تازيون خبرون

Daily Archives: March 14, 2016

ممبئي اچي محسوس ٿيو ته سڀني کان ڊگهي ۽ وڏي قد جي آهيان: صوفي چوڌري

ممبئي (شوبز نيوز) لنڊن ۾ اک کولي وڏي ٿيندڙ بالي وڊ اداڪارا ۽ ڳائڻي صوفي چوڌري چيو آهي ته جڏهن هوءَ ممبئي آئي هئي ته کيس محسوس ٿيو ته هوءَ سڀني کان ڊگهي ۽ وڏي آهي، ممبئي ۾ صحت بابت هڪ پينل مباحثي۾ حصو وٺندي صوفي چيو ته لنڊن ۾ ٻن ٽن ديسي ڇوڪرين کانسواءِ باقي سڀ ڊگهيون ۽ سنهڙيون سيپڪڙيون هيون، مان به محسوس ڪيو ته مان به انهن جيان ئي آهيان،پوءِ مان جڏهن ممبئي آيس ته مان پاڻ کي سڀني کان ڊگهي محسوس ڪيو، سندس چوڻ هو ته مان جڏهن ايم ٽي وي تي ڪم ڪرڻ شروع ڪيو ته مونکي نظر آيو ته ممبئي ۾ سڀ ڇوڪريون ننڍي قد واريون ۽ سنهڙيون آهن ۽ مان انهن سڀني کانم ڊگهي آهيان، صوفي چيو ته ٿي سگهي ٿو ته مان سنهڙي هجان پر ان جو مطلب اهو ناهي ته مان  سيپڪڙي يا ڏانڊيءَ جهڙي آهيان، هن ٻڌايو ته منهنجي چيلهه ڀلي سنهي نه هجي پر ڄنگهون ۽ ٻيو سڄو جسم فٽ فاٽ آهي، صوفي چوڌري چيو ته مان پنهنجي جسم مان مطمئن ۽ ٻين ڇوڪرين جي ڀيٽ ۾ مختلف آهيان، جيڪو منهنجو اثاثو آهي.001

 

رانا داگو بتي سان رومانس واريون خبرون رد،بس سٺا دوست آهيون: شريا سارن

ممبئي (شوبز نيوز) بالي ووڊ اداڪار شريا سارن اداڪار رانا داگو بتي سان رومانس وارين خبرن کي رد ڪيو آهي ته هو ۽ رانا رڳو دوست آهن، هڪ انٽرويو ۾ شريا چيو ته داگوبتي سان سندس عشق وارين خبرن مان هوءَ به مزو وٺي رهي آهي پر انهن ۾ ٽڪي جي به سچائي ناهي، سندس چوڻ هو ته رانا داگو سان سندس ملاقات هڪ دوست جي سالگ ره تقريب ۾ ٿي هئي، جنهن ۾ سندن دوستي ٿي ۽ ان کانپوءِ ڳالهه اڳتي ناهي وڌي، شريا سارن چيو ته هاڻ به هو ۽ داگو سٺن دوستن جيان آهن. 001

 

ٽي ٽوئنٽي جي وارم اپ ميچ ۾ پاڪستان ۽ سريلنڪا جون ٽيمون آمهون سامهون

ڪولڪتا (شوبز نيوز) آءِ سي سي ورلڊ ٽي-20 ڪپ ۾ آسٽريليا ۽ انگلينڊ جي ڪرڪيٽ ٽيمن وچ ۾ وارم اپ ميچ اڄ ايڊن گارڊنز ڪولڪتا ۾ کيڏي ويندي، جڏهن ته گرين شرٽس واحد وارم اپ ميچ ۾  سڀاڻي سومر تي سريلنڪا سان زور آزمائيندي. ورلڊ ڪپ ٽي-20 جي سپر ٽين مرحلي جي شروعات 15 مارچ کان ٿي رهي آهي، سريلنڪا جي ٽيم ٽائٽل جو بچاءُ ڪندي، ايونٽ ۾ اڄ آسٽريليا ۽ ويسٽ انڊيز وچ ۾ وارم اپ ميچ ايڊن گارڊنز ڪولڪتا ۾ کيڏي ويندي، جڏهن ته پاڪستاني ٽيم پنهنجي پهرين وارم اپ ميچ سڀاڻي سومر تي سري لنڪا خلاف کيڏندي، ان سلسلي ۾ قومي ڪرڪيٽ ٽيم ايڊنز گارڊن جيميدان ۾ پريڪٽس سيشن ۾ حصو وٺي رهي آهي، قومي ٽيم سخت سيڪيورٽي ۾ ڪولڪتا جي ميدان ۾ پهتي، جتي رانديگرن پهرين ته ورزش ڪئي، ان کانپوءِ بيٽنگ، بالنگ ۽ فيلڊنگ ۾ پنهنجون خاميون ختم ڪرڻ لاءِ پريڪٽس ڪئي وئي.001

 

ڀارت ۾ کيڏڻ لاءِ ذهني ۽ جسماني طور تيار آهيون : شاهد آفريدي

ڪولڪتا (اسپورٽس نيوز) قومي ٽي ٽوئنٽي ڪرڪيٽ ٽيم جي ڪپتان شاهد آفريدي چيو آهي ته اسان ڀارت ۾ کيڏڻ لاءِ ذهني ۽ جسماني طور تي تيار آهيون، ڪولڪتا جي ايڊنز گارڊن ۾ پريس ڪانفرنس ڪندي شاهد آفريدي چيو ته ڀارت ۾ کيڏندي تمام گهڻي خوشي ٿي رهي آهي، جنهن لاءِ اسان ڀرپور پريڪٽس شروع ڪري ڇڏي آهي، هن چيو ته ورلڊ ڪپ جي پهرين ميچ تمام گهڻي اهم هوندي آهي، پهرين ميچ کٽڻ سان ٽيم جو اعتماد وڌندو آهي،سندس چوڻ هو ته ڀارتي ٽيم هن وقت سٺي ڪرڪيٽ کيڏي رهي آهي، جڏهن ته پاڪستان کي به ٽورنامينٽ ۾ رهڻ لاءِ سٺي ڪرڪيٽ کيڏڻي پوندي، شاهد آفريدي چيو ته مڃان ٿو ته ٽي ٽوئنٽي ورلڊ ۾ اسان تي گهڻو دٻاءُ هوندو پر ڪرڪيٽ ۾ ائين ئي ٿيندو آهي، جڏهن ته ڪولڪتا ۾ اسان جو رڪارڊ سٺو آهي، ٽي ٽوئنٽي ٽيم جي ڪپتان چيو ته تمام گهٽ ملڪ اهڙا آهن، جتي ڪرڪيٽ کيڏڻ ۾ مزو ايندو آهي، انهن ۾ ڀارت به شامل آهي، جتي ڪرڪيٽ کيڏي تمام گهڻو مزو ايندو آهي.001

 

سماج کي کوکلو ڪندڙ ڪرپشن جي خاتمي وارو سوال!: نور سنڌي

ڪرپشن صرف اسان جي ملڪ جو مسئلو نه پر سڄي دنيا جو سنگين مسئلو بڻجي وئي آهي. هر ملڪ ڪرپشن کي ختم ڪرڻ لاءِ ڪوششون ڪري رهيو آهي، قانون کي سخت بڻايو پيو وڃي، اهڙا ڪيس تڪڙا هلائي ڪرپشن ڪندڙ سرڪاري ملازمن کي ڪيفر ڪردار تائين پهچايو پيو وڃي، جنهن ڪري ڪرپشن ۾ گهٽتائي اچي رهي آهي، پر اسان جي ملڪ ۾ ڪرپشن جو خاتمو اچڻ بجاءِ ڏينهون ڏينهن واڌارو اچي رهيو آهي. دنيا اندر ڪرپشن جي الزامن هيٺ ايندڙ وزيرن مشيرن کان ڏنل قلمدان واپس ورتا وڃن ٿا يا هو خود استعيفيٰ ڏين ٿا، پر اسان جي ملڪ ۾ اهڙو رواج نه پيو آهي. هتي الٽو حڪمران پارٽي وارا ڪرپشن ۾ ملوث وزيرن، مشيرن، پارٽي قيادت جي ماڻهن کي بچائڻ لاءِ ڪوششون ڪن ٿا. چين ۾ ڪرپشن ڪندڙ 3 لکن کان وڌيڪ ملازمن کي سخت سزائون ڏنيون ويون آهن، اهو انگ صرف هڪ سال جو آهي. هڪ سال اندر انهن خلاف انڪوائري به ڪئي وئي ته سزائون به ڏنيون ويون. ڇاڪاڻ ته چين ۾ ڪرپشن جي مڪمل خاتمي لاءِ حڪمران سنجيده آهن. هنن جا هٿ صاف آهن، ان ڪري هو ملڪ مان ڪرپشن جو خاتمو چاهين ٿا، جو ڪرپشن اڏوهي وانگر آهي، جنهن سان ملڪ جي معاشي حالت خراب ٿي وڃي ٿي. جيئن هن وقت اسان جي ملڪ جي معاشي حالت بدترين آهي. اسان چين جي صدر کي سلام پيش ڪريون ٿا.

اسان جي ملڪ ۾ هر دور جا حڪمران ڪرپشن جي خاتمي جا اعلان ۽ دعوائون ڪندا رهن ٿا، پر ڪرپشن جي خاتمي لاءِ ڪوبه سنجيده نظر نه آيو آهي. اسان جي ملڪ ۾ اينٽي ڪرپشن کاتو آهي، جيڪو انگريز جي دور کان قائم آهي، پر شروع کان هن کاتي جي ڪارڪردگي بهتر نظر نه آئي آهي. اينٽي ڪرپشن جو سسٽم اڃا تائين انگريز دور وارو آهي. هن کاتي کي جديد نه بنائڻ ڪري به ڪارڪردگي بهتر نظر نه ٿي اچي. بعد ۾ ايف آءِ اي جيڪا وفاقي کاتن ۾، جڏهن ته نيب جيڪا وفاقي ۽ صوبائي کاتن ۾ ڪرپشن ختم ڪرڻ، ڪرپشن ڪندڙن خلاف ڪارروايون ڪرڻ لاءِ قائم ڪيون ويون هيون، تن کي ماضيءَ ۾ سياسي انتقامي ڪاررواين لاءِ استعمال ڪيو ويو، ان جا ڪافي مثال موجود آهن. اسان وٽ قانون جي محافظ پوليس کي به سياسي انتقامي ڪارروائين ۽ ذاتي فائدي لاءِ استعمال ڪيو پيو وڃي، جنهن ڪري پوليس جي ڪارڪردگي ختم ٿي وئي آهي، جنهن ڪري رينجرز مقرر ڪرڻ جو مطالبو ڪيو پيو وڃي.

اسان وٽ ڪجهه عرصي کان نيب پنهنجو ڪم ڪري رهي آهي، ڪرپشن خلاف سنڌ کان شروع ڪيل آپريشن پنجاب ۽ وفاق تائين پهتو آهي، ڪيترن ئي وزيرن، مشيرن ننڍي کان وڏي آفيسرن بعد هاڻ ته وزيراعظم ميان نواز شريف پنجاب جي وزيراعليٰ شهباز شريف سميت اڳوڻي وفاقي وزيرن، وزيراعليٰ ۽ وزيراعظمن خلاف به ڪرپشن جي جاچ شروع ڪئي وئي آهي. ڪيترن کي سوگهو ڪيو ويو آهي. نيب جو ڪرپشن خلاف آپريشن ان ڪري ڪامياب وڃي رهيو آهي جو ان سان رينجرز جو سهڪار آهي. تڏهن ته سنڌ حڪومت رينجرز خلاف دانهون ڪرڻ لڳي آهي ۽ هنن جي مدي ۾ واڌارو ڪرڻ کان انڪار ڪيو. مٿس پيل زور بعد واڌارو ته ڪيو، پر اختيار محدود ڪيا ويا ۽ سنڌ اسيمبليءَ مان قانون پاس ڪري نيب جي آپريشن کي روڪڻ جون ڪوششون ڪيون ويون. نيب جي ڪرپشن خلاف ڪاررواين تي سنڌ حڪومت ته رڳو دانهون ڪيون پر وزيراعظم ۽ پنجاب جي وزيراعليٰ ته کين ڌمڪيون ڏنيون آهن. نيب جي ڪاررواين ۾ سنڌ ۽ حڪمرانن انهن سان تعاون ڪرڻ بجاءِ اهي ڪارروايون روڪرائڻ لاءِ هر طرح سان ڪوششون ڪيون ۽ ڪرپشن جي الزام هيٺ ايندڙ ڪيترائي وزير ۽ پارٽي جي اعليٰ قيادت جون ڪيتريون ئي شخصيتون گرفتار ٿيڻ کان بچڻ لاءِ ملڪ ڇڏي ويون آهن. نيب جي جاچ دوران ڪرپشن جا جيڪي ڪلور ميڊيا تي آيا آهن، اهي حيرت ۾ وجهي ڇڏڻ وارا آهن ته حڪمران پارٽي جي اعليٰ عهديدارن کان وٺي وزير مشيرن، بيورو ڪريٽن، ملڪ جي خزاني کي مالِ غنيمت سمجهي ڪيئن لٽ مار ڪئي آهي. هنن پاهوڙين سان مال ميڙيو آهي. گذريل تقريبن 8 سالن ۾ سنڌ حڪومت ۾ جيڪا ڪرپشن ڪئي وئي آهي، تنهن رڪارڊ ٽوڙي ڇڏيا آهن، ايتري قدر جو حڪمران ڌر جي ماڻهن ايمبولينس کي به نه بخشيو، برساتي تباهين ۾ ملندڙ ايمبولينس کي رنگ ڪرائي عوامي ٽرانسپورٽ لاءِ هلايو ويو. ٻاهرين ملڪن مان امداد ۾ ايندڙ مهانگين شين کي وڪرو ڪيو ويو.

نيب سنڌ ۽ پنجاب ۾ غير قانوني الاٽمينٽ، سرڪاري فنڊن ۾ هيرا ڦيري، ترقياتي ڪمن ۾ ڪرپشن، ناجائز جائدادون ٺاهڻ جي ڪيسن جي جاچ ۾ مصروف آهي. ان الزام ۾ موجوده ۽ سابق حڪمران، اقتداري ڌرين جا بااثر ماڻهو آيل آهن، انهن جا تفصيل نيب پاران ويب سائيٽ تي جاري ڪيل آهن. ڪرپشن ۾ ملوث ماڻهن کي خواب خيال به نه هو ته ان ليول تي جاچ ڪري کين سوگهو ڪيو ويندو. نيب تڏهن ميدان ۾ آئي آهي، جڏهن ڪرپشن جي انتها ٿي رهي هئي، جنهن سان ملڪ جي معيشت ڪمزور ٿي رهي آهي ۽ نيب سان طاقتور رياستي ادارن جو مڪمل سهڪار هئڻ ڪري هنن بنا ڊپ جي ملڪ جي اعليٰ منصبن تي ويٺل ماڻهن ۾ هٿ وڌا آهن. نيب جي هنن ڪاررواين تي عوام ۾ سرهائي آيل آهي ۽ عوام جون مڪمل حمايتون نيب سان آهن.

سنڌ ۾ نيب جي ڪاررواين بعد حڪومت اينٽي ڪرپشن جيڪا ڪيترن ئي سالن کان اگهور ننڊ ۾ ستل هئي، ان کي جاڳايو آهي، ان جا اختيار وڌايا آهن ۽ پگهارون به وڌايون آهن، اهو به پڙاڏو گونجي پيو ته سنڌ حڪومت نيب جي ڪاررواين کي گهٽ ڪرڻ ۽ سنڌ حڪومت جي ٿيل عالمي ليول تي بدنامي بعد اينٽي ڪرپشن کي سرگرم ڪيو آهي، اهو به پڙاڏو گونجي رهيو آهي ته حڪومت اينٽي ڪرپشن هٿان الزام هيٺ آيل کاتن جو رڪارڊ تحويل ۾ وٺرائي ان کي درست ڪرڻ لاءِ ائين ڪيو آهي، ان جو ٻيو سبب اهو ٻڌايو پيو وڃي ته جڏهن ڪرپشن جي الزام هيٺ ايندڙ ادارن تي ڇاپا هڻي رڪارڊ کڻي ويندي ته نيب جو وڌندڙ پريشر گهٽ ٿيندو ۽ سنڌ حڪومت اها دعوا ڪندي ته اسان ڪرپشن جي خلاف آهيون.

اينٽي ڪرپشن ڪورٽن ۾ سوين ڪيس سالن کان هلي رهيا آهن، اتي جن ڪيسن جو فيصلو ڪرپشن ڪندڙن جي خلاف اچي ٿو ته کين هاءِ ڪورٽ، سپريم ڪورٽ وڃڻ جو حق آهي، اهڙي ريت ڪرپشن ڪندڙن خلاف تڪڙيون ڪارروايون نه ٿيڻ، ڪيفر ڪردار تائين کين نه پهچائڻ ڪري هنن جي دل وڌي وڃي ٿي ۽ هو دليرانه انداز ۾ بناخوف جي ڪرپشن ڪن ٿا ۽ ٻين آفيسرن جي دل به وڌي ٿي ۽ اهڙي ريت سنڌ ۾ رڪارڊ ٽوڙ ڪرپشن ٿئي ٿي.

اسان وٽ راتو رات امير ٿيندڙ ماڻهن کان پڇاڻو نه ٿو ٿئي ته ڪالهه ته تو وٽ سائيڪل موٽر هو، اڄ هي وڏيون گاڏيون، وڏا بنگلا، بئنڪ بئلينس، پلاٽ، زمينون جائدادون ڪٿان آيون. هتي وڏا آفيسر ته ڇڏيو، ڪلارڪ ۽ ننڍا آفيسر جيڪي جائيداد ٺاهيون آهن، انهن کان به ڪو پڇڻ وارو نه آهي. ضرورت ان ڳالهه جي آهي ته ايف آءِ اي، نيب، اينٽي ڪرپشن کي بااختيار بڻايو وڃي. هنن کاتن ۾ سياسي مداخلت بند ڪئي وڃي، وقت جون حڪومتون هنن سان تعاون ڪن. هنن جاچ ادارن جي جاچ جو طريقيڪار سولو بڻايو وڃي. سنڌ ۾ اينٽي ڪرپشن جي ڪورٽن جو تعداد وڌايو وڃي. هر ضلعي ۾ آڊٽ ۽ ٽيڪنيڪل آفيسر مقرر ڪيو وڃي، هر ضلعي ۾ هن لاءِ الڳ مئجسٽريٽ مقرر ڪيو وڃي. اينٽي ڪرپشن کي انهن ڪميٽين کان آجو ڪري بااختيار بڻايو وڃي ۽ اينٽي ڪرپشن لاءِ به سزا جزا جو عمل شروع ڪيو وڃي. سرڪاري ملازمن سان گڏ انهن عام ماڻهن پاران غير قانوني ڌنڌن مان ٺاهيل جائدادن جي جاچ ٿيڻ گهرجي ته اهي ماڻهو ڪک پتيءَ مان ڪروڙي پتي ڪيئن ٿا ٿين؟ هي وڏيون گاڏيون، شاندار بنگلا، پلاٽ، زمينون ڪٿان ۽ ڪيئن ٿا حاصل ڪن؟ اسان مان هر ساڃاهه وند ماڻهو کي ڪرپشن خلاف هر طرح سان آواز اٿارڻ گهرجي، جهاد ڪرڻ گهرجي، ڇاڪاڻ ته طاقت جو اصل سرچشمو عوام آهي.

 

ڀيل قوم ۾ سجاڳي آڻڻ وارو ڀيل قوم جو پهريون اڳواڻ، گهمن سنگهه ( 1922 کان 1970) : تحرير: تنيراج گهمن سنگهه

سنڌ ماتا ڌرتي انيڪ سورما ۽ جوڌا جوان پنهنجي وطن لاءِ شهيد ٿيندڙ جوان پنهنجي ڪُک مان پيدا ڪيا آهن. گهمن سنگهه ڀيل به انهن مان هڪ سچو سپاهي هو. هن 1922ع ۾ موتيرام ڀيل جي گهر هڪ ننڍڙي ڳوٺ ۾ جنم ورتو. موتيرام واپاري ۽ ذميندار هو. ان وقت پڙهائيءَ جو انتظام تعلقه شهر ۾ هوندو هو. گهمن سنگهه کي ڌرم شالا ڪانگريس اسڪول ننگرپارڪر ۾ پڙهڻ لاءِ ڇڏيائين، ان وقت گهمن سنگهه جا ڪلاسي، مسڪين جهان خان کوسو، سردار خان کوسو، امر سنگهه ڀيل، عالم چند ڪولهي، ساڙچند ميگهواڙ، امر سنگهه ڀيل، پنهون مل ميگهواڙ، رئيس ڪاپڙي خان کوسو۽ ٻيا ٻهراڙي سان تعلق رکندڙ، هندي، گجراتي پڙهندا هئا. بمبئي ايڪٽ موجب 37-1936ع ۾ ڌرم شالا ۾ سنڌي پڙهائڻ شروع ڪئي. 41-1940ع ۾ گهمن سنگهه، امرسنگهه، مسڪين جهان خان کوسو فائينل ۾ پڙهندا هئا. ان وقت جي … راءِ بهادر ڌرم شالا جو وزٽ ڪيو، انهن کي قدآور ۽ هوشيار ڏسي پوليس ۾ ڀرتي ڪيو. ضلعي هيڊڪوارٽر ٿرپارڪر ايٽ ميرپورخاص هو.

1947ع ۾ گهمن سنگهه شريمتي مروان، فائينل پاس ڪانهو ڀيل جي نياڻي سان ٻاکاسر مان شادي ڪيائين. سندس سالو ڀائجي ڀيل قوم جو پهريون فرد تپيدار جي نوڪري ۾ هو. گهمن سنگهه نوڪري دوران غريب ٿرين جي خذمت ڪرڻ جو جذبو پيدا ٿيو. ڀيلن ڪولهين، ميگهواڙن ۽ ٻين غريب ۽ لاچار انسانن جا ڪم ضلعي آفيس مان ڪرائي ڏيندو هو ۽ پنهنجي ڪوارٽر تي ترسائيندو هو. پنهنجي حق وٺڻ جي ۽ تعليم پرائڻ جي پرچار ڪندو هو. اها ڳالهه وڏيرن کي پسند ڪونه آئي. گهمن سنگهه ۽ امر سنگهه مٿان ڪوڙو ڪيس داخل ڪرايو، جو ان وقت جي سياسي شخصيت حاجي مير محمد بخش ٽالپر چيئرمين ضلعه ڪائونسل ٿرپارڪر ختم ڪرايو.

1953 ۾ نوڪري تان رٽائر ٿي شيڊول ڪاسٽ کي هڪ پليٽ فارم تي گڏ ڪرڻ، ٻارن کي تعليم ڏيارڻ ۽ بي ڊي اليڪشن ۾ حصو وٺڻ لڳو. پاڻ 100/150 گهوڙن ۽ اُٺن جي جلوس/ريلي جي صورت ۾ ٿر ۾ ورڪ ڪندو رهيو. ان وقت لکيل پڙهيل ڀيلن، ڪولهين ۽ ميگهواڙن کي گڏ ڪري ضلعه ڪائونسل جي چيئرمين حاجي محمد بخش ٽالپر ۽ پير غلام رسول شاهه جيلاني اڳوڻو ايم اين اي ( والد ايم اين اي پير آفتاب حسين شاهه جيلاني) جي مهربانين سان نوڪريون وٺي ڏنيون ۽ اسڪول ڳوٺن ۾ کولايا. اها ڳالهه قابل تعريف آهي ته مير صاحب ۽ پير صاحب ذات پات، مذهب کان مٿانهون ٿي غريبن جي خدمت ڪئي. انهن جا نالا شيڊول ڪاسٽ وارن جي دلين ۾ سونهري اکرن سان لکيل آهن ۽ واهه واهه ڪندا رهندا. 1956 کان 1962 جي بي ڊي اليڪشن ۾ ڀيلن، ڪولهين، ميگهواڙن کي ميمبر بيهڻ جو شعور ڏنو ۽ ووٽ جي اهميت کي اجاڳر ڪيو. اها حقيقت آهي ته هن کان اڳ ۾ ڪوبه ڀيل، ڪولهي، ميگهواڙ ڪنهن وڏيري جي سامهون ميمبر اليڪشن ۾ نه بيهندا هئا ۽ انهن جي چوڻ تي ٺپا هڻندا هئا.

گهمن سنگهه پنهنجي چونڊيل ميمبرن جا ووٽ پاڪستان جي وارث قائداعظم محمد علي جناح جي ڀيڻ مادر ملت فاطمه جناح صاحبه کي ڏنا، انهيءَ جي عيوض گهمن سنگهه کي جيل ياترا ڪرڻي پئي. گهمن سنگهه هڪ سچو سپاهي ۽ جفاڪش، خذمت خلق انسان هو، آخر ۾ دماغ جي ڪينسر ٿي پيس. پير غلام رسول شاهه جيلاني ۽ مير حاجي محمد بخش ٽالپر لنڊن مان علاج ڪرائڻ لاءِ پاسپورٽ ٺهرايس مگر حياتيءَ ساٿ نه ڏنو 8 مارچ 1970 تي دم پروان ٿيو. ان وقت ٿر ۾ ڏڪار هو مگر گهمن سنگهه جي موت جي خبر باهه وانگر ٿر ۾ پکڙجي وئي ۽ سوين دوست آخري ديدار ڪرڻ لاءِ گڏ ٿيا. ٿر جي عوام واهه گهمن سنگهه واهه چوندا رهيا.

1992 ۾ ڀيل شاگرد اتحاد گهمن سنگهه جي ورسي ملهائي جنهن ۾ هزارين ڀيل گڏ ٿيا هئا ان وقت ڀيل شاگرد اتحاد تحريڪ جي اڳواڻ موجوده ايم پي اي ڊاڪٽر پرتاب سنگهه، سومرو ڀيل موجوده ميمبر ضلعه ڪائونسل جن گهمن سنگهه جي خدمتن عيوض ڀيٽا ڏيندي بابا ڀيل قوم جو لقب ڏنو. گهمن سنگهه جو بي وقتو موت ڀيل قوم جو نقصان ثابت ٿيو آهي. ڊاڪٽر هرجي ڀيل جي ڪيل سروي موجب ضلعي ٿرپارڪر ۾ 16/18 سيڪڙو ڀيل آباد آهن ۽ تعلقي اسلام ڪوٽ ۾ 40 سيڪڙو ڀيل آهن. ٿرپارڪر جي تازو لوڪل باڊيز اليڪشن ۾ ڀيل قوم مان 4 يوسي چيئرمين، 10 وائيس چيئرمين ۽ 4 لوڪل بورڊ جا ميمبر ۽ ڪافي تعداد ۾ ڪائونسلر چونڊجي آيا آهن. ٿرپارڪر ۾ ڪل 64 يوسيز آهن جيڪڏهن ڀيل قوم متفق ٿين ۽ گهمن سنگهه جي ڏنل واٽ تي هلن ته 16/20 يوسيز مان چيئرمين ۽ ضلعه ڪائونسل جا ميمبر منتخب ٿي سگهن ٿا ۽ سياسي پارٽيون آئينده ايم پي اي ۽ ايم اين اي جون ٽڪيٽون ڀيل فردن کي ڏيڻ لاءِ مجبور ٿي سگهن ٿيون.

ٿر جي سياسي ڀوتارن ڀيلن جيالن کي خوش ڪرڻ لاءِ پٽيوالي، سپاهي ۽ هڪ اڌ ڪلارڪي ۽ ڊسپينسر ٽيڪنيڪل پوسٽون ڏنيون آهن ۽ سڻڀيون پوسٽون پنهنجن چاهيندڙن کي ڏنيون آهن ۽ ڪٿي ڪٿي بلڊنگون ۽ آر او پلانٽ پڻ ڏنا آهن. جيڪي ڀيل آبادي جي حساب سان گهٽ آهن. مان بحيثيت فرزند گهمن سنگهه ڀيل قوم کي گذارش آهي ته متحد ٿيو ۽ گهمن سنگهه جي ڏنل واٽ تي هلي پنهنجو مستقبل روشن ڪريو ۽ قوم ۽ ملڪ جي ترقيءَ لاءِ ڪوشش ڪريو.

 

 

جماليءَ جي موڪلاڻي

وفاقي سرڪار غلام حيدر جمالي کي هٽائي اي ڊي خواجا کي سنڌ جو نئون انسپيڪٽر جنرل پوليس مقرر ڪري ڇڏيو آهي. ان جو نوٽيفڪيشن به جاري ڪيو ويو . سنڌ حڪومت آءِ جي سنڌ لاءِ وزيراعظم نواز شريف کي اي ڊي خواجه ۽ نثار مهر سميت 3 سينيئر پوليس آفيسرز جا نالا موڪليا هئا ۽ غلام حيدر جمالي کي عهدي تان هٽائڻ جي سفارش ڪئي هئي.جڏهن ته وزيراعظم نواز شريف، سنڌ حڪومت جي سفارش تي الله ڏنو عرف اي ڊي خواجه کي سنڌ پوليس جو نئون سربراهه مقرر ڪرڻ جي منظوري ڏئي ڇڏي آهي، اسٽيبلشمينٽ ڊويزن پاران ان جو نوٽيفڪيشن به جاري ڪيو ويو آهي .آءِ جي سنڌ غلام حيدر جمالي کي اسٽيبلشمينٽ ڊويزن کي رپورٽ ڪرڻ جون هدايتون ڏيون ويون آهن .اي ڊي خواجه کيس آءِ جي سنڌ مقرر ڪرڻ واري فيصلي جي تصديق ڪندي چيو آهي ته هو سنڌ پوليس جي بهتري لاءِ ڪردار ادا ڪندو رهندو.الله ڏنو عرف اي ڊي خواجه جو تعلق ٽنڊو محمد خان سان آهي ۽ اهو سنڌ جي 6 کان 7 ضلعن ۾ ايس ايس پي به رهي چڪو آهي، سندس بهترين رڪارڊ ۽ تجربي جي بنياد تي کيس آءِ جي سنڌ مقرر ڪيو ويو آهي.20 هين گريڊ جو آفيسر اي ڊي خواجه هن وقت سنڌ پوليس جي اسپيشل برانچ شعبي ۾ ايڊيشنل آءِ جي طور ڪم ڪري رهيو هو.

غلام حيدر جمالي خلاف ڪرپشن، ضابطه خلاف مقرريون ۽ عدالتي حڪمن جي ڀڃڪڙي سميت سپريم ڪورٽ ۽ سنڌ هاءِ ڪورٽ ۾ ڪيس هلي رهيا آهن، جڏهن ته هڪ ڪيس ۾ غلام حيدر جمالي مٿان فرد جرم به لاڳو ٿي چڪو آهي.سپريم ڪورٽ گذريل ڏينهن سنڌ پوليس ۾ غيرقانوني ڀرتين واري ڪيس ۾ آءِ جي سنڌ خلاف نيب کي جاچ ڪرڻ جي هدايت ڪئي هئي ۽  عدالت پنهنجي آبزرويشن ۾ چيو هو ته جاچ دوران آءِ جي ۽ ٻين جو عهدن تي رهڻ مناسب نه آهي.

سنڌ جي وڏي وزير سيد قائم علي شاهه سان نئين انسپيڪٽر جنرل سنڌ پوليس اي ڊي خواجه گذريل ڏينهن وزير اعليٰ هائوس ۾ ملاقات ڪئي. وڏي وزير نئين آءِ جي پوليس اي ڊي خواجه کي سڄي صوبي خاص طور ڪراچيءَ ۾ امن امان تي خاص توجهه ڏيڻ جي هدايتون ۽ گائيڊ لائين ڏني. سنڌ جي وڏي وزير سيد قائم علي شاهه پوليس ڊسيپلين تي خاص ڌيان ڏيڻ جون هدايتون ڏيندي اي ڊي خواجه کي چيو ته ٿاڻي ڪلچر کي بهتر بڻايو وڃي. وزير اعليٰ سنڌ چيو ته اي ڊي خواجه انتهائي ذميوار ۽ سٺي ساک رکندڙ آفيسر آهي ۽ اُميد ڪجي ٿي ته هُو سنڌ صوبي اندر امن ۽ امان جي معيار کي مثالي بڻائيندو.