تازيون خبرون

Daily Archives: February 25, 2016

سنجي دت جيل مان آزاد، خاص اُڏام ذريعي ممبئي پهتو

ممبئي(شوبز نيوز) بالي ووڊ اداڪار سنجي دت کي جيل مان آزاد ڪيو ويو. ڀارتي ميڊيا مطابق 56 سالن جي اداڪار کي گذريل ڏينهن پوني شهر جي يرودا جيل مان آزادي ملي. سنجي دت کي جيل جي ٻاهران وٺڻ سندس زال انيتا ۽ ٻارن سميت ويجها دوست ۽ ميڊيا جون ٽيمون پڻ موجود هيون. پوني جي هوائي اڏي تي ڳالهائيندي هن چيو ته آزادي لاءِ ڪو آسان رستو نه آهي. بعد ۾ هو پوني مان هڪ خاص اُڏام ذريعي ممبئي روانو ٿي ويو. اداڪار کي غير قانوني طور تي هٿيار رکڻ جي ڏوهه ۾ 21 مارچ 2013ع کي ڀارت جي سپريم ڪورٽ 5 سال قيد جي سزا ٻُڌائي هئي.

 

شاهد ڪپور 35 سالن جو ٿي ويو، ڪيريئر جي شروعات سڀاش گئي جي فلم ”تال“ سان ڪئي

ممبئي(شوبز نيوز) بالي ووڊ اداڪار شاهد ڪپور 35 سالن جو ٿي ويو. 25 فيبروري 1981ع ۾ ڀارت جي گادي واري شهر ممبئي ۾ پيدا ٿيل شاهد ڪپور پنهنجي بالي ووڊ ڪيريئر جي شروعات سڀاش گئي جي فلم ”تال“ سان ڪئي، جڏهن ته هيرو طور سندس پهرين فلم 2003ع ۾ ”عشق وشق“ هئي، پنهنجي پهرين فلم ۾ بهترين ڊيبيو اداڪار جا ڪيترائي ايوارڊ حاصل ڪندڙ شاهد نه صرف اداڪاري جڏهن ته ڊانس جي شعبي ۾ پڻ بهتري ڪارڪردگي جو مظاهرو ڪيو ۽ فلم وواهه، فدا، شڪار، جب وي ميٽ سميت ڪيترن ئي فلمن ۾ اداڪاريءَ جا جوهر ڏيکاريا آهن ۽ ايوارڊ پنهنجي نالي ڪيا. گذريل سال جولاءِ ۾ شاهد ڪپور جي شادي ميرا راجپوت سان ٿي.

 

ڀارتي ٽينس اسٽار ثانيا مرزا ۽ مارٽينا هنگز عالمي رڪارڊ ٺاهڻ جي ويجهو

دوحا(اسپورٽس نيوز) ڀارتي ٽينس اسٽار ثانيا مرزا ۽ مارٽينا هنگز لاڳيتو ڪاميابين جو سلسلو جاري رکندي 41 هين ميچ تائين پهتيون.ٽاپ جوڙي ۾ هلندڙ عورتن واري ٽينس ايونٽ جي ٻئي رائونڊ کان سفر شروع ڪيو،پهرين ميچ ۾ چين جي رانديگرياڻين کي دلچسپ مقابلي ۾ 6.4 4.6 ۽ 4 .10 تان مات ڏئي ڪوارٽر فائنل ۾ جاءِ ٺاهي،هلندڙ سال ثانيا مرزا ۽ هنگز جي جوڙي اڄ تائين 4 ٽائيٽل کٽي چڪي آهي.ثانيا مرزا ۽ هنگز جي جوڙي برسبين،سڊني کانپوءِ آسٽريلين اوپن ۽ پوءِ سينٽ پيٽرزبرگ ۾ چيئمپين بڻجڻ ۾ ڪاميابي ماڻي  آهي،لاڳيتو ڪاميابين جو عالمي رڪارڊ هاڻي انهن کان 4 مچن جي مفاصلي تي آهي.1990ع ۾ جانا نووٽنا ۽ هلينا سوڪووا ڊبل فگر ۾ لاڳيو 44 ميچون کٽيون هيون.

 

ايشيا ڪپ ٽي 20 ڪرڪيٽ ٽورنامينٽ ۾ اڄ بنگلاديش ۽ يو اي اي وچ ۾ مقابلو ٿيندو

ميرپور (اسپورٽس نيوز) ايشيا ڪپ ٽي 20 ڪرڪيٽ ٽورنامينٽ ۾ (اڄ) جمعي تي بنگلاديش ۽ يور اي اي جي ٽيمن وچ ۾ شير بنگال اسٽيڊيم ميرپور ۾ مقابلو ٿيندو، تفصيل موجب ايشيا ڪپ ۾ مقابلن جو سلسلو شروع ٿي چڪو آهي. ميگا ايونٽ ۾ پنج ٽيمون ٽائٽل حاصل ڪرڻ لاءِ مقابلو ڪري رهيون آهن، جن ۾ پاڪستان، بنگلاديش، سريلنڪا، ڀارت ۽ گڏيل عرب امارات شامل آهن. پاڪستان جي ٽيم ٽورنامينٽ ۾ 2 مارچ تي بنگلاديش جڏهن ته 4 مارچ تي سريلنڪا خلاف ميچ کيڏندي، ايشيا ڪپ 6 مارچ تي ختم ٿيندو. ڀارت ۽ پاڪستان جون ٽيمون ايشيا ڪپ ۾ سڀاڻي ۽ ٽي 20 ورلڊ ڪپ ۾ 19 مارچ تي ڌرم شالا ڀارت ۾ ٽي 20 ميچون کيڏنديون. بنگلاديش ۾ ٿيندڙ ايشيا ڪپ گڏيل طور تي 13هون ۽ بنگلاديش ۾ منعقد ٿيندڙ پنجون ٽورنامينٽ آهي

 

ملڪ جو وجود، انصاف ڪڏهن ملندو: ساٿي محمد صالح ڪاتيار

ملڪ جي آفيسر شاهي ڪرپٽ سياستدانن جي ملي ڀڳت سان ملڪ ۾ ڪرپشن جي وڌڻ سان ملڪ جو وجود خطري ۽ خساري ۾ ڌڪي ڇڏيو آهي، جڏهن ته سڀني جو مستقبل ملڪ جي وجود سان جڙيل آهي، هن وقت ملڪ ۾ ڪرپشن جي ڪمال جا چرچا هلي رهيا آهن، هر ڪرپٽ پنهنجي صفائي پيش ڪندي سڀني کي نظر اچي رهيا آهن، هڪ ٻئي تي الزام هڻي پنهنجي جان آجي ڪرڻ لاءِ ڪوڙ جو سهارو وٺي رهيا آهن، اهي ڪرپشن ڪندر پنهنجي آرام ڦٽائي چڪا آهن، دنيا جا مثال آڏو رکندي ملڪ ۾ جيستائين ناانصافي جو ازالو نٿو ٿئي، حق تلفين جو خاتمو ۽ سچائي جي عنصر کي برقرار نٿو رکيو وڃي تيستائين، ترقي جو رجحان نه وڌي سگهندو، جڏهن ته ڦرلٽ ڪري عوام جي خوشحالي نه ٿي سگهي آهي، دنيا جا ملڪ اڳتي وڌي ترقي ڪندي نظر اچن ٿا، اسان وٽ ترقي جي راهه کي روڪي غير يقيني صورتحال پيدا ڪئي پئي وڃي، سڀني کي عوام جي خوشحالي لاءِ امن برقرار رکڻ لاءِ بهتر سوچ اتحاد جو مظاهرو نيڪ نيتي سان ڪرڻ گهرجي ۽ عوام دهشت وحشت جي واڌاري ڪري مونجهاري جو شڪار آهي، عوام جي بيارومددگار پاڻ کي سمجهي ٿو، اهڙي صورتحال ڪري عوام کي تحفظ غير يقيني بڻيل آهي، سياستدانن تان امان، تحفظ نه ڪرائڻ ڪري عوام جو اعتماد ختم ٿي چڪو آهي، عوام اڄ به خوف ۾ ورتل آهي، عوام جي بهتر زندگي لاءِ ترت قدم کڻي دهشت ۽ وحشت ڪندڙن مجرمن کي عوام آڏو ظاهر ڪري پردو سڀني تان کنيو وڃي جيئن ڪوبه مجرم سزا کان نه بچي سگهي، دنيا جا ملڪ ترقي لاءِ محنت جي رجحان کي وڌائي خوشحال بڻجي چڪا اهن پر اسان جي ملڪ ۾ سڀ وسيلا هوندي به ترقي نه پئي ٿئي ۽ معاشي بحران وڌڻ ڪري غربت ۾ واڌارو آيو آهي ان ڪري ملڪ خساري ۾ اچي ويو آهي، عوام خوشحالي نه اچڻ ڪري تباهي جو عنصر نمايان بڻيل آهي، جيستائين عوام لاءِ امن امان برقرار رکي سڀ وسيلا ڪتب نٿا آندا وڃن ۽ ڦرلٽ جي نظام کي تبديل نٿو ڪيو وڃي تيستائين ايندڙ نسل جو مستقبل نٿو سنوارجي سگهجي. انهي لاءِ امن هجڻ ضروري آهي.

ملڪ ۾ ڦرلٽ جي پيدا ڪيل نظام مان صرف اتحاد ايڪي سان ڇوٽڪارو حاصل ڪري سگهجي ٿو. اسان جو ملڪ آزاد ٿيڻ کان پوءِ سازشين ملڪ کي دلي تسليم نه ڪيو هو، انهن جي نسل اڄ به سازشون ڪري ملڪ ۾ غيريقيني صورتحال پيدا ڪري رکي آهي، انهن سان آفيسر شاهي جٽ بڻيل آهي، دهشت ۽ وحشت جي راڄ جو وڌڻ جو سبب انهن جو هٿ آهي، تنهن ڪريم ڪمل عوام کي تحفظ نه ملي رهيو آهي، اڃا تائين امن امان جو مسئلو نه نبري سگهيو آهي، صرف روڪٿام جون دعوائون ڪيون پيون وڃن پوءِ به امن نه ٿي سگهيو آهي، پهريا ئي کان رشوت جو ٻچ ڇٽيو ويو، جيڪو وڌي وڻ ٿي چڪو آهي، انهي غربت خساري ۾ ڌڪي ڇڏيو آهي، ملڪ کي قرض تي هلايو پيو وڃي، قرضن جا انبار کڻي به ملڪ ترقي نه ڪري سگهيو آهي، آمراڻن دورن کان سواءِ هر دفعي حڪمران دعوائون ۽ واعدا ڪندا پيا اچن اسان ڪشتو ٽوڙي ڇڏيو آهي، ملڪ جا وسيلا استعمال ڪري ترقي ۽ خوشحالي آڻينداسين، تنهن هوندي ڪشتو انهن جي هٿن ۾ موجود آهي، اسان وٽ رشوت جي خاتمي يا ضابطي لاءِ ادارا موجود آهن، اهي ادارا راشي بڻجي ناڪام آهن، پراصل رشوت جي جڙ اهي ادارا آهن،

پهريائين کان رشوت جا انداز پنهنجا پنهنجا رهيا آهن، پر هاڻ کلي عام سوديبازي ڪري واڪ وانگر ورتي وڃي ٿي، يا پهچائي وڃي ٿي، رشوت خور آفيسرن مختلف گس طريقي سان وٺڻ جا ڪري ڇڏيا آهن، سياستدان به ملي ڀڳت ڪري ڪرپشن جي لپيٽ ۾ اچي بدنام وائکا ٿي چڪا آهن، انهن ۾ مال ڪمائڻ واري سوچ جو طوق پنهنجي ڳچي ۾ وجهي ڇڏيو آهي، رشوت ڏيڻ ۽ وٺڻ ۾ ٻئي برابر جا ڏوهي آهن پر انصاف ترت نه ملڻ ڪري ڏيڻ وارو جيءُ نٿو سگهي، اهڙي عنصر هئڻ ڪري وٺڻ وارو ڪک پتي مان ارب پتي تائين پهچي چڪا اهن، اهي مال ميڙڻ واري مقابلي ۾ پوتي نه پيا وڃن انهن جا شيش محل نما گهر عوام آڏو نمايان آهن، غريب جي جهوپڙي ۾ اڄ به پاڻي ٽمي رهيو آهي، اڳ ۾ آفيسر نيڪ ايماندار چورائي پنهنجي نوڪري دوران نالو پيدا ڪرڻ جي ڪوشش ڪندا رهيا پوءِ به رشوت ٻئي طريقي سان استعمال ٿيندي هئي، گفٽ سسٽم طور انهن تائين پهچائي انهن کي راضي ڪيو ويندو هو، يا سندس گهر واري کي چورائي انهن کي ٻارن جي خرچي طور لفظ وٺي ان کي راضي ڪيو ويندو هو، جنهن سان ان آفيسر جي نيڪ نامي بچي ويندي هئي ۽ رشوت جو مال به ان جي گهر ۾ ملي ويندو هو، ان بعد ٻيو طريقو ٽيبل جي دراز ۾ آستگي سان خانو کولي نوٽ رکيا ويندا هئا، جيئن صاحب راضي ٿي ڪم ڪري ڏئي، رجسٽر جي پنن ۾ به پئسا رکي ڇڏيا ويندا هئا، جيئن ڪنهن کي خبر نه پئجي سگهي پر وقت گذرڻ سان اهي سسٽم ختم ٿي چڪا اهن، سياستدانن خدمت جو لفظ استعمال ڪري مال هضم ملڪ جو ٻيڙو ٻوڙي ڇڏيو آهي هن وقت ڪرپشن اڏوهي وانگر کائي رهي آهي جنهن ڪري غريب ماڻهو پريشان حال بڻيل آهي، هاڻ ته پئسي جي هوس سڀني کي وڌيڪ مرض ۾ مبتلا ڪري ڇڏيو آهي، اهڙي رجحان ڪري رساڪشي ۾ غريب جو جيئڻ جنجال بڻي سندس پيٽ گذر لاءِ ماحول بهتر نه ٿي رهيو آهي، غريب ڏينهون ڏينهن پوئتي امير تر امير بڻجي ويا آهن آفيسر شاهي به ڦرلٽ ۾ رڌل امير ترين خوابن جا مالڪ بڻجي ويا آهن، ان ڪري غريب تعليم ۽ صح لاءِ لاچار بڻيل آهن، اسڪول، صحت مرڪزن، اسپتالن جو انتظام بهتر نه ڪرڻ جا ذميوار سياستدان ۽ آفيسر برابر آهن، سندن ڪوڙيون دعوائون عوام آڏو ظاهر آهن، حڪمران ڪوڙ جي سهاري تي ڦرلٽ جي نظام کي واڌارو ڏيئي ملڪ کي تباهي طرف ڪري ڇڏيو آهي،

سنڌ ۾ زراعت کي هٿ وٺي ڪاپاري ڌڪ هئڻ سان هاري جي زندگي ننڍي زميندار جو گذارو ختم ڪيو ويو آهي، تعليم ۾ ڪوبه سڌارو نه اچي سگهيو آهي، تعليم معيار جو ملي ڀڳت سان هٿ وٺي بلند ڪيو ويو آهي، ٻهراڙين ۾ اسڪول بند آهن، ماستر غائب گهر ويٺي پگهارون وڏيرن جا ڪمدار اسڪول اوطاقون گدام، واڙا آهن، ان لاءِ اڃا تائين ڪي به موثر قدم نه کنيا ويا آهن اهڙي تعليمي صورتحال ۽ تعليم جو به خاتمو ڪري وڏيرن جي سوچ کي تقويت ڏني وئي آهي، صحت لاءِ به موثر انتظام نه ڪيا ويا آهن، اسپتالن جي حالت زار بڻيل آهي، اسپتالن تائين ٻهراڙين کان پهچندي موت جي حوالي ٿي وڃن ٿا، ٻهراڙين ۾ رٿابندي سان ڪي به صحت مرڪز نه ٺهرائي ڏنا ويا آهن، ٻهراڙي جي عوام اڄ تعليم ۾ پوئتي ۽ بيمارين جي ور چڙهي ويا آهن آفيسر شاهي جا ٻار ڦرلٽ مان پئسو ڪمائي رهيا آهن، غريب جو ٻار کي نه بهتر تعليم صحت لاءِ بندوبست ڪيو ويو آهي، سٺي حڪمراني ڪندڙن ۽ حقيقي جمهوريت آڻڻ ۽ ملڪ کي بچائڻ وارن کي خاندان سميت خاتمو آندو ويو آهي، آمرن دوران جي آمراڻيون روشون عوام کي ياد رهڻ کپن، جيئن وري هڪ ڀيرو استحصالي طبقا عوام کي ڏاڍ طرف ڪري منهن ۾ نه وجهي ڇڏين، سامراجي قوتون پاڪستان کي يرغمال بڻائي پنهنجي هڪ هٽي رکي سگهن ٿا، ملڪ جي وجود کي بچائڻ لاءِ سڀني کي درست رستو اختيار ڪرڻ گهرجي، ملڪ ڳنڀير حالتن مان گذري رهيو آهي، ملڪ کي تباهي کان بچائي ايندڙ نسل جو مستقبل سنوارڻ لاءِ ڪوشسون ورتيون وڃن ته بهتر امن ٿي سگهندو ۽ سازشين جا حربا ختم ٿي ويندا.

ملڪ مالا مال آهي سڀ وسيلا ڪتب آڻي سگهجن ٿا نيڪ نيتي جو عمل هجڻ گهرجي، جنهن سان ملڪ اهڙي صورتحال مان نڪري سگهندو ۽ ترقي ۾ اڳتي وڌي سگهي ٿو ملڪ ۾ دهشت وحشت کي اڀاري ڀٺڀرائي ڪري تقويت ڏني پئي وڃي عوام ۾ خوف پيدا ڪيو پيو وڃي جنهن سان معاشي ڪاروبار کي ڇيهو پهچي رهيو آهي، غير ملڪي پنهنجو سرمايو نه لڳائي رهيا آهن، جنهن سان معاشي نقصان ٿي رهيو آهي امن امان مڪمل برقرار ٿي سگهيو آهي، ملڪ ۾ امن امان برقرار تڏهن ٿي سگهندو جڏهن سڀ ڌريون نيڪ نامي جي عمل مان گذري گڏيل ڪوشسون وٺي اڳتي عمل سان وڌڻ گهرجي، ان ۾ ڪنهن سان به حق تلفي نه ٿيندي، انصاف جو پلڙو ڀاري ٿيندو، ۽ سڀني سان انصاف برابر هئڻ گهرجي، ڪرپٽ معاشري مان ملڪ کي بچائڻ لاءِ ڪرپشن جو خاتمو ضروري آهي، اهڙا ترت اقدام ڪيا وڃن جنهن سان ملڪ جو جوجود برقرار رهي ۽ ڪرپشن کي ٻنجو ڏيئي سسٽم تبديل ڪيو وڃي جنهن سان ڏوهن ۾ ڪمي اچي سگهي ٿي ۽ ڏوهارين کي گرفت ۾ آڻي سزا لائق بڻائي سگهجي ٿو، دهشت وحشت جي راڄ جي پٺڀرائي ڪندرن جو خاتمو اچي ويندو، بهتر قدمن کڻڻ سان بغير رعايت جي امن برپا ٿيڻ سان ملڪ غربت جي خساري مان نڪري خوشحالي طرف گامزن ٿيندو، ايندڙ نسل جو مستقبل روشن ٿيندو، انصاف جو پلڙو ڀاري رهندو.

 

 

 

وري هڪ نئون يو ٽرن!: شفيق شاڪر

هونئن ته پاڪستان ۾ سياستدانن طرفان يو ٽرن اختيار ڪرڻ جو ڏانء ڪا نئين ڳالھ ناهي.عمران خان، الطاف حسين ۽ نوازشريف ان معاملي ۾ هڪ شاندار ريڪارڊ رکن ٿا پر تازو اڳوڻي صدر آصف علي زرداري صاحب هڪ بيان ڏيئي سڀني کي حيرت ۾ وجھي ڇڏيو آهي.سندس تازي تحقيق مطابق فوج پاڪستان مان دهشتگردي ختم ڪرڻ جي جدوجهد ۾ شاندار قربانيون ڏنيون آهن. ڪراچيء ۾ ڀتاخورن جيڪا عظيم سازش سٽي هئي،فوج انهيء سازش کي ناڪام بنائي حالتون بهتر بنايون آهن.هن جنرل راحيل شريف جي رٽائرمينٽ جي اڳواٽ اعلان تي به مايوسيء جو اظهار ڪندي چيو ته انهيء اعلان سان قوم ۾ مايوسي وڌندي. دهشتگرديء جي جنگ کي منطقي انجام تائين پهچائڻ لاء فوجي قيادت جو تسلسل ضروري آهي.ٻين لفظن ۾ جنرل راحيل شريف کي رٽائر نه ٿيڻ گھرجي. هن فوجي قيادت کي پنهن جي جماعت جي طرفان مڪمل ساٿ ۽ سهڪار جو يقين ڏياريو ۽ ماڻهن خاص طور تي ميڊيا کي صلاح ڏني ته اهي موجوده بحراني ۽ سنجيده صورتحال ۾ ذميداريء جو مظاهرو ڪندي اهڙين خبرن کان پاسو ڪن جن سان غلط فهميون وڌن. هن سياسي قيادت يعني موجوده حڪمرانن کي به مشورو ڏنو ته اهي به ملڪ ۾ جاري آپريشن جي حوالي سان ذميداريء وارو رويو اختيار ڪن.اهڙي طرح هن پاڪستاني فوجي قيادت جي تدبر،بهادري،جرئت ۽ همت جا ڪئين قصيدا به ڳايا آهن.اها ساڳي فوج آهي جنهن جي باري ۾ هو ڪجھ مهينا اڳ چارج شيٽ جاري ڪري رهيو هو ۽ ساڻن ماضيء جا سڀ حساب چڪتو ڪرڻ جون تنبيهون ڪري رهيو هو ۽ ملڪ جي سر سان سر وڄائڻ جون ڌمڪيون ڏيئي رهيو هو.

بدقسمتيء سان پاڪستاني سياستدانن جي اڪثريت جي اڄ حالت انهن سڪل پنن جيان بڻجي ويئي آهي جن کي حالتن جو واچوڙو جيڏانهن اچيس ٿو تيڏانهن اڏائي رهيو آهي ۽ وقت جو وهڪرو جيڏانهن چاهي اوڏانهن وهائي وڃي ٿو.پنهن جي ان ناقدري،بي وقعتي ۽ بي حيثيتيء جا هو تمام گھڻي ڀاڱي پاڻ ذميوار آهن جو اصولن جي سياست جڏهن کان عظيم قومي مفاهمت جي گھاڻي ۾ پيسجي ويئي تڏهن کان پاڪستاني جمهوريت جو رهيل سوجھرو به چٽ ٿي ويو. جڏهن سياسي حڪومتون هوندي به عوام جنرل راحيل شريف جون وڏيون وڏيون تصويرون روڊن ۽ رستن تي سجائي رهيو هو ته حڪمرانن جي لاء اهو وڏي فڪر ۽ ڳڻتيء جو لمحو هئڻ گھربو هو، پنهن جن روين ۽ پاليسين جو جائزو وٺڻ جي ضرورت هئي،عوام جو سياسي ادران تي ويساھ بحال ڪرڻ جو جوڳو بندوبست ڪرڻ گھربو هو پر ان جي ابتڙ اهي وڌيڪ پستين جي طرف وڌندا ويا،پنهن جو گھربل ڪم ڪرڻ بدران انا جي کول ۾ پناھ ڳولهيندا رهيا ۽ انتظامي معاملن کي بهتر گورنس جي ذريعي پنهن جي ڪنٽرول ۾ رکڻ بدران انهن محاذ آرائيء جو رستو ورتو، اهو سمجھڻ سواء ته محاذ آرائيء جو اهو رستو عوام ۾ سندن ئي خلاف منفي سوچن کي آسمان تي پهچائي ڇڏيندو ۽ ٿيو به ايئن جو اڄ عوام ۾ ڪو به انهن جي بربادين تي ماتم ڪرڻ وارو نه رهيو آهي ۽ انهن سان ٿيل هر سلوڪ تي تاڙيون وڄائڻ وارا ته کوڙ آهن پر ڪو افسوس ڪرڻ وارو ناهي.هاڻي سوال اهو ٿو پيدا ٿئي ته جناب زرداري صاحب اوچتو اهو يو ٽرن ڇو ورتو؟  ان لاء انهن معاملن تي به نظر رکڻ ضروري آهي ته زرداري صاحب کي فوج جي خلاف اهڙا سخت بيان ڏيڻ جي ضرورت ڇو پيش آئي؟ جيڪا حقيقت هاڻي لڪيل نه رهي ته ان مزاحمتي موقف ۾ ڪا اصولي جنگ نه پر صرف پنهن جن ويجھن کي جيڪي ڪرپشن جي ڪيسن ۾ ادارن کي گھربل هئا انهن کي حوالي ڪرڻ کان صريح انڪار هو جنهن ڪري اها سخت صورتحال پيدا ٿي.جنهن کان پوء هڪ ڊگھي عرصي تائين نوازشريف تي به زرداري صاحب طرفان اهو مستقل دٻاء هو ته هو طاقتور حلقن سان ڳالهائي انهن کي ان مهم کان روڪي.ذريعن موجب نواز شريف طرفان بار بار زرداري صاحب کي اهي دلاسا به ڏنا ويا ته هنن کي وقت ڏنو وڃي ته هو ڪنهن طرح طوفان جو رخ موڙي وٺن پر ايئن نه ٿي سگھيو.طوفان جو رخ زرداري صاحب کان موڙڻ جي جاکوڙ الٽو اثر ڏيکاريو جو ان طوفان جو رخ  خود نوازشريف ڏانهن ٿي ويو. ان نازڪ صورتحال ۾ آخر نواز شريف زرداري صاحب مان هٿ ڪڍندي کيس پنهن جي ڪوشش پاڻ ڪرڻ جو مشورو معذرت واري انداز ۾ پيش ڪري ڇڏيو.جنهن کان پوء زرداري صاحب جون ملڪ کان ٻاهر ۽ اندر سرچاء لاء بيڪ ڊور ڊپلوميسيء واريون ڪوششون جاري رهيون تنهن هوندي به انهن جو ڪو خاطرخواه نتيجو نڪري نه سگھيو. ڪنهنآئيني ۽  قانوني اٽڪلن ذريعي به احتساب واري عمل کي روڪڻ جون ڪوششون ڪيون وييون جيڪي به ڪارگر نه ٿي سگھيون، ڌ مڪين ۽ انتباهن جو انداز به اپنايو ويو پر بي سود ثابت ٿيو. آرمي چيف جي مدت ملازمت ۾ واڌ جي حوالي سان مختلف بيان جاري ڪري موجوده آپريشن  کي تڪراري بنائڻ جي به پوري ڪوشش ڪئي ويئي پر آرمي چيف طرفان ان معاملي ۾ اڳواٽ ڪيل وضاحت کان پوء اهو معاملو به اڳتي وڌي نه سگھيو.انهن حالتن ۾ موجوده پي پي پي قيادت وٽ پنهن جي ڪيل سموري سياسي نقصان جي باوجود احتساب کان بچڻ جو ڪو آپشن باقي نه بچيو هو.سو جيڪر جناب آصف علي زرداري واقعي اهو بيان جاري ڪيو آهي جيئن ميڊيا جي هڪ وڏي حصي ۾ رپورٽ ٿيو آهي ته پوء انهيء کي مٿين سڄي صورتحال جي تناظر ۾ ڏسڻ بعد ان جا ٽي نتيجا ئي ڪڍي سگھجن ٿا.پهريون اهو ته عسڪري قيادت کي اهو پيغام ڏنو ويو هجي ته جيڪر ڪن به سببن ڪري موجوده نواز حڪومت قابل قبول نه رهي آهي ته پوء سندس پارٽيء جون خدمتون متبادل جي طور تي حاضر آهن.ٻيو اهو نتيجو ڪڍي سگھجي ٿو ته پنهن جي پراڻي روش ۽ تلخ بيانن سبب عسڪري قيادت سان جيڪا ڇڪتاڻ واري صورتحال پيدا ٿي آهي انهيء تي معزرت ڪندي لاڳاپن کي ٻيهر بهتر بنايو وڃي ته جيئن ٻئي طرف کان احتساب جي عمل ۾ ڪا نرمي حاصل ڪري سگھجي.ٽيون نتيجو اهو به ڪڍي سگھجي ٿو ته آرمي چيف جي کليل حمايت ۽ سندس مدت ملازمت واري اشوء کي وري بحث جو موضوع بنائي نواز حڪومت کي ڪنهن محاذ آرائيء واري رويي طرف ڌڪجڻ تي مجبور ڪجي.اهو به ٿي سگھي ٿو ته ته هڪ ئي تير سان اهي ٽيئي شڪار هڪ ئي وقت ڪرڻ جي راند کيڏي ويئي هجي!اهم سوال اهو آهي ته اهو داء ڪهڙي به مقصد سان کيڏيو ويو هجي پر ڇا انهيء جي نتيجي ۾ موجوده پي پي قيادت کي ڪو رليف ملي سگھندو؟انهيء سوال جو صحيح جواب ته ايندڙ وقت ئي ڏيندو پر حالتون  جنهن منظرنامي طرف واضح اشارو ڪري رهيون آهن تنهن ۾ اهڙي اسپيس تمام گھٽ نظر اچي رهي آهي.تازي بيان جو هي تير ڪنهن نه ڪنهن کي گھائل ڪرڻ لاء ترڪش مان نڪري چڪو آهي. وقت ئي ٻڌائيندو ته ان جي نتيجي ۾  ڪير ٿو گھائل ٿئي ، ڪنهن ٻئي جو دامن يا پنهن جو ئي  ستايل سينو!

ٻئي طرف سنڌ ۾ پنهن جي صوبائي احتساب ڪميشن قائم ڪرڻ جي حوالي سان قانوني صلاح مسورا سنجيدگيء سان جاري آهن جنهن جي قيام کان پوء مرڪزي ۽ صوبائي احتساب ادارن جي وچ ۾ نئين ڇڪتاڻ شروع ٿيڻ واري امڪان کي به نظرانداز ڪري نٿو سگھجي.هوڏانهن نواز حڪومت لاء به مشڪلاتون گھٽجڻ بدران ڏينهون ڏينهن وڌي رهيون آهن جو نيب جي پرن ڪٽڻ يا ننهن سنوارڻ جي حوالي سان طيء ڪيل سڀ منصوبا سياسي صورتحال ۾ ڪنهن ٿڌ جو سبب بنجڻ بدران وڌيڪ گرمي پيدا ڪري سگھن ٿا. هي پٽڪو بچايو تحريڪ ڪيترو ٿي ڪامياب ٿئي انهيء جون اميدون خود انهيء تحريڪ جي سالارن کي به گھٽ نظر اچن ٿيون تنهن هوندي به ڪوبه پنهنجي پوزيشن ايتري آسانيء سان تبديل ڪرڻ لاء راضي نه ٿيندو.ان راند جو انت ڇا ٿو ٿئي، ڪجھ چئي نٿو سگھجي پر اها ثابت ٿيل حقيقت آهي ته اجائي ضد جو نتيجو هميشه ڪنهن الميي جي صورت ۾ ئي ظاهر ٿئي ٿو!

******

 

 

تي اتر وزيرستان ۾ دهشتگردن خلاف آپريشن جو آخري مرحلو شروع

آرمي چيف جنرل راحيل شريف جي هدايتن تي اتر وزيرستان ۾ دهشتگردن خلاف آپريشن جو آخري مرحلو شروع ٿي ويو آهي، بقول آرمي چيف جنرل راحيل شريف جي ته قوم سان دهشتگرديءَ جي خاتمي واعدو پورو ڪيو ويندو. گذريل ڏينهن آرمي چيف جنرل راحيل شريف اتر وزيرستان جو دورو ڪري آپريشن ضرب عضب جو آخري مرحلو شروع ڪرڻ جي هدايت ڪئي. آءِ ايس پي آر موجب پاڪ فوج جي سپهه سالار شوال جي دوري دوران پاڪ فوج جي جوانن ۽ آفيسرن سان ملاقات ڪئي آهي. دوري دوران آرمي چيف جنرل راحيل شريف کي آپريشن ضرب عضب ۾ اڳڀرائي تي بريفنگ ڏني وئي. کيس آگاهه ڪيو ويو ته دتا خيل کان اڳتي ۽ شوالن جي گهاٽن ٻيلن ۾ دهشتگردن جا ٿاڪ آهن. بريفنگ ۾ چيو ويو ته گهاٽن ٻيلن کي دهشتگرد پاڪستان ۽ افغانستان ۾ اچ وڃ لاءِ استعمال ڪندا آهن. ان موقعي تي آرمي چيف جنرل چيو ته دهشتگردن خلاف آپريشن جو آخري مرحلو شروع ڪري سندن مددگارن جو به خاتمو آندو وڃي. پاڪ فوج جو عزم بلند آهي، جلد دهشتگردن جو خاتمو ڪيو ويندو. دهشتگردن کي اڪيلو ڪري سندن مددگارن سان رابطو ختم ڪيو وڃي. امن دشمنن جو گهيرو تنگ ڪيو وڃي. پاڪ فوج جي جوانن جي قربانين کي ضايع ٿيڻ نه ڏنو ويندو.

شايد آرمي چيف جنرل راحيل شريف پنهنجي مقرر مدي ۾ رٽائر ٿيڻ کان اڳ پنهنجا ڪيل واعدا پاڙي عوام کي امن جو تحفو ڏئي وڃڻ چاهي پيو، ڇو جو سندس دور ۾ شروع ڪيل آپريشن پوري ملڪ ۾ تيزي سان جاري آهن ۽ گهڻي ڀاڳي امن بحال به ٿي چڪو آهي جيڪو پرويز مشرف جي دور ۾ هڪ خواب پئي لڳو، هاڻي آپريشن جو اخري مرحلو به شروع ٿي ويو آهي ٿي سگهي ٿو موجوده آرمي چيف پنهنجي مدي ۾ اهو سڀ ڪجهه ڪري ڏيکاري جنهن جي عوام کائنس اميد رکي ويٺل آهي.

عوامي مطالبو آهي ته آرمي چيف جنرل راحيل شريف کي پنهنجي مقرر مدي تي رٽائر ٿيڻ بدران مدي ۾ واڌ وٺي جئين سندس دور ۾ شروع ڪيل دهشتگردي خلاف آپريشن پنهنجي متقي انجام تائين پهچي سگهي، ۽ هئڻ به ائين گهرجي ته جيڪا لاٽ آرمي چيف جنرل راحيل شريف ٻاري آهي اها ٻرندي رهي ۽ ان بعد ايندڙ پاڪ فوج جو نئون سپهه سالار به ان لاٽ کي جاري ساري رکي، هن وقت عوام ۾ آرمي چيف لاءِ وڌندڙ محبت عيوض آرمي چيف پنهنجي مدي ۾ واڌ وٺي ته سڀ کان بهتر جي نه اهو پنهنجي مقرر مدي ۾ رٽائر ٿئي ٿو ته به سندس نالو تاريخ ۾ سونهري اکرن ۾ لکيو ويندو ڇو ته هن پاڪ فوج جي وڃايل ساک کي به بحال ڪيو ۽ عوام کي امن ڀريو پاڪستان ڏنو آهي ۽ مقرر مدي ۾ رٽائر ٿيڻ سان به سندس مان ۾ واڌارو ٿيندو ۽ سينيارٽي جي حصاب سان سينيئر پاڪ فوج جو آفيسر اچي واڳ سنڀاليندو جيڪو به سٺو سنوڻ هوندو.

 

پاڪ فوج پاران اتر وزيرستان ۾ دهشتگردن خلاف آپريشن جو آخري مرحلو شروع ڪرڻ جو اعلان

اُتروزيرستان (مانيٽرنگ ڊيسڪ) آرمي چيف جنرل راحيل شريف جي هدايتن تي اتر وزيرستان ۾ دهشتگردن خلاف آپريشن جو آخري مرحلو شروع سندس چوڻ آهي ته قوم سان دهشتگرديءَ جي خاتمي واعدو پورو ڪيو ويندو.آرمي چيف جنرل راحيل شريف اتر وزيرستان جو دورو ڪري آپريشن ضرب عضب جو آخري مرحلو شروع ڪرڻ جي هدايت ڪئي. آءِ ايس پي آر موجب آرمي چيف جنرل راحيل شريف شوال جي دوري دوران پاڪ فوج جي جوانن ۽ آفيسرن سان ملاقات ڪئي آهي. آءِ ايس پي آر موجب دوري دوران آرمي چيف جنرل راحيل شريف کي آپريشن ضرب عضب ۾ اڳڀرائي تي بريفنگ ڏني وئي. آرمي چيف کي آگاهه ڪيو ويو ته دتا خيل کان اڳتي ۽ شوالن جي گهاٽن ٻيلن ۾ دهشتگردن جا ٿاڪ آهن. بريفنگ ۾ چيو ويو ته گهاٽن ٻيلن کي دهشتگرد پاڪستان ۽ افغانستان ۾ اچ وڃ لاءِ استعمال ڪندا آهن. ان موقعي تي آرمي چيف جنرل راحيل شريف چيو ته دهشتگردن خلاف آپريشن جو آخري مرحلو شروع ڪري سندن مددگارن جو به خاتمو آندو وڃي. هن چيو ته پاڪ فوج جو عزم بلند آهي، جلد دهشتگردن جو خاتمو ڪيو ويندو. سندس چوڻ هو ته دهشتگردن کي اڪيلو ڪري سندن مددگارن سان رابطو ختم ڪيو وڃي. آرمي چيف جنرل راحيل شريف چيو ته امن دشمنن جو گهيرو تنگ ڪيو وڃي. هن چيو ته پاڪ فوج جي جوانن جي قربانين کي ضايع ٿيڻ نه ڏنو ويندو.

 

پناهگيرن جي واپسي لاءِ افغان حڪومت بهتر ۽ پــُرامن ماحول فراهم ڪري: نواز شريف

اسلام آباد (بيورو) وزيراعظم سان ڀارتي هاءِ ڪمشنر گوتم بمباوالــَي ۽ افغان پارليامينٽ جي اسپيڪر ڌار ڌار ملاقاتون ڪيون، نواز شريف جو چوڻ آهي ته پاڪستان ۽ ڀارت وچ ۾ بهتر لاڳاپن مان عوام هڪ جيترو فائدو حاصل ڪري سگهي ٿو، پناهگيرن جي واپسي لاءِ افغان حڪومت بهتر ۽ پــُرامن ماحول فراهم ڪري. پي ايم هائوس اسلام آباد ۾ وزيراعظم نواز شريف سان ڀارتي هاءِ ڪمشنر گوتم بمباوالــَي ملاقات ڪئي. ملاقات دوران پاڪ-ڀارت لاڳاپن ۽ ٻين معاملن تي خيالن جي ڏي وٺ ڪئي وئي. ان موقعي تي وزيراعظم چيو ته پاڙيسري ملڪن سان سٺا لاڳاپا پاڪستان جي پاليسي جو حصو آهي. نواز شريف چيو ته پاڪستان ۽ ڀارت وچ ۾ سٺن لاڳاپن سان ٻنهي ملڪن جو عوام هڪ جيترو فائدو حاصل ڪري سگهي ٿو. ان موقعي تي ڀارتي هاءِ ڪمشنر پاڪ –ڀارت لاڳاپن ۾ بهتري لاءِ وزيراعظم جي ڪردار جي تعريف ڪئي. ان کان اڳ وزيراعظم نواز شريف، افغان پارليامينٽ جي اسپيڪر عبدالرئوف ابراهيمي ملاقات ڪئي. ملاقات ۾ ٻطرفن لاڳاپن ۽ دهشتگردي سميت خطي ۾ امن امان جي صورتحال تي خيالن جي ڏي وٺ ڪئي وئي. وزيراعظم چيو ته پاڪستان افغانستان سان ڀائپي وارن لاڳاپن کي تمام گهڻي اهيمت ڏئي ٿو. وزيراعظم افغانستان کي بنيادي ڍانچي جي ترقي ۾ سهڪار جي آڇ ڪئي ۽ افغان حڪومت جي طالبان سان ڳالهين جي فيصلي کي وڏي اڳڀرائي قرار ڏنو. نواز شريف چيو ته طالبان سان ڳالهين لاءِ 4 ملڪي گروپ بهتر نموني اڳڀرائي ڪري رهيو آهي، جڏهن ته پاڪستان افغان امن عمل جي ڪاميابي لاءِ سٺو ڪردار ادا ڪري پيو. وزيراعظم چيو ته پاڪستان افغانستان سان جامع ۽ جٽادار پارٽنرشپ جو خواهشمند آهي، ڪابل حڪومت سان سڪيورٽي، واپار ۽ معاشي ترقي لاءِ سهڪار وڌڻ گهـُرجي. ان موقعي تي عبدالرئوف ابراهيمي افغان پناهگيرن جي 30 سالن تائين ميزباني تي پاڪستان جو ٿورا مڃيا

 

پاڪستان کي ڪرپشن ۽ بدعنواني تباهه ڪيو، انهن براين کي ختم ڪرڻ بنا ملڪ ترقي نٿي ڪري سگهجي: صدر ممنون حسين

اسلام آباد (بيورو) پاڪستان جي صدر ممنون حسين چيو آهي ته موجوده حڪومت جي گذريل اڍائي سالن جي عرصي ۾ قومي معيشت بهتر ٿي آهي جنهن جي عالمي مالياتي اداري به تصديق ڪئي آهي مٽا سٽا ناڻي جي ذخيرن ۾ اضافو ٿيو آهي ۽ ملڪ ۾ اقتصادي ترقي جو  عمل تيزي سان جاري آهي صدر ممنون حسين اها ڳالهه تحقيقات اسلامي ادارو، اسلامي يوينورسٽي اسلام آباد جي اهتمام هيٺ اسلامي بئنڪاري ۽ فنانس جي عنوان تي خطاب ڪندي ڪئي صدر ممنون حسين چيو ته پاڪستان کي ڪرپشن ۽ بدعنواني تباهه ڪيو انهن براين کي ختم ڪرڻ بنا ملڪ ترقي نٿو ڪري سگهي ان ڏس ۾ اسان سڀني کي پنهنجو ڪردار ادا ڪرڻ گهرجي هن چيو ته ماضي ۾ لوڊشيڊنگ جي خاتمي جي ڪائي سنجيده ڪوشش ناهي ڪئي ويئي ڪالاباغ ڊيم کي تڪراري بڻايو ويو جڏهن ته رينٽل پاور جهڙا منصوبا شروع ڪيا ويا جن ۾ ڪرپشن ۽ بدعنواني وڏي پئماني تي ڪئي ويئي پي آءِ اي جهڙي قومي ادارن ۾ وڏي پئماني تي اضافي ڀرتيون ڪري ان کي تباهي جي ڪناري تي پهچايو ويو صدر چيو ته ماضي ۾ تعليم ڏانهن ڀرپور ڌيان ڏنو ويو هاڻي ضرورت ان ڳالهه جي آهي ته قوم کي اعليٰ تعليم جا موقعا فراهم ڪيا وڃن ته جيئن ملڪ ترقي ڪري جيئن اسان موجوده دور جي تقاضائن سان جهڙي سگهون صدر چيو ته جن قومن ماضي ۾ اسان کان ترقياتي منصوبا وٺي پنهنجي ترقي جي شروعات ڪئي اهي اسان کان اڳتي نڪري ويون آهن هن چيو ته موجوده دور ۾ معيشت کي سياست تي اهميت حاصل آهي جڏهن ته ٻه ڏهاڪا اڳ سياست کي معيشت تي برتري حاصل هوندي هئي ان مان اندازو لڳائي سگهجي ٿو ته معيشت جي اهميت ڪيتري قدر وڌي ويئي آهي. هن چيو ته اسان جا تعليمي ادارا فعال ۽ متحرڪ ڪردار ادا ڪري رهيا آهن صدر چيو ته حڪومت قائداعظم جي ان فرمان تي يقين رکي ٿي ته دنيا ۾ رائج اقتصادي نظام اسان جي عوام جي ترقي ۽ خوشحالي جو ضامن نه آهي عوام جي ترقي انهيءَ صورت ۾ ممڪن ٿي سگهي ٿي جڏهن اسان اسلامي تعليم ۽ سماجي انصاف کي عام ڪري پنهنجي قسمت پاڻ ٺاهيون ۽ دنيا آڏو هڪ منصفاڻو معاشي نظام مربوط شڪل ۾ پيش ڪيون مون کي اميد آهي ته مستقبل ۾ پيش ايندر مسئلن جو حل پيش ڪري نه صرف اسان ڪامياب ٿينداسين پر اسلامي مالياتي نظام جي ڪاميابي جو رستو به گهڙي سگهنداسين سيمينار کي پروفيسر ڊاڪٽر معصوم ياسين زئي، ڊائريڪٽر بين الاقوامي اسلامي يونيورسٽي پروفيسر ڊاڪٽر يوسف احمد الدرويش، صدر بين الاقوامي اسلامي يوينورسٽي، ڊاڪٽر سعيد احمد، ڊپٽي گورنر اسٽيٽ بئنڪ آف پاڪستان ۽ مولانا مفتي محمد رفيع عثماني پڻ خطاب ڪيو.