تازيون خبرون

Daily Archives: March 5, 2016

ريتڪ سان قابل ۾ ڪم ڪرڻ جي آڇ ٿي ته خوشي بيان ڪرڻ لاءِ لفظ ئي نه هئا: يامي گوتم

ممبئي (شوبز نيوز) بالي ووڊ اداڪار يامي گوتم چيو آهي ته جڏهن کيس ريتڪ روشن سان گڏ فلم قابل ۾ ڪم ڪرڻ جي آڇ ٿي ته سندس خوشي جي ڪا حد ئي نه هئي ۽ وٽس اها خوشي بيان ڪرڻ لاءِ ڪي لفظ ئي نه هئا، ڀارتي ميڊيا مطابق هڪ انٽرويو ۾ يامي گوتم چيو ته قابل ۾ ڪم ڪرڻ سان هوءَ ريتڪ کان گهڻو ڪجهه سکڻ چاهي ٿي، جنهن لاءِ هوءَ وڏي جوش ۾ آهي، سندس چوڻ هو ته اها هن لاءِ خاص فلم ۽ خاص سفر آهي، مان چاهيان ٿي ته فلم جي شوٽنگ ترت شروع ٿئي، هن چيو ته مان ريتڪ روشن سان گڏ رومانس ۽ ڊانس ڪرڻ جي حوالي سان به تمام گهڻي پريشان آهيان، ڇو ته هو بهترين اداڪار ۽ ڪمال جو ڊانسر آهي، سندس رويو ۽ اسٽائل به ڪمال جو آهي، يامي گوتم چيو ته فلم جي تياري وارو ڪم هلي رهيو آهي ۽ اسان جد شوٽنگ شروع ڪنداسين.

 

مونکي جڏهن ڪو سپر اسٽار چوندو آهي ته عجيب لڳندو آهي:شاهه رخ خان

ممبئي (شوبز نيوز) بالي ووڊ ڪنگ شاهه رخ خان چيو آهي ته خوشقسمتي يا بدقسمتي سان هن زندگي ۾ گهڻو ڪجهه ماڻي ورتو آهي پر جڏهن ڪو مونکي سپر اسٽار چوندو آهي ته عجيب لڳندو آهي، ڀارتي ميڊيا مطابق شاهه رخ خان هڪ تقريب ۾ ڳالهائيندي چيو ته فلم نگري ۾ هن 25 سال گذاريا آهن، جنهن دوران هن جيڪي ڪجهه حاصل ڪيو آهي، اهو زندگي کان وڌيڪ آهي ۽ هاڻ هو ان کان پري نه ٿو وڃي سگهي، سندس چوڻ هو ته مان فلم ۾ پنهنجي ڪردار مان خوش رهندو آهيان، جڏهن ته ڏسندڙن کي به خوش رکڻ چاهيندو آهيان، شاهه رخ خان چيو ته هو پنهنجي ڪردار ۾ پيهجي ويندو آهي، رومانوي ڪردار هجي يا ڪاوڙ وارو، مان هدايتڪار جي هدايت تي هر ڪردار هڪ عام ماڻهو جيان ڪرڻ جي ڪوشش ۾ لڳل رهندو آهيان، پنهنجي لقب جي حوالي سان ڪنگ خان چيو ته کيس ايس آر ڪي جو خطاب سٺو لڳي ٿو پر هو رڳو شاهه رخ خان جي نالي سان وڌيڪ خوش آهي.

 

پاڪستان ڪرڪيٽ ٽيم لاءِ فول پروف سيڪيورٽي جي خاطري،پاڪ- ڀارت ميچ شيڊول مطابق ٿيندي: ڀارتي بورڊ

نئين دهلي (اسپورٽس نيوز) ڀارتي ڪرڪيٽ بورڊ پاڪستان ڪرڪيٽ ٽيم لاءِ فول پروف سيڪيورٽي جي پڪ ڏياريندي چيو آهي ته ٽي ٽوئنٽي ڪرڪيٽ ورلڊ ۾ پاڪستان ۽ ڀارت وچ ۾ ميچ شيڊول مطابق ٿيندي، ڀارتي ڪرڪيٽ بورڊ جي عهديدار ۽ آئي پي ايل چيئرمين راجيو شڪلا نئين دهلي ۾ ميڊيا سان ڳالهائيندي چيو ته هماچل پرديش جي وڏي وزير سان سندن ڳالهه ٻولهه ٿي آهي ۽ پاڪستان ڪرڪيٽ ٽيم کي فول پروف سيڪيورٽي ڏني ويندي،واضح هجي ته پاڪستان ۽ ڀارت ۾ ٽي ٽوئنٽي ورلڊ ڪپ جي ميچ هماچل پرديش جي شهر ڌرم شالا ۾ رٿيل آهي پر ڪجهه ڏينهن پهرين رياست جي وڏي وزير پاڪ – ڀارت ميچ جي سيڪيورٽي کان نابري واريندي حڪومت کي اها ميچ ڪنهن ٻئي هنڌ ڪرائڻ جي درخواست ڪئي هئي،هاڻ ٻنهي ملڪن جي ڪرڪيٽ بورڊن ۾ ان حوالي سان رابطا ٿي رهيا آهن، جڏهن ته پاڪستان حڪومت پاران سيڪيورٽي ڪليئرنس ملڻ کانپوءِ قومي ٽيم ڀارت رواني ٿيندي.

 

آسٽريلوي عورت ڪرڪيٽ ٽيم ٽئين ٽي ٽوئنٽي ميچ ۾ نيوزيلينڊ کي 17 رنسن تان مات ڏئي ڇڏي

نيو پلي مائوٿ: آسٽريلوي عورت ڪرڪيٽ ٽيم ٽئين ٽي ٽوئنٽي ميچ ۾ ميزبان نيوزيلينڊ کي 17 رنسن تان مات ڏئي ڇڏي، نيو پلي مائوٿ جي ميدان تي کيڏيل ٽئين ميچ ۾ آسٽريلوي عورت ٽيم مقرر 20 اوورن ۾ 7 وڪيٽن جي نقصان تي 145 رنسون ٺاهيون،پيري بهترين بيٽنگ ڪندي سڀ کان وڌيڪ 43 رنسون ٺاهيون، جڏهن ته بليڪ ويل 27 ۽ لاننگ 17 اسڪور ڪيو، نيوزيلينڊ طرفان نيوٽن 2 وڪيٽون ورتيون، جواب ۾ نيوزيلينڊ جي ٽيم بيٽس جي شاندار ففٽي ۽ مڪ گلاشن جي محنت کانپوءِ به مزو نه ڪيو ۽ 8 وڪيٽن جي نقصان تي مقرر 20 اوورن ۾ 128 رنسون ٺاهي سگهي، بيٽس شاندار 54 ۽ مڪ گلاشن 35 رنسون ٺاهيون، جڏهن ته باقي 6 رانديگرياڻيون ڊبل فگرز ۾ پهچڻ کان پهرين ئي پويلين موٽي ويون،اهڙي ريت مهمان عورتن 17 رنسن تان ڪاميابي ماڻي، آسٽريليا طرفان شوٽ ۽ پيري 2-2 شڪار ڪيا، پيري کي شاندار آل رائونڊ ڪارڪردگي تي ميچ جي بهترين رانديگرياڻي قرار ڏنو ويو.

 

حالتون ڪيڏانهن وينديون؟: قيوم سنديلو

ڪجهه ٿوري ماٺار کان پوءِ هڪ ڀيرو ٻيهر قومي سياست ۾ طوفان جي ڪيفيت طاري ٿي وئي آهي، هي ڪيفيت کان هلڪي ڦلڪي ناهي پر انتهائي حد تائين خطرناڪ ٿي وئي آهي، ڪجهه ماڻهون اسٽيبليشمينٽ کي گيم بادشاهه چئي رهيا آهن ته ڪي وري خدا جو فيصلو قرار ڏئي رهيا آهن، مطلب ته جيترا وات آَهن اوتريون ڳالهيون هلي رهيون آهن هن وقت ملڪ ۾، مصطفيٰ ڪمال ۽ انيس قائمخاني جي پريس ڪانفرنس ته کڻي نئين هئي پر اهڙي ڪانفرنس ٿيڻ جون ڳالهيون ٽن مهينن کان هلي رهيون هيون، پر ان جي ٽائيمنگ ان جي ڪري اهميت جوڳي بڻجي وئي آهي جو ڪجهه ٽائيم اڳ اسڪاٽ لينڊ يارڊ ايم ڪيو ايم قائد الطاف حسين خلاف هلندڙ مني لانڊرنگ ڪيس کي ختم ڪرڻ جون ڳالهيون شروع ڪيون آهن.

مني لانڊرنگ جي ڪيس ۾ جيئن ئي ايم ڪيو ايم قائد کي رليف ملڻ جي بريڪنگ نيوز شروع ٿي وئي آهي ان کان پوءِ يڪدم ئي ايم ڪيو ايم خلاف به بريڪنگس نيوز هلڻ شروع ٿي ويون آهن، شروعات ايم ڪيو ايم جي قيادت جي دوست سرفراز مرچنٽ جيڪو هن وقت لنڊن ۾ ئي رهي رهيو آهي ان ملڪي ميڊيا تي اهڙو بيان ڏئي ممڻ مچايو آهي ته واقعي به ايم ڪيو ايم گذريل 20 سالن هندستاني ڳجهي ايجنسي را جي لاءِ ڳالهه ڪندي رهي آهي جنهن جي تصديق اسڪاٽ لينڊ يارڊ وارن مونسان پاڻ ڪئي آهي، ان جي مطابق ته اسڪاٽ لينڊ يارڊ وارن الطاف حسين خلاف تمام گهڻا ثبوت هٿ ڪري ورتا آهن، هڪ سوال جي جواب ۾ ان جو چوڻ هو ته مونکي حيرت اهي ته ايترا ثبوت هجڻ جي باوجود اسڪاٽ لينڊ يارڊ وارن ڪيس کي ڪمزور ڪيئن ڪيو آهي.

سرفراز مرچنٽ جي اهڙي انٽري کان پوءِ ٻيهر خطرناڪ انٽري مصطفيٰ ڪمال ۽ انيس قائمخاني ڪئي آهي، هنن ٻنهن جي انٽري ان جي ڪري به خطرناڪ آهي جو هي ڪنهن ٽائيم ۾ ايم ڪيو ايم جي اندر جا خاص ماڻهون رهيا آهن، ويتر هنن جهڙيون ڳالهيون ڪيون آهن تن مان بخوبي اندازو لڳائي سگهجي ٿو ته اسٽيبلشمينٽ پوري طرح سان هاڻي ملڪي سياست ۾ وڏيون تبديليون ڪرڻ جي موڊ ۾ اچي وئي آهي، مصطفيٰ ڪمال ۽ انيس قائمخاني جي پريس ڪانفرنس کان پوءِ گهرو وزارت پڻ متحرڪ ٿي وئي آهي، گهرو وفاقي وزير چوڌري نثار فوري طور تي نوٽيس وٺندي وزيراعظم نواز شريف کي مصطفيٰ ڪمال ۽ انيس قائمخاني جي الزامن کان آگاهي ڏئي ڇڏي آهي ۽ اهڙيون خبرون به هلڻ شروع ٿي ويون آهن ته مصطفيٰ قائمخاني پاران اڳوڻي وفاقي وزير رحمان ملڪ خلاف جيڪي الزام هنيا آهن ان کان پوءِ ملڪي سيڪيورٽي ادارن وفاقي وزير چوڌري نثار کي اهڙي آگاهي ڏني وئي آهي ته لنڊن ۾ هن وقت رهندڙ رحمان ملڪ کي ملڪي واپسي تي گرفتار ڪيو ويندو جنهن جي ذريعن مطابق اڃا تائين منظوري ناهي ملي سگهي پر اهڙي صورتحال شايد به ٻن ٽن ڏينهن جي اندر واضح ٿي ويندي.

هاڻوڪي صورتحال جي مطابق ايندڙ ڪجهه ڏينهن ملڪي سياست ۾ انتهائي حد تائين خطرناڪ ثابت ٿيندا، ڇو جو مصطفيٰ ڪمال جيڪي الزام هنيا آهن اهي ڪهڙي طرح سان به هضم ڪرڻ جهڙا ناهن، ان جي ڪري ڏسڻو اهو آهي ته ايم ڪيو ايم جو ردعمل ڪيتري حد تائين مضبوط ٿئي ٿو، جنهن تي هن وقت ڳجهيون اکيون اٽڪيل آهن، ان کان پوءِ اهو به ڏسڻو آهي ته هن سڄي صورتحال ۾ پيپلز پارٽي ڪهڙي پاسي بيهي ٿي ۽ اڳوڻو صدر آصف علي زرداري ڪهڙو موقف اختيار ڪري ٿو، شايد ان کان پوءِ صورتحال جي پروڙ پئجي ويندي ته ملڪي سياست ڪهڙي پاسي بيهي ٿي.

سرفراز مرچنٽ ۽ مصطفيٰ ڪمال جي ميڊيائي بيانن ۽ پريس ڪانفرنس کان جتي ملڪي سياست ۾ ڦيرو اچي ويو آهي، اهڙو فيصلو لازمي طور تي هاڻي اسڪاٽ لينڊ يارڊ وارن وٽ به اچي سگهي ٿو لازمي طور تي لنڊن ۾ اهڙيون ڳالهيون به اٿي سگهن ٿيون ته جيڪڏهن سرفراز مرچن ۽ مصطفيٰ ڪمال جون ڳالهيون صحيح ۽ اسڪاٽ لينڊ يارڊ پاران مهيا ڪيل ثبوت حقيقت تي مبني آهي ته پوءِ ڪهڙي طاقت الطاف حسين خلاف ڪارروائي ڪرڻ کان روڪي رهي آهي، بحرحال قومي سياست ۾ هاڻوڪو جيڪو وقت هلي رهيو آهي، هاڻي لازمي طور تي هيڏانهن يا هوڏانهن ضرور ويندو.

 

هڪ پنجابي سنڌي ۽ مادري ٻولي جو خانو: عباس جلباڻي

اکين ۾ اشڪبارين کانسواءِ پوکيون ته ڇا پوکيون

 اوهانجي انتظار کانسواءِ پوکيون ته ڇا پوکيون

 سنڌو جي سينڌ مان واري اڏي پئي ڄام شورا ڏس

اسان سوچڻ تاسارين کانسواءِ پوکيون ته ڇا پوکيون

هي غزل جنهن ۾ ٻولي جي اربيلي رواني به آهي، رومانس جي چاشني به ۽ حقيقت جي ڪٿراڻ به، رزاق عاصي جو آهي. رزاق جو ڏاڏاڻو ڏيهه اوڀر پنجاب آهي. سندس بابو شفيع محمد انگريز جي فوج جو سپاهي هو. انهن سپاهين مان جنکي سورهيه بادشاهه جي اڳواڻي ۾ هلندڙ آزادي جي هٿيار بند جدوجهد کي چيڀاٽڻ لاءِ سنڌ موڪليو ويو.

پر شفيع محمد ڪم ئي ابتو ڪيو. هو وطن يا ڪفن تحريڪ کان ايترو متاثر ٿيو جو لوڙهن ۽ ويڙهن ۾ حر فقيرن جي خاندانن سان ٿيندڙ ويل کي ڏسي کيس پنهنجي نوڪري کان نفرت ٿي وئي. هن فوج ڇڏڻ جو فيصلو ڪيو. پر وقت  کان اڳ ريٽائرمينٽ هو وٺي به ته ڪيئن؟ ان لاءِ ته ڪو عذر گهرجي. اهو به پڪو.

ڇاڪيائين جو هڪ لوهي شيخ کڻي پنهنجي هڪ اک ۾ ٽنبي ڇڏيائين. پاڻ کي پنهنجن هٿن سان ڪاڻو ڪري ڇڏيائين. جسماني معذوري جي بنياد تي ريٽائرمينٽ وٺڻ لاءِ. ..وهه ڙي جوان واهه..سلام آ توکي، سنڌ ڌرتي جو. جئي پت جمن مانوان.

سنڌ شفيع محمد جي دل ۽ روح ۾ ائين گهر ڪري وئي جو ورهاڱي کانپوءِ جن هتي ئي مستقل طور آباد ٿيڻ جو فيصلو ڪيو. انڊيا ۾ پنهنجي زمين جي ڪليم ۾ جهڏو لڳ 37 ايڪڙ زمين حاصل ڪيائين ۽ اهڙي ريت پنهنجيون پاڙون سنڌ ڌرتي ۾ پوکي ڇڏيائين.

عاصي ٻڌائي ٿو ته بابو کيس چوندو هو ته پٽ! جڏهن اسان انڊيا کان آيا پئي سين ته اسانجا ئي پنجابي ريل جي  دٻي جو در بند ڪري اسان کي چون پيا ته ”پاڪستان آگي هي“. ان جي ابتڙ سنڌ  ماءُ جيان اسان کي پنهنجي دامن ۾ پناهه ڏني، جيڪڏهن توکي سنڌ سان وفا ڪرڻي آهي. ڪرين سگهين ته هتي رهه. نه ته جهنگ (پنجاب ۽ هير جو شهر) لڏي وڃ جتي تنهنجا مائٽ رهن ٿا.

اهڙو سبق ڪيئن نه اثر ڪري، عاصي پيءُ جي ڳالهه سمجهي ويو. چئي ٿو، سنڌ ڪبو ۽ قبلو ڪليسا به آ، مون کان منهنجو مذهب ۽ خدا نه پڇو

عاصي چواڻي کيس پنجن پٽن کانپوءِ ڌي ڄائي ته هو ڏاڍو خوش ٿيو. سو چيائين ته اهڙو نالو رکانس جيڪو منهنجي سوچ جي عڪاسي به ڪري ۽ مذهبي مائٽن کي به هضم ٿي وڃي ته نالو رکيائين ”جنت سنڌ“

عاصي روزگار سانگي ڪراچي ۾ ڇڙو رهندو آهي (عوامي آواز ۾ ڪم ڪندو آهي.) جڏهن به ڳوٺ ويندو آهي ته سڀ کان وڌيڪ خوش سندس ڌي ٿيندي آهي. سندس آجيان ۾ نعرا هڻندي آهي. جيئي سنڌ

پر عاصي جي گهر ۾ سنڌي نه پنجابي ڳالهائي ويندي آهي هاڻ اوهان فيصلو ڪيو ته عاصي سنڌي آهي يا نه.

عاصي لاءِ نه، هن کي ڪنهن سند سرٽيفڪيٽ جي گهرج ڪانهي (هو سنڌي ڳالهائيندڙ گهرن ۾ ڄايل اسان سنڌين  کان وڌيڪ سنڌي آهي، ڇاڪاڻ ته اسان ته ڄم جي حادثي جي ڪري سنڌي آهيون. ۽ هن سنڌيت جي چونڊ ڪئي آهي، پنهنجي برادري ۾ هنجي قيمت به ادا ڪندو هوندو. جديد سنڌي قوم جي جوڙجڪ، تشڪيل ڪهڙن عناصر سان ٿئي ٿي، اهو ڏسڻ لاءِ، قومپرستي ۽ نسل پرستي ۾ تميز  پيدا ڪرڻ لاءِ، اڻ پڙهيل دانشورن/ٻٽاڪي سياسي ڪارڪنن جي ڳالهين کي ته ظاهر  آهي اسان ٻڌي اڻ ٻڌو ڪري  ڇڏيون ٿا. منهنجيون وايون ان مهل بتال ٿي ويون جڏهن مون نيوز ميگزين ”افيئر“ ۾ ارشاد ميمڻ جو هڪ ڪالم پڙهيو جنهن ۾ هن لکيو ته قوم هڪڙي ئي نسل جي ماڻهن  جو مجموعو آهي تنهنڪري هو بلوچن ۽ گهرن ۾ سنڌي نه ڳالهائيندڙ ٻين برادرين کي ”سنڌيت جي دائري“ مان خارج ٿو ڪري.

اهڙي ڪا هڪ قوم آهي دنيا ۾ جيڪا هڪ ئي نسل جي ماڻهن تي ٻڌل هجي ڇاڪاڻ ته يهوديت تبليغي  مذهب ناهي ان ڪري اسرائيلي ان ڳالهه تي ناز  ڪندا آهن ته هو دنيا جي واحد ”نج قوم“ آهن، پر اندر ئي اندر ۾، ٻاهر ٻاڦ ناهن ڪڍندا. ٿي سگهي ٿو دنيا کان ڪٽيل ڪنهن ڏورانهين سامونڊي ٻيٽ تي ڪجهه هزار ماڻهو رهندا هجن جيڪي نسلي طور غير آلودهه قوم هجن باقي دنيا جي هر قوم مختلف نسل جي ماڻهن جو مجموعو آهي.

سنڌي قوم به ۽ اها diversity سنڌي قوم جي سونهه  به آهي ۽ سگهه به. دراوڙن کان عربن تائين، بلوچن کان پٺاڻن تائين، مختلف نسل ضم آهن سنڌي قوم ۾.

ٻئي پاسي سنڌ هڪ لساني نه پر گهڻ لساني قوم آهي. سنڌي ٻولي جي قومي ٻولي هئڻ تي ڪو به سمجهوتو نه ڪبو. پر سرائيڪي، ٻروچڪي، ڍاٽڪي، گجراتي ۽ اردو ٻوليون به سنڌ جون پنهنجيون ٻوليون آهن. پرايون ناهن. انهن ٻوليون ڳالهائيندڙن جون ثقافتون سنڌي ثقافت جون ذيلي ثقافتون Sub-cultures آهن.

پوءِ اسان ڪائنرن ۽ خائنن جي ڪوڙن دهمانن ۾ اچي پنهنجي ملوڪ ماڻهن کي اهو ڇو پيا چئون ته هو پنهنجين امڙين بابت ڪوڙ ڳالهائين بلڪه لکن. منهنجو اشارو آدم شماري جي حوالي سان هلندڙ هن مهم ڏانهن آهي ته سنڌ ۾ رهندڙ هر ماڻهو مادري ٻولي جي خاني ۾ سنڌي لکي.

عاصي ته اهم ڪم خوشيءَ سان ڪندو. مٽن مائٽن کي به چوندو. بدين، ميرپورخاص، نوابشاهه،حيدرآباد، ٿر، سکر ۽ گهوٽڪي ۾ رهندڙ اهي پنجابي سنڌي به ڪندا جيڪي سياسي لحاظ کان Clear آهن. جيڪي هن پنجابي جوڌي جا وارث آهن جنهن سائين جي ايم سيد ڏانهن ايندڙ گولين کي پنهنجي سيني تي جهٽي سنڌ تي سر قربان ڪيو هو. پريان لوءِ جي هن رحمان مغل جا وارث جنهن سرمد سنڌي بڻجي 80 واري ڏهاڪي ۾ قومپرستي کي اڀارڻ ۾ مکيه ڪردار ادا ڪيو.سائين جي ايم سيد جي ڪتابن ۽ شيخ اياز جي شاعري اوترا قومپرست ناهن پيدا ڪيا جيترا هن ٻيجل جي صدا ڪيا آهن.

پر عاصي جي برادري جي اڪثريت شايد اها ڳالهه قبول نه ڪري، لياري جو بلوچ ڇو اهو ڪوڙ هڻي ته سندس ماءُ گهگهو ناهي پائيندي، ورهاڱي کان اڳ کان وٺي لياري، ملير ۽ ڪراچي جي ڪنڊ ڪڙڇ جا بلوچ سياسي طور سنڌين سان سلهاڙيل رهيا آهن. سنڌي ڪانگريس ۾ هئا ته هو به ڪانگريس ۾ هئا. سنڌي مسلم ليگ ۾ آيا ته هنن به جهنڊو مٽائي ڇڏيو. ذوالفقار علي ڀٽو پيپلز پارٽي جو پرچم بلند ڪيو ته هو سندس ڪاروان جي پهرين صف ۾ شامل ٿيا. بلوچي جي سرموڙ ڳائڻي ۽ موسيقار استاد شفيع بلوچ ”جيئي ڀٽو، جيئي ڀٽو، سدائين جيئي“ تخليق ڪري تاريخ رقم ڪئي. اهو پاڪستان جو پهريون مقبول سياسي ترانو هو. 1988 جي چونڊ دوران لياري پي پي کي ”دلا تير بجان“ ڏنو، جيڪو گذريل اليڪشن ۾ به پارٽي جو سڀ کان وڏو منتر هو. اهو گيت بلوچي جي عوامي شاعر حضرت شاهه جو لکيل آهي. جنهن بلوچي ۾ ڪو هياري لکي ۽ واهه جي لکي. بلوچي ٻولي جي ٻولي کي به ”ڏ-ڏيڏر“ ڏئي ويو.

” منت مداري مني جيڏلان، من بي روان وطنا وتي“

”دلا تير بجان“ جي ڌن ٺاهيندڙ ۽ ان کي موسيقي ڏيندڙ آهي ظهور خان زيبي. ميوه شاهه جي خاندان جيان لياري ۾ ورهاڱي کان اچي آباد ٿيندڙ هڪ افغان ڪٽنب جو ڄايو. وهه جو ڪم ڪيائين. وهه جو fusion آهي. ڌن سنڌي لوڪ گيت ”ڍڳو پير پيران“ جي. موسيقي بلوچي. دهل افريقي، (اها آهي سنڌ)

ڀٽو صاحب جي ڦاهي تي بنگل ديرو ٻري اٿيو ته لياري ۾ به وڏو لڙ ٿيو. ملير ۾ به ممڻ مچي ويو. ملير جي ناصر بلوچ ۽ لياري جي اياز سمون ڪراچي سينٽرل جيل ۾ ڪڏندي ڳائيندي، کلندي کلائيندي، نعرا هڻندي، ڦاهي جي ڦندي کي چمي ڏئي اکين تي رکي، وڏي خوشيءَ ناز سان، پنهنجي گردن ۾ پاتو ته جلاد رجاهٿ لڏي ويا، ضياءُ الحق جي ننڊ ڦٽي وئي. جيئي ڀٽو. 1983جي جمهوريت جي بحالي جي تحريڪ ۾ لياري ۽ ملير دادو، ميهڙ، خيرپور ناٿن شاهه ۽ ڳوٺ قيصر خان چانڊيو سان گڏ بيٺا هئا. ٽن مهينن تائين جنگ جوٽي رکيائون آمريت سان، جيئي ڀٽو.

ڀٽو صاحب ٽن تڪن تان چونڊ وڙهندو هو. لاڙڪاڻو، ٺٽو ۽ لياري مان، بينظير صاحبه به اها روايت برقرار رکي. 88 واري اليڪشن ۾ کيس سڀ کان وڌيڪ ووٽ لياري مان مليا. گهڻو ڪري 93 هزار. جيئي ڀٽو. اهو سلسلو بعد ۾ به جاري رهيو. موٽ ۾ محترمه پنهنجي بابي جيان، جنهن لياري ڊگري سائنس ڪاليج قائم ڪيو، لياري جنرل اسپتال ته ٺهرائي پر نوڪرين جي حوالي سان بي بي جي پي پي لياري، ملير ۽ ڪراچي جي ٻين قديمي علائقن جي رهواسين کي سندن حق ڏيڻ ۾ ناڪام وئي. ويتر هن حق تي ڌاڙا هنيا ويا. جيڪي نوڪريون کين ملڻ گهربيون هيون، اهي اترادي کائي ويا.

نتيجي طور مقامي پارٽي ڪارڪنن ۾ هن احساس جنم ورتو ته ڪٿي پي پي ڪراچي جي قديم رهواسين کي فقط استعمال ٿي ڪري. وقت ۽ حڪومتون گذرڻ سان اها سوچ سگهاري ٿيندي وئي. زرداري صاحب جي صدارت جي دور ۾ اچو. ايم ڪيو ايم جي بلائن کي منهن ڏيڻ لاءِ گينگ وار جي ڪارندن کي استعمال ڪيو ويو. پر جڏهن ڪم لٿو ته ڊکڻ وسري ويو. ۽ اهڙيو وسري ويو جو ”يارن“ کي خوش ڪرڻ لاءِ لياري ۾ آپريشن ڪيو ويو. کيس ڪربلا بڻايو ويو. ٽن ڏينهن تائين نه بجلي نه پاڻي. رڳو بارود جي بوءِ. گولين جا ٺڪاءَ . چوڌري اسلم جا داٻا،

ڦر ڀي هم سي يه گله هي ڪه وفادار نهين

هم وفادار نهين تو ڀي تو دلدار نهين

جذباتي ٿي ويم. ڇا ڪيان؟ لياري جا سور جو سامهون اچي ويا. لياري پنهنجي جنم ڀومي آهي. مٽي منهنجي لاڙڪاڻي جي آهي. مون کي بلوچن سان بلوچي ۾ ڳالهائيندڙ ڏسڻ دوران مون ڪيترن ئي سنڌي دوستن جي اکين ۾ ناپسنديدگي جي لهر ڏٺي آهي. کين منهنجي ”سنڌيت تي شڪ ٿيڻ لڳندو آهي. جيڪي حجائتا آهن، اهي ته چئي ڏيندا آهن، ”واهه جو ڊبل ڪراس آهين.“

ها يار اهو ته آهيان، بلڪه ٽرپل ڪراس کان به وڌيڪ آهيان پنجابين سان پنجابي ڪندو آهيان، پٺاڻن سان پشتو، هاڻي ڏيو منهن.

ته پيارا ! هي جيڪا مهم هلي پئي ماڻهن کي قائل ڪرڻ جي ته مادري ٻولي جي نالي ۾ سنڌي لکرايو، اول ته اها پنهنجو ٽارگيٽ حاصل ڪري ئي نه سگهندي. اوهان اهو پيغام هن مامري سان لاڳاپيل هر ماڻهو تائين پهچائي ڪو نه ٿا سگهو. جي ڪري به وڃو ته هر هڪ کي قائل نه ٿا ڪري سگهو. فطرت جي خلاف ڪا به ڳالهه قبوليت نه ٿي ماڻي سگهي. ابتدا اها exercise ڪري اوهان ڪجهه ماڻهن کي پاڻ ڌڪي دور ڪري ڇڏيندو.

۽ اهو عمل سنڌي قومپرست سياست سدائين ڪندي آئي آهي. اها سياسي ڌارا جديد سنڌي قوم جي جوڙجڪ کان واقف ئي ڪونهي. نسل پرستي جي ڌٻڻ ۾ ڦاٿل آهي.

ڇا اهو بهتر نه ٿيندو ته جن ڊراما بازن کان اسان ڊڄون پيا، تن کي چئون ته سنڌي جديد قوم آهي. Multi-lingual and multi-cultural .

1952 کانپوءِ هندستان مان لڏي آيل ماڻهن کان وٺي تازي غير قانوني قبضا گيرن کي ڇڏي باقي سنڌ ۾ فقط سنڌي رهن ٿا. هنن جي اڪثريت سنڌي ڳالهائي ٿي. پر هنن ۾ ننڍيون وڏيون اهڙيون ڪيئي برادريون آهن جيڪي ٻيون ٻوليون ڳالهائين ٿيون.

بس اتني سي بات هي. سيڌي سادي، سچي، سائنسي اور بين الاقوامي

 

فضيلا سرڪي کي اغوا ٿئي 9 سال ٿيڻ وارا ۽ سواليه بڻيل سنڌ پوليس جي ڪارڪردگي

فضيلا سرڪي سميت ٺل جا 3 مغوي اڃا تائين ڌاڙيلن جي چنبي ۾ ڦاٿل آهن، جن جي وارثن ۽ شهرين پاران الڳ الڳ احتجاجي مظاهرا ڪيا ويا آهن. ڄاڻ موجب ٺل تعلقي ۾بدامني هڪ دفعو ٻيهر ڪر کنيو آهي، انتظاميا بدامني تي ضابطو آڻڻ ۾ مڪمل طور تي ناڪام ٿي چڪي آهي، ٺل جي قادري پاڙي مان 3 ڏينهن اڳ مبينا طور تي اغوا ٿي ويل شاگرد ڪاشف علي ولد امير بخش ٻرڙو جو ڪوبه ڏس پتو پئجي نه سگهيو آهي، انتظاميه مغوي ڪاشف ٻرڙو جي بازيابي جي لاءِ خاموش تماشائي بڻيل آهي، مغوي ڪاشف علي ٻرڙو جي بازيابي جي لاءِ قادري محلي جي رهواسين ۽ ٻرڙا برادري پاران جونگل موڙ کان احتجاجي جلوس ڪڍيو ويو جيڪو شهر جي مختلف چوڪن ۽ رستن کان ٿيندو پريس ڪلب پهتو. ان موقعي تي ميڊيا سان ڳالهائيندي اڳواڻن ميرحسن ٻرڙو، امير بخش ٻرڙو، نعمت الله ڊول،حاجي عبدالرحيم ٻرڙو، غلام مصطفيٰ ميراڻي، قادر بخش نوناري ۽ ٻين چيو ته ٺل تعلقي ۾ امن امان جي صورتحال بدتر ٿي وئي آهي جڏهن ته ٻارڙن جي اغوائن ۾ رڪارڊ اضافو ٿيو آهي، ٻئي طرف ٺل کان خيرپور ويندي اغوا ڪيل حافظ غلام رسول نعماني ڪنراڻي 128 ڏينهن گذري وڃڻ جي باوجود بازياب نه ٿي سگهيو آهي، مغوي حافظ غلام رسول نعماني ڪنراڻي جي بازيابي جي لاءِ وارثن ۽ شهرين پاران 128هين ڏينهن به احتجاجي مظاهرو ڪري پريس ڪلب اڳيان ڌرڻو هنيو ويو. هوڏانهن ٺل ڀرسان ڳوٺ ڳڙهي حسن سرڪي مان 8 سال 11 مهينا اڳ اغوا ٿي ويل فضيلا سرڪي ڌاڙيلن جي چنبي مان آزاد نه ٿي سگهي آهي، 53 هين ڏينهن به نينگري جي وارثن والد عبدالرزاق سرڪي ۽ امڙ سڪينه خاتون پاران پنهنجي جگر جي ٽڪري جي بازيابي جي لاءِ پاڪ ڪتاب کڻي ٺل پريس ڪلب اڳيان احتجاجي مظاهرو ڪري علامتي بک هڙتال ڪئي، احتجاج ۾ ايس ٽي پي جي ڪارڪنن اصغر لاشاري، عبدالوهاب بنگلاڻي،ممتاز ٻرڙو، عبدالغفور ٻرڙو ۽ ٻين شرڪت ڪئي. ميڊيا سان ڳالهائيندي نينگري فضيلا سرڪي جي والد عبدالرزاق سرڪي چيو ته اسان جي جگر جي ٽڪري نينگري فضيلا سرڪي کي بازياب ڪرايو وڃي.

سنڌ پوليس جي ڪارڪردگي ڪنهن کان به لڪل ناهي، جيڪڏهن سنڌ پوليس ۾ اهليت هجي ها ته سنڌ ۾ رينجرز جو وجود ئي نه هجي ها، سنڌ ۾ ٿيندڙ هر برائي ۾ پوليس اهم ڪردار هجي ٿو، پوءِ اها چوري هجي، ڌاڙا هجن،اغوا هجي يا منشيات يا اسلحي جو ڪاروبار سنڌ پوليس سڀني کاتن ۾ پاڻ ملهايو آهي، ايتري قدر جو سنڌ ۾ پرڏيهي ڏوهارين جي به آمد ۾ سنڌ پوليس جو اهم ڪردار آهي جيڪا واٽن تي چيڪنگ بهاني کيسا ڀري ڪنهن کان به نه ٿي پچي ته ڪير آهي، ڪٿان آيو آهي ۽ اڳتي هلي ڪندو ڇا، بحر حال سنڌ پوليس کي ڇڏي جيڪڏهن ٺل جي مغوين جي بازيابي ۾ رينجرز ڪردار ادا ڪري ته نه سال نه ڏينهن ڪلاڪن اندر مغوي پنهنجي گهرن ۾ هوندا، ڊي جي رينجرز کي عرض آهي ته معصوم ٻارڙن جي اغوائن جي واقعن جو به دهشتگردي واقعن جيان نوٽِيس ورتو وڃي جئين انهن جي گهر ۾ متل ماتم ختم ٿئي ۽ خوشيون جنم وٺن.