تازيون خبرون

Daily Archives: March 19, 2016

سيد صبغت الله شاهه شهيد سورهيه بادشاهه ۽ سنڌ جو عوام: تحرير: اسد ڏاهري

پاڳارا خاندان سنڌ جو عظيم ۽ محسن خاندان آهي هن خاندان هميشه اسلام ، وطن ۽ قوم خاطر عظيم قربانيون ڏنيون آهن، هن خاندان جي ڇهين پڳدار امام انقلاب شهيد اعظم حضرت پيرسيد صبغت الله شاهه راشدي ثاني ”سورهيه بادشاهه“ وطن يا ڪفن جو نعرو هڻي ان وقت جي انگريز سامراج سان گوريلا جنگ جوٽي ، ٻارنهن سالن جي عمر گادي نشين ٿيڻ ۽ ڪافر ۽ ظالم انگريز خلاف جهاد جو اعلان ڪري حر مجاهد تيار ڪري انگريز سامراج جي حرڪتن ۽ ناپاڪ ارادن کي نيست و نابود ڪرڻ لاءِ بهادرانه ڪارنامه سرانجام ڏنا ۽ انگريز سنڌ جي وڏيرن، جاگيردارن ۽ پالتو ڇاڙتن جي معرفت شيطاني چالون هلڻ لڳو ليڪن پاڳارا خاندان جي سورهيه بادشاهه ۾ حسينيت سمايل هئي جهڪڻ بجاءِ آزادي سان جيئڻ کي وڌيڪ ترجيع ڏني، اهڙي هيبتناڪ ماحول ۾ انگريز ڪجهه زميندارن، جاگيردارن ۽ سرڪاري آفيسرن معرفت ڪوڙيون شاهديون وٺي سورهيه بادشاهه لاءِ سزا مقرر ڪئي، ۽ 1935ع ڌاري سورهيه بادشاهه کي رتنا گر جي جيل ۾ رکيو ويو ۽ ٻاهر حر پنهنجيون ڪاروايون ڪندا رهيا، رتناگريءَ جي جيل ۾ سورهيه بادشاهه پيرسائين محمد راشد روضي ڌڻي جي ملفوظات شريف پڙهندا هئي ۽ پنهنجي نصيحتن جو مجموعو ” تنبيهه الفقراءُ “ پڻ تيار ڪيو، ان دوران پاڻ جيل مان حرجماعت جي خليفن ڏانهن سلام ، پيغام موڪليندا هئا سورهيه بادشاهه کي ڪوڙن ڪيسن مان 1938ع ڌاري آزادي ملي ۽ پاڻ ڪلڪتي کان واپس پنهنجي وطن سنڌ پهتا ، پيرجوڳوٺ وارن کان حال احوال وٺي جلد گڙنگ بنگلو سانگهڙ پهچي حرجماعت لاءِ ترڪيبي هدايتون ۽ نصيحتون جاري ڪيائون ۽ انگريز سامراج سان اکيون اکين ۾ ملائي مقابلي ڪرڻ لاءِ تيار ڪيو، چغل خورن اها ڳالهه انگريز کي ٻڌائي سورهيه بادشاهه کي ٻيهر 1943ع ڌاري گرفتار ڪرائي هزارين حرن کي لوڙهن ۾ بند ڪيو، هر ايراضي ۾ مارشل لا لاڳو ڪري حرن مٿان قهري ڪاروايون ڪيون ويون ليڪن حرن پنهنجي روحاني مرشد رهبر سورهيه بادشاهه جي آزادي لاءِ پنهنجي حڪمت عملي سان وڙهندا رهيا ۽ انگريز حرجماعت خلاف غلط پروپيگنڊا ۽ افواهه پکيڙيندا رهيا انگريزجي سرپرستي هيٺ ڪم ڪندڙ جاگيردار پڏيرا وڏاوڏا لقب ۽ انعام حاصل ڪري رهيا آهن ۽ اخبارون انگريز جي دهشت دٻائڻ لاءِ غلط خبرون شايع ڪري هيسائڻ ۾ پوريون هيون، ليڪن سنڌ جي پاڳارا خاندان جي هن بهادر هيرو سورهيه بادشاهه انگريز جي هٿ تي بيعت ڪرڻ کان شهادت کي قبول ڪري حرجماعت کي فرمايو ته فقيرو گهٻرايو نه ! اوهان مان جيڪي هوندا اهي رنگ ڏسندا، نيٺ ظالم انگريز سورهيه بادشاهه جي لاءِ سزا جي تاريخ مقرر ڪئي، جنهن رات سورهيه بادشاهه کي ڦاسي اچي رهي هئي ان رات انگريز سوچيو ته اڄ وقت آهي پيرصاحب پنهنجي موت جي مدنظر ذهني ڇڪتاڻ ۾ مبتلا هوندو ان ڪري اڄ پير صاحب کان آساني سان شطرنج راند جي بازي کٽي ويندس، ليڪن ان جي اميدن تي ان ڏينهن به پاڻي پئجي ويو جڏهن سورهيه بادشاهه انگريز ڪارگل کي ڏاڍي سڪون ۽ آرام سان شڪست ڏني، هو اهڙي سڪون ۽ اٽل ارادي کي ڏسي حيران ٿي ويو، پيرسائين سورهيه بادشاهه ان کي جواب ڏنو ته اسان غلام بنجڻ لاءِ پيدا نه ٿيا آهيون پر غلامي جي زنجيرن کي ٽوڙڻ اسان جي زندگي جو مقصد آهي ظالم گوري جڏهن اهي ڳالهيون ٻڌيون ته هن جو منهن ڀت سان لڳو هن کي اها ڪهڙي خبر ته هي اها جرئت مند هستي آهي جنهن جي رڳن ۾ ڪربلا جي حسين جو رت ڊوڙي رهيو آهي جنهن ڏينهن سورهيه بادشاهه کي شهيد ڪري رهيا هئا ان ڏينهن سورهيه بادشاهه جي آخري خواهش لاءِ ڪرسي تي ويهاريو ويو جڏهن لئمبرڪ سامهون آيو ته ڏٺائين سورهيه بادشاهه جهڙي تشبيهه رکندڙ نوراني هڪ سئو تصويرون ان جي اڳيان اچي ويون ۽ هو فيصلو نه ڪري سگهيو ته ڪنهن کان پڇان ۽ نوراني چهري جو جلوو رکندڙ سورهيه بادشاهه جي خوف کان واپس هليو ويو، پيرسائين سورهيه بادشاهه روحاني پيشوا هئا الله سائين جي امر کي قبول ڪرڻ لاءِ تيار هئا 18 مارچ 1943ع تي فريڊرڪ ينگ آيو ۽ سورهيه بادشاهه کي چيائين ته 20 مارچ تي اوهان کي شهادت جو جام نوش فرمائڻو آهي ليڪن سورهيه بادشاهه جي چهري تي ڪوبه گهنج نه آيو بلڪه پاڻ مرڪي فرمايائون ته شهادت اسان جو تاج آهي اڳتي وڌي ان کي پائڻ عبادت آهي، اسلام وطن ۽ قوم جي آزادي جي انهي ويڙهه ۾ سورهيه بادشاهه کي 20 مارچ 1943ع تي انگريز سامراج سان وڙهندي حيدرآباد سينٽرل جيل ۾ جام شهادت نوش فرمايائون سورهيه بادشاهه کان پوءِ تقريبن 50 حرن کي به شهيد ڪيو ويو ۽ سنڌ اسيمبلي ۾ حر ايڪٽ پاس ڪري ۽ حرن خلاف ڪاغذي ڪاروايون ڪري انهن لاءِ ڌرتي تنگ ڪئي وئي، ان کانپوءِ سندس جسد خاڪي کان به انگريز ڊنا ٿي ان ڪري رات جي تاريخي اونداهي ۾ ڪنهن نامعلوم هنڌ ڏانهن نيو ويو،   امام انقلاب سورهيه بادشاهه جي شهادت کان پوءِ انگريز جي سلطنت کي چئن سالن جي به مهلت نه ملي ۽ انگريز جو اهڙو زوال اچي ويو جو لئمبرڪ جا پوئينر به ياد ڪندا، اڄ سورهيه بادشاهه جي شهادت کي 73 سال گذري چڪا آهن سنڌ جا اديب دانشور اڄ به خاموش آهن، سورهيه بادشاهه جي شهادت تي سنڌ اسيمبلي ۾ اڄ به خاموشي آهي جيڪا حر تحريڪ دوران هئي سورهيه بادشاهه جي عظيم قرباني جي ڏهاڙي 20مارچ تي سنڌ اسيمبلي ۾ عام موڪل جو قرارداد پاس نٿي ڪئي وڃي سنڌ اندر سورهيه بادشاهه جي نالي ڪو تحقيقي ادارو يا يونيورسٽي قائم نه ڪري سگهيا آهيون، حر تحريڪ جي اڳواڻ امام انقلاب شهيد اعظم پيرسائين سورهيه بادشاهه جي شخصيت ۽ حر تحريڪ تي عملي ڪم نه ڪري سگهيا آهيون، پاڳارا خاندان جي عظيم سورهيه سپوت سورهيه بادشاهه جي عظيم قرباني جو مثال ملڻ مشڪل آهي، سورهيه بادشاهه جي حريت پسندي جي جيڪا شمع ٻاري انهيءَ جي شعائن پاڳارا خاندان کي ويتر اهڙو ته بهادر ۽ دلير بنائي ڇڏيو جو اڄ اعليٰ حضرت پيرسائين پاڳارا ظلم ۽ ڏاڍ خلاف حق ۽ سچ وارو ڪلمو چوندا پيا اچن ، اسلام ، وطن ۽ قوم خاطر جنگ وڙهندڙ پيرسائين سورهيه بادشاهه جي شهادت واري ڏهاڙي کي نظرانداز ڪري رهيا آهيون ، اڄوڪي ڏهاڙي تي سيمينار ڪرائي سورهيه بادشاهه ۽ تحريڪ بابت نوجوان نسل کي آگاهه ڪرڻ گهرجي سورهيه بادشاهه جي قرباني جي ڪري هي وطن آزاد ٿيو ۽ سنڌ جي عوام کي انگريز ظالم جي ظلمن کان نجات ملي،

سورهيه بادشاهه جي قرباني تي سنڌ جي سڄاڻ حلقن ايترو ڪم نه ڪيو آهي جيترو کين ڪرڻ گهرجي اچو عهد ڪريون ته اڄ کان سورهيه بادشاهه ۽ حر تحريڪ بابت جديد تحقيقي ڪري نوجوان نسل کي آگاهه ڪريون…

 

Email: asaddahri92@yahoo.com

 

 

پرويز مشرف جي ڪهاڻي پراڻي بوتل ۾ نئون شراب…!!!!: غلام مصطفيءَ جمالي

حڪومت نيٺ سابق صدر ۽ اڳوڻي آرمي چيف پرويز مشرف کي ٻاهر جي اجازت ڏئي به ڇڏي ۽ هوءُ دبئي روانو به ٿي ويو.پرويز مشرف خانگي جهاز اي ڪي 611جي وسيلي پنهنجي گهر واري ۽ ٻين ساٿين سميت دبئي به پهچي ويو.جتي سندس پارٽي ڪارڪنن سندس استقبال ڪيو.مشرف ٻاهر ڇو ويو کيس ايڏي وڏي اجازت ڪئين ملي.؟انهي بحٽ جي سلجهائڻ لاءِ ڪيترائي قلمڪار پنهنجي پنهنجي تخليقن سان بيان ڪري رهيا آهن.جڏهن ته مشرف جي ٻاهر وڃڻ جي سياسي پارٽي جي اڳواڻن جي بيانن ۾ پڻ تيزي اچي وئي آهي.جڏهن ته پاڪستان پي پي پي جي نوجوانن قيادت بلاول ڀٽي پنهنجي ٽيئر پيغام اندر “گو نواز گو“جو نعرو پڻ لکي ڇڏيو آهي.۽ پنهنجي هڪ بيان اندر بلاول ڀٽي چيو ته مشرف جي ايتري مهلت ڏيڻ کان پوءِ وفاق کي اقتدار ۾ رهڻ جو ڪو حق ناهي.پر وفاق حڪومت پرويز مشرف کي ٻاهر وڃڻ جي اجازت ڏئي ڇڏي آهي ۽ هو ويو به هليو پر هاڻ ته ڳاهه نانگ نڪري ويو ۽ ليڪو پيو ڪٽجي واري وڃي بچي آهي.جنهن ڳالهه تي افسوس به آهي ۽ حيرت به ڇو ته پاڪستان اندر جيڪڏهن اهڙي آمريت رکندڙ شخص آساني سان ٻاهر وڃي سگهن ٿا ته پوءِ اهين هت انصاف جو پلڙو ڀاري هجڻ جو ڪو ثبوت بچي به ٿو يا نه.اگر ڪو ثبوت بچي ٿو ته اهو ڪهڙي صورت ۾ ملڪ اندر موجود آهي.شايد حڪومت دير آيو درست آيو واري ڳالهه ڪري رهي آهي ڇو ته لڳي اهين پيو ته حڪومت ماضي مان سبق سکي ورتو آهي.اهي به کڻي چئي سگهجي ٿو ته بوتل نئي آهي جنهن اندر شراب پراڻي اچي وئي آئي.

عجيب صورتحال آهي ته حڪومت سابق صدر پرويز مشرف جي حوالي سان جيڪو به فيصلو ڪندي آهي.انهي سان ظاهري آهي ته حڪومت جي ساک تي ته ضرور اثر ڪرندو يا نه.؟انهي حوالي سان مان سمجهان ٿو ته حڪومت وٽ هن وقت مشرف جي مهلت جي حوالي جي سوال جو ڪو به جواب موجود ناهي.ڇو ته لڳي اهين پيو ته جيڪڏهن حڪومت پرويز مشرف کي ٻاهر وڃڻ جي اجازت نه ڏي هان ته پوءِ به پريشان ٿي ها ۽ هاڻ جيڪڏهن مشرف کي اجازت ملي چڪي آهي انهي صورت ۾ به حڪومت کي تمام گهڻيون پريشانيون ٿي رهيون آهن.برحال هن وقت پرويز مشرف ملڪ کان ٻاهر هليو ويو آهي. ۽ سندس وڪيل اهو بيان ڏئي رهيو آهي ته چار يا ڇهه هفتن اندر پرويز مشرف پنهنجي طعبيت ڏيکاري پوءِ واپس موٽي ايندو.جڏهن ته گهڻي ڀاڱي راءِ اها هلي رهي آهي ته هاڻ پرويز مشرف واپس نه ايندو.!ڇو ته مان به سمجهان ٿو ته پرويز مشرف سان تمام گهڻي تادي ٿي چڪي آهي.ان ڪري پهرين شايد کيس اهو وهم هو ته هو عوامي سطح تي تمام گهڻو مقبول آهي.پر هاڻ اهو به بلڪل ختم ٿي چڪو آهي پوءِ آخر پرويز مشرف واپس ڇو ته ايندو.۽ اها به سوچڻ جهڙي ڳالهه آهي ته آخر واپس اچي ڪندو به ڇا.؟ڇا هن جي ڪا پارٽي مظبوط آهي يا سندس پارٽي اقتدار ۾ آهي جو هو واپس ايندو.پاڪستان اندر ته پورو نظام ئي بگڙيو پيو آهي.جيڪي اقتدار ڌڻي آهن اهي به پاڪستان قانون جي گرفت کان بچڻ لاءِ ڪيترن ئي سالن کان ٻاهر رهيا پيا آهن جيڪي واپس اچڻ جو نالو به نه پيا وٺن.اتي پرويز مشرف پاڪستان لاءِ ايندو.ڇا هو واپس اچي پنهنجي پير تي پاڻ ڪهاڙو هڻندو ڇا.جڏهن ته کيس اها به پڪ ٿي چڪي آهي ته سندس هاڻ ڪو به ساٿ نه ڏيندو.جيڪي هن وقت سندس ساٿي هئا اهي مان سمجهان ٿو ته ڪٽي کائڻ وارا مجنا هئا. جن وري ڪڏهن به سندس حال چال جي خبر نه ورتي ان ڪري جيڪي خواب مشرف ڏٺا هئا مان سمجهان ٿو ته مشرف انهن مان ٻاهر نڪري آيو هوندو.۽ هن جيڪا پاڪستان اچي ڪري پهرين غلطي ڪئي هئي مان سمجهان ٿو ته هو وري ٻيهر اهڙي ڪا به غلطي نه ڪندو.

پر جيڪڏهن ڪنهن ماڻهو کي اڃان تر جيترو به يقين آهي ته مشرف واپس وري پاڪستان ايندو ته اهي هن ڳالهه کي ياد رکن ڇو ته هنن کي ياد هوندو سابق سفير حسين حقاني جيڪو ڪيترائي يقين ڏياري ڪري ملڪ کان ٻاهر ويو هو ته هو واپس موٽي ايندو.پر هو اڄ تائين پاڪستان موٽي نه آيو آهي.جڏهن ته اهو صرف پاڪستان واپس نه آيو آهي پر انهي سان گڏ پاڪستان ۾ هلندڙ سندس ميمو گيٽ جو به همِشيه لاءِ پاڪستان جي مٽي ۾ دفن ٿي ويو آهي.هاڻ پرويز مشرف به ملڪ کان ٻاهر هليو ويو آهي.ان ڪري هاڻ اهو به يقين ڪرڻ گهرجي ته مشرف کان ڪيس به پراڻا پنا بڻجي ڪري هيمشه هميشه لاءِ دفن ٿي ويندا.۽ آهستي آهستي سندس داستان به بند ٿي ويندو.!جڏهن ته ملڪ جي وڏي انگ ۾ سياسي توڙي تجزيه نگارن جي اها راءِ موجود آهي ته لڳل ڌرڻن جي پويان به پرويز مشرف جو وڏو هٿ هو.جڏهن ته حڪومت پرويز مشرف خلاف غداري جو ڪيس داخل ڪرڻ جي پڻ پڪو فيصلو ڪري ڇڏيو هو.جڏهن ته اها به ڳالهه عام هئي ته ان وقت به حڪومت ۾ اهڙا ٻه ڌڙا پيدا ٿي ڇڪا هئا جنهن مان هڪ دڙي چاهيو پئي ته پرويز مشرف تي ڪيس ٿي ۽ هڪڙي دڙي  چاهيو ته پرويز مشرف تي ڪيس  نه ٿي.۽ وزير داخلا چوڌري نثار به انهي دڙي ۾ شامل هو جنهن چاهيو پئي ته پرويز مشرف تي ڪيس نه  ٿي.

برحال هن وقت پرويز مشرف ٻاهر هليو ويو آهي ۽ ملڪ مان ٻاهر ڪڍڻ ۾ ڪنهن جو ڪرادار آهي انهي ڳالهه ۾ حڪومت جي ڪهڙي وجهه آهي اها انهن کي ئي خبر آهي پر هاڻ مشرف جي ٻاهر وڃڻ سان حڪومت کي ضرور تنقيد جو نشانو بنجڻو پوندو.جڏهن ته اهي ڳالهيون پڻ عام هلي رهيون آهن ته حڪومت جيڪا پرويز مشرف کي ملڪ کان ٻاهر وڃڻ جي اجازت ڏئي ڇڏي آهي.اها سڀ ڪجهه هڪ ڊيل تي تحت ٿيو آهي.حڪومت ڌرڻن کان پوءِ اسٽبلشمنٽ کان بچڻ پئي چاهيو.تنهن جي ڪري شايد حڪومت بچائڻ لاءِ حڪومت پرويز مشرف کي ٻاهر موڪلي کاري گوري مجبوري مان کاڌي آهي.هن وقت بلاول ڀٽو هڪ سوال ڪري رهيو آهي ته چوڌري نثار کيس جواب ڏئي ته پرويز مشرف ٻاهر ڇو ويو آهي.جڏهن ته چوڌري نثار به کيس جواب ڏيڻ جو ڪوشش ڪري رهيو آهي.۽ اها ڳالهه پنهنجي جڳهه تي بلڪل به درست آهي ته اسانجي حڪمرانن اندر اها ڪا نئي ڳالهه ناهي جنهن جي ڪري حڪمرانن حڪومت بجاءِ لاءِ اسٽيبلشمنٽ جي ڳالهه مڃي هجي.خد پ پ جي پنهنجي دور اندر اسٽيبلشمنٽ سان سهڪار ۾ رهي آهي.جڏهن ته نه صرف مسلم ليگ ن يا پ پ پر انهي صف ۾ جي يو آءِ جماعت اسلامي به شامل آهن.برحال پرويز مشرف جي ٻاهر وڃڻ کان پوءِ الله جو اهو ته شڪر ادا ڪرڻ گهرجي ته سمورين جماعتن اندر ڳالهيون ٿي چڪيون آهن جنهن جي ڪري ملڪ اندر ڪو وڏو هلءٌ هنگامو ناهي ٿيو.جڏهن ته ملڪ هڪ دفعو ڪنهن وڏي بحران کان بچي ويو آهي.ڇو ته اهڙن معاملن اندر جنهن ۾ حڪومت جي فيصلي تي عوام ناراض ته پوءِ ملڪ جي تمام گهڻو نقصان کڻڻو پوندو آهي.۽ حڪومت جو عوام تان ڌيان پڻ هٽي ويندو آهي ۽ هو پنهنجي حڪومت بچائڻ ۾ لڳي ويندي آهي.هڪ وقت اسانجي ملڪ اندر پرويز مشرف جي صورت ۾ هڪ نئون ايشو آهي.جڏهن ته انهي کي ايشوز بڻائڻ هرگز حڪومت کي مفاد ۾ نه هوندو.ان ڪري توري سياسي تنقين به برداشت ڪرڻ مان سمجان ٿو ته ايتري برداشت ته حڪومت ۾ به هجڻ گهرجي.جڏهن ته حڪومت جي اڳوڻي صدر کي ملڪ مان ٻاهر ڪري جي ايتري ته جلدي هئي جو سندس نالو اي سي اي جو نوٽيفيڪشن مان ڪڍڻ دوران پاڪستان لفظ جي اسپيلنگ به غلط لکجي وئي هئي. ايڏي تڪڙ ڇو ۽ ڇا جي ڪري اها به ڳالهه سمجهه ۾ نه پئي اچي.پر مونکي اهو ضررو يقين آهي ته پرويز مشرف ٻاهر ويندي ئي صحتياب ٿي ٿيندو.۽ اهين محسوس ٿيندو ته ڄڻ کيس ڪا به بيماري نه هئي.جڏهن ته اها ڳالهه ڳالهه ناهي انهي جو ثبوت به ملڪ جي مختلف ٽي وي چيئلن وضاحيت سان بيان ڪيو ته اڳوڻي صدر پرويز مشرف دبئي پهچندي آل پاڪستان مسلم ليگ پارٽي جو اهم اجلاس گهرائي ورتو آهي. ۽ پارٽي جون نئي سر تياريون شروع ڪري ڇڏيون آهن.جڏهن ته آل پاڪستان مسلم ليگ يو اي ئي جو اجلاس به ڪالهه شام جو ڪوٺايو ويو ويو.جيڪو پرويز مشرف جي گهر منقد ڪيو ويو هو.پر ڪري مان سمجهان ٿو ته مشرف جي ڪيس تي هاڻي ڪو بحث ڪري اجايو هوندو.مشرف نئي سر پارٽي ٺاهڻ لاءِ اجلاس ته جوڙي رهيو آهي ته پر کيس اهو ياد آهي ته هو پاڪستان واپس ايندو به سهي.يا کڻي اهو چئجي ته مشرف پنهنجي نئي سر جوڙيل پارٽي جو تير ٻين جي ڪلهي جي کڻي هلائي ته پوءِ اها ڳالهه ضرور مڃڻ جهڙي هوندي نه ته مشرف جي ڪهاڻي مان اهو ئي لڳي پيو ته بوتل اها ئي پراڻي آهي خالي اندر شراب نئي لڳائي پئي وڃي.

 

 

 

پرويز مشرف آزاد ٿي پرڏيهه روانو

نيٺ وفاقي حڪومت غداري ڪيس جي جوابدار اڳوڻي صدر پرويز مشرف کي پرڏيهه وڃڻ جي اجازت ڏئي ڇڏي . حڪومت جي فيصلي بعد گهرو وزارت اڳوڻي صدر جو نالو ايگزٽ ڪنٽرول لسٽ مان خارج ڪري ڇڏيو آهي ۽ ان ڏس ۾ نوٽيفڪيشن پڻ جاري ڪيو ويو آهي ۽ سمورن هوائي اڏن تي اهڙو نوٽيفڪيشن پڻ پهچايو ويو ، سندس وڪيل کي به نوٽيفڪيشن ملي ويو، پريس ڪانفرنس ڪندي وفاقي گھرو وزير چوڌري نثار چيو ته حڪومت عدالتي فيصلي تحت اڳوڻي صدر کي ٻاهر وڃڻ جي اجازت جو فيصلو ڪيو، مشرف سان وزير اعظم نواز شريف جي ڪا ذاتي دشمني ناهي. کيس معاف ڪري ڇڏيو آهي. عدالت جو فيصلو حڪومت سميت سڀني کي قبول ڪرڻو پوندو. وفاقي گھرو وزير موجب پرويز مشرف جي پارٽي اڳواڻن واعدو ڪيو آهي ته هو پرڏيهه مان علاج ڪرائي واپس ايندو ۽ اچي ڪيسن کي منهن ڏيڻ لاءِ پاڻ کي عدالتن آڏو پيش ڪندو. ان ڪري حڪومت فيصلو ڪيو آهي ته سپريم ڪورٽ جي فيصلي جي روشني ۾ پرويز مشرف کي علاج لاءِ ٻاهر وڃڻ جي اجازت ڏني وڃي. پرويز مشرف جي پرڏيهه وڃڻ باوجود سندس خلاف ڪيس ختم نه ٿيندا. مشرف ايمرجنسي لڳائي عدالتن تي حملو ڪيو. گهرو وزير پنهنجي پاران ۽ وزير اعظم طرفان يقين ڏياريو ته پرويز مشرف جي معاملي تي ڪا به بيڪ ڊور ڊپلوميسي ناهي ٿي، نه ئي اسان تي ڪو دٻاءُ وڌو ويو آهي. اسان اي سي ايل جي پاليسي تبديل ڪري ان کي جوابده بڻائي ڇڏيو آهي. اڳي به چئي چڪو آهيان ته ماضي ۾ زال مڙس جي جھيڙي تي به نالا اي سي ايل ۾ شامل ٿيندا هئا پر هاڻي ائين ناهي.

حڪومت 9 هزار ماڻهن جا نالا اي سي ايل مان خارج ڪيا ۽ پنجاهه هزار ماڻهن جا نالا بليڪ لسٽ مان ڪڍيا. پاڪستان ۽ جمهوريت کي آزاد عدليا مان وڏو فائدو آهي. پر ڪجھه پارٽي جا اڳواڻ چينلن تي هلندڙ پٽين جي سياست ڪري رهيا آهن ۽ ٽي وي تي ٽِڪر ڏسي بيان ڏين ٿا ته مشرف کي ڇڏيو ويو ته هيئن ٿي ويندو، هونءَ ٿي ويندو. انهن کي چوان ٿو انهن پنهنجي پنج سالن جي حڪومت ۾ ڇا ڪيو. انهن مشرف کي گارڊ آف آنر پيش ڪري پرڏيهه وڃڻ ڏنو.  مشرف کي محفوظ رستو ڏيندڙ هاڻي ڳالهيون ڪري رهيا آهن. مشرف تي بينظير جي قتل جو الزام گذريل حڪومت ۾ به هو، اسان کي مشرف کي ڇڏڻو هجي ها ته اڳ ئي ڇڏي ڏيون ها. مشرف کي گذريل حڪومت ڇوٽ ڏني ۽ مٿس ڪو ڪيس نه ڪيو. جيڪڏهن اسان جو ناني ويڙهو هجي ها ته مشرف خلاف عدالت ۾ ڇو وڃون ها؟ هڪ خاص پارٽي حڪومت جي هر ڪم کي ناڪاري رنگ ڏيڻ جو ٺيڪو کڻي ڇڏيو آهي. عدالت جي فيصلي کي ان جي اصل روح کان هٽي ڪري پيش ڪيو پيو وڃي. ڪنهن فيصلي کي وڌائي پيش ڪيو وڃي ٿو. ميڊيا اهو رواج بڻايو آهي ته سٺي خبر، خبر ناهي، بري خبر ئي خبر بڻجي وڃي ٿي. اطلاعات کاتي جي صوبائي صلاحڪار مولابخش چانڊيي پ پ ميڊيا سيل تي پريس ڪانفرنس ڪندي چيو آهي ته سپريم ڪورٽ پرويز مشرف جي حوالي سان (ن) ليگ کي وائکو  ڪري ڇڏيو آهي، عدالتي ريمارڪس سان اها ڳالهه ثابت ٿي وئي آهي ته (ن) ليگ ۽ پرويز مشرف وچ ۾ هڪ نئون اين آر او طئي ٿي چڪو آهي، (ن) ليگ جي حڪومت آئين ٽوڙيندڙ پرويز مشرف کي ملڪ مان ٻاهر وڃڻ کان روڪڻ ۾ ناڪامي جو عملي مظاهرو ڪري چڪي آهي جيڪو ملڪ ۾ جمهوري عمل کي ڪمزور ڪرڻ جي برابر آهي. (ن) ليگ ملڪ مان جلاوطني وقت پرويز مشرف سان ڪيل معاهدي ۽ معافي نامي جي حوالي سان به قوم سان ڪوڙ ڳالهايو هو پر سچ سڀني جي سامهون اچي ويو، اهڙي طرح نئين اين آر او جي حقيقت به ڪنهن کان لڪل نه رهندي. پرويز مشرف جي ملڪ مان روانگي هڪ طئي ٿيل پروگرام تحت آهي. جڏهن ڳالهه سياستدانن ۽ سرڪاري آفيسرن جي ٿيندي آهي ته (ن) ليگ جي حڪومت کي آئين، قانون ۽ ادارن جي بالادستي ياد اچي ويندي آهي پر جڏهن آرٽيڪل 6 تحت غداري جي ڪيس ۾ اڳوڻي جنرل جي ڳالهه اچي ٿي ته ناني ويڙهو ٺاهيو پيو وڃي، ماضي جو سڀ کان طاقتور چيف جسٽس به پرويز مشرف کي عدالت ۾ روبرو پيش نه ڪرائي سگهيو جنهن مان صاف ظاهر آهي ته ڪجهه طاقتون آئين جي آرٽيڪل 6 کان به وڌيڪ طاقتور آهن.