تازيون خبرون

Daily Archives: March 12, 2016

سنڌ پوليس ۾ ڪرپشن ۽ غير قانوني ڀرتين جي جاچ نيب حوالي،آئي جي جو عهدي تي رهڻ مناسب ناهي: سپريم ڪورٽ

ڪراچي (اسٽاف رپورٽر) سپريم ڪورٽ سنڌ پوليس ۾ ڪروڙين رپين جي ڪرپشن ۽ غير قانوني ڀرتين جو معاملو جاچ لاءِ نيب جي حوالي ڪري ڇڏيو، نيب کي 4 هفتن ۾ جاچ ڪري رپورٽ پيش ڪرڻ جو حڪم ڏيندي چيو ويو آهي ته آءِ جي سنڌ تي سخت الزام آهن،سندس عهدي تي رهڻ مناسب ناهي، سپريم ڪورٽ سنڌ پوليس جي جاچ فنڊن ۾ ٿيل ڪرپشن ۽ غير قانوني ڀرتين جي ڪيس جو تحريري فيصلو جاري ڪري ڇڏيو ، 16 صحفن تي ٻڌل لکت واري فيصلي مطابق سپريم ڪورٽ پوليس ۾ ڪرپشن ۽ غير قانوني ڀرتين جو معاملو جاچ لاءِ نيب جي حوالي ڪري ڇڏيو آهي، عدالت آءِ جي سنڌ جي نظرثاني جون 2 درخواستون رد ڪري ڇڏيون آهن، عدالت چيف سيڪريٽري سنڌ کي هدايت ڪئي آهي ته ڪرپشن  ۽ ڀرتين بابت رڪارڊ کي محفوظ رکيو وڃي ۽ ان رڪارڊ تائين رڳو نيب اختيارين کي ئي پهچ ملڻ گهرجي، فيصلي ۾ سپريم ڪورٽ قرار ڏنو آهي ته جاچ ۾ وڏي پيماني تي ڪرپشن جي نشاندهي ڪئي وئي آهي ۽ ان جو ذميوار آءِ جي سنڌ ۽ ٻيا آفيسر آهن، تنهنڪري آءِ جي سنڌ ۽ ٻين ملوث آفيسرن جو عهدن تي برقرار رهڻ نامناسب آهي، ڇو ته  جاچ ڪاميٽي آءِ جي سنڌ ۽ ٻين آفيسرن خلاف ڪارروائي جي سفارش ڪئي آهي، عدالت  پنهنجي فيصلي ۾ حيرت جو اظهار ڪيو آهي ته آءِ جي سنڌ جاچ جي رپورٽ نه ملڻ تي ڪاميٽي جي ميمبرن کي ڊيڄاريو ۽ ڌمڪايو، جنهن رپورٽ کي سپريم ڪورٽ رد ڪيو، آءِ جي سنڌ ان کي بنياد بڻائي جاچ ڪاميٽي جي ميمبرن خلاف ڪارروائي شروع ڪري ڇڏي، عدالت اسٽيبلشمنٽ واري وفاقي سيڪريٽري ۽ چيف سيڪريٽري کي هدايت ڪئي آهي ته جاچ ڪاميٽي جي رپورٽ تي آءِ جي سنڌ غلام حيدر جمالي ۽ ٻين آفيسرن خلاف قانون مطابق ڪارروائي ڪري، سپريم ڪورٽ قرار ڏنو آهي ته جاچ ڪندڙ ڊي آءِ جيز بابت اي سي آر رپورٽ آءِ جي سنڌ نه پر چيف سيڪريٽري لکي.

 

عزير بلوچ جو پ پ سان ڪو واسطو ناهي، ڊاڪٽر عاصم لاءِ وڙهندو رهندس:آصف زرداري

ڪراچي (م.ڊ) اڳوڻي صدر آصف علي زرداري چيو آهي ته هو ملڪ ڇڏي ناهي ڀڳو پر آمريڪا علاج لاءِ پهتل آهي. هڪ انٽرويو ۾ آصف علي زرداري چيو ته عزير بلوچ جي گرفتاري جا وارنٽ پ پ سان نه ڳنڍيا وڃن. سندس چوڻ هو ته عزير بلوچ جو پيپلز پارٽي سان ڪو واسطو ناهي، پيپلز پارٽي جو خراب نه پر سٺو وقت هلي رهيو آهي. آصف زرداري جو چوڻ هو ته سندس آمريڪا ۾ دفن ٿيڻ جو ڪو به ارادو ناهي، هو ڏيهه واپس ضرور موٽندو. اڳوڻي صدر چيو ته پيپلز پارٽي ختم ٿيڻ جون ڳالهيون اڳ به ٿينديون رهيون آهن، کين اهڙين ڳالهين جي ڪابه پرواهه ناهي. اينٽ سي اينٽ سان سر وڄائڻ جي بيان کي غلط انداز ۾ پيش ڪيو ويو، پ پ کي هميشه غلط طور تي پيش ڪيو ويو آهي، ۽ ذوالفقار علي ڀٽو تي اڄ ڏنهن تائين تنقيد ڪئي ويندي آهي، هن چيو ته ڪنهن سان به جهيڙو ناهي، پر سسٽم سان گڏ هلڻ چاهيون ٿا، هن چيو ته اينٽ سي اينٽ اپوزيشن جي وڄائي سگهون ٿا. جيڪي پوليٽيڪل فورسز اسان سان وڙهن ٿيون پر اسان جمهوريت کي بچائڻ چاهيون ٿا. ڊاڪٽر عاصم منهنجي انتهائي ويجهن دوستن مان هڪ آهي جنهن جي لاءِ هميشه وڙهندو رهندس جڏهن ڊاڪٽر عاصم لنڊن ۾ هيو ۽ مان دبئي ۾ هيس ته ڊاڪٽر عاصم واپس ويو ته ان کي گرفتار ڪيو ويو، مون کي تمام گهڻيون بيماريون آهن جن جو علاج ڪرائڻ لاءِ وقت ئي نه مليو ۽ جڏهن ٻاهرين ملڪ آيس ته مخالفن ۽ دوستن ان جو فائدو کڻي ورتو.

 

زرعي شعبي تي ماحولياتي تبديلي جا اثر گهٽائڻ لاءِ قدم کڻڻ گهرجن: وزيراعظم

اسلام آباد (اين اين آءِ) وزيراعظم محمد نواز شريف چيو آهي ته زرعي شعبي تي ماحولياتي تبديلي جا اثر گهٽائڻ لاءِ قدم کڻڻ گهرجن جمعي تي وزيراعظم نواز شريف زرعي شعبي کي مسلسل دٻاءَ ۾ رکڻ بابت مختلف مسئلن جو نوٽيس وٺندي هن چيو ته جاچ ادارن کي ٻيهر فعال بنائڻ گهرجي. هن قومي تحفظ خوراڪ جي وزارت کي هدايت ڪئي ته هو زرعي شعبي جي ترقي لاءِ صوبائي حڪومتن ۽ لاڳاپيل شعبن سان گڏجي مشاورتي عمل شروع ڪري هن پارٽي جي ذخيرن جو موثر استعمال ۽ پاڻي مهيا ڪرڻ لاءِ ڊگهي مدي واري پاليسي جي ضرورت تي زور ڏنو. ٻئي طرف وزيراعظم محمد نواز شريف سي ايس ايس امتحان ۾ عمر جي حد 28 سالن مان 30 سال ڪرڻ واري سمري رد ڪري ڇڏي اسٽيبلشمينٽ ڊويزن پاران وزيراعظم نواز شريف کي سي ايس ايس امتحان لاءِ عمر جي حد وڌائڻ جي سمري اماڻي وئي هئي جنهن ۾ سفارش ڪئي وئي هئي ته سي ايس ايس لاءِ عمر جي حد 28 بدران 30 سالن تائين ڪئي وڃي سمري ۾ موقف اختيار ڪيو ويو ته حڪومت کي گهٽ عمري ۾ سول سروس ۾ ايندڙ ماڻهن جي حوصلا افزائي ڪرڻ گهرجي. وزيراعظم نواز شريف اسٽيبلشمينٽ ڊويزن جي سمري کي ڪيترن ئي رخن جي فقدان جي بنياد تي رد ڪري ڇڏيو جڏهن ته وزيراعظم جو چوڻ هوته 16 سالن ۾ پوسٽ گريجوئيشن ڪرڻ کانپوءِ هڪ اميدوار 28 سالن جي ڄمار تائين سي ايس ايس امتحان پاس ڪرڻ لاءِ ٽي موقعا آساني سان حاصل ڪري سگهي ٿو.

 

سنڌ پوليس ۾ واڌو ڀرتين ۽ گهوٻين جو وڏي وزير نوٽيس ورتو، جاچ جو حڪم

ڪراچي (اسٽاف رپورٽر) سنڌ جي وڏي وزير سيد قائم علي شاهه سنڌ پوليس تي سخت ناراضگي ۽ ڪاوڙ جو اظهار ڪندي اينٽي ڪرپشن کاتي کي سنڌ پوليس ۾ غير قانوني ڀرتين، انويسٽيگيشن فنڊز جي غير منصفاڻي ورهاست ۽ ڪجهه پوليس آفيسرن جي مبينا سنگين ڏوهن ۾ ملوث هئڻ وارن معاملن جي جاچ ڪرڻ جو حڪم ڏنو آهي. وزير اعليٰ هائوس مان جاري ٿيل بيان ۾ ٻڌايو ويو آهي ته وزير اعليٰ سنڌ سيد قائم علي شاهه پوليس کاتي ۾ ضرورت کان وڌيڪ ڀرتيون ڪرڻ تي سخت ناراضگيءَ جو اظهار ڪيو آهي. هن چيو آهي ته مون نوَ هزار ڀرتيون ڪرڻ جي منظوري ڏني هئي جنهن لاءِ ضلعي سطح تي سليڪشن ڪميٽيون به جوڙيون ويون هيون پوءِ ان جي باوجود 9000 کان وڌيڪ ڀرتيون ڪهڙيءَ طرح ٿيون، مان اهڙي قسم جي رويي ۽ اختيارن جي ناجائز استعمال ڪنهن به صورت ۾ برداشت نه ڪندس. وڏي وزير چيف سيڪريٽري سنڌ صديق ميمڻ کي سنڌ پوليس جي انڪوائري ڪرڻ لاءِ اينٽي ڪرپشن کاتي کي ٻن هفتن اندر رپورٽ پيش ڪرڻ جي هدايت ڪئي. هن ٻڌايو ته مان اها جاچ لاءِ چيف منسٽر انسپيڪشن ٽيم کي به ڏني آهي جنهن جي رپورٽ جو انتظار آهي. هن چيف سيڪريٽريءَ کي هدايت ڏني ته انسپيڪشن ٽيم کي پنهنجي طريقي سان جاچ مڪمل ڪرڻ ڏيو ۽ به انٽي ڪرپشن کان به انڪوائري ڪرايو. پوليس ۾ انويسٽيگيشن لاءِ رکيل فنڊز جي غير منصفاڻي ورهاست ۽ ناجائز استعمال جي حوالي سان ڳالهائيندي سنڌ جي وڏي وزير چيو ته مون انويسٽيگيشن جي خرچ لاءِ خصوصي فنّڊز جاري ڪرڻ جي منظوري ڏني هئي ته جيئن بهتر طريقي سان ڪيسن جي انڪوائري ٿي سگهي پر اهو ڇا ٿي رهيو آهي ۽ ڇو اهڙي سنجيده معاملن تي به اهڙي قسم جي لاپرواهي ۽ غيرذميوريءَ جو مظاهرو ڪيو پيو وڃي. هن چيف سيڪريٽري سنڌ صديق ميمڻ کي ان معاملي تي اينٽي ڪرپشن کان نه رڳو جاچ ڪرائڻ جي هدايت ڪئي بلڪه کين حڪم ڏنو ته غير ذميواري ۽ لاپرواهي ڪندڙ آفيسرن جي نشاندهي ڪئي وڃي ۽ مان اهڙن آفيسرن کي به معاف نه ڪندس. سنڌ جي وڏي وزير سيد قائم علي شاهه ڪجهه پوليس آفيسرن جي شڪي ريڪارڊ جي حوالي سان رپورٽس جو سختيءَ سان نوٽيس وٺندي چيو ته پوليس آفيسرن جي ذميواري آهي ته هُو ماڻهن جي جان ۽ مال جي حفاظت ڪن پر انهن جي ڏوهاري سرگرمين ۾ ملوث هئڻ انتهائي ڳڻتيءَ جوڳو آهي. هن پوليس کاتي کي هدايت ڪئي ته کاتي جي اهڙن آفيسرن کي فوري طور تي هٽايو وڃي. هن چيف سيڪريٽري سنڌ کي هدايت ڪئي ته سنگين ڏوهن ۾ ملوث پوليس آفيسرن خلاف اينٽي ڪرپشن کاتي کان جاچ ڪرائي وڃي ۽ سپريم ڪورٽ ۾ جمع ڪيل رپورٽ به مون کي پيش ڪئي وڃي ته جيئن ضروري قدم کنيا وڃن. هن چيف سيڪريٽري کي ان رپورٽ جو ذاتي طور تي جائزو وٺڻ ۽ کين سفارشون موڪلڻ جي به هدايت ڪئي.

 

آمريڪي سينيٽ ۾ پاڪستان کي ايف 16 جهاز ڏيڻ خلاف پيش ڪيل ٺهراءُ رد

واشنگٽن (م.ڊ) آمريڪي سينيٽ پاڪستان کي ويڙهه وارا ايف 16 جهاز ڏيڻ جي خلاف پيش ڪيل ٺهراءُ رد ڪري ڇڏيو.آمريڪي سينيٽ ۾ ريپبليڪن پارٽي جي سينيٽر رينڊ پال پاڪستان کي ايف 16 جهاز ڏيڻ خلاف ايوان  ۾ ٺهراءُ پيش ڪيو،جنهن جي ايوان مخالفت ڪئي ۽ سندس ٺهراءُ کي رد ڪري ڇڏيو.ريپبليڪن پارٽي جي سينيٽر پاران پيش ڪيل ٺهراءُ جي حمايت ۾ 24 جڏهن ته مخالفت ۾ 71 ووٽ وڌا ويا.پاڪتان کي ايف 16 جهاز خريد ڪري ڏيڻ جي خلاف ٺهراءُ رد ٿيڻ تي آمريڪا ۾ مقرر پاڪستاني سفير جليل عباس جيلاني جو چوڻ آهي ته آمريڪا جي ڀائيواري خطي  جي سلامتي لاءِ ضروري آهي.پاڪستان دهشتگرديءَ جهڙي لعنت کي خاتمي جي لاءِ پُر عزم آهي.

 

ايشيا دنيا جو سڀ کان فعال خطو آهي: سرتاج عزيز

اسلام آباد(اي پي پي) پرڏيهي صلاحڪار سرتاج عزيز چيو آهي ته ايشيا دنيا جو سڀ کان فعال خطو آهي، ترقي جو سفر جاري رکيو ته 21 هين صدي ايشيا جي آهي. گذريل ٽن ڏهاڪن کان ايشيا تيزي سان ترقي طرف گامزن آهي، پاڪستان، چين، ڏکڻ ايشيا ۽ اولهه ايشيا سان ڪاسا 1000، تاپي، ايران-پاڪستان گئس پائيپ لائين ۽ پاڪ چين اقتصادي ڪوريڊور جهڙن منصوبن تي ڪم ڪري رهيو آهي. ايندڙ سالن ۾ ايشيا جو عالمي معيشت ۾ اهم ڪردار هوندو. اهڙن خيالن جو اظهار هن بئنڪاڪ ۾ ايشيا ڪو آپريشن ڊائيلاگ (اي ڊي سي) جي 14 هين وزارتي سطح جي اجلاس کي خطاب ڪندي ڪيو. سرتاجعزيز چيو ته گذريل سال عالمي معيشت جي اوسر 3.1 سيڪڙو هئي جڏهن ته ايشيا جي اوسر 5.4 سيڪڙو رڪارڊ ڪئي وئي. اها اوسر هلندڙ سال به متوقع آهي ۽ ايندڙ سالن ۾ ايشيا جي معيشت عالمي معيشت کان گوءِ کڻي ويندي پر اسان کي ڪجهه سيڪيورٽي ۽ سياسي چئلينج به درپيش آهن. پنهنجن سڀني صلاحيتن کي استعمال ڪرڻ لاءِ ۽ انهن چئلينجن تي ضابطو آڻڻ لاءِ ويجهي سهڪار جي ضرورت آهي، ان مقصد لاءِ اي ڊي سي بهترين فورم آهي، سرتاج عزيز چيو ته پاڪستان علائقائي رابطن لاءِ تيار ڪيل روڊ ميپ سان اتفاق ڪري ٿو. رابطن جو ملڪن کي هڪ ٻئي جي ويجهو آڻڻ ۾ اهم ڪردار آهي. علائقائي رابطن کي مواصلاتي انقلاب ۽ ڊجيٽل هاءِ ويز ذريعي وڌائي سگهجي ٿو. هن چيو ته پاڪستان ڪاسا 1000، تاپي، آءِ ڇي توانائي منصوبن ذريعي وچ ايشيائي پاڙيسري ملڪن سان رابطن تي ڪم ڪري رهيو آهي، ان کان علاوه پاڪستان سي پي اي سي تي به تيزي سان ڪم ڪري رهيو آهي

 

عدليا پ پ جي حق ۾ ڪڏهن به فيصلو ناهي ڏنو،ملڪ ۾ احتساب جو ٻٽو معيار آهي:بلاول ڀٽو

لاهور (م.ڊ) پ پ چيئرمين بلاول ڀٽو زرداري چيو آهي ته ملڪ ۾ احتساب جو ٻٽو معيار آهي، عدليا طرفان پ پ جي حق ۾ ڪڏهن به فيصلو ناهي آيو پ پ چيئرمين بلاول ڀٽو زرداري لاهور ۾ سينيٽ ۾ مخالف ڌر جي اڳواڻ اعتزاز احسن سان سندس رهائشگاهه تي ملاقات ڪئي. ملاقات دوران ملڪ جي تازي سياسي صورتحال، خاص طور پنجاب ۾ پارٽي کي مضبوط ڪرڻ بابت خيالن جي ڏي وٺ ڪئي وئي. ان موقعي تي ڳالهائيندي بلاول ڀٽو زرداري چيو ته سنڌ ۽ پنجاب ۾ مختلف رويا اختيار ڪيا ويا آهن. سندس چوڻ هو ته سنڌ ۾ سرڪاري آفيسن مان سرعام فائلون کنيون وڃن ٿيون، جڏهن ته پنجاب ۾ اورنج لائين ۾ ڇا پيو ٿئي، ان کي ڪو ڏسڻ وارو ناهي. پ پ چيئرمين چيو ته جيڪڏهن پنجاب جي سرڪاري آفيسن مان فائلون کنيون وڃن ته پوءِ شهباز شريف جو ڪهڙو رد عمل هوندو ۽ هو ڇا سوچيندو ؟ هن چيو ته پارٽي ۾ هيٺان کان مٿان تائين تبديليون آنديون وينديون، جنهن جو فيصلو هو نه پر ايگزيڪيٽو ڪميٽي ڪندي. بلاول ڀٽو زرداري چيو ته هو سمورين ڌرين سان گڏجي جمهوريت جي مضبوطي لاءِ ڪم ڪرڻ چاهين ٿا. هن چيو ته سينيئر اڳواڻن جي مدد سان پنجاب ۾ پ پ کي اڳ جيان مضبوط ڪيو ويندو.002

 

سڄي ملڪ ۾ برسات جا راڱان، عورت ۽ 4 ٻارڙن سميت 7 فوت

ڪراچي (م.ڊ) سنڌ سميت سڄي ملڪ ۾ برساتن جو سلسلو جاري آهي، بلوچستان جي اڪثر علائقن ۾ برسات تباهي مچائي ڇڏي، ڇت ڪرڻ ۽ حادثن ۾7 ڄڻا فوت ۽ 11ڄڻا زخمي ٿي پيا. سنڌ سميت سڄي ملڪ ۾ برساتن جو سلسلو جاري آهي، بلوچستان جي اڪثر علائقن ۾ برسات تباهي مچائي ڇڏي، ڇت ڪرڻ ۽ حادثن ۾7 ڄڻا فوت ۽ 11ڄڻا زخمي ٿي پيا. برسات سبب بلوچستان جي مختلف علائقن ۾ ڪيترائي ڪچا گهر پٽ ٿي ويا ۽ گهرن جون ڇتيون ڪري پيون، جڏهن ته ندين نالن ۾ پاڻي جي چاڙهه سبب ٻوڏ جهڙي صورتحال پيدا ٿي وئي آهي. شيراڻي ۾ گهر جي ڇت ڪرڻ سبب هڪ ئي ڪٽنب جا 5 ڀاتي فوت ۽ چمن ۾ حادثن سبب 2 ڄڻا فوت ٿي پيا. برسات سبب هيٺاهين وارا علائقا پاڻي هيٺ اچي ويا ۽ چمن سميت مختلف روڊ لڙهي ويا، جهل مگسي ڊيم جو بند ٽٽڻ سبب ٻوڏ جهڙي صورتحال ٿي وئي آهي. موسميات کاتي موجب دالبندين ۾ 22، پنجگور ۾ 11، سبي ۾ 22 ۽ قلات ۾ ملي ميٽر برسات رڪارڊ ڪئي وئي. موسميات کاتي پاران پنجاب، سنڌ، ڪي پي ڪي ۽ بلوچستان ۾ وڌيڪ برسات جي اڳڪٿي پڻ ڪئي وئي. وڌيڪ برسات جي اڳڪٿين کانپوءِ ڪمشنر ڪوئيٽا هنگامي صورتحال لاڳو ڪندي عملي جون موڪلون رد ڪري تيار رهڻ جي هدايت ڪري ڇڏي آهي. هوڏانهن سنڌ سميت ڪراچي ۾ هلڪي برسات ۽ تيز هوا مختلف علائقن ۾ بجلي بند ٿي وئي. محمود آباد، منظور ڪالوني، گلشن اقبال، صدر، فيڊرل بي ايريا، گلستان جوهر، رنڇوڙ لائن سميت ٻين علائقن ۾ بجلي بند ٿي وئي. ڪي اليڪٽرڪ ترجمان جو چوڻ آهي هاءِ ٽينشن لائن ۾ فني خرابي سبب ڪجهه گرڊ اسٽيشن ٽرپ ٿي ويا. ترجمان موجب گرڊ اسٽيشن تي مرمتي ڪم جاري آهي،جلد بجلي بحال ڪئي ويندي. ڪنڌڪوٽ، جيڪب آباد، نوابشاهه، نارَي، گڊو ۽ ٻين شهرن ۾ برسات کانپوءِ موسم خوشگوار، بلوچستان ۾ طوفاني برساتن سبب ندي نالن ۾ ٻوڏ، روڊ رستا پاڻيءَ ۾ لڙهي وڃڻ سبب مختلف علائقن جو رابطو ڪٽجي ويو، موسميات کاتي موجب صوبي اندر وڌيڪ ٻن ڏينهن تائين برسات جو سلسلو جاري رهندو. جيڪب آباد، ڪشمور، نوابشاهه، کڏڙَي، نارَي، سڪرنڊ ۽ گڊو سميت سنڌ جي مختلف علائقن ۾ وسڪاري کانپوءِ موسم خوشگوار ٿي وئي آهي. بلوچستان جي ڪوئيٽا سميت مختلف علائقن ۾ برساتن جو نئون سلسلو جاري آهي، پنجگور، دالبندين، سبي، قلات ۽ ڪوئيٽا سميت ٻين ٻين علائقن ۾ طوفاني برسات سبب هيٺانهين وارا علائقا پاڻي هيٺ اچي ويا آهن. مختلف علائقن ۾ طوفان سان برسات سبب گهرن جون ڇتيون اڏامي ويون، جڏهن ته چمن ۾ شديد وسڪاري سبب روڊ رستا پاڻيءَ ۾ لڙهي ويا آهن. ڪوئيٽا، مڪران، سبي، دالبندين، زوب، چمن ۽ ٻين علائقن ۾ زوردار وسڪارو ٿيو، جڏهن ته مچ ۾ برسات سبب گاڏيءَ سان حادثي جي نتيجي ۾ 2 ڄڻا فوت ۽ 11 زخمي ٿي پيا. جهل مگسي ۾ ڊيم جا بند ٽٽڻ سبب ٻوڏ واري صورتحال پيدا ٿي وئي، ڪوئيٽا، قلعه عبدالله، پشين، چاغي ۽ نوشڪي جي ڊپٽي ڪمشنرز کي هنگامي حالتن کي منهن ڏيڻ لاءِ تيار رهڻ جي هدايت ڪئي وئي آهي. موسميات کاتي موجب بلوچستان جي مختلف علائقن ۾ وڌيڪ ٻن ڏينهن تائين برساتن جو سلسلو جاري رهندو. ڊيرا اسماعيل خان، ٽانڪ، موسيٰ خيل، فيصل آباد، ٽوبه ٽيڪ سنگهه، ملتان، راجن پور، ڀڪر سرگوڌا، صوابي، چترال، جهانيان، غذر، ملتان، مظفر ڳڙهه، مظفرآباد ۽ شورڪوٽ سميت ٻين علائقن ۾ هلڪي ۽ زوردار برسات کانپوءِ هيٺانهين وارا علائقا پاڻي هيٺ اچي ويا آهن. پشاور ۽ ڀرپاسي گذريل رات کان برساتن جو سلسلو جاري آهي، جنهن سبب موسم خوشگوار بڻجي وئي آهي.

 

فاروق ستار مظلوم آهي،هن جي پريشانين ۾ اضافو نٿو ڪرڻ چاهيان، اسان جي پارٽي قومي سياست ڪندي: مصطفيٰ ڪمال

ڪراچي (اسٽاف رپورٽر) اڳوڻي سٽي ناظم مصطفيٰ ڪمال چيو آهي ته ڊاڪٽر فاروق ستار مظلوم ۽ معصوم ماڻهو آهي، هو سندس پريشانين ۾ اضافو نه ٿو ڪرڻ چاهي. اڳوڻي سٽي ناظم مصطفيٰ ڪمال چيو آهي ته ڊاڪٽر فاروق ستار مظلوم ۽ معصوم ماڻهو آهي، هو سندس پريشانين ۾ اضافو نه ٿو ڪرڻ چاهي ڪراچيءَ ۾ ميڊيا سان ڳالهائيندي مصطفيٰ ڪمال چيو ته هو فاروق ستار جي ڪابه ڳالهه دل ۾ نه ڪندو آهي. هن چيو ته هو بندوق ڇڏڻ جي ڳالهه ڪري رهيا آهن ۽ پارٽيءَ ۾ عورتن کي به شامل ڪيو پيو وڃي.مصطفيٰ ڪمال چيو ته هنن اڃا پنهنجي پارٽيءَ جي نالي جو فيصلو نه ڪيو آهي. هن چيو ته هنن پارٽيءَ ۾ شامل ٿيڻ سان سڄي ملڪ جي ماڻهن کي دعوت ڏني آهي. سندس چوڻ هو ته هو ننڍي چونڊ ۾ حصو نه وٺندا، هو سياست ڪرڻ آيا آهن ۽ سياست ئي ڪندا. مصطفيٰ ڪمال چيو ته هو اڃا پنهنجي پارٽيءَ کي منظم ڪرڻ جي ڪوششن ۾ آهن. هن چيو ته سندن پارٽي لساني نه پر قومي سياست ڪندي، هو ڪنهن به قسم جي تشدد خلاف آهن.002

 

اسان عوام لاءِ ۽ مصطفيٰ ڪمال ڪنهن ٻئي لاءِ ڪم پيو ڪري: وسيم اختر

ڪراچي (اين اين آءِ) ايم ڪيو ايم جي سينيئر اڳواڻ ۽ ڪراچي جي نامزد ميئر وسيم اختر چيو ته اسان عوام لاءِ ۽ مصطفيٰ ڪمال ڪنهن ٻئي لاءِ ڪم ڪري رهيو آهي ڪراچي ۾ ميڊيا سان ڳالهائيندي وسيم اختر ڪراچي جي اڳوڻي ميئر مصطفيٰ ڪمال جي سياسي سرگرمين بابت ڳالهائڻ کانا نڪار ڪري ڇڏيو آهي وسيم اختر چيو ته مان مصطفيٰ ڪمال بابت ڪائي ڳالهه نٿو ڪرڻ چاهيان اسان عوام لاءِ ڪم ڪري رهيا آهيون ۽ هو ڪنهن ٻئي لاءِ ڪم ڪري رهيو آهي.