تازيون خبرون

Daily Archives: March 2, 2016

سنڌ جي وڏي وزير سنڌ ۾ ايف آءِ اي جي ڪارروائين تي نظر رکڻ لاءِ ڪاميٽي جوڙي ڇڏي

ڪراچي (اي پي پي)سنڌ جي وڏي وزير سيد قائم علي شاهه سنڌ ۾ ايف آءِ اي جي ڪارروائين تي هڪ ڪاميٽي جوڙي آهي. چيف منسٽر هائوس مان جاري هينڊ آئوٽ ۾ چيو ويو آهي ته وڏي وزير پاران جوڙيل ڪاميٽي لاءِ چيف سيڪريٽري سنڌ نوٽيفڪيشن جاري ڪندو. اها ڪاميٽي ايف آءِ اي جي ڪارروائين جي انڪوائري ڪري 3 مهينن ۾ سنڌ جي وڏي وزير کي پنهنجي رپورٽ پيش ڪندي.

 

پنجاب ۾ شديد ڪوهيڙي سبب عام زندگي سخت متاثر، شيخوپوره ۽ وهاڙي ۾ ڌار ڌار حادثن ۾ 9 ڄڻا فوت

لاهور (مانيٽرنگ ڊيسڪ) پنجاب ۾ شديد ڪوهيڙي سبب عام زندگي سخت متاثر ٿي آهي، شيخوپوره ۽ وهاڙي ۾ ڌار ڌار حادثن جي نتيجي ۾ 9 ڄڻا فوت ۽ 30 کان وڌيڪ زخمي ٿي پيا آهن. شديد ڪوهيڙي سبب وهاڙي جي باءِ پاس تي تيز رفتار ٽرالر ۽ مسافر بس وچ ۾ ٽڪر ٿي پيو. حادثي جي نتيجي ۾ عورتن ۽ ٻارڙن سميت 7 ڄڻا فوت ٿي ويا، جڏهن ته  کان وڌيڪ زخمي ٿيا، جن کي اسپتال منتقل ڪيو ويو. ٻئي پاسي شخپوره ۾ شديد ڪوهيڙي سبب ڏهه گاڏيون ٽڪرائجي ويون، جنهن جي نتيجي ۾ 2 ڄڻا فوت ۽  10 زخمي ٿي پيا آهن. پوليس جو چوڻ آهي ته حادثا شديد ڪوهيڙي سبب پيش آيا آهن، وڌيڪ جاچ ڪئي پئي وڃي.

 

نواز حڪومت منافقت ختم ڪري غيرت جي نالي تي ٿيندڙ قتل خلاف قانونسازي وارو بل جلد منظور ڪري: بلاول ڀٽو

ڪراچي (اسٽاف رپورٽر) پاڪستان پيپلزپارٽي جي چيئرمين بلاول ڀٽو زرداري نواز حڪومت کي چيو آهي ته هومنافقت ختم ڪري غيرت جي نالي تي ٿيندڙ قتل خلاف قانونسازي واري بل ” اينٽي آنر ڪلنگس لاز(ڪرمنل لاز امينڊمينٽ) بل 2014ع کي فوري طورمنظور ڪرائي، اهو بل پاڪستان پيپلزپارٽي طرفان گذريل سال مارچ ۾ سينيٽ ۾ پيش ڪيو ويو هو ته جيئن غيرت جي نالي تي ٿيندڙ قتل جهڙي غير انساني عمل کي ختم ڪري سگهجي، بلاول ڀٽو زرداري چيو ته هڪ انسان کي قتل ڪرڻ غيرت ناهي ۽ غيرت جي نالي تي ٿيندڙ قتل خاص طور تي عورتن جي قتل کي ناقابل معافي ۽ خطرناڪ ڏوه قرار ڏيڻ گهرجي ته جيئن انهيءَ خطرناڪ روايت کي ٻنجو اچي سگهي جنهن جو اسان جي تاريخ توڙي تهذيب سان ڪو به واسطو ناهي، هن چيو ته پوري ملڪ ۾ غيرت جي نالي تي سوين عورتن کي قتل ڪيو وڃي ٿو پرسخت قانون نه هجڻ جي ڪري قاتل سرعام آزاد گهمندا رهن ٿا جن کي مثالي سزا ڏيڻ گهرجي، هن چيو ته غيرت جي نالي تي قتل هڪ اهڙي خطري واري تلوار آهي جيڪا اسان جي سماج جي ڪجه حصي ۾ عورتن جي مٿان هر وقت لٽڪيل رهي ٿي ۽ اتي عورتون مستقل خوف جي پاڇي ۾ زندگي گذارين ٿيون، پيپلزپارٽي جي چيئرمين وڌيڪ چيو ته پارٽي جي پارليامينٽ ميمبرن انهيءَ بل جومتن ٺاهڻ ۾ وڏي محنت ڪئي ۽ ان کانپوءِ اهو بل سينيٽ مان منظور ڪرايو ويو پرنواز حڪومت انهيءَ بل کي قومي اسيمبليءَ جي ڪٻٽن ۾ بند ڪري رکي ڇڏيو آهي، هن چيو ته انهيءَ بل کي هڪ سال تائين بنا جواز رکي ڇڏڻ جو مطلب آهي ته نواز حڪومت غيرت جي نالي تي ٿيندڙ قتلن کي هٿي ڏيڻ ۾ برابر شامل آهي، بلاول ڀٽو زرداري سياسي پارٽين ۽ سول سوسائٽي تي زور ڀريو آهي ته اهي نواز حڪومت جي منافقت جي خاتمي ۽ پاڪستان پيپلزپارٽي جي طرفان تيار ڪيل قانونسازي جي تڪميل جي لاءِ وفاقي حڪومت تي دٻاءَ وجهن، بلاول ڀٽو زرداري وڌيڪ چيو ته شهيد محترمه بينظير ڀٽو جو اهو خواب هو ته عورتن کي برابر موقعا ملڻ سان گڏ کين تحفظ به ملڻ گهرجي ۽ غيرت جي نالي تي ٿيندڙ قتل خلاف قانونسازي وارو بل ” اينٽي آنر ڪلنگس لاز(ڪرمنل لاز امينڊمينٽ) بل 2014ع ان حوالي سان تاريخي ثابت ٿي سگهي ٿو، بلاول ڀٽو زرداري قومي اسيمبلي ۾  پاڪستان پيپلزپارٽي جي پارلياماني پارٽي کي هدايت ڪئي آهي ته انهيءِ بل جي حوالي سان راه هموار ڪرڻ لاءِ ايوان ۾ لابنگ شروع ڪئي وڃي ۽ قومي اسيمبلي ۾ ٻين پارٽين سان به ڳالهايو وڃي.

 

سنڌ اسيمبلي ۾ ڪراچي بلڊنگ ڪنٽرول اٿارٽي کي سنڌ بلڊنگ ڪنٽرول اٿارٽي کان الڳ ڪرڻ جو بل رد

ڪراچي (اين اين آءِ) ڪراچي بلڊنگ ڪنٽرول اٿارٽي کي سنڌ بلڊنگ ڪنٽرول اٿارٽي کان الڳ ڪرڻ ۽ ڪراچي جي ميئر کي ان جو چيئرمين مقرر ڪرڻ لاءِ ايم ڪيو ايم جي ميمبرن اڱاري تي سنڌ اسيمبلي ۾ متعارف ڪرائڻ لاءِ تحريڪ پيش ڪئي جنهن کي ايوان اڪثريت سان رد ڪري ڇڏيو، سنڌ بلڊنگ ڪنٽرول ترميمي بل 2016 ايم ڪيو ايم جي ميمبرن سيد خالد احمد، محمد معين، عامر پيرزادو ۽ افتخار عالم متعارف ڪرائڻ لاءِ تحريڪ پيش ڪئي، نثار احمد کهڙو ان بل جي مخالفت ڪئي، اسپيڪر ان تحريڪ تي راءِ شماري ڪرائي، ايوان اڪثريت سان ان تحريڪ کي رد ڪري ڇڏيو، ان کان اڳ ايم ڪيو ايم جي محمد دلاور قريشي جي به تحريڪ ملتوي ڪئي وئي، تحريڪ ۾ چيو ويو ته اسپتالن خاص ڪري حيدرآباد جي اسپتالن ۾ مريضن کي دوائون نه پيون ڏنيون وڃن، نثار کهڙو چيو ته حڪومت ڪوشش ڪري ٿي ته اسپتالن ۾ مريضن کي دوائون فراهم ڪيون وڃن، ان جو ڪو ثبوت فراهم ناهي ڪيو ويو ته ڪهڙي اسپتال ۾ ڪهڙي مريض کي دوائون فراهم ناهن ڪيون ويون، اسپيڪر تحريڪ کي ضابطي خلاف قرار ڏئي ڇڏيو.

 

ڪراچي ۾ امن جي بحالي جو ڪريڊٽ آرمي چيف ڏانهن وڃي ٿو، اين او سي بنا ڪو به مدرسو کولڻ نه ڏنو ويندو:سهيل سيال

لاڙڪاڻو(اي پي پي) گهرو وزير سهيل انور سيال چيو آهي ته ڪراچي ۾ امن امان قائم ڪرائڻ جو ڪريڊٽ آرمي چيف ڏانهن وڃي ٿو، آپريشن ضرب عضب ۾ پاڪ فوج، رينجرس ۽ قانون لاڳو ڪندڙ ادارن، سنڌ پوليس سميت آرمي چيف جنرل راحيل شريف جو وڏو ڪردار آهي. سنڌ اندر جيڪب آباد ۾ پيش آيل دهشتگردي واري واقعي ۾ ملوث دهشتگرد بلوچستان جي مستونگ شهر مان آيا هئا ان جي روڪٿام لاءِ بارڊر فورس کي بحال ڪيو ويو آهي ته جيئن دهشتگرد ٻين صوبن مان سنڌ اندر داخل نه ٿي سگهن. اهڙو اظهار ڪالهه ڊي آءِ جي آفيس ۾ نيشنل ايڪشن پلان تي عمل درآمد ڪرائڻ ۽ شڪارپور آپريشن جي حوالي سان ڪوٺايل اعليٰ سطحي اجلاس کان بعد ميڊيا کي بريفنگ ڏيندي ڪيو. هن وڌيڪ چيو ته ڪراچي آپريشن سڀني اسٽيڪ هولڊرس جي رضامندي سان شروع ڪيو ويو جنهن ۾ پاڪ فوج، رينجرس ۽ پوليس ڪم ڪري رهي آهي. هن چيو ته اِهو تاثر غلط آهي ته سنڌ حڪومت ڪراچي آپريشن جي خلاف آهي ۽ آپريشن بند ڪيو وڃي، اسان جي پارٽي سڀ کان وڌيڪ دهشتگردن جي خلاف آهي جنهن لاءِ اسان جي پارٽي قائد شهيد محترمه بينظير ڀٽو کي دهشتگردن شهيد ڪيو آهي دهشتگردن خلاف پارٽي چيئرمين بلاول ڀٽو زرداري، شريڪ چيئرمين آصف علي زرداري ۽ اسان جو موقف ساڳيو ئي آهي ۽ آخري دهشتگرد جي خاتمي تائين ڪراچي آپريشن جاري رهندو. هن چيو ته ڪجهه ضلعن سان ٻين صوبن جا بارڊر وڏي ايراضي تي مشتمل آهن جنهن لاءِ اسين ڪمشور ڪنڌڪوٽ ۽ قمبر شهدادڪوٽ ضلعن جي حد ۾ بارڊر فورس مقرر ڪري رهيا آهيون ته جيئن ٻين صوبن مان دهشتگرد سنڌ ۾ داخل ٿي نه سگهن. هن چيو ته جن پوليس اهلڪارن جون پگهارون رهيل آهن انهن کي هن ئي مهيني ادا ڪيون وينديون. فضيلا سرڪي بابت پڇيل هڪ سوال جي جواب ۾ گهرو وزير چيو ته فضيلا سرڪي جي بازيابيءَ لاءِ آپريشن جاري آهي جنهن ڪيس ۾ 7 جوابدار نامزد هئا ان ۾ هڪ ٻڍو سرڪي 2004 ۾ فوت ٿي چڪو آهي ۽ ٻيا جوابدار گرفتار ٿيا آهن جڏهن ته پوليس ان معاملي کي حل ڪرڻ جي ڪوشش ۾ آهي ۽ تمام جلد فضيلا سرڪي کي بازياب ڪرايو ويندو. هن چيو ته ڪراچي جي لياري ۾ اسان جو وڏو ووٽ بئنڪ آهي پر هن وقت لياري ۾ سڀ کان وڌيڪ آپريشن لياري ۾ ٿيا پر سنڌ حڪومت يا پ پ پ ڪنهن به ڏوهاري کي ڇڏائڻ لاءِ رينجرس توڙي پوليس وٽ نه وئي آهي ۽ ڪراچي آپريشن پنهنجي منتقي انجام تائين پهچندو. هن چيو ته سنڌ اندر جن ٿاڻن جي حالت زبون آهي ان لاءِ سنڌ حڪومت کي لکنداسين ته جيئن انهن ٿاڻن جي مرمت سميت نئين سر تعمير ٿي سگهي ۽ اُهي ٿاڻا بهتر انداز ۾ ڪم ڪري سگهن. هن چيو ته هن وقت سنڌ جي ڪيترن ئي ضلعن قمبر شهدادڪوٽ، ڪشمور ڪنڌڪوٽ، مٽياري، ٽنڊوالهيار، ٽنڊو محمد خان ۽ ٻين ضلعن ۾ پوليس هيڊڪوارٽر نه آهن اتي پوليس هيڊڪواٽر قائم ڪيا ويندا. هن چيو ته سنڌ اندر 7 هزار کان وڌيڪ مدرسا رجسٽرڊ ٿيل آهن ان حوالي سان صوبي جي مڙني ضلعن جي ڊپٽي ڪمشنرن ۽ ايس ايس پيز کي سخت هدايتون ڏنيون ويون آهن ته جيڪڏهن ڪٿي مدرسو ٺهي ٿو ته ان جي مڪمل طور تي جاچ ڪئي وڃي ۽ گهرو کاتي جي اين او سي کانسواءِ ڪو به مدرسو کولڻ نه ڏنو ويندو. هن چيو ته امن امان جي صورتحال خراب ٿيڻ جي خدشي سبب ڪٿي شڪ پيو ته ان مدرسي کي سيل ڪيو ويندو. هن چيو ته نيشنل ايڪشن پلان تي  سڀ کان وڌيڪ ڪم سنڌ ۾ ٿيو آهي. هن چيو ته شڪارپور جي ڪچي وارن علائقن ۾ پوليس ٿاڻا ۽ پڪٽون قائم ڪيون ويون آهن ۽ ماضي ۾ اتي اهي ٿاڻا ۽ پوليس پڪٽون نه هيون جتي هينئر ڌاڙيلن ۽ ڏوهارين خلاف ڪاروايون جاري آهن. ان موقعي تي آءِ جي سنڌ غلام حيدر جمالي بريفنگ ڏيندي چيو ته اسان جي ڪوشش آهي ته سنڌ ۾ مثالي امن قائم ڪرايون ڪراچي، حيدرآباد، سکر لاڙڪاڻو، سميت سموري سنڌ اندر دهشتگرد توڙي ڏوهارين خلاف پوليس ۽ رينجرس جو آپريشن جاري آهي جنهن ۾ ڪافي حد تائين ڪاميابي ملي آهي جڏهن ته ڪراچي ۾ هزارين ٽارگيٽ ڪلرن سميت مختلف ڏوهن ۾ ملوث ڏوهارين کي گرفتار ڪيو ويو آهي. ان کان اڳ ڊي آءِ جي آفيس ۾ صوبائي گهرو وزير سهيل انور سيال جي صدارت هيٺ نيشنل ايڪشن پلان تي ڀرپور نموني سان عمل درآمد ۽ شڪارپور آپريشن بابت اعليٰ سطحي اجلاس ٿيو. جنهن ۾ آءِ جي سنڌ غلام حيدر جمالي، اي آءِ جي فنانس سلطان خواجا، ڊي آءِ جي لاڙڪاڻو عبدالله شيخ، ڊي آءِ جي سکر اظهر رشيد، ايس ايس پي لاڙڪاڻو ڪامران نواز، ايس ايس پي خيرپور پيرمحمد شاهه، ايس ايس پي شڪارپور ناصر آفتاب پٺاڻ، ايس ايس پي جيڪب آباد ساجد کوکر، ايس ايس پي سکر تنوير تنيو، ايس ايس پي ڪشمور ڪنڌڪوٽ عمر طفيل، ايس ايس پي گهوٽڪي ثاقب سلطان، ايس پي مسعود احمد بنگش سميت سکر ۽ لاڙڪاڻي ڊويزن جي پوليس عملدارن وڏي انگ ۾ شرڪت ڪئي.

 

 اسان قانون جا نوڪر آهيون،ڪنهن جا ذاتي ملازم نه،ڪير ناراض ٿئي ٿو ته ڀلي ٿئي: ايف آئي اي ڊائيريڪٽر

ڪراچي (اسٽاف رپورٽر) ايف آئي جي ڊائريڪٽر شاهد حيات جو چوڻ آهي ته اسان قانون جا نوڪر آهيون،ڪنهن جا ذاتي ملازم ناهيون اسانجي جاچ مان ڪير به ناراض ٿئي ٿو ته ڀلي ٿئي،پرقانون کان هٽي ڪري ڪجهه نه ٿيندو.ڪراچي ۾ ميڊيا سان ڳالهائيندي ايف آئي سنڌ جي ڊئيريڪٽر شاهد حيات جو چوڻ آهي ته ايف آئي جو ميڊيا ٽرائل ٿي رهيوآهي،گذريل ڪيترن ئي ڏينهن کان مون تي ۽ ايف آئي تي گند اڇلايو پيو وڃي.منهنجي خلاف نيب،ايف آئي اي يا گهرو وزارت جي ڪا به ڪارروائي نه پئي ٿئي ۽ نه ئي ڪو منهنجي خلاف ڪيس داخل ڪيو ويو آهي.سندس چوڻ هو ته ڊاڪٽر عاصم سان ڪو به تعلق ناهي،منهنجو نه ته ڪو ڪاروبار آهي ۽ نه ئي ڪي شگر ملون آهن،گذريل ٽن سالن کان مان ڪو به پرڏيهي دورو ناهي ڪيو.شاهد حيات جو چوڻ هو ته ڪنهن جي دماغ ۾ ڪا ڳالهه آهي ته ڪڍي ڇڏي،اسان قانون جا نوڪر آهيون ڪنهن جا ذاتي ملازم ناهيون،منهنجو ادارو جن ڪيسن جي جاچ ڪري رهيو آهي انهن کي آخري حد تائين کڻي وينداسين ۽ انهن ڪيسن ۾ وڌيڪ گرفتاريون به ڪري سگهون ٿا.اسانجي جاچ سان ڪير ناراض ٿئي ٿو تٿه ڀلي ٿئي،اسانکي ڪنهن جي به پرواهه ناهي.سندس چوڻ هو ته ڪو به وڏو واپاري غلط ڪم ڪندو ان خلاف به قانونج مطابق ڪارروائي ڪنداسين.

 

 نيپرا جنوري لاءِ بجلي 4 رپيا 11 پئسا في يونٽ سستي ڪري ڇڏي

اسلام آباد (بيورو) نيشنل پاور ريگيوليٽري اٿارٽي(نيپرا) جنوري لاءِ بجلي جي اگهه ۾ 4 رپيا 11 پئسا في يونٽ گهٽٽائي جي منظوري ڏئي ڇڏي، نيپرا چيئرمين طارق سدوزئي سرنٽرل پاور پرچيزنگ ايجنسي پاران بجلي جي اگهه ۾ 3 رپيا 38 پئسا في يونٽ گهٽٽائي واري ڏنل درخواست جي ٻڌڻي ڪئي، درخواست ۾ چيو ويو هو ته جنوري دوران ڊيزل مان بجلي ٺاهڻ تي 12 رپيا 42 پئسا، ايران مان بجلي گهرائڻ تي 10 رپيا 60 پئسا، فرنس آئل مان 6 رپيا 26 پئسا، گئس مان 6 رپيا هڪ پئسا ۽ ايٽمي بجلي گهرن مان في يونٽ بجلي پيدا ڪرڻ تي هڪ رپيو 12 پئسا خرچ آيو، درخواست ۾ ڄاڻايو ويو ته جنوري دوران بجلي جي في يونٽ پيداواري ريفرنس پرائس 9 رپيا 86 پئسا في يونٽ مقرر ڪئي وئي هئي پر سراسري طور پيداواري خرچ 6 رپيا 48 پئسا في يونٽ آيو، تنهن ڪري پيداواري لاڳت ۾ گهٽتائي جو فائدو عوام کي ڏيڻ لاءِ فيول ايڊجسٽمينٽ سرچارج جي مد ۾ بجلي 3 رپيا 38 پئسا في يونٽ سستي ڪئي وڃي، بڌڻي دوران نيپرا چيئرمين جي هدايت کانپوءِ به ميرٽ آرڊر جا تفصيل نه ڏنا ويا، جنهن تي هن سخت ڪاوڙ ڏيکاري، هن پڇايو ڪيو ته پاور پلانٽ فرنيس آئل بدران ڊيزل تي ڇو پيا هلايا وڃن؟ ان موقعي تي نيپرا سي سي پي اي جي درخواست رد ڪندي جنوري لاءِ بجلي جي اگهه ۾ 4 رپيا 11 پئسا في يونٽ گهٽٽائي جي منظوري ڏني، نيپرا مطابق بجلي جي اگهه ۾ گهٽٽائي جنوري لاءِ فيول ايڊجسٽمينٽ سرچارج جي مد ۾ ڪئي ويئ آهي، جنهن سان بجلي جي واهپيدارن کي 32 ارب رپيا واپس ڪيا ويندا، جڏهن اهو فيصلو ڪي اليڪٽرڪ ۽ لائف لائن واهپيدارن تي لاڳو نه ٿيندو.