تازيون خبرون

Daily Archives: March 18, 2016

اٿيا شيٺي ارجن ڪپور سان لاڳاپن وارا افواهه رد ڪري ڇڏيا

ممبئي (شوبز نيوز) بالي ووڊ ۾ رڳو هڪ فلم ذريعي انٽري ڏئي پاڻ ڏانهن ڌيان ڇڪائيندڙ اٿيا شيٺي به ڊيٽون لڳائڻ وارن افواهن  جي ور چڙهي وئي آهي پر سندس چوڻ آهي ته ان قسم جا افواهه کيس پريشان نه ٿا ڪري سگهن، هيرو فلم جي هيروئن 23 ورهين جي اٿيا شيٺي لاءِ ڀارتي ميڊيا ۾ اهي خبرون هلي رهيون آهن ته اداڪار ارجن ڪپور سان سندس لاڳاپا جڙي ويا آهن ۽ کين ممبئي ۾ تازو ئي هڪ پارٽي ۾ گڏ ڏٺو ويو، ان حوالي سان ڀارتي خابرو ادارن سان ڳالهائيندي اٿيا چيو ته جيستائين منهنجي ڳالهه آهي ته مان اهڙن لاڳاپن بابت افواهن کي سنجيده ناهيان وٺندي، منهنجي ڪٽنب ۽ ويجهو رهندڙن کي سچ جي خبر آهي، تنهن ڪري مان انهن افواهن تي ڌيان ئي ناهيان ڏيندي، سندس چوڻ هو ته منهنجو بابا سنيل شيٺي وڏو عرصو فلم انڊسٽري ۾ رهيو آهي ۽ کيس خبر آهي ته جڏهن ڪو ماڻهو مشهور ٿي ويندو آهي ته ان لاءِ اهڙيون ڳالهيون شروع ٿي وينديون آهن، اٿيا چيو ته اسان اهڙن  افواهن کي ڪابه اهميت ناهيون ڏيندا ۽ اهي افواهه اسان جي رات جي ماني واري ميز تي بحث جو موضوع ناهن بڻجندا.001

 

 ڪوشش هئي ته ڪنهن پاڪستاني فلم يا ڊرامي ۾ ڪردار ملي پر ڪنهن به رابطو نه ڪيو: رضا مراد

لاهور (شوبز نيوز) ڀارتي اداڪارا رضا مراد چيو آهي ته پاڪستان ۾ رهڻ دوران هن ڪوشش ڪئي ته کيس ڪنهن فلم يا ڊرامي ۾ ڪردار ملي وڃي پر ڪنهن به ساڻس رابطو نه ڪيو، پاڪستاني دورو پورو ڪري ڏيهه واپسي دوران واهگا بارڊر تي ميڊيا سان ڳالهائيندي رضا مراد چيو ته سندس خواهش هئي ته هو پاڪستاني فلمن يا ڊرامن ۾ ڪم ڪري، جنهن لاءِ هن ڪراچي ۽ لاهور ۾ ڪوششون به ڪيون پر ساڻس ڪنهن رابطو ئي نه ڪيو، پاڪستان ۾ مليل پيار بابت سندس چوڻ هو ته ڪراچي ۽ لاهور ۾ رهڻ دوران گهرڀاتين ايتري ته شاپنگ ڪئي جو کيسا ئي خالي ٿي ويا، هو زال کي شاپنگ ڪرائيندي رت جا ڳوڙها ڳاڙيندو رهيو پر پاڪستان ۾ کيس سڀني ايترو پيار ڏنو جو سندس دل ڀرجي وئي، رضا مراد چيو ته هو پنهنجي ڪٽنب سان گڏ آيو هو ۽ پاڪستان مان واپس ويندي تمام گهڻيون محبتون ميڙي وڃي رهيو آهي. ان موقعي تي رضا مراد جي گهرواري جو چوڻ هو ته هوءَ پاڪستان مان تمام گهڻيون سٺيون يادون کڻي وڃي رهي آهي،پاڪستان ۾ ايتري محبت ملي جو دل روئڻ لاءِ چوي ٿي، هوءَ ان ڪري واپس وڃي رهي آهي ته جيئن ٻيهر پاڪستان اچي سگهي.001

 

پاڪ- ڀارت ٽي-20 ميچ (سڀاڻي) ايڊن گارڊن اسٽيڊيم ۾ کيڏي ويندي،ِ سڀئي تياريون مڪمل

لاهور(اسپورٽس نيوز) پاڪ ڀارت ٽي-20 ڊي اينڊ نائيٽ ميچ (سڀاڻي) 19 مارچ تي ايڊن گارڊن اسٽيڊيم ۾ پاڪستاني وقت مطابق شام جو 7 وڳي ٿيندي جنهن لاءِ سڀئي تياريون مڪمل ڪيون ويون آهن. ٻنهي ٽيمن وچ ۾ ميچ اڳ ۾ ڌرم شاله ۾ رٿيل هئي پر پاڪستان ڪرڪيٽ بورڊ جي درخواست تي سيڪيورٽي سببن جي ڪري ان جو ماڳ تبديل ڪري ڪولڪته اسٽيڊيم ۾ ڪيو ويو آهي. پاڪستاني ٽيم سپر ٽين مرحلي ۾ گروپ 2 ۾ بنگلاديش جي ٽيم کي 55 رنسن تان شڪست ڏئي 2 پوائنٽون حاصل ڪيون جڏهن ته ڀارت جي ٽيم جيڪا گروپ 2 ۾ پاڪستان سان شامل آهي کي پنهنجي پهرين ميچ ۾ نيوزي لينڊ خلاف 47 رنسن تان شڪست کي منهن ڏيڻو هو ۽ ان جي ڪا پوائنٽ ناهي. بنگلاديش خلاف ميچ کٽڻ سبب قومي ٽيم جا حوصلا بلند آهن پر ڀارت جي ٽيم ايشيا ڪپ ۾ پاڪستاني ٽيم کي شڪست ڏني هئي. پاڪستان جي بالنگ بهترين آهي جڏهن ته ڀارت کي بيٽنگ ۾ سرسي حاصل آهي.ا

 

سنڌ سرڪار جي بي ڌياني جو شڪار ترقياتي رٿائون: اصغر ملاح

پيرن فقيرن اوليائن جي سڏجندڙ سنڌ ڌرتي جنهن جي ننڍن وڏن شهرن ڳوٺن ۾ الله پاڪ جي ولين، برزگن جا روضا موجود آهن جيڪي انسان ذات جي ڀلائي خدمت جو سبق ڏيندا رهيا آهن سنڌ پنهنجن سان پيار ڪندڙن جو ديس آهي سنڌ جي تاريخ ٻڌائي ٿي ته ماضي ۾ سنڌ اهو خطو رهيو آهي. جتي الله پاڪ جي ولين صوفين امن محبت انسان دوستي جي پيغام ملندو رهيو آهي سنڌ جا ماڻهو هميشه ڪنهن فرق جي هڪ ٻئي جي ڏک سک ۾ شامل رهيا آهن ننڍن وڏن شهرن ڳوٺن جي سياسي سماجي شعور رکندڙسڌريل ماڻهن عام ماڻهن جي سدائين رهنمائي ڪري پنهنجي مسئلن جي نشاندهي ڪري حقن جي حاصلات لاءِ جدو جهد هلائي جاکوڙي پنهنجا حق حاصل ڪيا آهن جدوجهد تيز طرح هلائڻ سان عوام جا جائز مسئلا حل به ٿيا آهن پنهنجي ملڪ جي شهرين کي روزگار، تحفظ، امن ۽ بنيادي سهولتون ڏيڻ حڪمرانن جي ذميواري آهي، اهو هر شهريءَ جو حق آهي ته هن کي روزگار، تعليم ۽ صحت جون سهولتون ڏنيون وڃن پر جڏهن اُهي سهولتون هڪ خواب بڻجي وڃن، هڪ اهڙو خواب، جيڪو آسمان جي ستارن کي به پري نظر ايندو هجي، آسمان جي ستارن تائين پهچڻ شايد ممڪن هجي پر روزگار حاصل ڪرڻ شايد اُن کان به ڏکيو ٿي پوي ته اُن وقت ماڻهن جي قوت برداشت جواب ڏئي وڃي ٿي، اُهي حڪمران طبقن مان ايترا ته دلبرداشته ٿي وڃن ٿا جو پاڻ ساڙڻ جهڙو انتهائي قدم کڻن ٿا سنڌ جو عوام ڪيترنئي مسئلن ۾ گهيريل آهي سنڌ ۾ ڪو هڪ مسئلو نه آهي بلڪي سڄي سنڌ مسئلن جي ور چڙهيل آهي پنهنجا نواز پاليسي سبب بي پهچ نوجوان غريب نياڻين کي سرڪاري نوڪريون ملڻ هڪ خواب بڻجي ويو آهي.

سنڌ جا لکين بيروزگار ۽ ڪروڙين غربت سٽيل ماڻهو اميد ڪن ٿا وقت جي حڪمرانن مان ته حڪمران سندن مسئلي جو نوٽيس وٺندا ۽ کين بهتر تعليم، روزگار ۽ بنيادي سهولتن سميت انصاف جي فوري فراهمي لاءِ اثرائتا عملي قدم کڻندا سنڌ ۾ بيروزگاري مهانگائي ايڏو ته مسئلو ٿي ويو آهي جنهن کي ختم ڪرڻ حڪمرانن جي وس ۾ نه آهي. سنڌ ۾ بدترين غربت، بيروزگاري ۽ حڪمرانن جي بي حسي جو ثبوت آهي سڀ کان وڏو مسئلو هن جديد ۽ سائنسي دؤر ۾ هزارن سالن کان آباد سنڌي سنڌ ۾ تعليم جهڙي انمول تحفي کان محروم آهن تعليم سان ئي قومون ترقي ڏانهن وک وڌائينديون آهن ۽ ترقي يافته ملڪن سان گڏ ڪلهو ڪلهي سان ملائي بيهنديون آهن اها تعليم ئي آهي جنهن سان انسان هن سائنسي ۽ ترقي واري دور ۾ داخل ٿي چڪو آهي سنڌ جا اڪثر سياستدانن، حڪمران سنڌ جي ترقي عوام جي خوشحالي وارو دڳ وساري چڪا آهن سنڌ جي عوام کي چوندي ڏٺو ويو آهي ته. سنڌ جو ڪهڙو به ضلعو هجي سنڌ جي موجوده صورتحال جو جائزو وٺجي ٿو ته سنڌ جا ڪيترائي علائقا جديد تيز ترقي واري سائنسي دور ۾ به بنيادي سهولتن جي حوالي سان انتهائي پٺتي پيل خطو نظر اچي ٿو ۽ انهي جو بنيادي سبب سنڌ حڪومت پاران فلاحي ۽ ترقياتي اسڪيمن لاءِ مخصوص ڪيل رقم جو درست نموني سان استعمال ٿيڻ ناهي گذريل ڪيترن ئي سالن کان سنڌ ۾ هلندڙ ترقياتي اسڪيمن تي من پسند ڪامورا شاهي جي ڪرپشن ڪميشن وصولي رهي آهي.

انهن ترقياتي   رٿائن کي مڪمل ڪرڻ لاءِ ڪميشن وصولي ۽ ڪرپشن ڪلچر جو خاتمو به آندو وڃي عوام لاءِ سوال بڻيل آهي ته روڊ کاتي جي انجينئير ڪهڙو جادو ڪيو آهي سالن کان مقرر ٿيل من پسند انجينئر رجب سومرو ايس ڊي او ۽ ٽينڊر ڪلارڪ جبار شاهي ٻين آفيسن، اسپتالن رود رستن جي اسڪيمن ۽ مرمت نئن سر تعمير جا ٺيڪا قانوني گهرجون پوري ڪرڻ بنا ايڊوانس ڪميشن وصولي ڪري من پسند ٺيڪيدارن کي ٺيڪا ڏيڻ پروفيشنل ٺيڪيدارن کي نظر انداز ڪري ٿو پروفيشنل ٺيڪيدارن جو چوڻ آهي ته درخواستون گذريل ڪيترنئي سالن کان جمع ڪرائي ٿڪجي پيا آهيون ساڻس قانون جي مطابق ٽينڊر کولڻ جي لاءِ چئون ٿا ته اسان کي ڌمڪيون ڏنيون وڃن ٿيون من پسند ڪاموري تي سالن کان اسڪيمن ۾ ناقص مٽيريل جي استعمال ڪرڻ جا الزام عوامي احتجاجن ۾ لڳندا رهيا آهن وڏن شهرن ڳوٺن ۾ ٿيندڙ ترقياتي ڪم ڪرپشن جي ڄار ۾ ڦاٿل آهن اهو ئي سبب آهي اڳيان روڊ ٺهندا وڃن ٿا پوئتي روڊ ڊهندا وڃن ٿا ٽٽل ۽ کڏا پيل روڊن جي ڪوڙي مرمت ڄاڻائي سرڪار فنڊ هڙپ ڪندا رهيا آهن اهڙا ڪيترائي مثال موجود آهن ننڍن وڏن ڳوٺن کي ڳنڍيندڙ روڊ رستن جي حالت رحم جوڳي ٿي وئي آهي جيڪي گاڏين جي هلڻ جي لائق نه رهيا آهن ٽوڙ ڦوڙ جو شڪار ٿي ويل روڊ رستن تي سون جي تعداد ۾ گاڏين جي اچ وڃ سبب سفر ڪندڙ مسافرن جون زندگيون هر وقت خطري ۾ رهن ٿيون ٻي طرف عوام آمد رفت جي سهولت کان محروم ۽ پريشان آهي جڏهن ته روڊ حادثن ۾ پڻ اضافو ٿي نظر اچي رهيو آهي من پسند ڪامورن روڊ رستن جي ترقياتي ڪمن ۾ ناقص مٽيريل جي استعمال جي ٺيڪيدارن کي اجازت ڏئي بنا ڊپ ڊاءِ جي 10 سالن کان ڪميشنون وصول ڪري سنڌ سرڪار جا مبينا ڪروڙن جا فنڊ غرق ٿي ويا آهن ڪنهن به چونڊيل نمائندي سار نه لڌي سياسي اڳواڻن انڪوائري بدارن پنهنجو حصو پتي وٺي ترقياتي ڪمن کي رولڙي هيٺ آڻي ڇڏيو ڪميشن وصولي سبب عوام سخت مايوسي جو شڪار آهي عوام احتجاج ڪري سپريم ڪورٽ کي اپيل ڪئي آهي ته گذريل سالن ۾ ٿيل ترقياتي ڪمن جي آعلي! سطحي جانچ ڪرائي ڪرپشن جي مختلف ڪيسن ۾ ملوث من پسند انجينئر رجب سومرو ۽ ٻين خلاف قانوني ڪاروائي ڪري هڙپ ٿيل رقم واپس ڪررائي انصاف جا مثال ڪيا وڃن پر لاتعداد احتجاجن باوجود من ڪامورو پنهنجي سيٽ تي مضبوط نظر اچي رهيو آهي.

ٺڪيدارن دادو ۽ حيدرآباد پريس ڪلب اڳيان احتجاج ڪري دانهيو سنڌ جي وڏي وزير پاران دادو ضلعي ۾ ترقياتي رٿائن لاءَ 40 ڪروڙ روپيا جاري ڪرڻ کانپوءَ روڊس کاتي دادو جي ڊسٽرڪٽ روڊس انجنئير رجب علي سومرو ٽينڊر ڪلارڪ جبار شاهي پاران ٽنڊر جاري ڪرڻ ٽينڊر کولڻ کانپوءِ هاءَ ڪورٽ ۾ پٽيشن تان هٿ کڻندڙ ٺڪيدارن کان ايگريمنٽ تحت 15 سيڪڙو ڪميشن بداران 35 سيڪڙو ايڊوانس ڪميشن ڏيڻ کانپوءَ کين ٺيڪا ڏيڻ لاءَ چيو آهي ٺيڪيدار. الزام هنيو آهي ته جيڪي ضلعي ۾ تعمر ٿيل روڊ رستن اسڪيمون ٻيهر رقم ڦٻائڻ لاءِ انهن روڊ رستن جون اسڪيمون ڏنيون ويون آهن روڊ کاتي ۾ مقرر ٿيل من پسند ڪامورن ايس ڊو او سب انجنيئرن جي سالن کان هڪ هٽي قائم ٿيل آهي من پسند ڪامورن پيئسا ڪمائڻ خاطر سرڪاري ادارن کي پنهنجي جاگير سمجهي بنا ڪنهن ڊپ ڊاء جي ڪميشنون وصول ڪري رهيا آهن مقرر ٿيل من پسند ڪامورن ۽ عملي لاء ڏيڻ ڪو به قانون نه آهي سرڪار پاران روڊ رستن جي نظام کي بهتر ڪرڻ وارين ڪوششن کي نظر انداز ڪري پنهنجو ڪميشن وصولي جو ڪاروبار سالن کان زور شور سان هلائيندا رهيا آهن جيڪا عوام سان سراسر ناانصافي ته آهي پر سرڪار کي پڻ نقصان آهي سرڪار کي گهرجي ته روڊ کاتي راشي انجينئير جي قبضي هيٺ آيل کاتي تان قبضو هٽائي جن تي خاص توجهه ڏيڻ جي سخت ضرورت آهي اخباري خبرن مطابق دادو جي روڊس کاتي ۾ 40 ڪروڙ رپين جي پيڪيج ۾ وڏي پيماني تي گهوٻين دادو روڊس کاتي ۾ 9 ڪروڙ رپين جي ڪرپشن جو انڪشاف ٿيو آهي جنهن جي جاچ ڪاميٽي قائم ڪئي وئي آهي جيڪا شهرين جي شڪايتن تي اينٽي ڪرپشن جي چيئرمين ممتاز شاهه بخاري نوٽيس وٺندي ٽيڪنيڪل آفيسر ارشاد ميمڻ کي جاچ آفيسر مقرر ڪندي کيس دادو ضلعي جي روڊس کاتي جي طرفان   ڪرايل روڊ جي چڪاس ڪري کيس 15 ڏينهن جي اندر رپوٽ ڏيڻ جو حڪم ڏنو آهي ذريعن مان معلوم   ٿيو آهي ته ٽيڪنڪل آفيسر ارشاد ميمڻ روڊس کاتي دادو ۾ پهچي ترقياتي اسڪين جو جائزو وٺندو .

 

 

الزامن جي کک مان ڄمندڙ نئين ايم ڪيو ايم!: شفيق شاڪر

ايم ڪيو ايم جي مشڪلن جو جيڪو سلسلو الطاف حسين جي پاڪستاني اسٽيبلشمينٽ  جي خلاف سخت تقرير کان پوء شروع ٿيو هو انهيء ۾ مسلسل اضافو ٿي رهيو آهي ڪراچيء جي اڳوڻي ميئر ۽ ايم ڪيو ايم جي هڪ اهم اڳواڻ جي پنهن جي قيادت کان بغاوت کان ويندي روز بروز ان نئين گروپ ۾ شامل ٿيندڙ نون اڳواڻن جي شرڪت کي ڪيتريون ئي معنائون پهرايون پييون وڃن.مختلف سازشي ٿيوريز جو ذڪر ڪيو پيو وڃي.جن ماڻهن هڪ ڊگھو عرصوايم ڪيو ايم ۾ وڏن اهم عهدن تي گذاريو هجي ۽ هرصحيح توڙي غلط فيصلي ۾ پنهن جي قيادت سان گڏ رهيا هجن،اڄ اوچتو سڀني جو ضمير هيتري ڊگھي عرصي کان پوء هڪ ئي وقت ڪيئن جاڳي پيو؟ جيڪر اهي هڪ اهڙي قيادت سان گڏ هئا جيڪا را سان لاڳاپن،ملڪ دشمني،قتل ۽ خونريزي ۾ ملوث هئي ته پوء اڄوڪن منحرف اڳواڻڻ  جيڪي خود ان پوري نظام جو حصو رهيا، ڇا انهن انهن ڏوهن تي قوم کان معافي گھري؟ بلڪه هو ته چون ٿا ته ان سڄي صورتحال جو ذميدار اڪيلو الطاف حسين ئي آهي،ايستائين جو هو ايم ڪيو ايم کي به انهن ڏوهن ۾ شامل نٿا سمجھن!

اهڙو عجيب منطق سازشي ٿيوريز کي وڌيڪ مضبوط بنائڻ جو سبب بڻجي رهيو آهي.مڃيوسين ته الطاف حسين ئي انهن جي چوڻ مطابق اصل ڏوهاري آهي پر سوال اهو آهي ته ڪراچي۾ جيڪي ڪجھ ٿيندو رهيو اهو سڀ ڪجھ الطاف لنڊن مان پاڪستان اچي ته نه ڪندو هو، سندس حڪمن تي بنان چون چرا جي عمل ڪرڻ وارا،ماڻهن کي موت جي ننڊ سمهارڻ وارا، ماڻهن کان ڀتا وصول ڪرڻ وارا ۽ فيڪٽرين کي باهيون لڳائڻ وارا ڪي انسان هئا يا جن؟  جيڪر اهي انسانن مان ئي ڪي هئا ته منحرف اڳواڻ انهن جا نالا ڇو نٿا کڻن؟  پريس ڪانفرنس يا ٽاڪ شوز م جڏهن نئين گروپ جي اڳواڻن کان اهو سوال ڪيو وڃي ٿو ته انهن ڏوهارين ڪاروائين ۾ ٻيا ڪهڙا ڪهڙا ايم ڪيو ايم اڳواڻ ملوث آهن ته جواب اهو ڏنو وڃي ٿو ته “ اسان ٽوڙڻ نه پر  جوڙڻ  آيا آهيون” ٻين لفظن ۾ ايم ڪيوايم جي هر قسم جي ڏوهارين جي لاء سندن نئين پارٽيء جا دروازا کليل آهن. هيستائين جيڪا حقيقتت سمجھ ۾ اچي ٿي سااها ته اصل ۾ هي سڄو معاملو مائينس يا پوسٽ الطاف ايم ڪيو ايم جي جوڙجڪ ڪرڻ آهي. ڪمال گروپ ۽ ايم ڪيو ايم جي پاليسين،موقف ۽ سوچن ۾ آخر ڪهڙو فرق آهي؟ ايم ڪيو ايم نئين صوبي جي ڳالھ ڪري ٿي ته ساڳي ڳالھ ڪمال به ڪري رهيو آهي. ايم ڪيو ايم ڪوٽا سسٽم ختم ڪرڻ گھري ٿي ته ساڳي ڳالھ نئون گروپ به ڪري رهيو آهي.ايم ڪيو ايم جي سياست جو محور جيڪر “مهاجر“ آهي ته ڪمال جي سڄي گفتگو به ان لفظ تي مرڪوز آهي. ايم ڪيو ايم پنهن جن ڪارڪنن جي ڏوهاري سرگرمين کان انڪار ڪري ٿي ته نئون گروپ به ايم ڪيو ايم جي سمورن  ڪارڪنن کي بي ڏوهي سمجھي ٿو. هاڻي ان ۾ ڪو شڪ نه رهيو آهي ته الطاف جي صحت جي حوالي سان پيدا ٿيل سخت تشويش مختلف گروپن کي ايم ڪيو ايم جي قيادت تي قبضي جي لاء ميدان ۾ لاٿو آهي، ڪمال گروپ طرفان نئين پارٽيء جو نالو نه ڄاڻائڻ ان طرف واضح اشارو ڪري ٿو ته ڪنهن ممڪنه ”وڏي خبر” جو انتظار ڪيو پيو وڃي.اها حقيقت به هاڻي گھڻي حد تائين تصديق ٿيل آهي ته ايم ڪيو ايم اڳواڻ سخت بيمار آهي ۽ ڊاڪٽر سندس صحتيابيء جي باري ۾ ڪي سٺيون خبرون نه پيا ڏين. جيڪا حقيقت توڙي جو ماڻهن کان لڪائي پيئي وڃي پر ايم ڪيو ايم جي مٿين ليول جي قيادت کي سموري خبر آهي ، جنهن ڪري.هن وقت چار مختلف گروپ ايم ڪيو ايم جي اڳواڻي هٿ ڪرڻ لاء ڪوششون ڪري رهيا آهن .پهريون گروپ لنڊن وارن جو،.ٻيو گروپ سنڌ ۾ آئيني عهدي تي ويٺل هڪ اهم  شخصيت جو، ٽيون گروپ ڪراچي رابطا ڪميٽي وارن جو جو جڏهن ته چوٿون ڪمال گروپ آهي.پر چئني گروپن جي سوچ ۽ پاليسين ۾ ڪو بنيادي فرق ناهي  يعني لساني سياست! اهو به ممڪن آهي ته اڳتي هلي انهن گروپن مان ڪجھ گروپ هڪ ٻئي سان ملي وڃن. جيڪي دانشور اهو تجزيو ڪري رهيا آهن ته ايم ڪيو ايم ايندڙ چند ڏينهن يا مهينن ۾ بلڪل ختم ٿي ويندي يا ملڪ ۾ ڪا وڏي مثبت تبديلي اچي رهي آهي، اهي غلطيء تي آهن.انهيء جا ٻه مکيه سبب آهن. هڪڙو اهو ته حڪومت ايم ڪيو ايم ۽ الطاف حسين تي لڳل سنگين الزامن تي خاموش تماشائيء وارو ڪردار ادا ڪري ايم ڪيو ايم سان لاڳاپيل اردو ڳالهائيندڙهڪ وڏي آباديء جي انهن گمانن ۾ وڌيڪ اضافو ڪري رهي آهي ته “ماضيء جيان هن وقت به حڪومت وٽ ڪي به ٺوس ثبوت موجود ناهن ۽ اسٽيبلشمينٽ هڪ سازش تحت ايم ڪيو ايم کي ختم ڪرڻ لاء اهو سمورو ڊرامو ڪري رهي آهي.” ٻين لفظن ۾ خود حڪومت الطاف حسين جي انهيء موقف کي جيڪو هن پنهن جي چاهيندڙن ۾ ڦهلائي رکيو آهي، وڌيڪ مضبوط بنائي رهي آهي.حالانڪه حڪومت ۽ تحقيقاتي ادارن وٽ ايم ڪيو ايم قيادت جي “را”   سان لاڳاپن ۽ ٻين الزامن جي حوالي سان ڪافي مواد موجود آهي. مثال ڪجھ مهينا پهرين وفاقي حڪومت بلوچستان،فاٽا ۽ ڪراچيء جي حالتن جي حوالي سان “را” جي ملوث هئڻ جا بيان ڏنا هئا ۽ حڪومت جي چوڻ مطابق انهن اهي ثبوت لکت ۾ اقوام متحده جي به حوالي ڪيا هئا. جيڪر “را” جي حوالي سان اڄ حڪومت وٽ ڪي واضح ثبوت ئي موجود ناهن ته پوء سرتاج عزيز اقوام متحده جي حوالي ڪهڙا ڪاغذ ڪيا هئا؟ ظاهر آهي ته هيڏي وڏي بين الاقوامي اداري سامهون هيڏو وڏو معاملو صرف اخباري ڪهاڻين يا خيالي فسانن جي بنياد تي ته نه کنيو ويو هوندو!هاڻي جڏهن الطاف يا ٻي ايم ڪيو ايم قيادت تي لڳل حساس قسم جي الزامن، جن جا جيئرا جاڳندا شاهد پاڪستان ۾ موجود آهن ۽ جيڪي هڪ ڊگھي عرصي تائين ان پوري نظام جو اهم حصو رهيا آهن،انهن پاران انهن الزامن جي تصديق کي پاڪستان جو وزيرداخلا جڏهن “لفاظي” سان تعبير ڪري ٿو ته حيرت ڇونه ٿيڻ گھرجي؟ پوء ان جو مطلب آخر ڇا ورتو وڃي، اهو ته يا ته اوهان اقوام متحده يا برطانوي حڪومت کي اهڙن الزامن جا ڪي به ٺوس ثبوت ڏنا ئي ناهن يا وري اوهين ملزمن جي خلاف ڪا قانوني ڪاروائي ڪرڻ بدران صرف ڪنهن نموني ايم ڪيو ايم کي ٽوڙي ڪو پنهن جو پسنديده ڌڙو ٺاهڻ گھرو ٿا.جيڪڏهن اها سوچ آهي ته ان سان ايم ڪيو ايم کي وقتي نقصان ته پهچي سگھي ٿو پر سندن ووٽرن ۾ ايم ڪيو ايم جي لاء همدردي اڃا به وڌندي ويندي، ماضيء ۾ اهڙن تجربن جو اهو ئي نتيجو نڪتو آهي.هڪ اهم ڳالھ جيڪا متحده مان تازو منحرف بڻيل رضاهارون پنهن جي پريس ڪانفرنس ۾ ڪئي سا اها ته الطاف حسين خلاف ملڪ جي چئن اسيمبلين مان ٺهراء منظور ڪيو ويو هو ته الطاف حسين کي دهشتگرد ۽ ملڪ دشمن قرار ڏيئي حڪومت انهن الزامن جي جاچ ڪري کيس قانوني سزا ڏئي پر انهن قراردادن جي روشنيء ۾ اڄ تائين حڪومت ڪهڙي جاچ ڪئي، ڪهڙا ثبوت هٿ ڪيا ۽ قانوني ڪاروائي ڪيترو اڳتي وڌي؟ اهي الزام ڪي معمولي ته ناهن،انهن جي صحيح يا غلط هئڻ جي سنجيده جاچ ڪرڻ بدران وفاقي حڪومت انهن کي لفاظي قرار ڏيئي ڪنهن جو ڪيس مضبوط ڪري رهي آهي؟جڏهن وزيرداخلا ان سموري معاملي کي لفاظي سڏيندو هجي ته پوء ايم ڪيو ايم سان جذباتي لاڳاپو رکندڙ ماڻهو انهيء کي ايم ڪيو ايم خلاف فقط هڪڙي سازش سمجھي نه رڳو اهو ته نظرانداز ڪري ڇڏيندا پر انهيء سان گڏوگڏ ايم ڪيو ايم جي همدردي ووٽ ۾ به اضافو ٿيندو.ٻيو سبب ايم ڪيو ايم جي اڃا مضبوط رهڻ جو اهو آهي جو اردو ڳالهائيندڙن جو هڪ وڏو طبقو الطاف حسين سان سياسي کان وڌيڪ جذباتي لڳاء رکي ٿو،هنن جي نظر ۾ الطاف حسين غلط ٿي نٿو سگھي ۽ الطاف ئي هنن جي نظر ۾ سندن تحفظ ۽ حقن جي واحد ضمانت آهي.سمورن الزامن، بد امني ۽ تڪليفن باوجود هو انهيء صورتحال جو ذميدار ڪنهن به طرح الطاف حسين کي نٿا سمجھن.هنن جي نظر۾ هنن(اردو ڳالهائيندڙن) جي لاء الطاف کان سواء ٻيو ڪوبه متبادل نه آهي.

توڙي جو اهو صحيح آهي ته پارٽيء جي اهم اڳواڻن طرفان هڪئي وقت پارٽي ڇڏڻ ۽ پنهن جي سابق قيادت تي عائد ڪيل الزامن جي نتيجي ۾ هن وقت ايم ڪيو ايم يعني الطاف حسين کي سياسي طور تي تاريّخ ۾ پهريون ڀيرو وڏي ۾ وڏو ڌڪ رسيو آهي پر ايم ڪيو ايم ان ڌڪ مان ٻاهر ئي نه اچي سگھندي اهڙو ڪو امڪان في الحال نظر نٿو اچي.البته جيڪي الزام هن وقت ٽي وي اسڪرين تي ڪورس جي انداز ۾ ڳايا پيا وڃن جيڪر حڪومت سياسي ڊرامي کان هٽي ڪري انهن کي ڪنهن ٺوس حقيقت ۾ بدلائڻ ۾ ڪامياب ٿي وڃي ته پوء شايد گھڻو ڪجھ بدلجي سگھي ٿو. ڪجھ دانشور بار بار ڪراچيء جي هاڻوڪي امن جو حوالو ڏيئي اهو ثابت ڪرڻ جي ڪوشش ڪن ٿا ته ايم ڪيو ايم ختم يا گھڻو ڪمزور ٿي ويئي آهي جو انهن جي سڏتي نه ته ڪا هڙتال ٿئي ٿي ۽ نه ئي ايم ڪيو ايم جي هاڻي اها دهشت ماحول ۾ باقي رهي آهي.جزوي طور تي اها ڳالھ صحيح آهي پراها صورتحال  اڃا مستقل  ۽ پائيدارناهي.دنيا ۾ هرهنڌ ڪنهن آپريشن دوران وقتي خاموشي ڇانئجي ويندي آهي،ڪارڪن زيرزمين هليا ويندا آهن ۽ جيئن ئي آپريشن ختم ٿيندا آهن ته حالتون پنهن جي اصل صورت ڏانهن موٽڻ شروع ٿي وينديون آهن. ڇا ايم ڪيو ايم خلاف ماضيء م ڪيل سخت آپريشنز کان پوء ايم ڪيو ايم ڪمزور يا ختم ٿي ويئي يا وڌيڪ مضبوط ٿي ويئي؟انهي سوال جي جواب ۾ئي ايندڙ وقت جو منظر لڪيل آهي!

*****

 

پوليو ٽيمن تي حملا

ڳڙهي ياسين ۾ جوابدارن پوليو ٽيمن تي حملا  ڪري هيلٿ ورڪرز کي گوليون هڻي زخمي ڪري ڇڏي ۽ وري ٻن ورڪرن تي ڪتا بڇيا ويا، ڳوٺ ڪوريجا لاڙي ۾ پوليو جي ٽيم ٻارڙن کي ڦڙا پيارڻ لاءِ پهتي تي جوابدارن حملو ڪري فائرنگ ڪري ڏني. گوليون لڳڻ جي نتيجي ۾ ليڊي هيلٿ ورڪر افشان مهر ۽ سندس ڀاءُ ظهير مهر زخمي ٿي پيا آهن. مقامي ماڻهن زخمي ليڊي هيلٿ ورڪرز افشان مهر کي اسپتال پهچايو، جتي سندس حالت ڳڻتي جوڳي هئڻ جي ڪري کيس لاڙڪاڻي منتقل ڪيو ويو.

ٻئي پاسي ڳوٺ گهر پنهنجا ۾ جوابدارن ليڊي هيلٿ ورڪر زينت ۽ سرتاج تي ڪتا بڇي کانئن موبائيل فون ۽ ٻيو سامان ڦر ڪري ورتو. رپورٽن موجب پوليو ٽيم تي فائرنگ ڪئي وئي. جنهن ۾ 3 هيلٿ ورڪر زخمي ٿي پيون. جن مان هڪ جي حالت ڳڻتي جوڳي آهي.

چانڊڪا ميڊيڪل اسپتال ۾ زخمي ليڊي هيلٿ ورڪر سان گڏ پوليو ڦڙا پياريندڙ ليڊي هيلٿ ورڪر سندس سؤٽ امبرين جو چوڻ آهي ته ڳوٺ ڪوريجا ۾ اسين پوليو جا ڦڙا پيارڻ لاءِ پهتاسين ته اتي ٻن موٽر سائيڪلن تي سوار 4 نامعلوم هٿياربندن اسان مٿان پسٽل سان فائرنگ ڪري ڏني جنهن جي نتيجي ۾ مون سان گڏ پوليو جا ڦڙا پياريندڙ افشان مهر گولي لڳڻ سبب زخمي ٿي پئي.واقعي کان پوءِ علائقي جي پوليس پهچي اسان کي ايمبولنس ذريعي لاڙڪاڻي جي چانڊڪا اسپتال پهچايو. اسان جي ڪنهن سان به دشمني ناهي. اسان کي تحفظ ڏيڻ لاءِ ڪي به سيڪيورٽي جا انتظام نه ڪيا ويا آهن پر ان جي باوجود به اسين جان خطري ۾ وجهي پوليو مهم ۾ حصو وٺي رهيون آهيون.

زخمي ليڊي هيلٿ ورڪر جي مڙس مهتاب مهر موجب ته منهنجي گهر واري افشان پنهنجي ڀاءُ ظهير سان گڏجي پوليو جا ڦڙا پياري واپس گهر ڏانهن اچي رهي هئي ته چار موٽرسائيڪل سوار جوابدارن سندن رستو روڪي منهن ماري ڪئي جنهن بعد جوابدارن سندن مٿان فائرنگ ڪري ڏني جنهن جي نتيجي ۾ ليڊي هيلٿ ورڪر افشان مهر سخت زخمي ٿي پئي جڏهن ته سندس ڀاءُ ظهير مهر پڻ زخمي ٿي پيو آهي. اسان جي ڪنهن سان ڪا به دشمني نه آهي، هٿياربند جوابدارن فائرنگ ڪري ظلم ڪيو آهي.

ميڊيا رپورٽن موجب ڊي ايس پي علي بخش ڍڪڻ جو چوڻ آهي ته پوليو ٽيم  تي حملي جي ذميوارن خلاف ڪارروائي ڪئي ويندي. پوليو خلاف جنگ ۾ حصو وٺندڙ پوليو ٽيمن جي سيڪيورٽي حڪومت جي ذميواري هجي ٿي پر الائي ڇو حڪومت منهن موڙي ويٺل آهي، اهڙن واقعن بعد کوکليون دعوائون ڪندڙ حڪمرانن کي اکيون کولڻ گهرجن.