تازيون خبرون

Daily Archives: March 3, 2016

اداڪار ٽائيگر شيروف 26 سالن جو ٿي ويو، سندس سالگرهه تي فلم باغي جو پوسٽر به جاري

ممبئي(شوبز نيوز) بالي ووڊ اداڪار ٽائيگر شيروف پنهنجي 26هين سالگره ملهائيندو. بالي ووڊ سڌ سماءَ جي ذريعن مطابق اداڪار ٽائيگر 26 سالن جو ٿي ويو آهي. اداڪار ٽوئيٽر تي مداحن سان سالگره جي موقعي تي مبارڪباد ۽ نيڪ خواهشن جي پيغامن تي شڪريو ادا ڪيو. اداڪار چيو ته سالگره واري ڏينهن سندس فلم باغي جو پوسٽر جاري ٿيو آهي جيڪو منهنجي لاءِ ڪنهن تحفي کان گهٽ ناهي. فلم جي ڪهاڻي بلڪل الڳ آهي جيڪا مداحن کي پسند ايندي. فلم ۾ هيروئن شرڌا ڪپور آهي ۽ فلم جي هدايت صابر خان ڏني آهي جڏهن ته اها فلم جلد رليز ڪئي ويندي.

 

زال جي ڪري سياست ۾ ناهيان آيو: سلويسٽر اسٽيلون

لاس اينجلس(شوبز نيوز) بالي ووڊ اداڪار سلويسٽر اسٽيلون چيو آهي ته پنهنجي زال جي ڪري سياست ۾ ناهيا آيو. بالي ووڊ اداڪار سلويسٽر چيو ته دوست اداڪار آرنلڊ شيوانزگر جي نقش قدم تي هلندي سياست ۾ قدم رکڻ چاهيان ٿو پر پنهنجي زال جي ڪري سياست ۾ ناهيان آيو. سندس زال مطابق اهو فضول آئيڊيا آهي، اداڪار جي ايندڙ اينيميٽيڊ فلم رينجڊ اينڊ ڪلينڪ هوندي جنهن ۾ هو ڪردار لاءِ بيڪ گرائونڊ آواز ڏيندو جڏهن ته فلم 20 اپريل تي سئنيما گهرن ۾ لڳندي.

 

بنگلاديش هٿان ناڪامي تي محمد عامر قوم کان معافي وٺي ڇڏي

مير پور(اسپورٽس نيوز) قومي ڪرڪيٽ ٽيم فاسٽ بالر محمد عامر ايشيا ٽي توئنٽي ڪپ جي اهم ميچ ۾ بنگلاديشي ڪرڪيٽ ٽيم هٿان ناڪامي تي پاڪستاني قوم کان معافي وٺي ڇڏي.محمد عامر سماجي رابطن واري ويب سائيٽ فيس بڪ تي پنهنجي چاهيندڙن ڏانهن پيغام موڪليو آهي ،جنهن ۾ چيو آهي ته مان پنهنجي پوري ڪوشش ڪئي پر بدقسمتيءَ سان ٽيم کي کٽرائي نه سگهيا سين،جنهن تي ڪرڪيٽ شوقينن کان معافي وٺان ٿو.

 

نيوزيلينڊ ڪرڪيٽ ٽيم جو اڳوڻو ڪپتان مارٽن ڪرو ڪينسر وگهي 53 ورهين جي ڄمار ۾ لاڏاڻو ڪري ويو

آڪلينڊ (اسپورٽس نيوز) نيوزيلينڊ ڪرڪيٽ ٽيم جو اڳوڻو ڪپتان مارٽن ڪرو ڪينسر جي مرض وگهي 53 ورهين جي ڄمار ۾ لاڏاڻو ڪري ويو، پرڏيهي ميڊيا مطابق مارٽن ڪرو نيوزيلينڊ جي شهر آڪلينڊ ۾ پنهنجا آخري پساهه کنيا، ڊاڪٽرن سيپٽمبر 2014ع ۾ کيس ڪينسر هجڻ جي تصديق ڪئي هئي ۽ سندس علاج هلي رهيو هو، مارٽن ڪرو جون آخري رسمون 11 مارچ تي آڪلينڊ جي هولي ٽرينٽي ڪيٿيڊرل ۾ ادا ڪيون وينديون، واضح هجي ته مارٽن ڪرو نيوزيلينڊ طرفان 77 ٽيسٽ ميچن ۾  45 ڏهائي 36 جي شرح سان 5444 ۽ 143 ون ڊي ميچن ۾ 38 ڏهائي 55 جي شرح سان 4704 رنسون ٺاهيون، پاڪستان خلاف 1992ع واري ورلڊ ڪپ جي سيمي فائنل ۾ نيوزيلينڊ جي ڪپتاني به مارٽن ڪرو ڪئي هئي، سندس لاڏاڻي تي نيوزيلينڊ ڪرڪيٽ ٽيم جي موجوده ڪپتان ڪين وليمسن ڏک جو اظهار ڪندي چيو ته مارٽن ڪرو عظيم رانديگرهو، جيڪو سدائين ٽيم لاءِ هاڪاري سوچ رکندو هو.

 

قصو هڪ پروفيسر جو!: شفيق شاڪر

ان پروفيسر جو چهرو اهڙو ته ڀيانڪ هو جوڄڻ ته سائين جن تازو قبر مان اٿي آيا هجن. خدا شل اهو چهرو ڪنهن دشمن کي خواب ۾ به نه ڏيکاري. وڏيون ڦڏيون واسينگ جهڙيون بليڪن وائيٽ مڇون جن سندس وات مبارڪ جي اڌ حصي تي قبضو ڪري رکيو هو.خير سان هن کي مرڪندي ڪڏهن ڪنهن ڏٺو ئي نه هو جو اندازو لڳائي سگھجي ته سائينء جو انداز تبسم ڪهڙي غضب جو هوندو پر ڏسندڙن سندس رڳو غضب ئي غضب ڏٺو هو جنهن دوران سندس زبان کان وڌيڪ سندس مڇون لرزشي حرڪت ڪنديون هيون.سندس تڪيه ڪلام هو ته “ هي ڪهڙو ڪلاس آهي جنهن ۾ قبرستان واري خاموشي آهي؟” وري جيڪر ڪنهن شاگرد ڪو ابتو سبتو سوال پڇڻ جي حماقت ڪئي ته سامهون اهوئي آواز ايندو “ شٽ اپ، نان سنس!”سائين نه صرف عجيب هو پر باقائدي هڪڙو عجوبو هو. روسٽم تي بيٺو ته هڪ موضوع مان ٻيو،ٻئي مان ٽيون ۽ ٽئين مان چوٿون.نه ڪاما نه فل اسٽاپ،بريڪ تي پير صرف تڏهن رکندو هو جڏهن کيس چانھ لاء سڏ ٿيندو هو.سائينء جي واحد عينڪ جنهن کي مر مٽيء جو گهرو رنگ چڙهيل هوندو هو،موئن جي دڙي مان مليل نادراتن مان معلوم ٿيندي هئي.بار بار هائي ري ايڪٽر اسڪيل تي ڪنڌ ڌوڻڻ جي شوق سبب انهيء عينڪ کي رسن سان ٻڌڻ شايد ضروري ٿي پيو هجي.اصل قيامت ته تڏهن ڪرندي هئي جڏهن پروفيسر صاحب جي امتحان ۾ ڊيوٽي لڳندي هئي.گھڻا گھڻا معزز شاگرد پرچو شروع ٿيڻ کان پهرين امتحاني ڪمري ۾ تياري ڪرڻ نه پر پوين سيٽن تي جايون ڳولهڻ لاء پهچي ويندا هئا ته جيئن ايندڙ ٽن ڪلاڪن ۾ عذاب الاهيء کان محفوظ رهي سگھن.پر جن بدنصيبن کي اڳين سيٽن تي ويهڻ ئي مقدر بڻبو هو سي به پويان ويٺل شاگردن مان باهيون ان نموني ڪڍندا هئا جو اوچتو اڳين سيٽن تي ويٺل ڪنهن شاگرد رڙ ڪئي، “ سر! هي مون کان سوال جو جواب ٿو پڇي.” بس پوء ان پويان ويٺل جي ڄڻ شامت آئي.گرجدار آواز ايندو، “ اسٽينڊ اپ، گيٽ آئوٽ!”ڪنهن کي مجال جو وڌيڪ هڪ لفظ به ڪڇي سگھي،سمجھو ته تاريڪ راهن ۾ ماريو ويو.آخر ڪلاڪ ڏيڍ جي منٿ سماجت بعد غصي وچان کيس ڪاپي واپس ڪندي آخري وارنگ ڏيندي چوندو هو،“ دس از دي لاسٽ چانس فار يو.” هن جو دماغ ڪمپيوٽر وانگر ڪم ڪندو هو ۽ وقت جو سج وانگر پابند!

موڪل ڪرڻ ته هن جي ڊڪشنريء ۾ ئي شامل نه هو.هن جي بيماريء لاء بار بار گھريل دعائن باوجود هو ڪڏهن به بيمار نه ٿيندو هو.هو هڪ اهڙي مشين هو جنهن ۾ سندس مضمون ۽ موضوع کان سواء ٻيو ڪو مواد فيڊ ٿيل ئي نه هو. نه لطيفو،نه ڪا ڪهاڻي ء۽ نه ئي ڪو دلچسپ واقعو شايد ان ڪري جو هو پاڻ ئي هڪ دلچسپ مخلوق هو.جيڪڏهن ڪنهن شاگرد جي بهترين ڪار ڪردگيء  کان خوش به ٿيندو هو ته پنهن جي ان پراڻي عينڪ جي پويان شاگرد کي اهڙين ته خونخوار نظرن سان ڏسندو هو جو خبر نه پوندي هئي ته شاگرد جي ان سٺي ڪارڪردگيء تي خوش ٿيو آهي يا سڙي رهيو آهي!

هونئن ته هن جي شخصيت جي تعريف ڪرڻ لاء ڪنهن کي ڳولهئي به ڪو مواد نظر نه ايندو هو پر چالاڪ شاگرد خوشامد جي طور تي سندس اوڻيھ سو ٻڙيء جي ڪوٽ،انگريزن جي دور جي پتلون ۽ ڪلهوڙن جي دور جي گھڙيء جي تعريف ضرور ڪندا هئا جواها ئي هن جي ڪمزوري هئي.اهڙن خوشامدڙين تي هو هٿ ڪجھ هلڪو رکندو هو. باقرخانيون جنهن کي عرف عام ۾ کارا بسڪوٽ چيو وڃي ٿو چانھ ۾ ٻوڙي کائڻ سندس من پسند شوق هو ۽ کائڻ وقت هو دنيا وما فيها کان لاتعلق بڻجي ويندو هو.جيڪر باقرخانين مان وهندڙ چانھ جي خوبصورت لار سندس سيني تي سري پيئي ته مڙيئي خير آهي هو ان کي صاف ڪرڻ جو خاص تڪلف نه ڪندو هو.پروفيسر صاحب کي جيڪر ڪا شيء گھڻو پريشان ڪندي هئي ته اهو هن جو هروقت وهندڙ نڪ هو.جنهن کي صاف ڪرڻ لاء کيسي مان بار بار رومال ڪڍي وقت ضايع ڪرڻ بدران ٻانهن جي ٻنهي قفن کي واري واري سان استعمال ڪري وٺندو هو.شاگردن جي لاء هونئن ته سڄو پروفيسر ئي هڪ آفت هو پر انهي کان به وڏي آفت سندس ڇڪ يعني نڇ هئي جيڪا ڪنهن زلزلي کان گھٽ نه هئي.نڇ اهڙي ڄڻ ته اوچتو ڪنهن ڪريڪر جو ڌماڪو ڪيو هجي.ان وقت شاگردن جي دل چاهيندي هئي ته حفاظتي تدبير تحت ڪرسين جي هيٺان هليو وڃجي پر ايئن ڪرڻ ممڪن نه هوندو هو.چانھ پروفيسر جي لاء پيٽرول جي مثال هئي. ڪڏهن ڪڏهن ڪلاس ۾ ئي گھرائي وٺندو هو ۽ شاگردن کي صلاح ڪرڻ سواء اهڙي ته موسيقيء سان پيئندو هو جو سرڪ ڀرڻ جو آواز پوري ڪلاس کي ٻڌڻ ۾ اچي. کل ته ڏاڍي ايندي هئي پر ڪنهن کي کٽيء کنيو آهي جو چوي ته “ آ بيل مجھي مار”.

ڪا اسائينمينٽ ڪهڙي به بهترين لکي اچو پر وڌ ۾ وڌ ريمارڪس جيڪي ملندا هئا سي هوندا هئا،

“ فيئر، سيٽسفڪيٽري ” باقي “ گڊ، ويري گڊ يا ايڪسيلنٽ ” جا اعزاز هو ڪهڙي خلائي مخلوق لاء بچائي رکندو هو ان جي ڪنهن کي ڪا خبر نه پئجي سگھي!.

 

 

آدمشماري ملتوي نه ٿيڻ گهرجي..: گھنشام شيام

ملڪ جي ڇهين آدمشماري جيڪا 8 سال اڳ 2008 ۾ متوقع هئي سا مارچ 2016 ۾ ٿيندي ٿيندي گڏيل مفادن واري ڪائونسل (ڪائونسل آف ڪامن انٽريسٽ) واري اجلاس ۾ اڻ ڄاتل مدي تائين ملتوي ٿي ويئي آهي. هونئن مرڪزي حڪومت اڳئي آدمشماري ڪرائڻ جي موڊ ۾ نه هئي ڇو جو گذريل پ پ پ حڪومت ۾ به گھرشماري کان پوءِ آدمشماري ڪرائڻ جو ٻيو مرحلو پنجاب جي اعتراضن جي ور چڙهي ويو هو ۽ آدمشماري نه ٿي سگھي هئي. جڏهن ته گذريل پ پ پ حڪومت پڻ آدمشماري ڪرائڻ متعلق ديرسان فيصلو ڪري لاپرواهي جو مظاهرو ڪيو هو پر پوءِ به آدمشماري ٻي مرحلي ۾ داخل ٿي. پنجاب جي اعتراضن جي ور چڙهي رڪجي ويئي. انهي وقت کان پنجاب صوبو اڄ تائين مختلف بهانن سان آدمشماري ٿيڻ جي راھ ۾ رڪاوٽ بڻيل آهي ڇو جو 2011ع ۾ ٿيل گھر شماري ۾ پنجاب صوبي ۾ آبادي جي شرح بلڪل گھٽ هئي. انهي ڪري پنجاب کي پڪ ٿي ويئي آهي ته اڄ به پنجاب صوبي جي آبادي جي لحاظ کان شرح وڌڻ بجاءِ گھٽ آهي.

ڏٺو وڃي ته 16مارچ کان رٿيل آدمشماري لاءِ ملڪ کي 166819 بلاڪن ۾ ورهايو ويو ۽ 210239 سيڪيورٽي فورسز جي پڻ ضرورت محسوس ڪئي ويئي فوج جي دستيابي جي حوالي سان آدمشماري ۽ سينسز سميت مرحلا ٻن ميهنن ۾ مڪمل ڪرڻ جو ايڪشن پلان پڻ تيار ٿي چڪو هو. آدمشماري واري حوالي سان سنڌ سرڪار پاران 32 جماعتن جون APC جي اجلاس ۾ پيش ڪيل سفارشون ڊارفٽ جي صورت ۾ سي سي آءِ جي اجلاس لاءِ تيار ٿي چڪيون هيون ۽ توقع ڪئي پئي ويئي ته رٿيل آدمشماري جيڪڏهن مارچ ۾ نه ته هلندڙ سال جي آڪٽومبر مهيني تائين ڪرائڻ جون تجويزون گڏيل مفادن واري ڪائونسل جي اجلاس ۾ زير غور اچي قبول ڪيون وينديون ۽ پوري سنڌ ۾ آدمشماري لاءِ جاگرتا مهم جي ضرورت محسوس ڪندي سياسي، سماجي تنظيمن کان وٺي هر باشعور ماڻهو پنهنجو ڪردار نڀائي رهيو هو ۽ رهيو آهي. انهن سڀني حڪمت عملين مان لڳو پئي ته آدمشماري هر حال ۾ مارچ ۾ ٿيندي پر هيڏين وڏين تيارين کان پوءِ به آدمشماري کي اڻ ڄاتل مدي تائين ملتوي ڪرڻ جو شماريات کاتي پاران صرف هڪ ڪارڻ سامهون آيو ته فوج دهشتگردي خلاف ضرب عضب آپريشن ۾ رڌل آهي ۽ آدمشماري فوج جي نگراني ۾ ڪرائڻ انتهائي ضروري آهي انهي ڪري مارچ يا اپريل ۾ فوج جي دستيابي قطعي ناممڪن هئڻ ڪري رٿيل آدمشماري ٿي نٿي سگھي.

جڏهن ته گڏيل مفادن واري ڪائونسل جي اجلاس ۾ شماريات کاتي پاران پيش ڪيل موقف تي فيصلو ڪيو ويو ته آدمشماري لاءِ گھربل فوج جي دستيابي بابت فوج سان مشاورت ڪري نئين تاريخ پڻ  تجويز ڪئي ويندي ۽ مرڪزي حڪومت پاران سنڌ سرڪار جي آدمشماري جي حوالي سان مرحليوار ڪرائڻ واري تجويز کي رد ڪيو ويو پر وزير اعظم 32 جماعتن جي سفارش جو احترام ڪندي سنڌ سرڪار کي سنڌ ۾ ڌارين کي آدمشماري ۾ شامل نه ڪرڻ جي خاطري ڪرائي. ڏٺو وڃي ته آدمشماري متعلق جيڪا قانون سازي ٿيل آهي تنهن ۾ وفاق کي وڌيڪ اختيار مليل آهن جڏهن ته 18هين ترميم کان پوءِ آدمشماري وارو معاملو صوبائي معاملو آهي انهي ڪري سينيٽ ۾ شفاف آدمشماري لاءِ آدمشماري ڪرائيندڙ شماريات بيورو اداري ۾ صوبن جي نمائندگي کي يقيني بنائڻ لاءِ هڪ ٺهراءُ پڻ پاس ڪيو ويو ليڪن وفاق جي سخت مخالت جي ڪري اهو منظور نه ٿي سگھيو انهي سان ۾ سان آدمشماري واري حوالي سان خدشا ويتر وڌايا ويا.

ڏٺو وڃي ته شروع کان ئي وفاق آدمشماري ڪرائڻ واري حوالي سان جنهن نموني سستي جو مظاهرو ڪيو پي ۽ آدمشماري نه ڪرائڻ جا بهانا پي ڳوليا تنهن نموني سان ته آدمشماري ٿيڻ جا امڪان بلڪل ڌنڌلا نظر اچي رهيا هئا پر پوءِ به گڏيل مفادن واري ڪائونسل (سي سي آءِ) ۾ رٿيل آدمشماري ٿيڻ واري فيصلي جي توقع هئي بهرحال جيئن وڏي سرڪار مرڪزي حڪومت چاهيو تيئن ٿيو ۽ آدمشماري اڻ ڄاتل مدي تائين ملتوي ٿي ويئي.

ڏٺو وڃي ته مارچ ميهنو تعليمي امتحانن وارو مهينو هوندو آهي ۽ اپريل تعليمي سال جو پهريون مهينو هوندو آهي. انهن ٻنهي مهينن ۾ آدمشماري لاءِ اسٽاف ڪيئن ٿو ملي سگھي؟ ان کان پوءِ ضرب عضب آپريشن دوران سيڪيورٽي اهلڪار پڻ ڪيئن ٿا ملي سگھن؟ آدمشماري لاءِ مارچ ميهنو طئي ڪرڻ وقت وفاق انهن سببن تي ڌيان ڇو نه ڏنو؟ ڇا وفاق سنڌ کي ان سلسلي ۾ سبز باغ ڏيکاري ۽ مايوسين ڏانهن ڌڪڻ جي ڪوشش ڪئي آهي؟ هونئن اهو طئي شده آهي ته آدمشماري سنڌ صوبي جي مفادن وٽان آهي ۽ آدمشماري عوامي ترقي ۽ خوشحالي جي ضمانت پڻ آهي انهي ڪري آدمشماري سنڌ لاءِ حساس معاملي سان گڏ زندگي ۽ موت جو معاملو پڻ آهي ته پوءِ اها ڳالھه جيڪا سنڌ جي مفادن وٽان هجي سا ڳالھه وفاق کي ڪيئن وڻندي؟

هتي سوال ٿو پيدا ٿئي ته سي سي آءِ جو اجلاس 90 ڏينهن بجاءِ 348 ڏينهن گذرڻ بعد ڇو ٿيو؟ ڇا وفاق کي سنڌ جي جائز مطالبن کان خوف هو؟ 1998 ۾ ٿيل آدمشماري جيڪا 10 سالن کان پوءِ 2008 ۾ ٿيڻ کپي سا متوقع تاريخ 8 سال بعد به نه پئي ٿئي ان جا ڪهڙا ڪارڻ آهن؟ اها حقيقت آهي ته ماڻهن جي ڳڻپ جا درست انگ اکر سامهون اچڻ سان سنڌ وڌندڙ آبادي موجب وفاق کان وسيلن مان وڌيڪ حصو وٺڻ جو حق رکندي. انهي ڪري ئي وفاق جو هاضمو آدمشماري واري حوالي سان بگڙيل لڳي ٿو.

ڏٺو وڃي ته جتي وسيلا گھٽ ۽ آبادي وڌيڪ هجي ٿي اتي آدمشماري هر حال ۾ ٿيڻ لازم هجي ٿي. سڀ ڪو ڄاڻي ٿو ته عوام جي سمورين گھرجن جو انحصار آدمشماري تي آهي. قومي اسيمبلي جي سيٽن کان ويندي، اين ايف سي ايوارڊ جي ورڇ تائين، وفاق ۾ نوڪرين جي ورهاست کان وٺي، کاڌ خوراڪ جي وسيلن تائين جي منصفاڻي ورهاست وارو عمل آدمشماري سان لاڳاپيل آهي. آدمشماري سان صوبي، ڊويزن کان وٺي يوسي يا ڳوٺ سطح تائين جي آبادي جي خبر پوي ٿي ۽ اها خبر پوي ٿي ته ڪيترا ماڻهو اڻ پڙهيل ۽ ڪيترا پڙهيل آهن. غربت جي شرح جي پڻ خبر پوي ٿي انهي ڪري آدمشماري واري اهميت کان ڪوبه انڪار نٿو ڪري سگھي.

فرض ڪجي ته جيڪڏهن ڪنهن کي ڪنهن گھر يا خاندان جي ڀاتين جي خبر نه هجي ۽ ان کي چئجي ته انهي خاندان لاءِ بازار مان وکر وٺي اچ ته اهو ماڻهو ڪيئن وکر وٺي سگھندو؟ يا ائين کڻي چئجي ته ڪنهن دعوت جي انتظام سنڀاليندڙ کي اها خبر نه هجي ته ڪيترن ماڻهن کي دعوت ڏني ويئي آهي ته پوءِ اهو ڪيئن سمورا انتظام سنڀاليندو؟ ساڳين طريقي سان جيڪڏهن سنڌ ۾ رهندڙ آبادي جي انگ اکر جو پتو نه آهي ته پوءِ سنڌ، وفاقي وسيلن مان پنهنجي حصي جو تعين ڪيئن ڪندي؟

ڏٺو وڃي ته سنڌ کي انٽرنيشنل يتيم خانو سمجھي پنجابي، پشتو، برمي، بنگالي ۽ افغاني جيڪي سنڌ ۾ وڻ وڻ جي ڪاٺي ٿي گڏ ٿيا آهن اهي يقيناً سنڌ جي وسيلن تي ڌاڙو آهن. تقريباً ڏيڍ ڪروڙ ڌاريان سنڌ جي وسيلن تي قابض آهن انهي ڪري ئي ته بيروز گاري، مهانگائي کان ويندي سموريون ڏکايون سنڌ جي نصيب ۾آيون آهن. انهن ڌارين پنهنجا شناختي ڪارڊ به ٺهرائي سنڌ جي شهريت حاصل ڪري ورتي آهي هاڻي جيستائين انهن کي سنڌ بدر نٿو ڪيو وڃي تيستائين آدمشماري جي شفافيت تي ڪيئي شڪ اڀرندا. ڏٺو وڃي ته هر ڏهين سال آدمشماري نه ٿيڻ ڪري سنڌ سان خاص ڪري وڏي زيادتي ٿي آهي. مرڪزي حڪومت پاران آدمشماري ملتوي ڪرڻ وارو فيصلو صوبن سان ٻه اکيائي وارن روين جو تسلسل آهي ۽ بد نيتي تي پڻ ٻڌل آهي. انهي ڪري سنڌ جي سمورين پارٽين کي سنڌ کي پنهنجي ماءٌ سمجھي آدمشماري واري حوالي سان هڪ پليٽ فارم تي گڏ ٿي تحريڪ هلائڻ کپي ته جيئن وفاق آدمشماري ڪرائڻ تي مجبور ٿئي.

 

تعليمي ادارن جي سيڪيورٽي جا اڻپورا انتظام: امتياز عباسي

ڄ سڄي دنيا ۾ دهشتگردي جي فضا ڇانيل آهي هر ٻيو ملڪ دهشتگردي کي مُنهن ڏئي رهي آهي اُها دهشتگردي جيڪا پهريان صرف سياسي جلسن جلوسن تائين محدود هئُي اها اڄ اچي اسان جي تعليمي ادارن تي پهتي آهي جتي اسان جا معصوم ٻار اسڪولن ۾ پڙهن ٿا ۽ جيڪي ڪاليجن ۽ يونيورسٽين ۾ تعليم حاصل ڪن ٿا نام نهاد دهشتگرد انهن تي پنهنجي بهادري آزمائين ٿا.جڏهن ته هڪ سلگون تي سڄي دنيا عمل ڪندي آهي جتي به جنگ هجي اتي اتان جي تعليمي ادارن اسپتالن عبادتگاهن معصوم ٻارن عورتن ۽ پيرسن ماڻهن کي نشانو ناهي بڻائڻو پر اڄ جا دهشتگرد جيڪي اسلام جا سچا پوئلگ ۽ رسول ڪريم صلي الله عليه وآله وسلم جا امتي  سمجهن ٿا جڏهن ت اسلام ۾ هڪ انسان کي قتل ڪرڻ پوري انسانيت جو قتل آهي پر هي وهشي دريندا غافلن جي راه تي هلي ڪري اسلام کي نقصان پهچائي رهيا آهن توهان کي ياد هوندو ته نائجيريا جيڪو مسلمان ملڪ آهي اتي جي نام نهاد بڪوحرام نالي  اسلامي ٺيڪيدار نائجيريا جي هڪ يونيوسٽي مان ٻه سو کان وڌيڪ شاگردياڻين کي اغوا ڪري ڪجھ مهينن کان پوء انهن کي جڏهن ظاهر ڪيو تـ خبر پئي تـ انهن اسلام جي ٺيڪيدار پنهنجي وهشين سان انهن جا نڪاح پڙهائي ڇڏيا ڇا اسلام اسان کي اهو سيکاريو آهي ۽ هي ٻيو واقعو جيڪو اسان ملڪ ۾ ٿيو جنهن اسان جون نينڊرون حرام ڪري ڇڏيون انهن اسلام جي ٺيڪيدارن جڏهن آرمي پبلڪ اسڪول تي حملو ڪيو ۽ اتي معصوم ٻارن جي مٿان  بندقون جا منهن ڪنهن ساوڻي جي برساتن جيان کولي ويا ۽ چند گهڙين ۾ ٻـ سو کان وڌيڪ گلن کي موت جي نيند سمهاريو ويو  اهي اسان زخم اڄان تازا ئي هئا تـهنن وحشين باچا خان يونيورسٽي ۾ اندر داخل ٿي ويا ۽ اتي هنن استاد ۽ شاگردن تي گولين جو مينهن وسايو ۽ وري مائرن جون جهوليون خالي ڪرڻ ۾ ڪامياب ٿي ويا اهي جيڪي واقعا پيش آيا انهن ادارن ۾ حفاظتي انتظام سخت هجڻ باوجود اهڙا ڪيئس ڪيا ويا ان سڄي صورتحال کي نظر ۾ رکي سنڌ جي تعليمي ادارن جي سيڪيورٽي جي حالت ڏسون تـ  اسان جي ڄامشوري ۾ ٽـ يونيورسٽيون آهن انهن جا حفاظتي انتظام بـ اهڙا ڪارائتا نه آهن جو ڪنهن اڻوڻندڙ واقعي مُنهن ڏئي سگهن ڇو ته جيڪي اسلام جا ٺيڪيدار جنت حاصل ڪرڻ لاء مائرن جون جهوليون خالي ڪرڻ ۾ دير نٿا ڪن انهن جي آڏو اهڙا انتظام ڪجهه به نه آهن ٻئي طرف وڏن شهرن ڪراچي حيدرآباد سکر نواب شاه ۽ خيرپور ميرس جي تعليمي ادارن جي سيڪيورٽي اٽي ۾ لوڻ برابر آهي اندروني سنڌ جي تعليمي ادارن ۾ ڪاري وارا ڪک آهن خدا نه ڪري جو  وري اڻ وڻندڙ واقعو پيش اچي ۽ اسان جي مائرن جون جهوليون وري اجڙي وڃن انهن جي جگر جي ٽڪرن مٿان وري بندوقون ڀونڪي پون اهڙن واقعن کان بچڻ لاء اسين پاڪستان جي وس وارن سيڪيورٽي ادارن ڱي پر زور اپين ٿا ڪيون ته مستقبل جي معمارن کي جون زندگيون بچايون وڃن تعليمي ادارن جي سيڪيورٽي جا انتظام سخت ڪيا وڃن اسان جي خوابن جي تڪميل لاء اسان سيڪيورٽي خدشا ختم ڪيا وڃن ته جيئن انهن معصوم ٻارن کي ۽ انهن مائرن کي جيڪي پنهنجي جگر جي ٽڪرن کي قوم جي سرمائيو بڻائڻ لاء انهن جي تعليم ۽ تربيت ۾ ڀرپور ڪردار ادا ڪري رهيون آهن تن مائرن جي جي خوابن کي چڪنا چور ڪرڻ کان بچايو وڃي.

 

 

 

ڊاڪٽر غاصم خلاف نيب جو گهيرو ڏينهون ڏينهن تنگ

نيب پيٽروليم واري اڳوڻي وفاقي وزير ۽ پ پ اڳواڻ ڊاڪٽر عاصم خلاف ايل اين جي ڪيس ۾ هڪ ٻيو ريفرنس داخل ڪرڻ جي منظوري ڏئي ڇڏي آهي. اسلام آباد ۾ نيب جي ايگزيڪيوٽو بورڊ جو اجلاس چيئرمين قمرالزمان چوڌري جي صدارت هيٺ ٿيو. ان موقعي تي سنڌ جي اڳوڻي نگران وڏي وزير زاهد قربان علوي، اڳوڻي صوبائي صلاحڪار ضياءُ الحسن لنجار ۽ بلوچستان اسيمبلي جي اڳوڻي ايم پي اي فتح علي عمراڻي خلاف جاچ جو حڪم پڻ ڏنو ويو. نيب ترجمان موجب ڊاڪٽر عاصم تي قومي خزاني کي 17 ارب 33 ڪروڙ، ضياءُ الحسن لنجار تي غير قانوني اثاثا ٺاهڻ ۽ قومي ناڻي کي 4 ڪروڙ 40 لک رپين جو نقصان پهچائڻ جو الزام آهي. نيب جي اجلاس ۾ ايف بي آر ڪيس ۾ اڳوڻي چيئرمين عبدالله يوسف خلاف جاچ جي منظوري ڏني وئي، جڏهن ته ريلوي جي اڳوڻي آءِ جي ابن حسن خلاف شڪايتن جي جاچ جي تصديق ڪرڻ جي هدايت ڪئي وئي. نيب ترجمان موجب ڪي ڊي اي جي چئن آفيسرن خلاف به جاچ جي منظوري ڏني وئي. ان موقعي تي اڳوڻي سينيٽر مرحوم اعظم هوتي ۽ سندس بيواهه حميرا خلاف شڪايتن کي رد ڪيو ويو. ڊاڪٽر عاصم تي سوئي گيس، او جي ڊي سي ايل ۾ ٺيڪن، ايل پي جي، ڪوئلي ۽ ٻين معاملن ۾ بيقائدگين جي به جاچ ٿيندي.

 

شهيد بينظير ڀٽو يونيورسٽي پشاور جي وائيس چانسلر جي مقرري ڪيس….

چيف جسٽس آف پاڪستان جسٽس انور ظهير جمالي چيو آهي ته جنهن اداري ۾ هٿ وجھون ٿا اتان هڪ نئون داستان نڪري ٿو اچي. جسٽس انور ظهير جمالي جي سربراهي ۾ ٽي رڪني بينچ شهيد بينظير ڀٽو يونيورسٽي پشاور جي وائيس چانسلر جي مقرري بابت ڪيس جي ٻڌڻي ڪئي. چيف جسٽس آف پاڪستان وائيس چانسلر جي مقرري جي معاملي تي هائير ايجوڪيشن ڪميشن ڪي پي ڪي تي سخت تنقيد ڪئي ۽ چيو ته اختيار ملڻ کانپوءِ جيڪڏهن ڪو ماڻهو بي ايمان ٿي وڃي ته اها سسٽم جي خرابي ناهي،جنهن اداري ۾ هٿ وجهون ٿا انهيءَ جي هڪ نئين ڪهاڻي سامهون اچي ٿي وڃي.ان موقعي تي جسٽس انور ظهير جمالي ريمارڪس ڏيندي چيو ته سپريم ڪورٽ جي بادشاهت ناهي جو جنهن کي چاهي ڦاهي ڏئي،جنهن کي هار پارائي،عدالتون سسٽم ناهن ٺاهينديون،پر قانون مطابق ڪم ڪنديون آهن.وڏي وزير بابت فيصلو ڏنو ته سڀاڻي ٻيو ڪو آفيسر ساڳيو معاملو کڻي ايندو،سندس چوڻ هو ته الله ڪري هي قوم سڌري وڃي.

 

وزيراعظم عورتن جي خودمختياري بابت پاليسي جوڙڻ لاءِ ڪميٽي ٺاهي ڇڏي

اسلام آباد (بيورو) وزيراعظم نواز شريف عورتن جي خودمختياري بابت پاليسي جوڙڻ لاءِ ڪميٽي ٺاهي آهي، جيڪا 5 مارچ تي پنهنجون سفارشون کيس پيش ڪندي، ميڊيا رپورٽن مطابق عورتن جي خودمختياري بابت پاليسي جوڙڻ لاءِ ٺاهيل ڪميٽي ۾ وزيراعظم جو خاص مددگار خواجا ظهير احمد، اشتر اوصاف، مملڪتي وزير سائره افضل تارڙ، انوشا رحمان، اڪرام بخاري، ارم بخاري، ڊاڪٽر شزرا منصب علي خان، شائستا پرويز ملڪ، سينيٽر عائشا رضا فاروق ۽ ڊاڪٽر اعجاز منير شامل آهن، جڏهن ته وفاقي وزير زاهد حامد ڪميٽي جو ڪنوينر هوندو، ڪميٽي سڀني اسٽيڪ هولڊرن سان صلاح مشوري ذريعي ملڪي ۽ پرڏيهي قانونن هيٺ حڪمت عملي جوڙيندي، وزيراعظم هائوس طرفان پاليسي بابت ورڪنگ پيپر به تيار ڪيو ويو آهي، جيڪو ڪميٽي ريفرنس پيپر طور استعمال ڪندي، وزيراعظم نواز شريف ڪميٽِي کي هدايت ڪئي آهي ته اها 5 مارچ تائين پنهنجون سفارشون پيش ڪري، جن جي روشني ۾ 8 مارچ تي عورتن جي عالمي ڏهاڙي جي موقعي تي حڪومت پنهنجي پاليسي جو اعلان ڪندي.