تازيون خبرون

Monthly Archives: March 2016

سنڌ يونيورسٽي ۾ انٽرڊپارٽمينٽل گرلز ٿرو بال ٽورنامينٽ، فزيڪل ايجوڪيشن شعبي کٽي ورتي

ڄامشورو (اسپورٽس نيوز) سنڌ يونيورسٽي ڄامشورو جي ڊائريڪٽريس اسپورٽس گرلز جي پڌرائي موجب گرلز انٽر ڊپارٽمينٽل ٿرو بال ٽورنامينٽ-2016 سينٽر فار هيلٿ اينڊ فزيڪل ايجوڪيشن شعبي کٽي ورتي. تفصيل موجب مادر ملت فاطمه جناح گرلز جمنازيم ۾ ٿيل انٽرڊپارٽمينٽل ٽورنامينٽ ۾ مختلف شعبن جي ڏهن ٽيمن حصو ورتو. جنهن ۾ سينٽر فار هيلٿ اينڊ فزيڪل ايجويشن پهرين پوزيشن، فيڪلٽي آف فارميسي ٻين پوزيشن جڏهن ته فزيالاجي شعبي ٽين پوزيشن حاصل ڪئي. ٽورنامينٽ ۾ سنڌ يونيورسٽي جي استادن ۽ شاگردن وڏي انگ ۾ شرڪت ڪئي.

 

غير ملڪين کي پاڪستاني شهريت ڪيئن ملي؟: شفيق شاڪر

تازو اسان پاڪستان جو ڏهاڙو وڏي ڌوم ڌام سان ملهايو آهي،اهو قومي نغمو جنهن سان اسان جو سڄو ماحول گونجي رهيو هو ته “ هم زنده قوم هين،هم تابنده قوم هين” پر مون کي الائي ڇو هڪ خبر ياد اچي ويئي.خبر اها هئي ته

“ نادرا هڪ لک ٽيھ هزار غيرملڪي افغان شهرين کي بليڪ لسٽ ڪري ڇڏيو آهي،هلندڙ سال وڌيڪ هڪ لک افغانين جي ڇنڊ ڇاڻ ڪئي ويندي.” نادرا جي ذريعن موجب افغانين ملڪ جي ڪنڊ ڪڙڇ ۾ وسيع ڪاروبار ۽ ملڪيتون ٺاهي رکيون آهن جن ۾ اسلام آباد به شامل آهي.جنهن ڪري سندن سڃاڻپ ڪرڻ ۾ ڏکيائيون پيش اچي رهيون آهن تنهن هوندي به جانچ مان خبر پيئي آهي ته هڪ لک ٽيھ هزار افغانين جا ڪوڙا شناختي ڪارڊ ثابت ٿي چڪا آهن. نادرا طرفان اهو به ٻڌايو وڃي ٿو ته جنهن وقت شناختي ڪارڊن کي ڪمپيوٽرائيز ڪيو پئي ويو ان کان اڳ ئي پنجويھ لک افغانين ناجائز طريقي سان پاڪستاني شهريت حاصل ڪري ورتي هئي. اها ڳالھ وزارت داخلا ۽ سرحدي معاملن واري وزارت حڪومت کي ٻڌائي ۽ اهو امڪان ظاهر ڪيو ته اهڙن گھٽ ۾ گھٽ وڌيڪ ڏھ لک افغانين جي نشاندهي ٿي سگھي ٿي جن وٽ پاڪستان جا قومي شناختي ڪارڊ هجن.

اها عام خبر انهن سوين خبرن مان هڪ آهي جيڪي خبرون روزانو اخبارن ۾ اينديون رهن ٿيون پر نادرا ۽ افعانين جا لفظ پڙهي ماڻهو انهن کي پورو پڙهڻ جي تڪليف ڪرڻ بدران نظرانداز ڪندي ٻين سنسني خيز خبرن طرف وڌي وڃن ٿا.هن خبر جو دلچسپ حصو اهو ته “ وزارت داخلا ۽ سرحدي معاملن جي وزارت اها معلومات “ حڪومت” کي ڏني آهي.ان جو مطلب ٿيو ته اهي ٻئي وزارتون حڪومت جو حصو ناهن، پر جيڪر اهي وزارتون حڪومت جو ئي حصو آهن ته پوء اها معلومات ڪهڙيء “ حڪومت” کي ڏني ويئي آهي؟ شايد نادرا ڪنهن خلا ۾ ڪم ڪري رهي آهي جنهن جو وزارت داخلا سان ڪو واسطو ناهي. نه ڪنهن ڳالھ جو ڪو مٿو آهي نه پڇ!اهو ئي واردات جو طريقو رهندو پيو اچي جو هر ادرارو ۽ هر وزارت پنهن جي ذميداري ۽ نااهلي آسانيء سان پنهن جي ڳچيء مان ڪڍي ٻئي جي ڳچيء ۾ وجھندي آئي آهي.سڄي دنيا کي خبر آهي ته افغانستان سان ملندڙ اسان جو اڍائي هزار ڪلوميٽر ڊگھو بارڊر نه پر عام شاهراه بنيل آهي جتان روزانو سوين هٿيار بند دهشتگرد بنان ڪنهن سفري دستاويز جي ايندا ويندا رهن ٿا.مٿان معاملي جو شرمناڪ پهلو اهو جو اهي لکين شناختي ڪارڊ ۽ پاسپورٽ انهن غيرملڪين کي وڏيون وڏيون رشوتون وٺي حوالي ڪيا ويا.هزارين پاڪستانين جي شهادتن ۽ هزراين خاندانن جي برباديء کان پوء اڄ قوم کي اهو ٻڌايو پيو وڃي ته هڪ لک ٽيھ هزار افغانين کي بليڪ لسٽ ڪيو ويو آهي جو انهن وٽ ڪوڙا شناختي ڪارڊ آهن ۽ بنان ڪنهن شرم جي اهو اعتراف به ڪيو پيو وڃي ته پنجويھ لک افغانين غير قانوني طريقي سان پاڪستاني شهريت به حاصل ڪري ورتي آهي.ناجائز ذريعن جو مطلب آخر ڇا ٿيو سواء ان جي ته لاڳاپيل ادارن ۾ حد درجي جي ڪرپشن ٿي آهي.انهن کي اهي ڪارڊ ۽ پاسپورٽ ملائڪن آسمان مان اڇلائي ته نه ڏنا هوندا.اهي دستاويز ڪنهن تيار ڪيا،ڪنهن جاري ڪيا،اهو سڀ ريڪارڊ اوهان جي ادارن ۾ موجود هوندو.انهن مجرمن جي خلاف هيستائين ڪهڙي ڪاروائي ٿي آهي؟

غدار ۽ ملڪ دشمن ته اهي اهلڪار آهن جن بي  ضميرن رشوت وٺي پاڪستان جي قومي سلامتيء سان راند ڪئي آهي.اها ملڪ سان غداري ناهي ته ٻيو ڇا آهي؟ٿوري دير جي لاء ان پوري منظر مان افغانين کي هٽائي انڊين کي انهن جي جڳھ تي رکي ڏسو ته جيڪر ايترن انڊين کي ناجائز نموني اهي دستاويز جاري ٿين ها ته توهان جو ردعمل ڇا هجي ها؟غيرملڪي ته غيرملڪي ئي آهي پوء اهو انڊين هجي يا ٻئي ڪنهن ملڪ جو. هاڻي جڏهن ڪنهن به نااهليء جو جواب اسان جي حڪمرانن وٽ نه هوندو آهي ته يڪدم اسلام کي وچ ۾ کڻي ايندا آهن.اهو ئي ته مسلمان ڀائر آهن،افغانستان ۾ حالتون ٺيڪ ناهن وغيره وغيره اهي ناٽڪ ڪري ته اوهان ملڪ کي دهشتگرديء جي اوڙاه ۾ اڇليو آهي.هاڻي جڏهن صفائي ٿي رهي آهي تڏهن به پنهن جن حرڪتن کان باز نٿا اچو.اسان جا پنهن جا مسئلا ٿورا آهن جو ٻين ملڪن جو ٺيڪو کڻندا وتون. گھڻو ٿيو جيتري قدر اسان هنن کي برداشت ڪري سگھيا سين ٿي برداشت ڪيوسين،هاڻي انهن کي پنهن جي ملڪ وڃڻ گھرجي. ڳالھ صرف اتي دنگ ٿئي ها ته به چڱو هو پر اڄ به افغانين جي اچڻ جو سلسلو جاري آهي جنهن جا سڀ کان وڌيڪ اثر صرف سنڌ کي برداشت ڪرڻا پئجي رهيا آهن.ٻئي نمبر تي ڪي پي ڪي ۽ ٽئين نمبر تي بلوچستان انهن کان متاثر ٿيو آهي .پنجاب کي ته پرواه ئي ڪانهي جو سموري دنيا جي مسلمانن جو ٺيڪو صرف ٻين صوبن کنيو آهي.خبر ناهي ته هنن کي پاڪستان کي ٻيو افغانستان ٺاهڻ جو شوق ڇو کنيو بيٺو آهي .

نيشل ايڪشن پلان ۾ اهو نڪتو شامل هو ته سڀني غيرملڪين کي سندن ملڪن ڏانهن موڪلڻ جو بندوبست ڪيو ويندوته پوء ان نڪتي تي عمل ڇو نٿو ٿئي ؟اڃا تائين اها ئي ٻٽي پاليسي جاري آهي.اهي لکين غير ملڪي جن جا غير قانوني نموني حاصل ڪيل دستاويز اوهان پڪڙيا آهن انهن مان ڪيترن کي ملڪ بدر ڪيو آهي؟اهو ملڪي سلامتيء جو معاملو آهي.جن انهن غيرملڪين سان ملي غداريء جو ڏوه ڪيو آهي انهن تي مليٽري ڪورٽن ۾ڪيس هلائي کين ڦاسي يا عمر قيد جي سزا ڏيو ته جيئن آئنده ڪو اهڙي ڪريل حرڪت ڪري نه سگھي پر اوهين ڪڏهن به ايئن نه ڪندا جو اوهين ته انهن غيرملڪين کي پنهنجن ذاتي،گروهي ۽ سياسي مقصدن لاء استعمال ڪريو ٿا ۽ اوهان کي هروقت انهن جي مدد جي ضرورت رهي ٿي. ۽ اهم ڳالھ اها ته اوهين انهن غيرملڪين کي ٻين صوبن ۾ مستقل آباد ڪري اتان جي ڊيموگرافي بدلائڻ گھرو ٿا.ڊالر وصول ڪري پنهن جي ملڪ جي سلامتيء سان کيڏڻ هتان جو دستور رهيو آهي.جڏهن آمريڪا اجمل ڪانسيء کي پڪڙڻ لاء 35 لک ڊالر آڇيا هئا ته ڪانسيء جا اهي دوست جن وٽ هو لڪيل هو تن ئي کيس پئسا وٺي آمريڪا جي حوالي ڪري ڇڏيو.اها رقم ئي سال پوء اسان جي ملڪ جي هڪ اڳوڻي صدر پنهن جي ڪتاب ۾ سڄي دنيا جي سامهون پاڻ وڏي فخر سان اعتراف ڪيو ته اسان القائده جا 369 ميمبر پڪڙي آمريڪا جي حوالي ڪيا جن جي بدلي ڪروڙين ڊالر وصول ڪيا.

جيڪر اوهين انهن کي پڪڙي پنهن جي ملڪ جي خدمت ڪري رهيا هئا ته پوء اوهان معاوضو ڇا جو وصول ڪيوپر جيڪر اهو ڪم اوهان پنهن جي ملڪ لاء نه پر ٻين لاء ڪيو هو ته پوء اوهين انهن ملڪن جا ڪمدار ٿيا ۽ هو اوهان جا آقا،جيئن هنن اوهان کي چيو،اوهان پئسا وٺي اهو ڪندا ويا.دنيا ۾ عزتدار ۽ خوددار قومون ايئن جيئنديون آهن! زنده ۽ تابنده قومن جا اهي پرڪار هوندا آهن!اهي حاصل ڪيل پئسا ڪيڏانهن ويا ڪنهن کي ڪا خبر ناهي.هن ملڪ ۾ ڇا ڇا نٿو وڪجي؟ ڇا هتي نوڪريون ۽ ڪوڙيون ڊگريون نٿيون وڪجن.ڇا ٿاڻا ۽ ادارا نٿا وڪجن.اليڪشن جون ٽڪيٽون نٿيون وڪجن،سياسي وفاداريون نٿيون وڪجن؟ٻار ۽ عورتون نٿيون وڪجن؟ انسانن جا عضوا نٿا وڪجن؟ قبرستان نٿا وڪجن؟ پنجويھ لک غير ملڪين کي شهريت جو وڪرو ته هتي معمول جي ڳالھ آهي.!

 

لاهور سانحو ۽ جنگ جو ميدان بڻيل اسلام آباد .!!: غلام مصطفيٰ جمالي

اسانجي معاشري کي الائي ته ڪنهن جي نظر لڳي وئي آهي.پشاور آرمي پبلڪ اسڪول جي معصوم پتڪڙن لاشن جون قطارون ۽ رت سان ڀريل معصوم زخمي چهرن جون رڙيون اڃان ڪنن ۾ ڳونجن پيون.آئون ڪڏهن ڪڏهن اچتو ڇرڪ ڀري سوچيندو آهيان ته ڪاش اهو هڪ خواب هجي ۽ هن اهڙي ڀيانڪ خواب ڏسڻ واري  ننڊ مان جڏهن به سجاڳ ٿيان ته  اکين جي آرسي سامهون اهو سڀ ڪجهه هڪ خواب  ۽ ڪوڙ مثل هجي.پر افسوس  دل حيقيقت کي جڏهن تسليم ڪندي آهي ته اکيون لڙڪن قطارون ڪري وهڻ شروع ٿي وينديون آهن.۽ پوءِ پنهنجي جئيري وجود کي هڪ مئل وجود تسليم ڪندو آهيان.هر طرف هاءِ گهوڙا هٽو بچو جو شور ساهه ساڻو ڪري ڇڏيندو آهي.پر پوءِ به سڪرات ڀريل ساهه کي پل ڪن جي پٿڪي به ناهي ملندي.پاڪستان جي امن کي شايد ڪنهن جي نظر اچي وئي آهي جو پاڪستان اندر دهشتگردي کي جيتري روڪڻ جي ڪوشش ڪئي پئي وڃي ملڪ اندر اوتري ئي دهشتگردي وڌندي پئي وڃي. ملڪ اندر هاڻ دهشتگردي جي واقعن ڪري اهڙو ته ماحول بڻجي ويو آهي جو هڪ يا ٻه ڪرندڙ لاشن کي معمولي واقعا سمجهي ڪري انهي واقعن کان ڪنڊار ڪئي ويندي آهي.جيڪي واقعا وڌي ڪري اهڙن دهشتگردي جي واقعن کي جنم ڏيندا آهن.جن واقعن جي ڪري پورو ملڪ سوڳوار بڻجي ويندو آهي.جڏهن ته پاڪستان اندر ٿيندڙ دهشتگردي جي واقعن جي تاريخ ڪا نئي ناهي.پشاور آرمي پبلڪ اسڪول واقعو هجي يا ڪراچي اندر اسماعيلي برادري جي بس تي حملو يا باچا خان يونيورسٽي يا جيڪب آباد جي ماتمي جلوس تي خدڪش حملو وغيره مطلب ته پاڪستان اندر خدڪش حملن جي پراڻي تاريخ جا پنا کولبا ته ڪيترائي باب انهي حملن سان ڀريل نظر ايندا. تازو گذريل ڏينهن لاهور اندر پڻ اهڙو خدڪش واقعو پيش آيو جنهن اندر 72 انساني زندگيون پنهنجي پيارن کان هميشه لاءِ وڇڙي ويون. علامه اقبال ٽائون جي علائقي ۾ واقع گلشن اقبال پارڪ اندر خدڪش حملو ان وقت ٿيو جڏهن پورو پارڪ ننڍڙن ٻارن مرد عورتن سان ڀريل هو.ڇو ته اهو موڪل وارو ڏينهن هو ۽ موڪل واري ڏينهن هر پي يا ماءُ پنهنجي ننڍڙن ٻارڙن کي پارڪ گهمائڻ لاءِ وٺي آيا هئا.جڏهن ته انهي پارڪ اندر موجود ٻار جن مان ڪي جهولا جهولي رهيا هئا ته ڪي ٻين راندين ۾ مشغول هئا ته اوڇتو هڪ زوردار ڌماڪو ٿيو.جنهن ڌماڪي72معصوم زندگين جو ڏيئو اجهائي ڇڏيو.

ڌماڪي کان پوءِ پوري ملڪ اندر ايمرجسي لڳائي وئي ۽ جيڪي ته تفريع گاهون آهن انهن اندر سڪيورٽي اهڪارن کي مقرر ڪيو ويو.جڏهن ته لاهور واري واقعي کان پوءِ واقعي واري هنڌ جي ويجهن اسپتالن اندر پڻ ايمرجنسي لڳائي وئي.جڏهن ته زخمين ۾ وڏي ۾ وڏي تعداد معصوم ٻارن ۽ عورتن جي هئي جن کي انهن اسپتالن اندر پهچايو پئي ويو.جڏهن ته علامه اقبال ٽائون ۾ واقع  گلشن اقبال ٽائون جي گيٽ نمبر پنج تي اهو خدڪش حملو ٿيو.جنهن حملي جي نتيجي ۾ 72 انساني زندگيون ذيان ٿي ويون.جڏهن ته اتي واقعي واري هنڌ جي عين شاهدن جي موجب ته اهو حملو انهن جهولن جي تمام گهڻو ويجهو ٿيو جتي ٻار جهولا جهلي رهيا هئا.جڏهن ته پوليس ڪاروائي ڪندي ٽن نامعلوم ماڻهن کي پڻ گرفتار ڪري ورتو هو.بم ڊسپوزل سڪواڊ جي عملي جي مطابق ته خدڪش حملي ۾ استعمال ٿيل ڌماڪي خيز مادي جو وزن گهٽ ۾ گهٽ 20ڪلو هو.جڏهن ته ريسڪيو ذرايع جو چوڻ هو ته 300کان وڌيڪ ماڻهو زخمي ٿيا آهن جن مان ڪيترن جي حالت نازڪ آهي.جن کي فاروق اسپتال،شيخ اسپتال،جناح اسپتال ۽ ٻين اسپتالن اندر داخل ڪيو ويو آهي.صوبائي وزيرتعليم پنجاب رانا مشهود احمد جو چوڻ هو ته ڌماڪي اندر 72ماڻهو شهيد ٿيا آهن جن ۾ 29معصوم ٻار به شامل آهن.جڏهن ته زخمين جي تعداد لڳ ڀڳ 315هوندي.

صدر ممنون حسين ۽ وزيراعظم ميان نواز شريف لاهور اندر ٿيندڙ خدڪش حملي جي مذمت ڪندي دلي ڏک جو اظهار ڪيو ۽ زخمين جي اعلاج لاءِ فوري طبي امداد ڏيڻ جو چيو جڏهن ته وزيراعليٰ پنجاب به واقعي جي مذمت ڪندي واقعي جي فوري رپورٽ به طلب ڪري ورتي آهي.لاهور واقعو  هڪ وڏو افسوسناڪ هڪ وڏو الميو آهي جنهن واقعي هر پاڪستاني جي اکين ۾ آب آڻي ڇڏيو آهي.گلشن اقبال پارڪ ڪيترن ئي مائرن جا گلشن اجاڙي ڇڏيا هڪ نجي ٽي وي چيئلن کي انٽريو ڏيندي زخمي حالت ۾ هڪ شخص چيو ته سندس معصوم پٽ ۽ سندس معصوم ڀائيٽو اليڪٽرونڪ تي هلڻ واري ڪار تي چڙهڻ لاٰءِ ڪيترن ئي ڏينهن کان ضد ڪري رهيا هئا.جڏهن ته موڪل واري ڏينهن هو پنهنجي فيملي سان گڏ انهن ٻن معصوم هڪ پٽ ۽ هڪ ڀائيٽي کي به اهو پارڪ گهمائڻ ۽ انهي اليڪٽرونڪ ڪارن ۾ ويهارڻ لاءِ وٺي آيو هو.جڏهن ته هو ٽوڪن وٺڻ لاءِ اڃان لائين ۾ ٻيٺل هو ته هڪ زوردار ڌماڪو ٿيو.جنهن ڌماڪي انهن ٻنهي مصعوم ننڍڙن کان پنهنجي حياتيون کسي ورتيون.جڏهن ته انهي خد ڪش واقعي ۾ سندس گهر واري شبانه به فوت ٿي وئي آهي.جڏهن ته خدڪش حملي جي واقعي ۾ گلشن اقبال پارڪ اندر هڪ موبائيل فون به مليو جنهن موبائيل فون ۾ ڪال هلندڙ هئي.جڏهن ته ڌماڪي کان پهرين هڪ معصوم ٻار پنهنجي جيجل ماءُ سان فون تي ڳالهائي رهيو هو.جڏهن ڌماڪو ٿيو ته انهي ٻار جو آواز هيمشه لاءِ خاموش ٿي ويو جڏهن ته ننڍڙي جي موبائيل ۾ نمبر ڏنو ويو جيڪو ان وقت ننڍڙو ڊائل ڪري ڳالهائي رهيو هو اهو نمبر“امي جان”جي نالي سان سيو ٿيل هو.جڏهن ته ڌماڪي کانپوءِ جيئن ننڍڙو فوت ٿي ويو ته انهي گهر ويٺل جيجل جو سک آرام ڦٽي ويو.جيڪا بار بار انهي ننڍڙي معصوم جي نمبر تي ڪال ڪري رهي هئي ايندڙ ڪال جي نمبر تي امي جان لکيل هو.جنهن کي ڏسي ڪري ماڻهو اڀ ڏاريندڙ رڙيون ڪندا رهيا .

واقعي کان پوءِ ميان نواز شريف پنهنجو لنڊن وارو دورو ملتوي ڪري ڇڏيو آهي.هڪ نچي ٽي وي جي انٽريو ڏيندي ميان نواز شريف چيو ته هاڻ هو ٻن ڏينهن کان پوءِ آمريڪا ويندو.جتي هو آمريڪا جي صدر سان ملاقات ڪندو جڏهن ته ميان نواز شريف ايٽمي سلامتي ڪائونسل ۾ به شرڪت ڪندو.لاهور واقعي کان پوءِ سموري ملڪ اندر ٻن ڏينهن جي سوڳ جو اعلان ڪيو ويو آهي.جڏهن ته انهي سوڳ دوران سموران سرڪاري توڙي غيرسرڪاري ادار بند رهندا.جڏهن ته لاهور جي عدالتن به پنهنجي هلندڙ ڪيس ٻن ڏينهن لاءِ ملتوي ڪري ڇڏيا آهن.جڏهن ته لاهور  هاءِ ڪورٽ بينچ جنرل هائوس جو اجلاس طلب ڪري ورتو آهي.واقعي کان پوءِ ڪيتريون ڳالهيون سامهون آيون جن اندر حڪومت جي نااهلي به نظر آئي.هڪ اخباري رپورٽ مظابق ته جڏهن گلشن اقبال اندر اهو واقعو پيش آيو ته ان وقت گلشن اقبال اندر سڪيورٽي انتظام نه هجڻ جي برابر هئا.خدڪشي حملي آور جي سڃاڻپ مظفر ڳڙه واسي يوسف طور سڃاڻپ ٿي آهي.واقعي واري ڏينهن عيسائين جو عيد ڏهاڙو ايسٽر هيو جنهن جي ڪري گلشن پارڪ اندر عيسائي برادري وڏي انگ ۾ شامل هئي.جڏهن ته واقعي جي زميواري اڃان تائين ڪنهن به دهشتگرد تنظيم نه قبولي آهي.واقعي کان پوءِ پاڪ آرمي جي جنرل راحيل شريف پنهنجي بيان ۾ چيو ته وحشي دهشتگردن کي قوم جي آزادي خطري ۾ وجهڻ نه ڏبي جڏهن ته جي ايڇ ڪيو جو اعليءِ اجلاس لاهور سانحي جي زميوارن کي پڪڙڻ جو هدايتون پڻ ڏنيون ويون هنيون.

هڪ نچي ٽي وي جي مطابق ته  سي ٽي ڊي اهلڪار قيصر،محمدعمران،شاهد پرويز ۽ منظور ارباب جي مدعيت تي لاهور سانحي جو ڪيس ورتو ويو آهي جنهن اندر 70ماڻهن جو فوت ٿيڻ 300کان وڌيڪ جو زخمي ٿيڻ شامل آهي ڪيس اندر دهشتگردي جي ڪيس شامل ڪيا ويا آهن جڏهن ته ايف آءِ آر داخل ڪرائيندڙن جي مطابق ته شلوار قميِض پريل اهي مشڪوڪ ماڻهو گلشن اقبال جي گيٽ نمبر پنج کان داخل ٿيا.۽ داخل ٿيندي پاڻ ۾ ڳالهيون ڪري رهيا هئا جڏهن ته مشڪوڪ ماڻهن کي پاڻ ۾ ڳالهيون ڪندي ڏسي ڪري پوليس اهلڪار سندن ويجهو ويا ته انهن مان هڪ ڄڻي انهن جهولن جي ويجهو ويندي ئي پاڻ کي بم سان اڏائي ڇڏيو.جنهن جي نتيجي ۾ سندس ٽي ٻيا ساٿي به مارجي ويا.

هڪ طرف سموري ملڪ انهي لاهور واري سوڳ ۾ ورتل هو ته ٻئي پاسي پاڪستان جو راڄداني وارو شهر هر هنڌ باهه جي شعلن سان ڀڙڪي اٿيو هو.ميٽرو اسٽيشن کي ساڙيو ويو هو جنهن ڀڄ ڊاهه کان پوءِ پارليامينٽ هائوس،سپريم ڪورٽ،۽ ٻين اهم عمارتن جو ڪنٽرول فوج سنڀالي ورتو هو.جڏهن ته جنگ جو ميدان ٻڻيل اسلام آباد شهر ۾ ڀڄ ڊاهه دوارن 42فوجي اهڪار پڻ زخمي ٿي پيا هئا.جڏهن ته واقعو ممتاز قادري جنهن کي سلمان تاثير جي قتل ڪيس ۾ ڦاسي ڏني وئي هئي.جنهن جي چالهيي جي جلسي بعد ڪارڪنن روالپنڊي کان اسلام آباد طرف مارچ ڪيو هو.جڏهن ته مارچ ڪندڙ جڏهن ريڊ زون ۾ داخل ٿيا ته چڪريون شروع ٿي ويون.پر اتي هڪ اهو به سوال آهي ته جڏهن ڪارڪنن ممتاز قادري جي چالهيي جي جلسي کان پوءِ روالپنڊي ۽ اسلام آباد ڏانهن مارچ ڪيو هو ته هو ان وقت حڪومت کي اها ڳالهه ڇو ڪون ذهن ۾ آئي ته اهي ڪارڪن ريڊزون ۾ ضرور داخل ٿيندا.جڏهن ته حڪومت جي گهرجي هان ته انهن ڪارڪنن کي ريڊ زون ۾ داخل ٿيڻ کان پهرين ريڊ زون ڏانهن ويندڙ سمورا رستا سيل ڪيا  وڃن هان ته ايترو معاملو اڳتي نه وڌي ها.پر پاڪستان جي راڄڌاني واري شهر اندر مذهبي ڪارڪنن جي هڪ ريلي جيڪا مسلسل ريڊ زون اندر داخل ٿيڻ لاءِ اڳتي وڌي رهي هئي.جڏهن ته اها ئي  ڳالهه ٿي ريلي  ريڊ زون ۾ داخل ٿئي وئي جنهن جي ڪري اهڪارن ۽ ڪارڪنن وچ ۾ چڪريون شروع ٿي ويون.42اهڪارن سميت 60 کان وڌيڪ ماڻهو زخمي ٿي پيا هئا.جڏهن ته چڪرين جو سلسلو رات دير تائين جاري رهيو ۽ رات دير جو مفتي عابد سان ڳالهيون ڪيون ويون جنهن ڀڄهه ڊاه نه ڪرائڻ جي خاطري ڏني.جيڪڏهن ته هڪ نظر سان ڏنو وڃِي ته اهو ڀڄ ڊاهه ڪرڻ ۽ پنهنجي قومي عمارتن کي نقصان پهچائڻ سان ملڪ جو نقصان ته ٿي ٿو پر انهي سان گڏ انهي قوم جو نقصان به ضرور ٿي ٿو.پاڪستان تي هن وقت لاهور سانحي کان پوءِ هڪ ڏک ۽ درد جي هوا گهلي رهي آهي مان سمجهان ٿو ته اهڙي ماحول اندر هر پاڪستاني کي سموري رنجشون ختم ڪري ملڪ ۽ قوم جي سلامتي جي باري ۾ سوچڻ گهرجي.

*********

 

 

 

لاهور آپگهاتي ڌماڪو…..?

آچر جي ڏينهن شام جو 6 لڳي 40 منٽن تي گلشن اقبال پارڪ جي گيٽ نمبر هڪ تي ڌماڪو ٿيو، جنهن سبب ويجھين عمارتن جا شيشا پڻ ٽُٽي ويا. موڪل هجڻ سبب ماڻهن جو وڏو انگ پارڪ ۾ موجود هو، جنهن سبب جاني نقصان وڌيڪ ٿيو. ڌماڪي کانپوءِ سيڪيورٽي ادارن جا اهلڪار واقعي واري جاءِ تي پهچي ويا جن ڌماڪي واري جاءِ کي ڪڙو چاڙهي ثبوت گڏ ڪرڻ شروع ڪري ڇڏيا جڏهن ته پارڪ کي پڻ خالي ڪرايو ويو. امدادي ٽيمن فوري طور تي زخمين کي شيخ زيد اسپتال، ميئو اسپتال، جناح اسپتال ۽ ٻين اسپتالن ڏانهن منتقل  ڪيو. زخمين ۾ ٻارڙا ۽ عورتون به شامل آهن. ڌماڪي سبب لاهور شهر جي اسپتالن ۾ ايمرجنسي لڳائي وئي جڏهن ته موڪل سبب ڊيوٽين تي نه پهتل ڊاڪٽرن کي به طلب ڪيو ويو.

ڊي آءِ جي آپريشنز حيدر اشرف چيو آهي ته ڌماڪو آپگھاتي هو ۽ بمبار جي منڍي ملي وئي آهي جنهن جي جاچ ڪئي پئي وڃي. پوليس جو چوڻ هو ته شروعاتي جاچ ۾ معلوم ٿيو آهي ته ڌماڪي ۾ 8 ڪلو بارود استعمال ڪيو ويو.  مارجي ويلن ۾ ڪجھه ماڻهن جي سڃاڻپ، هارون، سيف جي نالن سان ٿي آهي. حالتن کي نظر ۾ رکندي پوليس ۽ رينجرز اهلڪارن کان سواءِ فوجي جوان به ڌماڪي واري جاءِ تي طلب ڪيا ويا، جن پهچي امدادي ڪارروائين ۾ حصو ورتو.

هفتيوار موڪل سبب شام جو پارڪ ماڻهن سان مڪمل ڀريل هو ۽ پارڪ ۾ ايندڙ ڪيترائي ماڻهو به پارڪنگ ايريا گيٽ نمبر هڪ تي پنهنجون گاڏيون ۽ موٽر سائيڪلون پارڪ ڪري رهيا هئا ته اوچتو هڪ زوردار ڌماڪو ٿيو جنهن بعد پارڪ ۾ رڙيون پئجي ويون ۽ ٽاڪوڙو مچي ويو. ڌماڪي جي فوري اطلاع تي ريسڪيو 1122 سميت امدادي ٽيمون موقعي تي پهچي ويون ۽ زخمين کي جناح اسپتال، شيخ زيد اسپتال منتقل ڪري ورتو، زخمين مان ڪيترن جي حالت ڳڻتي جوڳي ٻڌائي وئي آهي ڌماڪي کان فوري بعد ڊي آءِ جي آپريشنز ڊاڪٽر حيدر اشرف ۽ ڊي سي او لاهور ڪيپٽن(ر) محمد عثمان به موقعي تي پهچي ويا جڏهن ته پوليس ۽ قانون لاڳو ڪندڙ ادارن جي اهلڪارن واقعي واري هنڌ تي پهچي علائقي کي گهيري ۾ وٺي شاهديون گڏ ڪرڻ شروع ڪري ڇڏيون ۽ امدادي سرگرمين جي پاڻ نگراني ڪئي.

پنجاب حڪومت جي ترجمان زعيم قادري جو چوڻ آهي ته 65 ڄڻا شهيد ۽ 300 زخمي ٿيا آهن، جڏهن ته جناح اسپتال ۾ 38 لاش، 135 زخمي، شيخ زيد اسپتال ۾ 5 لاش، 43 زخمي، سروسز اسپتال ۾ 7 لاش، 25 زخمي، فاروق اسپتال ۾ 6 لاش، 45 زخمي ميئو اسپتال ۾5 لاش، 9 زخمي، لاهور جنرل اسپتال ۾ 34 زخمي ۽ گنگارام اسپتال ۾ 11 زخمي آندا ويا.0230هوڏانهن واقعي جو ڪيس داخل ڪيو ويو آهي.

 

گڏيل مفادن واري ڪائونسل جو اجلاس، آدمشماري ٻيهر ملتوي ڪرڻ جو فيصلو

اسلام آباد (اين اين آءِ) گڏيل مفادن واري ڪائونسل آدمشماري جو عمل هڪ دفعو ٻيهر ملتوي ڪرڻ جو فيصلو ڪيو آهي جڏهن ته نئين تاريخ لاءِ پاڪستان شماريات بيورو کي صوبائي حڪومتن ۽ فوج سان مشاورت ڪرڻ جي هدايت ڪئي ويئي آهي گڏيل مفادن واري ڪائونسل جو اجلاس جمعي تي وزيراعظم نوازشريف جي صدارت هيٺ وزيراعظم آفيس ۾ ٿيو اجلاس ۾ آدمشماري 2016 جو معاملو تف صيلي غور هيٺ آندو ويو اجلاس کي ٻڌايو ته گڏيل مفادن واري ڪائونسل جي گڏيل اجلاس ۾ ڪيل فيصلي مطابق صوبائي حڪومتن ۽ فوج سان ڪيترائي اجلاس منعقد ڪيا ويا ڇو ته مستقبل جي رٿابندي لاءِ آدمشماري آپريشن جي شفافيت نهايت اهميت واري اهي ۽ هن مقصد لاءِ اٽڪل 3 لک فوجين جي ضرورت آهي اجلاس کي ٻڌايو ويو ته فوج جي شوال آپريشن ۽ ضرب عضب ۾ مصروفيتن سبب گهربل انگ ۾ فوجي مهيا هئڻ ناممڪن آهي مرحلي وار آدمشماري جي آپش کي اجلاس دوران غور هيٺ آندو ويو جڏهن ته اجلاس ۾ شماريات بيورو پاران آگاهه ڪيو ويو ته مرحليوار آدمشماري ۾ مختلف خاميون آهن ۽ هي بين الاقوامي سطح تي به وڌيڪ مناسب طريقو نٿو سمجهيو وڃي اجلاس دوران گڏيل طور تي فيصلو ڪيو ويو ته آدمشماري جو عمل ملتوي ڪيو وڃي ۽ ان حوالي سان نئين تاريخ صوبائي حڪومتن ۽ فوج جي مشاورت سان ڪئي وڃي.

 

پاڪ- ايران مختلف معاهدن تي صحيحون ڪري ڇڏيون، امن جي واڌاري لاءِ گڏيل ڪوششن تي اتفاق

اسلام آباد(بيورو) پاڪستان ۽ ايران وچ ۾ مختلف شعبن ۾ معاهدن تي صحيحون ڪيون ويون آهن. وزير اعظم نواز شريف چيو آهي ته اميد آهي ته پاڪستان ۽ ايران جا لاڳاپا مضبوط کان مضبوط ٿيندا ويندا. گذريل ڏينهن ايراني صدر حسن رفسنجاني ۽ وزير اعظم نواز شريف وچ ۾ ملاقات ٿي. ملاقات کانپوءِ ٻنهي اڳواڻن مختلف شعبن ۾ معاهدن تي صحيحون ڪيون ويون. جڏهن ته بنهي ملڪن امن امان جي واڌاري لاءِ گڏيل ڪوششن تي اتفاق پڻ ڪيو. ملاقات کانپوءِ گڏيل پريس ڪانفرنس ڪندي وزير اعظم نواز شريف چيو ته پاڪستان ۽ ايران جي بهتر لاڳاپن جو فائدو عوام کي پهچندو. پاڪستان ۽ ايران وچ ۾ 2 سرحدي ڪراسنگ پوائنٽون جوڙيون وينديون. هن چيو ته ايراني صدر کي پاڪستان اچڻ تي ڀليڪار چوان ٿو. اميد آهي ته ايراني قوم صدر روحاني جي قيادت ۾ ترقي ڪندو. پاڪستان ۽ ايران گڏيل سهڪار کي توانائي سميت سمورن شعبن ۾ هٿي ڏني ويندي. سندس چوڻ هو ته ٻنهي ملڪن ۾ گھاٽا ڀائپي وارا لاڳاپا آهن، ايراني صدر سان ڳالهين ۾ سمورن شعبن ۾ سهڪار وڌائن تي ڳالهه ٻول ٿي آهي. ان موقعي تي ايراني صدر حسن روحاني پاڪستاني قوم کي يومِ پاڪستان جون مبارڪون ڏنيون. هن چيو ته پاڪستان ۽ ايران علائقائي مسئلن جي حل تي اتفاق ڪيو آهي ۽ ٻئي ملڪ دهشتگردي خلاف پرعزم آهن. هن چيو ته دهشتگردي خلاف گڏجي ڪوششون ڪرڻيون آهن. ٻنهي ملڪن جون سرحدون مضبوط ٿيڻ سان ئي ترقي ممڪن آهي. پاڪستان ۽ ايران وچ ۾ اقتصادي سهڪار وڌائڻ جا وڏا موقعا موجود آهن. ايراني صدر حسن روحاني وڌيڪ چيو ته پاڪستاني قيادت سان مختلف معاملن تي ڳالهيون ٿيون آهن. قدرتي وسيلن جي شعبن ۾ سهڪار کي وڌيڪ هٿي ڏئي سگھجي ٿي. هن چيو ته پاڪستان جي سلامتي اسان جي سلامتي آهي. ٻنهي ملڪن جون سرحدون محفوظ ٿيڻ سان گڏي فائدو ٿيندو. پاڪستان ۽ ايران لاڳاپن کي وڌيڪ هٿي ڏيڻ لاءِ پرعزم آهن.

 

سنڌ سرڪار سي سي آءِ ۾ نون ڊيمن جي مخالفت ڪري ڇڏي

ڪراچي (اسٽاف رپورٽر) پاڪستان جي وزيراعظم محمد نواز شريف جي صدارت هيٺ اڄ اسلام آباد ۾ ٿيل گڏيل مفادن واري ڪائونسل (سي سي آءِ) واري اجلاس سنڌ جي وڏي وزير سيد قائم علي شاهه سنڌ صوبي جو ڀرپور دفاع ڪندي نون ڊيمن جي سخت ۾ مخالفت ڪئي ۽ وفاقي حڪومت تي آدمشماري ڪرائڻ تي زور ڀريو. وزير اعليٰ هائوس مان جاري ٿيل بيان ۾ ٻڌايو ويو آهي ته وفاقي پاڻي ۽ بجلي واري وزارت ڏهه سالن جي نيشنل فلڊ پروٽيڪشن پلان VI پيش ڪيو جنهن ۾ ٻوڏ واري وقت پاڻي ئي گڏ ڪرڻ لاءِ ڪالاباغ ڊيم ۽ اکوڙي ڊيم جي تعمير جي ڀرپور حمايت ڪئي وئي. وڏي وزير ان تي اصولي موقف اختيار ڪندي چيو ته سنڌ ۽ خيرپختون خواه جون حڪومتون ۽ اسيمبليون اڳ ئي ڪالاباغ ڊيم کي رد ڪري چڪيون آهن، اهي فلڊ پلان بيوروڪريسي جو بڻايل لڳي ٿو نه ته ٻئي صورت ۾ پاڻي ۽ بجليءَ واري وفاقي وزير سياستدان هئڻ ڪري ان کي سي سي آءِ ۾  آڻڻ جي منظوري نه ڏئي هان. هن چيو ته 1991ع جي پاڻي معاهدي ۾ ڪٿي به ڪنهن نئين ڊيم بڻائڻ جو ڪو ذڪر نه آهي. پاڻي ۽ بجلي واري وزارت اجلاس ۾ اهي دليل ڏنا ته ملڪ ۾ مسلسل ٻوڏ اچي رهي آهي ۽ ٻوڏ واري پاڻيءَ کي گڏ ڪرڻ جو واحد طريقو ڪالاباغ ڊيم ۽ اکوڙي ڊيم جي تعمير وارا منصوبا آهن. سنڌ جي وڏي وزير چيو ته 2010ع ۾ ٻوڏ ۽ 2011ع جي برساتن کان سواءِ ملڪ ۾ گذريل پنجن ورهين ۾ ڪا وڏي ٻوڏ نه آئي آهي. حالانڪ ٿرپارڪر سميت صوبي جي مختلف ضلعن ۾ ڏڪار واري صورتحال آهي. سنڌ سرڪار ڪاڇي، ڪوهستان ۽ ٻين ريگستاني علائقن ۾ رهندڙن ماڻهن کي ڪڻڪ ۽ کائڻ پيئڻ جون ٻيون شيون فراهم ڪرڻ لاءِ پنج ارب رپيا خرچ ڪيا آهن ۽ ان صورتحال ۾ ٻوڏ جي واري مفروضي تي نون ڊيمن جي اجازت ڪئين ڏئي سگهجي ٿي؟ ان تي وزير اعظم پاڪستان نواز شريف پاليسي فيصلو ڪندي ڪالاباغ ڊيم ۽ اکوڙي ڊيم جي تجويزن کي ملتوي ڪري ڇڏيو. سنڌ جي وڏي وزير سيد قائم علي شاهه چوٿين قومي ٻوڏ واري تحفظي پلان (نيشنل فلڊ پروٽيڪشن پلان VI) بابت ڳالهائيندي چيو ته گذريل ٽن پلانن کي وفاقي حڪومت طرفان فنڊنگ ڪئي وئي جڏهن ته ان چوٿين پلان لاءِ صوبائي حڪومتن کي 177 ارب رپين جو خرچ برداشت ڪرڻ لاءِ چيو ويو آهي، جيئن ته اهو هڪ قومي پلان آهي انڪري مرڪز کي ئي خرچ ڪرڻ گهرجي. وزير اعظم پاڪستان پاليسي فيصلو ڪندي پاڻي ۽ بجلي واري وزارت کي نيشنل فلڊ پروٽيڪشن پلان VI جي حوالي سان چئني وڏن وزيرن کي بريفنگ ڏيڻ جي هدايت ڪئي، جنهن بعد ان معاملي تي ايندڙ اجلاس ۾ بحث ڪيو ويندو. آدمشماري ڪرائڻ واري معاملي تي وڏي وزير سيد قائم علي شاهه چيو ته سنڌ صوبي ۾ سڀ کان پهرين آدمشماري ڪرائي وڃي. وزير اعظم چيو ته آرمي چيف آدمشماريءَ لاءِ ٽي لک کان وڌيڪ نوجوانن ڏيڻ جي بندوبست کان معذرت ڪئي آهي، انڪري آدمشماري ڪجهه وقت کان پوءِ ڪرائي ويندي. ان تي سنڌ جي وڏي وزير وزيراعظم تي زور ڀريو ته هُو گهٽ ۾ گهٽ آدمشماريءَ جي مهيني ۽ تاريخ جو اعلان ئي ڪري ڇڏي جنهن تي وزير اعظم کين يقين ڏياريو ته آدمشماري 2016ع ۾ ئي ڪرائي ويندي.

 

موجوده دور جي گهرجن مطابق پاڪ فوج کي جديد بنائڻ لاءِ ڪائي ڪسر نه ڇڏي ويندي: ممنون حسين

اسلام آباد (اين اين آءِ) پاڪستان جي صدر ممنون حسين چيو آهي ته موجوده دور جي تقاضائن مطابق پاڪ فوج کي جديد بنائڻ لاءِ ڪائي ڪسر نه ڇڏي ويندي دنيا جي ڪائي طاقت پاڪستان کي اک کڻي ڏسڻ جي جرئت نٿي ڪري سگهي اتحاد ۽ ٻڌي جي طاقت سان اسان پنهنجن سمورن مسئلن تي ڪنٽرول ڪري سگهون ٿا هن اها ڳالهه جمعي تي شڪرپوڙيان پريڊ گرائونڊ ۾ هٿياربند فوج جي يوم پاڪستان پريڊ ۾ حصو وٺندڙن ۾ انعام ورهائڻ ۽ هٿياربند فوج جي دعوت جي تقريب کي خطاب ڪندي ڪئي صدر ممنون حسين يوم پاڪستان جي شاندار پريڊ جي اهتمام تي ان ۾ شامل ٿيندڙن کي واڌايون ڏيندي چيو ته ان جي پيشاوراڻي صلاحيتن ۽ جذبن تي کين ۽ پوري قوم کي فخر آهي اسان جي ٽنهي فوجين جنهن شاندار پريڊ جو مظاهرو ڪيو ان سان قوم جي جذبي کي حوصلو مليو آهي. هن چيو ته پريڊ دوران ان جو وڌندڙ هر قدم پاڪستان جي دشمنن جي دلين تي مڱ ڏريندو ويو ۽ پاڪستان فوج تي قوم جي اعتماد جو ورجا به ٿيو ته هو پيشاوراڻي صلاحيتن سان دفاع وطن لاءِ هر وقت تيار آهن. صدر چيو ته 23 مارچ جي پريڊ قوم جي انهيءَ جذبي کي يقيني تازو ڪيو آهي جنهن جي طاقت سان اسان جا بزرگ آزاد وطن حاصل ڪرڻ ۾ ڪامياب ٿيا هئا. صدر چيو ته فوج جي شاندار پريڊ پاڪستان جي وقار کي عالمي سطح تي به اجاگر ڪيو آهي ان کان اڳ صدر پريڊ ۾ حصو وٺندڙن ۾ شيلڊ ورهايون ۽ انهن جي شاندار ڪارڪردگي جي واکاڻ ڪئي.

 

سياست کي تخليقي ماڻهن جي ضرورت آهي: پرويز رشيد

اسلام آباد (اين اين آءِ) سڌسماءَ جي وفاقي وزير سينيٽر پرويز رشيد ميڊيا ٽائون جي توسيع ۽ ميڊيا جي نون ماڻهن جي هائوسنگ جا مسئلا حل ڪرڻ جي خاطري ڪرائيندي چيو ته ميڊيا ٽائون ٻين سوسائٽين لاءِ هڪ مثال بڻجي چڪو ماضي ۾ پنجاب حڪومت مان ويندڙن شهبازشريف کي خزانو خالي ڪري صرف منصوبن جو قبرستان ڏيئي ويا سياست کي تخليقي ماڻهن جي ضرورت آهي سردار عتيق مسلم ڪانفرنس کي آمريت جي هٿ جي لٺ ۽ کيسي جي گهڙي بڻايو جمهوري قوتن کي آمريت جو هٿيار نه بڻجڻ گهرجي آمريت کي صرف زوال ۽ جمهوريت کي عروج حاصل آهي ماڻهو سياست ۾ پلاٽن تي قبضو ڪرڻ اچن ٿا پر مشتاق منهاس هڪ ايماندار شخص آهي اميد آهي ته هو سياست جي ميدان ۾ اچڻ کان پوءِ ملڪ جي تعمير ۽ ترقي ۾ خاص ڪردارف ادا ڪندو هن ڳالهه جو اظهار هن جمعي تي ميڊيا ٽائون هائوسنگ سوسائٽي جي سيڪريٽري فاروق فيصل پاران نيشنل پريس ڪلب جي اڳوڻي صدر ۽ مشهور اينڪر پرنس مشتاق منهاس جي اعزاز ۾ ڪوٺايل تقريب کي خطاب ڪندي ڪيو. سينيٽر پرويز رشيد چيو ته مشتاق منهاس فاروق فيصل ۽ افضل بٽ سميت ٻين ساتين صحافين جي فلاح ۽ بهبود لاءِ وڏيون ڪوشش ڪيون آهن ۽ هر ڪم نيڪ نيتي ۽ محبت سان ڪيو جنهن سبب کين ڪاميابي ملي ميڊيا ٽائون هائوسنگ سوسائٽي رٿا ۾ ڪيترائي ڀيرا ان کي ٽاريو ويو پر مشتاق منهاس ۽ ٻين ساٿين جي دلڇسپي ۾ گهٽتائي نه آئي ۽ اڄ ميڊيا ٽائون جو منصوبو سڀني آڏو آهي جيڪو ملڪ جي سڀ کان ڪامياب هائوسنگ منصوبن مان هڪ آهي جيڪو حڪومت جي آمدني ۾ اضافو به ڪري رهيو آهي جنهن تي انتظاميه کي واڌايون ڏجن ٿيون.

 

ڪرپشن شڪايتن جي انڪوائري ۾ غير ضروري التوا : سپريم ڪورٽ نيب چيئرمين کي طلب ڪري ورتو

اسلام آباد  (اين اين آءِ) سپريم ڪورٽ آف پاڪستان ڪرپشن شڪايتن جي انڪوائري ۾ غير ضروري التوا تي چيئرمين نيب قمرزمان چوڌري کي هڪ هفتي کان پوءِ طلب ڪري ورتو آهي جمعي تي نيب پاران ڪرپشن شڪايتن جي انڪوائري ۾ غير ضروري ڊيگهه بابت ڪيس جي ٻڌڻي سپريم ڪورٽ جي ٽه رڪني بئنچ ڪئي جسٽس گلزار احمد پڇاڻو ڪيو ته فيڊرل پبلڪ سروس ڪميشن جي اڳوڻي سربراهه اشرف مگسي پاران غير قانوني مقررين بابت انڪوائري چئن سالن کان هلي رهي آهي چئن سالن ۾ انڪوائري مڪمل نه ٿي ۽ نه ئي ريفرنس داخل ٿيو انڪوائري مڪمل ڪرڻ ۾ وڌيڪ ڪيترو وقت لڳندو جسٽس دوست محمد ريمارڪس ڏنا ته احتساب قانون جي ڪجهه شقن تي نظرثاني جي ضرورت آهي عدالت ايندڙ ٻڌني تي چيئرمين نيب کي ذاتي حيثيت ۾ پيش ٿيڻ جو حڪم ڏنو جنهن تي ڊپٽي پراسيڪيوٽر نيب اپيل ڪئي ته چيئر.مين جي جاءِ پراسيڪيوٽر جنرل کي طلب ڪيو جسٽس طارق پرويز چيو ته ڪمال ڪريو ٿا ڇا چيئرمين نيب کي عدالت اچڻ ۾ شرم اچي ٿو ڪيس جي ٻڌڻي هڪ هفتي لاءِ ملتوي ڪئي ويئي.