تازيون خبرون

Daily Archives: February 25, 2016

5سال اڳ جيڪڏهن پ پ ڪو ڪم ڪري ها ته ن ليگ حڪومت اهو اڳتي وڌائي ها: پرويز رشيد

اسلام آباد (بيورو) پرويز رشيد چيو آهي ته آصف علي زرداريءَ جي آرمي چيف بيان بابت تي تبصرو نه ٿو ڪري سگهجي اهڙن ادارن تي نه ڳالهائڻ گهرجي جيڪي سياسي بيان نه ٿا ڏئي سگهن. اسلام آباد ۾ ميڊيا سان ڳالهائيندي پرويز رشيد چيو ته هنن نه آصف علي زرداري جي آرمي چيف بابت پهرين بيان تي تبصرو ڪيو ۽ نه وري هاڻي ڪجهه ڳالهائيندا. هن چيو ته پنج سال اڳ جيڪڏهن پ پ جو ڪم ڪري ها ته مسلم ليگ ن حڪومت اهو اڳتي وڌائي ها. پرويز رشيد چيو ته پاڪستان ۾ هن وقت سياسي بيان ڏيڻ جي ضرورت گهٽ ۽ عملي ڪم ڪرڻ جي وڌيڪ ضرورت آهي. هن چيو ته سرڪاري طور نيب بابت ڪميشن تي ڪي به ڳالهيون نه ڪيون ويون آهن. سندس چوڻ هو ته اهڙو بحث نه ڇيڙڻ گهرجي جنهن سان ادارن جو ڪم متاثر ٿي. پرويز رشيد چيو ته آپريشن ضرب عضب ۾ پاڪ فوج وڏيون ڪاميابيون حاصل ڪيون آهن جنهن جي سڀني واکاڻ ڪئي آهي. هن چيو ته دهشتگردي ۽ انتها پسندي جي سوچ ختم ڪرڻ جي ضرورت آهي. پرويز رشيد چيو ته مسلم ليگ ن آزاد ڪشمير جي چونڊن ۾ ڀرپور حصو وٺندي.

 

خضدار ۾ گهر اندر ڌماڪيدار مادو ڦاٽڻ سان ٻارن ۽ عورتن سوڌو 7 ڄڻا مارجي ويا

خضدار: خضدار ۾ هڪ گهر اندر ڌماڪيدار مادو ڦاٽڻ سان ٻارن ۽ عورتن سوڌو 7 ڄڻا مارجي ويا، نجي ٽي وي مطابق تعلقي نال ۾ هڪ گهر ۾ ڌماڪيدار مادو گڏ ڪيو ويو هو، جيڪو وڏي ڌماڪي سان ڦاٽي پيو، ليويز ذريعنمطابق ڌماڪي ۾ مارجي ويلن ۾ 3 عورتون ۽ ٻه ٻار به شامل آهن، جڏهن ته زخمين کي سول اسپتال خضدار ۾ داخل ڪرايو ويو آهي.

 

وڏن وڏن آمرن جو مقابلو ڪيو، ثابت ٿي ويو ته ملڪ ۾ انڌي منڊي جمهوريت به بهتر آهي: خواجه سعد رفيق

لاهور (بيورو) سعد رفيق چيو آهي ته هنن وڏن وڏن آمرن جو مقابلو ڪيو، اها ڳالهه ثابت ٿي وئي آهي ته ملڪ ۾ انڌي منڊي جمهوريت به بهتر آهي واري وفاقي وزير خواجه سعد رفيق چيو آهي ته هنن وڏن وڏن آمرن جو مقابلو ڪيو، اها ڳالهه ثابت ٿي وئي آهي ته ملڪ ۾ انڌي منڊي جمهوريت به بهتر آهي. لاهور ۾ تقريب کي خطاب ڪندي خواجه سعد رفيق چيو ته ملڪ مان جمهوريت وئي ته ملڪ ۾ ڏنڊي واري سرڪار هوندي. هن چيو ته مايوس ٿيڻ جي ڪا به ضرورت نه آهي، اهي ڏينهن پري ناهن جڏهن ڀارت کان ڪمشير حاصل ڪري پاڪستان جو حصو بڻايو ويندو. خواجه سعد رفيق چيو ته ملڪ مان دهشتگردي سميت سمورن بحرانن مان ڇوٽڪارو حاصل ڪري ملڪ کي ترقي کي راهه ڏانهن گامزن ڪيو ويندو. وفاقي وزير چيو ته هو حڪومت تي هاڪاري تنقيد جي هو آجيان ڪندا پر ناڪاري تنقيد مناسب نه آهي، ذاتي مفاد وساري ملڪ جي خدمت ڪرڻي پوندي.

 

ڌانڌليءَ ذريعي اسيمبلي ۾ ايندڙ ماڻهو ايماندار ڪيئن ٿا ٿي سگهن: عمران خان

ڪوٽلي (مانيٽرنگ ڊيسڪ) تحريڪ انصاف سربراهه عمران خان چيو آهي ته ڌانڌلي مسلم ليگ ن جي رت ۾ شامل آهي سندن ڪپتان امپائرن کي پاڻ سان ملائي چونڊن ۾ حصو وٺندو آهي. ڪوٽلي ۾ جلسي کي خطاب ڪندي عمران خان چيو ته ڌانڌليءَ ذريعي اسيمبلي ۾ ايندڙ ماڻهو ايماندار ڪيئن ٿا ٿي سگهن. هن چيو ته چوريءَ جو پئسو ملڪ کان ٻاهر منتقل ٿيندو آهي، ڪرپشن جي خاتمي کانسواءِ ڪو به مستقبل ناهي. عمران خان چيو ته جيڪا رقم تعليم تي لڳڻ گهرجي اها ٻاهر موڪلي پئي وڃي. هن چيو ته مسلم ليگ ن ۽ پ پ 6، 6 ڀيرا اقتدار جا وارا حاصل ڪيا آهن. سندس چوڻ هو ته نيب ۾ اڃا به نواز شريف تي 2 ڪيس داخل ٿيل آهن. عمران خان چيو ته نواز شريف کي خوف آهي ته جيڪڏهن سندس حڪومت وئي ته هو جيل هليو ويندو. هن چيو ته پهريون ڪرپشن ذريعي ادارا تباهه ڪيا ويا هاڻي خانگايا پيا وڃن. سندس چوڻ هو ته پاڪستان اسٽيل ملز بند آهي پر جدي ۾ نواز شريف جي ملز وڏو ناڻو ڪمائي رهي آهي. عمران خان چيو ته عوام کي احتساب قانون ۾ ٿيل ترميمن تي خدشا آهي، ڪي پي ڪي ۾ سڀ کان گهٽ ڪرپشن آهي

 

15-2013ع تائين بنا ريٽ جي 5 ارب رپين جا اشتهار جاري ڪيا ويا: رپورٽ

ڪراچي (اسٽاف رپورٽر) نيب سنڌ اطلاعات کاتي ۾ 3 ارب رپين جي ڪرپشن بابت سنڌ هاءِ ڪورٽ ۾ جواب داخل ڪرائي ڇڏيو، نيب رپورٽ ۾ ڄاڻايو ويو آهي ته شرجيل ميمڻ ۽ ٻين آفيسرن سان گڏجي بنا ريٽ مقرر ڪرڻ جي 7 ايڊورٽائيزنگ ڪمپنيز کي 5 ارب جا اشتهار جاري ڪيا، جنهن سبب سرڪار کي 3 ارب رپين جو نقصان ٿيو. سنڌ هاءِ ڪورٽ ۾ اڳوڻي صوبائي وزير شرجيل ميمڻ پاران ڪرپشن الزامن خلاف درخواست تي نيب سنڌ پنهنجو جواب داخل ڪرائي ڇڏيو آهي. نيب رپورٽ ۾ ڄاڻايو ويو آهي ته اطلاعات واري اڳوڻي صوبائي وزير شرجيل ميمڻ ۽ تڏهوڪي سيڪريٽري ذوالفقار شالواڻي ٻين آفيسرن سان گڏجي 7 ايڊورٽائيزنگ ايجنسيز کي رليز آرڊر جاري ڪرايا، جن ۾ قانوني گهرجون پوريون نه ڪيون ويون. نيب رپورٽ ۾ وڌيڪ چيو ويو آهي ته 2013ع کان 2015ع تائين ريٽ مقرر ڪرڻ کانسواءِ 5 ارب رپين جا اشتهار جاري ڪيا ويا، جنهن سبب سرڪار کي 3 ارب رپين جو نقصان ٿيو. نيب رپورٽ موجب ميڊيا جي مختلف ادارن کي سنڌ جي اطلاعات کاتي طرفان اشتهارن جي مد ۾ 2 ارب رپيا جاري ڪيا ويا، جڏهن ته باقي 3 ارب رپين جون بي ضابطگيون ٿيون.

 

نيپال جي گم ٿيل جهاز جو ڍير ملي ويو،23 مسافر اجل جو شڪار

کٽمنڊو (م.ڊ) نيپال جو ننڍو جهاز ڪري تباهه ٿي ويو، اختيارين حادثي ۾  جهاز ۾ سوار23 ڄڻن مسافرن جي فوت جي تصديق ڪري ڇڏي آهي، غير ملڪي ايجنسي مطابق نيپال ۾ جهاز خراب موسم سبب جهنگ ۾ ڪري تباهه ٿي ويو، هن کي نيپال جو ٻيو وڏو هوائي حادثو قرار ڏنو پيو وڃي، اختيارين مطابق جهاز جو ٽيڪ آف کانپوءِ ڪنٽرول ٽاور سان رابطو ختم ٿي ويو هو، جنهن کانپوءِ جهنگ ۾  هن جو ڍير مليو، مارجي ويندڙن ۾ چيني ۽ ڪويت جا شهري به شامل آهن.

 

ڪراچي جي بلديا فيڪٽري کي ڪيميڪل ذريعي ڄاڻي واڻي باهه ڏيڻ جي تصديق

ڪراچي(اسٽاف رپورٽر) ڪراچي جي بلديا فيڪٽري کي ڪيميڪل ذريعي ڄاڻي واڻي باهه ڏيڻ جي تصديق ٿي وئي آهي، ميڊيا رپورٽن مطابق بلديا فيڪٽري سانحي کانپوءِ ڪارخاني جو معائنو ڪندڙ فارنزڪ ليبارٽري ۽ انٽرنيشنل سينٽر فار ڪيميڪل اينڊ بايولوجيڪل سائنسز ليبارٽري جي ماهرن ۾ ان ڳالهه تي اتفاق ٿي ويو آهي ته فيڪٽري ۾ باهه ڪيميڪل ذريعي لڳائي وئي، ماهرن مطابق اهو ڪيميڪل فيڪٽري ۾ اڇلائڻ سان باهه ڀڙڪندي وئي ۽ ڪارخاني ۾ موجود سوين ملازم حياتي بچائڻ جي ڪوشش ۾ پنهنجي حياتي وڄائي ويٺا، ليبارٽري ماهرن پنهنجي رپورٽ ۾ چيو آهي ته واقعي واري هنڌان گڏ ڪيل نمونن مان استعمال ڪيل ڪيميڪل جو پتو ته لڳائي نه ٿو سگهجي پر ثبوتن جي مختلف ڪيميائي تجربن جي روشني ۾ اها ڳالهه سامهون آئي آهي ته باهه ڄاڻي واڻي لڳائي وئي هئي.