تازيون خبرون

Daily Archives: March 16, 2016

آرمي چيف 13 دهشتگردن جي موت جي پرواني تي صحيح ڪري ڇڏي

راولپنڊي(م.ڊ) پاڪ فوج جي سربراهه جنرل راحيل شريف 13 دهشتگردن کي موت جي سزا ڏيڻ جي منظوري ڏئي ڇڏي، پاڪ فوج جي عام رابطن واري اداري آئي ايس پي آر جي پڌرائي مطابق آرمي چيف جنرل راحيل شريف 13 دهشتگردن جي موت واري سزا تي عمل جي منظوري ڏئي ڇڏي آهي، موت جي سزا مليل انهن دهشتگردن ۾ بخت امير،عزيز خان، فضل غفار، اصغر خان، اڪرام الله، حيدر، مشتاق احمد، محمد نواز، تاج گل ۽ هارون الرشيد شامل آهن، آئي ايس پي آر مطابق اهي دهشتگرد ناگا پربت تي پرڏيهي سياحن جي قتل، سيدو شريف ايئرپورٽ ۽ پاڪ فوج تي حملن ۾ ملوث هئا. ٻئي طرف آرمي چيف جنرل راحيل شريف چيو آهي ته پاڪستان آرڊيننس فيڪٽريز پاڪستان جي دفاعي صلاحيت وائڻ ۾ مثالي ڪردار ادا ڪري رهي آهي، نجي ٽي وي موجب آرمي چيف جنرل راحيل شريف آرڊيننس فيڪٽري واهه جو تفصيلي دوروڪيو، آئي ايس پي آڙ موجب آرمي چيف آپريشن ضرب عضب جي دوران اسلحي ۽ گوله بارود جي ضرورتن جي پورائي تي پي او ايف جي خدمتن جي ساراهه ڪندي اسلحي ۽ گوله بارود ۾ خود انحصاري جي لاءِ فيڪٽري جي تڪنيڪي آپ گريڊيشن تي زور ڏنو، چيئرمين واهه ليفٽيننٽ جنرل عمر محمود حيات فيڪٽري جي ڪارڪردگي کان آرمي چيف کي آگاهه ڪيو.

 

ڪور ڪمانڊر ڪراچي جي وڏي وزير سان ملاقات، امن امان جي صورتحال تي اطمينان جو اظهار

ڪراچي (اسٽاف رپورٽر) ڪور ڪمانڊر ڪراچي ليفٽننٽ جنرل نويد مختار اڄ اڱاري ڏينهن سنڌ جي وڏي وزير سيد قائم علي شاهه سان وزيراعليٰ هائوس ۾ ملاقات ڪئي. انهيءَ دوران سنڌ جي وڏي وزير ۽ ڪورڪمانڊر ڪراچي نويد مختار سنڌ صوبي خاص طور تي ڪراچي شهر ۾ امن امان جي مجموعي صورتحال، دهشتگردن خلاف ٽارگيٽڊ آپريشن ۽ نيشنل ايڪشن پلان تي عملدرآمد سميت مختلف مامرن تي خيالن جي ڏي وٺ ڪئي وئي. ملاقات ۾ اپيڪس ڪميٽي جي فيصلن جنهن ۾ دهشتگردي ٽوڙ عدالتن جي قيام، ڪيسن جي بهتر جاچ ۽ هاءِ پروفائل ڪيسن جو مناسب طريقي سان فالو اَپ شامل آهن انهن تي عملدرآمد جي حوالي سان غور ڪيو ويو. سنڌ جي وڏي وزير چيو ته هُن نئين آءِ جي پوليس اي ڊي خواجه کي چيو آهي ته هُو جاچ واري نظام کي مضبوط بڻائي ته جيئن پيراسيڪيوشن کي يقيني بڻائي سگهجي. هن چيو ته اپيڪس ڪميٽيءَ ۾ انويسٽيگيشن آفيسرز (آءِ اوز) لاءِ مراعتن بابت فيصلي تي به عملدرآمد ٿي رهيو آهي ۽ انهيءَ مقصد لاءِ ضروري هدايتون جاري ڪيون ويون آهن. هن چيو ته حڪومت نيشنل ايڪشن پلان تي ان جي رُوح مطابق عمل ڪرائڻ جي خواهشمند آهي. هن وڌيڪ چيو ته پوليس کي ضروري جديد اوزار فراهم ڪري وڌيڪ مضبوط ۽ فعال ڪيو پيو وڃي.

 

سمورن لاڳاپيل اسٽيڪ هولڊرز جي مشاورت سان 30 ڏينهن اندر ريڪروٽمينٽ رولز کي آخري شڪل ڏيڻ جي هدايت

اسلام آباد (اين اين آءِ) وزيراعظم محمد نوازشريف فيڊرل ڊائريڪٽوريٽ آف ايجوڪيشن اسلام آباد ۾ ايگزيڪيوٽو ڊائريڪٽر جي آسامي جي قيام جي منظوري ڏيئي ڇڏي آهي اڱاري تي وزيراعظم محمد نوازشريف بي ايس 21 جي ان آسامي جي سمري جي منظوري ڏني ۽ ڪئپيٽل ايڊمنسٽريشن اينڊ ڊيولپمينٽ ڊويزن (ڪيڊ) کي هدايت ڪئي ته ان ڳالهه کي يقيني بڻايو وڃي ته فيڊرل ڊائريڪٽوريٽ آف ايجوڪيشن جي ايگزيڪيوٽو ڊائريڪٽر جي مقرري لاءِ ريڪروٽمينٽ رولز مڪمل طور تي مطابقت پذير هجن وزيراعظم آفيس جي بيان موجب هي مقرري يا ته مناسب تجربو رکندڙ باصلاحيت سرڪاري آفيسر جي ٿي سگهي ٿي يا پيشاوراڻي تعليمي صلاحيت رکندڙ جي ٿي سگهي ٿي. جيڪو (ڪيڊ) ۾ تعليم بابت صلاحڪار يا وزير جي مجموعي رهنمائي تحت سڌاراتي عمل تي عملدرآمد ڪري سگهي وزيراعظم سمورن لاڳاپيل اسٽيڪ هولڊرز جي مشاورت سان 30 ڏينهن اندر ريڪروٽمينٽ رولز کي آخري شڪل ڏيڻ جي هدايت ڪئي.

 

پنجاب ۾ نيب جي ڪاررواين سان وزيرن جي گوڙ عوام جي سامهون گهڻو ڪجهه رکي ڇڏيو آهي: خورشيد شاهه

اٽڪ (م.ڊ) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته ڪنهن کي سٺو لڳي يا خراب پر قومي اسيمبلي ۾ عوامي حقن جي بچاءِ لاءِ پنهنجا فرض سرانجام ڏيند ا رهنداسين، آپريشن ضرب عضب جي ڪاميابي سان ملڪ ۾ امن قائم ٿيو، جنهن تي  پاڪ فوج جو ڪردار ساراهه جوڳو آهي، شفاف پڇاڻو انصاف ۽ جمهوريت جو روح آهي، نيب جي پنجاب ۾ ڪاررواين سان حڪومتي وزيرن جي گوڙ عوام جي سامهون گهڻو ڪجهه رکي ڇڏيو آهي، چنگيز خان جي برزگن  ۽ ڪٽنب  جي عوامي خدمتن جا اثر سڄي ملڪ  ۾ موجود آهن ، اهڙن خيالن جو اظهار هن اٽڪ جي ناليواري  شخصيت چنگيز خان سان ملاقات ۾ ڳالهائيندي ڪيو، جنهن پنهنجي رهائشگاهه تي ملاقات ساڻس ملاقات ڪئيخورشيد شاهه چنگيز خان جا ٿورا مڃيند ي چيو ته توهان پنهنجي مامي خان منور خان آف خگواني سان اسان جي لاڳاپن کي هلائيندا پيا ا چو ۽ اسان به ائين ئي هلائيندا رهنداسين.001

 

قومي اسيمبلي پاڪ افغان سرحد جي سيڪيورٽي مضبوط بنائڻ لاءِ اثرائتا قدم کڻڻ جي ٺهراءٌ جي منظوري ڏيئي ڇڏي

اسلام آباد (اين اين آءِ) قومي اسيمبلي پاڪ افغان سرحد جي سيڪيورٽي مضبوط ڪرڻ لاءِ اثرائتا قدم کڻڻ جي ٺهراءُ جي منظوري ڏيئي ڇڏي اهي جڏهن ته پارليماني گهرو سيڪريٽري مريم اورنگزيب چيو آهي ته پاڪ افغان بارڊر ڪراس ڪندڙن کي نارا ۽ نادره جي ڊيٽا بيس موجب راهداري پاس ڏيڻ جي عمل کي خودڪار بڻايو پيو وڃي ايف آءِ اي جا قائدا لاڳو ڪرڻ لاءِ سمري پاڪستان جي صدر ڏانهن اماڻي ڇڏي آهي هڪ سافٽ ويئر ڊيولپ ڪري پاڪستان ايندڙن کي مارنيٽر ڪيو ويندو اڱاري تي قومي اسيمبلي ۾ تحريڪ انصاف جي مراد سعيد ٺهراءُ پيش ڪيو ته هن ايوان جي راءِ آهي ته حڪومت پاڪستان افغانستان سرحد جي سيڪيورٽي مضبوط ڪرڻ جا اثرائتا قدم کڻي پارليماني گهرو سيڪريٽري مريم اورنگزيب چيو ته بارڊر ڪراس ڪندڙن کي نارا ۽ نادره جي ڊيٽا بيس مطابق راهداري پاس ڏيڻ جي عمل کي خودڪار بڻايو پيو وڃي ۽ ان حوالي سان ايف آءِ اي جا قائدا لاڳو ڪرڻ لاءِ سمري صدر کي اماڻي ويئي آهي هن چيو ته هن معاملي ۾ بچاءُ واري وزارت واپار جي وزارت ۽ ايف بي آر جون به ذميواريون آهن مراد سعيد چيو ته اڍائي سال اڳ قومي گهرو پاليسي جوڙي ويئي پر ان کان پوءِ اي پي ايس ۽ چارسده جا واقعا ٿيا پارليماني گهرو سيڪريتري مريم اورنگزيب چيو ته اسان قومي داخلي پاليسي کي نظر ۾ رکي ئي نيشنل ايڪشن پلان تيار ڪيو آهي اسان هن ٺهراءُ جي مخالفت ڪيون ٿا مراد سعيد ٺهراءُ جي حق ۾ ڳالهائيندي چيو ته افغانستان مان روزانو غير قانوني طور هزارين ماڻهو بارڊر ڪراس ڪن ٿا تنهنڪري دهشتگرد به اچي سگهن ٿا ان جو سدباب هئڻ گهرجي عائشه سيد چيو ته افغانستان مان هٿيار ۽ غير قانوني گاڏين جي اچڻ جو سلسلو روڪڻ لاءِ تڪڙا قدم کنيا وڃن عبدالستار بچاڻي به ٺهراءُ جي حمايت ڪندي چيو ته افغانستان جي رستي پاڪستان داخل ٿيندڙ دهشتگردن جو رستو روڪڻ وقت جي اهم ضرورت آهي ڊاٽر شيرين مزاري چيو ته بارڊر جي سيڪيورٽي مضبوط ڪرڻ قومي پاليسي آهي حڪومت کي هن ٺهراءُ جي مخالفت نه ڪرڻ گهرجي مولانا گوهر شاهه چيو ته اسان دهشتگردي جي واقعن جي مذمت ڪيون ٿا ۽ پاڪ افغان باردر جي سيڪيورٽي مضبوط ڪرڻ جو مطالبو ڪيون ٿا عبدالقهار چيو ته پاڪستان پنهنجي سمورن باردرز جي سيڪيورٽي مضبوط ڪري جڏهن ته سڄو الزام افغان پشتونن تي نه ڏنو وڃي مولانا امير زمان چيو ته پاڪ افغان بارڊر جي ڀرپاسي ۾ رهندڙ ماڻهن هڪٻئي جي ڏک سور ۾ شريڪ ٿيڻو آهي انهن ماڻهن کي دهشتگرد نه چيو وڇي عائشه گلالئي چيو ته افغانستان مان دهشتگرد حملا آور ٿين ٿا اسان جا ماڻهو شهيد ٿين ٿا هن ٺهراءُ جي مخالفت جو ڪوئي جواز نه آهي بارڊر مئنجمينٽ وقت جي اهم تقاضا آهن جيڪڏهن افغانستان اها ڳالهه نٿو مڃي ته اسان کي پنهنجي پاران بارڊر سيل ڪري ڇڏڻ گهرجي انجنيئر عثمان خان ترڪئي چيو ته پاڪ افغان بارڊر جي سيڪيورٽي جي حوالي سان ٺهراءُ جي خمالفت جو ڪوئي جواز نه هو اسان کي پنهنجو ملڪ بچائڻو آهي افغان شهري پاڪستان اچي اسان جو سڃاڻپ ڪارڊ ۽ پاسپورٽ وٺي دنيا ۾ اسان جي بدنامي جو سبب بڻجي رهيا اهن مولانا امير زمان چيو ته مان ڊيورنڊ لائين کي تڪراري ناهي چيو شيخ اڪبر خان چيو ته ملڪ جي هر شهري جي جان ۽ مال جو تحفظ حڪومت جي ذميواري آهي ٺهراءُ جي مخالفت ڪرڻ زيادتي واري ڳالهه آهي اسان ٺهراءُ جي حمايت ڪيون ٿا. غوث بخش مهر چيو ته ٺهراءُ جي مخالفت مناسب طرزعمل نه آهي نيشنل سيڪيورٽي صوبن ۽ مرڪز سڀني جي ذميواري آهي ڊاڪٽر عارف علوي چيو ته پنهنجي بارڊر تي ڊگهي ڪنڊيدار تار لڳائي ڇڏي آهي سرحدن جي حفاظت صوبن جي ذميواري نه آهي مرڪز جي آهي هي تمام بهتر ٺهراءُ آهي ان کي منظور ٿيڻ گهرجي پارليماني سيڪريٽري مريم اورنگزيب چيو ته هن بارڊر مئنجمينٽ کي صوبن جي ذميواري ناهي چيو پر هن اهو چيو آهي ته سيڪيورٽي جي معاملن جي ذميواري لکاڳاپيل صوبي جي هوندي آهي هن چيو ته هو ٺهراءُ جي مخالفت نٿا ڪن ان معاملي کي ڪوئي ٻيو رنگ نه ڏنو وڃي قومي اسيمبلي ٺهراءُ يڪراءِ سان منظور ڪري ورتو اجلاس دوران قومي اسيمبلي يونيورسٽين ۾ شاگردياڻين کي يونيورسٽي احاطي اندر هاسٽل ۾ رهائش ڏيڻ لاءِ قدم کڻڻ جو ڄهراءُ گڏيل طور تي منظور ڪري ورتو جماعت اسلامي جي صاحبزاده طارق الله ٺهراءُ پيش ڪيو ته هن ايوان جي راءِ آهي ته حڪومت سڄي ملڪ جي يوينورسٽين ۾ داخلا وٺڻ تي شاگردياڻين کي يونيورسٽي جي اهاطي اندر هاسٽلن ۾ رهائش فراهم ڪرڻ لاءِ قدم کڻي پارليماني ناڻي سيڪريٽري رانا افضل خان ٺهراءُ جي مخالفت نه ڪئي قومي اسيمبلي ٺهراءُ جي منظوري ڏيئي ڇڏي. قومي اسيمبلي ۾ مخصوص سيٽون رکندڙ عورتن کي ترقياتي فنڊ نه ڏيڻ تي وومين ميمبرز ايوان مان علامتي واڪ آئوٽ ڪيو اڱاري تي قومي اسيمبلي ۾ عائشه سيد چيو ته مالاڪنڊ ڊويزن ۾ پيٽرول هاڻي به 65 ۽ 66 رپيا في ليٽر وڪرو ٿي رهيو آهي ان جو نوٽيس ورتو وڃي مخصوص سيٽون رکندڙ عورت ميمبرز کي ترقياتي فنڊ ڏنا وڃن ان حوالي سان فرق نه ڪيو وڃي هن چيو ته هن ايوان جون سموريون عورت ميمبرز ترقياتي فنڊ فراهم نه ٿيڻ تي احتجاجن ايوان مان واڪ آئوٽ ڪنديون ان سان گڏ ئي انهن ايوان مان واڪ آئوٽ ڪيو ڊپٽي اسپيڪر وفاقي وزيرن کي هدايت ڪئي ته عورت ميمبرز کي پرچائي واپس ايوان ۾ آڻي ان کان اڳ پوائنٽ آف آرڊر تي صبحه نظير چيو ته 8 مارچ تي عورتن جي عالمي ڏينهن جي موقعي تي حڪومت عورتن جي ڪردار کي قومي ترقي ۾ خاص طور تي واکاڻيو آهي ۽ عورتن جي ڀلائي لاءِ ڪيترائي قدم کنيا آهن. طاهره اورنگزيب چيو ته هن تعليمي ادارن ۾ معذور شاگردن لاءِ ويل چيئرز جي فراهمي لاءِ هڪ بل جمع ڪرايو هو اهو هن وقت تائين ايجنڊا تي ناهي آندو ويو ان جو نوٽيس ورتو وڃي شير اڪبر خان چيو ته بونير ضلعي ۾ اين ايڇ اي جي ڪائي شاهراه نه آهي اسان جو مطالبو آهي ته اسان حڪومت کي ٽيڪس ڏيئي رهيا آهيون آئين تحت ملڪ جي بدحال ضلعن کي ترقي ڏيڻ لاءِ قدم کنيا وڃن مولانا امير زمان چيو ته بلوچستان جي آبادگارن کي ڀاڻ فراهم ڪرڻ لاءِ قدم کنيا وڃن نواب يوسف ٽالپر چيو ته نئين ڪڻڪ اچڻ واري آهي سپورٽ پرائيز تي خريداري لاءِ پاسڪو کي متحرڪ ڪيو وڃي هن چيو ته سياست کان مٿانهون ٿي آبادگارن جو تعلق ڪنهن به جماعت سان هجي گڏجي اڳتي وڌڻو پوندو زراعت بهتر ٿيندي ته ملڪ جي معيشت بهتر ٿيندي ايم ڪيو ايم جي ميمبر شيخ صلاح الدين چيو ته ايم ڪيو ايم جي پارليمينٽ ميمبرن جو نائين زيرو تان ضبط ڪيل لائسنس وارو اسلحو واپس ڪيو وڇي اسپيڪر رولنگ ڏني پاڪستان تحريڪ انصاف جي ميمبر ڊاڪٽر اظهر جدون چيو ته هريپور ڦوارا چوڪ مان ريلوي بڪنگ آفيس ختم ڪئي پئي وڃي ان تي نظرثاني ڪئي وڇي.

 

غيرقانوني ڀرتين ۽ فنڊن ۾ گهوٻين ۾ جاچ لاءِ اڳوڻو آءِ جي غلام حيدر جمالي نيب ۾ طلب

ڪراچي (اسٽاف رپورٽر) نيب پاران سنڌ پوليس ۾ غيرقانوني ڀرتين ۽ جاچ فنڊز ۾ گهوٻين جي جاچ جي لاءِ، اڳوڻي آءِ جي غلام حيدر جمالي، ڊي آءِ جي فنانس فداحسين شاهه،اعترازاحمدگوريا،ايس ايس پي غلام بني ڪيرئي،ڊي آءِ جي مظهر شاهه، سيد سيلمان شاهه ۽ انسپيڪٽر اسلم لانگاهه سميت 26 پوليس آفيسرز کي 21 کان 28 مارچ تائين پيش ٿي بيان رڪارڊ ڪرائڻ لاءِ نوٽيس جاري ڪري ڇڏي آهي .جڏهن ته ايس ايس پي ويسٽ ڪراچي ، مٽياري ۽ ڪشمورسميت ڪراچي جي سموري ڊي آءِ جيز کي به نوٽيس جاري ڪري21 کان 28 مارچ تائين طلب ڪري ورتو آهي.  نيب سنڌ ۾ کاڻين مان ڪوئلو ڪڍڻ لاءِ ڪم کان اڳ ٺيڪيدار کي ڏيڍ ارب رپين جا فنڊز جاري ڪرڻ واري معاملي جي جاچ به شروع ڪري ڏني، فنڊز جاري ڪرڻ جي منظوري جي تصديق لاءِ نيب وڏي وزير ڏانهن ليٽر به اماڻي ڇڏيو.002

 

 مذهبي پارٽين حڪومت کي عورتن جي تحفظ وارو قانون واپس وٺڻ لاءِ ڊيڊلائن ڏئي ڇڏي

لاهور(م.ڊ) ملڪ جي مختلف مذهبي پارٽين حڪومت کي پنجاب ۾ عورتن جي تحفظ وارو لاڳو ڪيل قانون واپس وٺڻ لاءِ 27 مارچ جي ڊيڊلائن ڏني آهي، لاهور ۾ جماعت اسلامي جي مرڪز منصوره ۾ مذهبي پارٽين جي ٿيل اجلاس ۾ عورتن جي تحفظ واري بل بابت گڏيل حڪمت عملي جوڙڻ تي غور ويچار ڪيو ويو، اجلاس کانپوءِ جاري ڪيل پڌرنامي ۾ چيو ويو آهي ته پنجاب ۾ عورتن جي تحفظ وارو لاڳو ڪيل قانون 27 مارچ تائين واپس ورتو وڃي، جڏهن ته 2 اپريل تي اسلام آباد ۾ عالمن ۽ مشائخن جي ڪانفرنس ڪوٺائي ويندي، جنهن ۾ ايندڙ حڪمت عملي ۽ تحريڪ جو اعلان ڪيو ويندو،پڌرنامي ۾ چيو ويو ته وياج وارن قانونن جو خاتمو آڻي ملڪي معيشت کي ان نظام کان پاڪ ڪيو وڃي، ڊاڪٽر عافيا صديقي جي آزادي لاءِ حڪومت پنهنجون ذميواريون پوريون ڪري، جڏهن ته دهشتگردي جو مڪمل خاتمو سڀني جو گڏيل مطالبو آهي، پڌرنامي ۾ چيو ويو ته مددرسن ۽ مسجدن تي لاڳو ڪيل اجائي پابنديون ختم ڪيون وڃن ۽ دهشتگردي جي خاتمي لاءِ قومي ايڪشن پلان جي سڀني شقن تي عمل ڪيو وڃي، اجلاس کي خطاب ڪندي مولانا فضل الرحمان چيو ته اسان عورتن جي تحفظ واري بل کي پوري ريت رد ڪيون ٿا ، ان حوالي سان حڪومت سان وفاقي ۽ صوبائي سطح تي ڌار ڌار ڳالهيون ٿيڻ گهرجن، هن چيو ته پنجاب حڪومت سان عورتن جي تحفظ ۽ وفاقي سرڪار سان مشرف دور ۾ منظور ڪيل بل تي ڳالهايو وڃي. اجلاس کي خطاب ڪندي سراج الحق چيو ته اسلامي نظرياتي ڪائونسل عورتن جي تحفظ واري بل کي آئين ۽ شريعت جي خلاف قرار ڏنو، جماعت اسلامي جي مرڪزي امير سينيٽر سراج الحق چيو آهي ته اسان مالي ڪرپشن جو پٽڪو پٽي رهيا هئاسين پر  حڪمرانن نظرياتي ڪرپشن تي هلڻ شروع ڪيو آهي،پنجاب حڪومت پنهنجي عددي گهڻائي ۽ تڪبر جي بنياد تي عورتن جي تحفظ وارو بل منظور ڪرايو، هن چيو ته جن ماڻهن پاڪستان ٺاهيو، اهي اسلامي پاڪستان لاءِ جاکوڙ ڪري رهيا هجئا، سندس چوڻ هو ته اسان عورتن تي هر قسم جي تشدد جي خلاف آهيون پر هي بل تشدد جي خاتمي لاءِ نه پر ڪٽنبي نظام جي بربادي لاءِ آهي، سراج الحق چيو ته اسان کي دنيا کي اهو نياپو نه ڏيڻ گهرجي ته هي عورتن ۽ عالمن جو جهيڙو آهي، ڇو ته هي عورتن جي حقن تي ڌاڙو آهي ۽ حڪومت رڳو اولهه کي خوش ڪرڻ چاهي ٿي.

 

آصف زرداري وطن واپسي لاءِ آرمي چيف جي رٽائرڊ ٿيڻ جو انتظار ڪري رهيو آهي: ڊاڪٽر زوالفقار مرزا

بدين (اين اين آءِ) سنڌ جي اڳوڻي گهرو وزير ۽ پ پ پ باني اڳواڻ ڊاڪٽر ذوالفقار مرزا چيو اهي ته آصف زرداري آرمي چيف جي رٽائرڊ ٿيڻ جو انتظار ڪري رهيو آهي ان جي رٽائرڊ ٿيندي ئي هو به واپس اچي ويندو بدين ۾ ميڊيا سان ڳالهائيندي ذوالفقار مرزا چيو ته جيستائين پ پ پ عوامي جماعت هئي اهو به پارٽي سان گڏ هو پر جڏهن پ پ پ سنڌ جو وڪرو شروع ڪيو ته هو ان جي خلاف اٿي بيٺو آصف زرداري پنهنجي بيان سبب ملڪ کان ٻاهر آهي ۽ آرمي چيف جي رٽائرڊ ٿيڻ جو انتظار ڪري رهيو آهي ذوالفقار مرزا چيو تها ندرون سنڌ ۾ به اردو ڳالهائيندڙن جو وڏو انگ موجود آهي جنهن کي نطرادناز نٿو ڪري سگهجي هن پهريان تجويز ڏني هئي ته ايم ڪيو ايم ۾ موجود سٺن ماڻهن کي الڳ ڪيو وڃي مصطفيٰ ڪمال جي ۽ انهن جي ساٿين جي ايم ڪيو ايم کان علحيدگي خوش آئيند آهي جيڪڏهن مصطفيٰ ڪمال ايئن ئي رهيو ته ان جو مستقبل روشن آهي ۽ جيڪڏهن هن به قوم سان غداري ڪئي ته ان جو حشر به ايم ڪيو ايم جي اڳاوڻ جهڙو ٿيندو هن چيو ته مصطفيٰ ڪمال ان جي پراڻي پريس ڪانفرنس ٻڌي ان مان اهم نقطا ڪڍي ڳالهائي ٿو ان لاءِ مون کي به سٺو لڳي ٿو.

 

پاڪستان کي اڳيان کڻي هلڻو آهي ته پنجاب کي قرباني ڏيڻي پوندي، اقتصادي راهداري رٿا کي مڪمل ٿيڻ گهرجي: مير ظفرالله جمالي

لاهور (اين اين آءِ) پاڪستان جي اڳوڻي وزيراعطم مير ظفرالله خان جمالي چيو آهي ته جيڪڏهن پاڪستان کي اڳيان کڻي هلڻو آهي ته پنجاب کي قرباني ڏيڻي پوندي اڄ به ان حق ۾ آهيان ته انتظامي بينجادن تي صوبن جو انگ 12 ڪيو وڃي وزيراعظم طور ان تي پيپر ورق تيار ڪيو هو پر ان کان پوءِ منهنجي خلاف پروپيگنڊا شروع ڪيو ويو بلوچستان جو عوام محب وطن آهي خدا جي واسطي ان کي گاريون ڏيڻ جو سلسلو بند ۽ غدار چوڻ جي روايت ختم ٿيڻ گهرجي اهرن خيالن جو اظهار هن سماجي اڳواڻ اڪرم چوڌري جي رهائشگاهه تي ڳالهه ٻولهه ڪندي چيو مير ظفرالله خان جمالي چيو ته پنجاب پاڻ کي وڏو ڀاءُ چوي ٿو ته ان کي پاڪستان کي اڳيان کڻي وڃڻ لاءِ قرباني ڏيئي ان کي ثابت به ڪرڻو پوندو هاڻي ان کي فيصلو ڪرڻو آهي ته ان ننڍن صوبن سان ڪهڙو ورتاءُ ڪرڻو آهي هن چيو ته بلوچن کي پاڪستان سان ايتري محبت آهي ايتري ڪنهن ٻئي صوبي جي فرد کي آهي ڇو ته پاڪستان آهي ته اسان سڀ آهيون هن چيو ته پاڪ چين اقتصادي راهداري رٿا پاڪستان لاءِ سٺو سوڻ آهي اهڙي ڊگهي مدي منصوبن جا معاهده ڪندڙ ڪي ٻيا ۽ انهن کي مڪمل ڪرڻ وارا ڪي ٻيا ماڻهو هوندا هن منصوبي کي ضرور مڪمل ٿيڻ گهرجي هن چيوت ه مان اڄ به سمجهان ٿو ته پاڪستان جي مسئلن جو حل انتظامي بنيادن تي صوبن کي ننڍو ڪرڻ ۾ آهي ۽ هي تعداد 12 ڪيو وڇي مان وزيراعطم طور پيپر ورق ڪيو هو پر ان کان پوءِ منهنجي خلاف پروپئگڊا شروع ڪئي ويئي.

 

پ پ پ ۾ ڪوئي به فارورڊ بلاڪ نه پيو بڻجي، تحريڪ عدم اعتماد جي خبرن ۾ صداقت نه آهي: نثاراحمد کهڙو

ڪراچي (اين اين آءِ) سنڌ جي صوبائي وزير نثار کهڙو چيڳو آهي ته پ پ پ ۾ ڪوئي به فارورڊ بلاڪ نه پيو ٺهي جڏهن فارورڊ بلاڪ ٺهيو ته ان وقت پڇا ڪئي وڃي ته پوءِ تبصرو ڪيو ويندو وڏي وزير خلاف سنڌ اسيمبلي ۾ عدم اعتماد جي تحريڪ آڻڻ جي اهڙي ڪائي ڳالهه نه آهي انهن ڳالهه ۾ صرف خبر بنائڻ کان علاوه ڪائي صداقت نه آهي مخدوم خاندان پ پ پ جو بنياد وجهندڙن مان آهي ۽ جن پارٽي جو بنياد وڌو انهن جي الڳ ڳالهه آهي جڏهن ته ان جو مقصد پارٽي ڇڏڻ ناهي هوندو اهڙن خيالن جو اظهار اڱاري تي بحريه يونيورسٽي ڪراچي ڪئمپس ۾ ڪانفرنس جي موقعي تي ميڊيا سان ڳالهائيندي ڪيو نثار کهڙو چيو ته ملڪ ۾ جمهوريت قائم آهي تنهنڪري مارچ يا اپريل مهيني کي اهم چوڻ جي ڪائي ڳالهه نه آهي ۽ صورتحال معمول مطابق آهي هڪ سوال جي جواب ۾ چيو ته پاڪستان جمهوري ملڪ آهي ۽ آئين ڪنهن کي به پنهنجي جماعت ٺاهڻ جو حق ڏي ٿو ۽ جن ماڻهن متحده کان الڳ ٿي پنهنجي نئين پارٽي ٺاهي آهي اهي سڀ متهده جا پراڻا ساٿي آهن هن چيو ته متحده کي ان جا پنهنجا ماڻهو هي پهريون ڀيرو نه پيا ڇڏين 90 جي ڏهاڪي ۾ به متحده جي ايم پي ايز ۽ ٻين اڳواڻن متحده کي ڇڏي الڳ گروپ ٺاهيو هن چيو ته هاڻي متحده جا ڪجهه ايم پي ايز اسيمبلي مان استعيفا ڏيئي الڳ ٿي رهيا آهن ۽ انهن اسيمبلي اندر ڪوئي گروپ نه ٺاهيو آهي هي نارمن صورتحال آهي. هن چيو ته عوام جي دلين ۾ ڪير گهر ڪري سگهي ٿو هي تڏهن خبر پوندي جڏهن سياسي پارٽيون چونڊن دوران عوام سان رجوع ڪنديون ۽ فيصلي لاءِ عوام سپريم عدالت آهي.