تازيون خبرون

Daily Archives: February 8, 2016

خورشيد شاهه قوم کي ٻڌائي ته پنهنجي دور حڪومت ۾ ملڪ کي ڪهڙا ڪهڙا فائدا ڏنا: رانا تنوير حسين

اسلام آباد (بيورو) وفاقي وزير سائنس ۽ ٽيڪنالوجي رانا تنوير حسين اپوزيشن ليڊر خورشيد شاهه پاران وزيراعظم تي تنقيد کان پوءِ ردعمل ۾ چيو آهي ته خورشيد شاهه قوم کي اهو به ٻڌائي ته هو پنهنجي حڪومت جي ڏينهن ۾

ملڪ کي ڪهڙا ڪهڙا فائدا ڏنا وفاقي وزير پنهنجي بين ۾ چيو ته کيس 35 خطن بابت خبر پئي آهي جيڪي خورشيد شاهه وزيراعظم کي لکيا جڏهن ته جيڪڏهن پنڊوراباڪس کليو ته ڳالهه پري وڃي پوندي هن چيو ته خورشيد شاهه هڪ ميچوئر سياستدان آهي تنهنڪري ان کي اهڙي ڪڌي بيان بازي نه ڪرڻ گهرجي ۽ نه ئي کيس اپوزيشن ليڊر جي حيثيت سان اهي ڳالهيون جڳائين ٿيون.

 

وڏي وزير پاران ڪيٽي بندر واقعي تي افسوس جو اظهار، سڙي زخمي ٿيلن کي ڪراچي منتقل ڪرڻ جي هدايت

ڪراچي( اي پي پي ) سنڌ جي وڏي وزير سيد قائم علي شاهه ٺٽي ضلعي ۾ ڪيٽي بندر ۾ واقع ڳوٺ جي جهوپڙين ۾ لڳل باهه سبب هڪ ئي خاندا جي 10 ڀاتين جي فوت ٿيڻ تي گهري ڏک ۽ افسوس جو اظهار ڪيو آهي. هن چيو ته ڪيٽي بندر ۾ انساني جانين جو ضايع ٿيڻ هڪ وڏو الميو آهي جنهن جو خال ڪڏهن به ڀرجي نٿو سگهي. وڏي وزير ڪيٽي بندر جي لاڳاپيل انتظاميا کي هدايت ڪئي ته هو ڄاڻايل جاءِ جو معائنو ڪري فوري طور تي رپورٽ پيش ڪرڻ جي هدايت ڪئي.ان کان علاوه هن جهوپڙين ۾ رهندڙن جي مدد لاءِ بهتر اپاءَ ورتا وڃن ۽ سڙي زخمي ٿيلن کي فوري طور تي سول اسپتال ڪراچي جي برنس وارڊ ۾ منتقل ڪيو وڃي ۽ انهن کي علاج جون بهتر سهولتون مهيا ڪيون وڃن ۽ ان ۾ ڪا به ڪسر نه ڇڏي وڃي. وڏي وزير سڙي فوت ٿيلن جي وارثن سان تعزيت ڪئي ۽ مرحومن جي مغفرت ۽ زخمين جي جلد صحتيابي لاءِ دعا ڪئي آهي.

 

عذير بلوچ جو پ پ سان تعلق ثابت ٿيو ته جواب ڏينداسين: بلاول ڀُٽو زرداري

واشنگٽن (مانيٽرنگ ڊيسڪ) پيپلزپارٽي جي چيئرمين بلاول ڀُٽي زرداري چيو آهي ته عذير بلوچ جو پيپلزپارٽي سان ڪو به تعلق ناهي،جڏهن ته عذير بلوچ جو پ پ سان تعلق ثابت ٿيو ته هو جواب ڏيندا. واشنگٽن ۾ ميڊيا سان ڳالهائيندي پ پ چيئرمين بلاول ڀُٽي زرداري چيو ته هو عذير بلوچ واري معاملي لاءِآمريڪا ناهي آيو. هن چيو ته عذير وارو معاملو اڃا عدالت ۾ هلندڙ آهي پر ان معاملي تي پيپلز پارٽي جو ميڊيا ٽرائل ڪيو پيو وڃي. سندس چوڻ هو ته هن جو پنهنجي والد سان ڪي به اختلاف ناهن.

 

پي آءِ اي جو فلائيٽ آپريشن جذوي بحال،سعودي ۾ ڦاٿل 1450 پانڌيئڙا ڏيهه پهچي ويا

اسلام آباد/ راولپنڊي/ڪراچي (اسٽاف رپورٽر/مانيٽرنگ ڊيسڪ)پي آئي اي جون ٻه اڏامون جَدا کان پانڌئيڙن کي کڻي واپس اسلام آباد پهچي ويون آهن. تفصيل مطابق ٻنهي بوئنگ 777 جهازن ۾ 725 پانڌئيڙا واپس آيا. پي ڪي 7330 اڏام 400 عمرو ڪندڙ پانڌئيڙن کي کڻي اسلام آباد ائيرپورٽ تي پهتي،جڏهن ته پي ڪي 760 اڏام 325 عمري پانڌئيڙن کي کڻي اسلام آباد ائيرپورٽ پهتي.چيئرمين پي آئي اي،سيڪريٽري ايوي ايشن عمرو ڪندڙ پانڌئيڙن جي آجيان ڪئي. پي آءِ اي ملازمن احتجاج جاري رکندي قومي ايئر لائنز کي خانگائڻ وارو فيصلو واپس وٺڻ جو مطالبو ڪيو آهي، جڏهن ته ڇهن ڏينهن بعد جزوي طور فلائيٽ آپريشن بحال ڪيو ويو. حڪومت پي آءِ اي جو فلائيٽ آپريشن ڇهن ڏينهن کان پوءِ جزوي طور تي بحال ڪرائڻ ۾ ڪامياب ٿي وئي. ٻئي پاسي جزوي طور تي قومي ايئر لائنز فلائيٽ آپريشن بحال ڪيو ويو آهي. قومي ايئرلائنز جا ٻه بوئنگ جهاز راولپنڊي جي بينظير ايئرپورٽ کان جده لاءِ روانا ٿيا، جتان هو سوين مسافرن کي کڻي ڏيهه پهچندا. پي آءِ اي جي ترجمان جو چوڻ آهي ته جده ۽ گلت ويندڙ جهازن ۾ سمورو عملو پي آءِ اي جو هو، هن پي آءِ اي عملي کان مطالبو ڪيو ته هو غير مشروط طور تي فرض ٻيهر سنڀالين. هوڏانهن پي آءِ اي ملازمن ڇهين ڏينهن احتجاج جاري رکيو جنهن سبب فلائيٽ آپريشن بند رهيو. ملازمن جي احتجاج سبب ڪراچي، لاهور، پشاور، ڪوئيٽا، ڊيره اسماعيل خان، سکر. رحيم يار خان، ۽ ملتان سميت ملڪ جي ٻين هوائي اڏن تي فلائيٽ آپريشن معطل رهيو. احتجاج ڪندڙ ملازمن جو چوڻ هو ته جيستائين پي آءِ اي کي خانگائڻ وارو فيصلو واپس نه ورتو ويندو سندن احتجاج جاري رهندو، جڏهن ته اڄ هو مطالبن جي مڃتا لاءِ اڄ گهر ڀاتين سميت احتجاج رڪارڊ ڪرائيندا .

 

نواز شريف حڪومت نه پر بادشاهت ڪري پيو، نواز ليگ حڪومت پنجاب خلاف نفرت پکيڙي رهي آهي: عمران خان

ڪراچي (اسٽاف رپورٽر) تحريڪ انصاف جي چيئرمين عمران خان چيو آهي ته نواز شريف حڪومت نه پر بادشاهت ڪري پيو، نواز ليگ حڪومت پنجاب خلاف نفرت پکيڙي رهي آهي، پي آءِ اي معاملو پارليامينٽ ۾ اچي ها ته ڊيڊ لاڪ پيدا نه ٿئي ها. ڪراچي ۾ ميڊيا سان ڳالهائيندي عمران خان چيو ته نواز شريف جو عوامي منصوبن ۾ ذاتي مفاد هوندو آهي، ڊيزل تي 51 سيڪڙو ٽيڪس لڳايو ويو آهي، وفاقي حڪومت عوام سان ظلم ڪري رهي آهي. عمران خان چيو ته اقتصادي راهداري پاڪستان لاءِ زبردست منصوبو آهي، وزيراعليٰ ڪي پي ڪي کي منصوبي بابت ٻڌايو ئي نه پيو وڃي. عمران خان چيو ته پي آءِ اي کي نقصان ٿي رهيو آهي، پر حڪومت کي ڪو فڪر ئي ناهي، حڪومت پي آءِ اي ملازمن سان ڳالهيون ڪري، پي آءِ اي وارو معاملو پارليامينٽ ۾ اچي ها ته ڊيڊ لاڪ پيدا نه ٿئي ها. تحريڪ انصاف جي چيئرمين عمران خان وڌيڪ چيو ته نواز ليگ حڪومت پنجاب خلاف نفرتون پکيڙي رهي آهي.

 

پي آئي اي ملڪ جي سڃاڻپ آهي،ايم ڪيو ايم ملازمن جي مطالبن جي حمايت ڪري ٿي: فاروق ستار

ڪراچي (اسٽآف رپورٽر) پي آئي اي ملڪ جي سڃاڻپ آهي،اهڙن خيالن جو اظهار حڪمرانن کي نياپو ڏيندي ايم ڪيو ايم جي اڳواڻ ڊاڪٽر فاروق ستار ڪيو.سندس چوڻ هو ته  خانگائڻ جو مطلب آهي تباهه ڪرڻ ۽ ايم ڪيو ايم پي آئي اي ملازمن جي سڀني مطالبن جي حمايت ڪري ٿي.تفصيل مطابق ڪراچي پي آئي اي هيڊ آفيس ۾ گڏيل ايڪشن ڪميٽي سان گڏ احتجاج

ڪندڙ ملازمن سان ڳالهائيندي ڊاڪٽر فاروق ستار چيو ته پي آئي اي اسان جي سڃاڻپ آهي ۽ دنيا ۾ پاڪستان جي سفير آهي.ننڍپڻ ۾ ڪاغذ جا جهاز اڏائيندڙ پي آئي اي کي به اهڙي ريت سمجهون ٿا.حڪمرانن قومي ادارن جو نيلام گهر سينگاري رکيو آهي،اهڙو نيلام گهرسينگارجڻ نه ڏينداسين.ايم اين اي آصف حسنين چيو ته ايم ڪيوايم خانگائڻ جي خلاف ملازمن جي جدوجهد ۾ گڏ آهي.ايم ڪيو ايم ملازمن جي سڀني مطالبن جي حمايت ڪري ٿي.

 

ٿر ۾ معصوم ٻارڙن جي فوت ٿيڻ جو سلسلو جاري، وڌيڪ 2 فوت، انگ 141 ٿي ويو

مٺي (نمائندو) ڏڪاريل ڏيهه ٿر ۾ معصوم ٻارڙن جي فوت ٿيڻ وارن واقعن ۾ گهٽتائي اچي ناهي سگهي، وڌيڪ ٻه ٻارڙا فوت ٿي ويا، جنهن کانپوءِ 38 ڏينهن ۾ جي مختصر عرصي ۾ فوتي ٻارڙن جو انگ وڌي هڪ سئو 41 ٿي ويو آهي.. سول اسپتال مٺي ۾ خوراڪ جي کوٽ جو شڪار وڌيڪ ٻه ٻارڙا فوت ٿي ويا آهن، جنهن کانپوءِ 38 ڏينهن جي مختصر عرصي ۾ فوت ٿي ويل ٻارڙن جو انگ وڌي هڪ سئو 41 ٿي ويو آهي.. ڏڪاريل ڏيهه ٿر جي مٺي، ڇاڇرو، ڏيپلو، ننگرپارڪر ۽ ڪلوئي سميت ٻين علائقن ۾ سهولتن جي کوٽ سبب گيسٽرو، ڊائريا ۽ نمونيا جي بيماري ۾ مبتلا سوين معصوم ٻارڙن جون زندگيون داءِ تي لڳي ويون آهن. هڪ سئو 41 انساني جانيون ضايع ٿي وڃڻ باوجود سهولتن جي کوٽ ختم ڪرڻ لاءِ جوڳا اپاءُ ناهن ورتا ويا. ڏڪار سٽيل علائقن جي رهواسين جو چوڻ آهي ته ٻهراڙين وارن علائقن ۾ طبي سهولتن جي کوٽ برقرار آهي، جنهن جي نتيجي ۾ معصوم ٻارڙا اسپتال پهچڻ کان اڳ فوت ٿي رهيا آهن.