تازيون خبرون

Daily Archives: April 2, 2016

سياسي ۽ عسڪري قيادت جو پنجاب ۾ دهشتگردن خلاف سخت آپريشن جو فيصلو

راولپنڊي(م.ڊ) سياسي ۽ عسڪري قيادت پنجاب ۾ دهشتگردن خلاف سخت آپريشن ۽ اتي ”را“ جو نيٽ ورڪ ٽوڙڻ لاءِ ڪارروائين جو فيصلو ڪري ورتو آهي. ان سلسلي ۾ گذريل ڏينهن وفاقي گھرو وزير چوڌري نثار علي خان ۽ پنجاب جي وڏي وزير شهباز شريف پاڪ فوج جي سربراهه آرمي چيف جنرل راحيل شريف سان ملاقات ڪئي. پاڪ فوج جي سُڌ سماءُ واري شعبي آءِ ايس پي آر جي پڌرائي موجب آرمي چيف، گھرو وزير ۽ پنجاب جي وڏي وزير جي ملاقات ۾ پنهجاب ۾ آپريشن بابت ڳالهيون ڪيون ويون. نجي ٽي وي چينل سماء نيوز موجب آءِ ايس پي آر پاران ڄاڻايو ويو آهي ته ملاقات ۾ پنجاب م سخت آپريشن ڪري دهشتگردن جا سمورا نيٽورڪ ختم ڪرڻ جو فيصلو ڪيو ويو آهي، ان کان سواءِ صوبي ۾ ”را“ جي نيٽ ورڪ کي ختم ڪرڻ جي حوالي سان به ڳالهه ٻول ڪئي وئي ۽ ان ڳالهه تي اتفاق ڪيو ويوته ڪارروائيون ڪري ”را“ نيٽ ورڪ کي ختم ڪيو ويندو. هوڏانهن ناڻي واري وفاقي وزير اسحاق ڊار به آرمي چيف جنرل راحيل شريف سان ملاقات ڪئي آهي. آءِ ايس پي آر موجب ملاقات ۾ دفاعي بجيٽ تي ڳالهه ٻول ڪئي وئي.

 

مشرف معاملي تي حڪومت ٺوس موقف اختيار نه ڪيو: تفصيلي فيصلو جاري

اسلام آباد  (اين اين آءِ) سپريم ڪورت چيو اهي ته حڪومت اڳوڻي صدر جنرل رٽائرڊ پرويز مشرف جو نالو اِي سي ايل مان نه ڪڍڻ جي حوالي سان ٺوس موقف اختيار ناهي ڪيو چيف جسٽس انور ظهير جمالي جي لکيل تفصيلي فيصلي ۾ چيو ويو آهي ته ڪنهن به جوابدار جو نالو اِي سي ايل مان ڪڍڻ لاءِ ٺوس ثبوت جي ضرورت هوندي وفاقي حڪومت لاڳاپيل ڪيس ۾ ٺوس موقف اختيار ناهي ڪيو ۽ اٽارني جنرل کان ڪيترائي ڀيرا ان حوالي سان پڇا ڪئي ويئي پر اهو به مشرف جو نالو اِي سي ايل ۾ وجهڻ جي حوالي سان ڪوئي هدايت نامو کڻي نه آيو تفصيلي فيصلي ۾ چيو ويو ته مشرف جو نالو اِي سي ايل مان نه ڪڍڻ جو سنڌ هاءِ ڪورٽ جو فيصلو قانوني هو هاءِ ڪورٽ معاملي جي حساسيت سبب 15 ڏينهن تائين عملدرآمد روڪي ڇڏيو سپريم ڪورٽ پاران مشرف جو نالو اي سي ايل ۾ وجهڻ جو حڪم عبوري هو ۽ حتمي فيصلو اچڻ کان پوءِ عبوري حڪم موثر نٿو رهي.

 

آدمشماري سان سنڌ کي فائدو پهچندو، مخالفت اجائي آهي: وڏو وزير

سانگهڙ(ڊ.ر) سنڌ جي وڏي وزير سيد قائم علي شاهه چيو آهي ته  گڏيل مفادن واري ڪائونسل ملڪ ۾ آدمشماري اڻ ڄاتل مدي تائين نه پر ڊسمبر 2016  تائين ملتوي ڪئي آهي، جنهن جو مک سبب ضرب عضب آپريشن آهي، جنهن سبب  پاڪ آرمي مصروف آهي ۽ ڇاڪاڻ ته اسان پاڪ آرمي جي نگراني ۾ چونڊون ڪرائڻ چاهيون ٿا. هن دعويٰ ڪئي ته  ڪراچي ۾ اڳ صرف هڪ سياسي پارٽي چونڊن ۾ ڪامياب ٿيندي هئي پر تازين مقاني چونڊن ۾ پي پي پي ڪراچي ۾ 50 سيڪڙو ڪاميابي حاصل ڪئي آهي ۽ مستقبل جي چونڊن ۾ سنڌ سميت ڪراچي ۾ وڏي اڪثريت سان ڪاميابي ماڻيندي،هن اهڙو اظهار اڄ ضلعي سانگهڙ جي کپرو شهر ۾ خصوصي معاون علي حسن هنگورجو جي رهائشگاهه تي شهيد ذوالفقار علي ڀٽو جي 4 اپريل تي ٿيندڙ ورسي جي حوالي سان انتظامن جو جائزو وٺڻ لاءِ ڪوٺايل هڪ وڏي عوامي ميڙ کي خطاب ڪندي ڪيو. سيد قائم علي شاهه چيو ته وزير اعظم ميان نواز شريف وعدو ڪيو آهي ته آدمشماري ڊسمبر 2016 ۾ آدمشماري ڪرائي ويندي. آدمشماري جي حوالي سان اسان سنڌ جي 32 پارٽين کي گهرائي صلاح مصلحت ڪئي جنهن کان پوءِ اهي آدمشماري جي حوالي سان متحرڪ ٿيا هن چيو ته گڏيل مفادن واري ڪائونسل ۾ پهريون ڀيرو هن سنڌ جي وزير اعليٰ  جي حيثيت سان ڀرپور احتجاج ڪيو ته آدمشماري ملتوي نه ڪئي وڃي پر ٻه صوبا ۽ مرڪز مخالفت ڪري ويهي رهيا، هن چيو ته آدمشماري سان سنڌ کي فائدو پهچندو   اجائي مخالفت نه ڪئي وڃي، هن چيو ته اڇڙي ٿر نه وساريو آهي نه ئي ڪڏهن وساري سگهون ٿا. جڏهن ته اڇڙي ٿر  توڙي ٿرپارڪر ۾ رڪارڊ ترقياتي ڪم ڪرايا آهن مٺي جي سول اسپتال ۾ علاج جون سموريون سهولتون ڏنيون ويون آهي اسان تي اجائي تنقيد ڪئي پئي  اڇڙي ٿر ۾ مٺي پڇاڻي جون اسڪيمون ۽ سولر پلانٽ لڳايا ويا آهن  تعلقي اسپتال کپرو کي مثالي اسپتال ٺاهينداسين ۽ ٽائون ڪاميٽي کپرو کي ميونسپل ڪاميٽي ٺاهڻ لاءِ چونڊيل نمائندا سفارشون ڪن جن ۾ آبادي جي شرح پڻ شامل ڪئي وڃي  کپرو کي فائر برگيڊ گاڏي ڏني ويندي  هن چيو ته ٿر ۾ 400 واٽر پلان ٽ لڳايا آهن ۽ وڌيڪ 400 پلانٽ پڻ لڳايا ويندا جنهنن سان ٿرين کي پيئڻ جو صاف پاڻي مهيا ڪيو ويندو هن چيو ته  سانگهڙ کي ترقياتي ڪمن جي سخت ضرورت آهي جنهن لاءِ خصوصي پيڪيج ڏنو ويندو  جڏهن ته کپرو لاءِ ڊرينيج ۽ واٽر سپلائي سڪيم پڻ تمام جلد ڏنو ويندي. هن چيو ته تاريخ ۾ پهريون ڀيرو سانگهڙ ۾ پي پي پي جي ڪاميابي عوامي خدمت جو نتيجو آهي  ۽ مستقبل ۾ پڻ سانگهڙ جي عوام کي مراعاتون ڏنيون وينديون، هن چيو ته تازو ئي سنڌ حڪومت سانگهڙ لاءِ 42 ڪروڙ روپين جي خرچ سان گئس منصوبي جو اعلان ڪيو آهي  هن چيو ته سنڌ حڪومت 2 لک نوجوانن کي روزگار ڏنو ۽ هڪ لک 60 هزار نوجوانن کي تربيت ڏيون پيا جن کي ڏيهه توڙي پرڏيهه ۾ روزگار ڏياريو ويندو. هن چيو ته شهيد ذوالفقار علي ڀٽو جهڙو اڳواڻ صدين ۾ جنم وٺندو آهي هن مسلمان ملڪن کي گڏ ڪيو ۽ انهن جي ترقي جي ڳالهه ڪئي . هن چيو ته 4 اپريل تي سندس ورسي ۾ سنڌ جو عوام ڀرپور شرڪت ڪري اهو ثابت ڪندو ته عوام اڄ به ڀٽو کي دلين ۾ جايون ڏئي ٿو.  هن چيو ته پي پي پي سانگهڙ جي مقاني چونڊن ۾ تاريخي ڪاميابي حاصل ڪري اهو ثابت ڪيو آهي ته پي پي يي ئي ملڪ جي واحد عوامي پارٽي آهي ۽ اسان ڪڏهن به انتقامي ڪاروائين تي يقين نه رکيو آهي اهو ئي ڪارڻ اهي جو اڄ عوام پي پي پي کي دلين ۾ جايون ڏئي ٿو. ان موقعي تي  پي پي پي سانگهڙ جي ضلعي صدر علي حسن هنگورجو، ايم اين اي شازيه عطا مري، روشن جوڻيجو، صوبائي وزير ناصر شاهه، صوبائي صلاحڪار علي اصغر جوڻيجو، سهراب خان مري،  سيد رياض شاهه خراساني، ايم پي اي ضياءُالحسن لنجار، شاهد ٿهيم، پي پي پي اڳواڻ سرفراز راڄڙ، جهانگير جوڻيجو، محمد خان جوڻيجو، وارث محمد درس، ايوب وساڻ ، علي حيدر هنگورجو، علي محمد کوسو، امان الله مري، سردار فاروق بلوچ، نثار وساڻ، عبالڪريم مري، وسيم قائمخاني، وسيم عمراڻي، علي محمد بريهي، علي مراد راڄڙ، تاج محمد هنگورجو،نور احمد ڀرڳڙي، نويد ڏيرو، امير بخش عمراڻي , ڊپٽي ڪمشنر سانگهڙ عمر فاروق بلو  ۽ ٻيا پڻ موجوس هئا.

 

هڪ سئو کان وڌيڪ ملڪن ايٽمي هٿيارن جي حفاظت واري معاهدي جي منظوري ڏئي ڇڏي: اوباما

واشنگٽن(م.ڊ) آمريڪي صدر باراڪ اوباما چيو آهي ته هڪ سئو کان وڌيڪ ملڪن ايٽمي هٿيارن جي حفاظت واري معاهدي جي منظوري ڏئي ڇڏي آهي. واشنگٽن ۾ ايٽمي سلامتي بابت اجلاس ٿي گذريو، اجلاس ۾ پاڪستان سميت 50 ملڪن جي نمائندن شرڪت ڪئي. اجلاس کي خطاب ڪندي آمريڪي صدر باراڪ اوباما چيو ته دنيا جي 102 ملڪن ايٽمي هٿيارن جي حفاظت واري معاهدي تي صحيحون ڪري ڇڏيون آهن. دهشتگردن کي ايٽمي هٿيار حاصل ڪرڻ کان روڪڻ لاءِ متحد ٿيڻو پوندو، اسان داعش کي خطرناڪ هٿيار حاصل ڪرڻ کان روڪيو آهي. واشنگٽن ۾ ٿيل اجلاس ۾ ڳالهائيندي آمريڪي صدر باراڪ اوباما چيو ته  ايٽمي مودا جي حفاظت جي معاهدي جي ڪيترن ئي ملڪن منظوري ڏني آهي، گڏيل ڪم ڪرڻ سان ايٽمي هٿيارن جي حفاظت ۾ ڪاميابي ملي آهي ۽ دهشتگردن کي ايٽمي هٿيارن تائين پهچڻ کان روڪيو ويو. هن چيو ته اسان اهم اڳڀرايون حاصل ڪري ورتيون آهن. رنگ ۽ نسل کان مٿانهون ٿي ڪري عوام لاءِ سوچڻو پوندو ۽ دهشتگردن خلاف متحد ٿيڻو پوندو.

 

ڊي چوڪ کي اهڙو ٺاهينداسين جيئن ڪو ڌرڻو هڻي نه سگھي: چوڌري نثار

اسلام آباد(بيورو) وفاقي گھرو وزير چوڌري نثار علي خان ايف آءِ اي ۽ ٻين قانون لاڳو ڪندڙ ادارن کي ڪرپٽ ماڻهن خلاف ڪارروائيون تيز ڪرڻ جي هدايت ڪندي اشتهاري ماڻهن جو ڊجيٽيل رڪارڊ ٺاهڻ جي هدايت ڪري ڇڏي آهي. ميڊيا رپورٽن موجب گذريل ڏينهن گھرو وزارت ۾ وفاقي گھرو وزير چوڌري نثار علي خان جي صدارت هيٺ جل اعلي سطحي اجلاس ٿيو. اجلاس ۾ پوليس، ايف آءِ اي ۽ گھرو وزارت جا عملدار شريڪ ٿيا. ان موقعي تي ملڪ جي موجوده صورتحال سميت مختلف معاملن تي خيالن جي ڏي وٺ ڪئي وئي. ان موقعي تي وفاقي گهرو وزير چوڌري نثار علي خان چيو ته اسلام آباد پوليس، نادرا ۽ قانون لاڳو ڪندڙ ادارا اشتهاري ڏوهارين جا تفصيل گڏ ڪن. سموري ڊيٽا آءِ اي سان شيئر ڪئي وڃي. هن چيو ته ڊي چوڪ کي ائين ٺاهيو ويندو جيئن ڪير به ڌرڻو هڻي نه سگھي. ڊي چوڪ تي جلسن جي اجازت هرگس نه ڏني ويندي. مستقبل ۾ ڊي چوڪ تي جسلن جي اجازت نه هوندي. چوڌري نثار وڌيڪ چيو ته نيب ۽ ايف آءِ اي ڪرپٽ ماڻهن خلاف ڪارروائيون تيز ڪن.

 

گلشن اقبال پارڪ واقعي جي ذميوار پنجاب حڪومت آهي، وڏي وزير کي استعيفا ڏيڻ گهرجي: سينيٽر اعتزازاحسن

لاهور (اين اين آءِ) پ پ پ جي مرڪزي اڳواڻ سينيٽر اعتزازاحسن چيو آهي ته گلشن اقبال پارڪ واقعي جي ذميوار پنجاب حڪومت آهي جنهن تي شهبازشريف کي بنا دير استعيفا ڏيڻ گهرجي ايئن لڳي ٿو ته شريف ڀائر احتساب کان آجا آهن ۽ انهن جو احتساب نه ٿيندو پنجاب ۾ رينجرز  پر نيب جي اچڻ جي ضرورت آهي. لاهور هاءِ ڪورٽ ٻاهران ميڊيا سان ڳالهائيندي اعتزازاحسن چيو ته لاهور جي اڌ پوليس شريف ڀائرن جي سيڪيورٽي تي مقرر آهي ته ماڻهن جي حفاظت ڪيئن ڪندي. لاهور واقعي جي ذميوار پنجاب حڪومت آهي پ پ پ پارليامينٽ اندر به شهبازشريف جي استعيفا جو مطالبو ڪندي ۽ گلشن اقبال پارڪ واقعي کي سينيٽ ۾ به اٿاريو ويندو. هن چيو ته لاهور سانحي کان پوءِ اسپتال ۾ طبي سهولتون نه هجڻ ڪري وڏي انگ ۾ ماڻهو فوت ٿيا جڏهن ته پنجاب حڪومت پاران متاثرن کي ڏنل امدادي چيڪن ورهائڻ ۾ به ڪرپشن ٿي رهي آهي حڪومت کي ماڻهن جي سيڪيورٽي جي ڪائي ڳڻتي نه آهي هن چيو ته شريف ڀائر قومي خزاني تي ڌاڻي مٿان ڌاڙو هڻي رهيا آهن پر ان جي باوجود شريف ڀائرن جو احتساب نه پيو ٿئي ۽ عدالتون خاموش آهن جنهن مان لڳي ٿو ته شريف ڀائر احتساب کان آجا آهن. سندس چوڻ هو ته کيس پڪ آهي ته شريف ڀائرن جو احتساب نه ٿيندو.

 

 

سنڌ ۾ ”را“ جي سرگرمين جي جاچ شروع، پابندي پيل قومپرست پارٽي به جاچ ۾ شامل

ڪراچي(اسٽاف رپورٽر) قانون لاڳو ڪندڙ ادارن هڪ پابندي پيل قومپرست پارٽي جي ”را“ سان لاڳاپن جي جاچ شروع ڪري ڇڏي آهي. ميڊيا رپورٽن موجب سياسي ڪارڪنن کان به ”را“ جي حوالي سان جاچ ڪئي پئي وڃي. نجي ٽي وي چينل سماء ٽي وي نيوز پنهنجي رپورٽ ۾ انڪشاف ڪيو آهي ته قانون لاڳو ڪندڙ ادارن سنڌ ۾ ”را“ جي سرگرمين جي جاچ شروع ڪري ڇڏي آهي. ڪراچي جي علائقي لياري سميت سنڌ جي مختلف شهرن ۾ سرگرمين جي جاچ شروع ڪئي وئي. نجي ٽي وي موجب قانون لاڳو ڪندڙ ادارن هڪ سياسي پارٽي جي 17 گرفتار ماڻهن کان به پڇا ڳاڇا شروع ڪئي آهي. ان سان گڏوگڏ پابندي پيل قومپرست پارٽي بابت ”را“ سان لاڳاپن جي حوالي سان جاچ شروع ڪئي وئي آهي.

 

فاروق ستار پارٽي عهدي تان فارغ، ڪنور نويد جميل نئون ڊپٽي ڪنوينر مقرر

ڪراچي(اسٽاف رپورٽر) ايم ڪيو ايم اڳواڻ فاروق کي پارٽي عهدي تان هٽايو ويو آهي ۽ ايم ڪيو ايم جي مرڪزي اڳواڻ ڪنور نويد جميل کي رابطا ڪميٽي جو نئون ڊپٽي ڪنوينر مقرر ڪيو ويو آهي. ميڊيا رپورٽن موجب ڪنور نويد جمي کي ڪنوينر مقرر ڪرڻ جو فيصلو رابطا ڪميٽي پاڪستان ۽ لنڊن جي گڏيل اجلاس ۾ ڪيو ويو آهي. ڪنور نويد جميل کي ڪنوينر مقرر ڪرڻ واري فيصلي جي منظوري ايم ڪيو ايم سربراهه به ڏئي ڇڏي آهي.

 

ايم ڪيو ايم سربراهه وفادار ماڻهن کي ”را“ جو ايجنٽ بڻائي ڇڏيو: مصطفيٰ ڪمال

ميرپورخاص(بيورو) ايم ڪيو ايم سربراهه ڪراچي جي ماڻهن جون  ٻه نسلون تباهه ڪري ڇڏيون ۽ هو هاڻ به اها ڪوشش ڪري رهيو آهي ته جيڪا زندهه جي انهن کان تعليم ۽ خوراڪ به کسجي. پاڪ سر زمين پارٽي جي سربراهه مصطفيٰ ڪمال ميرپورخاص ۾ ميڊيا سان ڳالهائيندي چيو ته الطاف حسين بزدل انسان آهي ڪڏهن سنڌ کي ورهائڻ جي ڳالهه ڪندو آهي ته ڪڏهن مهاجر ڪارڊ اسعتمال ڪندو آهي، ڪڏهن ڪنهن جرنل کي گار ڏيندو ۽ پوءِ ان کان معافي گهرندو آهي. سنڌ جي ماڻهن کي چوان ٿو ته الطاف حسين جي بيانن کي سنجيدگي سان نه وٺن. الطاف حسين ماڻهن کي ڪيڙو ماڪوڙو سمجهندو آهي ۽ هن کي رڳو ماڻهن جو لاشون گهرجن، الطاف حسين پندرهن هزار ماڻهن کي مارائي چڪو آهي.

 

پ پ آدمشماري تي سوديبازي ڪري ڇڏي آهي: سنڌ ڊيموڪريٽڪ الائنس

حيدرآباد(بيورو) سنڌ ڊيموڪريٽڪ الائنس پاران سنڌ ۾ ٿيندڙ زيادتين ۽ نا انصافين خلاف اڄ عمرڪوٽ ۾ جلسو ڪيو ويندو، فنڪشنل ليگ اڳواڻ سيد صدر الدين شاهه چيو آهي ته سنڌ ۾ ٿيندڙ زيادتين ۽ نا انصافين خلاف حيدرآباد کان عمرڪوٽ تائين ريلي ڪڍي ويندي جڏهن ته عمرڪوٽ ۾ جلسو به ٿيندو. گذريل ڏينهن حيدرآباد م سنڌ ڊيموڪريٽڪ الائنس جو اجلاس ٿيو اجلاس کانپوءِ ميڊيا سان ڳالهائيندي الائسن جي ترجمان اياز لطيف پليجي چيو ته سنڌ جي حقن جي ڳالهه ڪئي وڇي ته حڪمران گم ٿي وڃن ٿا هن چيو ته پيپلزپارٽي آدمشماري تي سوديبازي ڪري ڇڏي آهي. پ پ سنڌ ڪارڊ استعمال ڪري ٿي. پ پ گذريل 8 سالن ۾ هر سال پنج کرب رپين جي ڪرپشن ڪئي. ان موقعي تي سيد غوث علي شاهه چيو ته سنڌ ۾ پيپلزپارٽي جو ڄمي مقابلو ڪنداسين. هن چيو ته سنڌ بهتر ٿيندو ته پاڪستان ۾ بهتري ايندي. وفاقي وزير مرتضيٰ جتوئي چيو ته پنجاب جي مقابلي ۾ سنڌ جي حالتن کي ڏسي شرم اچي ٿو. پيپلزپارٽي جي ڪرپشن سنڌ کي پنجاهه سيڪڙو پوئتي ڌڪي ڇڏيو آهي. هن چيو ته جمهوريت جي بحالي ۽ سنڌ جي خوشحالي لاءِ سڀاڻي ريلي ڪڍي ويندي.