پنهن جي ماضيء جي ڪيل سمورين سياسي توڙي انتظامي غلطين مان سبق سکيو هو، جنهن جي نتيجي۾ انهن تجزيي نگارن جي چوڻ مطابق هن محترمه بي نظير ڀٽو سان ماضيء جي غلطين تي معذرت ڪندي جمهوريت جي بحالي ۽ بقا لاء هڪ عظيم چارٽر آف ڊيموڪريسيء تي به صحيحون ڪيون هيون.ٻنهي اهم سياسي پارٽين جي اڳواڻن اهو وچن به ڪيو ته اهي ڪنهن به سياسي حڪومت جي خلاف اسٽيبلشمينٽ طرفان ٿيندڙ ڪنهن به سازش جو حصو نه بڻبا ۽ نه ئي اسٽيبلشمينٽ يعني فوج کي سياسي معاملن ۾ ٽنگ اڙائڻ جي اجازت ڏيندا.اهو ڏاڍو وڻندڙ خواب هو جيڪو هنن پاڪستان توڙي دنيا جي جمهوريت پسند ڌرين کي ڏيکاريو هو.پر اهو خواب اڃا گھڻو عرصو نه گذريو هو ته 2007ع ۾ ان وقت پاڪستان جي فضائن ۾ پهچڻ کان پهرين پرزا پرزا ٿي پکڙي ويو جڏهن پاڪستان پيپلز پارٽيء جي قيادت ملڪ ۾ پير رکڻ جي قيمت ان وقت جي فوجي آمر سان بدنام زمانه اين آر او جي صورت ۾ ادا ڪئي جنهن جي برڪت سان نه رڳو پيپلز پارٽيء جا پاپ ڌوپي ويا پر ٻين پارٽين جا سوين ڪرمنل ان اين ار او جي گنگا ۾ ٽٻيون هڻي انساني قتل جهڙن سنگين ڏوهن کان به پاڪ ۽ پوتر بڻجي وڃي اقتدار ۽ اختيار جي ڪرسين تي ويٺا.جيڪر ڏٺو وڃي ته ان اين آراو جي برڪت سان ئي ميان ڀائرن کي رائيونڊ جي رستي جي راهداري نصيب ٿي.2007ع ۾ پاڪستان پهچي ميان صاحب ان وقت تخت تي ويٺل آمر جي خلاف جيڪا “ عظيم جدوجهد ” ڪئي يا حقيقي جمهوريت بحال ڪرڻ لاء جيڪا “قربانين ڀريل تحريڪ” هلائي،وقت جو مورخ اڄ به خوردبين کنيو ان داستان کي ڳولهيندو ئي رهي ٿو. ها فوجي آمرن خلاف ذري گھٽ سڀني سياستدانن اٺ جي آنڊي جيڏيون ڊگھيون تقريرون ڪرڻ کان ڪڏهن به وسان نه گھٽايو.پر سچ اهو ئي آهي ته اسٽيبلشمينٽ جي خلاف اصولي جنگ جا اعلان به ٿيندا رهيا ساڳئي وقت سياستدانن مان ڪنهن به ساڻن سنگت نه ٽوڙي.جيڪر اهي انهن جي چوڻ مطابق ايتري عوامي طاقت رکڻ جا دعويدار هئا جو هڪڙي لانگ مارچ جي نتيجي ۾ عدليا کي بحال ڪرائي سگھيا ٿي ته پوء جنهن مشرف عدليا کي معزول ڪرڻ جو غيرآئيني سنگين ڏوه ڪيو هو انهيء جي خلاف ڪاروائيء لاء ڪو لانگ مارچ ڇو نه ٿي سگھيو؟ اهي ڪڏهن به شينهن ناهن بڻيا پر انهن کي سدائين شينهن تي سواري ڪرڻ جو شوق رهيو آهي.شير بنجڻ جي شوق ۾ اهي مشرف کي اجلت ۾ جھپٽو هڻي کيس وات ۾ ته وجھي ويا پر ترت ئي کين خبر پئجي ويئي ته اهو ته اهڙو هڏو هو جنهن کي هو نه  ته ڳڙڪائي سگھيا ٿي ۽ نه ئي واپس الٽي ڪري ٻاهر ڪڍي سگھيا ٿي.اهو ته اڃا ثابت نه ٿيو آهي ته انهن تي مشرف کي ڇڏڻ لاء ڪهڙا ڪهڙا پريشر ۽ دٻاء هئا،اهي دٻاء ملڪي هئا يا غير ملڪي،ڪاروباري هئا يا سياسي پر نواز حڪومت جنهن نفسياتي هيجان ۽ اعصابي خوف جو شڪار آهي، اهو به ممڪن هجي ته هنن بنان ڪنهن جي چوڻ جي  ڪمبل مان بيزار ٿي ڪمبل مان  پاڻ ئي هٿ ڪڍيا هجن.اهو به ته ممڪن آهي ته اسٽيبلشمينٽ سان اڳواٽ بنان چوڻ جي نيڪ خواهشن جو پيغام موڪليو ويو هجي ته اڳتي پنجاب ۽ وفاق ۾ ڪجھ “اشرافن” جا کلندڙ اڇا چٺا کلڻ کان بچي وڃن.اهو به امڪانات مان آهي ته جيئن پنجاب ۾ عورتن تي تشدد خلاف پاس ڪيل بل ۽ ممتاز قادريء کي ڏنل ڦاسيء ذريعي غيرملڪي خانبهادرن کي اهو يقين ڏيارڻ جي ڪوشش ڪئي ويئي ته ميان صاحب جي باري ۾ مغربي ميڊيا جو اهو تاثر ته هن جا انتهاپسندن سان لاڳاپا آهن،ان تاثر کي ختم ڪرڻ لاء واضح ٿبوت فراهم ڪيا وڃن ته عرصو ٿيو ميان صاحب اسلاميت جو اوڍڻ لاهي لبرل جي لنگوٽي  ٻڌي چڪو آهي.هڪ اخبار ۾ميان صاحب جي هڪ عقيدتمند جا اهي لفظ پڙهي کل به اچي ٿي ۽ ان عقيدتمند جي معصوم خواهش تي ترس به ٿئي ٿو جيڪو اهو ماتم ڪري رهيو هو ته “ ميان نواز شريف کي لبرل ٿيڻ جي سزا ڏني پيئي وڃي!”اهڙن معصومن ئي پاڪستاني قوم جو ٻيڙو غرق ڪيو آهي.“ڪيڏانهن منهن ملير جو ڪيڏانهن ٽنڊو الهيار!” ملڪي خزاني جو هي جيڪو هنن حشر ڪيو،هي بدعنوانين جا جيڪي داستان رقم ٿيا ۽ هي جيڪو دهشتگردن سان پيار ۽ محبت وارو سلوڪ ڪندا رهيا،هيء جا عوام کي تاريخ جي بدترين گورنس ڏني،جيڪر اهو ئي لبرلزم آهي ته بس پوء ملڪ جو خدا ئي حافظ آهي!اسان جا دانشور ۽ عوام ڪوبه فيصلو ڪرڻ ۾ دير نٿا ڪن.هيرو کي زيرو ڪن يا زيرو کي هيرو ڪن،وس وارا آهن. پاڪستان جي حڪمرانن مان ڪهڙو بدنصيب آهي جنهن کي عظيم لقبن سان نه نوازيو ويو هجي. ڪو اسلام جو سپاهي، ڪو ايشيا جو شير،ڪو مائو،ڪوياسرعرفات،ڪو جمال ناصر،ڪو مصطفى عطا ڪمال،ڪو اساما ته ڪو ملا عمر آهي. سوچن ۽ روين جون ايڏيون وڏيون انتهائون ۽ تضاد شايد اسان جي پاڪستاني معاشري کان سواء ٻئي ڪنهن ملڪ کي نصيب نه ٿيا آهن.خير ڇڏيو ان ڳالھ کي! ذڪر پئي ٿيو هڪ جمهوري ۽ اصول پسند عوامي سياستدان جي طور تي ميان صاحب ۽ مشرف واري معمي جو ته اڃا تائين ميان صاحب ۽ سندس عظيم جانثارن جا چپ ان معاملي تي خاموش ڇو آهن؟ پيرن ۾ وڇايل ڪنڊو ته نظر اچي ويو پر جنهن ڪنڊي وڇائڻ جي شرارت ڪئي تنهن ڪهڙي سليماني ٽوپي پائي رکي آهي جو نظر نٿو اچي.مشرف کي ڦاهيء تي لٽڪائڻ واري جرئت پنهن جي اندر پيدا ڪرڻ جو مطالبو اوهان کان عوام هرگز نٿو ڪري پر صرف ايتري جرئت جي اظهار جو مطالبو ٿو ڪري ته مهرباني ڪري ان مخلوق جو چهرو ته ماڻهن کي ڏيکاريو جنهن اوهان جي سموري جمهوري جدوجهد ۽ عظيم انصاف جي ارادن تي پاڻي ڦيرڻ جي ناپاڪ سازش ڪئي آهي!هاڻي اچون ٿا نوازشريف جي “لبرلزم” ڏانهن سفر جي عظيم ڪهاڻيء طرف ته ممتاز قادريء کي ڦاهي ڏيئي ليلا جي عاشقن ۾ پنهن جو نالو ته لکائي ويٺا پر هن شعر وانگر ته

“رات ڪو مئي خوب سي پي،صبح ڪو توبھ ڪرلي،

رند ڪي رند رهي،اور هاتھ سي جنت ڀي نه گئي.”

سو شايد غالب بدلجي ويو هجي پر غالب جا خيال نه بدليا هجن.اهو هجوم جن ڏنڊن ۽ جھندن سان بعد ۾ اسلام آباد جي ستيا ناس ڪئي تن کي  پئسا ۽ بسون ڏيئي،راولپنڊيء ڪنهن پهچايو،خيرات جي ديڳين کان اسلام آباد جي پلائن تائين ثواب ڪنهن ڪمايو،اهو هاڻي هڪ کليل راز آهي.ان سموري پراسرار منظر مان رات ڏينهن قانون جون هنڀوڇيون هڻندڙ وزيرداخلا جڏهن پنهن جو ديدار مبارڪ ڪرايو ته ان وقت تائين ته سڀ ڪجھ سڙي چڪو هوپر هن جي چهري تي اهائي بيوسي هئي جيڪا مشرف کي باادب طريقي سان دبئي دربدر ڪرڻ واريء سرڪاري خوشبريء ذريعي ميڊيا وارن جو وات مٺو ڪرائڻ وقت نظر آئي هئي.يا جيڪا بيوسي آئي ايس پي آر جي پريس ڪانفرنس دوران چرچن جون چٽڻيون کارائيندڙ پرويز رشيد جي چهري تي ڏٺي ويئي هئي.حڪومت عالمي ۽ ملڪي ليول تي ڪيترو مضبوط آهي ان جو فيصلو ڪرڻ ۾ پنهن جو مٿو کپائڻ بدران اسان صرف ڪجھ منظر خود حڪومت جي اندروني ڏاڙهي پٽ ۽ مونجهارن جا شاهڪار ظاهر ڪرڻ لاء پيش ڪيون ٿا.وزيرداخلا چيو ته حڪومت ڌرڻي وارن سان ڪي به ڳالهيون نه ڪندي.اسحاق ڊار چيو ته اسان نه صرف ڳالهيون ڪيون آهن پر انهن جا  ڪجھ مطالبا به مڃيا آهن.نواز شريف چيو ته حڪومت پنجاب ۾ دهشتگردن خلاف سخت ڪاروائيء جو حڪم ڏيئي ڇڏيو آهي جڏهن ته پنجاب جي وزيرقانون جي چوڻ مطابق پنجاب ۾ ڪوبه نئون آپريشن نه پيو ڪيو وڃي.آئي ايس پي آر مطابق پنجاب ۾ آرمي چيف جي حڪم تي فوج ۽ رينجرز طرفان آپريشن شروع ڪيو ويو آهي جڏهن ته پنجاب حڪومت جي ذريعن مطابق وزيراعظم جي هدايتن تحت ڪاروائيون ڪيون پييون وڃن.هي جيڪو چيو پيو وڃي ته حڪومت ۽ فوج هڪ ئي پيج تي آهن،سو هڪئي پيج تي آهن يانه پر اها حقيقت سامهون اچي چڪي آهي ته اهو پيج ئي هاڻي ڦاٽي ٻن حصن ۾ ورهائجي چڪو آهي. ويچاري وزيراعظم جي اها قابل رحم حالت آهي جو هو آمريڪا جي دوري تي به نٿو وڃي سگھي جو  شايد واپس پاڪستان ۾ پير رکڻ جو به کيس وهم پيدا ٿي پيو آهي.اڃا ته شروعات آهي جنهن هنن جون متيون منجھائي ڇڏيون آهن،نيب جا پر ڪٽڻ جي خواهش ۾ اهي پنهن جا هٿ زخمي ڪري چڪا آهن،“را” جي هٿ آيل غيرملڪي شهزادي هيڪاري حڪمرانن جي مونجھارن ۾ اضافو ڪري ڇڏيو آهي،جنهن جي گرفتاريء جو ايترو فڪر ڀارت کي ڪونهي جيترو هنن کي آهي.

سٽ سلجھڻ جي بدران وڌيڪ منجھندو محسوس ٿئي ٿو.ايندڙ هرڏينهن هنن لاء وڌيڪ المناڪ هئڻ جا آثار نظر اچي رهيا آهن.اهي سڀ ڪجھ صدقو ڪري ڪجھ عرصي لاء خوشيء سان گھر ويهڻ لاء به تيار آهن جيڪر هنن کي  ڪوسندن پيارن جي عافيت جو يقين ڏياري پر سامهون اهو نعرو لڳي رهيو آهي ته “جمهوريت کي ڪنهن به صورت ۾ پٽڙيء تان نه لهڻ ڏبو. دهشتگردن خلاف جنگ جاري رهندي.” مطلب ته اوهان کي به گھر وڃڻ نه ڏنو ويندوپر ڪنداسين اسان اهوئي جيڪو اسان چاهينداسين.سو تقدير اسان جي هنن حڪمرانن سان عجيب کيل کيڏي رهي آهي جتي انهن کي اهو ئي مشورو ڏيئي سگھجي ٿو ته

“ آه نه ڀر،لبون ڪو سي،يي عشق هي دل لگي نهين!”

جيڪي نادان دوست ميان صاحب کي اڃا تائين ڪي پهلوانيء جا ڪرتب نه ڏيکارڻ جا مهڻا ڏيئي رهيا آهن،ميان صاحب کي هن شعر جي ذريعي سندن تسلي ڪرڻ گھرجي ته

“ رسوائيان نه لاتي تو اور ڪيا ڪرتي، نه جشن شعله مناتي تو اور ڪيا ڪرتي،

اندهيرا باغ مين آيا تها روشني ڪي ٿي،جو اپنا گھر نه جلاتي تو اور ڪيا ڪرتي”

 

 

 

اي خطئه لاهور تيري جانثارون کو سلام……!! : ڊاڪٽر عظميٰ جوکيو

27 مارچ 2016ع  آچر  ڏينهن جي شام ۽ حضرت عيسا عليه اسلام جي مڃيندڙن آسماني ڪتاب بائبل تي ايمان رکندڙ ۽ پڙهندڙ پراٽسيٽنٽ ۽ ڪِٿلڪه وڏن عيسائي فرقن ۽ جملي 55 فرقن جي گڏيل عيد ايسٽر جنهن کي بهار، بنست رُت، رنگن جي هولي، وڻن ۾ نون پن  گونچ نڪرڻ يعنيٰ وڻندڙ ۽ ڌرتي جو سينو چيري ٻجن جي ڦٽڻ جو مهينو، شاعرن، اديبن، تخليق ڪارن جي ذهني اوسر ۽ سرجڻ جو عالمي عيسوي مهينو، سپت سنڌو يعنيٰ ستن دريائن جي ڌرتي تهذيبن جي ماءُ ڌرتي کي رت جي هولي سان ان مهل وهنجاريو ويو جڏهن لاهور جي گلشن اقبال ٽائون پارڪ راوي ڪناري سوساله قديم پنجاب يونيورسٽي ڪئمپس ڀرسان خودڪش بمباري سبب سوين معصوم ٻچڙن جا لاش ٽڪر ٿي هوا ۾ اڏامڻ لڳا ۽ سوين ماڻهو شديد زخمي حالت ۾ اسپتالن ۾ زير علاج داخل ٿيا، هن ڌماڪي ۾ صرف پنجاب جي شهر لاهور جا شهري شهيد يا زخمي نه ٿيا بلڪه پوري ملڪ جي ڪنڊ ڪڙڇ  سنڌ کان آزاد ڪشمير تائين وسندڙ آبادين جي فردن جو نقصان ٿيو ته ٻئي طرف گورنر پنجاب جي قتل ۾ سزا يا فته اعواڻ (ممتاز قادري) پوليس واري جي چاليهي جي سلسلي ۾ راولپنڊي ۾ گڏ ٿيل ماڻهن اسلام آباد جي ريڊ زون ايريا ۾ پارليامينٽ هائوس ۽ لاجز تي قبضو ڪري اسلام آباد پوليس جي ايس پي ۽ سپاهين کي زخمي ڪري ڀڄائي ڇڏيو

سائي ۽ ناسي پٽڪي وارن مولوين ڪيترن ئي سرڪاري گاڏين ۽ بلڊنگن کي باهه ڏئي ساڙهي ڇڏيو،  جڏهن ته ان وقت ڌرڻي کي ختم ڪرڻ لاءِ  پاڪستان آرمي جيڪا دنيا جي عظيم ماهر فوج آهي ان فوج  جي ٽرپل ون (111) هڪ سو يارنهه برگيڊ کي پارليامينٽ هائوس جو قبضو ڇڏائڻ  لاءِ ميدان ۾ لاٿو ويو ساڳئي ڏينهن هڪ مذهبي ڌر ڪراچي پريس ڪلب تي حملو ڪري ڪيترن ئي صحافين ۽ واٽهڙن ماڻهن کي زخمي ڪيو گاڏين ۽ پريس ڪلب جي ڪينٽين کي پڻ شديد نقصان پهچايو ويو ان کان اڳ ۾ 23 مارچ يوم پاڪستان جي موقعي ۽ 22 مارچ جي تهوار تي پهلوان علي نواز پنهور جي شراب جي بٺيءِ جيڪا ڏهاڪو سالن کان ٽنڊو محمد خان ضلعي ۾ لوڪل شگر ملن جي الڪول کپائڻ جو ڪاروبارو ڪندڙ رهيو ان پاران زهريلي ڪيمڪل واريون چار هزار بوتلون ٿيلهيون ڪچو شراب (ٺرو) 100 روپيه في ٿيلهي کپائي اڌ پئسا پاڻ رکندو هو ۽ اڌ انتظاميه توڙي  وڏيرن مقامي حڪومتي سياستدانن ۾ ورهائيندو هو ان جو جنهن به شراب پيتو ڄڻ جام اجل گُل ٿي ويو ايستائين جو سندس گهر جا ٽي ڀاتي به لقمئه اجل بڻجي ويا، مارچ 2016ع جو مهينو پاڪستان لاءِ ڳرو ثابت ٿيو مرحوم و مذ فور حضرت پيروپاڳارو شاهمرادن شاهه سدائين پنهنجي حياتي ۾ مارچ مهيني لاءِ ڊبل مارچ جو اصطلاح استعمال ڪندو هو سندس حياتي ۾ ته سمجهه ۾ نه آيو پر هن سال جو مهينو ڄڻ سندس چوڻي ڊبل مارچ ثابت ٿيو آهي

پاسٽ واقعه در واقعه  سانحه در سانحه انساني سماج هر هنڌ پوري دنيا ۾ اٿل پٿل ۽ جنگ جدل، تبديلي، ترقي، تنزلي جو سبب آهن پر هزارها سالن جي سنڌو تهذيب تي حمله آورن غاصبن، مذلن، ارغونن، ترخونن، تاتارين، احمد شاهه ابدالين ۽ نادرشاهن پاران ڪيل ڦرلٽ بربريت ۾ ميدان ڪار زار مقابله ۽ جنگيون ٿينديون هيون ۽ مڙس مڙسن جو مٽ  يا چٽ ٿي شڪست خورده ٿي جنگ هارائي ويهندا هئا ۽ غلامي قبول ڪري رعيت ٿيندا هئا ۽ مارجي ويل يا شهيد ٿيل باغي سورمن  جي  اولاد ٻار ٻچه غلام بڻائي سرِبازار خريد وفروخت جي منڊي لڳائي ويندي هئي ۽ نه ڪي معصوم بي قصور نياڻين ۽ پٽن کي اجل جو مزو چکايو ويندو هو، پر هن  جديد دور ڪمپيوٽر ايج ۾ پشاور پبلڪ اسڪول جي معصوم بي گناهه شاگردن کي جنت الفردوس حوالي ڪيو ويو ته ڪالهه وري يعنيٰ (27 مارچ)  موڪل ڏينهن سستي تفريح، کليل هوا خوري ۽ جهولن ۾ جهولڻ ۽ کلڻ جو مزو وٺڻ رنگ بر رنگي گل ۽ سبز پارڪ وڻ ۽ وڻ وڻ ڪاٺي گڏ ٿيل عام ماڻهن جي رونق پسڻ لاءِ آيل معصوم ۽ بي گناهه مسافر عورتن، نوجوانن، پوڙهن ۽ ننڍڙن معصوم ٻارڙن جي زندگي هڪ ڌماڪي   سان گل ڪري، ماءُ کان پٽ ۽ پيءُ کان پيار ڪندڙ ڌيءُ، زال کان ور ۽ مڙس کان سندس وني ۽ هن قوم جو مستقبل آئيندو نسل بم ڌماڪي جي دونهي ۾ خاڪه سان خاڪه بڻايو ويو ، انهن بي رحم سفاڪه قاتلن جلادن کي پنهنجي هن بزدلاڻي ۽ ڪريل حرڪت تي شرم اچڻ گهرجي جيڪي ننڍڙن ٻارڙن عورتن ۽ مسافرن، سير تفريح لاءِ آيل مهمان ماڻهن تي لڪل وار ڪن ٿا، مڙس آهن مرد آهن ڪهڙا به ڪٿان جا به ڪهڙي به خيال نظريه جا آهن انهن کي همٿ  ۽ جرئت آهي مقابلو ڪرڻو آهي ته مڙس ٿي مڙسن سان ميدان ڪار زار سجائين باقي بزدلاڻي ڪاروائي ۽ عورتن، ٻارڙن، مسافرن، مهمانن ۽ سير تفريح لاءِ لاهور ايندڙن کي لقمئه اجل بڻائڻ وارو عمل شديد مذمت لائق آهي

اسان حاڪم وقت شريف برادرن،  اعليٰ عدليه، هٿياربند آرمي چيف / فوج ۽ پوليس توڙي خفيه ادارن جي اڳواڻن، سول ڪامورن کان پرزور مطالبو ۽ اپيل ٿا ڪريون ته مهرباني ڪري ذاتي نظريات،  مفاد ۽ مذهبي قدورت ختم ڪري، معصوم انسانن، عوام يعني خلق خدا کي جاني ۽ مالي نقصان کان بچايو عيش عشرت ۽ ٺاٺهه باٺهه، پروٽوڪول ۽ لالچون حرص حوص ختم ڪري آئينده جي ايندڙ نسل ۽ مستقبل جي معمار گلن جهڙي زندگين  معصوم بي گناهه ۽ بي قصور ٻچن جي زندگي جي حفاظت ڪريو ۽ ملڪ ۾ هر قسم جي دهشتگردن خلاف متحد ٿيو ٻي صورت ۾ ملڪ دشمن اندروني ۽ بيروني قوتون مذهب، قومپرستي، فرقه واريت ۽ لسانيت جي بنياد تي هن ملڪ کي افغانستان ۽ عراق بڻائي ڇڏيندا.

 

Druzmajokhio786@gmail.com

 

 

”را“ بابت ايران کان به وضاحت طلب

گذريل ڏينهن پرڏيهي کاتي جي ترجمان هفتيوار بريفنگ ڏيندي چيو آهي  ته پاڪستان مان ڀارتي ڳجهي اداري را جي حاضر سروس آفيسر جي گرفتاري انتهائي اهم ڪاميابي آهي، سڄي دنيا کي ڀارتي سرڪاري ادارن جي پاڪستان ۾ تخريبي ڪاررواين بابت ڌيان ڇڪرايو آهي، سڄي دنيا ڀارتي ايجنسي را جي ايجنٽ ڪلڀوشڻ ياديو جو اعترافي بيان ڏٺو.

پاڪستان ۾ ڀارتي مداخلت جو معاملو پهرين ئي گڏيل قومن ۾ کنيو ويو آهي، گذريل سال اسان ڀارتي ڳجهي اداري جي پاڪستان ۾ سرگرمين جا ثبوت گڏيل قومن کي ڏنا آهن. ڀارت هاڻي ڪلڀوشڻ ياديو کي پنهنجو ايجنٽ مڃي يا نه مڃي پر ڀارتي ايجنٽ پاڻ اهو اعتراف ڪري چڪو آهي. را جي ايجنٽ جي گرفتاري کانپوءِ وڌيڪ ثبوت گڏ ڪيا پيا وڃن. ڪلڀوشڻ ياديو ٻڌايو آهي ته پاڪستان ۾ سرگرمين جي لاءِ ڀارتي ايجنسي را جا اهم آفيسر ان کي رقم فراهم ڪندا هئا. ڪلڀوشڻ ياديو پنهنجي اعترافي بيان ۾ سڀ ڪجهه واضح ڪيو آهي ۽ اهڙو ئي بيان افغانستان ۾ چڪ هيگل به ڏنو هو.

ڪلڀوشڻ ياديو جي گرفتاري کانپوءِ پاڪستان ايران سان رابطي ۾ آهي ۽ ايران خاطري ڪرائي آهي ته ايران جي سرحد کي پاڪستان جي خلاف استعمال ٿيڻ نه ڏنو ويندو.ايم ڪيو ايم کي را جي فنڊنگ جو معاملو گهرو وزارت ڏسي رهي آهي. لاهور سانحي تي سڄي دنيا مذمت ڪئي آهي ۽ دهشتگردن جو ڪو به مذهب ناهي هوندو. سمورا پاڪستاني هڪ آهن، لاهور ۾ ٿيندڙ حملو مسيحي برادري تي نه پر پاڪستان تي هو. پاڪستان طرفان دهشتگردن جي مالي مدد جا بيان انتهائي بي بنياد آهن. پاڪستان دهشتگردي خلاف جنگ ۾ مصروف آهي ۽ اسان دهشتگردي جي خاتمي لاءِ پرعزم آهيون. پاڪ ڀارت پرڏيهي سيڪريٽرين جي ملاقات لاءِ مناسب تاريخ جو تعين ڪري رهيا آهيون.

ٻئي طرف پاڪستان ايران کان را جي هڪ ٻئي ايجنٽ راڪيش عرف رضوان جي حوالگي جو مطالبو ڪيو آهي، ان سلسلي ۾ وفاقي گهرو سيڪريٽري عارف احمد خان پاڪستاني حڪومت طرفان ايراني گهرو وزارت کي خط موڪليو آهي، پاڪستان ۾ مقرر ايران جي سفير مهدي هنر دوست ذريعي موڪليل خط ۾ چيو ويو آهي ته ڪل ڀوشن ياديو عرف حسين مبارڪ پٽيل اربين ڊالرن جي پاڪ چين اقتصادي راهداري کي ناڪام بڻائڻ جي ڪوشش ۾ هو، خط ۾ چيو ويو آهي ته ايران را جي پاڪستان مخالف سرگرمين کي سنجيده طور ڏسي، پاڪ ايران سرحد جي خودمختياري لاءِ ضروري قدم کنيا وڃن، اميد آهي ته ايران پاڪستان مخالف سرگرمين جو سخت سان نوٽيس وٺي انهن کي بند ڪرائيندو. ايراني حڪومت کان خط ۾ 6 معاملن تي تعاون طلب ڪيو ويو آهي، خط ۾ 6 مطالبا پڻ ڪيا ويا آهن، جن ۾ پهريون مطالبو ڪل ڀوشڻ ياديو جي ساٿي ”را“ جي سب انسپيڪٽر اڪيش عرف رضوان کي گرفتار ڪري پاڪستان جي حوالي ڪرڻ آهي، ٻيو مطالبو ڪل ڀوشڻ ياديو جي ايران ۾ سرگرمين بابت تصديق ڪئي وڃي، ٽيون مطالبو ايران جي مختلف شهرن ۾ ڪل ڀوشڻ ياديو جي رهڻ بابت آگاهه ڪيو وڃي ته هو ڪيترو وقت ايران ۾ رهيو ۽ ڪٿي رهيو، چوٿون مطالبو ڪل ڀوشڻ ياديو جي ڪاروبار سان گڏوگڏ اهو به ٻڌايو وڃي ته ڪن ماڻهن سان رابطي ۾ هو، پنجون مطالبو ايران ۾ ”را“ جي نيٽ ورڪ بابت آگاهه ڪيو وڃي، جڏهن ته ڇهون ۽ آخري مطالبو اهو آهي ته ان معاملي بابت لاڳاپيل ٻي جيڪا به معلومات دستياب ٿئي ته اها به فراهم ڪئي وڃي.