تازيون خبرون

Daily Archives: February 18, 2016

نواز شريف ٻن سالن دوران 65 پرڏيهي دورا ڪري 68 ڪروڙ کان وڌيڪ رقم خرچ ڪري ڪري ڇڏي: قومي اسيمبلي ۾ رپورٽ پيش

اسلام آباد (بيورو) وفاقي سرڪار، وزير اعظم جي پرڏيهي دورن جا تفصيل قومي اسيمبلي ۾ پيش ڪري ڇڏيا آهن، جنهن ۾ ڄاڻايو ويو آهي ته نواز شريف ٻن سالن دوران 65 پرڏيهي دورا ڪري 68 ڪروڙ کان وڌيڪ رقم خرچ ڪري چڪو آهي. قومي اسيمبلي جو اجلاس ڊپٽي اسپيڪر مرتضيٰ جاويد عباسي جي صدارت ٿيو، جنهن ۾ مختلف معاملن تي بحث ڪيو ويو. اجلاس ۾ وفاقي حڪومت پاران وزير اعظم نواز شريف جي پرڏيهي درون بابت تفصيلي رپورٽ پيش ڪئي وئي. رپورٽ ۾ ڄاڻايو ويو ته مئي 2013ع ۾ ٿيل عام چونڊن کانپوءِ وزير اعظم نواز شريف لنڊن ، سعودي عرب، سريلنڪا ۽ آمريڪا سميت هيل تائين 65 پرڏيهي ملڪن جا دورا ڪري چڪو آهي. وفاقي سرڪار پنهنجي رپورٽ ۾ ڄاڻايو آهي ته وزير اعظم جي پرڏيهي دورن تي 68ڪروڙ، 82 لک 76 هزار رپيا خرچ آيو آهي. حڪومت پاران جمع ڪرايل رپورٽ ۾ اهو به ڄاڻايو ويو آهي ته پرڏيهي دورن دوران وزير اعظم نواز شريف سان 631 ماڻهو گڏ هئا، جڏهن ته گڏيل قومن جي اجلاس ۾ شرڪت  تي 7 ڪروڙ کان وڌيڪ خرچ ٿيا هئا.

 

شيخوپوره ۾ ڪائونٽر ٽيرر ازم ڊپارٽمينٽ جي ڪارروائي جي نتيجي ۾ 7 دهشتگرد مارجي ويا

اسلام آباد (اين اين آءِ) ڪائونٽر ٽيرر ازم ڊپارٽمينٽ جي ڪارروائي جي نتيجي ۾ ست دهشتگرد مارجي ويا جن جو تعلق تحريڪ طالبان ۽ لشڪر جهنگوي سان آهي دهشتگردن جو 12 ماڻهن تي ٻڌل ٽولو گهر ۾ موجود هو فائرنگ جي ڏي وٺ ٻن ڪلاڪن تائين جاري رهي پنج دهشتگرد فرار ٿي ويا اطلاع مطابق شيخوپوره جي علائقي شرقپور روڊ تيواقع گهر ۾ دهشتگردن جي موجودگي جي اطلاع تي سي ٽي ڊي ڇاپو هنيو جنهن تي گهر ۾ موجود دهشتگردن پوليس اهلڪارن تي فائرنگ شروع ڪئي ۽ دستي بمن سان به حملا ڪيا ويا سي ٽي ڊي عملدارن مطابق پوليس جي جوابي فائرنگ ۾ 3 دهشتگرد مارجي ويا جڏهن ته ان دوران چئن دهشتگردن ٻن موٽر سائيڪلن تي فرار ٿيڻ جي ڪوشش ڪئي جڏهن ته انهن جي ڪوشش ناڪام ڪندي چئني دهشتگردن کي ماريو ويو.

 

پاڪستان اڃا سعودي عرب جي اڳواڻي ۾ ٺهيل 34 ملڪي فوجي اتحاد ۾ شامل ناهي ٿيو:سرتاج عزيز

اسلام آباد (بيورو) پرڏيهي معاملن بابت وزيراعظم جي صلاحڪار سرتاج عزيز چيو آهي ته پاڪستان اڃا تائين سعودي عرب جي اڳواڻي ۾ ٺهيل 34 ملڪي فوجي اتحاد ۾ شامل ناهي ٿيو، هن اهڙو اظهار قومي اسيمبلي جي اجلاس ۾ ڳالهائينديڪيو، اجلاس دوران پشتونخوا ملي عوامي پارٽي جي سربراهه محمود خان اچڪزئي جو چوڻ هو ته داعش خلاف سعودي قيادت ۾ ٺهيل اتحاد ۾ پاڪستان شامل آهي پر شام، عراق ۽ ايران ان ۾ شامل ڇو ناهن؟ تحريڪ انصاف جي ڊاڪٽر شيرين مزاري چيو ته جيڪڏهن حڪومت کي فوجي اتحاد جي جوڙجڪ جي ڄاڻ ناهي ته پوءِ پاڪ فوج جي جوانن کي مشقن لاءِ سعودي عرب ڇو اماڻيو ويو؟ سعودي فوجي اتحاد ۽ فوجي مشقن ۾ شامل ٿيڻ بابت پڇيل سوالن جا جواب ڏيندي سرتاج عزيز چيو ته پاڪستان اڃا تائين سعودي اتحاد ۾ شامل ناهي ٿيو، فوجي اتحاد ۾ شامل ٿيڻ لاءِ وڌيڪ تفصيل ۽ ٽيڪنيڪل صلاح مشورا گهربل آهن. سندس چوڻ هو ته اسلامي اتحاد 6 نقطن تي گڏيل قدم کڻندو، جڏهن ميمبر ملڪن جو اجلاس ٿيندو ته ايران ۽ عراق جي شامل ٿيڻ وارو معاملو به غور هيٺ ايندو، هن چيو ته سعودي عرب سان دفاعي ٺاهه هيٺ پاڪ فوج 20 ملڪن جي گڏيل مشقن ۾ حصو وٺي رهي آهي ۽ ان سلسلي ۾ هڪ هزار کان وڌيڪ فوجي سکيا ڏيڻ لاءِ سعودي عرب ۾ موجود آهن، جڏهن ته سعودي فوج کي پاڪستان ۾ به سکيا ڏني ويندي آهي. سرتاج عزيز چيو ته سعودي عرب جي خودمختياري ۽ سلامتي کي خطري جي صورت ۾ سڄو پاڪستان پنهنجي ڀاءُ اسلامي ملڪ سان گڏ بيٺل هوندو.

 

وزيراعظم جو نيب عملدارن بابت بيان اکين ۾ ڌوڙ وجھڻ برابر آهي: بلاول ڀٽو

ڪراچي(اسٽاف رپورٽر) پاڪستان پيپلزپارٽي جي چيئرمين بلاول ڀٽو زرداري چيو آهي ته وزيراعظم نواز شريف نيب جي عملدارن هٿان سرڪاري

عملدارن ۽ معصوم ماڻهن کي حراسان ڪرڻ خلاف آيل بيان صرف اکين ۾ ڌوڙ وجھڻ برابر آهي ڇاڪاڻ ته سنڌ حڪومت کي مفلوج ڪرڻ لاءِ سموريون آئيني حدون ڪراس ڪري مسلسل ڇاپا هڻڻ ۽ صوبائي علمدارن جي گرفتاري ان جا واضح مثال آهن،جاري ٿيل بيان ۾ بلاول ڀٽو زرداري ياد ڏياريو ته نيب ۽ ايف آءِ اي سميت ٻيا وفاقي ادارا هڪ صوبي کي نشانوبڻائي رهيا آهن ۽ نواز حڪومت جا عملدارڪجه مهينن کان ضابطن جي ڀڃڪڙي به ڪري رهيا آهن پر نواز شريف جي وفاقي وزيرن انهن حملن ۽ ڪاهن جو وڌي چڙهي دفاع ڪيو، بلاول ڀٽو زرداري چيو ته پاڪستان پيپلزپارٽي هميشه هر اداري جي لاءِ جوڙيل آئين جي حدن ۾ رهي ۽ ڪنهن کي مقدس ڳنون ٺاهڻ کانسواءِ سڀني لاءِ هڪجهڙي احتساب ڪرڻ جي حمايت ڪئي آهي پر نوازشريف ڪابينا جي ڪنٽرول هيٺ ايندڙ نيب ۽ ايف آءِ اي سنڌ ۾ صوبائي حڪومت جي ڪجه ادارن جي ڪم ڪار کي مفلوج ڪرڻ لاءِ پنهنجي اختيارن کي اورانگهي ڪارروايون ڪيون، بلاول ڀٽو زرداري وڌيڪ چيو ته ماضي ۾ هميشه احتساب واري عمل کي پيپلزپارٽي جي خلاف انتقامي ڪارروائي جو نشانو بنائڻ لاءِ اوزار طور استعمال ڪيو ويو آهي ۽ پيپلزپارٽي جي مخالفن کي هٿ به نه لاٿو ويو آهي جيڪي هميشه غير جمهوري قوتن جي ڇانو۾ اوچتو پلجي وڏا ٿيا آهن، بلاول ڀٽو زرداري چيو ته ملڪ ۾ سياسي قيدين کي يرغمال بنائڻ ۽ کين سياسي مقصدن جي لاءِ استعمال ڪرڻ لاءِ کين ايذائڻ ۽ دٻاءَ وجهڻ بدران ڪنهن کي به مقدس ڳئون سمجهڻ کانسواءِ سڀني جي لاءِ هڪجهڙي احتساب جي ضرورت آهي، پيپلزپارٽي جي چيئرمين چيو ته پارليامينٽ جي سمورين پارٽين کي گڏ ويهاري کين اعتماد ۾ وٺي احتساب قانون ۾ موجود اوڻائين کي ختم ڪيو وڃي ته جيئن آئين ۾ صوبن کي مليل خودمختياري کي تحفظ ملڻ سان گڏوگڏ معصوم ۽ ايماندار ماڻهو ڪنهن سياسي وابستگيءَ جي ڪري انتقامي ڪارروائي جو نشانو بنجڻ کان بچي سگهن.

 

وزيراعظم بعد وزير به ڌمڪيون پيا ڏين، وقت ٻڌائيندو ته وزيراعظم نيب خلاف بيان ڇو ڏنو: پيپلز پارٽي

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته نيب کي ڪرپشن خلاف ڪاررواين تي ڌمڪيون ڏيڻ خطرناڪ عمل آهي، وزيراعظم ۽ ان جي وزيرن کي بيان بازي ڪرڻ بدران پارليامينٽ ۾ ڳالهائڻ گهرجي. اسلام آباد ۾ پنهنجي چيمبر ۾ ميڊيا سان ڳالهائيندي خورشيد شاهه چيو ته وزيراعظم نواز شريف پنهنجي خلاف نيب جون ڪارروايون روڪڻ لاءِ پهريان کان ئي قدم کڻي رهيو آهي. هن چيو ته موجوده صورتحال ۾ وزيراعظم نواز شريف نيب خلاف بيان ڇو ڏنو، ان بابت وقت اچڻ تي ئي خبر پئجي ويندي. هڪ سوال جي جواب ۾ خورشيد شاهه چيو ته پنجاب جي هڪ وزير پاران نيب خلاف بيان ڏيڻ افسوسناڪ عمل آهي، نيب کي ڪرپشن خلاف ڪاررواين تي ڌمڪائڻ خطرناڪ عمل آهي. اپوزيشن ليڊر وڌيڪ چيو ته وزيراعظم کانپوءِ هاڻي وزير به نيب خلاف ڳالهائين پيا، وزيراعظم ۽ وزيرن کي ٻاهر بيان ڏيڻ بدران پارليامينٽ ۾ ڳالهائڻ گهرجي،

 

وزيراعظم جي راءِ جو احترام، حڪومت طرفان مداخلت نه ڪرڻ واري پاليسي سبب نيب اڄ آزاد ادارو آهي: نيب

اسلام آباد (بيورو) نيب اختيارين وزيراعظم نواز شريف جي بيان جي آجيان ڪندي چيو آهي ته نيب کي ڪجھ خرابيون ورثي ۾ مليون آهن، وزيراعظم جِي تجويز تي احتساب جي عمل کي بهتر بڻايو ويندو. نيب جي ترجمان پاران جاري ڪيل پنهنجي پڌرائي ۾ چيو ويو آهي ته نيب وزيراعظم نواز شريف جي راءِ جو احترام ڪري ٿي.نيب جي ترجمان چيو ته حڪومت طرفان مداخلت نه ڪرڻ واري پاليسي سبب نيب اڄ آزاد ادارو آهي، نيب ۾ ڪجهه خرابيون آهن جيڪي کين ورثي ۾ مليون آهن، جن کي ختم ڪرڻ لاءِ قدم کنيا پيا وڃن. نيب جي ترجمان وڌيڪ چيو ته هو مسئلن جي حل لاءِ قدم کڻي رهيا آهن، وزيراعظم نواز شريف جي تجويز جي روشني ۾ احتسابي عمل کي بهتر بڻايو ويندو.

 

ٻين کي خوش ڪرڻ لاءِ پنجاب ۾ نيب کي ڪارروائي ڪرڻ جي اجازت نه ڏينداسين: راڻا ثناءُ الله

لاهور (م.ڊ) پنجاب جي قانون واري وزير راڻا ثناءُ الله چيو آهي ته ٻين کي خوش ڪرڻ لاءِ پنجاب ۾ نيب کي ڪارروائي ڪرڻ جي اجازت نه ڏينداسين، جڏهن ته نيب هن وقت جوڙجڪ واري مرحلي ۾ آهي، تنهن ڪري ان کي احتياط سان ڪارروايون ڪرڻ گهرجن. لاهور ۾ پريس ڪانفرنس ڪندي راڻا ثناءُ الله چيو ته نيب کي جنهن رٿا بابت وڻي، ان بابت جاچ ڪري پر ڪارروائي کان پهرين پڪا ثبوت ڏنا وڃن ته ڪو اعتراض ناهي ، نيب کي پنهنجو ڪم ذميواري سان ڪرڻ گهرجي. سندس چوڻ هو ته وزيراعظم خلاف ٺاهيل ريفرنس بي بنياد آهن، جيڪڏهن وزيراعظم ادارن کي ڪارروائي بهتر بڻائڻ جو نه چوندو ته ٻيو ڪير چوندو؟ هن چيو ته وزيراعظم ايگزيڪيوٽو آهي ۽ هو نيب کي هدايتون ڏئي سگهي ٿو، هن جيڪي ڪجهه چيو، ان کي هاڪاري انداز ۾ ڏسڻ گهرجي. صوبائي وزير چيو ته نيب پنجاب ۾ جيترو به سرگرم ٿيڻ چاهي، ان جي آجيان ڪنداسين پر پنجاب ۾ هڪ ٽڪي جي به ڪرپشن ناهي، رٿائون شفاف نه هجن ته اسان جوابدا آهيون، جيڪڏهن اورينج ٽرين رٿا ۾ ڪرپشن ٿي آهي ته اها سامهون آندي وڃي. هن چيو ته مشرف حڪومت جيڪي ريفرنس ٺاهيا، انهن ۾ ڪرپشن ثابت نه ٿي سگهي، راڻا ثناءُ الله چيو ته جيڪڏهن اهو ڇيو وڃي ته نيب ٻين صوبن ۾ ڪارروائي ڪري ٿو ته پنجاب ۾ به ٿيڻ گهرجي ته اسان ائين ٿيڻ نه ڏينداسين،نيب کي توازن برقرار رکڻ لاءِ ڪنهن به صورت ۾ ڪارروائي ڪرڻ نه ڏني ويندي. راڻا ثناءُ الله چيو ته نندي پور رٿا ۾ ڪيتري ڪرپشن ٿي، نيب ڇا ثبات ڪيو آهي؟ پنجاب اندر حڪومتي رٿائن ۾ هڪ ٽڪي جي به ڪرپشن ناهي ٿي، هن چيو ته پهرين ميٽرو بس ۽ هاڻ اورينج ٽرين تي وڏو گوڙ ڪيو پيو وڃي، ڪرپشن جون غضب ڪهاڻيون ڇپجنديون رهيون آهن، ٻڌايو وڃي ته هاڻ ڪهڙي غضب ڪهاڻي سامهون آئي آهي؟ نيب شروعاتي جاچ کانپوءِ ڪيس داخل ڪري. هن اهو به چيو ته پنجاب جي ڪنهن به شهر ۾ ڪراچي جهڙيون حالتون ناهن پر جيڪڏهن ضرورت پئي ته رينجرز ۽ فوج کي به گهرائي سگهجي ٿو. داعش جي حوالي سان پنجاب جي قانون واري وزير چيو ته داعش جو ڪوبه گڏيل نيٽ ورڪ ناهي، هتان رڳو ڪجهه ماڻهو شام ويا آهن، جڏهن ته ڪيترن ئي ماڻهن کي اڳواٽ ڪارروائي ڪري شام وڃڻ کان روڪيو ويو، هن چيو ته اها ڳاله يقيني بڻائي وئي آهي ته پاڪستان ۾ داعش جون سرگرميون نه پکڙجن، جڏهن ته داعش جي تنظيمي ڍانچي جي حوالي سان به حڪومت جي سامهون ڪي ثبوت ناهن،راڻا ثناءُ الله چوڻ هو ته دهشتگردي کي روڪڻ ۾ آئي ايس آئي جو وڏو ڪردار آهي.

 

پاڻ کي اڃا تائين ٻارڙي سمجهان ٿي: ڪرينا ڪپور

ممبئي (شوبز نيوز) بالي ووڊ اداڪارا ڪرينا ڪپور جي نئين فلم اڙتا پنجاب جون ۾ رليز ٿيندي.بالي وڊ جي ڊرامه ٿرلر فلم جي ڪهاڻي ڀارتي پنجاب ۾ موجود براين جي چوڌاري گهمي ٿي.فلم جي هدايت اڀيشڪ چوئبي ڏني آهي،فلم ۾ اداڪاري جا جوهر ڏيکاريندڙن ۾ ڪرينا ڪپور،عاليا ڀٽ ۽ دلجيت دوسونجي شامل آهن،ان فلم ۾ ڪرينا ڪپور ڊاڪٽر جو ڪردار نڀائيندي، جيڪا 17 جون تي ڀارتي سينما گهرن ۾ نمائش لا۽ پيش ڪئي ويندي، هوڏانهن ڪرينا ڪپور هن وقت پنهنجي فلم ڪي اينڊ ڪا جي مشهوري مهم ۾ رڌل آهي، ممبئي ۾ تقريب دوران ميڊيا سان ڳالهائيندي ڪرينا ڪپور چيو ته هوءَ پنهنجي ڊائريڪٽر جي هدايتن تي هلندڙ اداڪارا آهي، فلم ۾ پنهنجي ڪردار ۾ حقيقي رنگ ڀرڻ بابت سوال جي جواب ۾ هن چيو ته هوءَ رڳو ڊائريڪٽر جي هدايت تي عمل ڪندي آهي، اهو ئي ڪارڻ آهي جو هن پنهنجي فني سفر دوران سٺن هدايتڪارن سان گڏجي سٺو ۽ خراب هدايتڪارن سان گڏجي خراب ڪم ڪيو آهي، سندس چوڻ هو ته هن سدائين ڊائريڪٽر جي آڱر پڪڙي بالي ووڊ ۾ هلڻ سکيو آهي ۽ اڃا تائين هوءَ پاڻ کي هڪ ننڍڙي ٻارڙِي سمجهي ٿي، جيڪا ڊائريڪٽر جي آڱر پڪڙڻ کانسواءِ هڪ قدم به نه ٿي هلي سگهي.

 

رنبير ۽ ڪترينه وچ ۾ لاڳاپن جو خاتمو، سلمان خان جي اڳڪٿي سچ ثابت ٿي وئي

ممبئي(شوبز نيوز) بالي ووڊ اداڪار سلمان خان جي رنبير ڪپور ۽ ڪترينه ڪيف وچ ۾ لاڳاپا ختم ٿيڻ جي اڳڪٿي سچ ثابت ٿي وئي. بالي ووڊ ذريعن اداڪار سلمان خان، رنبير ڪپور ۽ ڪترينه ڪيف بابت 2009ع ۾ چيو هو ته اداڪار رنبير ڪترينه سان ويجهڙائپ نه وڌائي ۽ هو سندس دل ٽوڙي هلي ويندي ۽ هلندڙ سال رنبير ڪپور ۽ ڪترينه ڪيف بابت بريڪ اپ کانپوءِ سلمان خان جي اڳڪٿي سچ ثابت ٿي وئي آهي، ڪترينه هاڻي سلمان خان جي زندگيءَ جو ٻيهر حصو بڻجڻ لاءِ ڪوششون ڪري رهي آهي، سندس ڪوششون رنگ لاهينديون يا نه. ڪترينه جي تازو ئي فلم فتور رليز ٿي آهي جنهن تي مداحن جي سٺي موٽ ملي آهي.

 

 قومي ٽيم کي حڪومت پاران ڀارت ۾ ٽي ٽوئنٽي ڪپ کيڏڻ جي اجازت ناهي ملي:شهريار خان

لاهور:پاڪستان ڪرڪيٽ بورڊ جي چيئرمين شهريار خان چيو آهي ته قومي ٽيم کي حڪومت پاران ڀارت ۾ ٽي ٽوئنٽي ورلڊ ڪپ کيڏڻ جي اجازت اڃان تائين ناهي ملي.ميڊيا سان ڳالهائيندي شهريار خان جو چوڻ هو ته پاڪستان جي ٽيم کي ڀارت ۾ ٽي ٽوئنٽي ورلڊ ڪپ کيڏڻ جي اجازت اڃان تائين ناهي ملي.جڏهن انهيءَ سلسلي م وزيراعظم سيڪريٽريٽ سان رابطو ڪيو آهي،پراڃان تائين جواب ناهي مليو،پي سي بي کي وزيراعظم جي جواب جو انتظار آهي.شهريار خان جو چوڻ هو ته پاڪستان سپر ليگ جي فائنل ميچ وزيراعظم نه ڏسي سگهندو،جڏهن ته وزيراعظم هائوس پاران معذرت ڪئي وئي آهي.