تازيون خبرون

Daily Archives: March 26, 2016

پريانڪا چوپڙا ”هولي“ آمريڪا ۾ ڪوائنيڪو جي سيٽ تي ملهائي

ممبئي (شوبز نيوز)بالي ووڊ اداڪاره پريانڪا چوپڙا ”هولي“ آمريڪا ۾ ٽي شو ڪوائنيڪو جي سيٽ تي ملهائي، ڀارتي سڌ سماءَ جي ذريعن مطابق پريانڪا چوپڙا آمريڪا ۾ هجڻ جي ڪري پنهنجي فيملي ۽ دوستن سان هولي نهملهائي سگهي، اداڪاره انسٽاگرام تي ڪوائنيڪو جي سيٽ تي عملي ۽ ڪاسٽ سميت هولي ملهائڻ جون تصويرون شيئر ڪيون آهن، هن ان موقعي تي پنهنجي ساٿين جو شڪريو ادا ڪندي چيو ته انهن گهر جهڙو ماحول فراهم ڪيو آهي.

 

پونم پانڊي اڄ ڪولمبو ۾ لائيو پرفارم ڪندي

ممبئي (شوبز نيوز)بالي ووڊ اداڪاره پونم پانڊي (اڄ) ڇنڇر ڏينهن ڪولمبو ۾ لائيو پرفارم ڪندي، ڀارتي سڌ سماءَ جي ذريعن مطابق هن هڪ بيان ۾ چيو آهي ته هوءَ ڪولمبو جي بالي ڪيسينو ۾ پنهنجي مداحن سميت هڪ تقريب ۾ لائيو پرفارم ڪندي، هلندڙ مهيني هن جون ڪيتريون ئي لائيو پرفارمنس رٿيل آهن، جنهن تي هوءَ تمام گهڻي خوش آهي.

 

آسٽريليا ، پاڪستان کي 21 رنسن تان مات ڏئي ٽي ٽوئنٽي ورلڊ ڪپ مان ٻاهر ڪڍي ڇڏيو

موهالي: آسٽريليا اهم ميچ ۾ پاڪستان کي 21 رنسن تان مات ڏئي ٽي ٽوئنٽي ڪرڪيٽ ورلڊ ڪپ مان ٻاهر ڪڍي ڇڏيو، موهالي جي ميدان تي پاڪستان لاءِ انتهائي اهم ميچ ۾ ڪپتان شاهد آفريدي لاڳيتو ٽيون ڀيرو بدقسمت ثابت ٿيو ۽ ٽاس هارائي ويو، آسٽريليا پهرين بيٽنگ ڪندي زبردست راند کيڏي، عثمان خواجا روايتي جارحاڻي انداز ۾ بيٽنگ ڪئي ۽ ٽيم کي سٺي شروعات ڏئي ويو، ان موقعي تي پاڪستاني بالرن پاڻ ملهايو ۽ 57 رنسن تي ٽن آسٽريلوي بيٽسمينن کي پويلين جورستو ڏيکاريو، جنهن بعد ڪپتان اسٽيون سمٿ اچي باهه ٻاري ۽ شين واٽسن سان گڏجي اسڪور اڳتي کڻي ويو، سمٿ شاندار بيٽنگ ڪندي ففٽي هڻي ويو ته ٻئي پاسي کان وري واٽسن دونهيندار اننگز کيڏي، سمٿ ۽ واٽسن 6 ڏهائي ٻن اوورن ۾ 74 رنسن جي ڀائيواري جوڙي، ڪپتان سمٿ 61 ۽ واٽسن 44 رنسون ٺاهي ناٽ آئوٽ رهيا، اهڙي ريت آسٽريليا 20 اوورن ۾ 4 وڪيٽن جي نقصان تي 193 رنسون ٺاهيون، وهاب رياض ۽ عماد وسيم 2- 2 وڪيٽون ورتيون، پاڪستان بيٽنگ شروع ڪئي ته احمد شهزاد رڳو هڪ رنسن ٺاهي موٽيو، شرجيل خان هڪ ڀيرو وري جارحاڻي بيٽنگ ڪندي تيز رفتار 30 رنسون ٺاهي موٽيو، ان کانپوءِ عمر اڪمل ۽ خالد لطيف 5 اوورن ۾ 45 رنسن جي ڀائيواري جوڙي پر اڪمل به 32 رنسن تي آئوٽ ٿي ويو، شاهد آفريدي اچي روايتي تيز رفتاري سان کيڏيو پر رڳو 14 رنسون ٺاهي موٽي ويو، شعيب ملڪ ۽ خالد لطيف رنسون ٺاهڻ جو سلسلو ته جاري رکيو پر خالد تيزي سان اسڪور ٺاهڻ ۾ ناڪام ٿي ويو، جنهن ڪري گهربل رن ريٽ وڌندو ويو، خالد لطيف 41 بالن تي 46 رنسون ٺاهي آئوٽ ٿيو، جيمز فالڪنر پاڪستان لاءِ تباهي آندي ۽ هن 5 وڪيٽون ورتيون، اهڙي ريت پاڪستان ڪرڪيٽ ٽيم مقرر 20 اوورن ۾ 8 وڪيٽن جي نقصان تي 172 رنسون ٺاهي 21 رنسن تان هارائي وئي، شعيب ملڪ 20 بالن تي 40 رنسون ٺاهي ناٽ آئوٽ رهيو، آسٽريلوي بالر جيمز فالڪنر کي مين آف دي ميچ قرار ڏنو ويو.001

 

وومينز ورلڊ ٽي- 20 ڪپ: پاڪستاني ٽيم کي سيمي فائنل تائين پهچڻ لاءِ (سڀاڻي) انگلينڊ سان مهاڏو اٽڪائڻو پوندو

چنائي(اسپورٽس نيوز)  آءِ سي سي وومينز ورلڊ ٽي- 20 ڪپ ۾ پاڪستاني ٽيم پنهنجي چوٿين ۽ آخري ميچ (سڀاڻي) آچر تي کيڏندي. پاڪستاني ٽيم کي سيمي فائنل تائين پهچڻ لاءِ انگلينڊ جو چئلينج درپيش هوندو، گرين شرٽس روايتي حريف ڀارت ۽ بنگلاديش کي شڪست ڏئي 2 ڪاميابيون حاصل ڪيون آهن. شروعاتي ميچ ۾ پاڪستاني ٽيم کي ويسٽ انڊيز هٿان شڪست ملي هئي. ٻئي پاسي انگلينڊ جي ٽيم لڳاتار 3 ڪاميابيون حاصل ڪيون آهن. لڳاتار ٻن ڪاميابين کان پوءِ پاڪستاني ٽيم جا حوصلا بلند آهن ۽ اها آخري ميچ ۾ هاڻي انگينڊ جي ٽيم جي چئلينج کي منهن ڏيڻ لاءِ تيار آهي. ٻنهي ٽيمن جي موجوده فارم ۽ ڪارڪردگي کي نظر ۾ رکندي آخري گروپ ميچ ۾ دلچسپ مقابلي جي اميد ڪئي پئي وڃي.ا

 

منشياتي دهشتگردن هٿان يرغمال بڻيل سماج: شفيق شاڪر

اسان جي نام نهاد قومي ميڊيا جا به پنهن جا ئي شان ۽ انداز آهن.ڪنهن نان اشوء کي وڏي ڏانء سان اشو بنائڻ ۽ ڪنهن اشوء کي نان اشو جي ٽوڪريء ۾ ڦٽو ڪرڻ ته ڪو وٽانئن سکي.خاص طور تي پاڪستان جي پيڙهيل طبقن ۽ محروم قومن جي حوالي سان سچ لکڻ تي ته ڄڻ کين نانگ سونگھيو وڃي.البته جتي کين چٿر جو موقعو ملي ٿو اتي اخبارن ۾ وڏيون وڏيون شه سرخيون ۽ اٺ جي آندي جيڏا ڪالم به پڙهڻ لاء ملندا. 22 مارچ تي دنيا ۾ ٻه وڏا بدنصيب واقعا ٿيا.هڪڙو بيلجيم جي شهر برسلز ۾ ۽ ٻيو پاڪستان جي شهر ٽنڊو محمد خان ۾ جن مان هر واقعي ۾ اٽڪل پنجاه جي قريب ماڻهو موت جو شڪار ٿي ويا.برسلز واري واقعي کي ته قومي ميڊيا ۾ سرموڙ خبر جو درجو مليو ۽ سڄي دنيا ۾ ممڻ مچي ويو پر ٽنڊي محمد خان وارو واقعو ان انداز ۾ پيش ڪيو ويو ڄڻ ته انسان نه پر ڪي جانور مري ويا هجن.جڏهن موتن جو تعداد وڌڻ لڳو ته ننڊ پيل قانون به اکيون مهٽي سجاڳ ٿيو،اقليتي معاملن جي صوبائي وزير جنهن کي ايڪسائيز سان گڏ ٻيا به ڪيئي کاتا عنايت ٿيل آهن ،تنهن به پريس ڪانفرنس جي ذريعي پنهن جي موجودگيء جو احساس ڏياريو.واقعي تي رسمي افسوس جو اظهار ڪيو ويو۽ عوام جي تحفظ جا سمورا حق ادا ڪري هرڪو وڃي گھر سمهي پيو.

هاڻي ٿيڻو ڇا آهي؟ ڪجھ ڏينهن لاء گٽڪي،مين پڙي ۽ ڪچي شراب جي وڪري خلاف وٺ پڪڙ ٿيندي،پوليس جا وارا نيارا ٿي ويندا،ڪجھ گنهگار ۽ بي گناه گڏي پڪڙي انهن جا خيسا خالي ڪيا ويندا،منٿلين ۾ اضافو ڪيو ويندو۽ وري ساڳي ڪاتي ساڳي وڍڻ جي وار جاري رهندي جو منٿلين جو اهو سلسلو هيٺان کان مٿي تائين وڃي ٿو،ڪيترن ئي شرفا جي محلن جا خرچ انهيء ئي ڪمائيء جي برڪت سان هلن ٿا. سنڌ جو اهو ڪهڙو ڳوٺ يا شهر آهي جتي ڪچو توڙي ولايتي شراب، چرس، ڀنگ ۽ ٻيون منشيات سر عام نه هلنديون هجن ۽ اتان جي پوليس کي انهيء جي پوري ڄاڻ نه هجي.شايد اسين اهڙي سماج ۾ پهچي چڪا آهيون جتي انسان،انسانيت،جذبا۽احساس سڀ پئسي جي هيٺان دٻجي دفن ٿي چڪا آهن.جنهن کي ڏسو،ان پئسي جي ڊوڙ ۾ ايترو ته انڌو ٿي چڪو آهي جو اهو هرقيمت تي ان کي حاصل ڪرڻ چاهي ٿو.

آهي اسلامي جمهوريه پاڪستان پر شراب تي ڪا قانوني پابندي ڪانهي،جواز اهو ٿو ڄاڻايو وڃي ته غيرمسلمن جو اهو حق آهي ته کين سندن مذهب مطابق  رياست کين شراب مهيا ڪري ڏئي. غير مسلمن کي ٻيا سڀ سندن حق رياست ڏيئي چڪي باقي شراب جو حق ئي رهجي ويو هوجيڪو انهن کي مهيا ڪري ڏنو ويو آهي.پهرين ڳالھ اها ته اهو مذهب جي نالي تي سراسر بهتان آهي،دنيا جي ڪنهن به مذهب ۾ شراب جهڙي پليد شيء استعمال ڪرڻ جي اجازت نه ڏني ويئي آهي. ٻي ڳالھ  اها ته غيرمسلمن کان وڌيڪ مسلمان اهو شراب استعمال ڪن ٿا.اصل پئسي ڪمائڻ جو مسئلو آهي جو ان گندي ڪاروبار ذريعي ڪيترائي ڪک پتي  رات وچ ۾ لک پتي بڻجي ويا.سوال اهو ٿو پيدا ٿئي ته جيڪر سڀاڻي ڪنهن به مذهب سان تعلق رکندڙ اهو چوي ته سندس مذهب ۾ ماڻهن کي ڪهڻ جائز آهي ته ڇا رياست ان جو اهڙو مطالبو مڃي وٺندي؟ اڄ جيڪي انتها پسند ماڻهن کي بمن سان اڏائي رهيا آهن انهن جي نزديڪ به سندن هٿ ٺوڪي مذهبي تشريح موجب اهو ڪم مذهب مطابق آهي.حڪومت کي واقعي عوام جي زندگين جو ڪو فڪر آهي ته سڀ کان پهرين ولايتي شراب جي انهن سمورن گھتن کي بند ڪري ڏيکاري.انهن گھتن مان ڪيترا گھتا خود وزيرن ۽ سياسي اڳواڻن جا آهن.وري جڏهن اهڙو ڪو ڪٺور واقعو ٿئي ٿو ته اهي وزير،مشير ۽ پوليس عملدار اهڙي ته سادگيء سان اچي بيان ڏين ٿا ڄڻ ته انهن کي انهن گندن ڪاروبارن جي باري ۾ اڳ ۾ ڪا خبر ئي نه هئي.

روزانو اخبارن ۾ عوام طرفان اهڙن سماج دشمن ڪاروبارن جي باري ۾ رڙيون ڪيون وڃن ٿيون،اخبارون اداريا لکي لاڳاپيل عملدارن جو ڌيان انهن معاملن ڏانهن ڇڪائينديون رهن ٿيون،ڪيترن ئي هنڌن تي ماڻهن طرفان مظاهرا به ڪيا وڃن ٿا پر ڪنهن جي ڪن تي جون نٿي سري جو يا ته اهي عملدار خود انهي ڪڌي ڪاروبار جا سرپرست آهن يا وري اها مافيا ايترو ته مضبوط آهي جو انهن جي خلاف قانون جا پير ڏڪڻ لڳن ٿا.سالن کان اهي منشياتي دهشتگرد نوجوان نسل جون زندگيون برباد ڪندا ۽ ڪيترائي گھر اجاڙيندا رهيا آهن پر نه ته انهن جي خلاف ڪڏهن ڪو آپريشن ٿئي ٿو ۽ نه ئي ڪنهن کي پڪڙيو وڃي ٿو ۽ نه ئي ڪنهن کي ڪا سزا اچي ٿي.جيڪو به انساني جانين سان کيڏي ٿواهو دهشتگرد ئي آهي پوء انهن منشياتي دهشتگردن سان ايڏو مهربانيء وارو سلوڪ آخر ڇو؟ جيڪر ڪنهن علائقي جي ايس ايڇ او کي اهو پتو ئي ناهي ته سندس علائقي ۾ ڪهڙا ڪهڙا ڏوهاري ماڻهو ۽ ڪهڙا ڪهڙا سماج دشمن ڏوھ ٿي رهيا آهن ته پوء اهڙي ايس ايڇ او کي نوڪري ڇڏي وڃي پڪوڙا کپائڻ گھرجن.پر ايئن هوندو ناهي،هر ايس ايڇ او کي پوري پوري خبر هوندي آهي،جڏهن ڪو نئون ايس ايڇ او ايندو آهي ته سڀ کان پهريائين ٿاڻي تي انهي جي سامهون ڏوهن ۽ ڏوهارين جي لسٽ ئي سامهون رکبي آهي ته جيئن سائين جن پنهن جي ذاتي بجيٽ انهي حساب سان ٺاهي سگھن.

نئين آئي جي پوليس جي اچڻ سان سنڌ جي ساڃاه وند ڌرين ۽ خاص طور تي ڪمزور شهرين ۾ خوشيء ۽ اميد جي هڪ لهر پيدا ٿي هئي،پر گھوٽڪي ۽ ٽنڊي محمد خان واري واقعي نئين آئي جي جي ساک تي به ڪيترائي سواليه نشان پيدا ڪري ڇڏيا آهن.خاص طور تي اهڙو المناڪ واقعو جيڪو سمجھو ته هن جي پنهن جي اباڻي ضلعي ۾ پيش آيو هجي. جڏهن ڪو واقعي ايماندار ۽ ديانتدار پوليس آفيسر چارج سنڀاليندو آهي ته سندس نالو ٻڌندي ئي ڏوهارين ۾ ڦڙڦوٽ پئجي ويندي آهي ۽ اهي ايڏي ديده دليريء سان پنهن جون سرگرميون جاري نه رکي سگھندا آهن پر هتي ته اهڙو ڪجھ به ڏسڻ ۾ نه آيو آهي. يا ته سنڌ پوليس جي اڳواڻ کي اهو مڃڻ گھرجي ته سندس پوليس نااهل،نڪمي ۽ ڪرپٽ آهي جيڪا ڏوهن تي ڪنٽرول ڪرڻ کان لاچار آهي يا وري اهو تسليم ڪرڻو پوندو ته آئي جي صاحب به ان اسٽيٽس ڪو جو حصو آهي جنهن ۾ قدم قدم تي مصلحت ۽ منافقت کان ڪم وٺڻو ٿو پوي ۽ جنهن ۾ چهرا بدلڻ سان ڪوبه فرق نٿو پوي ان ڪري عوام منجھائس اجايون اميدون نه رکي!

***********

 

 

مشرف جي ملڪ ڇڏڻ تي ٿيندڙ هل هنگاما: زاهد حسين

مشرف جي پرڏيهه روانگيءَ تي جيڪو هُل هنگامو ٿي رهيو آهي، تنهن تي ڪجهه به ٿيندي نظر نه ٿو اچي. هي هڪ اهڙو معاملو هو، جيڪو شريف سرڪار جي جنرلن سان ڇڪتاڻ جو مکيه ڪارڻ بڻيل هو، تنهن ڪري سندس پرڏيهه روانگي اهڙي سياسي سوديبازي آهي، جنهن جي شريف سرڪار کي جنرلن سان ڇڪتاڻ گهٽائڻ لاءِ ضرورت هئي. ان سان سول انتظاميا جي هڪ حد به ظاهر ٿي وئي آهي، جيڪا اُها فوج جي هڪ اڳوڻي مضبوط ماڻهوءَ تي بغاوت جو ڪيس هلائي اورانگهي وئي هئي.

پ پ هاڻي ته حڪومت تي دٻاءَ لاءِ هن معاملي کي استعمال ڪري رهي آهي پر ڳچ عرصو اڳ پنهنجي اقتداري دور ۾ جنرل خلاف ههڙي قسم جو ڪيس نه هلائي پ پ ڄڻ ته انهيءَ ڏس ۾ پنهنجي رڪاوٽن ۽ مجبورين جو اعتراف ڪري چڪي آهي. توڙي جو پ پ سرڪار جا فوج سان لاڳاپا ڇڪتاڻ وارا رهيا پر اهڙي سوديبازيءَ جي ڪري ئي اها پنهنجو مدو پورو ڪري سگهي هئي. هاڻي جيئن ته اُها اقتدار ۾ ناهي، تنهن ڪري هن معاملي تي سخت موقف اختيار ڪري رهي آهي. پر اهو ان هُل هنگامي کانسواءِ ڪجهه به ناهي جنهن تي ڪجهه به هڙ حاصل ٿيڻي ناهي.

سندس پرڏيهه روانگيءَ تان پابندي هٽائڻ جو مقصد اهو ناهي ته سندس خلاف سڀ معاملا ختم ٿي ويا آهن. يقيني طور سندس خلاف بغاوت جو ڪيس ته اڳ ئي ماٺو ٿي ويو هو، ۽ لڳي رهيو آهي ته هي معاملو تقريبن دَمُ ٽوڙي چڪو آهي. پر جنرل خلاف جيڪي ٻيا ڪيس داخل آهن، سي ڪيڏانهن به ويندي نظر نه ٿا اچن، سو انهيءَ معاملي تي سرڪار طرفان جيڪا لچڪ ڏيکاري وئي آهي، تنهن سان فوج سان سندس لاڳاپن ۾ تلخي ختم ٿيندي جنهن ڪري کيس اهڙو سياسي موقعو نه اهم ٿيندو جو ٻين اهم قومي معاملن کي منهن ڏئي سگهي.

پر نواز سرڪار جيڪو نئون گسُ ورتو هو، سو ان لاءِ اڙانگو ثابت ٿيو. نواز شريف طرفان جنرل مشرف خلاف بغاوت جو ڪيس هلائڻ وارو فيصلو سندن هاڻوڪي ٽين حڪومتي دور ۾ فوجي قيادت سان سندس ڇڪتاڻ جو سبب بڻيو. اهڙي ڇڪتاڻ جي ڪري ئي انهن افواهن کي هٿي ملي هئي ته اسلام آباد ۾ عمران-قادريءَ وارو جيڪو ڌرڻو آهي تنهن جي پٺيان فوج جو هٿ آهي.

ميان نواز شريف جيتوڻيڪ انهيءَ بحران ۽ لوڏي مان بچي ته ويو هو پر فوج واضح ڪري ڇڏيو هو ته سندس اڳوڻو سربراهه بغاوت واري ڪيس کي منهن نه ڏيندو. 2014ع ۾ خاص عدالت ڏانهن نيندي مشرف کي فوجي اسپتال ۾ داخل ڪيو ويو هو، جتي هو سخت حفاظتي انتظامن هيٺ رهيو. مشرف بهرحال بعد ۾ ٽربيونل اڳيان اطلاعن موجب فوجي قيادت سان ڊيل تحت ان شرط تي پيش ٿيو ته ڪيس جي ٻڌڻيءَ کانپوءِ کيس پرڏيهه روانگيءَ جي اجازت ڏني ويندي. هڪ خاص جهاز کيس گڏيل عرب امارات کڻي وڃڻ لاءِ تيار هو پر اطلاعن موجب نواز شريف انهيءَ معاهدي تي عمل نه ڪيو.

نواز شريف طرفان معاهدي تي نه بيهڻ سبب ڇڪتاڻ ۾ ويتر واڌ ٿي. جيتوڻيڪ بعد ۾ سندس خلاف ڪيس هلڻ ته شروع ٿيو پر هو ڪڏهن به عدالت اڳيان پيش نه ٿيو. گذريل هڪ سال کان هو فوج جي تحفظ هيٺ پنهنجي ڪراچيءَ واري گهر ۾ رهي رهيو هو. کيس عدالت ۾ حاضرين تي پيش ٿيڻ کان به ڇوٽ ڏني وئي هئي. پر ساڻس فقط هڪڙو مسئلو هو ته کيس پرڏيهه وڃڻ جي اجازت نه ٿي ڏني وئي. وفاقي حڪومت هن معاملي تي عدالت جي پاڇي ۾ لڪندي نظر آئي. پر اهو معاملو به سپريم ڪورٽ جي تازي فيصلي سان ختم ٿي ويو ته کيس مشرف جو نالو ايگزٽ ڪنٽرول لسٽ ۾ وجهڻ جو جواز نظر نه ٿو اچي.مشرف پاڻمرادي جلاوطني ختم ڪري 2013ع ۾ تڏهوڪي فوجي سربراهه جنرل اشفاق پرويز ڪيانيءَ جي مشوري تي ڏيهه وريو هو، جنرل ڪيانيءَ ئي 2008ع ۾ کيس محفوظ رستو ڏيارڻ لاءِ ڊيل ڪرائي هئي. پر هو جيئن ئي ڏيهه وريو ته سندس خلاف قانوني ويڙهه شروع ٿي وئي. پر جنرل ڪياني اهڙي صورتحال مان سندس جند ڇڏائڻ لاءِ مشڪل سان ئي ڪجهه ڪري سگهيو.معاملو ان وقت مَتو جڏهن مشرف خلاف بغاوت جو ڪيس هليو. هي اهو وقت هو جڏهن فوج جي ڪمانڊ تبديل ٿي رهي هئي ۽ جنرل راحيل شريف چارج سنڀالي رهيو هو. نئين فوجي سربراهه ذريعي جنرل جيڪو سخت نياپو وزيراعظم ڏانهن موڪليو، سو ئي سندن ڪاوڙ ۽ ڪروڌ جو چٽو ثبوت هو. لڳ ڀڳ ٻن سالن تائين دٻاءُ برداشت ڪرڻ کانپوءِ وزيراعظم آخرڪار همت هاري ويٺو.

ڊسمبر 2014ع ۾ پشاور ۾ آرمي پبلڪ اسڪول تي حملي کانپوءِ گذريل لڳ ڀڳ هڪ سال کان دهشت گردن خلاف آپريشن شروع ٿيڻ جي ڪري سول-فوجي لاڳاپن ۾ ڪجهه بهتري ضرور آئي. پر بغاوت وارو ڪيس مکيه نقطو رهيو آهي. نواز شريف جيڪڏهن مشرف کي پرڏيهه روانو نه ٿيڻ تي بيٺو رهي ها تڏهن به ان جو ڪيس ڪو گهڻو سياسي فائدو نه ٿئي ها. جنرل راحيل شريف ڪجهه مهينن ۾ ريٽائر ٿي رهيو آهي پر نئين ايندڙ فوجي سربراهه تي به آفيسرن جو دٻاءُ هجي ها ته سندن اڳوڻي سربراهه خلاف بغاوت جو ڪيس هلڻ نه ڏنو وڃي. ٿي سگهي ٿو ته ممتاز قادريءَ کي ڦاهي ۽ پنجاب سرڪار طرفان عورتن جي تحفظ واري منظور ڪيل بل تان ساڄي ڌر وارين مذهبي جماعتن طرفان جيڪا للڪار وڌي رهي هئي، تنهن جي وزيراعظم هن معاملي تي لچڪ ڏيکارڻ تي مجبور ٿيو هجي.

شدت پسنديءَ خلاف ويڙهه جيئن جيئن حتمي مرحلي ۾ داخل ٿيڻ طرف وڃي رهي آهي ته نواز شريف جو دارومدار به فوج تي وڌندو پيو وڃي. قادريءَ کي ڦاهيءَ کانپوءِ لڳي ٿو ته سندس قدامت پسند مذهبي حلقو متاثر ٿيو آهي. جيتوڻيڪ سندس سرڪار ڪافي مضبوط آهي پر تنهن هوندي به ان ۾ جنرلن سان ٽڪر کائڻ جي سگهه ناهي. نواز شريف لاءِ مشرف کي پرڏيهه وڃڻ جي اجازت ڏيڻ فوج لاءِ گنجائش پيدا ڪرڻ جي ضرورت هئي ته جيئن سياسي عمل هلندو رهيو. ايتري قدر جو جيڪي هن معاملي تي هُل هنگامو ڪري رهيا آهن، سي به ان کان چڱي ريت واقف آهي.

مشرف اڃا به ڪنهن وقت به ڏيهه واپس وري سگهي ٿو پر جيتري قدر سندس خلاف بغاوت واري ڪيس جو تعلق آهي ته نه ٿو لڳي ته اُهو توڙ تي پهچندو. بهرحال قانوني ۽ آئيني ڪاررواين لاءِ هر ڪنهن کي جوابده هئڻ گهرجي ۽ اهو ته انصاف ۾ پسند ناپسند نه هئڻ گهرجي. اهي جيڪي مشرف خلاف ڪارروائي چاهن ٿا، سي ماضيءَ ۾ فوجي حڪومت جو حصو رهي چڪا آهن.

سندن ڪردار ۾ به ڪيئي داغ آهن. عدالت فوجي بغاوت کي جائز قرار ڏنو هو ۽ چونڊيل پارليامينٽ فوجي حڪومت جي سمورن قدمن جي توثيق ڪئي هئي. ڇا مشرف 2007ع ۾ هنگامي حالتون لڳائڻ کانپوءِ جسٽس عبدالحميد ڊوگر کي سپريم ڪورٽ جو چفس جسٽس مقرر ڪرڻ سميت، جيڪي فيصلا ڪيا هئا، تن کي پ پ حڪومت جيئن جو تيئن برقرار نه رکيو هو؟

اتفاق سان جيڪڏهن هن اڳوڻي فوجي سربراهه کي سزا اچي به وڃي ٿي، تڏهن به ان سان مستقبل ۾ فوجي بغاوت جي رستا روڪ نه ٿيندي. هن وقت جمهوري ادارن کي مضبوط ڪرڻ ۽ سول ادارن تي عوام جو اعتماد وڌائڻ جي ضرورت آهي، ڇو جو مستقبل ۾ ڪنهن به مهم جوئي کي روڪڻ جو واحد رستو به اهو ئي آهي.

 

بي روزگاري مهاڻن جون صدائون ڪير ٻڌندو : اصغر ملاح

حصو ٻيو ۽ آخري……….

مقرر ٿيل ڪامورن ٺيڪيدارن تي عوامي احتجاجن ۾ الزام لڳندا رهيا ته ملي ڀڳت ڪري ڪميشنون وصول ڪري سرڪاري فنڊن سان جيڪي ڪلور ڪيا ويا هيا اهي جيڪي عوام کان ڳجها نه رهيا آهن قدرتي آفتن ٻوڏ ۽ برسات متاثرين ننڍن آبادگارن لاءِ گذريل سرڪار پاران مفت ٻج، ڀاڻ جي فراهمي وارو عمل سارهه جوڳو هو جنهن کي سنڌ جي عوام پڻ ساراهيو هو رورنيو کاتي جي ڪامورن مختيارڪارن تپيدارن گهٽ نه ڪئي آهي قدرتي آفتن جو شڪار ٻوڏ برسات متاثرين جي لاءِ آيل ڪروڙين روپين جو ٻج ڀاڻ جون سوين ٻوريون ڪوڙي ڪاغذي ڪاروائي ڪري بنا ڪنهن ڊپ ڊاءِ جي هڙپ ڪرڻ  جا الزام عوامي احتجاجن ۾ لڳندا رهيا. آبادگارن جي سوين احتجاجي مظاهرن باوجود ڪابه قانوني ڪاروائي اڄ تائين عمل ۾نه آئي آهي،

سنڌ جي چونڊيل نمائندن سنڌ اسيمبلي 29 فيبروري2012ع تي سنڌ ايريگيسن ايڪت م ترميم جو قانوني بک  يڪراءِ طور منظور ڪيو ويو جنهن تحتپاڻي جي قردتي وهڪرن توڙي  سنڌ جي درياءِ جي ٻنهي  ڪپن تي ڍنڍن ڍورن  مٿان قبضا ڪندڙ خلاف 10 سالن ٽيپ ڀوڳڻ  جون سزائون لک  ڏنڊ جو قانون جوڙيو  ويو پر سنڌ جي مختلف ضلعن جي سوين ايڪڙ سنڌو درياه جي ٻنهي ڪپن  تي قدرتي ڍنڍون ڍورن تي سالن کان بااثر وڏيرن ۽ سياسي ماڻهن جا قبضا ٿيل اهن سنڌ ۾ مهاڻا بااثر ڌرين ۽ سياسي ماڻهن جي ظلم جو شڪار آهن سنڌ جي ملاحن سنڌ جي مهاڻن وقت به وقت احتجاج ڪري پرنٽ ۽اليڪٽرانڪ ميڊيا اڳيا نشاندهيون ڪري دانهيون آهي ته سنڌ ۾ ملاحن سان زيادتون پيون ٿين مهاڻن جي جياپي لاءِ مٺن پاڻين  تان قبضا ختم ڪرائي سنڌ جي سمورين  ڍنڍن کي مٺي پاڻي ڪري  زهريلي پاڻي جو ڇوڙ  بند ڪرايو وڃي سامونڊي پٽي تي رهندڙ مهاڻا هجن يا سنڌو درياءَ جي ٻنهي ڪپن تي ڍنڍن ڍورن تي مڇي جو شڪار جو ٿورو گهڻو جيڪو گذرسفر آبي معيشت تي هو، ان کي به ڏکيو بڻايو ويو آهي

ڇهه هزار سالن کان وجود ۾ آيل منڇر ڍنڍ ايشيا کنڊ جي مٺي پاڻي جي سڀ کان وڏي ڍنڍ جنهن جي پکيڙ وڌ مان وڌ 64800 ايڪڙ ۽ گھٽ مان گھٽ 19200 آهي منڇر ہر وقت جي سرڪار جي غلط پاليسين سبب تباهه حال بڻجي وئي سم جو زهريلو پاڻي ڇوڙ ڪرڻ سبب ڍنڍ ته تباهه ٿي وئي آهي. منڇر جي پيٽ ۾ رهندڙ 60  هزار انساني جانيون صحت، تعليم ۽ ٻين بنيادي سهولتن کان محروم. رهواسي زهريلو پاڻي واپرائڻ تي مجبور، انيڪ مسئلن ۽ بيمارين جي ور چڙهي ويا زهريلي پاڻي ڇڏڻ سبب خراب پاڻي ٿي ويو آهي. جنهن سبب ناياب نسل جون مڇيون، گاهه، پکي تباهه ٿي ختم ٿي ويا. 1988ع ۾ ان وقت جي وڏي وزير عبدالله شاهه منڇر ۾ آيل سموري زمين جي مالڪن کي پنهنجي پنهنجي حصي ۾ ايل زمين جي معاوصو ڏياريو هوپر معاوضو وٺڻ باوجود  بااثر سياسي ماڻهو منڇر  ڍنڍ ۾ مهاڻن کي پنهنجي حصي جي پاڻي ۾ پکي ۽  مڇي مارڻ  تي زبردستي  پابندي  هڻي رهيا آهن ملاح دشمن  پاليسون ختم ڪري ملاحن کي بنيادي سهولتون حق ڏئي ملاحنکي روزگار جوحق ڏنو وڃي پاڪستان ۽ ڀارت ٻنهي ملڪن مان جنهن به ملڪ جي فورسز کي مهاڻا مڇي ماريندي هٿ اچن ٿا، کين گرفتار ڪري کڻي وڃن ٿا.

خاص طور ڀارتي سيڪيورٽي فورس ۽ نيوي هٿان گرفتار ٿيل سنڌ جا ڪيترائي مهاڻا ڀارت جي جيلن ۾سختيون ڀوڳين پيا سنڌ جي مهاڻن جو ته ڪو ڌڻي سائين ڪو نه ٿو ٿئي. جيڪي ڀارتي جيلن ۾ قيد ڪاٽي رهيا آهن، نه صرف ڀارت ۾ قيد مهاڻن کي ڏيهه آڻڻ لاءِ تڪڙا اپاءُ ورتا وڃن سنڌ جي سوين ڍنڍن ڍورن تي با اثر ڌرين جا قبضا ڇڏائي غريب مهاڻن سان انصاف ڪيو وڃي ۽ ڀارت قيد ڪيل مهاڻن جي پويان سندن ڪٽنبن جي به سار سنڀال لهڻ گهرجي ۽ انهن غريب ماهيگيرن جي خاندانن کي بک ۽ بدحالي کان بچائڻ لاءِ پڻ سنڌ حڪومت حڪمت عملي جوڙي ۽ انهن غريب خاندانن جي پر گهور لڌي وڃي پاڪ-ڀارت وچ ۾ هلندڙ تڪرارن جي ڪري ٻنهي ملڪن جو عوام  ان جي سزا ڀوڳي رهيا آهن

 

بلوچستان مان ”را“ ايجنٽ جي گرفتاري

ڳجهن ادارن بلوچستان ۾ وڏي ڪارروائي ڪندي ”را“ جي هڪ حاضر سروس آفيسر ڪل ڀوشن ياديو کي گرفتار ڪيو، جنهن کي هڪ خاص جهاز ذريعي اسلام آباد منتقل ڪيو ويو، ”را“ جو ايجنٽ بلوچستان جي عليحدگي پسند تنظيمن سان رابطي ۾ هو، شروعاتي پڇا ڳاڇا دوران ڀارتي جاسوس اعتراف ڪيو آهي ته هو انڊين نيوي ۾ ڪمانڊر رينڪنگ جو آفيسر آهي، پاڪستان ۾ فرقيواراڻن جهيڙن، بلوچستان ۽ ڪراچي کان عليحدگي جي سازش جو به اعتراف ڪيو آهي، بلوچستان جي صوبائي گهرو وزير سرفراز بگٽي چيو آهي ته ڀارت جي ڳجهي ايجنسي ”را“ بابت ثبوت پهرين به هئا پر حاضر سروس آفيسر پڪڙجڻ کان ٻيو وڏو ثبوت ڪهڙو هوندو، سيڪيورٽي فورسز سوڌو اسان سڀئي گڏجي پنهنجي دشمنن جو خاتمو ڪنداسين، ڀارتي ڳجهي ايجنسي ”را“ جو مقصد پاڪستان کي غير مستحڪم ڪرڻ آهي، جيڪڏهن بلوچستان ۾ ”را“ جو نيٽ ورڪ موجود آهي ته ان جو خاتمو ڪيو ويندو. جنهن جي تصديق صوبائي گهرو وزير مير سرفراز بگٽي پڻ ڪئي، گرفتار ٿيل ايجنٽ ڀارتي نيوي جو حاضر سروس ڪمانڊر آهي، جنهن جي نالي جي سڃاڻپ ڀوشن ياديو جي طور ٿي آهي.

وزيراعليٰ بلوچستان ثناءُالله زهري چيو آهي ته ڀارتي ڳجهي ايجنسي ”را“ بلوچستان جو حالتون خراب ڪرڻ ۾ ملوث آهي، ڪل ڀوشن ياديو جي گرفتاري اهم اڳڀرائي آهي، گرفتار ڪيل را جو ايجنٽ ۽ حاضر سروس ڀارتي آفيسر بلوچستان ۾ عليحدگي پسند گروپن سان رابطي ۾ هو، جڏهن ته هو صوبي اندر دهشتگردي جي ڪيترين ئي وارداتن ۾ پڻ ملوث هو، کيس ٻه ڏينهن پهرين حساس ادارن پاڪ – ايران سرحد تان گرفتار ڪيو هو، جنهن کي پهرين ڪوئيٽا ۽ هاڻ جاچ لاءِ اسلام آباد پهچايو ويو آهي،

پاڪستان جي پرڏيهي معاملن واري صلاحڪار سرتاج عزيز هڪ نجي ٽي وي سان ڳالهائيندي چيو آهي ته  بلوچستان مان گرفتار ڪيل را جي آفيسر جو معاملو ڀارت آڏو اٿاريو ويندو، پاڪستان ۾ ڀارتي مداخلت جا ثبوت اڳ ئي گڏيل قومن کي فراهم ڪري چڪا آهيون، نجي ٽي وي ذريعن دعويٰ ڪئي آهي ته ڪل ڀوشن ياديو کي تفتان بارڊر ڪراس ڪندي گرفتار ڪيو ويو، ڀارتي ڳجهي ايجنسي ”را“ جي ايجنٽ کي حساس ادارن ڳجهي ڄاڻ تي ڪارروائي ڪري ايران جي بارڊر تفتان پار ڪرڻ دوران گرفتار ڪيو، جيڪو اسمگلنگ ۾ استعمال ٿيندڙ ٽرڪ ۾ لڪيل هو، ڀارتي ايجنٽ پابندي مڙهيل تنظيم جي مدد ڪندو هو.

ڀارت وري اعلان ڪيو آهي ته هن جو گرفتار ”را“ ايجنٽ سان ڪو به تعلق ناهي، حڪومت کي گهرجي ته هن معاملي کي گڏيل قومن ۾ اٿاري ڇو جو ايجنٽ جي گرفتاري سڀ کان وڏو ثبوت هئڻ ڪري هن معاملي کي هر سطح تي اڀاري ڀارتي ناپاڪ ارادن کي مٽي ۾ لائي سگهجي ٿو.