تازيون خبرون

Daily Archives: February 16, 2016

قومي اسيمبلي اسلام آباد ۾ مڪاني حڪومتن جي ترميمي آرڊيننس ۾ 120 ڏينهن جي واڌ بابت ٺهراءُ جي منظوري ڏئي ڇڏي

اسلام آباد (بيورو) قومي اسيمبلي اسلام آباد ۾ مڪاني حڪومتن جي ترميمي آرڊيننس ۾ 120 ڏينهن جي واڌ بابت ٺهراءُ جي منظوري ڏئي ڇڏي آهيقومي اسيمبلي جو اجلاس اسپيڪر اياز صادق جي صدارت هيٺ ٿيو، جنهن ۾ آزاد ڪشمير ۾ فائرنگ واري واقعي تي پ پ ميمبرن سخت احتحاج ڪندي علامتي واڪ آئوٽ ڪيو. پ پ ميمبرن لٺ جي سرڪار نه هلندي، شيم شيم ۽ قاتل قاتل جا نعرا هڻندي مطالبو ڪيو ته ملوث جوابدار گرفتار ڪيا وڃن. مخالف ڌر جي واڪ آئوٽ سبب اسپيڪر اياز صادق، شيخ آفتاب ۽ وفاقي وزير پرويز رشيد کي هدايت ڪئي ته مخالف ڌر کي پرچايو وڃي. سڌسما جي وفاقي وزير پرويز رشيد اسپيڪر آڏو مخالف ڌر کي پرچائڻ بابت معذرت ڪندي چيو ته سيد خورشيد شاهه جي لسٽ ۾ هو به شامل آهي، ان ڪري ڪنهن کي پرچائڻ نه ويندو. واڪ آئوٽ کان اڳ خطاب ڪندي مخالف ڌر جي اڳواڻ سيد خورشيد شاهه چيو ته حڪمران تشدد جي رستي تي هلي پيا آهن. هن چيو ته حڪمرانن آزاد ڪشمير ۾ ڀارتي رويو اختيار ڪيو آهي، جيڪڏهن ماڊل ٽائون سانحي جي شهيدن سان انصاف ٿئي ها ته ڪوٽلي وارو واقعو پيش نه اچي ها. سندس چوڻ هو ته حڪمرانن جي سوچ آهي ته عدليا به هاڻ سندن ڪجهه نٿي بگاڙي سگهي. مخالف ڌر جي اڳواڻ چيو ته هي دور جمهوري نه پر آمراڻو آهي، هنن مفاهمتي پاليسي اڳتي وڌائڻ جي ڪوشش ڪئي پر اها اڳتي نه وڌي سگهي. سيد خورشيد شاهه چيو ته پي آءِ اي جي احتجاج ڪندڙ ڪارڪنن خلاف ۽ ڪوٽلي ۾ کليل دهشتگردي ڪئي وئي. هن چيو ته احتجاج سندن دور ۾ به ٿيندا هئا، پر انهن خلاف ڪڏهن به طاقت استعمال نه ڪئي وئي، سمورا مسئلا ڳالهين ذريعي حل ٿيندا آهن. سيد خورشيد شاهه چيو ته هنن سوچيو هو ته مارشلا کانپوءِ صورتحال تبديل ٿيندي، پر ائين نه ٿيو، هڪ وزير چيو هو ته احتجاج ڪندڙن جا پر ڪٽيا ويندا. سڌسما جي وفاقي وزير پرويز رشيد چيو ته آزاد ڪشمير جي وزيراعظم لاش ڪيرائڻ جي ڌمڪي ڏني هئي، جڏهن ته هن ڪجهه وفاقي وزيرن لاءِ توهين تي ٻڌل جملا به چيا هئا. هن چيو ته آزاد ڪشمير جي وزيراعظم چوڌري عبدالمجيد پاران ٽن وفاقي وزيرن کي بدمعاش چوڻ وارو بيان 11 جنوري جي اخبارن ۾ شايع ٿيو. سڌسما واري وفاقي وزير چيو ته اڃا تائين ڪنهن کي ڏوهي قرار نه ڏنو ويو آهي، پر ان باوجود ن ليگ جي ڪارڪنن جون گرفتاريون ڪيون پيون وڃن. هن چيو ته پ پ جي ريلي ۾ ن ليگ خلاف چڙ ڏياريندڙ ٻولي استعمال ڪئي وئي. پرويز رشيد چيو ته هو خورشيد شاهه کي منصف مقرر ڪن ٿا، اهو سمورن ثبوتن کي سامهون رکي فيصلو ڪري، قبول ڪيو ويندو. پرويز رشيد چيو ته تقرير کان ترت پوءِ ڪورم پورو نه هجڻ جي نشاندهي تي اجلاس ڪجهه دير لاءِ ملتوي ڪيو ويو، اجلاس جي ڪارروائي ٻيهر شروع ٿي ته زاهد حامد پاران مڪاني حڪومتن ۾ ترميمي آرڊيننس جو ٺهراءُ پيش ڪيو ويو. ان موقعي تي پ پ، تحريڪ انصاف ۽ جماعت اسلامي ٺهراءُ جي سخت مخالفت ڪئي، پر ان باوجود اسپيڪر ووٽنگ ڪرائي. ٺهراءُ جي حق ۾ 75 ۽ مخالفت ۾ 69 ووٽ پيا جنهن تي اسپيڪر اياز صادق ٺهراءُ جي منظوري جو اعلان ڪيو. مخالف ڌر جي اڳواڻ سيد خورشيد شاهه بل جي مخالفت ڪندي چيو ته اسلام آباد ۾ ميئر ۽ ڊپٽي ميئر جي چونڊ غيرقانوني آهي. هن چيو ته پي آءِ اي اڄ به ٺيڪ ٿي سگهي ٿي، ادارن کي خانگايو پيو وڃي، پر قرض ڏينهون ڏينهن وڌي رهيا آهن. خورشيد شاهه چيو ته وزيراعظم 2012 ۾ پي آءِ اي جي بحالي جو فارمولو ڏنو هو پوءِ ان کي ڇو خانگايو پيو وڃي. هن مطالبو ڪيو ته پي آءِ اي جي پيسي جي استعمال ٿيڻ بابت پارلياماني ڪميٽي جوڙي وڃي.

 

آزاد ڪشمير جي وزيراعظم لاش ڪيرائڻ جي ڌمڪي ڏني هئي: پرويز رشيد

اسلام آباد (بيورو) پرويز رشيد چيو آهي ته آزاد ڪشمير جي وزيراعظم لاش ڪيرائڻ جي ڌمڪي ڏني هئي. جڏهن ته هن ٽيلفونڪ ڳالهه ٻولهه دوران وفاقي وزيرن کي به گهٽ وڌ ڳالهايو. قومي اسيمبلي ۾ خطاب ڪندي پرويز رشيد چيو ته هن چوڌري عبدالجميد کي چيو هو ته سخت ٻولي کيس نه ٿي سونهيَ. هن چيو ته ڪوٽلي واقعي ۾ اڃا تائين ڪنهن کي به ڏوهي قرار نه ڏنو ويو آهي، پوءِ نون ليگ جي ڪارڪن جون گرفتاريون ڇو ڪيون پيون وڃن. پرويز رشيد چيو ته آزاد ڪشمير جي وزيراعظم پاران سخت بيانن جو سلسلو اڃا به جاري آهي. هن چيو ته هو سيد خورشيد شاهه کي منصف مقرر ڪن ٿا، سموري صورتحال سندس سامهون رکي ويندي،هو جيڪو به فيصلو ڪري کين قبول هوندو.

 

دهشتگردي عالمي مسئلو آهي جنهن جو سڄي دنيا ۾ مقابلو ڪرڻو پوندو: عاصم سليم باجوه

ڪراچي (مانيٽرنگ ڊيسڪ) ڊي جي آءِ ايس پي آر ليفٽيننٽ جنرل عاصم سليم باجوه چيو آهي ته دهشتگردي عالمي مسئلو آهي. جنهن جو سڄي دنيا ۾ مقابلو ڪرڻو پوندو، سڄي دنيا کي سندن ڪوششن جي حمايت ڪرڻ گهرجي . هڪ انٽرويو ۾ ڊي جي آءِ ايس پي آر ليفٽيننٽ جنرل عاصم سليم باجوه چيو ته پاڪستان کي ڀرپور يقين آهي ته دهشتگردي خلاف جنگ ۾ ان جو رخ بلڪل صحيح آهي. هن چيو ته هو دهشتگردي ۽ انتهاپسندي کان پاڪ پاڪستان چاهين ٿا ان لاءِ کين دنيا جي مدد گهرجي. ڊي جي آءِ ايس پي آر چيو ته جن ملڪن دهشتگردي واري جن کي وڌايو آهي اهي ان جي خاتمي لاءِ سندن مدد ڪن. فوجي ترجمان جو چوڻ هو ته دهشتگردن پاران دهشتگردي جون ايڪڙ ٻيڪڙ ڪارروائيون پاڪ فوج جي عزم ۾ رڪاوٽ نه ٿيون ٿي سگهن. پاڪ فوج جي ترجمان چيو ته دهشتگردي خلاف جنگ ۾ آپريشن ضرب عصب جي شروعات کان پاڪ فوج هميشه دهشتگردن تي حاوي رهي آهي . هن چيو ته انهن دهشتگردن کي سندن ڪئمپن ،پناهگاهن ۽ جتي به اهي پنهنجا هٿيار لڪائي رهيا هئا انهن کي ڪڍي انهن جي پناهگاهن کي تباه ڪيو ويو آهي. دهشتگردي خلاف جنگ ۾ بي مثال قربانين جي باوجود پاڪستان جي دهشتگردن سان ڳٺ جوڙ جي حوالي سان اولهه واري ملڪن ۾ موجود تاثر بابت ليفٽيننٽ جرنل عاصم سليم باجوه چيو ته جيڪڏهن ڪوئي اهڙا الزام لڳائي ٿو ته اها واقعي افسوس جوڳي ڳالهه آهي . هن چيو ته ان جهڙا الزام بي بنياد آهن ۽ سندن سمجهه کان مٿاهان آهن. فوجي ترجمان ملڪ ۾ اڃان به ڪجهه دهشتگردن جي موجودگي واري خبرن بابت چيو ته دهشتگردي جون پاڙون پٽڻ لاءِ پاڪ فوج جي اسٽريٽجي بنا ڪنهن فرق جي جاري آهي جنهن ۾ ڪنهن سان ڪابه رعايت نه ڪئي ويندي. هن چيو ته پاڪستاني قوم دهشتگردي خلاف جنگ ۾ سڀ کان وڌيڪ قربانيون ڏنيون آهن جن کي ملڪ اندر توڙي ٻاهر تسليم ڪيو وڃي ٿو.

 

پڇ تي لت اچڻ بابت وضاحت ڪندس ته ڳالهه پري هلي ويندي: مولابخش چانڊيو

حيدرآباد (بيورو) سڌ سماءُ واري صوبائي صلاحڪار مولابخش چانڊئي چيو آهي ته پڇ تي لت اچڻ بابت وضاحت ڪندس ته معاملا وڌيڪ بگڙي ويندا، واپڊا ۽ حيسڪو ۾ وائسراءِ ويٺل آهن، واپڊا واري وزير کي سمورا جلال رڳو سنڌ اندر ڏيکارڻا آهن، بجلي بند ڪري سنڌ جي ماڻهن کي احتجاج تي مجبور ڪيو پيو وڃي. حيدرآباد سول اسپتال ۾ ٽنڊو ڄام ٽرين حادثي جي زخمين ۽ اسپتال جي مختلف وارڊز جو معائنو ڪرڻ بعد ميڊيا سان ڳالهائيندي مولابخش چانڊئي چيو ته ڌانڌليون ۽ تڪليفون رڳو پيپلز پارٽي برداشت ڪيون آهن. ، آزاد ڪشمير واقعي تي هن چيو ته اهو سڀ ڪجهه چونڊون کٽڻ لاءِ نواز ليگ ڪري رهي آهي، آزاد ڪشمير پرامن آهي، سياست جي ور نه چاڙهڻ گهرجي، واپڊا ۽ حيسڪو ۾ وائسراءِ ويٺل آهن. واپڊا وزير کي سمورا جلال رڳو سنڌ اندر ڏيکارڻا آهن، سنڌ جي ماڻهن کي احتجاج ڪرڻ لاءِ مجبور ڪيون پيو وڃي، بقايائن ۽ چوري روڪڻ لاءِ واپڊا سان گڏ آهيان پر ٻن ماڻهن جي ڪري سڀني سزا نه ڏني وڃي. پوري قوم فوج ۽ جنرل راحيل شريف سان سندس بهادر ۽ اسٽينڊ تي گڏ آهي، فوج سان ڪنهن به سياسي جماعت جو ڪوبه تضاد نه آهي، نيشنل ايڪشن پلان صوبن کي لاڳو ڪرڻ آهي.

 

سنڌ اسيمبلي سنڌ هندوز ميريج بل 2016 اڪثريت راءِ سان منظوري ڏئي ڇڏي

ڪراچي (اين اين آءِ) سنڌ اسيمبلي سومر تي سنڌ هندوز ميريج بل 2016 جي اڪثريت راءِ سان منظوري ڏئي ڇڏي جنهن تحت هندو، جين ۽ سک برادرين ۾ ٿيندڙ شادين جي رجسٽريشن لازمي هوندي بل جا متن ۽ مقصد بيان ڪندي نثار احمد کهڙو چيو ته هندو ۽ ٻين غير مسلم ڪميونٽيز ۾ ٿيندڙ شادين جي رجسٽريشن نه ٿيندي هئي ۽ شادين جو ڪاغذي ثبوت نه هئڻ سبب انهن ڪميونٽيز کي ڏکيائي پيش اچي رهي هئي ان قانون تحت کين مسلمانن وانگر شادين جي رجسٽريشن جو حق ڏنو ويو آهي بل مطابق شادين جي رجسٽريشن يونين ڪائونسل، يونين ڪميٽي ۽ بلدياتي اداري ۾ ٿيندي قانون انهن شادين تي به لاڳو ٿيندو جيڪي قانون جي منظور ٿيڻ کان اڳ ٿي چڪيون آهن ان قانون جي شيڊول اي ۾ سرٽيفڪيٽ آف ميريج يعني نڪاح نامو به تيار ڪيو ويو آهي بل تي بحث دوران مسلم ۽ غير مسلم ميمبرن ان قانون کي واکاڻيو ۽ چيو ته پاڪستان ٺهڻ کانپوءِ اهڙو ڪو به قانون نه هيو هن قانون جي گهڻو وقت اڳ ضرورت محسوس ٿي رهي هئي.

 

شرجيل ميمڻ سلطاني شاهد بڻجي چڪو آهي ۽ هاڻ سندس پ پ کان رستا ڌار آهن:نبيل گبول

ڪراچي (اسٽاف رپورٽر) نبيل گبول دعويٰ ڪئي آهي ته شرجيل ميمڻ سلطاني شاهد بڻجي چڪو آهي ۽ هاڻ سندس پ پ کان رستا ڌار آهن. هڪ انٽرويو ۾ نبيل گبول چيو ته جيستائين ڊاڪٽر ذوالفقار مرزا کان پڇاڳاڇا نه ٿيندي تيستائين عزير بلوچ خلاف ڪارروائي مڪمل نٿي ٿي سگهي. هن چيو ته سيد قائم علي شاهه کي وڏي وزير جي عهدي جو قسم کڻائڻ کانپوءِ لياري ۾ عزير بلوچ ڏانهن نيو ويو هو. هن چيو ته عزير بلوچ جي حيثيت ٺاهڻ وارو ڊاڪٽر ذوالفقار مرزا آهي، هن پنهنجي وزارت واري دور ۾ سندس مڪمل پٺڀرائي ڪئي. نبيل گبول چيو ته لياري ۾ رڳو عزير بلوچ جو حڪم هلندو هو، سندس ترقياتي رٿائن جو افتتاح به ذوالفقار مرزا ڪندو هو. هن چيو ته هن عزير بلوچ کي هٿيار ڦٽا ڪرڻ تي راضي ڪيو هو پر ڊاڪٽر ذوالفقار مرزا ايئن ڪرڻ کان روڪيو ۽ کيس کليل ڇوٽ ڏني. اڳوڻي ايم اين اي چيو ته شرجيل ميمڻ کي گرفتاري جو ڊپ آهي، انهيءَ ڪري ڏيهه ورڻ کان لنوائي پيو. نبيل گبول چيو ته آصف علي زرداري تي آڱريون کڄي رهيون آهن، کيس ترت واپس اچڻ گهرجي.

 

ڪي پي ڪي حڪومت کي احتساب ڪميشن بابت پنهنجي پوزيشن ڪليئر ڪرڻ گهرجي: سراج الحق

لاهور (بيورو) ڪي پي ڪي حڪومت کي احتساب ڪميشن بابت پنهنجو پنهنجي پوزيشن ڪليئر ڪرڻ گهرجي جڏهن ته مارچ ۾ ڪرپشن فري پاڪستان مهم جي شروعات ڪئي ويندي. لاهور جي ٽائون شپ واري علائقي ۾ ميڊيا سان ڳالهائيندي سراج الحق چيو ته الزام هڻڻ سان ڪو ڪرپٽ ناهي ٿيندو. هن چيو ته ڪي پي ڪي جي وڏي وزير جو چوڻ آهي ته هو هر قسم جي احتساب لاءِ تيار آهن. سندس چوڻ هو ته احستاب سڀنن لاءِ هڪ جهڙو هجڻ گهرجي. جماعت اسلامي جي امير چيو ته جيڪڏهن داعش خطرناڪ آهي ته عوام کي لٽڻ وارا به داعش آهن. سراج الحق چيو ته مارچ ۾ ڪرپشن خلاف شروع ٿيندڙ ڪرپشن فري پاڪستان مهم سڀني ڌرين کي شرڪت ڪرڻ گهرجي، ڇاڪاڻ ته ڪرپشن ملڪ جي پاڙن کي کوکلو ڪري ڇڏيو آهي. هن چيو ته الزام هڻڻ سان ڪو فرد يا ادارو ڪرپٽ نه ٿي ويندو آهي، جيڪڏهن ڪنهن تي الزام ثابت ٿين ٿا ته پوءِ کيس ڪرپٽ چوڻ کپي. سراج الحق چيو ته ڪرپشن خلاف مهم ۾ ملڪ جو عوام ڀرپور نموني شرڪت ڪري ته جيئن ڪرپٽ ماڻهن کان ڇوٽڪارو ملي سگهي. سندس چوڻ هو ته دوائن ۾ ملاوٽ ذريعي انساني جانين سان کيڏيو پيو وڃي، جنهن خلاف حڪومت کي تڪڙا اپاءُ وٺڻ گهرجن. هن چيو ته وفاقي حڪومت دوائن جي قيمتن ۾ گهٽتائي ڪري غريب ماڻهن کي رليف فراهم ڪري.