تازيون خبرون

Daily Archives: March 17, 2016

پشاور ۾ سرڪاري ملازمن جي بس ۾ ڌماڪو، 15ڄڻا مارجي ويا، 40 کان وڌيڪ زخمي

پشاور(م.ڊ) پشاور ۾ سرڪاري ملازمن جي بس ۾ ڌماڪي جي نتيجي ۾ 15ڄًڻا مارجي ويا ۽ عورتن توڙي ٻارڙن سوڌو 40 کان وڌيڪ زخمي ٿي پيا آهن، ميڊيا ۽ ريسڪيو ذريعن مطابق ڪي پي ڪي جي گادي واري شهر پشاور جي سنهري رود ويجهو سيڪريٽريٽ ملازمن کي کڻي ويندڙ سرڪاري بس ۾ زوردار ڌماڪو ٿيو، جنهن جي نتيجي ۾ هر پاسي تباهي پکڙجي وئي، ڌماڪو ايترو ته زوردار هو جو ان جو آواز پري پري تائين ٻڌو ويو، اها بس مختلف علائقن مان سرڪاري ملازمن کي ڊيوٽين تي کڻي وڃي رهي هئي، رپورٽن مطابق ڌماڪي جي نتيجي ۾ 15 ڄڻا ٿڏي تي ئي مارجي ويا ۽ 40 زخمي ٿي پيا، جن ۾ عورتون ۽ ٻارڙا به شامل آهن، ڌماڪي سبب ڀرپاسي جي ڪيترين ئي عمارتن جا شيشا پڻ ٽٽي پيا، سيڪيورٽي فورسز ڌماڪي واري هنڌ پهچي ڪڙو چاڙهي ڇڏيو، جنهن کانپوءِ امدادي ڪارروايون شروع ڪيون ويون، اکين ڏٺن شاهدن ٻڌايو ته ڌماڪي سبب بس پوري ريت تباهه ٿي وئي ۽ لاش توڙي زخمي اندر ڦاسي پيا، جنهن کانپوءِ بس جي باڊي کي ڪٽي انهن کي باهر ڪڍيو ويو، امدادي ڪاررواين دوران مارجي ويلن جا لاش ۽ زخمي ٿلين کي ليڊي ريڊنگ، حيات آباد ميڊيڪل سينٽر ۽ ٻين اسپتالن ڏانهن نيو ويو، جتي ايمرجنسي لاڳو ڪري زخمين کي طبي امداد ڏني وئي،

 

پنهنجي ٻارڙن کي پرامن پاڪستان ڏيڻ چاهيون ٿا: پرويز رشيد

اسلام آباد (اين اين آءِ) سڌسماءَ جي وفاقي وزير سينيٽر پرويز رشيد چيو آهي ته مني لانڊرنگ جي جاچ ٿي رهي آهي سرفراز مرچنٽ ايف آءِ اي کي بيان جمع ڪرائڻ لاءِ تيار ٿي ويو آهي پنجاب حڪومت عالمن کان عورتن جي تحفظ واري قانون جون خرابيون سمجهڻ جي ڪوشش ڪري رهي آهي عالم سڳورا شريعت جي خلاف شقن جي نشاندهي ڪن نشاندهي کان پوءِ بل جو جائزو وٺنداسين پشاور ڌماڪو مذمت جوڳو آهي اسان عوام کي پرامن پاڪستان ڏيڻ چاهيون ٿا ڪراچي جون حالتون بهتر ٿيون آهن ۽ اينڊر ڏينهن ۾ وڌيڪ بهتر ٿينديون اربع تي ميڊيا سان ڳالهائيندي پرويز رشيد چيو ته عورتن جي بل تي اسلام مخالف شقن جو جائزو وٺي رهيا آهيون ۽ پنجاب حڪومت عالمن سان هن بل جون خرابيون سمجهڻ جي ڪوششون ڪري رهيون آهي عالم سڳورن پاران تجويزن جو انتظار ڪري رهيا آهيون. پشاور ۾ دهشتگردي جي واقعي جي مذمت ڪندي وفاقي وزير چيو ته رٿابندي سان ڪم ڪرڻ بنا ڪوئي معاشرو ترقي نٿو ڪري سگهي وقت جو صحيح استعمال نه ٿيڻ سان بدحالي جهالت ۽ غربت وڌندي آهي دهشتگردي خلاف جنگ ۾ پاڪستان جون قربانيون بي مثال آهن محب وطن پاڪستانين دهشتگردي جي خلاف جنگ ۾ وڏيون قربانيون ڏنيون اسان پنهنجي ٻارڙن کي پرامن پاڪستان ڏيڻ چاهيون ٿا هن چيو ته ڪراچي جون حالتون بهتر ٿيون آهن ۽ ايندڙ ڏينهن ۾ وڌيڪ بهتر ٿينديون ايم ڪيو ايم جي اڳواڻن خلاف مني لانڊرنگ ۽ را سان لاڳاپن جي الزامن جي حوالي سان وفاقي وزير چيو ته مني لانڊرنگ جي جاچ ٿي رهي آهي ان ڏس ۾ سرفراز مرچنڊ ايف آءِ اي جي بيان جمع ڪرائڻ لاءِ تيار ٿي ويو آهي. هن چيو ته اردو زبان جي سرڪاري آفيسن ۾ استعمال جو آئين ۾ ڪيل واعدو پورو ناهيون ڪري سگهيا واعدو پورو نه ٿيڻ تي سپريم ڪورٽ توجهه ڏياري سرڪاري ادارن ۾ اردو جي استعمال لاءِ ڪميٽي ڪم ڪري رهي آهي جتي سرڪاري ادارن ۾ قومي زبان اردو نافذ العمل ٿيڻ گهرجي هڪ سوال جي جواب ۾ هن چيو ته پرويز رشيد چيو ته جمهوريت ۾ ماڻهن کي پنهنجي ڳالهه چوڻ جو حق آهي ۽ سياسي جماعتن ۾ ماڻهن جو اچڻ وڃڻ ٿيندو رهندو آهي. هن چيو ته مصطفيٰ ڪمال جي معاملي تي ڪوئي تبصرو نه ڪندس.

 

وفاق سي سي آءِ ۾ آدمشماري معاملو شامل ڪري، سڌ حڪومت جو مطالبو

ڪراچي (اسٽاف رپورٽر) سنڌ جي وڏي وزير سيد قائم علي شاهه وفاقي حڪومت تي زور ڀريندي چيو آهي ته هُو 25 مارچ تي اسلام آباد ۾ ٿيندڙ گڏيل مفادن واري ڪونسل (سي سي آءِ) جي ايندڙ اجلاس ۾ آدمشماريءَ جي معاملي کي شامل ڪيو وڃي، ڇو جو هي هڪ اهم مسئلو آهي انهيءَ ڪري ان کي اولين ترجيح ڏني وڃي. هن اها ڳالهه اڄ اربع ڏينهن وزير اعظم نواز شريف جي صدارت هيٺ 25 مارچ تي اسلام آباد ۾ منعقد ڪيل سي سي آءِ اجلاس ۽ ان جي ايجنڊه جي جائزي اجلاس جي صدارت ڪندي ڪئي. اجلاس ۾ چيف سيڪريٽري سنڌ صديق ميمڻ، وزير اعليٰ سنڌ جي پرنسپل سيڪريٽري علم الدين بلو، ايڊيشنل سيڪريٽري محمد وسيم، سيڪريٽري بين الصوبائي رابطه (آءِ پي سي) مشتاق شيخ، آبپاشيءَ وارو سيڪريٽري ظهير حيدر شاهه، ناڻي وارو سيڪريٽري سهيل راجپوت ۽ ٻين لاڳاپيل آفيسرن شرڪت ڪئي. بين الصوبائي رابطي وزارت واري سيڪريٽري مشتاق شيخ چيو ته بين الصوبائي وزارت سي سي آءِ کي جيڪو ايجنڊه ڏنو آهي ان ۾ رڳو هڪ آئٽم نيشنل فلڊ پروٽيڪشن پلان IV جي ڏهه سالن جي بنيادن تي تشڪيل کي رکيو ويو آهي. ان تي سنڌ جي وڏي وزير چيو ته سي سي آءِ جي گذريل اجلاس ۾ آدمشماري جو معاملو غور ويچار لاءِ رکيو ويو هو ۽ انهيءَ لاءِ وزير اعظم 25 مارچ جي تاريخ مقرر ڪئي هئي پر اهُو درست نه آهي ۽ ان معاملي کي به ايجنڊه ۾ رکڻ گهرجي پيو. وڏي وزير بين الصوبائي رابطي کاتي جي سيڪريٽري مشتاق شيخ کي هدايت ڪئي ته هو سي سي آءِ اجلاس جي ايجنڊه ۾ آدمشماريءَ کي به شامل ڪرڻ لاءِ آءِ پي سي ڊويزن سان رابطو ڪري. سنڌ جي وڏي وزير چيو ته پاڪستان پيپلز پارٽي گذريل مهيني وزير اعليٰ هائوس ۾ آدمشماري واري معاملي تي غور ويچار لاءِ مختلف سياسي جماعتن سان گڏجي هڪ اجلاس منعقد ڪيو هو ۽ اجلاس ۾ شريڪ سمورين 32 جماعتن اتفاق راءِ سان وفاقي حڪومت کان مطالبو ڪيو هو ته هُو آدمشماري کي ملتوي نه ڪري. هن چيو ته مون سمورين سياسي جماعتن جون سفارشون سي سي آءِ اجلاس ۾ پيش ڪيو هيون ۽ ان تي وزير اعظم مون کي يقين ڏياريو ته هُو آرمي چيف سان ڳالهائيندو ته هُو آدمشماري وارين ٽيمن جي سيڪيورٽيءَ لاءِ فورسز جو بندوبست ڪري. هن چيو ته کين سي سي آءِ واري اجلاس جي ايجنڊه ۾ آدمشماريءَ کي شامل نه ڪرڻ تي تعجب ٿيو آهي. هن صوبائي سيڪريٽريءَ کي چيو ته اسان جون سي سي آءِ واري اجلاس جي حوالي سان ڪجهه سمريون اتي آهن جنهن کي به ايندڙ اجلاس ۾ آڻڻ گهرجي. سيڪريٽري آبپاشي ظهير حيدر شاهه سنڌ جي وڏي وزير کي سي سي آءِ ايجنڊه ۾ شامل فلڊ پروٽيڪشن پلان-IV (2015 کان 2025) جي تشڪيل جي حوالي سان بريفنگ ڏيندي چيو ته ڄاڻايل پلان ۾ اينٽي گريٽيڊ فلڊ مئنجمينٽ تي ڌيان ڏنو ويو آهي جنهن تحت نان-اسٽرڪچرل قدمن جهڙوڪ ريزوائير آپريشن، فلڊ فور ڪاسٽنگ ۽ فوري وارننگ، فلڊ رسڪ زون، واٽر شيڊ مئنجمينٽ، فلڊ پروفنگ ۽ انشورنس ۽ ڊيزاسٽر مئنجمينٽ ۽ ٻيا قدم شامل آهن. سنڌ جي وڏي وزير چيف سيڪريٽري سنڌ محمد صديق ميمڻ ۽ سيڪريٽري آبپاشي ظهير حيدر شاهه کي هدايت ڪئي ته اهي ماهرن سان گڏجي اين ايف پي پي لاءِ تجويزون تيار ڪن. وڏي وزير گائيڊ لائن ڏيندي چيو ته پهاڙي طغياني سان ٻوڏ کان بچاءَ جا حفاظتي بندن، منڇر ڍنڍ جي بحالي، سامونڊي پاڻيءَ کي روڪڻ جنهن ڪارڻ زرعي زمين تباهه ٿي رهي آهي، صوبي ۾ آبپاشي نظام جي ري-موڊلنگ، امڪاني ٻوڏ وارن رستن / چئنلز کي وڌيڪ ٻوڏ واري پاڻيءَ ڏانهن موڙڻ، سنڌو درياهه جي هائيڊرو لاجيڪل / جيولاجيڪل انوسٽيگيشن ۽ زير زمين پاڻيءَ جي وسيلن جي ري-چارجنگ، ٻوڏ واري صورتحال کي منهن ڏيڻ ۽ دريائي تربيتي پروگرام مستقل بنيادن تي تربيت ۽ عربي سمنڊ جي پاڻيءَ کي روڪڻ لاءِ تمر (مينگروز) جي ٻوٽن جي وڌ ۾ وڌ پوک جهڙن مامرن تي فلڊ پروٽيڪشن پلان ۾ شامل ڪرڻ گهرجي. اجلاس ۾ اهو به واضع ڪيو ويو ته 2006، 2011 ۽ 2012 ۾ ٿيل شديد برساتن صوبي ۾ نڪاسي واري نظام کي بري طرح متاثر ڪيو هو انڪري ان جي به ري-موڊلنگ هئڻ گهرجي.

 

سپريم ڪورٽ پرويز مشرف کي پرڏيهه وڃڻ جي اجازت ڏئي ڇڏي ، نالو اي سي ايل مان ڪڍڻ جو اختيار حڪومت حوالي

اسلام آباد(بيورو) سپريم ڪورٽ اڳوڻي صدر پرويز مشرف کي پرڏيهه وڃڻ جي اجازت ڏيندي سندس نالو اي سي ۾ شامل رکڻ يا ڪڍڻ جو فيصلو حڪومت تي ڇڏي ڏنو آهي، اڳوڻي صدر پرويز مشرف جو نالو اي سي ايل مان ڪڍڻ بابت سپريم ڪورٽ ۾ داخل درخواست جي ٻڌڻي چيف جسٽس، جسٽس انور ظهير جمالي جي اڳواڻي ۾ 5 رڪني لارجر بينچ ڪئي،ان موقعي تي پرويز مشرف جي وڪيل بيرسٽر فروغ عدالت ۾ پيش ٿي چيو ته پرويز مشرف بيمار آهي، کيس علاج لاءِ پرڏيهه وڃڻ جي اجازت ڏني وڃي، چيف جسٽس انور ظهير جمالي ريمارڪس ڏيندي چيو ته جيڪي ميڊيڪل سرٽيفڪيٽ پيش ڪيا ويا آهن، اهي پاڪستان ۾ سولائي سان ٺهي وڃن ٿا، ٻڌڻي دوران اٽارني جنرل اڳوڻي صدر جو نالو اي سي ايل ۾ وجهڻ بابت عدالتي فيصلو پڙهي ٻڌايو، اٽارني جنرل جو چوڻ هو ته پرويز مشرف جو نالو عدالتي حڪم تي اي سي ايل ۾ وڌو ويو آهي،اسان عدالتي حڪمن تي عمل ڪري رهيا آهيون، جنهن تي چيف جسٽس چيو ته اوهان جيڪو فيصلو پڙهيو، اهو عارضي حڪم هو، ڇا توهان کي ان تي ڪو اعتراض آهي؟ ڌرين جو موقف ٻڌڻ کانپوءِ سپريم ڪورٽ پرويز مشرف کي پرڏيهه وڃڻ جي اجازت ڏيڻ بابت سنڌ هائيڪورٽ جي فيصلي خلاف وفاقي حڪومت جي داخل ڪيل درخواست رد ڪري ڇڏي ۽ کيس علاج لاءِ پرڏيه وڃڻ جي اجازت ڏني، سپريم ڪورٽ پنهنجي حڪم ۾ چيو ته پرويز مشرف جو نالو اي سي ايل مان ڪڍڻ يا نه ڪڍڻ بابت فيصلو هاڻ وفاقي حڪومت پاڻ ڪري، عدالت جو چوڻ هو ته اڳوڻي صدر جو نالو اي سي ايل ۾ شامل ڪرڻ بابت سپريم ڪورٽ جو 8 اپريل 2013ع تي ڏنل فيصلو ان معاملي ۾ رنڊڪ نه بڻجندو.001

بزدلاڻيون ڪارروايون دهشتگردي خلاف اسان جي عزم کي ڪمزور نٿيون ڪري سگهن: وزير اعظم

اسلام آباد (اين اين آءِ) وزيراعظم محمد نوازشريف پشاور ۾ دهشتگردي جي حملي جي سخت لفظن ۾ مذمت ڪندي چيو ته هن قسم جون ڪارروايون دهشتگردي جي خلاف اسان جي عزم کي ڪمزور نٿيون ڪري سگهن اربع تي پنهنجي هڪ بيان ۾ وزيراعظم چيو ته هن قسم جون ڪارروايون دهشتگردي جي خلاف اسان جي عزم کي ڪمزور نٿيون ڪري سگهن وزيراعظم لاڳاپيل عملدارن کي هدايت ڪئي ته زخمين کي بهترين طبي سهولتون فراهم ڪيون وڃن وزيراعظم قانون لاڳو ڪندڙ ادارن کي هن حملي جي ذميوارن جو پتو لڳائڻ جي به هدايت ڪئي.

لڳي ٿو ته پرويز مشر ف جي ٻاهر وڃڻ تي نواز شريف پاڻ راضي آهي: خورشيد شاهه

اسلام آباد(بيورو)  قومي اسيمبلي ۾ اپوزيشن ليڊر سيد خورشيد شاهه چيو آهي ته هاءِ پروفائل ڪيس ۾ پرڏيهه وڃڻ جي اجازت ڏيڻ جي ذميواري سپريم ڪورٽ جي آهي، وفاقي حڪومت ذهانت جو مظاهرو ڪندي معاملو پنهنجي مٿان اچڻ نه ڏنو، مون کي ته لڳي ٿو ته پرويز مشر ف جي ٻاهر وڃڻ تي نواز شريف پاڻ راضي آهي، اهڙو اظهار هن اڳوڻي صدر پرويز مشرف کي پرڏيهه وڃڻ جي اجازت تي پنهنجو رد عمل ڏيندي ڪيو، خورشيد شاهه چيو ته پرويز مشرف کي پرڏيهه وڃڻ جي اجازت ڏيڻ جو فيصلو اکين تي آهي، هاءِ پروفائل ڪيس ۾ پرڏيهه وڃڻ جي اجازت ڏيڻ جي ذميواري سپريم ڪورٽ جي آهي، حڪومت ذهانت جو مظاهرو ڪندي ان ڪيس کي پنهنجي مٿان اچڻ ئي نه ڏنو ، هن چيو ته ذوالفقار علي ڀٽو آئين ۾ آرٽيڪل 6 شامل ڪرايو پر آئين کيس ڦاسي کان نه بچائي سگهيو ،هن وڌيڪ چيو ته مونکي لڳي ٿو ته آئين جي آرٽيڪل 6 کان به طاقتور  ڪو ٻيو ويٺوآهي، جڏهن ته پرويز مشرف  جي ٻاهر وڃڻ  تي نوازشريف  پاڻ راضي آهي ، خورشيط شاهه چيو ته نوازشريف جڏهن پاڻي راضي آهي ته باقي ٻيون پارٽيون  ڇا ٿيون ڪري سگهن؟001

جمهوريت جي بحالي، اين ايف سي ايوارڊ ۽ صوبائي خودمختياري پ پ جا ڪارناما ۽ جمهوري تحفا آهن: بلاول ڀٽو زرداري

اسلام آباد (اين اين آءِ)بلاول ڀٽو زرداري چيو آهي ته 1973ع جو آئين ڏيڻ ، آمراڻي دؤر ۾ آئين ۾ ڪيل پيوندڪارين جو خاتمو، جمهوريت جي بحالي، مضبوطي، تسلسل، اين ايف سي ايوارڊ، صوبائي خودمختياري، 18هين ترميم ۽ پارلياماني جمهوريت قائم ڪرڻ پ پ جا ڪارناما ۽ جمهوري تحفا آهن، پاڪستان جي آئين جي ڪري قومي اتحاد جو وجود قائم آهي، اڳوڻي سينيٽ چيئرمين سيد نئير حسين بخاريءَ سان ملاقات ۾ ڳالهائيندي بلاول ڀٽو زرداري چيو ته پ پ جي دؤرن ۾ پاڪستان کي نه فتح ٿيڻ جوڳو بڻائڻ لاءِ دفاعي ادارن جو قيام عمل ۾ آيو. پاڪستان جي آئين هيٺ آئيني ادارا قائم ٿيا ۽ عوام کي رياستي معاملن ۾ سڌي ريت شريڪ ڪيو ويو. هن چيو ته اڄ به پ پ محروم ۽ مظلوم طبقن جي اُميد آهي. پ پ پ جي چيئرمين بلاول ڀٽو زرداري پشاور ڌماڪي جي مذمت ڪندي افسوس جو اظهار ڪيو تعزيتي بيان ۾ بلاول ڀٽو زرداري بم حملي جي مذمت ڪندي ۽ بيگناهه ماڻهن جي جاني نقصان تي افسوس جو اظهار ڪندي چيو ته هن قسم جا حملا ملڪ مان دهشتگردي جي مڪمل خاتمي جي ڪوششن کي روڪي نٿا سگهن ۽ نه ئي هن جنگ کي ڪمزور ڪري سگهن ٿا بلاول ڀٽو زرداري فوتين جي وارثن سان تعزيت ۽ همدردي جو اظهار ڪندي دعا ڪئي ته الله تعاليٰ فوتين کي جنت الفردوس ۾ جاءِ ڏي ۽ زخمين کي جلد صحتيابي عطا فرمائي.

 

افغانستان ۾ امن جو قيام رڳو سياسي طور تي ممڪن آهي: پاڪستان

نيو يارڪ(اي پي پي) گڏيل قومن جي اداري ۾ پاڪستان جي سفير ڊاڪٽر مليحه لوڌي چيو آهي ته پاڪستان طرفان افغان ڳالهين جي عمل سان نه رڳو افغانستان ۾ استحڪام ۽ خوشحالي جي اميد پيدا ٿي آهي پر ان سان پوري خطي ۾ استحڪام ۽ خوشحالي ايندي. گڏيل قومن جي اداري جي 15 رڪني سلامتي ڪائونسل ۾ افغانستان جي حوالي سان بحث دوران گڏيل قومن جي اداري ۾ پاڪستان جي سفير جو چوڻ هو ته عالمي برادري ننتيجي تي پهتي آهي ته افغانستان ۾ امن جو قيام رڳو سياسي طور تي ممڪن آهي. هن چيو ته پاڪستان هميشه افغانستان ۾ ڪيترن ئي ڏهاڪن کان جاري جنگ جي خاتمي جي ڳالهه ڪئي آهي ته جيئن افغان عوام کي امن ملي سگهي. افغانستان ۾ امن امان جي حوالي سان هن پاڪستان جي عزم جو ورجاءُ ڪيو.هن چيو ته گذريل ڪجهه مهينن دوران امن ڳالهين لاءِ مشاورتي عمل شروع ڪيو ويو آهي. مليحه لوڌي اسلام آباد ۾ ٿيندڙ هارٽ آي ايشيا ڪانفرنس جي موقعي تي ان حوالي سان ٿيندڙ هاڪاري اڳڀرائي جو حوالو ڏيندي چيو ته وزيراعظم محمد نواز شريف ۽ افغان صدر اشرف غني هاڪاري ڳالهيون ڪيون آهن. هن چيو ته افغانستان ۾ امن جي قيام لاءِ افغانستان، پاڪستان، امريڪا ۽ چين تي ٻڌل 4 ملڪي گروپ جوڙيو ويو آهي ته جيئن افغان امن ڪوششن کي ڪامياب بڻائي سگهجي. هن چيو ته ان نئين حڪمت عملي جي ڪاميابي جو دارومدار چئني ملڪن تي آهي.

 

دهشتگرد پنهنجي ناپاڪ ڪارروائين جي ذريعي بيگناهه شهرين کي نشانو بڻائي رهيا آهن: مولابخش چانڊيو

ڪراچي (اين اين آءِ) سنڌ جي انفارميشن صلاحڪار مولابخش چانڊيو پشاور ۾ سرڪاري بس ۾ ٿيل ڌماڪي جي مذمت ڪئي اهي ۽ قيمتي انساني جانين جي نقصان تي سخت ڏک جو اظهار ڪيو آهي اربع تي پنهنجي تعزيتي بيان ۾ مولابخش چانڊيو چيو ته دهشتگرد پنهنجي ناپاڪ ڪارروائين جي ذريعي بيگناهه شهرين کي نشانو بڻائي رهيا آهن سرڪاري ملازمن تي دهشتگرد حملو نهايت مذمت جوڳو آهي هن چيو ته دهشتگردي جي ناسور کي ختم ڪرڻ لاءِ قومي سلامتي جا ادارا ڀرپور ڪم ڪري رهيا آهن پوري قوم انهن سان گڏ آهي.

 

پاڪستان جي ٽي ٽوئنٽي ورلڊ ڪپ ۾ ڪامياب شروعات،بنگلاديش کي پهرين ميچ ۾ 55 رنسن تان مات، آفريدي ميچ جو هيرو قرار

ڪولڪتا(م.ڊ) پاڪستان ٽي ٽوئنٽي ڪرڪيٽ ورلڊ ڪپ جي ڪاميابي سان شروعات ڪندي پنهنجي پهرين ميچ ۾ بنگلاديش کي 55 رنسن تان مات ڏئي ڇڏي، ڪپتان شاهد آفريدي کي آل رائونڊ ڪارڪردگي تي ميچ جو هيرو قرار ڏنو ويو، ڪولڪتا جي ايڊن گارڊنز جي ميدان تي پاڪستان جي 201 رنسن جي جواب ۾ بنگلاديش جي ٽيم 6 وڪيٽن جي نقصان تي 146 رنسون ٺاهي سگهي،محمد عامر اٿندي ئي بنگلاديش جا ان وقت ترا ڪڍيا، جڏهن هن اننگز جي پهرين ئي اوور ۾ سوميا سرڪار کي ڪلين بوڊ ڪيو، ان کانپوءِ بنگلاديش جون وڪيٽون ساهي ساهي سان ڪرنديون رهيون، شاهد آفريدي بيٽنگ کانپوءِ بالنگ ۾ به بنگالي ٽائيگرز لاءِ ڊيڄاريندڙ خواب بڻيو، هن بنگلاديشي اوپنر تميم اقبال ۽ کي 24 ۽ شبير رحمان کي 25 رنسن تي پويلين موٽائي مخالفن جي چيلهه ڀڄي ڇڏي، آفريدي جي اهڙي ايذاءَ آخر تائين بنگالين کي پاڻ سنڀالڻ نه ڏنو، ان دوران محمود الله کي عماد وسيم آئوٽ ڪري بنگلاديش کي وڌيڪ دٻاءَ ۾ آڻي ڇڏيو، جنهن سان پاڪستان جي ڪاميابي جا امڪان به وڌيڪ چٽا ٿيندا ويا، صورتحال خراب ڏسي شڪيب الحسن ۽ مشفيق الرحيم احتياط سان کيڏڻ شروع ڪيو، جنهن جو فائدو وٺندي پاڪستان ميچ تي پنهنجي پڪڙ ويتر مضبوط ڪري ورتي،ان دوران مشفيق الرحيم به 18 رنسون ٺاهي محمد عامر جو شڪار ٿي ويو، جيتوڻيڪ شڪيب الحسن فٽي هڻي ناٽ آئوٽ رهيو پر ٽيم کي ناڪامي کان نه بچائي سگهيو،اهڙي ريت بنگلاديش جي ٽيم مقرر 20 اوورن ۾ 6 وڪيٽن جي نقصان تي 146رنسون ٺاهي سگهي ۽ پاڪستان 55 رنسن تان ڪاميابي ماڻي ورتي،ان کان اڳ پاڪستان ٽاس کٽي پهرين بيٽنگ جو فيصلو ڪيو، جيڪو بيٽسمينن صحيح ثابت ڪري ڏيکاريو، جنهن ڪري قومي ڪرڪيٽ ٽيم ٽي ٽوئنٽي ڪرڪيٽ جي تاريخ ۾ پهريون ڀيرو 200 رنسن جو حدف پار ڪيو، اوپنر شرجيل خان ۽ احمد شهزاد دونهيندار شروعات ڪئي، جنهن کانپوءِ رهيل ڪسر اچي محمد حفيظ ۽ شاهد افريدي ڪڍي، شرجيل خان 10 بالن تي 2 ڇڪن ۽ هڪ چوڪي جي مدد سان 18 رنسون ٺاهي آئوٽ ٿيو، جڏهن ته احمد شهزاد ففٽي هڻي موٽيو، هن 39 بالن تي 8 چوڪن جي مدد سان 52 رنسون ٺاهيون، ان کانپوءِ محمد حفيظ اچي باهه ٻاري ۽ بنگالي بالرن کي دل تي ڪٽيو، محمد حفيظ به ففٽي هڻي ساهه پٽيو، هن 42 بالن تي 7 چوڪن ۽ٻن ڇڪن جي مدد سان 64 رنسون ٺاهيون پر بائونڊري تي سوميا سرڪار شاندار ڪيچ پڪڙي کيس پويلين موٽايو، ان موقعي تي وري شاهد آفريدي روايتي دونهيندار اننگز کيڏي ۽ ميدان جي چئني پاسي اسٽروڪ هڻي بنگالين کي وائڙو ڪري ڇڏيو، قومي ٽيم جو ڪپتان ففٽي کان رڳو هڪ رنس پهرين 49 رنسن تي آئوٽ ٿي ويو،سندس 19 بالن تي کيڏيل اننگز ۾ 4 چوڪا ۽ 4 شاندار ڇڪا شامل هئا، شعيب ملڪ به آخر ۾ اچي پاڻ ملهايو ۽ 7 بالن تي ٻن چوڪن جي مددد سان 12 رنسون ٺاهي ناٽ آائوٽ رهيو،اهڙي ريت پاڪستان مقرر 20 اوورن ۾ 5 وڪيٽن جي نقصان تي 201 رنسون ٺاهيون، بنگلاديش طرفان تسڪين احمد ۽ عرفات سمي 2-2 وڪيٽون ورتيون، واضح هجي ته ٽي ٽوئنٽي ڪرڪيٽ ۾ پاڪستان پهريون ڀيرو 200 کان وڌيڪ رنسون ٺاهيون هيون.