تازيون خبرون

Daily Archives: February 26, 2016

شادي تقريب ۾ شرڪت لاءِ ڀارتي اداڪارا جوهي چاولا ڪراچي پهچي وئي

ڪراچي( شوبز نيوز) ڀارتي اداڪارا جوهي چاولا نجي دوري تي ڪراچي پهچي وئي آهي.هميشا جيان پنهنجو پاڻ کي ميڊيا کان پري رکندڙ بالي ووڊ اداڪارا ايئرپورٽ کان سڌو پنهنجي مامي مشهور فلم اسٽار ستيش آنند جي ڪٽنب سان گڏ کين گهر رواني ٿي وئي.جوهي چاولا هڪ هفتو ڪراچي ۾ رهندي ۽ پنهنجي مائٽن جي شادي تقريب ۾ شامل ٿيندي.ياد رهي ته جوهي چاولا انهيءَ کان پهرين 3 ڀيرا پاڪستان آئي آهي،پر نجي تقريب کانسواءِ ڪنهن به تقريب ۾ شامل ناهي ٿي.

 

ڀارتي اداڪارا بپاشا باسو پاران شادي جو فيصلو

ممبئي ( شوبز نيوز) بالي ووڊ اداڪارا بپاشا باسو ۽ ڪرن سنگهه گروور جي شادءَ جون خبرون به ميڊيا جو حصو بڻجڻ لڳيون آهن.رپورٽ مطابق بپاشا باسو ۽ ڪرن سنگهه هلندڙ سال اپريل مهيني جي آخر ۾ شادي ڪرڻ جو فيصلو ڪيو آهي.ڪجهه  ڏينهن اڳ ڪرن سنگهه ۽ سندس اڳوڻي زال جينيفر ونگيٽ وچ ۾ ڇڪتاڻ جون خبرون آيون هيون،جنهن کانپوءِ  ٻنهي وچ ۾ طلاق ٿي،هاڻي ڪرن سنگهه ڪاري ٻلي بپاشا باسو سان شادي ڪري رهيو آهي.جڏهن ته بپاشا باسو به اهڙو اعلان ڪيو آهي ته اپريل مهيني جي آخري هفتي ۾ ڪرن سنگهه سان شادي ڪري رهي آهيان.

 

سريلنڪن ڪپتان لاسٿ ملنگا رٽائرمينٽ جو اشارو ڏئي ڇڏيو

ڍاڪا (اسپورٽس نيوز) سريلنڪن فاسٽ بالر ۽ ٽي ٽوئنٽي ٽيم جي ڪپتان لاسٿ ملنگا ورلڊ ڪپ ٽي ٽوئنٽي کانپوءِ رٽائرمينٽ جو اشارو ڏئي ڇڏيو.ملنگا جو چوڻ آهي ته منهنجي ريٽائرمينٽ جو وقت اچي ويو آهي ۽ ٽي ٽوئنٽي  ڪپ کانپوءِ رٽائرمينٽ تي سوچي سگهان ٿو.گذريل ڏينهن ميچ کانپوءِ ميڊيا سان ڳالهائيندي سريلنڪن ڪپتان جو چوڻ هو ته ٽيم بهترين انداز سان کيڏي رهي آهي،منهنجي خواهش آهي ته ملڪ کي ايشيا ۽ تي ٽوئنٽي ڪپ جا تحفا ڏيان،هاڻي 32 سالن جو ٿي ويوآهيان،هاڻي سوچان ٿو ته ڪرڪيٽ کان پري ٿي وڃا ۽ جيڪڏهن مان ڪنهن ميچ  ۾ زخمي ٿي پوان ٿو ته تقريبن 6 مهينا يا هڪ سال ڪرڪيٽ کان پري ٿي ويندس،انهيءَ کان بهتر آهي ته مان پهرين ئي رٽائرمينٽ جو فيصلو ڪيان.

 

ايشيا ڪپ ۾ آڄ روايتي مخالف ٽيمون پاڪستان ۽ ڀارت هڪ ٻئي جو پاڻي ڪڇينديون

ڍاڪا (اسپورٽس نيوز)تاريخ جي پهرين ٽي ٽوئنٽي ايشيا ڪپ ۾ سڀاڻي روايتي مخالف ٽيمون پاڪستان ۽ ڀارت هڪ ٻئي جو پاڻي ڪڇينديون.ميرپور اسٽيڊيم ۾ ڀارتي سورما ۽ پاڪستاني شاهين عالمي ڪپ 2015ع کانپوءِ پهريون ڀيرو ٽڪرائينديون.ٻئي ٽيمون اڄ تائين 6 ڀيرا ٽي ٽوئنٽي ۾ مقابلو ڪري چڪيون آهن،جن ۾ ڀارت 4 ڀيرا ڪاميابي ماڻي ۽ پاڪستان هڪ رڳو هڪ ڀيرو فتح حاصل ڪري سگهي،جڏهن ته هڪ ميچ بنا ڪنهن نتيجي ختم ٿي.پاڪستان جي اڳواڻي شاهد آفريدي ڪري رهيو آهي،جڏهن ته ڀارتي ٽيم جي ڪپتاني مهيندرا سنگهه ڌوني جي هٿ ۾ آهي.

 

تبديلي جي ضرورت: اصغر ملاح دادو

عوام کي چوندي ڏٺو ويو آهي ته. انصاف جي حاصلات جو صحيح طريقو دنيا جي جن ملڪن ۾ رائج آهي اتان جي عوام سهولتن سڪون امن ۽ خوشحال واري زندگي بصر ڪري رهي آهي انهن ملڪن ۽ سماج ۾ ملڪ جي ترقي ۽ عوام جي خوشحالي جا دروازا هميشه لاءِ کليل هوندا آهن جنهن سماج ۾ سرڪار ڪامورا سياستدان عوام کي انصاف ڏيڻ ۾ ناڪام ٿيندا آهن ان ملڪ ۾ رهندڙ عوام ناانصافي جي چڪي ۾ پسجندو رهندو آهي ملڪ جي عوام جي لاتعداد قربانين بعد18 فيبروري 2008ع اليڪشن ۾ سياسي پارٽين جي اميدوارن عوام سان واعدو ڪيو هوهو ڪامياب ٿي بروقت سندن جائز مسئلا حل ڪندا گذريل سالن ۾ جيڪي به جمهوري حڪومتون اقتدار ۾ آيون آهن انهن اقتدار حاصل ڪرڻ بعد بي پهچ عوام کي وساري ڇڏيو آهي اٽي لٽي ۽ اجهي جو نعرو هڻندڙ پاڪستان پيپلز پارٽي جي حڪومت کي وفاق ۽ سنڌ ۾ اٺن سالن کان حڪومت ڪري رهيا آهن پر سنڌ جي اڪثريتي عوام جنهن پ پ کي ووٽ ڏئي اقتدار ۾ پهچايو آهي ووٽ ڏيندڙ اڪثريت غريبن جي آهي انهن کي ته پيٽ گذر لاءِ اٽو ميسر نه آهي دنيا جي ملڪن ۾رياست جي طاقت ادارن جي سٺي ڪاررڪردگي تي هوندي آهي عوام جي خدمت لاءِ پابند بڻيل سرڪاري ادارا جيترا منظم ۽ مضبوط هوندا ۽ رشوت سفارش ڪرپشن کان پاڪ هوندا ته پهچ به اوتري طاقتور هوندي آهي ۽ عوام جا جائز مسئلا بروقت حل ٿيندا آهن اسان جي ملڪ جي سرڪاري ادارن ۾ مقرر ٿيل من پسند ڪامورن ۾ سالن کان لالچ ۽ ڪميشن واري رجحان سبب عوام جي جائز حقن ۽ جائز مسئلن کي ناجائز قرا ڏيندي هر دور ۾ عوام کي پريشان ڪري ڪامورا ايترو ته مجبور ڪندا رهيا آهن جو انانصافين ظالم خلاف ۽ حقن جي حاصلات لاءِ عوام احتجاج ڪرڻ تي مجبو ٿي ويندو آهي سنڌ ۾ اهو ڏينهن نه آهي جنهن ڏينهن حقن جي حاصلات لاءِ عوام احتجاج نه ڪيو هجي جن ما اڪثريت عوام جي حڪومتي وزيرن ۽ مشيرن بجاءِ چيف جسٽس آف پاڪستان کي پاڻ مرادو نوٽيس وٺڻ جي اپيل ڪندي نظر ايندا آهن.

اڪثر عوام جي ووٽن تي چونڊجي آيل نمائندن عوامي جائز مسئلن جي حل لاءِ بيروزگارن کي بنا فرق روزگار تعليم صحت بنيادي سهولتون عوام لاءِ انصاف جي بروقت حاصلات لاءِ جيڪي ڪوششون وٺڻ گهرجن ۽ بروقت سندن جائز مسئلا حل ڪرڻ گهرجن اهي نه ٿيا آهن اڌ صدي گذرڻ بعد غريب ساڳيو غريب امير ته امير ترين ٿي ويو جن مان ماني جي ڳڀي لاءِ پريشان سنڌ جي عوام جون لکين اميدون هيون اهي اميدون پوريون نه ٿيون آهن وقت جي سرڪار پنهنجي شروعاتي دور ۾ جنهن ڳالهه تي زور ڏنو هو اهو ته هو عوام کي درن تي انصاف ۽ بيروگار، تعليم يافته نوجوانن کي بنا فرق جي روزگار ڏيڻ جون ڳالهيون ڪيون هيون عوام کي چوندي ڏٺو ويو آهي ته پٽيوالي کان ويندي بالا آفيسر تائين نوڪرين جا اگهه مقرر ٿيل آهن اڪثر پڙهيل لکيل نوجوان نوڪرين لاءِ ڊگرين جا سٿا کڻي چونڊيل نمائندن جي اوطاقن ۽ سرڪاري آفيسن ۾ گهمي رهيا آهن پر وريو ڪجهه به نه آهي. سنڌ جي عوام سالن کان انصاف جي اوسيئڙي ۾ لاتعداد قربانيون ڏيون آهن انهن کي اڪثر سياستدانن تي تنقيد ڪندي ٻڌو ويندو آهي ته ووٽ ضايع ٿي ويوگذريل سالن ۾ جيترا به سرڪاري نوڪرين جا آرڊ نڪتا آهن انهن مان غريب بي پهچ تعليم يافته نوجوانن کي ڪيترو حصو مليو آهي جن کي نوڪريون مليون آهن اڪثر پئسن تي مليون آهن پر من پسند ماڻهن کي مفت به مليون آهن ڪجهه وقت ڳ سنڌ پوليس ۾آيل پوليس اهلڪارن لاءِ نوڪرين جو به اهڙو ئي حال ٿيو هزارين بيروزگار نوجوانن کان جسماني توڙي لکت واري ٽيسٽ ته ورتي وئي پر کين نوڪري ڏيڻي ئي نه هئي عوام پوليس اهلڪارن کي وردين ۾ ڊيوٽيون ڪندي ڏٺو انهن کي عوام جسماني توڙي لکت واري ٽيسٽ ڏيندي نه ڏٺو هو جيڪي چونڊيل نمائندن جا من پسند هيا يا وري ڏنو پٽ ڇٽي واري رسم تحت انهن کي نوڪريون مليو ان جي ڄاڻ عوام کي آهي هر روز پرنٽ ۽ اليڪٽرانڪ ميڊيا اڳيان اسان جي سنڌ جي عوام جو ڪرپشن ۽ ناانصافين خلاف احتجاج نه ٿيو هجي ان جي ڄاڻ سنڀي کي آهي اسان جي ملڪ جو سياسي ماحول ڪڏهن سٺو رهيو آهي ته ڪڏهن خراب رهيو آهي آمريت هجي يا جمهوريت هجي ڪهڙي به صورتحال هجي هميشه سياسي صورتحال مان فاندو سياستدانن ۽ ڪامورا شاهي کي پيو آهي ۽ نقصان سدائين هر دور ۾ عوام کي پيو آهي جيڪي من پسند ڪامورا ڪرپشن ڪن ٿا عوام احتجاج ڪري اليڪٽرانڪ ۽ پرنٽ ميڊيا تي دانهيو آهي ته جاچ ڪندڙ ادارا انهن ڪاموران ڪلارڪن سان ڏنو پٽ ڇٽي واري رسم تحت اڪثر ڏٺو ويو آهي ته جنهن ڪروڙن جي ڪرپشن ڪئي هوندي انهن سان وري اڌ اوهان کائو ۽ اڌ اسان کي کارايو واري رسم لڳي پئي آهي سنڌ جي ننڍن وڏن شهرن کان ويندي سڄي سنڌ جيان سنڌ جو مرڪزي شهر ڪراچي صوبي جو گاديءَ وارو هنڌ آهي ڪراچي ۾ اربين کريبن رپين جي سرڪاري ملڪيتن تي قبضا ٿي ويا .

تاريخي پٽ ۽ ماڳ والارجي ويا سنڌ جا روڊ رستا ۽ جبل ڍنڍون ڍورا به قبضن هيٺ اچي ويا آهن ايستائين جو درياءِ جي ٻنهي ڪپرن تي به قبضا ڪيا ويا آهن ڪير پڇڻ وارو نه آهي باقي مختلف وقتن ۾ ڪرپشن جي خلاف سيمينار ڪري عوام کي بيوقوف بڻايو ويندو آهي جيڪو اڄ نه ٿي رهيو آهي سالن کان ٿي رهيو آهي اهڙا ڪيترائي مثال موجود آهن عوام لاءِ حيرت جي ڳالهه اها آهي اسان جي ملڪ ۾ اهڙي سياسي پارٽي نه آهي جيڪا عوامي ميڙن توڙي ميڊيا اڳيان اهو چوندي هجي ته ڪرپشن خلاف ڪاروائي نه ٿيڻ گهرجي ملڪ جي سياسي پارٽين جو سالن کان مطالبو رهيو آهي ته بنا فرق ڪرپشن ڪندڙ ڪامورن سياستدانن جي خلاف ڪاروائي ڪري ملڪ ۽ عوام جو لٽيل عريبن روپيه کين کان وصول ڪيا وڃن جڏهن ڪرپشن ڪندڙن خلاف ڪاروائي ٿئي ٿي ته ساڳيا ئي سياستدان واويلا ڪن ٿا ته اها سنڌ سان ناانصافي آهي. ملڪ ۾ عوام جي پگهر جي ڪمائي ٽيڪس جي رقم عوامي پئسي سان جيڪا بنا ڊپ ڊاءِ جي راند ٿيندي رهي آهي ان جي رستا روڪ ڪير ڪندو جيڪا وقت جي ضرورت آهي عوام جو مطالبو رهيو آهي ته بنا فرق جي اهڙن ماڻهن خلاف ڪارروائي ڪري جيڪي بي قائدگين ۽ ڪرپشن ۾ ملوث آهن پر افسوس اڪثر وفاقي۽ صوبائي سرڪار جي ماتحت مخلتف کاتن جا ڪامورا ڪنهن نه ڪنهن حڪومتي شخصيت جي مرضي سان ئي مقرر ٿيل هوندا آهن جيڪا سالن کان پڇاڻن کان آجا آهن مليل معلومات مطابق عوام کي بنيادي سهولتون فراهم ڪرڻ لاءِ سنڌ جي ٻين ضلعن جيان سنڌ جي قديم ضلعي دادو ضلعي جي چئن تعلقن دادو جوهي مهيڙ خيرپورناٿن شاهه جي عوام کي بنيادي سهولتون فراهم ڪرڻ لاءِ ترقياتي ڪمن لاءِ ساليانو عريبن روپيه ملن ٿا جنهن ۾ ساليانه ترقياتي پروگرامن لاءِ ڪروڙين روپيه اينيوئل ڊولپمينٽ پروگرام لاءِ ڪروڙين روپيا ملن ٿا نشينل ڪمپني تيل ۽ گئيس بي ايڇ پي ۽ ٻيون گئس ڪمپنن پاران ساليانه ڪروڙين روپيه ملن ٿا ايم اين اي ايم پي اي فنڊ ۽ لوڪل گورنمينٽ پاران ساليانه ترقياتي فنڊن ڪروڙين روپيا ملن ٿا جيڪا رقم اربين روپيا ٿي وڃي ٿي اها رقم ڪيڏانهن وڃي ٿي جنهن جي عوام کي ڪا ڄاڻ نه آهي.

ٺڪيدارن دادو ۽ حيدرآباد پريس ڪلب اڳيان احتجاج ڪري دانهيو سنڌ جي وڏي وزير پاران دادو ضلعي ۾ ترقياتي رٿائن لاءَ 40 ڪروڙ روپيا جاري ڪرڻ کانپوءَ روڊس کاتي دادو جي ڊسٽرڪٽ روڊس انجنئير رجب علي سومرو ٽينڊر ڪلارڪ جبار شاهي پاران ٽنڊر جاري ڪرڻ ٽينڊر کولڻ کانپوءِ هاءَ ڪورٽ ۾ پٽيشن تان هٿ کڻندڙ ٺڪيدارن کان ايگريمنٽ تحت 15 سيڪڙو ڪميشن بداران 35 سيڪڙو ايڊوانس ڪميشن ڏيڻ کانپوءَ کين ٺيڪا ڏيڻ لاءَ چيو آهي ٺيڪيدار. الزام هنيو آهي ته جيڪي ضلعي ۾ تعمر ٿيل روڊ رستن اسڪيمون ٻيهر رقم ڦٻائڻ لاءِ انهن روڊ رستن جون اسڪيمون ڏنيون ويون آهن اهڙن انڪشافن باوجود من پسند ڪامورا اڄ به پنهنجي سسيٽن تي مضبوط نظر اچي رهيا آهن انهن خلاف ڪير ڪاروائي ڪندو. من پسند ڪامورا عوام جي جائز مسئلي جي حل لاءِ بنا ڊپ ڊاءِ جي صحيح جي رقم ڪميشن وٺڻ پنهنجو حق سمجهن ٿا مختلف سرڪاري کاتن جي ڪامورن سرڪاري فنڊن جي ڀينگ ڪري ڇڏي آهي سالن کان ڪرپشن ڪندڙ من پسند ڪامورن جي هٿ ۾ ايتري ته صفائي اچي وئي آهي جو ڪوڙي ڪاغذي ڪاروائي ۾ ماهر ٿي ويا آهن اهڙي ته ڪوڙي ڪاغذي ڪاروائي ڪري رقم هڙپ ڪري وڃن ٿا جنهن جي جائچ به ناممڪن بڻيل آهي وفاقي ۽صوبائي سرڪار جي ماتحت مختلف کاتن جا ڪامورا ۽ سندن عملو عوام جي جائز ڪمن تي عوام جي بهتري ۽ ڀلائي لاءِ ٿيندڙ اسڪيمن کان وٺي ملڪ جي ترقي ۽ تعمير لاءِ هر سالن ايندڙ سرڪاري فنڊن مان ڪميشن وٺڻ پنهنجو حق سمجهن ٿا ۽ رشوت کاتن جي جڙ ۾ شامل ٿي وئي آهي اڪثر انصاف ڏيندڙ ادارن جا سربراهه عملو به ڏنو پٽ ڇٽي جو واري رسم جو اڪثر شڪار ٿيل آهن ڪرپشن خلاف عوامي احتجاجن نشاندهي ڪرڻ باوجود اڪثر چونڊيل نمائنده عوام جي حقن جي مالڪي ڪرڻ بجاءِ ڪرپٽ ڪامورن جا ساٿي بڻجندا آهن ڇو ته کين جا مقرر ٿيل هوندا آهن ته پوءَ عوام جي ڪير ٻڌندو عوام جي خوش قسمتي چئجي يا بد قسمتي هر دور ۾ وفاقي صوبائي سرڪاري کاتن ۾ مقرر ٿيل اڪثر ڪامورن کي سياسي ليڊرن جي حمايت هئڻ سبب سدائين عوام جي سچ مڃڻ کان انڪار ڪيو آهي ڪرپشن ڪندڙ من پسند ڪامورن کي سياسي پٺڀرائي سبب کين خلاف اڪثر قانوني ڪاروائي ناممڪن بڻيل هوندي آهي افسوس انهي تي آهي عوام جي رت ۽ پگهر جي پورهئي مان پگهارون کڻندڙ ۽ مراعتون حاصل ڪندڙن حڪمرانن ۽ سرڪاري ملازمن ڪڏهن به پاڻ کي عوام جو خادم نه پر حاڪم سمجهيو آهي جتي حاڪم ۽ محڪوم جو سوال اچي ٿو ۽ ٻين کي زير ڪرڻ ۽ پاڻ کي زبردست سمجهڻ جي ورايت جو خاتمو نه آندو ويندو تيستائين نه ملڪ ترقي ڪندو نه وري عوام خوشحال ٿيندو نه ئي حقيقي جمهوريت قائم ٿي سگهندي

 

 

سياست جي منڊين ۾ سازشن جي گيم!!: غلام مصطفيٰ جمالي

سياست جي منڊين ۾ سازشن جي ٿيهوري جي بازار هڪ دفعو ٻيهر گرم ٿي وئي آهي.ملڪ جي هر پاسي هر ڪنڊ ڪڙڇ اندر هڪ نئي سياست جي ٿهيوري پيش ڪئي پئي وڃي.سياست جي بازار ۾ هڪ دم ايتري تيزي اچي وئي آهي جو سندرا ڇڪيا پيا وڃن.مهرا سجايا پيا وڃن.۽ انهن مهرن جي چالن تي نظرون رکيون پيون وڃن.ڪنهن حد تائين اهو چئي سگهجي ٿوته انهي منڊي ۾ تيزي صرف آصف علي رزادي جي بيان کان پوءِ آئي آهي.جيڪو بيان هر اخبارن جي زينت بڻيل آهي.اليڪن ڪمال جي ڳالهه ته اها آهي.جهڙي طرح بيان جاري ڪيو ويو آهي اهڙي طرح انهي بيان  جي باري ۾ ڪو به بيان واضع نموني سان نه ڏنو ويو آهي.اها ڳالهه پنهنجي جاءِ تي درست به آهي ته ڪن صحافين سان آصف علي زرداري غير رسمي ڳالهه ٻول ڪئي آهي.جنهن اندر جرنل راحيل شريف جي ملازمت جي واڌ جي بيان کان لاتعلقي جو اظهار پڻ ڪيو آهي.باقي بيان تي تاعيد ڪئي آهي.پر پوءِ به ڪو باقده وضاحيت بيان جاري نه ڪيو ويو آهي.پي پي پي جي مرڪزي رهمنا انهي بيان کان پوءِ مڪلمل ڪنفيوز آهن. محتره ڪائراه صاحب پهرين ته انهي  تي انڪوائري جو حڪم ڏنو مگر شايد پوءِ کيس ٻڌايو ويو ته انڪوائري ڪرڻي ناهي.پر صبر کان ڪم وٺڻو آهي.جنهن جي ڪري ان ڪجهه ڪلاڪن کان پوءِ پنهنجي انڪوائري جو حڪم واپس وٺي لاٿو.

برحال انهي بيان جو مقصد سياست جي منڊي اندر تيزي آڻڻ هو.جيڪا تيزي اچي چڪي آهي.جڏهن ته ان کان پهرين سياست جي ميدان اندر ميان نواز شريف پاران جيڪو نيب کي خلاف بيان آيو هو انهي ۾ به پڻ ڪيتري ئي تيزي اچي چڪي آهي.اهڙي طرف آصف علي زرداري جي بيان کان پوءِ ميان نواز شريف جي بيان کان به وڌيڪ تيزي اچي چڪي آهي.هاڻي سياست جي منڊي اندر هڪ هلچل پيدا ٿي چڪي آهي،.جڏهن ته سڀ کان وڌيڪ سياسي ٿهيوري سياست جي منڊين اندر ئي وڪرو ٿي رهي آهي.اهو انهي ڪري جو اهو بيان هڪ گريٽ گيم جو حصو آهي.گريٽ گيم ڇا آهي،؟هڪ سادي اها ئي گريٽ گيم آهي.ته سڀ اهو ئي چاهين ٿا ته جرنل راحيل شريف رٽائر ٿيڻ گهرجي.ڇو ته سياست جي منڊين اندر اها ڳالهه عام آهي ته ڪرپشن ۽ نيب جي ڪاروائيون انهي ايجنڊا جو حصو آهن.آئي ايس پي آر جو هڪ ٽوئيٽ ته جرنل راحيل شريف پنهنجي مدت جي واڌ ۾ ڪابه دلچسپي نه کرڻ گهرجي.اهو انهي گريڊ گيم جو حصو آهي.اهو ٽوئيٽ انهي لاءِ ڪيو ويو هو ته جئين عوام کي يقين ڏياريو وڃي ته ته جرنل راحيل شريف جا ڪي به سياسي مقصد ناهن.جڏهن ته اهو به سوال ناهي پر جڏهن اهين ناهي ته پوءِ اهو سوال گريٽ گيم جو حصو ڪيئن آهي.سازشن جي تهوري بيان ڪرڻ وارا چون ٿا ته نيب انهي گريٽ گيم جي ڪري پنهنجي ڪاروائين ۾ تيزي آڻي ڇڏي آهي.جڏهن ته انهي سموري راند مرڪزي ڪرادر پاڪستان جون اهي سياسي جماعتون ڪردار ادا ڪري رهيون آهن جيڪي پاڪستان اندر ڪرپشن جي خاتمي جو نعارو هڻي ڪري اچي ميدان ۾ لٿيون آهن.جن ۾ پاڪستان سياسي پارٽي جماعت اسلامي ۽ عمران خان صاحب جي سياسي پارٽي تحريڪ انصاف آهي.

ان ڳالهه ۾ ڪو شڪ ناهي ته جماعت سلامي انهي راند جا پراڻا رانديگر آهن.جڏهن ته جماعت اسلامي اهو چئي رهي آهي ته انهي گريٽ گيم اندر تحريڪ انصاف انهي جو حصو ناهي،جڏهن ته تحريڪ انصاف اجو علان ڪري ڇڏيو آهي ته هو مارچ اندر ڪرپشن جي خلاف تحريڪ هلائيندا.جڏهن ته حيرت جهڙي ڳالهه آهي ته آخر مارچ ۾ ئي ڇو پارٽيون تحريڪ هلائينديون آهن.ان ڪري مان سمجهان ٿو ته سياست اندر وقت کي تمام گهڻي اهميت ڏني ويندي آهي.انهي ڪري سوال اهو آهي ته ڇا جيڪا آصف علي زرداري جي بيان کان پوءِ سياسي ميدان اندر سياست جي منڊي ۾ جيڪا تيزي آئي آهي انهي جو عملي پروگرام جماعت وٽ آهي.؟ ۽ ڇا اسٽبلشمنٽ کي پنهنجي غلطي جو احساس ٿي ويو آهي.گذريل ڌرڻن اندر انهن جماعت اسلامي ۽ پي پي پي کي گريٽ گيم جو حصو بڻايو هو.انهي ڪري  هڪ طرف کان سراج الحق پنهنجي مصالحتي گيم ۽ ٻئي پاسي آصف علي زرداري پنهنجي پارليامينٽي گيم سان انهن ڌرڻن کي پنهنجي مقصد تائين پهچائڻ نه ڏنو.انهي ڪري اسٽبلشمنٽ هن دفعي گريٽ گيم به سراج الحق سان ۽ آصف علي زرداري سان ملي ڪري. پوءِ ڪري رهي آهي ان ڪري پ پ جي نيب جي حوالي سان حڪومت جي ڪنهن به ترميم جي سپورٽ نه ڪرڻ جو حڪم جاري ڪيو ويو آهي.

پوءِ گريٽ گيم ڇا آهي.انهي ڪري ڪير به نه ٿو چاهي ته ملڪ اندر ڪرپشن ٿي.انهي ڪري حڪومت ڇو انهي ڪرپشن جي رستي ۾ ڪنڊا پکيڙڻ جي چڪر ۾ آهي.ڪرپشن جي خلاف ڪم ڪرڻ وارن ادارن کي حڪومت پنهنجي مرضي سان ڪم ڪرڻ نه پئي ڏئي کين هر ڪم کان روڪيو پيو وڃي..جڏهن ته اها ڳالهه صاف آهي ته ڪيترائي وزير ڪرپشن ۾ ملوث آهن ۽ ڪيترائي مني لارنڊنگ  ۾ ملوث آهي.انهي ڪري عدالتن کي به ڪم ڪرڻ نه پيو ڏنو وڃي .انهي ڪري مان سمجهان ٿو ته ملڪ مان ڪرپشن جي خاتمي لاءِ ڪيترائي اپاءُ وٺڻ ضروري آهن.هاڻي ڇا ٿيندو انهي جو انتظار آهي.پ پ جماعت اسلامي سان گڏ هوندي ۽ عمران خان صاحب به انهن سان گڏ هوندو.انهي ڪري پ پ الخصوص ڪجهه مهينن کان وٺي.جرنل راحيل شريف خلاف هڪ مهم هلائي رهي آهي.ڇو ته پهرين پ پ جي اعتراز احسن جرنل راحيل شريف جي مدي جي واڌ جي خلاف بيان ڏنو.پوءِ خورشيد رشيد صاحب انهي به پنهنجي بيان ۾ چيو ته جرنل راحيل شريف جي مدي ۾ واڌ نه ٿيڻ گهرجي.جڏهن ته سياست ٽئي ٿهيوري اندر ميان نواز شريف هر روز اڪيلو ٿيندو پيو وڃي.۽ سياسي جماعتون جرنل شريف جي ويجهو جمع ٿيڻ جي ڪوشش ڪري رهيون آهن.ان ڪري جڏهن گريٽ گيم ٿيندي ته پارليامينٽ جي مشترڪه اجلاس اندر ڪا به اپوزيشن جماعت نه هوندي. اڪيلي سر ن ليگ جماعت سياسي طور تي تنها فيصلو ڪندي.

 

 

نيب ۽ سياستدان

قومي اسيمبلي ۾ مخالف ڌر جي اڳواڻ سيد خورشيد شاهه جو چوڻ آهي ته نيب سنڌ ۾ ڪارروائي ڪندي رهي ته ڪنهن به اعتراض نه هيو،هُن پنجاب ۾ کير سان ڌوتل ماڻهن ۾ هٿ ڇو وڌا آهن، پيپلز پارٽي ته 2008ع کان نيب کي ختم ڪرڻ جي ڳالهه ڪري رهي آهي.مضبوط مخالف ڌر مضبوط جمهوريت لاءِ آهي ، ڪمزور پارليامينٽ مان ڪمزور جمهوريت جنم وٺندي آهي.سندس چوڻ هو ته ميان صاحب ٿورو دير سان سوچيندو آهي،پيپلز پارٽي ته 2008 ع کان چوندي پئي اچي ته نيب کي ختم ڪيو ۽ ڪرپشن خلاف پارلياماني ڪميشن بڻائي وڃي،جيستائين ننڍن صوبن  ۽ ننڍن ماڻهن خلاف ڪارروائي ٿيندي رهي ته نيب سُٺي هئي،هاڻي انهن غلطيءَ سان پنجاب جي ماڻهن ۾ هٿ وڌا آهن ته نيب خراب ٿي وئي.پنجاب جا ماڻهو ته صاف ۽ پاڪ آهن،ڪرپشن رڳو ننڍن صوبن جا ماڻهو ڪند آهن،اسانکي تاريخ مان سبق وٺڻو پوندو.جيستائين رينجرز سنڌ ۾ ڪارروائي ڪندي رهي ته بهترين هئي،هاڻي پنجاب ۾ دهشتگردن خلاف ڪارروائي جو اشارو ڏنو آهي ته تڪليف ٿي رهي آهي. اسانکي ميٽرو ۽ اورينج لائين ريل تي ڪو به اعتراض ناهي ،پر جيڪڏهن انهن پئسن مان وڏا اسڪول ۽ اسپتالون ٺهن ها ته عوام جو گهڻو ڀلو ٿئي ها.

اسان جي ملڪ ۾ اهو نرالو قانون آهي ته ڪڪڙ چور ڦاهي چڙهيو وڃي ۽ اربين روپيا ڳهندڙ کي چهنڊي به نه پوي، نيب جڏهن تحرڪ ۾ آئي اهي ته پهرين صوبائي حڪومتون ان جي خلاف واويلا ڪنديون رهيون ته سياستدانن خلاف نيب ڪارروايون نه ڪري پر پارليامينٽ ۾ بحٽ مباحثا ڪرايا وڃن جئين ملي ڀڳت سان ان معاملي کي به فائين جي حوالي ڪري ڇڏجي جئين ڪو ان بابت ڳالهائي بنه سگهي، هاڻي جڏهن نيب پنهنجو رخ پنجاب طرف ڪري ڇڏيو ته وري پنجاب ۽ وفاقي حڪومت ميدان ۾ آهن ته نيب خراب آهي، ان خلاف مختلف قسمن جا الزام مڙهيا پيا وڃن مٿان وري ان خلاف جاچ ڪميٽي جوڙي پئي وڃي جئين نيب جا پر ڪتري نالي ماتر ادارو بڻائي ملڪ کي لٽڻ جو سلسلو جاري او ساري رکيو وڃي،

 

قومي صحت اسڪيم ۾ پ پ ۽ ن ليگ هڪ صف ۾ آهن: وزير اعظم

مظفر آباد (م.ڊ) وزيراعظم نواز شريف آزاد ڪشمير ۾ قومي صحت پروگرام جو افتتاح ڪري ڇڏيو، مظفر آباد ۾ ٿيل افتتاحي تقريب  کي خطاب ڪندي وزيراعظم نواز شريف چيو ته قومي صحت اسڪيم ۾ پ پ ۽ ن ليگ هڪ صف ۾ آهن، قومي صحت پروگرام جي شروعات مسلم ليگ (ن) جي منشور جو حصو آهي، هن قومي صحت پاليسي کي حڪومت لاءِ وڏو اعزاز ڪوٺيندي چيو ته اسان وڏي عرصي کان ان منشور تي ڪم ڪري رهيا هئاسين، سندس چوڻ هو ته غربت سبب بيمار ماڻهو 10-10 سالن تائين علاج نه ٿا ڪرائي سگهن، ايستائين جو اسان جي معاشري ۾ ماڻهن کي علاج ڪرائڻ لاءِ پنهنجي ملڪيت ۽ ڳهه ڳٺا به وڪڻڻا پون ٿا، وزيراعظم چيو ته الله پاڪ اسانکي توفيق ڏئي جو اسان عوام جي خدمت ڪري سگهون،حڪومت غريبن کي عزت ڀرئي طريقي سان صحت جون سهولتون ڏيڻ لاءِ ڪوششون وٺي رهي آهي، نواز شريف ملڪ مان بيماري، غربت، جهالت ۽ بيروزگاري جي خاتمي جو عزم پڻ ورجايو، تقريب ۾ آزاد ڪشمير جو وزيراعظم چوڌري عبدالمجيد، صدر سردار محمد يعقوب خان،صحت واري ملڪتي وزير سائره افضل تارڙ، مريم نواز ۽ ٻيون حڪومتي شخصيتون پڻ موجود هيون،

 

ڪنهن به خطري کي منهن ڏيڻ لاءِ سڄي طاقت استعمال ڪنداسين:آرمي چيف

روالپنڊي (م.ڊ) آرمي چيف جنرل راحيل شريف جو چوڻ آهي ته بهترين تربيت ۽ آپريشنل تياري ئي امن جي ضمانت آهي،ڪنهن به خطري کي منهن ڏيڻ لاءِ سڄي طاقت استعمال ڪنداسين.آئي ايس پي آر مطابق آرمي چيف جنرل راحيل شريف فورٽ عباس ۽ بيما ڳڙهه ويجهو پاڪ فوج جي جاري تربيتي ڪيمپ جو معائنو ڪيو.سندس چوڻ هو ته هي تربيتي ڪيمپ مشقون نئين جنگي حڪمت عملي مطابق ڪيون پيون وڃن.هوائي فوج ۽ پاڪ ايوي ايشين به حصو وٺي رهي آهي.آرمي چيف جنرل راحيل شريف هٿياربند فوج جي آپريشنل تيارين ۽ تربيتي معيار تي مڪمل اعتماد جو اظهار ڪيو ۽ چيو ڪنهن به خطري کي منهن ڏيڻ لاءِ سڀئي وسيلا استعمال ڪيا ويندا.

 

ننڍن صوبن  ۽ ننڍن ماڻهن خلاف ڪارروائي ٿيندي رهي ته نيب سُٺي هئي:خورشيد شاهه

لاهور:قومي اسيمبلي ۾ مخالف ڌر جي اڳواڻ سيد خورشيد شاهه جو چوڻ آهي ته نيب سنڌ ۾ ڪارروائي ڪندي رهي ته ڪنهن به اعتراض نه هيو،هُن پنجاب ۾ کير سان ڌوتل ماڻهن ۾ هٿ ڇو وڌا آهن، پيپلز پارٽي ته 2008ع کان نيب کي ختم ڪرڻ جي ڳالهه ڪري رهي آهي.حميد نظامي جي ڏينهن واري تقريب کي خطاب ڪندي مخالف ڌر جي اڳواڻ سيد خورشيد شاهه چيو ته مضبوط مخالف ڌر مضبوط جمهوريت لاءِ آهي ، ڪمزور پارليامينٽ مان ڪمزور جمهوريت جنم وٺندي آهي.سندس چوڻ هو ته ميان صاحب ٿورو دير سان سوچيندو آهي،پيپلز پارٽي ته 2008 ع کان چوندي پئي اچي ته نيب کي ختم ڪيو ۽ ڪرپشن خلاف پارلياماني ڪميشن بڻائي وڃي،پرجيستائين ننڍن صوبن  ۽ ننڍن ماڻهن خلاف ڪارروائي ٿيندي رهي ته نيب سُٺي هئي،هاڻي انهن غلطيءَ سان پنجاب جي ماڻهن ۾ هٿ وڌا آهن ته نيب خراب ٿي وئي.مخالف ڌر جي اڳواڻ وڌيڪ چيو ته پنجاب جا ماڻهو ته صاف ۽ پاڪ آهن،ڪرپشن رڳو ننڍن صوبن جا ماڻهو ڪند آهن،اسانکي تاريخ مان سبق وٺڻو پوندو.خورشيد شاهه جو چوڻ هو ته جيستائين رينجرز سنڌ ۾ ڪارروائي ڪندي رهي ته بهترين هئي،هاڻي پنجاب ۾ دهشتگردن خلاف ڪارروائي جو اشارو ڏنو آهي ته تڪليف ٿي رهي آهي. مخالف ڌر جي اڳواڻ سيد خورشيد شاهه وڌيڪ چيو ته اسانکي ميٽرو ۽ اورينج لائين ريل تي ڪو بهٿ اعتراض ناهي ،پر جيڪڏهن انهن پئسن مان وڏا اسڪول ۽ اسپتالون ٺهن ها ته عوام جو گهڻو ڀلو ٿئي ها.