تازيون خبرون

Daily Archives: March 7, 2016

ناڻي واري وزارت صوبن کي ترقياتي ڪمن جي مد ۾ هڪ ارب 29 ڪروڙ جاري ڪري ڇڏيا

اسلام آباد(بيورو) ناڻي واري وزارت گڏيل مفادن واري ڪائونسل جي فيصلي مطابق  صوبن جي لاءِ هڪ ارب 29 ڪروڙ روپيا جاري ڪرڻ جي منظوري ڏئي ڇڏي.ناڻي واري وفاقي وزير اسحاق ڊار جي صدارت ۾ ٿيندڙاجلاس ۾ صوبن کي ترقياتي ڪمن  جي مد ۾ هڪ ارب 29 ڪروڙ رپيا جاري ڪرڻ جي منظوري ڏني وئي.جڏهن ته وفاقي حڪومت پاران اهڙو فيصلو گڏيل مفادن واري ڪائونسل جي اجلاس ۾ ڪيو ويو هو،جاري ڪيل پسئن مان پنجاب کي 27 ڪروڙ،سنڌ کي 20 ڪروڙ،ڪي پي ڪي کي 31 ڪروڙن کان وڌيڪ ملندا،جڏهن ته بلوچستان کي 50 ڪروڙ 23 لک رپيا انهيءَ پئسن مان ملندا.

 

تحريڪ پاڪستان جي ڪارڪنن جون خدمتون فراموش جوڳيون ناهن : خواجا سعد رفيق

ڪراچي (اين اين آءِ) وفاقي وزير ريلوي خواجا سعد رفيق چيو آهي ته تحريڪ پاڪستان جي ڪارڪنن جون خدمتون فراموش ڪرڻ جوڳيون ناهن جنهن سان نوجوان نسل کي آگاهي ڏيڻ وقت جي اهم ضرورت آهي انهن ڪارڪنن مان باباءِ خيرپور ۽ ڪارڪن تحريڪ پاڪستان حضرت مرشد شاهين گورايا مرشدي، قائداعظم ۽ علامه اقبال تصور ۽ فرمان جي ترويج ۽ اشاعت لاءِ دير نه ڪندا هئا اهڙن خيالن جو اظهار هن تحريڪ پاسڪتان جي ڪارڪن دانشور، صحافي باباءِ خيرپور پير طريقت حضرت مرشد شاهين گورايا جي چوٿين ورسي جي موقعي تي سندس ياد ۾ سينئر سٽيزن ڪائونسل پاڪستان ۽ جماعت مرشدي پاڪستان جي اهتمام هيٺ آستانه عالي مرشديه ۾ ڪوٺايل ريفرنس آف ميموري مرشد شاهين گورايا مرشدي لاءِ ڏنل پيغام ۾ ڪيو. جنهن جا خاص مهمان جسٽس ريٽائرڊ سيد ديدار حسين شاهه ۽ دانشور سماجي اڳواڻ محفوظ نبي هئا. مقررن ۾ خالد گورايا، ريٽائرڊ چيف پوسٽ ماسٽر محمد ريحان، سيد عابد حسين شاهه، نياز راجپوت ۽ ٻيا شامل هئا. خواجا سعد رفيق چيو ته مرشد شاهين گورايا سڄي ڄمار پاڪستان جي نظريي کي هٿي وٺرائڻ لاءِ جدوجهد ڪندو رهيو.

 

هميشه اسٽيبلشمينٽ جو مقابلو ڪيو، وڏين قربانين باوجود جهڪيا ناهيون: پيپلز پارٽي

ملير(ناز شر) پيپلز پارٽي جي اڳوڻي ايم پي اي عبدالله مراد جي 12 ورسي جي موقعي تي ڄام ڳوٺ ملير ۾ پي پي پاران عام جلسو منعقد ڪيو ويو، جنهن ۾ پيپلز پارٽي جي اڳواڻن سينيٽر سعيد غني، نجمي عالم، وقار مهدي، راشد رباني، سنڌ اسيمبلي جي ميمبرن جاويد ناگوري، ساجد جوکيو، شاهينا شير علي، شمع مٺاڻي کان علاوه پي پي ملير جي صدر راجا رزاق بلوچ، مرتضيٰ بلوچ، سلمان عبدالله مراد، نعمان عبدالله مراد، امان مسعود، خواجا محمد اعواڻ، عديل اختر شيخ، سردار اختر عارفاڻي، نذير احمد ڀٽو ۽ پي پي جي مختلف يونين ڪائونسلن مان چونڊيل نمائندن ۽ ڪارڪنن وڏي انگ ۾ شرڪت ڪئي. جلسي کي خطاب ڪندي سينيٽ ۾ پيپلز پارٽي جي پارلياماني اڳواڻ سينييٽر سعيد غني چيو ته پيپلز پارٽي هميشه اسٽيبلشمينٽ جو مقابلو ڪيو آهي ۽ ايترين وڏين قربانين باوجود اسٽيبلشمينٽ اڳيان نه جهڪيا آهيون ۽ هاڻي به واضح ڪرڻ چاهيون ٿا ته جيڪي قوتون بينظير ڀٽو کي شهيد ڪرڻ کانپوءِ آصف زرداري جي پٺيان لڳل آهن انهن کي ياد رکڻ گهرجي ته پيپلز پارٽي ظالمن ۽ آمرن جو مقابلو ڪيو آهي. انهن اڳيان ڪنهن به صورت ۾ نه جهڪندي. هن چيو ته آصف زرداري ۽ بلاول ڀٽو پنهنجي مرضي سان ملڪ کان ٻاهر ويندا آهن ۽ پنهنجي مرضي سان ئي ملڪ واپس ايندا آهن. انهن کي ڪنهن کان به پاڪستان اچڻ ۽ وڃڻ جي اجازت وٺڻ جي ضرورت نه آهي. هي ملڪ اسان جو ملڪ آهي اسان ڪنهن جي به ڊڪٽيشن تي نه هلنداسين. هن چيو ته سپريم ڪورٽ تي حملو ڪندڙ، طالبان جي حمايت ڪندڙ ۽ فوج خلاف ڳالهائيندڙن خلاف ته ڪا به ڪاروائي نه ٿيندي آهي پر آصف زرداري جيڪڏهن حق ۽ سچ جي ڳالهه ڪندو آهي ته ان سان آسمان ٽٽي پوندو آهي. انهن قوتن کي ياد رکڻ گهرجي ته آصف زرداري هن ملڪ جو وفادار آهي. هن چيو ته دهشتگردي ۾ سڀ کان وڌيڪ نقصان پيپلز پارٽي کي رسيو آهي. پيپلز پارٽي ڪڏهن به ڪراچي آپريشن جي مخالفت نه ڪئي آهي. جيڪڏهن ڪراچي ۾ امن ٿيندو ته ان جو وڌيڪ فائدو پيپلز پارٽي کي ٿيندو. پيپلز پارٽي جڏهن پنهنجي حڪومت ۾ وزير ستان ۾ آپريشن شروع ڪيو ته چوڌري نثار سخت مخالفت ڪئي ۽ عمران خان به طالبان جي حمايت ۾ نڪري آيو. ان باوجود دهشتگردي خلاف آپريشن جاري رکيوسين ۽ اسان مٿان دهشتگردي جا ڪوڙا الزام لڳايا پيا وڃن. هن چيو ته احتساب عدالتن جو به مقابلو آصف زرداري ڪيو آهي. جڏهن ته نواز شريف ۽ سندس قيادت ڪڏهن به احتساب عدالتن جو مقابلو نه ڪيو آهي. ان ڪري پيپلز پارٽي احتساب کان نه ٿي ڊڄي. هن چيو ته وفاقي حڪومت اسٽيل مل جي گئس بند ڪري ان کي تباهه ڪري ڇڏيو ۽ پي آءِ اي کي ٺيڪ ڪرڻ چاهن نه ٿا. پر اسان واضح ڪرڻ چاهيون ٿا ته قومي ادارن جي نجڪاري ٿيڻ نه ڏينداسين. جلسي کي خطاب ڪندي پي پي ڪراچي ڊويزن جي صدر نجمي عالم چيو ته عدليه جڏهن مشرف کي وردي سميت حڪومت ڪرڻ جي اجازت ڏئي ٿي ته ان وقت عدليه جو ڪردار جانبدار هوندو آهي. ۽ پيپلز پارٽي خلاف سدائين فيصلا ڏنا آهن. اسان احتساب کان ڊڄڻ وارا نه آهيون 77ع کان وٺي پيپلز پارٽي جو احتساب ڪيو ويو آهي. پر تنهن باوجود جمهوريت خاطر اهڙن ڪوڙن احتسابن جو مقابلو ڪيو آهي ۽ ايندڙ وقت ۾ به جمهوريت لاءِ قربانيون ڏينداسين. هن چيو ته نيب جڏهن ميان منشا ۾ هٿ وڌا آهن ته نواز شريف جون رڙيون نڪري ويون آهن ۽ کيس بچائڻ لاءِ ن ليگ نيب جي مخالفت ڪري رهي آهي. تقريب کي اڳوڻي صوبائي وزير جاويد ناگوري خطاب ڪندي چيو ته گٽرن جي سياست ڪري پنهنجو پاڻ کي چمڪائڻ لاءِ ڪجهه قوتون ڊرامي بازي ڪري رهيون آهن ۽ اسان جي اڳواڻن جا فوٽو گٽرن تي لڳائي هڪ سازش تيار ڪئي پئي وڃي پر اهڙين سازشن جو مقابلو ضرور ڪنداسين. تقريب کي خطاب ڪندي ايم پي اي ساجد جوکيو چيو ته ملير اندر پيپلز پارٽي روزگار جا موقعا فراهم ڪرڻ سان گڏو گڏ ترقياتي منصوبن جا ڄار وڇائي ڇڏيا آهن ۽ اسان جي ترقياتي منصوبن تي ن ليگ جو ايم اين اي پنهنجون تختيون لڳائي ان جا افتتاح ڪري رهيو آهي. پر ملير جو عوام پي پي سان گڏ آهي. تقريب جي آخر ۾ شهيد عبدالله مراد ۽ ملير جي ٻين شهيدن لاءِ خصوصي دعا ڪرائي وئي.

 

انتهاپسندن جون ڌمڪيون، عمران خان قومي ڪرڪيٽ ٽيم جي ڀارت ۾ ٿيندڙ ٽي ٽوئنٽي ورلڊ ڪپ ۾ شرڪت جي مخالفت ڪري ڇڏي

اسلام آباد (اين اين آءِ) پاڪستان تحريڪ انصاف جي چيئرمين عمران خان قومي ڪرڪيٽ ٽيم جي ڀارت ۾ ٿيندڙ ٽي ٽوئنٽي ورلڊ ڪپ ۾ شرڪت جي مخالفت ڪندي چيو آهي ته وزيراعليٰ هماچل پرديش جي بيان کان پوءِ پاڪستاني ٽيم کي ڀارت ۾ خطرو آهي پاڪستاني ٽيم کي ڀارت نه وڃڻ گهرجي، مصطفي ڪمال پاران لڳايل الزام سنجيده آهن ايم ڪيو ايم تي را کان فنڊنگ وٺڻ جي جاچ ٿيڻ گهرجي. ميڊيا سان ڳالهائيندي عمران خان چيو ته ڀارتي انتهاپسندن جي ڌمڪين کانپوءِ رياست جي وزيراعليٰ جو بيان غيرذميواراڻو آهي جيڪڏهن پاڪستاني ٽيم ڀارت وئي ته مان به ويندس، عمران خان چيو ته ڀارت ۾ سياستدان نفرت پکيڙي پنهنجي سياست چمڪائي رهيا آهن. عمران خان چيو ته هماچل پرديش جي وزيراعليٰ جو بيان مهمان نوازي جي گهرجن جي خلاف آهي

 

مصطفيٰ ڪمال ۽ انيس قائمخاني کي ڏسي،ٻڌي ۽ سمجهي رهيو آهيان:ڊاڪٽر عشرت العباد

ڪراچي (اسٽاف رپورٽر) سنڌ جي گورنر ڊاڪٽر عشرت العباد جو چوڻ آهي ته مصطفيٰ ڪمال ۽ انيس قائمخاني جي باري ۾ هن وقت ڪجهه به نه ٿو چئي سگهان،هاڻي ته انهن کي ڏسي،ٻڌي ۽ سمجهي رهيو آهيان.عباسي شهيد اسپتال ٻاهريا ميڊيا سان ڳالهائيندي  سنڌ جي گورنر ڊاڪٽر عشرت العباد جو چوڻ هو ته مصطفيٰ ڪمال ۽ انيس قائمخاني بابت ڪجهه به ڳالهائڻ وقت کان پهرين هو ندو،هن وقت مان انهن کي ٻڌي،ڏسي ۽ سمجهي رهيو آهيان،پر موجودا سياسي صورتحالي تي نظر وجهي رهيو آهيان،وفاقي گهرو وزير چٽي ڳالهه ڪري ڇڏي آهي.عشرت العباد جو چوڻ هو ته صوبائي حڪومت،مڪاني نمائندن جي ڪم ۾ مداخلت ۽ سياست نه ٿو ڪيان،ڪراچي ۾ امن امان جي صورتحال بهتر ٿي آهي،پر انتظامي معاملن ۾ بهتري جي ضرورت آهي.

 

 ڊيرا اسمائيل خان ۾ مسافر بس سان حادثو،5 ڄڻا فوت،14 زخمي

ڊيرا اسمائيل خان (م.ڊ) چونڊا چيڪ پوسٽ ويجهو مسافر ڪوچ ۽ ٽرالر وچ ۾ ٽڪر جي نتيجي ۾ 6 ڄڻا مارجي ويا،جڏهن ته 14 زخمي پڻ ٿي پيا.ميڊيا رپورٽ مطابق بنون کان ڊيرا اسمائيل خان ويندڙ مسافر ڪوچ چونڊا چيڪ پوسٽ ويجهو تيز رفتاري سبب سامهون ايندڙ ٽرالر سان ٽڪرائيجي وئي،حادثي سبب 5 ڄڻا فوت ٿي ويا جڏهن ته 14 سخت زخمي پڻ ٿي پيا،زخمين  کي ضلعي اسپتال نيوويو جن کي طبي امداد ڏني پئي وڃي.پوليس اختيارين جو چوڻ آهي ته فوت ٿيندڙن ۾ 2 عورتون ۽ هڪ ٻارڙو به شامل آهي،لاشن جي سڃاڻپ کانپوءِ وارثن حوالي ڪيو ويو.

 

مصطفيٰ ڪمال جي پارٽي جو نالو پاڪستان قومي موومينٽ ٿي سگهي ٿو: نبيل گبول

ڪراچي (اين اين آءِ) ايم ڪيو ايم جي اڳوڻي اڳواڻ نبيل گبول چيو آهي ته مان صدارتي نظام جي مخالفت نه ڪندس جلد ڪراچي وڃي مصطفيٰ ڪمال سان ملاقات ڪندس، هن چيو ته 70 سيڪڙو ايم ڪيو ايم رابطا ڪميٽي جا ماڻهو الطاف حسين مان بيزار آهن ڪجهه ڏينهن ۾ متحده جا ڪيترائي نالا مصطفيٰ ڪمال سان گڏ هوندا. مصطفيٰ ڪمال جي پارٽي جو نالو پاڪستان قومي موومينٽ ٿي سگهي ٿو، نبيل گبول مستقبل ۾ مصطفيٰ ڪمال جو ساٿ ڏيندڙن جو ذڪر ڪندي فاروق ستار ۽ گورنر سنڌ جو نالو وٺندي وٺندي خاموش ٿي ويو ۽ هن چيو ته ان کي سلپ آف ٽنگ سمجهو.