تازيون خبرون

Daily Archives: March 1, 2016

مينڌرسنگهه ڌوني ۽ ويرات ڪوهلي جهڙن ليجنڊ رانديگرن جو منهنجي تعريف ڪرڻ حوصله افزا آهي: محمد عامر

ڍاڪا (اين اين آءِ) قومي ٽيم جي فاسٽ بالر محمد عامر چيو اهي ته مينڌر سنگهه ڌني ۽ ويرات ڪوهلي جهڙن ليچنڊ رانديگرن جو منهنجي تعريف ڪرڻ حوصله افزا آهي جنهن تي انهن جو ٿورائتو آهيان ڀارت جي خلاف خاص رٿابندي نه هئي صرف جارحاڻي بالنگ ڪرڻ چاهيان پيا ميڊيا سان ڳالهائيندي محمد عامر چيو ته ٽيم ۽ ڪپتان ڀرپور سپورٽ ڪيو جنهن تي ان جو ٿورائتو آهيان قوم کي درخواست آهي ته منهنجا حوصلا وڌائي ته جيئن وڌيڪ پرفارم ڪري سگهان هن چيو ته ڀارتي رانديگرن پاران واکاڻ حوصلو وڌائڻ جو سبب آهي محمد عامر وڌيڪ چيو ته ڀارت جي خلاف مئچ ۾ ٽارگيٽ گهٽ هو تنهنڪري پلان صرف اٽيڪ ڪرڻ جو هو.

 

عورت عظمت جي نشاني آهي: اصغر ملاح

آخري خطبي ۾ حضرت محمد مصطفي ﷺ هدايت ڪئي ته عورتن سان بهتر سلوڪ ڪيو وڃي الله پاڪ سمورا حق توهان مردن جي ذمي ڪيا آهن جنهن کي پورو ڪرڻ مردن جي ذميواري آهي ڌرتي جي گولي تي انساني وجود کان وٺي عورت جي شان، عظمت ۽ مرتبو قائم دائم آهي. عورت عظمت جي نشاني آهي اسلام ۾ عورتن کي مردن جي برابر حق مليل آهن ماءُ ڀئڻ ۽ ڌيءُ زال کي وڏي عزت ۽ احترام ڏنو ويندو آهي ڇو ته مقدس ۽ پيارا رشتا آهن ايڏن مقدس پيارن رشتن باوجود به اسان جي معاشري ۾ عورتن تي ظلم ٿين ٿا جانور به پنهنجي ماءَ جو خيال رکندا آهن اسان جي سماج ۾ رهندڙ انسان ته جانورن کان به گوءٌ کڻي ويا آهن اسان جي سنڌ ۾ عام طور تي عورت کي وڏا رتبا ۽ اعزاز ڏنا ويندا آهن نياڻين کي ستن قرآنن جي برابر سمجهو ويندو آهي سجاڳ ڌرين کي چوندي ڏٺو ويو آهي ته تيز ترقي واري سائنسي دور ۾ اسان جي سماج ۾ عورتن کي برابري جا حق نه مليا آهن ڪيترين ئي صدين کان عورتن کي پنهنجي جائز حقن کان محروم رکيو ويو آهي سنڌ ۾ عورتن تي ڪيترائي ظلم ٿيڻ ٿا تعليم پرائڻ نوڪري ڪرڻ کان روڪڻ پسند جو پرڻو ڪرڻ تي پابندي هئڻ عورت جيڪا جيئڻ جو حق گهري ٿي انهن عورتن کي ڪاروڪاري الزامن تحت قتل ڪرڻ عام آهي.

عورت هڪ ماءُ جي حيثيت ۾ شفيق رشتو آهي، جنهن جي پيرن هيٺان جنت جو ڏس ڏنو ويو آهي. عورت ڀيڻن جي حيثيت ۾ آهي، ڌي جي حيثيت ۾ آهي ۽ هم سفر زال جي حيثيت ۾ آهي انساني تهذيت ۽ ثقافت جا جيڪي به رنگ آهن، انهن جي ترقي ۾ عورت جي محنت ۽ ڪردار به ايترو ئي شامل آهي، جيترو مردن جي حصي ۾ اچي ٿو. اڄ به سڄي دنيا ۾ عورتون نه صرف گهر اندر پر گهر کان ٻاهر به پنهنجي توڙي پنهنجي ڪٽنب جي پيٽ پالڻ لاءِ محنت ڪري پاڻ مڃائي رهيون آهن. دنيا جو اهو ڪهڙو ڪم آهي، جيڪو عورتن نه ڪيو آهي، جهاز هلائڻ کان وٺي اسپتالن، اسڪولن، آفيسن سميت ملڪ جي حفاظت ڪندڙ آرمي ۽ پوليس سميت ملڪن جون حڪمران به عورتون آهن اڄ عورتن جو تعداد بزنيس ۾، سياست ۾، تعليم ۾، صحت ۾ ۽ ملڪي ۽ بين الاقوامي فورمز تي مرد جي برابر نه آهي اسان جي ملڪ جي آبادي جو 52 فيسد عورتن تي مشتمل آهي جن مان 50 سيڪڙو عورتون پنهنجي زندگي ۾ تشدد کي منهن ڏين ٿيون.

اسان جي معاشري ۾ گهڻي ڀاڱي عورتن تي ظلم ۽ ناانصافيون ٿين ٿيون ملڪ ۾ عورتن سان ٿيندڙ ظلم ۽ زيادتين کي ڏسون ٿا ته 6 مان 1 عورت زيادتي سبب موت جو شڪار ٿئي ٿي ڪيتريون ئي عورتون ڪاروڪاري جي ڪنڌي رسم، ۾ ماريون وڃن ٿيون ڪيتريون ئي عورتن کي پنهنجا مڙس پنهنجا ڀائر پنهنجا پٽ يا ويجيا عزيز مختلف الزامن هيٺ قتل ڪن ٿا ڪيترين ئي عورتن کي قتل ڪرڻ اڳ زيادتي جو شڪار ڪيو وڃي ٿو ملڪ جي چئني صوبن جي پوليس رڪارڊ موجب 8 عورتون روزانو ظلم جو شڪار ٿين ٿيون ڪيترين ئي عورتن تي تيزاب هاريون وڃي ڪيترين ئي عورتن کي ساڙيون وڃي ٿو جن جي نشاندهي وقت به وقت پرنٽ ۽ اليڪٽرانڪ ميڊيا ڪئي آهي افسوس جهڙي ڳالهه آهي ڪوڙين رسمن رواجن جي نالي تي ملڪيت بچائڻ لاء قرآن پاڪ سان شادي ڪرائي ويندي آهي غربت جو شڪار پئسن عيوض وڪرو ٿيندڙ عورتون پيار ۾ ناڪامي صحيح انصاف نه ملڻ کان پوءِ ڪيتريون ئي عورتون پسند جي شادي نه ٿيڻ ۽ پنهنجي ناپسنده شخص سان مڱڻي ٿيڻ بعد انتهائي قدم کڻن ٿيون اڪثر عورتون   ڏهن ڪٿي شادي ڪري وينديون به آهن پر سنڌ ۾ رواج مطابق نياڻي جو اصل گهر ساهرن جو آهي پر جي ساهرن ۾ مختلف سببن جي ڪري خوش نه رهندي ته هو واپس مائٽن ڏانهن رخ ڪندي آهي. ۽ مائٽن ۾ کيس طعنن کي منهن ڏيڻو پوندو آهي مايوس ٿي خودڪشي ڪري پنهنجو آنت آڻي ڇڏينديون آهن اهڙا ڪيترا ئي واقعا پرنٽ ۽ اليڪٽرانڪ ميڊيا تي رپوٽ ٿيندا رهيا آهن عورتن کي سوچڻ گهرجي زندگي جي راهن ۾ سکن سان ڏک به اچن ٿا پر انهن ڏکن کي مرڪي پار ڪرڻ ئي زندگي آهي اسان جي سنڌ جي ننڍن توڙي وڏن شهر ڳوٺن ۾ هر روز عورتن سان ناجائزيون ناانصافيون ٿينديون رهن ٿيون اڄ به ملڪ جي مختلف جيلن ۾ ننڍن توڙي وڏن ڪيس ۾ ڪيتريون ئي عورتن ڦاٿل آهن افسوس جهڙي ڳالهه اها آهي سندس سان معصوم گلن جهڙو اولاد جيل اندر قيد آهي جنهن عمل خلاف سڄاڻ ڌرين پاران وقت به وقت مظلوم عورتن مٿان معاشرتي تشدد جي نشاندهي ڪئي آهي نشاندهي ڪرڻ سان هرف وقت جي سرڪار عورتن جي ڀلائي بهتري تحفظ لاء وقت به وقت مختلف قانون به پڻ جوڙيا آهن .

پاڪستان پيپلز پارتي جي سرڪار عورتن جي ڀلائي بهتري کين کي حقي حق ڏيارڻ لاء عورتن سان ناانصافيون ختم ڪرڻ لاء ڪوڙن رواجن جي خاتمي وارو بل 2008 ۾ منظور ڪيو ويو بل موجب عورتن کي زوري شادي ڪرڻ تي مجبور ڪرڻ ڏي وٺ جي شادي ڪرڻ سڱ چٽي ڏرڻ اهڙي طرح عورتن سان نانصافيون ڪرڻ تي مختلف سزائون ۽ ڏنڊ تجويز ڪيا ويا آهن هن وقت دنيا ۾ اڻڳڻيون عورتون اهڙا ڪارناما سرانجام ڏئي رهيون آهن، جيڪي ڪنهن به صورت ۾ مردن کان گهٽ نه آهن عورتن جي عظمت جي مڃتا لاءِ هرسال 8 مارچ تي دنيا جي تقريباً سڀني ملڪن ۾ عورتن جو عالمي ڏهاڙو ملهايو ويندو آهي. هي اهو ڏينهن آهي، جڏهن دنيا جون تمام عورتون بنا ڪنهن نسلي، زباني، ثقافتي، معاشي،مذهبي، قومي ۽ سماجي فرق جي پنهنجي ڪاميابين تي مڃتاماڻينديون آهن. هي اهو موقعو آهي، جڏهن نه صرف ماضي جي جدوجهد ۽ ان ۾ ملندڙڪاميابين تي، پر حال ۽ مستقبل ۾ به عورتن جي معاشي، سماجي ۽ سياسي ڪاميابين ۽ ڪردارجي مڃتا ڪئي ويندي آهي. سڀ کان وڌيڪ اهم اها ڳالهه آهي ته انهن سڀني صلاحيتن، موقعن ۽ وسيلن تي ڀرپور نظر وڌي ويندي آهي، جيڪي نه صرف اڄ جي، پر مستقبل جي عورت جون به منتظرآهن عورتن جي عالمي ڏهاڙي جي حيثيت دنيا جي گولي تي هڪ اهڙو ڏينهن آهي، جنهن ۾ ترقي يافته ۽ پوئتي پيل ملڪن ۾ هڪ ئي وقت عورتن جي اهميت ۽ مڃتا کي تسليم ڪيو وڃي ٿو هن تيز ترقي واري سائينسي دور ۾ اڄ به عورتون پنهنجا مڪمل حق ۽ آزادي حاصل ناهن ڪري سگهيون.

اڄ به عورت کي مرد جي برابر اجورو نٿو ملي عورتن جي تشدد جي صورتحال اڄ به بدترين آهي. اڄ به عورت پنهنجي حيثيت ۽ اهميت کي مڃرائڻ لاءِ اڳ کان وڌيڪ پاڻ پتوڙي ٿي. اچوته حقيقت کي تسليم ڪريون ته ڪل انسان ذات جي مجموعي ڀلائي، عورت جي حقن جي مڪمل پورائي، سماجي ۽ معاشي ترقي ۽ عالمي امن جو حصول عورتن جي مڪمل ۽ آزاد شموليت کان سواءِ ممڪن نه آهي. اسان جي سنڌ ۾ عورتن جي جان جو تحفظ عوام لاءِ هڪ وڏو سوال بڻيل آهي ضرورت آهي ته هڪ بهتر۽ بامقصد تبديلي لاءِ گڏجي جدوجهد جي ابتدا ڪريون، جڏهن ته سمورن مسئلن جو حل علم ۾ آهي هڪ نياڻي جي تعليم حاصل ڪرڻ سان سڄو خاندان تعليم يافته ٿي وڃي ٿو ان لاءِ اڄ جي هر عورت کي هڪ باوقار، پر اعتماد ۽ مڪمل برابري واري حيثيت ڏيارڻ لاءِ اسان سڀني کي پنهنجو پنهنجو ڪردار ادا ڪرڻو پوندو اچو ته پنهنجي مستقبل لاءِ تبديلي جي ابتدا ڪريون

 

وقت جي ترتيب جو فن: شفيق شاڪر

دنيا جي ڪامياب ترين ماڻهن پنهن جن ڪاميابين جي تجربن مان جيڪي گر ڪاميابيء جي خواهش رکندڙن سان شيئر ڪيا آهن انهن ۾ ٻين ڳالهين سان گڏ ان نڪتي کي بنيادي حيثيت حاصل آهي ته انسان جي پنهن جي زندگيء ۾ ترتيب هجي.اها ترتيب پيدا ٿي نٿي سگھي جيستائين مهيا ٿيل وقت جي صحيح ترتيب نه ٺاهبي.اسان جهڙن غيرذميدار معاشرن ۾ وقت کي جهڙِي طرح اجايو ضايع ۽ برباد ڪيو وڃي ٿو شايد سڌريل معاشرن ۾ اهو تصور به نه ڪري سگھجي.فضول ڪچهريون، اجايو موبائيل فون ، ٽي وي ۽ انٽرنيٽ جو استعمال، غير مفيد سرگرميون۽ بي نتيجي بحث مباحثا سيڪنڊن کان وٺي سالن کي اهڙي ته بيدرديء سان ڳڙڪائي وڃن ٿا جنهن جو اسان کي ڪڏهن ڪو احساس به نٿو ٿئي. گھڻي وقت کان دنيا جي ترقي يافته ملڪن ۾ ماڻهن کي وقت کي صحيح ترتيب سان استعمال ڪرڻ جو باقائدي فن سيکاريو وڃي ٿو جيڪو هاڻي سائنس جو درجو اختيار ڪري چڪو آهي. اهو فن هڪ ۾مضمون جي حيثيت سان انهن ملڪن جي اسڪولن ۽ ڪاليجن ۾ پڙهايو وڃي ٿو. جنهن کي وقت جي رٿابندي يا Time Management چيو وڃي ٿو.ڪامياب ماڻهو پنهن جي وقت کي بهترين رٿابنديء سان بهترين مقصدن جي لاء استعمال ڪن ٿا.اهو ياد رکڻ گھرجي ته جيڪي ماڻهو ڪنهن ڪم نه  ڪرڻ جي جواب ۾ وقت نه هئڻ جو ماتم ڪندا رهندا آهن انهن مان اڪثر اهي هوندا آهن جيڪي ڪم ڪرڻ چاهيندا ئي ناهن.ڪم ڪرڻ وارن وٽ وقت نه هئڻ جي شڪايت نه هوندي آهي جو اهي وقت جي استعمال جي صحيح ترتيب ۽ رٿابنديء کان خوب واقف ٿين ٿا.ڪامياب ماڻهن وٽ به 24 ڪلاڪ ۽ ناڪام ماڻهن وٽ به ساڳيا 24 ڪلاڪ هوندا آهن ته پوء ساڳيو وقت هئڻ باوجود هڪڙا ڪامياب ٿين ٿا ته ٻيا ناڪام ڇو؟فرق اهو آهي جو ڪامياب ماڻهو پنهن جي وقت جي دولت کي صرف اهم ۽ ضروري ڪمن ۾ خرچ ڪن ٿا جڏهن ته ناڪام ماڻهو ساڳيو وقت فضول ۽ اجاين ڪمن ۾ ضايع ڪري ڇڏين ٿا.هاڻي وقت جو صحيح استعمال تيستائين ٿي نٿو سگھي جيستائين وقت جي قيمتي هئڻ جو احساس نه هجي.سو روپين جو نوٽ گم ٿي وڃي ته آرام ڦٽي پوي ٿو پر سوين ڪلاڪ۽مهينا ضايع ٿيڻ تي ٽڪي جو افسوس نٿو ٿئي.زندگيء جي نعمت ته هن دنيا ۾ صرف هڪ دفعو ملي ٿي ته پوء انهيء کي فضول ضايع ڪرڻ تي افسوس ڇو نٿو ٿئي؟ جڏهن ته ٻيو هر نقصان واپس پورو ڪري سگھجي ٿو سواء وقت جي نقصان جي!وقت جو مثال ان برف وانگر آهي جنهن کي جيڪر استعمال نه ڪجي ته پگھرجي ختم ٿي وڃي ٿي. مشهور فاتح نيپولين بونا پارٽ ڏاڍي خوبصورت ڳالھ چئي آهي ته

“I may lose a battle but I shall never lose a minute. آئون جنگ ته وڃائي سگھان ٿو پر آئون پنهن جو هڪ منٽ به نه وڃائيندس” وقت کي صحيح نموني استعمال ڪرڻ ۽ انهيء مان ڀرپور فائدو حاصل ڪرڻ لاء ڏاهن طرفان ڏسيل ڪجھ نڪتا هيٺ لکجن ٿا.

پهريون اهو ته ڪوبه ڪم ڪرڻ کان پهرين پنهن جو پاڻ کان سوال ڪجي ته ڇا اهو ڪم واقعي اهم آهي يا ان کان وڌيڪ اهم ٻيو ڪو ڪم آهي جيڪو ان جي بدران ڪري سگھجي ٿو؟ يعني صرف اهو ڪم ئي ڪجي جيڪو اهم ۽ ضروري هجي ۽ جنهن جو تعلق پنهن جي مقرر ڪيل ڪنهن اهم مقصد سان هجي.اهڙيء طرح ڪيترن ئي فضول ڪمن کان ماڻهو خود بخود بچي ويندو جنهن جي نتيجي ۾ وقت به بچي پوندو.

ٻيو نڪتو اهو ته وقت کي استعمال ڪرڻ کان پهرين ان جي رٿابندي ڪجي ته ڪيترو وقت اسان وٽ موجود آهي ۽ ڪهڙا ڪهڙا ڪم ان وقت اندر مڪمل ڪري سگھجن ٿا؟ تحقيق مطابق اهڙي پلاننگ جو هڪ منٽ ڪم جا ڏه منٽ بچائي ٿو. ڏينهن شروع ٿيڻ وقت ئي پنهن جي ڪمن ۽ وقت جي ترتيب ٺاهجي بلڪه هڪ لکيل ڊائريء جي صورت ۾ اها روزاني ترتيب درج ٿيل هجي.اهڙيء طرح هفتي جي اڳواٽ پلاننگ به ڪري سگھجي ٿي.

ٽيون نڪتو اهو ته هڪڙي وقت ۾ صرف هڪ ڪم ڪرڻ گھرجي.هڪ ئي وقت تي پنهن جي لاء ڪيترائي ڪم کولي ڇڏڻ مونجھارن۽ ذهني دٻاء کي دعوت ڏيڻ برابر آهي ۽ اهو به ته هڪ ئي وقت صرف هڪ ڪم تي مڪمل ڌيان کپائي سگھجي ٿو.گھڻن ڪمن جي نتيجي ۾ ڌيان ورهائجي وڃي ٿو جنهن ڪري ڪوبه ڪم اتم نموني نه ٿي سگھندو.اهو به ته جنهن ڪم جو جيڪو وقت مناسب آهي انهيء وقت تي اهو ڪم ڪرڻ گھرجي ۽ وڌيڪ اهم ڪم کي گھٽ اهم ڪم جي پويان ڌڪڻ نه گھرجي.چوٿون اهم نڪتو اهو ته ڪو به ڪم شروع ڪرڻ کان پهرين ان ڪم جو آخري وقت يعني ڊيڊ لائين مقرر ڪرڻ گھرجي ته اهو ڪم لازمي ڪيتري عرصي اندر پورو ڪرڻو آهي.

پنجون اهم نڪتو اهو ته اسان جو مجموعي طور تي تمام گھڻو وقت انتظار واري صورتحال ۾ ضايع ٿي وڃي ٿو. مثال ڊاڪٽر جو انتظار،ڪنهن سان ملاقات يا ميٽنگ جو انتظار ،ڪنهن دعوت ۾ مانيء جو انتظار يا وري سفر ۾ پنهن جي منزل تي پهچڻ جو انتظار وغيره جيڪڏهن حساب ڪبو ته اهو روز روز جو انتظار به اسان جي زندگي جو هڪ وڏو حصو وڏي بي رحميء سان ڳڙڪائي ٿو وڃي. انهيء انتظار واري وقت کي ڪيئن ڪنهن فائدي مند ڪم يا سرگرميء ۾ استعمال ڪجي.اهو به ٽائيم مينيجمينٽ جو ڏانء آهي.مثال ان وقت کي لکڻ ۽ پڙهڻ جي مشغوليء ۾ استعمال ڪري سگھجي ٿو. ضروري فون ڪالز يا ميسيجز لکڻ لاء به اهو مناسب وقت آهي.  ڇهون نڪتو اهو جو هونئن ته هڪ وقت تي صرف هڪڙو ڪم ڪرڻ گھرجي پر ڪجھ ڪم اهڙا به آهن جيڪي هڪ وقت تي ٻئي گڏي ڪرڻ سان وقت بچائي سگھجي ٿو ۽ ڪمن جي صحت تي به ڪو خراب اثر نٿو پوي. مثال؛ واڪ يا ورزش وقت ڪنهن دوست سان ملاقات جي لاء به وڃي سگھجي ٿو.پنهن جي ٻني ٻاري جي سنڀال به لهي سگھجي ٿي.قدرت جي نظارن مان لطف اندوز به ٿي سگھجي ٿو يا وري واڪ جي دوران ضروري فون ڪالز يا ميسيجز به موڪلي سگھجن ٿا.اهڙيء طرح ورزش يا واڪ دوران موسيقي به ٻڌي سگھجي ٿي.انهيء سان به ڪافي وقت بچت ٿيندو.ان کان پوء آخري نڪتو اهو ته هر ڪم ۽ عمل ۾ وقت جي پابندي هجي.جنهن ڪم لاء جيڪو وقت مقرر ڪيل آهي انهيء تي ئي اهو ڪم هر حالت ۾ شروع ٿيڻ گھرجي.پنهن جي ڊيوٽي يا ڌنڌي تي وقت تي پهچڻ،ڪنهن ميٽنگ يا شادي وغيره ۾ وقت جي پابندي ڪرڻ،ڪنهن سان ملاقات جي لاء مقرر ڪيل وقت جي پابندي ڪرڻ،انهن سڀني شين سان نه رڳو پنهن جو ۽ ٻئي جو وقت بچائي سگھجي ٿو پر ڪيترن ئي مسئلن ۽ مونجھارن کان به بچي سگھجي ٿو.

 

 

ميرپورخاص ۾ شهيد سورهيه بادشاهه ٽيپ بال ڪرڪٽ ٽورنامنٽ جو فائنل الراشدي اليون ڦلهڏيون کٽي ورتو ميرپورخاص (اي پي پي) ميرپورخاص ۾ شهيد سورهيه بادشاهه ٽيپ بال ڪرڪٽ ٽورنامنٽ جو فائنل الراشدي اليون ڦلهڏيون کٽي ورتو. خبر موجب پهريون سيد سورهيه بادشاه ڪرڪيٽ ٽورنامنٽ ڳوٺ حاجي دلبر مهر ۾ ٿيو. جنهن ۾ ضلعي ميرپورخاص جي 16 ٽيمن حصو ورتو. جنهن جو فائنل الراشدي اليون ڦلهڏيون ۽ لاشاري ڪرڪيٽ ڪلب وچ ۾ کيڏيو ويو. پهرين بيٽنگ ڪندي لاشاري ڪرڪٽ اليون مقرر اوورن ۾ صرف 32 رنسون ٺاهي سگهي. صفدر بروهي 20 رنسون اسڪور ڪري ٽاپ اسڪورر رهيو. جواب ۾ 33 رنسن جو مليل ٽارگيٽ الراشدي اليون ڦلهڏيون ٻن وڪٽن جي نقصان تي پورو ڪري سوڀ ماڻي ورتي. فائنل ميچ ۾ الراشدي اليون ڦلهڏيون جي سرواڻ سنگھه 25 رنسون اسڪور ڪري ٽاپ اسڪورر رهيو جڏهن ته بهترين بالنگ ڪرڻ تي الراشدي اليون ڦلهڏيون جي محمد افضل کي مين آف دي ميچ قرار ڏنو ويو ۽ نند لعل کي مين آف دي سيريز قرار ڏنو ويو. انهي موقعي تي سورهيه بادشاه ايجوڪيشن ۽ اسپورٽس ويلفئير ايسوسيئيشن جي چئيرمين شير محمد درس، فقير دلبرمهر، اڪبر درس، ڊي ايم مهر پاران انعام ورهايا ويا. روايتي حريف ڀارت جي خلاف ميچ کان اڳ اسان جي ٽيم پچ کي صحيح نموني سمجهي نه سگهي: شعيب ملڪ ڍاڪا (اين اين آءِ) پاڪستان ڪرڪيٽ ٽيم جي مڊل آرڊر بيٽسمين شعيب ملڪ چيو آهي ته ڀارت خلاف ميچ کان اڳ سندس ٽيم پچ کي صحيح نموني سمجهي نه سگهي، ڍاڪا ۾ کيڏيل هن ميچ ۾ پاڪستاني بيٽسمينن جي خراب ڪارڪردگي سبب گرين شرٽس کي 5 وڪيٽن تان ناڪامي ملي، شعيب ملڪ ٽريننگ سيشن کانپوءِ هڪ انٽرويو ۾ چيو ته ڀارت ۽ پاڪستان جي وچ ۾ ميچ تي هميشه کان وڏو دٻاءُ هوندو آهي، اسان ڪجهه غلطيون ڪيون، اسان کي خبر نه هئي هتي حالتون اهڙيون هونديون، بيٽنگ ڪرڻ ڏکيو هو، جڏهن ته اسان کي حالتن بابت بلڪل اندازو نه هو، هن چيو ته هاڻ اسان هتي کيڏي چڪا آهيون ۽ سمجهي ويا آهيون ته اهڙين حالتن ۾ مخالف ٽِيم سان ڪهڙي طرح مقابلو ڪرڻو آهي، هن چيو ته اسان پنهنجن غلطين مان سبق سکون ٿا ۽ اهي ٻيهر نه ورجائڻ لاءِ پريڪٽس جاري آهي.

جيڪب آباد ۾ مير بابل خان جکراڻي هائوس ۾ 16 سال اڳ شروع ٿيل فصل جي ڀيل تان ڀيا ۽ جکراڻي خوني تڪرار جو جرڳو سردار منظور علي خان پنهور، سردار حضور بخش ڊومڪي جي سرپئنچي هيٺ ٿي گذريو جنهن ۾ صوبائي وزير هزار خان بجاراڻي ، مير عابد خان ڀيو، عابد خان جکراڻي ايم اين اي احسان الرحمان مزاري، اڳوڻو ايم اين اي گل محمد جکراڻي، محبوب بجاراڻي ، سردار سرفراز ڊومڪي، مير سعيد باجڪاڻي، سردار ڀلي رکيو لاکو، مير بابل خان جکراڻي، سردار حيدر جکراڻي. ميرحاڪم سندراڻي، ايس ٽي پي جو مرڪزي اڳواڻ ڄام عبدالفتاح سيمجو،چيف مقدم شير احمد باچڪاڻي سميت سنڌ، بلوچستان جي سردارن اميرن وڏي انگ ۾ شرڪت ڪئي جڏهن ته جهيڙيندڙ ڌرين مان سخي محمد مٺل خان جکراڻي، محبوب خان جکراڻي ۽ ڏاڏو خان جکراڻي جڏهن ته ڀيا برادري جي ڌر پاران سردار گل خان ڀيو، مير ظفر خان ڀيو ۽ رئيس ڪالو خان ڀيو  شرڪت ڪئي فيصلي جي امينن ٻنهي ڌرين جون ڳالهيون ٻڌڻ بعد ٽن ڪلاڪن تائين بند ڪمري ۾ فتويٰ تيار ڪري ٻڌائي وئي جيڪا ڪريم ڏنو جتوئي ميڊيا جي سامهون ڌرين کي پڙهي ٻڌائي جنهن موجب سردار گل خان ڀيو ڌر مٿان جکراڻي برادري جا 22 خون ثابت ٿيا جنهن ۾ دين بخش جکراڻي جا 10 لک چيف مقدم گلشير خان جکراڻي جا 30 لک ان جي پٽ محمد اسماعيل جکراڻي جا 30 لک عظمت خان جکراڻي الاهي بخش جکراڻي، رحيم بخش محمد اڪرم ، بختيار ، پوپل، نظير احمد ، بهاول دين، گلزار، شوڪت، امان الله ، خدابخش، محمد مراد، فقير بخش ، محمد حارث سميت 15 خونن جي في خون جي بها ڏهه ڏهه لک روپيه مقرر ڪئي وئي جهيڙي ۾قتل ٿيل ٽن عورتن جو في خون بها ويهه ويهه لک هڪ ڳور هاري عورت جي خون بها 25 لک رپيه مقرر ڪئي وئي مير برڪت علي خان جکراڻي جي قاتلن کي پناهه ڏيڻ جو 10 لک ڏنڊ مقرر ڪيو ويو جڏهن ته ڀيا برادري تي جکراڻي جي قتلن جو ڏنڊ ٽي ڪروڙ ويهه لک  ۽ زخمين جا 78 لک روپيه ڏنڊ جڏهن ته مجموعي طور تي ڀين مٿان 3 ڪروڙ93 لک روپيه ڏنڊ وڌو ويو جڏهن ته جکراڻي ڌر مٿان 29 خون ثابت ٿيا جنهن ۾ رئيس مبارڪ علي ڀيو جو خون بها 30 لک، نينگر زوهيب خان جو 15 لک جڏهن ته پنهل ، انجنيئر محمد ايوب، ڀورل ، محمد سچل، غلام مصطفيٰ، عبداللطيف، فريد، مريد، احمد نواز، محمد امين، عبدلواحد محمد شريف، ڪامريد گل حسن، منير احمد، حسين بخش، شهزادو، استاد رياض ، تپيدار شاهنواز، شير محمد، حاڪم علي، شفقت علي، جمعدار محمد حسن، علي حسن ڀورل ، حاجي لال بخش ڀيو سميت في خون بها ڏهه ڏهه لک روپيا مقرر ڪيا ويا جڏهن ته ٻن عورتن جا ويهه ويهه لک روپيه ڏنڊ مقرر ڪيو ويو ۽ 12 زخمين جا 46 لک روپيه مقرر ڪيا ويا ٽوٽل جکراڻي ڌر مٿان ڀيا ڌر جا 3 ڪروڙ 81 لک روپيه ڏنڊ وڌو ويو  جڏهن ته وچ ۾ مارجي ويل خميسو ڪوري جو خون بها 10 لک مقرر ڪيو ويو جنهن مان 5 لک جکراڻي ۽ 5 لک ڀيا برادري جي جهيڙيندڙ ڌر مٿان رکيو ويو جڏهن ته ٻنهي ڌرين مان اڳرائي ڪرڻ واري ڌر مٿان 40 لک روپيه ڏنڊ رکيو ويندو جڏهن ته فتويَ موجب تڪراري زمين جو ٻن هفتن اندر فيصلو ڪيو ويندو جڏهن ته ٻئي جهيڙيندڙ ڌريون هڪ ٻئي کي ٽن قسطن ۾ ادا ڪرڻ جون پابند هونديون اهڙي فتويٰ بعد ٻنهي تڪراري ڌرين جي ماڻهن کي ڀاڪر پارائي کير کنڊ ڪيو ويو ۽ آخر ۾ دعا پڻ گهري وئي.