تازيون خبرون

Daily Archives: February 19, 2016

پ پ وفد آدمشماريءَ بابت اي پي سي لاءِ رابطا مهم شروع ڪري ڇڏي، نائين زيرو جو دورو، متحده کي شرڪت جي دعوت

ڪراچي (اسٽاف رپورٽر) پيپلز پارٽيءَ جي وفد آدمشماريءَ بابت اي پي سي لاءِ رابطا مهم شروع ڪري ڇڏي. سندن وفد نائن زيرو جو دورو ڪري ايم ڪيو ايم کي اي پي سي ۾ شرڪت جي دعوت ڏني آهي.صوبائي وزير ناصر شاهه، وقار مهدي ۽ نجمي عالم ايم ڪيو ايم جي مرڪز نائن زيرو جو دورو ڪري کين آل پارٽيز ڪانفرنس ۾ شرڪت جي دعوت ڏني.پ پ ۽ ايم ڪيو ايم اڳواڻن ۾ ملاقات دوران سنڌ ۾ امن امان ۽ ملڪي سياسي صورتحال تي به خيالن جي ڏي وٺ ڪئي وئي.ان موقعي تي ميڊيا سان ڳالهائيندي وقار مهدي چيو ته هو ايم ڪيو ايم کي آدمشماريءَ ۾ شرڪت جي دعوت ڏيڻ آيا آهن.نجمي عالم چيو ته هو آل پارٽيز ڪانفرنس لاءِ سڀني سياسي پارٽين کي دعوت ڏيندا.صوبائي وزير ناصر شاهه چيو ته پ پ سميت ڪنهن به سياسي پارٽيءَ سان زيادتي نه ٿيڻ گهرجي.ايم ڪيو ايم اڳواڻ عبدالقادر خانزادي چيو ته پ پ جي دعوت قبولي آهي، اي پي سي ۾ شرڪت جو فيصلو صلاح مشوري سان ڪيو ويندو.هن چيو ته آدمشماري حقيقي آبادي جي بنياد تي ٿيڻ گهرجي.عبدالقادر خانزادي جو چوڻ هو ته پ پ جي خواهش آهي ته آدمشماري ايمانداري سان ٿي.

 

دهشتگرديءَ جي خاتمي لاءِ سنڌ سرڪار سان سهڪار جاري رکيو ويندو: چوڌري نثار

اسلام آباد(اي پي پي) گهرو معاملن واري وفاقي وزير چوڌري نثار علي خان چيو آهي ته وفاقي حڪومت سنڌ ۾ دهشتگردي جي مڪمل خاتمي ۽ امن امان جي قيام لاءِ هر ممڪن سهڪار جاري رکندي. هن اها ڳالهه خميس ڏينهن هتي پاڪستان مسلم ليگ(ن) سنڌ جي صدر محمد اسماعيل راهو سان ڳالهائيندي ڪئي. ملاقات دوران ملڪ جي مجموعي صورتحال خاص طور تي سنڌ جي صورتحال تي خيالن جي ڏي وٺ ٿي. ان موقعي تي وفاقي گهرو وزير چيو ته وفاقي حڪومت سنڌ ۾ دهشتگردي جي مڪمل خاتمي ، امن ۽ سيڪيورٽي جي قيام لاءِ هر ممڪن سهڪار جاري رکندي.

 

متحده طرفان پارٽي سربراهه جي تقريرن ۽ تصويرن تي پابندي خلاف اڄ کان چئن ڏينهن جي علامتي بک هڙتال جو اعلان

ڪراچي (اسٽاف رپورٽر) متحده طرفان پارٽي سربراهه جي تقريرن ۽ تصويرن تي پابندي خلاف اڄ کان چئن ڏينهن جي علامتي بک هڙتال ڪراچي ۾ پريس ڪانفرنس ڪندي متحده اڳواڻ ڊاڪٽر فاروق ستار چيو ته اظهار جي آزادي تي پابندي جمهوريت پسندي ناهي. هن چيو ته جمهوريت جي نالي تي آمريت قائم ڪئي پئي وڃي، حڪمران عوام جي اکين ۾ ڌوڙ وجهڻ بند ڪن. سندس چوڻ هو ته گڏيل مخالف ڌر نوابزاده نصر الله جي دور ۾ هوندي هئي، هاڻ رڳو ڊيل کان ڪم ورتو پيو وڃي. متحده اڳواڻ چيو ته خورشيد شاهه قومي اسيمبلي جو اجلاس سڏائي ميار لاهي ٿو. فاروق ستار چيو ته بک هڙتال پريس ڪلب ٻاهران ڪئي ويندي، جيڪا صبح جو 11 کان رات جو 11 وڳي تائين جاري رهندي. هڪ سوال جي جواب ۾ سندس چوڻ هو ته علامتي بک هڙتال ۾ متحده جي قومي ۽ صوبائي اسيمبلي ميمبرن سميت سينيٽر شامل هوندا. هن چيو ته هو ڌرڻا به هڻندا، جڏهن سندن ڌرڻا لڳندا ته پوءِ صدر ۽ وزيراعظم ملڪ کان ٻاهر نه وڃي سگهندا.