تازيون خبرون

Daily Archives: February 29, 2016

ڪرشما ڪپور ڏاج جي معاملي تي مڙس ۽ سس خلاف ايف آئي آر داخل ڪرائي ڇڏي

نئين دهلي (شوبز نيوز) بالي ووڊ اداڪارا ڪرشما ڪپور ڏاج جي معاملي تي پنهنجي مڙس سنجي ڪپور ۽ سس راڻي خلاف ايف آئي آر داخل ڪرائي ڇڏي، ڪرشما ڪپور ۽ سنجي ۾ طلاق وارو ڪيس پهرين ئي عدالت ۾ هلي رهيو آهي، جنهن دوران ڪرشما هاڻ سنجي ۽ سندس امڙ راڻي خلاف ڏاج جي معاملي ۾ هراسان ڪرڻ جي الزام هيٺ ڌار ڌار ايف آئي آر داخل ڪرائي آهي، ڪرشما ڪپور جو ايف آئي آر ۾ موقف آهي ته کيس سنجي ڪپور ۽ سس راڻي ڏاج گهرڻ تي هراسان ڪيو آهي، ان کانسواءِ درخواست ۾ اهو به چيو ويو آهي ته مڙس کانئس ٻه ٻار به ڦري ورتا آهن، جيڪي کيس واپس ڏياريا وڃن.

 

مختلف قسم جي ڪردار ۾ اچڻ جي خواهش رکان ٿي:ڪترينا ڪيف

ممبئي:ڀارتي اداڪارا ڪترينا ڪيف چيو آهي ته هو پنهنجي ڪيريئر ۾ اهڙي درجي تي اچي وئي آهيان جتي ڪردارن جي حوالي سان خطرا ٿي سگهن ٿا.ممبئي ۾ هڪ تقريب دوران صحافين سان ڳالهائيندي ڪترينا ڪيف چيو ته هاڻي مختلف قسم جو ڪردار ڪرڻ جي خواهش رکان ٿي.سندس چوڻ هو ته مون پنهنجي سُٺي ۽ خراب ٻنهي طرح جي فلمن ۾ ڪم ڪيو آهي،هاڻي مونکي جيڪڏهن ڪنهن مختلف ڪردار جي پيشڪش ڪئي وئي ته بنا رنڊڪ جي انهيءَ ڪردار کي نڀائڻ جي ڪوشش ڪنديس.

 

بورڊ اختيارين جي دٻاءُ سبب ٽي ٽوئنٽي فارميٽ کي ڇڏڻ جو فيصلو ڪيو:مصباح الحق

ڪراچي (اسپورٽس نيوز) پاڪستان ٽيسٽ ٽيم جي ڪپتان مصباح الحق جو چوڻ آهي ته مان اڃان ٽي ٽوئنٽي ڪرڪيٽ کيڏڻ جي خواهش رکان پيو،پر ڪرڪيٽ بورڊ اختيارين جي دٻاءُ سبب ٽي ٽوئنٽي کي الوداع ڪرڻو پيو،پي سي بي اختيارين جو موقف هيو ته ٽي ٽوئنٽي فارميٽ ۾ نون رانديگرن کي موقعو ملڻ گهرجي حقيقت ۾ جيتسائين رانديگر جي ڪارڪردگيءِ سُٺي آهي ۽ راند کيڏڻ لاءِ فٽ آهي ته عمر جي ڪا به حد ناهي هوندي.پاڪستان سپر ليگ جي ڪامياب ٽيم (اسلام آباد يونائيٽيڊ)جي ڪپتان مصباح الحق جو چوڻ هو ته پي ايس ايل جي ڪاميابي سان پاڪستان ڪرڪيٽ کي وڏو فائدو ٿيندو.

 

امپائر سان غلط رويو،ويرات ڪوهلي ميچ جي 30 سيڪڙو حصي کان محروم

ميرپور (اسپورٽس نيوز) آئي سي سي پاران ڪرڪيٽ قانون جي ڀڃڪڙي ڪرڻ تي ڀارتي بيٽسمين ويرات ڪوهلي مٿان ميچ جو 30 سيڪرو ڏنڊ لڳائي ڇڏيو.ويرات ڪوهلي پاڪستان خلاف ميچ ۾ آئوٽ ٿيڻ تي امپائر ۽ پاڪستاني بالر سان بد اخلاقي ڪئي هئي،جنهن تي ڪرڪيٽ جي عالمي اداري(آئي سي سي)مٿس ڏنڊ مڙهي ڇڏيو آهي.

 

آدمشماري ۽ اسان جون ذميواريون: نسرين چانڊيو (اڳوڻي ايم پي اي)

مردم شماري 16 مارچ 2016 کان شروع ٿي رهي آهي، پهرين مرحلي ۾ خانه شماري ٿيندي جنهن ۾ ملڪ ۾ موجود گهرن جي ڳڻپ ٿيندي، سموري دنيا ۾ هر ڏهه سالن ۾ مردم شماري ڪرائي ويندي آهي ۽ گهڻن ملڪن ۾ ڪرفيو لڳائي خانه شماري ۽ مردم شماري ڪرائي ويندي آهي ته پاڪستان ۾ ائين ڇو ممڪن ناهي. پاڪستان ۾ 17 سالن کانپوءِ مردم شماري ٿيندي، 1998 کانپوءِ هاڻي 2016 ۾ ٿي رهي آهي. مردم شماري ڪرائڻ وارا ادارا (پاڪستان بيورو آف اسٽيٽسٽڪ) جي تمام عهدن تي تمام صوبن مان مقرر ڪرڻ بجاءِ هڪ ئي صوبي (پنجاب) سان تعلق رکندڙ من پسندن ريٽائرڊ آفيسرن کي ڪنٽريڪٽ بنياد تي رکيو ويو آهي، ان ۾ چيف سينسز ڪمشنر آصف باوجه ۽ فنڪشنل ميمبر عارف محمود، چيمه، طارق ملڪ، حبيب الله خان، محمود اختر ۽ ڊاڪٽر سجاد شامل آهن، انتهائي غور ڪرڻ جهڙي ۽ حيرت ناڪ ڳالهه اها آهي ته آصف باوجه، عارف محمود ۽ حبيب الله خان 2011 ۾ غلط، عوام کي ناقابلِ قبول ۽ ناڪام خانه شماري ڪرائي جنهن تي ٽي ارب رپيا خرچ ٿيا ۽ ان جي اڄ تائين انڪوائري ناهي ٿي، پاڪستان بيورو آف اسٽيٽسٽڪ جي مالياتي وزير اسحاق ڊار جي چيئرمين شپ ۾ قائم ڪورننگ ڪونسل جي 5 ميمبرن مان سنڌ سان تعلق رکندڙ ميمبر مهتاب ڪريم کي هٽايو ويو آهي، باقي چارن جو تعلق صوبي پنجاب سان آهي، مردم شماري جي سمورن نتيجن جي ڊيٽا پروسيسنگ اسلام آباد ۾ قائم مرڪز ۾ ڪئي ويندي، جڏهن ته ڪروڙين رپين جي غير ملڪي امداد مان ڪراچي ۾ هڪ جديد ڊيٽا پروسيسنگ مرڪز موجود آهي، جنهن ۾ سنڌ ۽ بلوچستان جا نتيجا اسڪين ٿيڻا هئا، جنهن تي وفاقي آفيسرن نتيجن ۾ جعلسازي جو خدشو ظاهر ڪيو آهي، قومي ۽ صوبائي اسيمبلين جي نشتن جو تعين ڪرڻو هوندو آهي، آئين جي آرٽيڪل 160(2) تحت مردم شماري جي انگ اکرن جي بنياد تي قومي مالياتي ايوارڊ (NFC) تمام صوبن ۾ تقسيم ڪيو ويندو آهي ۽ انهن انگ اکرن تي هر علائقي تمام انساني، معاشي ۽ سماجي حالتن جو تعين ڪيو ويندو آهي ۽ مستقبل جي منصوبندي ڪئي ويندي آهي ۽ 17 گريڊ کان مٿي تائين سرڪاري ملازمن جي ڀرتي جي لاءِ ڪوٽه جو تعين ڪيو ويندو آهي. 2002 کان اڳ سنڌ اسيمبلي جي 100 سيٽون هيون، ڪراچي جي 28 ۽ باقي صوبن جي 72 سيٽون هيون، ڪراچي ڊويزن جي سيٽن ۾ 50 فيصد (14 سيٽن) جو اضافو ڪيو ويو ان طرح ڪل 42 سيٽون ٿيون، باقي 4 ڊويزنن جي 72 سيٽن ۾ 12 فيصد جو اضافو ڪيو ويو اهڙي طرح ڪل 88 سيٽون ٿيون، اصولن ان چار ڊويزنن ۾ به 50 فيصد جي حساب سان 36 سيٽن جو اضافو ڪيو وڃي ته 88 سيٽن جي بجاءِ 108 سيٽون هجن ٿا، ان طرح هر ڊويزن ۾ منصفاڻو اضافو ٿيڻ گهرجي. خانه شماري/مردم شماري کان اڳ پاڪستان بيورو آف اسٽيٽسٽڪ ۾ ملڪ جي تمام صوبن خاص طور سنڌ صوبي جي نمائندگي ڏني وڃي، گهر شماري جي لاءِ مقرر ڪيل ٽي ڏينهن انتهائي گهٽ آهن ڇو ته سنڌ جا جنگلات، ڪچي جا علائقا، جزيرا ۽ ڏورانهن علائقن ۾ رهندڙ ماڻهن تائين پهچ ٽن ڏينهن ۾ ممڪن ناهي. خانه شماري ۽ مردم شماري کي صاف شفاف بڻائڻ جي لاءِ ضروري آهي ته تمام صوبن جي نمائندگي سان گڏ صوبن کي اعتماد ۾ ورتو وڃي.

 

 

 

زندگي هڪ امتحان: گل بيبي لنڊ بلوچ، دادو

زندگي خدا جي طرفان مليل هڪ تحفو آهي پر هي دنيا هر وقت انسان کان امتحان پئي وٺندي آهي ڪجهه امتحان ته اهڙا مشڪل هوندا آهن جو ڪجهه ماڻهو وقت کان اڳئي همت هارائي ويندا آهن زندگي ۾ انسان کي سخت محنت ڪرڻ کپي هر مشڪل ڪم کي بهادري سان ڪري بلڪه همت نه هارائي اگر انسان جا رادا مظبوط آهن ته ڪوبه ڪم مشڪل نه آهي. ڏک ۽ سک ته انسان جي زندگي  جو هڪ حصو هوندو آهي جڏهن انسان کي ڏک ملندا آهن ته اهي پنهنجي زندگي مان تنگ ٿي پوندا آهن ۽ جيئن جو مقصد ئي ڇڏي ڏيندا آهن ۽ ڪجهه ماڻهو اهڙا ته بهادر هوندا آهن جو هر مشڪل سان مقابلو ڪندا آهن انهن کي اهڙا ته ڏک ملندا آهن جو انهن جو روح به تڙپي پوندو آهي ان باوجود به هو همت نه هارائيندا آهن آخر هڪ نه هڪ ڏينهن اهي پنهنجي زندگي جي امتحان ۾ پاس ٿي ويندا آهن پر ڪجهه ماڻهو ٿورن ڏکن ۾ به پنهنجي زندگي جو ڏيئو اجهائي ڇڏيندا آهن زندگي ۾ انسان هر مشڪل جو مقابلو ڪري خودڪشي ڪرڻ يا پنهنجي ضمير کي ٻين جي غلامي ڪرڻ زندگي نه آهي جيتري به زندگي آهي ان ۾ سخت محنت ڪرڻ گهرجي ڪاميابي آخر قدم چمندي ڪڏهن به انسان ڏکن ۾ حوصلو نه هاري ها مان سمجهي سگهان ٿي ته ڪجهه ڏک اهڙا ته دردناڪ هوندا آهن جو انسان جيئڻ جو مقصد ئي ڇڏي ڏيندو آهي بهادري مرڻ جو نالو نه آهي بلڪه جيئڻ جو نالو آهي.

سک جڏهن انسان کي سک ملندا آهن ته اهي ايترا  ته مغرور ٿي ويندا آهن جو انهن کان الله جو شڪر ڪرڻ وسري ويندو آهي عياشين ۾ مصروف ٿي ويندا آهن ۽ تڪبر ڪرڻ شروع ڪندا آهن ۽ اهي چوندا آهن ته هي سڀ ڪجهه مان ڪيو. اهي ماڻهو ڪاش ڪنهن  بکايل ماڻهو جو احساس ڪري يا ڪنهن ماڻهو جي تڪليف ۾ ان جي مدد ڪري انهن ماڻهن کي خبر ئي نه آهي ته تڪليف ڇا آهي يا اگهاڙن کي ڪپڙا پارائي يا انهن جي مصبت ۾ مدد ڪري اهو ماڻهو صرف اهو سوچي ته الله سائين مون کي ايترو ڪجهه ڏنو آهي ان مان ٿورڙو حصو ڪڍي ڪنهن غريب ماڻهو جي مدد ڪيان جڏهن سڀ ڪجهه ان جي هٿ مان هليو ويندو آهي ته پوءِ پڇتائيندو آهي زندگي محبت ڪرڻ جو نالو آهي محبت ۾ ڪجهه ڪلاڪ مهينن جي برابر ڪجهه سالن جي برابر لڳن ٿا ۽ هڪ پل يا لمحي جي جدائي عمر جي جدائي محسوس ٿئي ٿي. دلفريب يا خوبصورت شي تي گهڻو اعتبار نه ڪريو هڪ خوبصورت يا سٺو چهرو بذات خود بهترين شفارش سٺي صورت دل کي متاثر ڪري ٿي پر سٺي سيرت روح  کٽي وٺي ٿي محبت هڪ اهڙو نشو آهي جيڪو داناء نادان کي هڪ ئي طرف سان ٻنهي تي جادو ڪري ٿو ڇڏي محبت هڪ پاڪ جو جذبو آهي جو هر انسان جي دل ۾ هوندو آهي پيءُ ، ماءُ ۽ ڀائرن ۽ ڀينرن سان محبت ڪرڻ محبت جا روپ هوندا آهن هڪ ته پنهنجن سان محبت ڪرڻ جيڪي رشتا اسان کي خدا جي طرفان مليل آهن ٻيو ته ڪنهن ماڻهو سان محبت ٿي وڃي اڪثر ماڻهو پنهنجي مطلب لاءِ محبت جهڙي پاڪ جذبي کي استعمال ڪندا آهن ۽ غلط ڪم ڪندا آهن. محبت ته روح جو سڪون هوندو آهي ته ماڻهو ان کي غلط طريقي سان ڇو استعمال ڪندا آهن هڪ اها پاڪ محبت هوندي آهي جو انسان سڄي زندگي پنهنجي دل ۾ رکي جيئندا آهن مان انهن انسانن کي سلام ٿي ڪيان جنهن زندگي خوشي جو نالو آهي. جنهن انسان زندگي ۾ ڪڏهن به ڏک نه ڏٺا آهن ان کي زندگي جي هر سهولت ملي هجي اهو انسان ته چوندو زندگي خوشي جو نالو آهي.

ڪڏهن ڪڏهن ڪجهه انسان اهڙا به هوندا  آهن جو سڄي محبت ڪندا آهن  ۽ زندگي جي خوشي کي تلاش ڪندا آهن ۽ اهي  ٻين جي خوشي کي ڏسي دل ئي دل ۾ ان خوشي جي حسرت ۾ هوندا آهن ۽ ڪجهه انسان اهڙا هوندا آهن جو ٿورڙي خوشيءَ لاٰءِ پنهنجو سڀ ڪجهه قربان  ڪري ڇڏيندا آهن يا وڃائي ڇڏيندا آهن. زندگي وڇوڙي جو نالو آهي. وڇوڙو ڇا آهي جنهن کان پنهنجو پيارو وڇڙي وڃي يا ويو هجي وڇوڙو تمام ڏکيو ۽ تڪليف ڏيندڙ آهي جڏهن ڪو پنهنجو وڇڙي ويندو آهي ته اهو تمام گهڻو ياد ايندو آهي اهي سڀ ڳالهيون ته زندگي ۾ هونديون آهن جڏهن ڪنهن کان پنهنجو جوان ڀاءُ وڇڙي وڃي ان تڪليف جو ته ڪوبه اندازو ئي مه ٿو لڳائجي يا اسان کان ڪو پيارو ليڊر وڇڙي وڃي جيئن محترمه بينظير ڀٽو زندگي ته هلي رهي آهي زندگي ته نه روڪندي آ، اها اسان جي ڪهڙي نه پياري ليڊر هئي ايترا سال گذرڻ جي باوجود اسان جي دل ۾ ان لاءِ ڪيڏي ته محبت آهي ان پياري ليڊر جي وڇوڙي کي ياد ڪري اسان جي دل اڃا به زارو قطار روئيندي آهي. جدائي دل جي پياس وڌائي ٿي ڇڏي محبت ته ڪئي انهن ڪنهن جي رسوائي نه ٿئي محبت هڪ پاڪ جذبو آهي ڪجهه ماڻهو جو هن پاڪ جذبي کي سمجهن ٿا نه ته گهڻا ماڻهو ته هن نالي کي بس استعمال ڪندا آهن اڄ جي دور ۾ ڪا به محبت نه آهي هي بس مطلبي زمانو آهي جيڪي نوجوان ڇوڪرين کي بيوقوف ڪن ٿا ڪاش سڀ ماڻهو همت وارا هجن جو هي جذبو دل ۾ هوندي به ڪوبه غلط ڪم نه ڪن محبت ته محسوس ڪرڻ جو نالو آهي حاصل ڪرڻ جو نه . زندگي انتظار جو نالو آهي. زندگي ۾ اڪثر ماڻهو ڪنهن ڪنهن جي انتظار ۾ هوندا آهن انتظار ايڏي ته مشڪل آهي جو هن ۾ به ماڻهو هر پل مرندا ۽ جيئندا آهن تڏهن به ڪجهه ماڻهو سڄي زندگي انتظار ۾ گذاري ڇڏيندا آهن زندگي ته انسان کي هڪ دفعو ملندي آهي پر آءُ به اهي ماڻهو پنهنجي محبوب يا محبوبا لاءِ سڄي زندگي انتظار ڪندا آهن ڪجهه ڏينهن جو انتظار سالن جي برابر لڳندو آهي تڏهن به اهي ماڻهو پنهنجي پيار لاءِ سڄي زندگي قربان ڪري ڇڏيندا آهن هن دور ۾ به ڪجهه اهڙا ماڻهو آهن پنهنجي زندگي انتظار ۾ گذاريو هجي يا گذاري رهيا آهن انتظار تمام مشڪل ۽ ڏکيو آهي انتظار ڪجهه ڪلاڪن سالن جو برابر لڳندو آهي ته سڄي زندگي جو انتظار ته صدين جي برابر لڳندو آهي اگر ڪو انسان انتظار ۾ هجي ۽ ان جو موت جو ٽائيم ٿي وڃي تڏهن به ان جون اکيون دروازي ۾ هونديون آهن ۽ انهن کي هڪ هڪ دل جو انتظار هوندو آهي. اگر انهن جو ساهه هليو ويندو تڏهن به انهن جون اکيون کليل رهجي وينديون آهن ۽ انهن جو روح تڙپندو رهندو. آخر اهو ايترو مشڪل ڇو آهي ايترو مشڪل هوندي به ماڻهو انتظار ڇو ڪندا آهن انتظار به زندگي جو هڪ حصو آهي جيڪي ڪنهن ماڻهو جي نصيب ۾ لکيل هوندو آهي. زندگي تڪليف جو نالو آهي. هي زندگي ڇا آهي ڇاڪجي هن زندگي ۾ هر انسان کي تڪليفون ۽ تمام گهڻا مشڪلات پيش آيا هر انسان هڪ ڪهاڻي آهي ۽ ماڻهو کي کلندي سندا آهيون ته چوندا آهيون هن ماڻهو جهڙو ته ڪير به خوش نه هوندو جڏهن ان سان ڳالهائيندا آهيون يا ن جي زندگي جي باري ۾ خبر پوندي آهي ته ان ماڻهو پنهنجي زندگي ۾ ايڏيون ته تڪليفون ڏٺيون آهن جو اسان سوچيندا آهيون ته اسان ڇا ڏک ڏٺا آهن هن انسان پنهنجي زندگي ۾ ايتريون تڪليفون ڪيئن برداش ڪيون آهن ائين هر انسان پنهنجي زندگي ۾ ان تڪليف کان ضرور گذريو هوندو جيڪي روح کي به تڙپائي ڇڏيو هوندو ڪنهن کي زندگي ۾ پيار نه مليو هجي ڪنهن کي کائڻ لاءِ ماني نه ملي ڪنهن انسان کي اولاد جهڙي نعمت نه ملي هجي ڪنهن انسان کان پنهنجو پيارو وڇڙي ويو هجي يا ڪجهه انسان خراب بيمارين جي ڪري تڪليف ۾ زندگي گذاريندا آهن بيماريون ته انسان جي هر خوشي ختم ڪري ڇڏين ٿيون ۽ انسانن جي جيتري به زندگي هوندي آهي اهي تڪليف ۾ گذاريندا آهن ڇا ڪن جو انسان جي قسمت ۾ لکيل هوندو آهي اهي سڀ زندگي جو حصو آهن. مينهن جيڪڏهن تون منهنجي اکين کان وسڻ سکين ها ته بس ئي نه ڪرين ها ڪڪر منجهه ڪاپار،بيت اندر سڄو ڪڪر آهي مهر نظر جو ڪڪر نه لاهه، اهي عشق وارا ڪيني کان پاڪ ۽ پري رهن ٿا.

زندگي برداش ڪرڻ جو نالو آهي.: جيڪي ماڻهو برداش ڪرڻ ڄاڻن ٿا اهي زندگي جي هر مشڪل کي منهن ڏئي ويندا آهن هي برداش جو مادو به ڪنهن انسان ۾ تمام گهڻو آهي جيڪي ماڻهو هر مصيبت ۽ مشڪل حالت ۾ برداش جو مادو ختم ته ڪندا آهن اهي انسان زندگي ۾ ڪامياب هوندا ڪجهه ماڻهو ته اهڙا  ڪمزور هوندا آهن جو ٿورڙن ڏکن ۾ پنهنجي زندگي جو ڏيئو اجهامي ڇڏيندا آهن ۽ اها زندگي ٿوري ئي هوندي آهي زندگي ته برداش ڪرڻ جو نالو آهي (اعلى قسم جي جوڳين، سامين، کي الک کي وڌو ٿيڻ لاءِ ۽ ان منزل تي پهچڻ لاءِ ننڊ نه ٿي اچي اوجاڳي ۾ رام، خدا ڏي رمندا هلندا، ٿا وڃن جيڪي پاڪ محبت ڪندا اهي پاڪ آهن انهن جو درد دوا نه پر عشق جو وصل آهي درد انهن لاءِ تحفو آهي. زندگي ۾ ٽي ڳالهيون تمام سخت هونديون آهن هڪ موت جو خوف ٻيو مرض جي گهڻائي ۽ ٽيون قرض جي ذلت. (خوشي سان ڪجهه برداشت ڪيو وڃي ته بوج هلڪو ٿئي ٿو) زندگي ٻين خاطر جيئڻ جو نالو آهي. زندگي ٻين خاطر جيئڻ جو نالو هوندو آهي هر ماڻهو ٻين لاءِ جيئندو ۽ محنت ڪندو رهندو آهي جيئن انسان پنهنجي زندگي ۾ اولاد لاءِ ڪجههنه ڪجهه ڪندا رهندا آهن جيئن هڪ ماءُ پنهنجي اولاد لاءِ سڄي زندگي قربان ڪري ڇڏيندي آهي يا ڪو اهڙو ماڻهو جيڪو پنهنجي گهر وارن لاءِ ڏينهن رات هڪ ڪري محنت ڪندو آهي ته گهر جا سڀئي ڀاتي خوش رهن ۽ پنهنجي زندگي جي باري ۾ سوچيندو ئي نه آهي ڄڻ هي ٻين خاطر جيئي پيو. سچي خوشقسمتي  اها ئي آهي ته هڪ  سٺي زندگي گذاري وڃي ۽ خوشگوار موت  تي ختم ٿئي. زندگي ۾ ٻه الميه هوندا آهن. (1) جنهن جي خواهش هجي ان جو نه ملڻ. (2) جنهنجي خواهش نه هجي ان جو ملي پوڻ اها آهي زندگي.

********

 

 

پاڪ-ڀارت ميچ….شاهينن جي شڪست

گذريل ڏينهن ايشيا ڪپ جي اهم مئچ ۾  پاڪستان روايتي مخالف ڀارت هٿان شڪست کائي ويو، پاڪستاني سينيئرن سميت  اهم بيٽسمينن  جي بيٽنگ فلاپ ٿي وئي، ڀارتي ڪپتان مهيندرا سنگهه ڌوني ٽاس کٽي پهرين فيلڊنگ جو فيصلو ڪيو، جيڪو درست ثابت ٿيو، پاڪستاني بيٽنگ لائن واري جو  ڍير  ثابت ٿي، محمد حفيظ چوڪو هڻڻ بعد غير ضروري شاٽ کيڏندي آئوٽ ٿي ويو، شرجيل خان 7 رنسون ٺاهيون، خرم منظور 25 بالن تي 10 رنسون ٺاهيون، شعيب ملڪ 4 ۽ عمر اڪمل به ٽن رنسن تي ايل بي ڊبليو ٿي ويو، شاهد آفريدي 2 رنسو ٺاهي رن آئوٽ ٿيو، سرفراز ڪجهه مزاحمت ڪندي 25 رنسون ٺاهيون پاڪستان جا 9 رانديگر ڏهاڪي جي حد تائين به نه پهتا، ڀارت جي هر دڪ پانڊي 3 وڪيٽون ورتيون، جديجا 2، لنهرا ، بمراهه ۽ يوراج سنگهه به هڪ هڪ شڪار ڪيو، ڀارت به شروعات ڏکيائين جو شڪار رهيو، پهرين اوور جي پئين بال تي روهت شما کاتو کولڻ بنا آئوٽ ٿي ويو، رهاني به زيرو تي آئوٽ ٿي ويو، 8 رنسن جي مجموعي اسڪور تي سريش رائنا به آئوٽ ٿي ويو، ويرات ڪوهلي مردبحران بڻجي بيهي ويو، يوراج سنگهه  ۽ ڪوهلي 86 رنسن جي حصيداري جوڙي ڀارتي فتح کي يقيني بڻايو، 49 رنسون ٺاهي ڪوهلي آئوٽ ٿي ويو ته هردڪ پانڊي به کاتو کولڻ بنا محمد سميع جي بالنگ تي پويلين واپس هليو ويو، ڪپتان ڌوني چوڪي سان ڪاميابي جي منزل تي پڄي ويو، ويرات ڪوهلي کي مين آف دي مئچ ايوارڊ ڏنو ويو.

پاڪستاني ڪرڪيٽ ٽيم جي ڪپتان شاهد آفريدي چيو آهي ته ڀارت کان هارائڻ وڏو ڌچڪو ناهي، ٽيم ڪم بيڪ ڪرڻ جي صلاحيت رکي ٿي، پچ تي وڏو اسڪور ڪرڻ آسان ناهي. ويرات ڪولهي ۽ يووراج سٺي بيٽنگ ڪئي، اهو اسان جي بيٽسمينن لاءِ مثال آهي. بيٽسمين جلدي آئوٽ ٿي ڊريسنگ روم پڄي وڃن ته مشڪل ٿي ويندي آهي. وڏو اسڪور نٿو ڪري سگهجي. جڏهن ته ميچ جي مين آف دي ميچ ويرات ڪولهي چيو ته وڪيٽ بيٽنگ لاءِ آسان نه هئي. محمد عامر بهترين بالنگ ڪئي، محمد عامر دنيا جي بهترين بالرن مان هڪ آهي.

ايشيا ٽي 20 ڪپ دوران پاڪستان ۽ ڀارت جي ميچ ۾ پاڪستان جي بدترين شڪست ۽ بيٽنگ لائين جي هڪ ڀيرو ٻيهر فلاپ ٿيڻ کان پوءِ اڳوڻن ڪرڪيٽرن ۽ ڪرڪيٽ شوقينن جو سخت ردعمل سامهون آيو آهي. ان سلسلي ۾ اڳوڻي ڪرڪيٽر ۽ ڪپتان جاويد ميانداد، محمد يوسف، وقار يونس، محسن حسن خان، جو چوڻ هو ته کين لڳي رهيو آهي ته هو سڀ پراڻا ڪرڪيٽر وري گڏجي کيڏن ته به موجوده ٽيم کان سٺو کيڏندا. پاڪستان جو دفاعي انداز اهڙو هو جو هو رانديگرن جون ڄنگھون ڏڪي رهيون هيون، هو رنسون ته ٺهيون پر پاڻ بچائڻ ۾ پورا هئا. هنن هيڊ ڪوچ تي ڇتي تنقيد ڪندي چيو ته وقار يونس ۽ ٽي 20 ڪپتان رڳو ڳالهين جا شينهن آهن، هنن هيل تائين پاڪستان ٽيم کي بيٽنگ ڪرڻ ناهي سيکاري. قومي ٽيم ڀارتي ڪرڪيٽرن اڳيان کيڏيندي ڪنهن گھٽيءَ جي ٽيم لڳي رهي هئي. هو پنهنجي بچاءَ ۾ پورا هئا ۽ وائڙن جيان کيڏي رهيا آهن، پاڪستان ٽيم ۾ ڪٿي به رٿابندي نظر نه آئي، ايئن لڳي رهيو هو ته ڄڻ ڪنهن گھٽِي يا محلي جي ٽيم کيڏي رهي هجي، جيڪا بس ڊوڙ ڊوڙان ڪري رهي هئي.