تازيون خبرون

Daily Archives: March 11, 2016

آءِ جي سنڌ غير قانوني ڀرتين ۾ملوث آهي، جاچ ڪميٽي رپورٽ سپريم ڪورٽ ۾ پيش ڪري ڇڏي

ڪراچي (اسٽاف رپورٽر) سنڌ پوليس ۾غيرقانوني ڀرتين ۽ جاچ ونگ فنڊن جي غلط استعمال بابت ٻڌڻي دوران آءِ جي سنڌ پوليس ۾ غيرقانوني ڀرتين جو اعتراف ڪري ورتو، جاچ ڪميٽي رپورٽ ۾ ڄاڻايو آهي ته آءِ جـِي سنڌ، ڊي آءِ جِي فنانس فدا حسين شاهه، ڊي آءِ جي مظهر شاهه، ايس ايس پي غلام نبي ڪيريو سميت 7 پوليس آفيسر غير قانوني ڀرتين ۾ ملوث آهن، جاچ ونگ فنڊ 99 سيڪڙو روڪ جي صورت ۾ جاري ڪيا ويا . سپريم ڪورٽ، آءِ جِي سنڌ جي جسٽس امير هاني مسلم جي سربراهي ۾ ٽه رڪني بينچ سنڌ پوليس ۾غيرقانوني ڀرتين ۽ جاچ ونگ فنڊن جي غلط استعمال بابت ڪيس جي ٻڌڻي ڪئي. ٻڌڻي دوران ايڊيشنل آءِ جي ثناءَ الله عباسي جي سربراهي ۾ اي ڊي خواجه ۽ سلطان احمد خواجه تي ٻڌل ڪميٽي پاران جمع ڪرايل رپورٽ ۾ ڄاڻايو ويو ته حيدرآباد ريزرو پوليس ۾ 2012 کان 2015 دوران انهن اميدوارن کي ڀرتي ڪيو ويو، جن جي عمر وڏي هئي، جڏهن ته ڪجهه اميدوار جسماني ٽيسٽ ۾ فيل به هئا. رپورٽ ۾ وڌيڪ ڄاڻايو ويو ته ڪراچي ريزرو پوليس ۾ 794 جاين تي 993 اميدوارن کي ڀرتي ڪيو ويو. رپورٽ ۾ ڄاڻايو ته سکر ريزرو پوليس ۾ 574 اميدوار ڀرتي ڪيا ويا، جڏهن ته ڀرتيون پئسن عيوض ڪيون ويون. رپورٽ ۾ ڊي آءِ جي فنانس فدا حسين شاهه، آءِ جي غلام حيدر جمالي، ايس ايس پي غلام نبي ڪيرئي، ڊي آءِ جي مظهر شاهه ، اعتزاز احمد گوريا، سيد سلمان شاهه ۽ انسپيڪٽر اسلم لانگاهه کي غيرقانوني ڀرتين ۾ ملوث قرار ڏيندي چيو ويو ته 2013 ۾ 85 جاين تي 393 ماڻهو ڀرتي ڪيا ويا. رپورٽ ۾ ڄاڻايو ويو ته ڀرتين جا اشتهار ڊمي اخبارن ۾ شايع ڪرايا ويا، جڏهن ته اميدوارن جي ڇاتي ۽ ڊيگهه ساڳي ڏيکاري وئي آهي. رپورٽ ۾ وڌيڪ ڄاڻايو ويو آهي ته هڪ اميدوار جي عمر 47 سال هئڻ باوجود ڀرتي ڪيو ويو، جڏهن ته ڀرتين ۾ ڊي آءِ جي ايس آر پيز کي مڪمل طور نظرانداز ڪيو ويو. رپورٽ ۾ فنڊن بابت ڄاڻايو ويو آهي ته جاچ فنڊ جي 99 سيڪڙو رقم روڪ جاري ڪئي وئي، جڏهن تهمٽياري، دادو، ڪشمور ۽ مٺي ۾ فنڊن جي وڌيڪ رقم جاري ڪئي وئي. رپورٽ ۾ وڌيڪ ڄاڻايو ويو آهي ته اسپيشل برانچ کي به 50 لک رپيا جاري ڪيا ويا، جيڪو غيرقانوني عمل آهي ۽ اها برانچ جاچ ونگ ۾ نه ٿي اچي. رپورٽ ۾ اهو به انڪشاف ڪيو ويو آهي ته جاچ ونگ فنڊ ۾ وڏي پئماني تي ڪرپشن ڪئي وئي آهي، جڏهن ته رڳو ڪراس چيڪ ذريعي ئي فنڊ جاري ڪري سگهجن ٿا. ٻڌڻي دوران جسٽس عظمت سعيد رماڪس ڏنا ته سرڪاري پئسو روڪ جاري ڪرڻ غيرقانوني عمل آهي. ٻڌڻي دوران جسٽس عظمت سعيد آءِ جي سنڌ غلام حيدر جمالي کان پڇاڻو ڪيو ته ملوث آفيسرن خلاف ڪهڙي ڪارروائي ڪئي وئي آهي. آءِ جي سنڌ غلام حيدر جمالي عدالت کي ٻڌايو ته غيرقانوني ڀرتين بابت آفيسرن کان وضاحت طلب ڪئي وئي آهي . ٻڌڻي دوران جسٽس خلجي عارف رمارڪس ڏنا ته ان جو مطلب ته اداري جو سربراهه ئي غيرقانوني ڀرتين ۾ ملوث آهي. آءِ جي سنڌ عدالت کي ٻڌايو ته ته جاچ ڪميٽي ۾ شامل آفيسر پاڻ غيرقانوني ڀرتين ۾ ملوث آهن،جنهن ڪري ٻئي ڪميٽي جوڙي وڃي، جن جو ان معاملي سان ڪو واسطو نه هجي. آءِ جي چيو ته حيدرآباد ۾ 500 غيرقانوني ڀرتي ٿيندڙن اهلڪارن کي برطرف ڪيو آهي ،. جڏهن ته شڪارپور، سکر ، حيدرآباد ۾ جعلي ڀرتي ٿيندڙن کي هٽايو ويو آهي. ان کان اڳ ٻڌڻي دوران آءِ جي سنڌ جي جسٽس امير هاني مسلم خلاف داخل ڪيل بي اعتمادي واري درخواست رد ڪري ڇڏي، جڏهن ته آءِ جي سنڌ غلام حيدر جمالي جو چوڻ آهي ته سندس عزت جو آرٽيڪل 14 تحت خيال نه رکيو ويو آهي. سپريم ڪورٽ جي جسٽس امير هاني مسلم جي سربراهي ۾ ٽه رڪني بينچ سنڌ پوليس ۾ غيرقانوني ڀرتين ۽ جاچ ونگ فنڊن جي غلط استعمال بابت ڪيس جي ٻڌڻي ڪئي. آءِ جي سنڌ غلام حيدر جمالي عدالت ۾ درخواست داخل ڪرائيندي موقف اختيار ڪيو ته جسٽس امير هاني مسلم جاچ ڪميٽي سان رابطي ۾ آهي، جنهن ڪري اهو ڪيس جي ٻڌڻي نه ٿو ڪري سگهي. آءِ جي سنڌ درخواست ۾ وڌيڪ موقف اختيار ڪيو ته جسٽس امير هاني مسلم جو رويو تعصباڻو آهي ۽ هن نازيبا لفظ استعمال ڪيا آهن. عدالت آءِ جي سنڌ جي بي اعتمادي واري درخواست رد ڪري ڇڏي، جڏهن ته جسٽس امير هاني مسلم رمارڪس ڏنا ته هو رڳو الله آڏو جوابده آهي ۽ هو ميرٽ تي ڪيس هلائي رهيو آهي. جسٽس امير هاني مسلم وڌيڪ رمارڪس ڏنا ته هو بينچ کان ڌار نه ٿيندو. جسٽس امير هاني مسلم وڌيڪ رمارڪس ڏنا ته جيڪڏهن آءِ جي سنڌ کي خدشا آهن ته هو نظرثاني واري درخواست داخل ڪرائي.

 

فشرمين ڪو آپريٽو سوسائيٽي جو چيئرمين نثار مورائي گرفتار، اڻڄاتل هنڌ منتقل

اسلام آباد (بيورو) ايف آءِ اي، فشرمين ڪو آپريٽو سوسائيٽي جي چيئرمين نثار مورائي کي اسلام آباد ۾ گرفتار ڪري ورتو. ذريعن موجب نثار مورائي کي ڪرپشن ۽ پابندي مڙهيل پيپلز امن ڪاميٽي جي سربراهه عذير بلوچ سان رابطن جي الزام هيٺ حراست ۾ ورتو ويو آهي. ٻڌايو پيو وڃي ته فشرمين ڪو آپريٽو سوسائيٽي جي چيئرمين کي گرفتاري کانپوءِ پڇاڳاڇا لاءِ اڻڄاتل هنڌ منتقل ڪيو ويو آهي. امڪان ظاهر ڪيو پيو وڃي ته نثار مورائي کي جلد سنڌ پوليس حوالي ڪيو ويندو. ذريعن موجب فشرمين ڪو آپريٽو سوسائيٽي جي چيئرمين کي ڪنهن به وقت ڪراچي منتقل ڪيو ويندو.

 

جلسا ۽ پريس ڪانفرنسون مني لانڊرگ ڪيس کي انجام تي نٿيون پهچائي سگهن: چوڌري نثار

اسلام آباد (بيورو) سرفراز مرچنٽ جي الزامن بابت ايف آءِ اي جي جاچ جاري آهي ۽ کيس نوٽس به جاري ڪيو ويو آهي وفاقي گهرو وزير چوڌري نثار واضح ڪيو آهي ته ڀارت طرفان حڪومتي سطح تي سڪيورٽي جي خاطري ڪرائڻ تائين قومي ڪرڪيٽ ٽيم ڀارت نه موڪلي ويندي. اسلام آباد ۾ پريس ڪانفرنس ڪندي چوڌري نثار چيو ته حڪومتي سطح تي ڀارت طرفان اڃا تائين سڪيورٽي جي خاطري نه ڪرائي وئي آهي. هن چيو ته هر پاڪستاني چاهي ٿو ته قومي ٽيم ٽي ٽوئنٽي ورلڊڪپ ۾ شرڪت لاءِ ڀارت وڃي، پر رانديگرن تي ڪنهن به قسم جو دٻاءُ نه هجڻ گهرجي. سندس چوڻ هو ته رانديگرن کي تحفظ فراهم ڪرڻ حڪومت جي ذميواري آهي، بي سي سي آءِ ۽ آءِ سي سي مان کين ڪا به شڪايت نه آهي. گهرو وزير چيو ته بي سي سي آءِ طرفان لکت ۾ بيان کين ملي ويو آهي. چوڌري نثار چيو ته ڀارت ۾ رڳو پاڪستاني ٽيم کي ئي ڌمڪيون ڏنيون پيون وڃن، ڌمڪين سان ڪرڪيٽ ڪيئن ٿي سگهندي؟ هن چيو ته سرفراز مرچنٽ جي الزامن بابت ايف آءِ اي جي جاچ جاري آهي ۽ کيس نوٽس به جاري ڪيو ويو آهي. هن چيو ته سرفراز مرچنٽ پنهنجن وڪيلن سان صلاح مشوري کان پوءِ پاڪستان ايندو. گهرو وزير چيو ته ڊگهين پريس ڪانفرنسن ۽ بيانن سان ڪيس کي انجام تائين نه ٿو پهچائي سگهجي. هن چيو ته بيان ڏيندڙن کي خبر نه آهي ته مني لانڊرنگ ڪيس ۽ شاهدَ لنڊن ۾ آهن. وفاقي گهرو وزير چيو ته سرفراز مرچنٽ بيان ڏيڻ سان گڏوگڏ شاهديون به ڏيندو، سندس پاڪستان آمد ڳجهي رکي ويندي.چوڌري نثار چيو ته متحده سان ڀلي سندس لاڳاپا ٺيڪ نه هجن پر انصاف ٿيندو.

 

سعودي عرب ۾ دنيا جون سڀ کان وڏيون فوجي مشقون، وزيراعظم ۽ آرمي چيف جي شرڪت

رياض (اين اين آءِ) وزيراعظم نوازشريف ۽ راحيل شريف سعودي عرب ۾ ٿيندڙ دنيا جي سڀ کان وڏين فوجين مشقن جو معائنو ڪيو رپورٽ موجب سعودي عرب ۾ ٿيندڙ رعدل شمال مشقن ۾ پاڪستان سميت 21 ملڪن جون فوجون شامل آهن وزيراعظم ۽ آرمي چيف فوجي مشقن جي پڄاڻي واري تقريب دوران فوجين جي ماهراڻي صلاحيتن جو جائزو ورتو فوجي مشقن ۾ سعودي قيادت سميت ٻين ملڪن جا سربراهه ۽ اڳواڻ به شريڪ ٿيا.

 

ايم ڪيو ايم اسٽيبلشمينٽ جي بي بي هئي جنهن کي 1983 ۾ تيار ڪيو ويو: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ ۽ پ پ پ جي سينيئر اڳواڻ خورشيد شاهه چيو اهي ته ايم ڪيو ايم اسٽيبلشمينٽ جي بي بي هئي جنهن کي 1983 ۾ تيار ڪيو ويو بلاول جڏهن نڪرندو ته ان وٽ اختيار به هوندو سينيٽ کي فيڊريشن جي علامت سمجهان ٿو گارين ۽ الزامن جي سياست کان ٻاهر نڪرڻو پوندو هڪ انٽرويو ۾ هن چيو ته عام چونڊن کان اڳ بلاول ڀٽو کي ميدان ۾ لهڻو پوندو شهباز تاثير جي بازيابي تي سندس گهرڀاتين کي واڌايون ڏيان ٿو. ملڪ بچائڻ لاءِ سمورن سياستدانن کي گڏ ويهڻو پوندو اسٽيبلشمينٽ هجي پارليمينٽ هجي عدليه يا وري ميڊيا سڀني جو وجود پاڪستان سان مشورط آهي واري وٽي جو الزام لڳي ٿو واري وٽي ته پاڙيسري ملڪ ڀارت وٽ به هلي ٿي هن چيو ته حڪومت نيب کي ختم ڪرڻ جي حوالي سان رابطو ڪيو ته ساٿ ڏيڻ جو سوچينداسين. هن وقت نيب کي ختم ڪيو ويو ته الزام لڳندو ته هي سياستدان هڪٻئي کي بچائي رهيا آهن ڪوئي قانون ۽ آئين قرآني آيتون نه آهن جنهن ۾ تبديلي نه ٿي سگهي نواز ليگ کي چيو هو ته اڪوئي اهڙو شفاف نظام ٺاهيو جنهن تي ڪنهن کي اعتراض نه هجي نيب کي 2008 ۾ ختم ڪري ڇڏيو پر اپوزيشن ساٿ نه ڏنو خورشيد شاهه چيو ته حڪومت ۽ اسٽيبلشمينٽ هڪ پچ تي آهن ايندڙ آرمي چيف کي به جنرل راحيل شريف جي جذبي تحت ڪم ڪرڻو پوندو هن وقت تائين پڇيل سوال جي جواب ۾ خورشيد شاهه چيو ته منهنجو ناهي خيال ته آرمي چيف پنهنجي شخصيت جي خلاف فيصلو ڪندو ميڊيا ايترو ته شور ڪيو جو جنرل راحيل شريف کي مجبور ٿي واڌ نه وٺڻ جو اعلان ڪرڻو پيو رٽائرمينٽ بابت آرمي چيف جيڪو بهتر سمجهيو اهو فيصلو ڪيو هن چيو ته دهشتگردي خلاف جنگ ۾ صرف 20 سيڪڙو ڪم ٿيو آهي 80 سيڪڙو ڪم باقي آهي دهشتگردي خلاف جنگ ۾ آرمي چيف جو ڪردار تاريخي آهي اپوزيشن ليڊر چيو ته صرف هڪ صوبي کي ٽارگيٽ ڪرڻ ملڪ جي خدمت نه آهي ٻيا صوبا رينجرز کي گهرائين ٿا پر سنڌ ۾ بنا پڇڻ جي اماڻي وڃي ٿي رينجرز پاران سنڌ ۾ ٿاڻن جو مطالبو وڏي ناانصافي آهي ايم ڪيو ايم تي را سان لاڳاپن جا الزام نئين ڳالهه نه آهي حڪومت کي گهرجي ته انهن الزامن جي اعليٰ سطحي تي جاچ ڪرائي جنهن پارٽي کي عوامي حمايت حاصل هجي ان کي ڪمزور ته ڪري سگهجي ٿو پر ختم نٿو ڪري سگهجي.

 

بيلاروس حڪومت ۽ سيڙپڪار سنڌ ۾ سرمائيڪاري ڪن، کين ڀليڪار چونداسين: وڏو وزير

ڪراچي(اسٽاف رپورٽر) سنڌ جي وڏي وزير سيد قائم علي شاهه چيو آهي ته سنڌ صوبو قدرتي وسيلن سان مالامال آهي ۽ سنڌ سرڪار عوام جي وسيع مفاد ۾ انهن مان فائدو حاصل ڪرڻ شروع ڪري ڏنو آهي. هن چيو ته اسان بيلاروس حڪومت ۽ سندن سيڙپڪارن کي ڀليڪار چونداسين ته هو اچن ۽ اسان سان توانائي، زراعت ۽ پاڻي جي شعبن ۾ سهڪار ڪن ۽ انهن شعبن ۾ سيڙپڪاري ڪئي وڃي.  هن اها ڳالهه اڄ خميس ڏينهن وزير اعليٰ هائوس ۾ جمهوريه بيلاروس جي وفد سان ڳالهائيندي ڪئي. وفد جي اڳواڻي وزير صنعت ويٽالي ووڪ ڪري رهيو هو. ان موقعي تي ناڻي ۽ توانائي وارو سينئر صوبائي وزير سيد مراد علي شاهه، وزير اعليٰ جو پرنسپل سيڪريٽري علم الدين بلو، ناڻي وارو سيڪريٽري سهيل راجپوت ۽ ٻيا شريڪ هئا. وڏي وزير چيو ته سنڌ صوبو قدرتي وسيلن سان مالامال آهي، جهڙوڪ ڪوئلو، ونڊ، سولر، زراعت ۽ ٻين شعبن ۾ خود ڪفيل آهي. سنڌ سرڪار صوبي جي عوام جي وسيع تر مفاد ۾ انهن ذريعن جو استعمال شروع ڪري ڇڏيو آهي ۽ سنڌ سرڪار ونڊ ۽ سولر انرجي پيدا ڪري رهي آهي جڏهن ته ٿر جي ڪوئلي مان به تمام جلد بجلي پيدا ڪئي ويندي. سنڌ جي وڏي وزير سيد قائم علي شاهه بيلاروس جي حڪومت ۽ سيڙپڪارن کي سنڌ صوبي جي ڪنهن به شعبي ۾ سيڙپڪاريءَ جي دعوت ڏني ۽ چيو ته اسان اوهان کي هر طرح جون سهولتون فراهم ڪرڻ لاءِ تيار آهيون. ان موقعي تي بيلاروس جي وزير چيو ته وٽن زمين مان پاڻي ڪڍڻ جون مهارتون آهن جنهن ۾ فيلڊ ريسرچ ۽ ڪنهن به مخصوص علائقي جي زير زمين پاڻيءَ جي چڪاس شامل آهي. هن چيو ته انهن وٽ افقي ڊرلنگ رگس ۽ بورنگ ڪرڻ جون جديد ترين مشينون ۽ زير زمين پاڻي جي ليبارٽري ٽيسٽ ڪرڻ جون سهولتون موجود آهن ۽ هن چيو ته اسان سنڌ سرڪار سان گڏجي زير زمين پاڻي تي ڪم ڪري سگهون ٿا. هن وڌيڪ ٻڌايو ته هنن وٽ زراعت واري شعبي ۾ جديد مشينن ۽ اوزارن جون سهولتون به موجود آهن ۽ ٻڌايو ته سندن ٽريڪٽر سموري پاڪستان خاص طور تي سنڌ صوبي ۾ وڏا مشهور آهن. اسان وٽ هر ڪاهڻ، ٿريشرز ۽ ٻيون لاڳاپيل مشينون ۽ اوزار موجود آهن جنهن لاءِ صوبي ۾ پلانٽ تعمير ڪري پيداواري خرچ ۾ گهٽتائي ڪري سگهجي ٿي. بيلاروس جي وفد توانائي واري شعبي خاص طور تي ونڊ ۽ سولر انرجي ۾ سيڙپڪاري ڪرڻ ۾ دلچسپي جو اظهار ڪيو ۽ ان کانسواءِ ڪول انرجي تي به ڪم ڪرڻ تي اتفاق ڪيو. هن چيو ته اسان يقينن ان شعبي ۾ گڏجي ڪم ڪري سگهون ٿا ان لاءِ مان اوهان کي بيلاروس حڪومت طرفان بيلاروس جو دورو ڪرڻ جي دعوت ڏيان ٿو ته جيئن گڏجي ڪم ڪرڻ ۽ ٻين معاملن تي به تفصيلي ڳالهائي سگهجي. وڏي وزير سيد قائم علي شاهه چيو ته ٿرپارڪر ۾ پاور پلانٽ لڳائڻ ۽ مشينن جي چُرپُر لاءِ ڪراچي کان ٿرپارڪر تائين اعليٰ معيار وارو روڊ جي تعمير ڪيو ويو آهي. هن چيو ته اسان کي ڪراچي کان ٿرپارڪر تائين ڪوئلي تي مبني پاور پلانٽ لاءِ مشينن جي چُرپُر لاءِ ڪراچي کان ٿرپارڪر تائين هيوي ٽرڪن جي ضرورت آهي. ان تي بيلاروس جي وزير ٻڌايو ته کين هيوي ڊيوٽي وهيڪل بڻائڻ ۾ مهارت حاصل آهي ۽ اهي وڏي خوشيءَ سان سنڌ ۾ ان قسم جو پلانٽ سنڌ ۾ تعمير ڪري سگهن ٿا. وڏي وزير بيلاروس جي وفد جا ٿوار مڃيا ۽ انهن کي سينئر صوبائي وزير سيد مراد علي شاهه ۽ سندن ٽيم سان گڏجي سيڙپڪاري جي تجويزون ۽ ٻين ڪاغذي ڪاررواين لاءِ اجلاس منعقد ڪرڻ جي دعوت ڏني.

 

ڪنهن کي مهاجر نه پر سڀني کي سنڌي سمجهون ٿا، نسل پرستي نه پر محبتون کٽي رهيون آهن: مولابخش چانڊيو

ڪراچي (اسٽاف رپورٽر) مولا بخش چانڊئي چيو آهي ته هو ڪنهن کي مهاجر نه پر سڀني کي سنڌي سمجهي ٿو. نسل پرستي نه پر محبتون کٽي رهيون آهن. ڪراچي پريس ڪلب ۾ مولابخش چانڊئي جي ڪتاب “گليان ياد نگر ڪي” جي مهورتي تقريب ٿي، جنهن ۾ گورنر ڊاڪٽر عشرت العباد، مجاهد بريلوي، سيد احمد شاهه، ڊاڪٽر ايوب شيخ ۽ ٻين شرڪت ڪئي. مهورتي تقريب کي خطاب ڪندي مولا بخش چانڊئي چيو ته سنڌ رهندڙ سمورا ماڻهو سنڌي آهن. هن چيو ته گورنر ڊاڪٽر عشرت العباد جيڪو رستو اختيار ڪيو آهي ان هو آجيان ڪن ٿا. مولا بخش چانڊئي چيو ته هو وفاق جا دشمن نه آهن پر ان کي هلائڻ چاهن ٿا.

 

ايم ڪيو ايم خلاف الزامن جي جاچ لاءِ ايف آئي اي سرفراز مرچنٽ کي 15 مارچ تي گهرائي ورتو

اسلام آباد (بيورو) وفاقي جاچ اداري ايف آئي اي سرفراز مرچنٽ کي بيان قلمبند ڪرائڻ لاءِ 15 مارچ تي صبح جو ڏهين وڳي گهرائي ورتو آهي، ايف آئي اي جي ذريعن مطابق سرفراز مرچنٽ کي سيڪشن 160 مطابق پيش ٿيڻ جو حڪم ڏنو ويو آهي، واضح هجي ته سرفراز مرچنٽ پاران ايم ڪيو ايم تي سنگين الزام هنيا ويا هئا، جن جي جاچ لاءِ وفاقي گهرو وزير ايف آئي اي جي ڪميٽي جوڙي هئي، اها ڪميٽي سرفراز مرچنٽ کان سندس الزامن جر روشني ۾ مني لانڊرنگ، هٿيارن جي غيرقانوني خريداري ۽ ڀارتي ڳجهي اداري را پاران ايم ڪيو ايم کي فنڊ ڏيڻ جي حوالي سان الزامن جي جاچ ڪندي.

 

ميرپورخاص ۾ احتجاج دوران بااثرن پاران پيٽرول هاري ساڙيل هڪ ٻارڙو زندگي جي جنگ هارائي ويو، 2 زندگي ۽ موت جي ٻه واٽي تي بيٺل وارثن جو لاش رکي احتجاج

حيدرآباد(بيورو) ميرپور خاص ۾ گهر تي قبضي خلاف احتجاج ڪرڻ تي بااثر ماڻهن پاران پئٽرول هاري ساڙيل 6 سالن جو معصوم ٻارڙو سول اسپتال ڪراچيءَ ۾ زندگيءَ جي جنگ هارائي ويٺو، رپورٽ مطابق ميرپور خاص جي علائقي ناصر ٽائون جي رهواسي زال مڙس دلمراد جمالي ۽ نصيبا جمالي پنهنجي 6 سالن جي پٽ ساجد علي جو لاش رات دير سان حيدرآباد پريس ڪلب سامهون رکي احتجاج ڪندي صحافين کي ٻڌايو ته اسانجي گهر تي ڪجهه بااثر ماڻهن قبضي جي ڪوشش ڪئي، انهن خلاف گذريل 5 ڏينهن کان اسان ميرپورخاص پريس ڪلب سامهون احتجاج ڪري رهيا هئاسين ته بااثر ماڻهن گلزار پنهور، ڪنڀار بجير ۽ ٻين پنهنجن ساٿين سان گڏ پئٽرول کڻي اچي اسان مٿان هاري اسانکي باهه ڏني، جنهن ۾ 6 سالن جي سندن پٽ ساجد علي سميت 3 پٽ سڙي پيا، جن کي ڪراچيءَ جي سول اسپتال ۾ داخل ڪيو ويو ، جتي ساجد علي باهه جي زخمن جا گهاءُ نه سهي فوت ٿي ويو آهي، جڏهن ته باقي ٻه پٽ 25 سالن جي لياقت علي ۽ 5 سالن جو رجب علي جي حالت انتهائي خراب آهي. هنن مطالبو ڪيو ته بااثر ماڻهن کي گرفتار ڪري سخت کان سخت سزا ڏني وڃي.

 

ٿرپارڪر ۾ غذائي کوٽ سبب ڳورهاري عورت ۽ 3ٻارڙا فوت

ٿرپارڪر (اين اين آءِ) ٿرپارڪر ۾ غذائي کوٽ سبب هڪ ڳورهاري عورت ۽ 3 ٻارڙا فوت ٿي ويا اهڙي طرح گذريل 68 ڏينهن ۾ فوتين ٻارڙن جو انگ 240 ٿي ويو جڏهن ته 6 ڳورهاري عورتون فوت ٿي چڪيون 150 کان وڌيڪ ٻارڙا هاڻي به مختلف اسپتالن ۾ علاج هيٺ آهن تفصيل مطابق سول اسپتال مٺي ۾ 30ورهين جي عورت سرهي زال قاسم ويم دوران فوت ٿي ويئي جڏهن ته ان جو تازو ڄاول ٻارڙو به الله کي پيارو ٿي ويو مٺي سول اسپتال ۾ هڪ ٻيو پنجن سالن جو ٻارڙو ديدار علي ولد مشتاق فوت ٿي ويو تعلقي اسپتال اسلام ڪوٽ ۾ 6 مهينن جي ٻارڙي سميته ڌي گوتم به فوت ٿي ويئي انگن اکرن مطابق 68 ڏينهن ۾ فوتي ٻارڙن جو انگ 240 ٿي ويو آهي 150 کان وڌيڪ بارڙا هاڻي به مختلف اسپتالن ۾ علاج هيٺ آهن ٿر واسين سنڌ حڪومت کان مطالبو ڪيو ته جن مريضن کي ريفر ڪيو وڃي انهن کي مفت ايمبولنس سروس مهيا ڪئي وڃي.