تازيون خبرون

Daily Archives: February 9, 2016

حڪومت جو هڙتال ختم ٿيڻ تائين پي آءِ اي ملازمن سان ڳالهيون نه ڪرڻ جو فيصلو

اسلام آباد (بيورو) وزيراعظم نواز شريف چيو آهي ته حڪومت قومي اداري پي آئي اي جي بحالي لاءِ اپاءَ جاري رکندي، اسان ڪنهن جي به دٻاءَ ۾ نه اينداسين، رستن تي ايندڙ پهرين به ناڪام ٿيا ۽ هاڻ به ناڪامي سندن مقدر آهي، ميڊيا رپورٽن مطابق وزيراعظم نواز شريف جي صدارت هيٺ اسلام آباد ۾ پي آئي اي جي حوالي سان اعليٰ سطح جو اجلاس ٿيو، جنهن ۾ وفاقي وزير پرويز رشِيد، چوڌري نثار علي خان، اسحاق ڊار،ڪي پي ڪي جو گورنر سردار مهتاب عباسي، سينيٽر مشاهدالله خان ۽ شجاعت عظيم سوڌو ايوي ايشن جو سيڪريٽري شامل ٿيا، اجلاس ۾ وزيراعظم نواز شريف کي پي آئي جي موجوده صورتحال، ملازمن جي هڙتال ۽ آپريشن جزوي طور بحال ٿيڻ بابت تفصيلي بريفنگ ڏني وئي، پي آئي اي جي چيئرمين عرفان الاهي اجلاس کي ٻڌايو ته آفيسن جي تالابندي ختم ٿي چڪي آهي ۽ ملازمن جي آفيسن ۾ واپسي به جاري آهي، هن ٻڌايو ته لازمي سروس ايڪٽ لاڳو ٿيڻ کانپوءِ ذميواريون نه نڀائيندڙ هڙتالي ملازمن کي نوٽيس به جاري ڪيا ويا آهن، ان موقعي تي ڳالهائيندي وزيراعظم نواز شريف چيو ته پي آئي اي آپريشن جي بحالي واريون ڪوششون واکاڻ جوڳيون آهن، هن چيو ته پي آئي اي جي معاملي تي ڪجهه سياسي پارٽيون پنهنجي سياست چمڪائي رهيون آهن، جيڪي ناڪام وينديون، وزيراعظم جو چوڻ هو ته ماضي جي حڪومتن پي آئي اي ۽ ٻين قومي ادارن کي تباهه ڪناري پهچايو.

 

وفاقي سرڪار نيب کي سنڌ حڪومت جي آفيسرز ۽ اڳواڻن خلاف انتقامي ڪارروائين کان روڪي: وڏو وزير

ڪراچي (اسٽاف رپورٽر) وڏي وزير سيد قائم علي شاهه، اڳوڻي صوبائي وزير  شرجيل ميمڻ جو نالو اِي سي ايل ۾ شامل ڪرڻ تي ڳڻتي ظاهر ڪندي چيو آهي ته نيب جون ڪارروائيون بدنيتي تي ٻڌل آهن، وفاقي سرڪار نيب کي سنڌ حڪومت جي آفيسرز ۽ اڳواڻن خلاف انتقامي ڪارروائين کان روڪي. وڏي وزير سيد قائم علي شاهه  پنهنجي بيان ۾ چيو آهي ته شرجيل ميمڻ پارٽي جي فعال ميمبر  سان گڏ مرڪزي اطلاعات سيڪريٽري آهي، ان ذاتي سببن جي ڪري وزارت تان استعيفيٰ ڏني آهي ۽ اهو موڪل تي پرڏيهه ويل آهي. هن چيو ته شرجيل

ميمڻ جو نالو اي سي ايل ۾ شامل ڪرڻ سراسر بدنيتي ۽ انتقامي ڪارروائي آهي. سيد قائم علي شاهه چيو ته نيب هڪ مخصوص ايجنڊا جي تحت پارٽي اڳواڻن خلاف سياسي بنيادن تي ميڊيا ٽرائل ڪري انهن جي ساک کي نقصان پهچائڻ جي ڪوشش ڪري رهي آهي. وڏي وزير وفاقي حڪومت کان  مطالبو ڪيو آهي ته شرجيل ميمڻ ۽ ٻين پارٽي اڳواڻن خلاف ڪوڙا ڪيس ۽ ريفرنس فوري طور تي واپس ورتا وڃن. وڏي  وزير  وفاقي حڪومت کان اهو به مطالبو  ڪيو آهي ته،نيب کي سنڌ جي اڳواڻن ۽ آفيسرن خلاف انتقامي ڪارروائي کان روڪيو وڃي.

 

خطي ۾ پاڪستان جي تيزي سان ٿيندڙ ترقي دنيا تسليم پئي ڪري: پرويز رشيد

پلندري (اي پي پي) اطلاعات، نشريات ۽ قومي ورثي واري وفاقي وزير سينيٽر پرويز رشيد چيو آهي ته ڪراچي کان مظفرآباد تائين هڪ ئي جهنڊو لهرائيندو جيڪو پاڪستان مسلم ليگ ن) جو سبز هلالي جهنڊو هوندو، اڄ دنيا تسليم ڪري رهي آهي ته پاڪستان خطي ۾ تيزي سان ترقي ڪري رهيو آهي، جهڙي طرح وزيراعظم نواز شريف جي قيادت ۾ پاڪستان مسلم ليگ (ن) عوام جي خدمت ڪري رهي آهي اهڙي طرح ان جو نمائندو آزاد ڪشمير جي عوام جي خدمت ڪندو جيڪي خوشيون، امن ۽ اميد ڪراچي ۽ بلوچستان جي عوام کي مليون اهي ڪشمير جي عوام کي به ملنديون، ڪشمير جي آزادي جي لاءِ ڪشميرين لازوال قربانيون ڏنيون، شهيدن جي رت ۽ غازين سان عهد ڪريونٿا ته انهن جون قربانيون رائيگان نه وينديون ۽ پنهنجي ڏکويل ڀينرن ڀائرن کي هڪ ڪرڻ جي لاءِ جنهن موٽروي ٺاهي اهو ئي ان جو رستو ڪڍندو جنهن سان ڪشمير جي ٻنهي طرفن جا وڇڙيل خاندان هڪ ٿيندا، وزيراعظم نواز شريف نه رڳو ڪشمير جي وڇڙيل خاندانن کي ملائيندو پر خطي ۾ خوشحالي پڻ آڻيندو. ڪالهه سومر ڏينهن هتي ورڪرز ڪنوينشن کي خطاب ڪندي هن چيو ته ڪنوينشن ۾ عوام جو وڏو انگ ڏسي ائين لڳي ٿو ته پورو پلندري مسلم ليگ (ن) جو شهر بڻجي چڪو آهي، توهان جي ان محبت کي ڏسي اڳيان وينداسين، راولاڪوٽ، باغ ۽ مظفرآباد وينداسين. هن چيو ته آزاد ڪشمير جو سج لهڻ وارو آهي، جتي اسيمبلي ۾ مسلم ليگ (ن) ٻه ڀاڱي ٽي اڪثريت سان ايندي، ڪارڪنن جي محبت سان پارٽي کي نئين طاقت ملندي. هن چيو ته ڀمڀر مان جيڪو قافلو شروع ٿيو اهو ميرپور، ڪوٽلي ۽ پلندري پهتو، پوءِ مظفرآباد پهچندو، مظفرآباد جي عوام آزاد ڪشمير جي حڪمرانن کي ڪوهالا جي هن پار پهچائيندي ڇو ته آزاد ڪشمير حڪومت جو صدر ۽ وزيراعظم اسلام آباد ۾ نظر اچن ٿا، انهن کي ڪشمير جي شهرن ۾ نه ٿو ڏٺو وڃي. هن چيو ته پلندري جي عوام آزاد ڪشمير جي حڪمرانن جي مظفرآباد کان اسلام آباد جي لاءِ ٽڪيٽ ڪاٽي ڇڏي آهي. هن چيو ته وفاقي حڪومت آزاد ڪشمير حڪومت کي 300 ارب رپيا ترقياتي خرچن جي لاءِ ڏنا، جيڪڏهن هر ضلعي تي 30 ارب رپيا خرچ ٿين ها ته ڪشمير تمام گهڻو ترقي يافته بڻجي وڃي ها. پر آزاد ڪشمير حڪومت ترقياتي فنڊ عوام جي ترقي ۽ انفراسٽرڪچر جي لاءِ خرچ نه ڪيا، هاڻي ان پئسي جي حساب جو وقت اچي ويو آهي. هن چيو ته آزاد ڪشمير حڪومت جي ڪوشش هئي ته 2011ع وانگر 2016ع جي چونڊن کي به چوري ڪيو وڃي ان هوندي به آزاد ڪشمير جي عدليه انهن جي سازش کي ناڪام بڻائي ڇڏيو آهي. هاڻي عوام ۽ يوٿ ونگ جي ذميواري آهي ته هو ان فيصلي کي تبديل ٿيڻ نه ڏين. هن چيو ته آزاد ڪشمير ۾ سازش ڪئي پئي وڃي ته اسيمبلي جو مدو جيڪو رمضان کان اڳ ختم ٿي رهيو آهي، ان کان 5 سالن لاءِ پنهنجو نئون صدر چونڊرايو وڃي. هن چيو ته هڪ اهڙي اسيمبلي جيڪا پنهنجو آئيني مدو پورو ڪرڻ واري آهي اها ايندڙ 5 سالن جي لاءِ نئون صدر ڪيئن چونڊي سگهي ٿي. هن چيو ته ويندڙ صدر 5 سال ڇا پر 5 ڏينهن جي لاءِ به ميمبر نه ٿو چونڊجي سگهجي جنهن ڪو سٺو ڪم نه ڪيو، چوندن ۾ سندس ضمانت ضبط ٿي ويندي. هن چيو ته ايندڙ صدر کي موجوده اسيمبلي مان چونڊرائڻ غيراخلاقي ۽ غيرقانوني قدم هوندو. هن چيو ته اسان وفاق ۾ پيپلزپارٽي جي حڪومت ڏٺي ۽ ڪشمير ۾ به، نه وفاق ۾ عوام کي ڪو سک مليو ۽ نه ڪشميرين کي سک مليو. پيپلزپارٽي جي حڪومت ڏک ئي ڏنا، هاڻي وفاق ۾ پاڪستان مسلم ليگ (ن) جي حڪومت آهي، آزاد ڪشمير ۾ به (ن) ليگ جي حڪومت ٺهندي، ڪراچي کان مظفرآباد تائين هر طرف سبز هلالي جهنڊو لهرائيندو. هن چيو ته نواز شريف جي حڪومت پاڪستان کي بحرانن مان ڪڍي ترقي ۽ خوشحالي جي راهه تي آڻي ڇڏيو آهي. اڄ دنيا چوي ٿي ته پاڪستان خطي ۾ تيزي سان ترقي ڪندڙ ملڪ ۾ تبديل ٿي ويو آهي. نواز شريف جو نمائندو مظفرآباد ۾ حڪومت سنڀاليندو، ڪشمير جي ماڻهن کي اهي خوشيون، سڪون ۽ چين ملندو جيڪو بلوچستان ۽ ڪراچي کي واپس ڪيو ويو آهي. اها ئي اميد ۽ سڪون مظفرآباد، ڪوٽلي، ميرپور، ڀمڀر، باغ ۽ پلندري کي واپس ڪيو ويندو. هن چيو ته اسان جا ڀائر ڀينر ڪشمير جي ٻئي پاسي آهن انهن کي پنهنجي پيارن سان ملايو ويندو. ورڇ ٿيل خاندانن کي اهڙي طرح هڪ ڪيو ويندو جهڙي طرح وزيراعظم نواز شريف موٽروي ذريعي پاڪستان کي هڪ ڪيو آهي. اسان جو قائد ٻنهي طرفن جي ڪشميرين کي متحد ڪندو. هن چيو ته شينهن تي ٺپي جو مطلب ترقي ۽ خوشحالي آهي ۽ وڇڙيل خاندانن کي پاڻ ۾ ملائڻ آهي. ايندڙ چونڊن ۾ عوام جو فيصلو انهن ٻنهي منزلن کي ملائيندو. هن چيو ته پلندري ۾ يونيورسٽي قائم ڪرڻ جي لاءِ وزيراعظم محمد نواز شريف جي واعدي کي پورو ڪيو ويندو.

 

صدر دادو ۽ نوشهروفيروز جي تڪن تي اپيليٽ ٽربيونل جوڙي ڇڏيون

اسلام آباد (اي پي پي) صدر ممنون حسين وزيراعظم جي ايڊوائيس تي سنڌ اسيمبلي جي تڪ پي ايس 76 دادو III جي ضمني چونڊن جي موقعي تي نامزدگي ڪاغذن تي رٽرننگ آفيسرن جي فيصلن جي خلاف اپيلن جي ٻڌڻي جي لاءِ سنڌ هاءِ ڪورٽ جي ٻن ججن تي ٻڌل اپيليٽ ٽربيونل جوڙي ڇڏيو آهي جنهن موجب اپيليٽ ٽربيونل ۾ جسٽس عبدالمالڪ گادي ۽ جسٽس عبدالغني سومرو جا نالا شامل آهن. پي ايس 23 نوشهرو فيروز V جي ضمني چونڊن جي موقعي تي نامزدگي ڪاغذن  تي رٽرننگ آفيسرن جي فيصلن جي خلاف اپيلن جي ٻڌڻي جي لاءِ سنڌ هاءِ ڪورٽ جي ٻن ججن تي ٻڌل اپيليٽ ٽربيونل جوڙي ڇڏيو آهي جنهن موجب اپيليٽ ٽربيونل ۾ جسٽس عقيل احمد عباسي ۽ جسٽس شاهنواز طارق جا نالا شامل آهن.

 

پي آئي اي ملازمن جو گهرائڻ اکين تي پر واپس اچڻ مشڪل هوندو:خواجا سعد رفيق

لاهور (م.ڊ) وفاقي وزير خواجا سعد رفيق ميديا سان ڳالهائيندي چيو آهي ته پي آئي اي جا مسئلا انتظاميا نه پر ٽريڊ يونين جي ڪري ٿيا آهن،گڏيل ايڪشن ڪميٽي وارن جو گهرائڻ اسانکي اکين تي پر جيڪڏهن وياسين ته هٿين خالي واپسنه اينداسين.خواجا سعد رفيق جو چوڻ هو ته چيني ڪمپني وارن خراب انجڻ ڏني ته انهيءَ جو پڇاڻو ۽ جاچ به ٿيندي.وفاقي وزير جو چوڻ هو ته 29 انجڻ منجهان 16 انجڻون گرائونڊ ڪري ڇڏيون آهن.

 

پيپلزپارٽي جي حڪومت هميشه عوام جي خدمت لاءِ جدوجهد ڪئي آهي: نثار احمد کهڙو

لاڙڪاڻو (اين اين آءِ) سنڌ جي تعليم کاتي جي صوبائي وزير نثاراحمد کهڙو چيو آهي ته پ پ پ جي حڪومت هميشه عوام جي خدمت لاءِ جدوجهد ڪئي آهي ۽ غريب ماڻهن جي ترقي ۽ ڀلائي لاءِ جدوجهد جاري آهي اهڙن خيالن جو اظهار هن عيسائي برادري جي عريب ماڻهن ۾ چيڪ ورهائڻ جي تقريب کي خطاب ڪندي چيو هن وڌيڪ چيوت ه پيپلزپارٽي حڪومت بينظير انڪم سپورٽ پروگرام تحت عورتن کي رقم ڏيئي رهي آهي جڏهن ته نوجوانن جي روزگار لاءِ انهن کي به تربيت ڏني پئي وڃي ان موقعي تي صوبائي وزير عيسائي برادري سان تعلق رکندڙ ارم، فرخ، ارمان، شاندي ويرو، رضه ڀولا، نيم مسيح، شيراز، رفيق، بلقيس ۽ بين ۾ 5-5 هزار رپين جا چيڪ ورهايا تقريب ۾ پ پ پ اڳوڻ آفتاب نيڪ محمد ڀتو اسلم شيخ محمد امين شيخ امير بخش گاد ڊاڪٽر سڪينه گاد زليخه سومرو ۽ ٻيا پڻ موجود هئا.

 

ايان علي خلاف هڪ ٻي درخواست داخل،ڏکيا ڏينهن گهٽ ٿيڻ بدران وڌڻ لڳا

اسلام آباد (بيورو) پاڪستاني ماڊل اداڪارا ايان علي جا ڏکيا ڏينهن گهٽ ٿيڻ بدران وڌڻ لڳا،ڊالر گرل هاڻي هڪ نئين مشڪل ۾ فاسي پئي،گوهر علي نالي هڪ شهري

عدالت ۾ ايان علي خلاف درخواست داخل ڪرائي ڇڏي.شهري درخواست ۾ چيو آهي ته ماڊل انگريز ڳائڻي ايڊورڊ مايا جو ڪمرشل ڪرائڻ لاءِ کيس 60 لک رپيا ورتا،پر ڪمرشل نه ڪرائي سگهي.درخواست ۾ اهو به موقف اختيار ڪيو ويو ته ماڊل گرل 2 آڪٽوبر 2015ع تي موسيقيءَ  ڪرائڻ جو واعدو ڪيو پر هاڻي جواب ڏئي رهي آهي،جوابدار ايان خلاف دوکو ڏيڻ ۽ غداري جو ڪيس داخل ڪيو وڃي.

 

مارچ ۾ وڏين سياسي شخصيتن جي گرفتارين جو خواب ڏٺو آهي: منظور وساڻ

ڪنڊيارو(رپورٽر) معدنيات جي صوبائي وزير منظور حسين وساڻ چيو آهي ته آصف علي زرداري ۽ بلاول ڀٽو زرداري ۾ ڪي به اختلاف ناهن، سنڌ ۾ رينجرز ڪپتان جي ماتحت ڪم ڪري رهي آهي، عوام راحيل شريف کي چاهي ٿو، ان لاءِ هو عوام جي اسرار تي رٽائرڊ ٿيڻ بعد به عهدي تي ڪم ڪندو، مارچ ۾ وڏين سياسي شخصيتن جي گرفتارين جو خواب ڏٺو آهي،6

اهڙو اظهار هن ڪنڊيارو ۾ يوسي ڄام نورالله جي فوت ٿي ويل مسلم ليگ (ن) جي چيئرمين حاجي الهه ورايو سهتو جي وفات تي سندس ڀائرن ميرخان سهتو، گلزار سهتو ۽ ٻين سان تعزيت بعد صحافين سان ڳالهائيندي ڪيو، هن چيو ته سنڌ ۾ ڪامياب ٿيل ضلعي چيئرمينن جي نالن جو اعلان 10 ڏينهن اندر پارٽي چيئرمين ڪندو، چيئرمين شپ لاءِ ڪي به اختلاف ناهن، ڪجهه ماڻهو پنهنجي سياسي ساک بچائڻ لاءِ ابتا سبتا بيان ڏئي رهيا آهن، هن چيو ته سنڌ ۾ رينجرس ڪپتان جي ماتحت ڪم ڪري رهي آهي، عوام راحيل شريف کي چاهي ٿو، ان لاءِ هو رٽائرڊ ٿيڻ کانپوءِ به پنهنجي عهدي تي ٻيهر ڪم ڪري سگهي ٿو، هڪ سوال جي جواب ۾ هن چيو ته پارٽي چيئرمين بلاول ڀٽو زرداري ۽ آصف علي زرداري وچ ۾ ڪي به اختلاف ناهن، سنڌ ۾ پ پ صحيح نموني سان ڪم ڪري رهي آهي، ٿر ۾ فوت ٿيندڙ ٻارڙن بابت پڇيل هڪ سوال جي جواب ۾ هن چيو ته پ پ مخالف ماڻهو ٿر ۾ ٻارڙن جي فوت ٿي وڃڻ تي سياست چمڪائڻ جي ڪوشش ڪري رهيا آهن، ان موقعي تي ايم اين اي نواب خان وساڻ، اڳوڻو ايم پي اي مسلم ليگ (ن) اڳواڻ سيد آفتاب علي شاهه ۽ ٻيا پڻ موجود هئا.

 

سـُپريم ڪورٽ پاران لال مسجد ڪيس ۾ ڪميشن جي رپورٽ تي اٿاريل سوالن تي اٽارني جنرل کان جواب طلب

اسلام آباد (بيورو) سـُپريم ڪورٽ، لال مسجد ڪيس ۾ ڪميشن جي رپورٽ تي اٿاريل سوالن تي اٽارني جنرل کان جواب طلب ڪري ورتو آهي. جسٽس اقبال حميد الرحمان ۽ جسٽس فيصل عرب تي مشتمل سپريم ڪورٽ جي 2 رڪني بينچ لال مسجد ڪميشن بابت ڪيس جي ٻڌڻي ڪئي. ٻڌڻيءَ دوران لال مسجد ڪميشن جي رپورٽ تي اٽارني جنرل سلمان اسلم بٽ جواب داخل ڪرائيندي عدالت کي استدعا ڪئي ته ڪميشن جي رپورٽ کي پڌرو نه ڪيو وڃي. لال مسجد جي وڪيل طارق اسد چيو ته ڪميشن جي رپورٽ 30 هزارصفحن تي ٻڌل آهي، جنهن کي اٽارني جنرل پڙهيو ئي ناهي. عدالت، اٽارني جنرل کي لال مسجد ڪميشن جي وڪيل پاران اٿاريل سوالن تي جواب پيش ڪرڻ جي هدايت ڪندي ٻڌڻي اڻڄاڻايل مدي تائين ملتوي ڪري ڇڏي.

 

عذير بلوچ جاچ دوران اهم سياسي اڳواڻن سان لاڳاپن جي تصديق ڪري ڇڏي

ڪراچي (اين اين آءِ) لياري گينگ وار جي مک عذير بلوچ جاچ ۾ اهم سياسي اڳواڻن سان لاڳاپن جي تصديق ڪري ڇڏي آهي جاچ ادارن جي جاچ دوران لياري گينگ وار جي اهم جوابدار عذير بلوچ عتراف ڪندي چيو ته ان جا ڪيترن ئي سياستدانن سان واسطا هئا جن ۾ سنڌ سان تعلق رکندڙ سياستدانن جو ڳچ انگ آهي خانگي ٽي وي موجب عذير بلوچ جاچ ادارن کي ٻڌايو ته ان جا ڊاڪٽر ذوالفقار مرزا سان لاڳاپا هئا جڏهن ته نبيل گبول ۽ جاويد ناگوري سان به ان جا سٺا لاڳاپا هئا عذير بلوچ اعتراف ڪيو ته کيس پاڪستان پيپلزپارٽي جي ڪو چيئرمين ۽ اڳوڻي صدر آصف زرداري جي ڀيڻ فريال ٽالپر سميت قادر پٽيل ۽ ثانيه بلوچ جي مالڪي ۽ حمايت به حاصل هئي جاچ ادارن جاچ کان پوءِ عذير بلوچ جي سياسي سرپرستن جا نالا حڪومت کي ڏيڻ جو فيصلو ڪري ورتو ذريعن چيو ته عذير بلوچ جي اعتراف کان پوءِ انهن سياسي سرپرستن جا نالا اي سي ايل ۾ وجهڻ جي سفارش ڪئي ويندي جڏهن ته گهرو وزارت جي منظوري کان پوءِ نالا اي سي ايل ۾ شامل ڪيا ويندا. پابندي پيل پيپلز امن ڪميٽي جي سربراهه عذير بلوچ جي زال ملاقات لاءِ سنڌ هاءِ ڪورٽ ۾ درخواست داخل ڪري ڇڏي آهي درخواست ۾ موقف اختيار ڪيو ويو ته ان کي عذير بلوچ سان ملڻ جي اجازت نه پئي ڏني وڃي 30 جنوري تي عذير بلوچ کي عدالت 90 ڏينهن لاءِ رينجرز جي تحويل ۾ ڏنو هو پر اڃا تائين وڪيلن کي به ان سان ملڻ جي اجازت ناهي ڏني ويئي جنهن تي وڪيل عدالت سان رابطو ڪيو آهي ان موقعي تي عذير بلوچ جي زال جي وڪيل ميڊيا سان ڳالهائيندي چيو ته درخواست ۾ عذير بلوچ جو طبي معائنو ڪرائڻ جي به اپيل ڪئي ويئي آهي جڏهن ته اسلام آباد هاءِ ڪورٽ مان جاري ريڊ وارنٽ کي به چئلينج ڪيو ويو آهي.