تازيون خبرون

Daily Archives: March 10, 2016

بلوچستان جَي سبي واري علائقي ۾ سڪيورٽي فورسز جو آپريشن، 2 اهلڪار شهيد، 3 دهشتگرد مارجي ويا

سبي (مانيٽرنگ ڊيسڪ) بلوچستان جَي سبي واري علائقي ۾ سڪيورٽي فورسز جي آپريشن دوران 2 اهلڪار شهيد ٿي ويا، ٽن دهشتگردن کي مارڻ جي دعويٰ ڪئي وئي آهي. سبي جي سنگان واري علائقي ۾ سڪيورٽي فورسز ڳجهي اطلاع تي ڪارروائي ڪئي ته دهشتگردن اهلڪارن مٿان جديد هٿيارن جا منهن کولي ڇڏيا. ايف سي ترجمان موجب، دهشتگردن جي فائرنگ ۾ حسن ۽ مبشر نالي ٻه اهلڪار شهيد ٿي ويا، جڏهن ته جوابي ڪارروائي ۾ ٽن دهشتگردن کي ماريو ويو آهي. ايف سي ترجمان چيو آهي ته مقابلي دروان مارجي ويل دهشتگردن جو واسطو ڪالعدم تنظيم سان هو، جن وٽان مختلف قسمن جا هٿيار هٿ ڪيا ويا آهن.

 

شهباز تاثير ساڍن 4 سالن کانپوءِ پنهنجي گهر پهچي ويو، جگر جي ٽڪري کي ڏسندي امڙ لڙڪ روڪي نه سگهي، جذباتي منظر

لاهور (م.ڊ) پنجاب جي اڳوڻي گورنر سلمان تاثير جو پٽ شهباز تاثير ڪوئيٽا مان بازياب ٿيڻ کانپوءِ خاص اڏام ذريعي لاهور پنهنجي گهر پهچي ويو، لاهور ايئرپورٽ تي شهباز تاثير جي زال سوڌو ٻين گهر ڀاتين آجيان ڪئي، ان موقعي تي شهباز جي امڙ پنهنجي جگر جي ٽڪري کي ڏسندي ئي ڀاڪر ۾ ڀري ورتو ۽ خوشي جا ڳوڙها وهائيندي کيس چميون ڏيندي رهي،جنهن سبب ماحول جذباتي نظر آيو، شهباز تاثير کي ايئرپورٽ کان گهر اماڻڻ لاءِ پيپلز پارٽي جي چيئرمين بلاول ڀٽو زرداري جي بلٽ پروف گاڏي استعمال ڪئي وئي، جڏهن ته سندس قافلي ۾ پوليس ۽ سيڪيورٽي ادارن جون گاڏيون به شامل هيون، اٽڪل ساڍن چئن سالن کانپوءِ پنهنجي گهر پهچڻ تي شهباز تاثير سڀني مائٽن سان هڪ هڪ ٿي مليو، جتي پڻ جذباتي نظر اچي رهيا هئا.  شهباز تاثير کي گذريل ڏينهن ڪوئيٽا جي علائقي ڪچلاڪ مان بازياب ڪرايو ويو هو، جنهن کي لاهور پهچائڻ لاءِ راولپنڊِي مان خاص جهاز ڪوئيٽا اماڻيو ويو ، جنهن کانپوءِ کيس خالد ايئربيس تان خاص جهاز ذريعي لاهور روانو ڪيو ويو، لاهور ايئرپورٽ تي حڪومت پاران سيڪيورٽي جا انتظام سخت ڪيا ويا ، جڏهن ته شهباز تاثير جي گهر ٻاهران به واڌو سيڪيورٽي جٿا مقرر ڪيا ويا آهن، واضح هجي ته شهباز تاثير کي 2011ع ۾ اغوا ڪيو ويو هو.

 

موجوده چونڊ نظام جي ڪري تبديلي نٿي اچي سگهي:عمران خان

اسلام آباد (بيورو) تحريڪ انصاف جي سربراهه عمران خان اليڪشن ڪميشن کي نااهل ۽ بد ديانت قرار ڏيندي چيو آهي ته موجوده چونڊ نظام جي ڪري تبديلي نٿي اچي سگهي. اسلام آباد ۾ پريس ڪانفرنس ڪندي عمران خان چيو ته پاڪستاني سياست جي بهتري شفاف چونڊن ذريعي ممڪن آهي. هن چيو ته خواجا آصف بادشاهن سان رهي پاڻ کي به بادشاهه سمجهي ٿو پر جلد اين اي 110 تان سندس وڪيٽ ڪرندي. عمران خان چيو ته عليم خان جو ڪيس سڌو آهي، ڇاڪاڻ ته 21 هزار ووٽن جي تصديق نه ٿي رهي آهي.تحريڪ انصاف جي سربراهه چيو ته عوام چڱي ريت ڄاڻي ٿو ته نواز شريف چئن تڪن کي کولڻ جي مخالفت ڇو ڪئي. سندس چوڻ هو ته 2013 جي چونڊن ۾ وڏي پيماني تي ڌانڌلي ٿي، شفاف چونڊون جمهوريت لاءِ ضروري آهن. عمران خان چيو ته سردار يار محمد رند سان پوئين چونڊن ۾ زيادتي ٿي، هاڻ ساڻس ايئن نه ٿيڻ گهرجي. هن چيو ته پاڪ ڀارت ميچ ڌرم شالا کان ڪولڪتا منتقل ٿيڻ سٺو عمل آهي، هو ميچ ڏسڻ لاءِ ڀارت ويندو.

 

سيف سان شادي لاءِ اهو شرط رکيو هيو ته مونکي ڪم کان نه روڪيندو: ڪرينه ڪپور

ممبئي: بالي ووڊ اداڪارا ڪرينا ڪپور چيو آهي ته هن سيف علي خان سان شادي لاءِ رڳو هڪ شرط رکيو هو ته هوءَ سڄي عمر ڪم ڪندي ۽ پئسا ڪمائيندي، جڏهن ته سيف ان معاملي ۾ سندس حمايت ۽ مدد ڪندو، پنهنجي ايندڙ فلم ڪي اينڊ ڪا جي مشهوري تقريب دوران ڳالهائيندي ڪرينا ڪپور چيو ته عورت کي امڙ ڌرتي ۽ مدر ميري چيو وڃي ٿو، عورت ۾ وڏي طاقت آهي، انهن ۾ واڌو قوت هجي ٿي ۽ اهي گهڻ رخيون ٿي سگهن ٿيون، هن چيو ته مان اڄ هڪ زال آهيان ۽ مان سڄي عمر ڪم ڪنديس، پئسو ڪمائينديس ۽ منهنجو مڙس منهنجي حمايت ڪندو، اهو اڪيلو شرط هو، جنهن جي بنياد تي مان سيف علي خان سان شادي ڪئي،فلم ڪي اينڊ ڪا ۾ ڪرينا جو هيرو ارجن ڪپور آهي، جيڪو اهڙو مرد آهي، جيڪو گهر ۾ رڌپچاءَ سوڌو پنهنجي زال وارا سڀ ڪم ڪري ٿو، جڏهن ته فلم ۾ کيس منگل سوتر به پهريل هجي ٿو، جيڪو ڀارت ۾ پرڻيل عورتون پائينديون آهن، ان حوالي سان سوال جي جواب ۾ 35 ورهين جي ڪرينا ڪپور چيو ته اهڙو منظر توهان ڪڏهن به نه ڏٺو هوندو، مان سمجهان ٿي ته اهو بهترين خيال آهي، منگل سوتر ۾ ارجن تمام گهڻو سهڻو ۽ ڪشش وارو لڳي ٿو.

 

عاليه ڀٽ سلمان خان جي هيروئڻ بڻجڻ لاءِ پريشان بڻيل

ممبئي(شوبز نيوز) بالي ووڊ اداڪارا عاليا ڀٽ دبنگ خان جي هيروئن بڻجڻ لاءِ آتي آهي ۽ ان سلسلي ۾ هوءَ پنهنجي اهڙي خواهش پڻ ڏيکاري چڪي آهي، ڀارتي ميڊيا جي رپورٽن مطابق عاليا ڀٽ پنهنجي هڪ ٽوئٽ ۾ چيو آهي ته مان سلمان خان سان ڪم ڪرڻ بنا پاڻ کي مڪمل نه ٿي سمجهان، هن چيو ته هوءَ ان گهڙي جو بيچيني سان انتظار ڪري رهي آهي، جڏهن هوءَ سلمان خان سان گڏ فلم ۾ نظر ايندي، عاليا ڀٽ چيو ته مان هڪ سٺي ڪهاڻي جي ڳولا ۾ آهيان ۽ جيڪڏهن مونکي سلمان سان گڏ فلم ۾ ڪم ڪرڻ جو موقعو ملي ويو ته اهو ڪڏهن ته هٿان وڃڻ نه ڏينديس.

 

آئي سي سي پاڪ-ڀارت ميچ ڌرم شالا بدران ڪولڪتا ۾ ڪرائڻ جو اعلان ڪري ڇڏيو

نئين دهلي (اسپورٽس نيوز) عالمي ڪرڪيٽ ڪائونسل (آئي سي سي) ٽي ٽوئنٽي ڪرڪيٽ ورلڊ ڪپ ۾ 19 مارچ تي پاڪستان ۽ ڀارت ۾ رٿيل ميچ ڌرم شالا بدران ڪولڪتا ۾ ڪرائڻ جو اعلان ڪيو آهي، آئي سي سي جي چيف ايگزيڪيوٽو ڊيو رچرڊسن پاڪ-ڀارت ميچ جي حوالي سان پريس ڪانفرنس ڪندي چيو ته ڌرم شامالا ۾ سيڪيورٽي خطرن سبب پاڪ – ڀارت ميچ هاڻ اتي ڪرائڻ بدران ايڊن گارڊن اسٽيڊيم ڪولڪتا ۾ ڪرائي ويندي،هن چيو ته ميچ کي پرامن بڻائڻ لاءِ ان جو هنڌ گڏيل صلاح مشوري سان مٽائڻ جو فيصلو ڪيو ويو، سندس چوڻ هو ته آئي سي سي کي پاڪ – ڀارت ميچ جو اندازو آهي پر رانديگرن جي سيڪيورٽي پهرين اهميت آهي،ڊيو رچرڊسن چيو ته  ڀارت هر ميچ لاءِ هر ممڪن سيڪيورٽي جي پڪ ڏياري آهي، جڏهن ته پاڪستان حڪومت ۽ پي سي بي کي به ميچ جو هنڌ مٽائڻ واري فيصلي بابت ٻڌايو ويو آهي، آئي سي سي جي چيف ايگزيڪيوٽو چيو ته ڌرم شالا ۾ پاڪ – ڀارت ميچ لاءِ ٽڪيٽون خريد ڪندڙ شوقينن کي ٽڪيٽون ري فنڊ ڪيون وينديون ۽ جيڪڏهن ڪو ڪولڪتا جون ٽڪيٽون خريدڻ چاهي ته ان کي پراڻي ٽڪيٽ ڏيکارڻ تي نئين ٽڪيٽ جاري ڪئي ويندي.

 

قومي ٽيم جونيئر ڊيوس ڪپ ٽائي ۾ شاندار ڪارڪردگي جو مظاهرو ڪندي: معين شاهه

اسلام آباد (اسپورٽس نيوز) قومي جونيئر ٽينس ٽيم جي ڪوچ معين شاهه چيو آهي ته قومي ٽيم جونيئر ڊيوس ڪپ ٽائي ۾ شاندار ڪارڪردگي جو مظاهرو ڪندي. گذريل ڏينهن اي پي پي سان ڳالهائيندي هن چيو ته 3 ميمبرن تي ٻڌل قومي جونيئر ڊيوس ڪپ ٽائي ٽينس ٽورنامينٽ ۾ ڀرپور طريقي سان شرڪت ڪندي. جونيئر ڊيوس ڪپ اڄ خميس کان سريلنڪا جي شهر ڪولمبو ۾ شروع ٿيندو. 3 ميمبرن تي ٻڌل ٽيم ۾ شامل صاحبزاده محمد علي، ثاقب خان ۽ شعيب خان پاڪستان جي نمائندگي ڪندا. هن چيو ته ايونٽ لاءِ ٽرائلز کان پوءِ ٽيم جي چونڊ ڪئي وئي آهي اميد آهي ته قومي ٽيم ايونٽ ۾ شاندار ڪارڪردگي جو مظاهرو ڪندو. قومي ٽيم ايونٽ ۾ شرڪت کان پوءِ 18 مارچ تي پاڪستان واپس پهچندي.