تازيون خبرون

Daily Archives: February 17, 2016

ڪڏهن به ناهي چيو ته پاڪستان ۾ داعش جو ڪو وجود ناهي: چوڌري نثار

اسلام آباد (بيورو) چوڌري نثار جو چوڻ آهي ته هن ڪڏهن به ناهي چيو ته پاڪستان ۾ داعش جو ڪو وجود نه آهي اها ڪيترن ئي ملڪن ۾ پنهنجي بقا جي جنگ وڙهي رهي آهي، پابندي مڙهيل تنظيمون سندس نالو استعمال ڪري رهيون آهن. ٽيڪسلا ۾ پريس ڪانفرنس ڪندي چوڌري نثار چيو ته آخر ان ڳالهه تي ڇو ضد آهي ته پاڪستان ۾ داعش جو وجود آهي؟ ملڪ ۾ داعش جو تنظيمي ڍانچو ۽ فيصلا ڪندڙ قيادت موجود ناهي. هن انڪشاف ڪيو ته ملڪ ۾ 45 کان وڌيڪ دهشتگرد تنظيمون موجود آهن، جن خلاف ڪارروائي ڪئي پئي وڃي سندس چوڻ هو ته جن کي ڪا خبر ناهي، اهي به چون پيا ته پاڪستان ۾ داعش جو وجود آهي. چوڌري نثار چيو ته ملڪي ڳجهيون ايجنسيون تصديق ڪن پيون ته داعش جو پاڪستان ۾ وجود ناهي. چوڌري نثار چيو ته داعش جي ڪري سڄي دنيا ۾ اسلام بدنام ٿي رهيو آهي. وفاقي گهرو وزير چيو ته داعش هڪ عرب تنظيم آهي، جيڪا اتر آفريڪا تائين پکڙيل آهي. هن چيو ته دهشتگرد سندن نشاني تي آهن، اهي هاڻ ڀڄي رهيا آهن، پر کين نه ڇڏيو ويندو. چوڌري نثار چيو ته کيس خبر آهي ته ڪنهن جي پڇ تي سندس پير آهي ۽ جنهن جي پڇ تي پير آهي، انهن کي به خبر آهي. هن چيو ته خبر ناهي پ پ وارا هر ڳالهه کي پاڻ ڏانهن ڇو سمجهندا آهن. هڪ سوال جي جواب ۾ وفاقي گهرو وزير چيو ته هو سدائين حساب برابر ڪندو آهي، پر اعتزاز احسن ۽ خورشيد شاهه جي بيان بازي بابت هن وزيراعظم جي چوڻ تي خاموشي اختيار ڪئي. هن چيو ته هن ڪڏهن به ناهي چيو ته مولانا عبدالعزيز خلاف ايف آءِ آر ناهي، سندس خلاف 31 ڪيس هئا جن مان 11 کان 12 انتهائي حساس هئا. وفاقي گهرو وزير چيو ته مولانا عزيز پ پ جي دور ۾ خطبا ڏيندو هو، جيڪي هن پنهنجي دور ۾ روڪرايا. هن چيو ته رڳو تعصب جي بنياد تي ڪنهن خلاف ڪارروائي نٿي ڪري سگهجي، مولانا عزيز سميت ڪو به قانون ٽوڙيندو ان خلاف قدم کنيو ويندو. چوڌري نثار چيو ته جنرل راحيل شريف کي حڪومت جي مڪمل حمايت حاصل آهي، رٽائرمينٽ بابت سندس فيصلو ذاتي آهي. هن چيو ته جنرل راحيل شريف جي رٽائرمينٽ ۾ اڃا 10 مهينا پيا آهن، آرمي چيف جي مقرري بابت فيصلو ميرٽ کي سامهون رکي ڪيو ويندو. سندس چوڻ هو ته عزير بلوچ کان پڇا ڳاڇا ڪئي پئي وڃي، هو 90 ڏينهن لاءِ رينجرز تحويل ۾ آهي، جاچ رپورٽ سامهون آندي ويندي. چوڌري نثار چيو ته اقتدار ۾ ايندي ئي هنن گم ٿيلن جي معاملي کي سنجيدگي سان ورتو، امن امان صوبائي حڪومتن جو معاملو آهي. هن چيو ته پٺاڻ ڪوٽ واري واقعي جي جاچ لاءِ ٽيم ڀارت موڪلڻ جو فيصلو ڪيو ويو آهي. چوڌري نثار چيو ته ٽيم کي موڪلڻ جي درخواست جلد ڀارت کي ڏني ويندي. هن چيو ته پٺاڻ ڪوٽ واقعي جي جاچ لاءِ جي آءِ ٽي جا ڪيترائي اجلاس ٿي چڪا آهن. چوڌري نثار چيو ته جاچ ٽيم جي ڀارت مان واپسي تي ئي اصل صورتحال جي خبر پوندي.

 

نواز شريف جي بيان سنڌ حڪومت جي شڪايتن جي تصديق ڪري ڇڏي: مولا بخش چانڊيو

ڪراچي (اسٽاف رپورٽر): وزير اعليٰ سنڌ جي اطلاعات بابت صلاحڪار مولا بخش چانڊيو چيو آهي ته وزير اعظم ميان محمدنواز شريف جي بيان مان سنڌ حڪومت جي شڪايتن جي تصديق ٿي وئي آهي. هن پنهنجي جاري ڪيل هڪ بيان ۾چيو آهي ته مسلم ليگ (ن) وارن هميشه نيب کي سياسي انتقام لاءِ استعمال ڪيو ۽ اها روايت مسلم ليگ (ن) جي ئي آهي. هن چيو ته پاڪستان پيپلز پارٽي جي قائدين تي نيب جيڪي به ڪيس ٺاهيا انهن مان هڪ به ڪيس سچو ثابت نه ٿيو. صوبائي صلاحڪار چيو ته سنڌ ۾ نيب جي ڪارروائين تي ميان صاحب خاموشي اختيار رکي پر سندس اڄوڪي بيان نيب بابت سنڌ جي شڪايتن جي تصديق ڪري ڇڏي آهي.

 

ووٽ عوام ڏيندو آهي، حڪومت ڪو ٻيو ڪيرائي ڇڏي ٿو، هاڻي اهو سلسلو ختم ٿيڻ گهرجي: وزيراعظم

بهاولپور (مانيٽرنگ ڊيسڪ) وزيراعظم نواز شريف چيو آهي ته ووٽ عوام ڏيندو آهي، حڪومت ڪو ٻيو ڪيرائي ڇڏي ٿو، هاڻي اهو سلسلو ختم ٿيڻ گهرجي. نيب جا اهلڪار سرڪاري آفيسرن جي آفيسن ۽ گهرن ۾ داخل ٿي کينڌمڪائي رهيا آهن، بنا ڪنهن تصديق جي ڪنهن کي به تنگ نه ڪرڻ گهرجي، جيڪڏهن نيب چيئرمين معاملي جو نوٽيس نه ورتو ته  حڪومت ڪارروائي جو حق رکي ٿي. باولپور ۾ مسلم ليگ ن جي ڪارڪنن کي خطاب ڪندي وزيراعظم نواز شريف چيو ته نيب انتهائي اهم ادارو آهي، ان کي پنهنجو ڪم صحيح نموني   ۽ ذميواري سان ڪرڻ گهرجي. هـُن چيو ته شڪايتون مليون آهن ته نيب جا آفيسر معصوم ماڻهن جي گهرن ۾ داخل کين ڌمڪائين ٿا،سرڪاري آفيسرن کي ڊيڄارڻ يا ڌمڪائڻ ٺيڪ نه آهي، ان جو نوٽيس وٺڻ گهرجي. وزيراعظم نواز شريف چيو ته نيب جي اهلڪارن ڌمڪائڻ سبب سرڪاري آفيسر فيصلا ڏيڻ کان ڊڄن ٿا، جيڪڏهن نيب چيئرمين نوٽيس نه ورتو ته حڪومت ان معاملي تي ڪارروائي ڪري سگهي ٿي. هـُن چيو ته نيب کي ماڻهن جي عزت سان نه کيڏڻ گهرجي، بنا ڪيسز جي ڪنهن کي ڌمڪائڻ صحيح عمل ناهي، نيب پاران غلط ڪيسن ۾ ماڻهن تي هٿ وڌا ويا آهن، اهي غلط ۽ صحيح جو فرق ئي نٿا ڪن.  ماضي جي حڪومتن کي تنقيد جو نشانو بڻائيندي وزيراعظم نواز شريف چيو ته ماضي جي حڪومتن بجلي بحران ختم ڪرڻ سميت عوامي مسئلن تي ڪو به ڌيان نه ڏنو، لوڊشيڊنگ جي خاتمي لاءِ قدم ڇو نه کنيا ويا، ان سوال جو جواب عوام کي ملڻ گهرجي. وزيراعظم چيو ته ن ليگ جي حڪومت جو تختو اونڌو ڪرڻ بعد پرويز مشرف پنهنجي 7 نقاطي ايجنڊا ڏني پر ان جي 8 سالن واري دور ۾ اها ايجنڊا ڪٿي به نظر نه آئي، پيپلزپارٽي جي حڪومت به بجلي بحران ختم ڪري سگهي ٿي پر ان جيڪو ڪجهه ڪيو اهو سڀني ڏٺو ۽ ڀوڳيو. نواز شريف چيو ته هـُو ڪوڙ جي سياست تي يقين نٿو رکي پر اڄڪلهه اهڙا سياستدان پيدا ٿي ويا آهن، جيڪي ڪوڙ کانسواءِ ڪجهه ڳالهائيندا ئي ناهن، اهڙي سياست جلد بي نقاب ٿي ويندي آهي ۽ عوام به اهڙن سياستدانن کي سمجهي ويو آهي. وزيراعظم وڌيڪ چيو ته ن ليگ جي منشور ۾ بجلي بحران 6 مهينا يا هڪ سال ۾ ختم ڪرڻ جي دعويٰ نه هئي، هـُن سچ ڳالهايو، تنهن ڪري کيس ووٽ مليا ۽ حڪومت ۾ اچي عوام جي خدمت جو موقعو مليو، پنهنجي حڪومتي دور ۾ بجلي بحران جو خاتمو آندو ويندو. نواز شريف وڌيڪ چيو ته هڪڙو نيپرا، پيپرا ۽ نه ڄاڻ ڪيترا ادارا آهن ۽ ترقياتي منصوبن ۾ رنڊڪ وڌي پئي وڃي، هاڻي پاڪستان سان راند ڪرڻ وارو سلسلو بند ٿيڻ گهرجي ۽ جيڪا حڪومت ڪم ڪري پئي، ان کي ڪم ڪرڻ ڏنو وڃي.

ميان صاحب نيب سان گڏ توهانجي ايف آئي  اي به ساڳيا ڪم ڪري رهي آهي:آصف زرداري

ڪراچي(اسٽاف رپورٽر) پاڪستان پيپلز پارٽي پارليامينٽ جي صدرآصف علي زرداري وزيراعظم نوازشريف جي نيب واري بيان بابت رد عمل ڏيندي چيو آهي ته  ميان صاحب نيب سان گڏوگڏ توهانجي ايف آئي اي به اهڙائي ڪم ڪري رهي آهي،توهانجو پنهنجو وزير ئي چئي چڪو آهي ته ڊاڪٽر عاصم ڪرپشن يا چوري ناهي ڪئي،پر پوءِ به ان کي مهينن کان تنگ ڪيو پيو وڃي.سندس چوڻ هو ته 18 هين ترمين خلاف لاڳيتو ڪم ٿي رهيو آهي.

 

منهنجي ڳالهه عوام تائين نه پهتي، عوام کي ڪيئن خبر پوندي ته مخالف ڌر اڳواڻ جو ردعمل ڪهڙو هو؟ : خورشيد شاهه

اسلام آباد (بيورو) قومي اسيمبلي ۾ مخالف ڌر جي اڳواڻ سيد خورشيد احمد شاهه سندس تقرير بليڪ آئوٽ ڪرڻ تي اسپيڪر سان سخت احتجاج ڪندي چيو آهي ته 400 ارب رپين جو سرڪلر ڊيٽ ختم ڪري لوڊشيڊنگ ختم ڪرڻ جو واعدو ڪيو ويو هو پر اڄ تائين نه ته لوڊشيڊنگ ختم ٿي آهي ۽ نه ئي وري پيٽروليم وارين شين جا اگهه گهٽايا ويا آهن، قومي اسيمبلي جي اجلاس ۾ ڳالهائيندي خورشيد شاهه چيو ته سومر واري ڏينهن منهنجي تقرير کي بليڪ آئوٽ ڪيو ويو، جڏهن ته وفاقي وزير پرويز رشيد جي تقرير سڌي سنئين ڏيکاري وئي، هن چيو ته مان گذريل ڏينهن ايوان ۾ جيڪي به ڳالهايو،اهو عوام تائين نه پهچي سگهيو، عوام کي ڪيئن خبر پوندي ته مخالف ڌر جي اڳواڻ جو ردعمل ڪهڙو هو؟ هن چيو ته اسپيڪر منهنجي تقرير بليڪ آئوٽ ڪرڻ تي رولنگ ڏئي، هو سڌي ريت نشريات بابت جيڪو به فيصلو ڪندو، اهو قبول هوندو، مخالف ڌر جي اڳواڻ جي احتجاج تي اسپيڪر اياز صادق ايوان جي ڪارروائي سڌي ريت نشر ڪرڻ واري معاملي تي صلاح مشوري لاءِ اربع واري ڏينهن (سڀاڻي) اجلاس گهرائي ورتو آهي. قومي اسيمبلي ۾ تقرير دوران خورشِيد شاهه جو چوڻ هو ته وزيراعظم چوي ٿو ته پٽاٽي جو اگهه 5 رپيا في ڪلو ٿي ويو آهي، جنهن ملڪ جي سربراهه کي غربت ۽ بنيادي شين جي اگهن جي خبر نه هجي، ان ملڪ جو ڪهڙو حشر ٿيندو؟ سندس چوڻ هو ته تيل جا اگهه وڌائڻ کانپوءِ به سرڪلر ڊيٽ 300 ارب رپين تائين پهچي ويو آهي، حڪومت ٻڌائي ته ان عوام کي اڄ تائين ڪهڙو رليف ڏنو آهي؟

 

وڏي وزير واٽر سپلاءِ جا منصوبا شمسي توانائي تي منتقل ڪرڻ جو حڪم ڏئي ڇڏيو

ڪراچي (اسٽاف رپورٽر) سنڌ جي وڏي وزير سيد قائم علي شاهه پبلڪ هيلٿ انجنيئرنگ کاتي ۽ رورل ڊولپمينٽ کي حڪم جاري ڪيا آهن ته اهي پنهنجا واٽر سپلاءِ جا منصوبا شمسي توانائي تي منتقل ڪن ته جيئن ننڍن وڏن ڳوٺن کي بنا ڪنهن رنڊڪ جي پاڻيءَ جي سپلاءِ جاري ٿي سگهي. اهڙن خيالن جو اظهار اڄ هن پبلڪ هيلٿ انجنيئرنگ کاتي ۽ رورل ڊولپمينٽ جي ترقياتي منصوبن جي حوالي سان وزير اعليٰ هائوس ۾ منقعد جائزي اجلاس کي خطاب ڪندي ڪيو. اجلاس ۾ ناڻي ۽ توانائي واري صوبائي وزير سيد مراد علي شاهه، پبلڪ هيلٿ انجنيئرنگ ۽ رورل ڊولپمينٽ جي جي خاص معاون فياض ٻٽ، چيف سيڪريٽري سنڌ محمد صديق ميمڻ، ايڊيشنل چيف سيڪريٽري (پلاننگ ۽ ڊولپمينٽ) اعجاز علي خان، وڏي وزير جو پرنسپل سيڪريٽري علم الدين بلو، پبلڪ هيلٿ انجنيئرنگ ۽ رورل ڊولپمينٽ کاتي جي سيڪريٽري عمران عطا سومرو، کاتي جو چيف انجنيئر ۽ ٻيا لاڳاپيل عملدار شريڪ هئا. ان موقعي تي چيف انجنيئر نفيس شيخ ٻڌايو ته 1993.583 ملين رپين جي ڪل 139 اسڪيمن لاءِ، جن ۾ واٽر سپلاءِ جون 66 ۽ ڊرينيج جون 73 اسڪيمون به شامل آهن، انهن لاءِ ناڻي کاتي 1706.236 ملين رپيا جاري ڪيا آهن جن مان هيل تائين 888.864 ملين رپيا خرچ ٿي چڪا آهن. هن وڌيڪ ٻڌايو ته واٽر سپلاءِ جي 27 ۽ ڊرينيج جي 32 اسڪيمن سميت 59 نين اسڪيمن جي نشاندهي ڪئي وئي آهي جنهن لاءِ سنڌ سرڪار 490.659 ملين رپيا مختص ڪيا آهن. انهن منصوبن جي منظوري ملڻ کانپوءِ تمام جلد شروعات ڪئي ويندي. غير فعال منصوبن جي بحالي بابت چيف انجنيئر ٻڌايو ته هڪ سئو واٽر سپلاءِ جا ۽ هڪ سئو ڊرينيج جا منصوبا آهن جن جي بحالي لاءِ 2900 ملين رپيا منظور ٿي چڪا آهن ۽ انهن مان 1821.994 ملين رپيا جاري ٿي چڪا آهن جڏهن ته 916 ملين رپيا خرچ ٿي چڪا آهن. هڪ سوال جي جواب ۾ چيف انجينئر ٻڌايو ته هلندڙ سال جي آخر تائين واٽر سپلاءِ ۽ ڊرينيج جا 57 منصوبا مڪمل ٿي ويندا. ان تي وڏي وزير سيد قائم علي شاهه ايڊيشنل چيف سيڪريٽري اعجاز علي خان کي هدايت ڪئي ته هلندڙ مالي سال جي آخر تائين هر منصوبي جي جاچ ڪرائين ڇاڪاڻ ته پبلڪ هيلٿ انجنيئرنگ جا اڪثر منصوبا پنهنجي معيار ۽ پختگي جي حوالي سان اعليٰ معيار تي پورا ناهن لهندا. کاتي جي سيڪريٽري عمران عطا سومري چيو ته سندن کاتو منصوبن جي تعمير ٿيڻ بعد انهن کي لاڳاپيل ڪميونٽي حوالي ڪري ڇڏيندا آهن ۽ اڪثر ڪري اهي ڪميونٽيون فنڊز نه هجڻ ڪري منصوبي کي هلائڻ ۾ ناڪام ٿي وينديون آهن. ان تي وڏي وزير چيف سيڪريٽري کي هدايت ڪئي ته هو انهيءَ حوالي سان هڪ پرپوزل تيار ڪري ته تيار ٿيل منصوبا يا ته بلديات کاتي حوالي ڪيا وڃن يا وري انهن جي مرمت ۽ بحالي لاءِ پبلڪ هيلٿ انجنيئرنگ کاتي ۾ هڪ الڳ مينٽينس ونگ قائم ڪئي وڃي جنهن مان لاڳاپيل ڪميونٽي فائدو حاصل ڪري سگهي. کاتي جي چيف انجنيئر چيو ته سندن کاتي لنڪ روڊن، واٽر سپلاءِ، نيڪاسي آب، ڪوسٽل ايريا جي واٽر سپلاءِ ۽ نڪاسي آب، ماحوليات، هٿ جي نلڪن جي بحالي، پيئڻ جي پاڻي جي موبائل ٽيسٽنگ سروس ۽ حفاظتي قدم جي مشاورتي منصوبا ۽ سولر اسٽريٽ لائيٽ اسڪيمن سميت مختلف شعبن تي فوڪس رکيو آهي. هن چيو ته هن سال هڪ ارب رپين جي لاڳت سان 26 منصوبن جي شروعات ڪئي وئي آهي. ان تي وڏي وزير چيو ته پيئڻ جي پاڻي جي ٽيسٽنگ موبائل سروس ۽ حفاظتي انتظامن جي صلاحڪاري منصوبا (Mobile drinking water testing & safety measures advisory project) وڏي اهميت وارا آهن ڇاڪاڻ ته ان منصوبي جي ذريعي حڪومت کي انهن علائقن جي ڊيٽا ملي سگهندي جتي صحت لاءِ هاڃيڪار پاڻي موجود آهي ۽ ان ڊيٽا جي مدد سان نوان منصوبا جوڙڻ ۾ سولائي ٿيندي. شمسي توانائي تي هلندڙ منصوبي بابت وڏي وزير چيو ته سولر اسٽريٽ لائيٽ وارا منصوبا ٻهراڙين ۾ وڏا مشهور ٿيا آهن هر ڪوئي اهڙن منصوبن جو مطالبو ڪري رهيو آهي. ان موقعي تي سينيئر صوبائي وزير سيد مراد علي شاهه چيو ته جيڪي ڪمپنيون سولر لائيٽيون لڳائي رهيون آهن انهن وٽ اهڙو منصوبو هلائڻ لاءِ سڄي سال جو مڪمل انفرا اسٽرڪچر هئڻ لازمي آهي. ان موقعي تي فياض ٻٽ چيو ته هو رڳو انهن ڪمپنين سان معاهدو ڪري رهيو آهي جيڪي نه صرف سولر لائيٽ لڳائينديون پر انهن جي مرمت جون پڻ ذميوار هونديون. هن چيو ته بجلي چوري روڪڻ لاءِ هن سمورن ضلعي ڊپٽي ڪمشنرن سان مانيٽرنگ ڪميٽيون ٺاهڻ جي حوالي سان رابطو ڪيو آهي. وڏي وزير سيد قائم علي شاهه ايڊيشنل چيف سيڪريٽري کي هدايت ڪئي ته هو سمورن منصوبن جي ڪوالٽي کي يقيني بڻائڻ لاءِ پنهنجي مانيٽرنگ سسٽم کي وڌيڪ مضبوط بڻائين ۽ ان حوالي سان وقت بوقت پنهنجيون سفارشون به موڪليندا رهن.

 

ڪراچي ۾ بي رحم ڊمپر هڪ ئي ڪٽنب جي 5 ڀاتين جي حياتين جا ڏيئا اجهائي ڇڏيا

ڪراچي (اسٽاف رپورٽر) ڪراچي ۾ بي رحم ڊمپر ڊرائيور هڪ ئي ڪٽنب جي 5 ڀاتين کي چيڀاٽي حياتين جا ڏيئا اجهائي ڇڏيا، جن ۾ ٻه معصوم ٻارڙا به شامل آهن، ميڊِيا رپورٽن  مطابق ڪراچي جي علائقي بلديا ٽائون نمبر 2 ويجهو تيز رفتار ڊمپر سامهون ويندڙ موٽرسائيڪل کي زوردار ٽڪر هنيو، جنهن جي نتيجي ۾ 5 ماڻهو ٿڏي تي ئي فوت ٿي ويا، خبر پوڻ تي پوليس حادثي واري هنڌ پهچي وئي، جنهن کانپوءِ فوتين جا لاش کڻائي سول اسپتال نيا ويا، جڏهن ته ڊمپر ڊرائيور ڀڄي وڃڻ ۾ ڪامياب ٿي ويو، پوليس مطابق حادثي جي نتيجي ۾ فوت ٿيلن ۾ 30 ورهين جو محمد نذير، 15 ورهين جي سڪينا، 10 ورهين جي افضا، 25 ورهين جو رضوان ۽ ٻن ورهين جي دعا شامل آهن، پوليس ٻڌايو ته حادثي جو شڪار ٿيل ماڻهو شادي جي تقريب مان واپس اچي رهيا هئا، سندن لاش ضروري ڪارروائي کانپوءِ وارث کڻائي ويا.

 

لنڊن پوليس الطاف حسين کي پاسپورٽ ڏئي ڇڏيو آهي: ايم ڪيو ايم

لنڊن (مانيٽرنگ ڊيسڪ) لنڊن ميٽرو پوليٽن پوليس ايم ڪيو ايم جي سربراهه الطاف حسين کي پاسپورٽ واپس ڪري ڇڏيو آهي. پاڪستان جي ويزا لاءِ فارم به حاصل ڪري ورتو آهي. ايم ڪيو ايم ترجمان موجب رابطا ڪميٽي سان مشوري کانپوءِ انهيءَ حوالي سان حتمي فيصلو ۽ قدم کنيا ويندا. واضح رهي ته الطاف حسين جو پاسپورٽ مني لانڊرنگ ڪيس جي جانچ دوران ميٽروپوليٽن پوليس واپس ورتو هو.

 

سنڌ اسيمبلي اجلاس دوران اسپيڪر محمد حسين سخت جملن جي ڏي وٺ، مائيڪ بند ڪرڻ تي متحده ميمبرز جو احتجاج

ڪراچي (اسٽاف رپورٽر) سنڌ اسيمبلي جي اجلاس ۾ سوالن جوابن جو وقفو هلندڙ آهي، جڏهن ته متحده ميمبر محمد حسين ۽ اسپيڪر وچ ۾ سخت جملن جي ڏي وٺ ٿي. سنڌ اسيمبلي جو اجلاس اسپيڪر آغا سراج دراني جي صدارت هيٺ شروع ٿيو. سوالن جوابن جي وقفي دوران ٻڌايو وڃي ته سمنڊ ۾ ڪيترو گندو پاڻي وڃي رهيو آهي؟ جنهن تي صوبائي وزير سڪندر مينڌري چيو ته ڪيترائي ملين ليٽر گندو پاڻي وڃي رهيو آهي، پاڻي کي ماپڻ جو ڪو پيمانو ناهي. هن چيو ته صنعتون پنهنجو ٽريٽمينٽ پلانٽ لڳائين، ڊي ايڇ اي، ڪي پي ٽي ۽ ٻيا ادارا به پنهنجو پاڻي ٽريٽ ڪري سمنڊ ۾ ڇڏين. صوبائي وزير ڄام خان شوري چيو ته لياري ندي جو پاڻي ٽريٽ ڪرڻ جو پراجيڪٽ شروع ڪيو ويو آهي. وزير بابت ذاتي جملا چوڻ تي اسپيڪر متحده ميمبر محمد حسين کي روڪي ڇڏيو. ان موقعي تي متحده ميمبر محمد حسين ۽ اسپيڪر وچ ۾ سخت جملن جي ڏي وٺ ٿي. محمد حسين چيو ته اسپيڪر رولز خلاف ايوان هلائي رهيو آهي جڏهن ته آغا سراج دراني چيو ته اسيمبلي رولز موجب هلائي پئي وڃي. سينيئر صوبائي وزير نثار کهڙي چيو ته محمد حسين کي اهڙي قسم جا لفظ استعمال نه ڪرڻ گهرجن، اسپيڪر سندس خلاف ايڪشن وٺي. فنڪشنل ليگ ميمبر مهتاب اڪبر راشدي چيو ته ڳالهه رڳو سمنڊ جي ناهي، ڍنڍون ۽ درياهه به گندا ٿي رهيا آهن، منڇر ڍنڍ مڪمل طور گدلاڻ جي ور چڙهي وئي آهي. هن چيو ته ڇا ماحوليات واري کاتي ڪنهن کي نوٽيس جاري ڪيا آهن؟ جيڪڏهن ڪنهن خلاف ڪارروائي ٿيندي ته ٽربيونل اثرائتا ٿيندا ۽ نه ئي فيصلا چيلينج ٿيندا. مهتاب اڪبر راشدي چيو ته صنعتن کي ٻڌايو وڃي ته اهي ٽريٽمينٽ پلانٽ نصب ڪن، جنهن تي سڪندر مينڌري چيو ته هـُو نوٽيس ڏيندا آهن پر انوائرمينٽ ٽربيونل پاڻ ٻڌڻي ڪندو آهي. سڪندر مينڌري چيو ته ڪراچي ۽ حيدرآباد جي وچ ۾ هڪ پلانٽ آهي جيڪو ماحولياتي گدلاڻ پيدا ڪري رهيو آهي ان ڏانهن نوٽيس جاري ڪيا ويا آهن عمل نه ڪيو ته چالان ڪيو ويندو.

 

ٿرپارڪر ۾ غذائي کوٽ ۽ سهولتن جي اڻهوند سبب وڌيڪ 6 ٻارڙا حياتيون وڃائي ويٺا

مٺي (نمائندو) ٿرپارڪر ۾ غذائيت جي کوٽ ۽ سهولتن جي اڻهوند سبب اڄ وڌيڪ 6 ٻارڙا حياتيون وڃائي ويٺا آهن، جنهن بعد فوتي ٻارڙن جو انگ وڌي 198 ٿي ويو آهي. مٺي سول اسپتال ۾ پورهيت مقيم  جو 5 سالن جو ٻارڙو ابراهيم سمون ۽ ڳوٺ مياري هڱورجا جي رهواسي نثار احمد جو به هڪ ڏينهن جو ٻارڙو بيماري جي سٽ نه سهندي فوت ٿي ويو. ڇاڇري جي نجي اسپتال ۾ ڏيڍ مهيني جو اشوڪ ۽ ڳوٺ رڙگر  ۾ ٻن ورهين جي نازيا فوت ٿي وئي، جڏهن ته ڪلوئي جي بيسڪ هيلٿ ينٽر ۾ پورهيت عزيز لنڊ جو تازو ڄاول ٻارڙو ۽ ڏانو ڌانڌل شهر ۾ ٽن ڏينهن جي ماروي فوت ٿي وئي. ڏڪاريل ٿر ۾ غذائيت جي کوٽ، مختلف بيمارين ۽ اسپتالن ۾ سهولتن جي اڻهوند سبب 47 ڏينهن دوران حياتيون وڃائندڙ ٻارڙن جو انگ وڌي  198 ٿي ويو آهي.ٿرپارڪر ۾ ٻن مهينن دوران غذائيت جي کوٽ سبب 198 ٻارڙا فوت ٿيڻ بعد سنڌ حڪومت ۽ انتظاميا کي ڪڻڪ جي ورهاست جو خيال اچي ويو، وڏي وزير جي حڪم بعد انتظاميا ننگرپارڪر جي گدامن ۾ گذريل سال کان رکيل ڪڻڪ جي 12 هزار ٻورين جي ورهاست شروع ڪري ڇڏي. وڏي وزير سيد قائم علي شاهه جي هدايتن کانپوءِ ٿرپارڪر ۾ ڪڻڪ جي ورهاست شروع ٿي وئي آهي. مختيارڪار نينگرپارڪر ۽ اي سي پاران شهر جي گودامن ۾ گذريل سال کان رکيل ڪڻڪ جون 12 هزار ٻوريون ورهايون پيون وڃن. ڪمشنر ميرپورخاص شفيق مهيسر موجب ٿرپارڪر ۾ 2 لک 60 هزار 830 ڪٽنبن ۾ ڪڻڪ جون هڪ لک 30 هزار 414 ٻوريون ورهايون وينديون ۽ في ڪٽنب کي 50 ڪلو گرام ڪڻڪ فراهم ڪئي ويندي.