تازيون خبرون

Daily Archives: February 27, 2016

وزيراعظم ڪراچيءَ جون رونقون بحال ٿيڻ تائين آپريشن جاري رکڻ جو اعلان ڪري ڇڏيو

ڪراچي (اسٽاف رپورٽر) وزيراعظم نواز شريف، ڪراچيءَ جون رونقون بحال ٿيڻ تائين ڏوهارين خلاف آپريشن جاري رکڻ جو اعلان ڪيو آهي، سندس چوڻ آهي ته آپريشن کي منطقي انجام تائين پهچايو ويندو، آپريشن سان گڏ ترقياتي عمل به شروع ٿي چــُڪو آهي. ڪراچي ۾ گرين لائين بس منصوبي جي پيڙهه جو پٿر رکڻ کانپوءِ تقريب کي خطاب ڪندي وزيراعظم چيو ته جن علائقن مان بس گذرندي اتان جي ماڻهن لاءِ وڏي آساني ٿيندي. هن چيو ته هـِي منصوبو 11 نه پر 22 ڪلوميٽر ڊگهو هوندو ۽ هڪ سال ۾ پورو ٿيندڙ هـــِي پراجيڪٽ لاهور ميٽرو کان به سٺو هوندو. وزيراعظم چيو ته ڪراچي کي لاهور سان موٽر وي ذريعي ملائڻ لاءِ ڪم به شروع ٿي چڪو آهي جڏهن ته حيدرآباد کان سکر تائين موٽر وي تي ڪم شروع ڪرڻ لاءِ معاملا هڪ مهيني ۾ طئي ڪيا ويندا. سندس چوڻ هو ته لياري ايڪسپريس وي تي به مارچ ۾ ڪم شروع ڪيو ويندو جنهن لاءِ 2 ارب رپيا جاري ڪيا پيا وڃن. نواز شريف چيو ته ٿر ۾ ڪوئلي جي کاڻ مان ڪوئلو ڪڍڻ جو ڪم به شروع ٿي رهيو آهي ۽ ان سان بجلي پيدا ڪئي ويندي جنهن بعد ڪوئلو درآمد ڪرڻ جي ضرورت نه ٿيندي. سندس چوڻ هو ته ڪراچي ۾ هاڻي ڏوهي وارداتون گهٽجي چـُڪيون آهن پر کين وڌيڪ مضبوط ٿيڻ جي ضرورت آهي ته جيئن ڏوهه پاڙان ختم ٿي وڃن. وزيراعظم اعلان ڪيو ته ڪراچي جون رونقون بحال ٿيڻ تائين آپريشن جاري رهندو ۽ ان کي منطقي انجام تائين پهچايو ويندو. ان کان اڳ وزيراعظم نواز شريف ڪراچي پهتو ته سنڌ جي گورنر ڊاڪٽر عشرت العباد ۽ وڏي وزير سيد قائم علي شاهه فيصل ايئربيس تي سندس آجيان ڪئي. بعد ۾ فيصل ايئربيس تي ئي وزيراعظم امن امان بابت اعليٰ سطحي اجلاس جي صدارت ڪئي. اجلاس ۾ گورنر، وڏي وزير، وفاقي وزير پرويز رشيد، گهرو وزير سهيل انور سيال، آءِ جي سنڌ غلام حيدر جمالي، ڊي جي رينجرز ميجر جنرل بلال اڪبر، چيف سيڪريٽري صديق ميمڻ ۽ ٻين شرڪت ڪئي. اجلاس دوران ڊي جـِي رينجرز ۽ آءِ جي پوليس وزيراعظم کي ڪراچي ۾ امن امان جي صورتحال بابت بريفنگ ڏني. ان موقعي تي وزيراعظم چيو ته گرفتار دهشتگردن جي انڪشافن تي جاچ جلد مڪمل ڪئي وڃي. وزيراعظم چيو ته امن قائم رکڻ لاءِ سنڌ سرڪار سان سهڪار جاري رکيو ويندو ۽ دهشتگردن سان گڏ سندن سهولتڪارن کي به نه ڇڏيو ويندو

 

سنڌ ۾ امن امان بابت 70 سيڪڙو ڪاميابيون مليون آهن، اغوا جو ڪو به ڪيس ناهي: وڏو وزير

ڪراچي (اسٽاف رپورٽر) وڏي وزير سيد قائم علي شاهه چيو آهي ته سڄي سنڌ ۾ امن امان بابت 70 سيڪڙو ڪاميابيون مليون آهن جڏهن ته هن وقت اغوا جو ڪو به ڪيس ناهي، رينجرز ۽ پوليس امن لاءِ وڏيون قربانيون ڏنيون آهن. ڪراچيءَ ۾ گرين لائين بس منصوبي جي پيڙهه جو پٿر رکڻ وارِي تقريب کي خطاب ڪندي وڏي وزير منصوبي تي وزيراعظم جا ٿورا مڃيا ۽ چيو ته اهڙي ريت وڌيڪ 5 ٻيا منصوبا به شروع ڪيا ويندا جن کي ايندڙ اڍائي سالن ۾ مڪمل ڪيو ويندو. ان موقعي تي وڏي وزير وزيراعظم کي درخواست ڪئي ته لاهور – ڪراچي موٽر وي کي سکر بدران حيدرآباد کان شروع ڪيو وڃي ۽ ڪراچي ۾ پاڻي جي مسئلن جي حل لاءِ به پراجيڪٽ شروع ڪيو وڃي. هن چيو ته ڪراچي ۾ پاڻي ۽ بجلي جا مسئلا آهن، شهر کي ڪي فور پراجيڪٽ جي سخت ضرورت آهي. سيد قائم علي شاهه چيو ته ڪراچي سميت سڄي صوبي ۾ امن امان بابت 70 سيڪڙو ڪاميابيون مليون آهن ۽ هن وقت اغوا جو ڪو به ڪيس ناهي. وڏي وزير چيو ته سنڌ ۾ امن جي بحالي ۾ رينجرز ۽ پوليس وڏو ڪردار ادا ڪيو آهي، انهن جون قربانيون ضايع نه ڪيون وينديون.

 

دهشتگردي خلاف جنگ ۾ ڪاميابي پاڪ فوج کي دنيا بهترين فوج ثابت ڪيو آهي:آرمي چيف

راولپنڊي (بيورو) آرمي چيف جنرل راحيل شريف چيو آهي ته دهشتگردي خلاف جنگ ۾ ڪاميابي پاڪ فوج کي دنيا جي بهترين فوج ثابت ڪري ڇڏيو آهي. آءِ ايس پي آر موجب، پنجاب جي شهر بهاولپور  پاڪ فوج جي جوانن جون جنگي مشقون پڄاڻي تي پهتيون آهن، جن جو آرمي چيف جنرل راحيل شريف جائزو ورتو. ان موقعي تي آرمي چيف جنرل راحيل شريف جنگي مشقن ۾ حصو وٺندڙ فوجي جوانن کي خطاب ڪندي چيو آهي ته دهشتگردي خلاف جنگ ۾ ڪاميابين پاڪ فوج کي دنيا جي بهترين فوج ثابت ڪيو آهي. هن چيو ته اسان کي هر طرح جي خطري کي منهن ڏيڻ لاءِ تيار رهڻو پوندو، پاڪ فوج امن دشمنن کي پنهنجي انجام تائين پهچائڻ لاءِ هر ممڪن قدم کڻي رهي آهي.

 

گرين لائين بس سروس جي  آجيان ڪيون ٿا،نوازشريف جڏهن ڦاسندو  آهي ته منهنجي ئي مشوري سان بچندو آهي:خورشيد شاهه

سکر (بيورو) قومي اسيمبليءَ ۾ مخالف ڌر جي اڳواڻ سيد خورشيد احمد شاھ ڪراچيءَ ۾ گرين لائين بس سروس جي افتتاح جي آجيان ڪئي آهي. سندس چوڻ آهي ته، وزير اعظم نواز شريف سندس مشورن تي عمل نه پيو ڪري، جڏهن ڦاسندو آهي ته سندس مشوري تي عمل سبب ئي بچندو آهي. سکر ۾ ملٽري روڊ جي دوري دوران  ميڊيا سان ڳالهيون ڪندي سيد خورشيد احمد شاهه ته، وزير اعظم ميان نواز شريف سندس مشورن تي عمل نه پيو ڪري جڏهن ڦاسندو آهي ان وقت عمل ڪري بچي ويندو آهي، نواز شريف ڪراچي ۾ ميٽرو بس جو نه پر بس سروس جو افتتاح ڪيو آهي، جيڪا سٺي ڳالهه آهي هو هرو ڀرو مخالفت نه ڪندو، هن چيو ته جڏهن نيب سنڌ ۾ ڪارروائيون پئي ڪري هن انهيءَ وقت به پنجاب سميت سڄي ملڪ ۾ ڪارروائيون جي صلاح ڏني هئي، حڪومت  ڪارروائين تي پاڻ ۽ نيب کي تڪراري بڻائي ڇڏيو آهي، خورشيد شاهه جو چوڻ هو ته، کين پڇ ناهي جنهن کي ڊگھو پڇ آهي اهو ئي لت اچڻ کان ڊڄي. ڪجهه مهينن ۾ بجلي بحران جي ڳالهه ڪندڙ هاڻي 2018 جي ڳالهه ڪن پيا،هن چيو ته سنڌ پاڪستان جو حصو آهي ۽ سڀ کان وڌيڪ روينيو ڏئي پيو. ايشيا ڪپ ۽ ٽي 20 ڪپ ۾ پاڪستان ۽ ڀارت جي مئچ بابت سندس چوڻ هو ته   هو انهن مئچن تي ڪهڙو تبصرو ڪري . پاڪستان ۽ ڀارت وچ ۾ ڪرڪيٽ مئچ ٿيڻ سٺي ڳالهه آهي. باقي کٽيندو اهو ئي جيڪو محنت ڪندو.

 

نمائشي گيلري ۾ پ پ ۽ ڀٽو خاندان جي سياسي جدوجهد ۽ ملڪ خاطر ڪارناما انجام ڏيندڙن جو تصويرون لڳايون وڃن: مولا بخش چانڊيو

ڪراچي (اسٽاف رپورٽر) وزير اعليٰ سنڌ جي اطلاعات بابت صلاحڪار مولا بخش چانڊيو اڄ آرڪائيوز ڪامپليڪس ۾ ايگزيبيشن (نمائشي) گيلري ،نيوزيم ۽ ريپروگرافي ليب جي ترقياتي ڪم جو جائزو ورتو . ان موقعي تي ڊائريڪٽر آرڪائيوز بشير احمد بروهي ۽ ڊپٽي ڊائريڪٽر مخدوم ذولفقار صوبائي صلاحڪار کي آرڪائيوز جي تحت جاري ترقياتي منصوبي بابت تفصيلي بريفنگ ڏني جڏهن ته ان موقعي تي اطلاعات بابت صلاحڪار جو ڪوآرڊينيٽر برڪت ٻٻر ۽ اڳوڻو سنڌ اسمبلي جو ميمبر صغير احمد قريشي ۽ ٻيا آفيسر ساڻس گڏ هئا. صلاحڪار آرڪائيوز کاتي جي تحت جاري ترقياتي ڪم مقرر وقت تي مڪمل ڪرڻ جا حڪم جاري ڪندي چيو ته نمائشي گيلري ۾ پاڪستان پيپلز پارٽي ۽ ڀٽو خاندان جي سياسي جدوجهد ، ملڪ خاص ڪري سنڌ جي ناليواري شخصيتن، شعر ۽ ادب، فنون لطيفه سميت زندگي جي مختلف شعبن ۾ ڪارناما سرانجام ڏيندڙن جون تصويرون لڳايون وڃن ۽ انهن جي تاريخي ۽ تحقيقي ڪم کي ايندڙ نسلن لاءِ محفوظ ڪيو ويندو. هن آرڪائيوز کاتي جي آفيسرن کي تاريخي ۽ ناياب سرڪاري دستاويزن کي محفوظ ڪري ايندڙ نسلن تائين پهچائڻ ۾ پنهنجيون ذميوايون نڀائڻ جي هدايت ڪئي. هن چيو ته ناياب ۽ تاريخي دستاويز جي تحفظ لاءِ آرڪائيوز کاتي جي تحت سنڌ جي هر ڊويزنل هيڊ ڪواٽر ۾ آفيسون ۽ لائبريريون قائم ڪيون پيون وڃن. مولا بخش چانڊيو چيو ته آرڪائيوز کاتي جي تحت قائم ٿيندڙ نمائشي گيلريون، ريپرو گرافي ليب ۽ لائبريرين سان محققن کي تحقيق ڪرڻ ۾ مدد ملندي.

 

اسلام آباد ۾ 3 ڊپٽي ميئر مقرر ڪيا پيا وڃن، هاڻي ملڪ لاءِ وزير اعظم به 3 چونڊيا ويندا: مخالف ڌر

اسلام آباد (بيورو) قومي اسيمبلي ۾ مخالف ڌر جي سخت احتجاج باوجود اسلام آباد جي مڪاني ادارن بابت ترميمي بل 2015ع منظور ڪري ورتو، مخالف ڌر ميمبرز جو چوڻ آهي ته حيرت جي ڳالهه آهي ته اسلام آباد ۾ 3 ڊپٽي ميئر مقرر ڪيا پيا وڃن، لڳي ٿو ته هاڻي ملڪ لاءِ وزير اعظم به 3 چونڊيا ويندا. قانون ۽ انصاف واري وزارت قومي اسيمبلي کي لکت ۾ آگاهي ڏني آهي ته نيب 2013 ۽ کان 15 تائين ڪرپشن جا 8 ڪيسز مان رقم واپس ڪرائي. قومي اسيمبلي جو اجلاس اسپيڪر سردار اياز صادق جي صدارت هيٺ ٿيو، جنهن ۾ مختلف معاملن تي بحث ڪيو ويو. قانون ۽ انصاف وزاري وزارت نيب جي ڪارڪردگي بابت لکت ۾ آگاهي ڏيندي چيو ته قومي احتساب بيورو 2013 کان 15 تائين ڪرپشن جي 8 ڪيسز جي جاچ مڪمل ڪئي آهي. قانون ۽ انصاف واري وزارت چيو ته نيب اڍائي سالن دوارن مختلف ڪيسز ۾ ڪرپشن جا هڪ ارب 85 ڪروڙ واپس ڪرايا ويا آهن. پيٽروليم واري وفاقي وزير ايل اين جي معاهدي جا تفصيل ايوان ۾ پيش ڪندي چيو ته ايران سان ايل اين جي گهرائڻ واري ڊيل واضح هئي. هن چيو ته حڪومت گئس بحران جي حل لاءِ ايران سان ڪيل معاهدي کي به سنجيدگي سان ورتو آهي، جنهن تي جلد ڪم شروع ڪيو ويندو.

 

ايمرجنسي واري حڪمنامي تي رڳو پرويز مشرف جي صحيح آهي: سپريم ڪورٽ

اسلام آباد (بيورو) سپريم ڪورٽ، غداري ڪيس ۾ اڳوڻي چيف جسٽس عبدالحميد ڏوگر سميت شريڪ جوابدارن کي شامل ڪرڻ وارو فيصلو ڪالعدم قرار ڏئي ڇڏيو آهي، عدالت چيو آهي ته ايمرجنسي واري حڪمنامي تي رڳو پرويز مشرف جي صحيح آهي ۽ وفاق رڳو پرويز مشرف کي ايمرجنسي جو ذميوار سمجهي ٿو. جسٽس آصف سعيد کوسا جي سربراهي ۾ سپريم ڪورٽ جي 3 رڪني بيچ اڳوڻي چيف جسٽس عبدالحميد ڊوگر جي خاص عدالت خلاف محفوط ڪيل فيصلو ٻڌايو. جسٽس آصف سعيد کوسا سنگين غداري ڪيس ۾ عبدالحميد ڊوگر سميت ٻين شريڪ جوابدارن جا نالا شامل ڪرڻ خلاف فيصلو پڙهي ٻڌايو. عدالت ريمارڪس ڏنا ته ايمرجنسي واري حڪمنامي تي رڳو پرويز مشرف جي صحيح ٿيل آهي ۽ وفاقي سرڪار به مشرف کي ايمرجنسي جي ذميوار سمجهي ٿي. عدالت ۾ ريمارڪس ۾ چيو ته سنگين غڊاري ڪيس ۾ شريڪ جوابدارن کي شامل ڪرڻ جو اختيار رڳو وفاق کي آهي. سپريم ڪورٽ اڳوڻي چيف جسٽس عبدالحميد ڏوگر سميت شريڪ جوابدارن کي شامل ڪرڻ وارو فيصلو ڪالعدم قرار ڏيندي غداري ڪيس جلد اڪلائڻ جي هدايت ڪري ڇڏي. واضح رهي ته اسلام آباد جي خاص عدالت سنگين غداري ڪيس ۾ اڳوڻي چيف جسٽس عبدالحميد ڊوگر، شوڪت عزيز ۽ ٻين جوابدارن جا نالا نامزد ڪرڻ جو فيصلو ٻڌايو هو،

 

مشرف دور ۾ (ن) ليگ جن ٺهرائن جي مخالفت ڪئي هاڻي اهي پاڻ پاس پئي ڪرائيُ: مولانا فضل الرحمان

ڪوئٽا (م.ڊ) مولانا فضل الرحمان عورتن جي تحفظ واري بل تي چپ نه ڪري سگهيو،پنجاب اسيمبلي جي ميمبرن کي زالن جو مُريد به چئي ڏنو.سندس چوڻ هو ته ڊگهو ويڪرو قانون ٺاهڻ جي ڪهڙ ضرورت هئي،بس اها ترميم ڪجي ها ته هاڻي زال کي مُڙس ۽ مُڙس کي زال چيو وڃي.ڪوئٽا ۾ ميڊيا سان ڳالهائيندي مولانا فضل الرحمان جو چوڻ هو ته ڊگهو ۽ ويڪرو قانون ٺاهڻ جي ڪهڙي ضرورت هئي بس هڪڙئي ترميم ڪري ڇڏيو ها ته هاڻي زال کي مُڙس ۽ مُڙس کي زال چيو وڃي.جي يو آئي (ف) سربراهه جو چوڻ هو ته مشرف جي دور ۾ (ن) ليگ اهڙن ئي ٺهرائن جي مخالفت ڪئي  هئي پر هاڻي پاڻ ئي مشرف کان ٻه قدم اڳتي وڃي پئي،حڪمرانن قرآن ۽ سنت مطابق قانون سازي نه ڪرڻ جو قسم کينو آهي،سندس چوڻ هو ته مشرف دور اڃا پري ناهي ويو،جن ٺهرائن جي (ن)ليگ مخالفت ڪئي انهن کي پاڻ پاس ڪرائي رهي آهي.

 

پهرين مارچ کان پيٽرول ساڍا 8 رپيا سستو ٿيڻ جو امڪان ،اوڳرا لاڳاپيل وزارت ڏانهن سمري موڪلي ڇڏي

اسلام آباد(بيورو) پيٽرول جي اگهن ۾ گهٽتائي لاءِ پيٽروليم واري وزارت کي سمري موڪلي وئي،جنهن ۾ پيٽرول جي في ليٽر 8 رپيا 48 پئسا گهٽتائي ڪرڻ جي سفارش ڪئي وئي.ميڊيا رپورٽ مطابق اوڳرا پاران پيٽروليم جي وزارت کي موڪليل سمري ۾ پيٽرول جي اگهن ۾ 8 رپيا 48 پئسا گهٽتائي جي سفارش ڪئي وئي،جنهن کانپوءِ سمري منظور ٿيڻ جي صورت ۾ پيٽرول في ليٽر 62 رپيا 77 پئسن ۾ ملندو،جڏهن ته لائيٽ ڊيزل جي اگهن ۾ هڪ رپيو 97 پئسا،هائي اوڪٽن جي اگهن ۾ 2 رپيا 98 پئسا،في ليٽر گهٽتائي جي سفارش ڪئي وئي آهي،جنهن کانپوءِ هائي اوڪٽن 72 رپيا 68 پئسن ۾ ملي سگهندو.اوڳرا جي سمري ۾ ڊيزل ۽ هائي اسپيڊ ڊيزل جي اگهن ۾ 4 رپيا 67 پئسا ۽ ايڇ او بي سي 2 رپيا 98 پئسا في ليٽر سستو ڪرڻ جي سفارش ڪئي وئي آهي.اوڳرا جي سمري ۾ رڳو گاسليٽ جي اگهه ۾ واڌ جي سفارش ڪئي وئي آهي،جيڪو هڪ رپيو 66 پئسا في ليٽر واڌ ٿيندي.

 

گهارو ڀرسان تيز رفتار ڪار ڪلٽي، 2 نوجوان فوت،2زخمي

گهارو (رپورٽر) گهارو ڀرسان قومي شاهراهه تي سجاول کان ڪراچي ويندڙ ڪار تيز رفتاري سبب گهارو گولائي ڀرسان ڪلٽي ٿي پئي، جنهن جي نتيجي ۾ سجاول واسي نوجوان جگديش ڪمار موقع تي ئي فوت ٿي ويو، جڏهن ته ٽي ڄڻا گڊو،هريش ڪمار ۽ جهامنداس سخت زخمي ٿي پيا، فوتي نوجوان جو لاش ۽ زخمين کي رورل هيلٿ سينٽر گهارو آندو ويو جتان زخمين کي طبعي امدا ملڻ بعد ڳڻتي جوڳي حالت ۾ ڪراچي اسپتال منتقل ڪيو ويو، جڏهن ته رستي ۾ زخمن جي سٽ نه سهندي هڪ زخمي گڊو پڻ زندگي جي جنگ هارائي ويٺو، جڏهن ته ٻن زخمين کي ڪراچي اسپتال منتقل ڪيو ويو. جڏهن ته ٻنهي فوتي نوجوانن جا لاش ضروري ڪاروائي کانپوءِ وارثن حوالي ڪيا ويا. جڏهن ته ڪار مڪمل طور تباهه ٿي وئي آهي.