تازيون خبرون

Daily Archives: February 8, 2016

ڊپ ۾ رهڻ کي سڀ کان وڏو ڊپ سمجهان ٿي: انوشڪا شرما

ممبئي (شوبز نيوز) بالي ووڊ اداڪارا انوشڪا شرما چيو آهي ته هوءَ ڊپ ۾ رهڻ کي سڀ کان وڏو ڊپ سمجهي ٿي، کيس اميد آهي ته سونم ڪپور جي فلم نيرجا سينيمائن ۾ بنا ڊپ جي هلندي. ٽوئٽر تي ونڊيل وڊيو ۾ انوشڪا شرما چيو ته هوءَ ڊپ مان ٿيندڙ ڊپ کي وڌيڪ خطرناڪ سمجهي ٿي، سندس چوڻ هو ته مان ڪڏهن به اها شيءِ ڪرڻ کان ناهيان ڊڄندي، جيڪا مونکي ڪرڻي هوندي آهي، انوشڪا جو چوڻ هو ته کيس اميد آهي ته سونم ڪپور جي فلم نيرجا سينيما گهرن ۾ ڪوبه ڊپ نه پکيڙيندي ۽ سٺي ڪمائي ڪندي. سندس اهڙي ٽوئٽ جي جواب ۾ سونم جوابي نياپي ۾ چيو ته انوشڪا تون اداڪارا آهين ۽ اسان کي ان ڳالهه جي ضرورت آهي ته توکان اهو سکون ته بي ڊپو ڪيئن ٿي سگهجي ٿو.

 

گووندا ۽ روينا ٽنڊن هڪ ڀيرو ٻيهر گڏجي فن جو مظاهرو ڪندا

ممبئي (شوبز نيوز) بالي ووڊ اداڪار گووندا ۽ روينا ٽنڊن هڪ ڀيرو ٻيهر گڏجي فن جو مظاهرو ڪندا. ڀارتي ميڊيا مطابق ٻنهي اداڪارن کي پنهنجي ڪيريئر جي عروج جي بهترين جوڙي سمجهيو ويندو آهي ۽ هاڻ اهي ٻئي هڪ ڀيرو ٻيهر هڪ ڊانس پرفارمنس لاءِ گڏ ٿي رهيا آهن. روينا جو چوڻ آهي ته هن ۽ گووندا جي ٽائمنگ بهترين آهي ۽ هر ڪو اها ڳالهه سمجهي ٿو. هن چيو ته اسان ٻنهي جي موسيقي ۽ ڊانس لاءِ محبت هڪ جهڙي آهي.

 

انڊر 19 ورلڊ ڪپ جي ڪوارٽر فائنل ۾ ويسٽ انڊيزجي پاڪستان کي مات، قومي ٽيم ايونٽ مان ٻاهر

فتح الله (اسپورٽس نيوز) انڊر 19 ورلڊ ڪپ جي ڪوارٽر فائنل ۾ ويسٽ انڊيز جي پاڪستان کي مات،قومي ٽيم انڊر 19 ورلڊ ڪپ مان ٻاهر.بنگلاديش جي شهر فتح الله جي خان صاقحب علي عثمان  اسٽيڊيم ۾ کيڏي ويندڙ ميچ ۾ ويسٽ انڊيز پاڪستان پاران ڏنل 228 رنسن جو ٽارگيٽ 5 وڪيٽن جي نقصان تي 40 اورن  ۾ پورو ڪري ورتو.ويسٽ انڊيز پاران ٽيون املاچ ۽ شپمران هيٽ ميئر ففٽي اسڪور ڪري ٽيم جي ڪاميابي ۾ اهم ڪردار ادا ڪيو.ٻنهي رانديگرن گڏيل طور تي 54 ۽ 52 رنسون ٺاهيون.

 

مڪولم جوآسٽريليا خلاف شروع ٿيل ون ڊي ڪيريئر آسٽريليا خلاف ئي ختم

هيملٽن (اسپورٽس نيوز) نيوزيلينڊ ڪرڪيٽ ٽيم جي ڪپتان برينڊن مڪولم جو شاندار ون ڊي ڪيريئر پڄاڻي تي پهچي ويو آهي. هن گذريل ڏينهن آسٽريليا خلاف آخري ميچ کيڏي. 34 سالن جي بيٽسمين 2002ع ۾ آسٽريليا خلاف اوپننگ بيٽسمين طور ڪيريئر جي شروعات ڪئي ۽ 2016ع ۾ ئي پنهنجي آخري ميچ به آسٽريليا خلاف کيڏي رٽائرمينٽ جو اعلان ڪيو. هن وڪيٽ ڪيپنگ جا فرض پڻ انجام ڏنا. 14 سالن جي ڪيريئر ۾ هن 260 ون ڊي ميچن ۾ نيوزيلينڊ جي نمائندگي ڪئي ۽ 6083 رنسون ٺاهيون، جن ۾ 5 سينچريون ۽ 32 اڌ سينچريون شامل آهن. سندس ون ڊي ۾ هڪ اننگز جو بهترين اسڪور 166 آهي. جيڪو هن 2008ع ۾ آئرلينڊ خلاف ٺاهيو هو. برينڊن مڪولم 260 ون ڊي انٽرنيشنل ميچن ۾ وڪيٽ ڪيپنگ دوران 260 ڪيچون ۽ 15 اسٽمپ به ڪيا. واضح هجي ته هو ٽيسٽ ۽ ٽي-20 ڪرڪيٽ کيڏندو رهندو.

 

”وسي ته ٿر نه ته بر ئي بر“ : احمد الطاف حسين وڌو

سنڌ ۾مشهور چوڻي آهي ته ”وسي ته ٿر نه ته بر ئي بر“  ڇا اهو هڪ الميو آهي يا اسان ماڻهن ڪجھ چوڻين ۽ حالتن کي پاڻ تي مسلط ڪندي اهو سوچي سمجھي ڇڏيو آهي ته هتي ڪا به تبديلي اچڻ ممڪن نه آهي. روزانه اخبارون ڀريون پيون اچن ته مٺي جي اسپتال ۾ ٿر جا ننڍڙا ٻچا غذائي قلت سبب مري ويا، پر افسوس سان چوڻو ٿو پوي ته ٿر صرف مٺي شهر ۾ ڪونه آهي پر اهو پنجاب جي چولستان سان ملندڙ ۽ سنڌ جي وسيع علائقي تي هلندي راجستان ۽ ٻين  هندوستان جي علائقن تي مشتمل آهي. هتي ڪڏهن ڪنهن زماني ۾ هاڪڙو درياءَ  به وهندو هو جنهن جي وهڪري جي تبديل ٿيڻ يا ختم ٿيڻ جي ڪري اهو علائقو سامونڊي اٿل پٿل جي نتيجي يا ٻين تبديلن تحت وسيع واري جو ڍير بڻجي چڪو آهي. ان علائقي ۾ انڊيا ته پنهنجي علائقن کي ڪافي سرسبز ۽ آمد رفت جي وسيلن ۾ بهتر ڪيو آهي پر ان جي ابتڙ ميڊيا تي صرف جڏهن خبرون ڏنيون وينديون آهن ته ٿر جا ڪجھ حصا ڏيکاريا ويندا آهن ۽ مٺيءَ کي ڄڻ ته ٿر جو هيڊ ڪوارٽر ڄاڻايو ويندو آهي. معاملو ايترو ته خراب ڏيکاريو ويندو آهي جو ماڻهو سوچي دنگ رهجيو وڃن ته هوند مٺي مان موت جو راڄ ڪيئن ختم ڪرائي سگھجي ٿو ۽ مٺيءَ مان غربت جو خاتمو ڪيئن آڻي سگھجي ٿو. جڏهن ته ٿر هر هڪ  هيٺين ضلعي کي لڳي ٿو مثلاً بدين، سانگھڙ، ميرپورخاص، نوابشاھ، نوشهروفيروز، خيرپور، گھوٽڪي، ميرپور ماٿيلو وغيره. اهڙو ئي ٿر پنجاب ۾ چولستان جي نالي سان ۽ روهي جي نالي سان مشهور آهي.

ان کي خوشقسمتي سڏجي يا بدقسمتي ته جتي انسان کي رب پاڪ رکيو آهي، اتي حالتن پٽاندڙ روزگار جا ذريعا پڻ مهيا ٿيل هوندا آهن پر افسوس ته جيڪي ماڻهو اهڙن ڏورانهن علائقن مان پڙهي نڪرن ٿا اهي ئي پنهنجي علائقن ڏانهن منهن نٿا ڪن ۽ پنهنجي علائقي کي وساريو ڇڏين. ان جو سبب چند اهڙا خونخوار ماڻهو هوندا آهن جيڪي پنهنجي علائقي تي شيطاني القا قائم رکيو اچن، جن جي ڪري ترقي تي ملندڙ پئسا به پنهنجي کيسي ۾ ته مٿي ڪا به ونهوار ڪونه صرف ديسي مسئلن ۾ پنهنجون راڄڌانيون قائم ڪيون وڃن ٿيون ته جيئن جائز يا ناجائز پنهنجي حاڪميت قائم رکي سگھجي. تنهنڪري اسانکي جملي جفاڪشي ڪري جيڪي سڄاڻ خاندان اتان لڏپلاڻ ڪري پنهنجا گھر ڪراچي، حيدرآباد ۽ ٻين شهرن ۾ هڪ سٺي زندگي گذاري رهيا آهن. تن کي گھرجي ته پنهنجون صلاحيتون ننڍي توڙي وڏي پيماني تي اهڙن علائقن ۾ ڏين ته جيئن اتان جي زندگي جو معيار ۽ وسائل بهتر استعمال ٿي سگھن ۽ استحصالي ٽولي کي به هاڻي گھٽ ۾ گھٽ ايتري سمجھ اچڻ کپي ته هنن جو به مستقبل جملي ترقي ۾ آهي ۽ هو به ملي جلي پنهنجي لاءِ ٿر يا بر کي به بهشت بڻائي سگھن ٿا. ٿر جي وسيلن عام طور تي ڪوئلو وڏي پيماني تي دريافت ٿيو آهي. پر ان کان علاوه گھڻا ئي ڪاروباري موقعا ٿرين لاءِ پيدا ٿي سگھن ٿا. هيٺ انهن تي غور ڪجي ٿو.

ٿر جو سڀ کان اهم مسئلو زندگي جو بنياد هجڻ آهي ۽ اها قائم ڪرڻ لاءِ سنڌ حڪومت ناري ڪئنال جو ۽ گھوٽڪي ڪئنال جو فائدو وٺندي تقريباً پيئڻ جي پاڻي جو بندوبست چوٽيارون ڊيم جي واسطي پوري ٿر ۾ پيئڻ جو پاڻي سيمينٽيڊ نالن يا پائپن جي ذريعي ڦهلائي سگھجي ٿو. ان کان علاوه موجوده سرڪار جا لڳايل آر او پلانٽ به ڪتب آڻي سگھجن ٿا. پر جيڪڏهن نارا کي ويڪرو ڪيو وڃي ته ٻوڏ جي زماني ۾ وڏي پيماني تي اهو پاڻي اوڏانهن روانو ڪري ٿر کي مستحڪم پاڻي جو وسيلو فراهم ڪري سگھجي ٿو. هن ڏس ۾ ايريگيشن جي ماهرن کان معاونت حاصل ڪري سگھجي ٿي.

جيتري قدر ايل بي او ڊي جو تعلق آهي ته اهو پاڻي سمنڊ ۾ ڇوڙ ڪرائڻ جي بدران ٿر ۾ وڻڪاري لاءِ استعمال ڪري سگھجي ٿو. ان ڪرڻ سان ٿر جي آبهوا ۾ وڏو فرق پئجي سگھجي ٿو. هن ڏس ۾ ايريگيشن ۽ زراعت کاتي جي ماهرن کان معاونت حاصل ڪري سگھجي ٿي. ڊرپ ايريگيشن وسيلي ننڍا ننڍا علاقا چونڊجن جتي چڻي ۽ ٻين سبزين جي پوک جن ۾ تمام گھٽ پاڻي جي لاڳت هوندي آهي مثلاً سبزين جون وليون وغيره شامل ٿين ٿيون، تن سان به تمام گھڻو ڪجھ ڪمائي سگھجي ٿو. . هن ڏس ۾ ايريگيشن ۽ زراعت کاتي جي ماهرن کان معاونت حاصل ڪري سگھجي ٿي. هر علائقي جي ڊرينيج جي پاڻي تي وڻڪار جو وسيع ڄار وڇائي سگھجي ٿو. هن ڏس ۾ پبلڪ هيلٿ ۽ زراعت کاتي جي ماهرن کان معاونت حاصل ڪري سگھجي ٿي

ٿري ماڻهن کي چائنه جي ماڊل تي هنرمندي سيکاري وڃي تاڪه هو پنهنجي مال مويشي جي پيداوار ۽ ان جي گوشت، کير ۽ کلن جي تفصيلي صنعتي طور تي ٿر مان محفوظ قابل استعمال مصنوعات جي بنياد تي ڪري پنهنجو رزق ڪمائي سگھن. ٿر ۾ تعليم جو ۽ صحت جو بهترين مرڪز تڏهن ئي ممڪن ٿي سگھن ٿا جڏهن انهن علائقن ۾ يونيورسٽيون قائم ڪيون وڃن ۽ اتي جي ماڻهن کي ڊاڪٽر ۽ انجنيئر بڻايو وڃي. فلحال انهن کي خاطر خواه اسڪالرشپ ۽ مراعات ڏئي انهن کي بهترين صلاحيت يافته ڪيو وڃي.

ٿر ۾ سليڪان جنهن مان شيشي ۽ اليڪٽرانڪس جو سامان ٺهي سگھجي ٿو تنهن کي صنعتي بنيادن تي متعارف ڪرايو وڃي تاڪه روزگار جو سلسلو وڌي سگھي . ٿر جي واري اڏاوتي ڪم ۾ به استعمال ڪري سگھجي ٿي، تنهن ڪري روڊ رستا ۽ آمد رفت بهتر ڪئي وڃي ۽ ماڻهن کي ننڍين وڏين ٽرڪين خريد ڪرڻ ۾ معاونت ڏني وڃي. ٿر جي تهذيبي ڪمن ۾ ثقافت کي محفوظ ڪيو وڃي ۽ انهن کي صنعتي استعمال ۾ آڻڻ لاءِ سياحت کي باقائدگي سان فروغ ڏنو وڃي. ٿر جي هنر کي صنعتي بنيادن تي متعارف ڪرايو وڃي تاڪه روزگار جو سلسلو وڌي سگھي .

جيستائين اسان هڪ ٻئي کي زميوار قرار ڏيندا رهندا سين تيستائين صرف اسان مصيبتن کي دعوت ڏيندا رهنداسين. تنهن ڪري سنڌ جو نوجوان ننڍڙي يا ٻڍڙي کي ملي ڪري بغير ڪنهن ذات پات، مذهب، مسلڪ، رنگ و نسل جي فرق جي يا مزدور ۽ زميندار جي فرق جي باهمي عزت ۽ شعور تحت هڪ سوچ کي اڳتي آڻي سياسي ۽ سماجي تبديلين جو اهڃاڻ بڻائجي ته جيئن ترقي اسانجي مقدر ۾ هڪ تصور نه بلڪه هڪ حقيقت بڻجي سامهون اچي. اچو ته گڏجي ٿر کي وسندڙ شاداب ٿر بڻايون ۽ خوشحالي اسانجي گھرن جي اڱڻ تي مور وانگر نچي ۽ ڪڏي.     حڪومتي ادارن ۽ وس وارن اختيارين کي گذارش آهي ته مٿي ڏنل چند سفارشن کي غور طلب آڻي ٿر جي بهتري لاءِ عملي قدم کڻن.

Email:zafarhussain@ymail.com

Cell:03062998726

 

شاهه عبدالطيف يونيورسٽي خيرپور ۾ ٿيندڙ ڪرپشن ۽ خاموش انتظاميه: حفيظ عباسي

اتر سنڌ جي مشهور مادر علمي شاهه عبدالطيف يونيورسٽي خيرپور ۾ پنج سو ملين يعني پنجاهه ڪروڙ رپين جي لاڳت سان ”شاهه عبدالطيف يونيورسٽي ۾ تعليمي سهولتن جو استحڪام” جي نالي سان شروع ڪيل پراجيڪٽ رولڙي جو شڪارآهي. ٽينڊر ٿيندي ٿيندي 17 ملين يعني هڪ ڪروڙ ستر لک رپيا ڪاغذي ڪاروائي ۾ کپايا ويا آهن. ان پراجيڪٽ جي رولڙي ۽ پنج سو ملين جي گڏيل ٽينڊر خلاف خيرپور جي هڪ سماج سڌارڪ هاءِ ڪورٽ سکر ۾ پٽيشن پڻ داخل ڪرائيندي سپرا SPRA کي درخواست پڻ ڏني آهي. جنهن کانپوءِ هاءِ ڪورٽ ۽ سپرا SPRA پراجيڪٽ جي ڪوآرڊينيٽر ممتاز لاکو کان پراجيڪٽ جا تفصيل ورتا ويا آهن. اهڙي تفصيل وٺڻ کانپوءِ هاءِ ڪورٽ ۽ سپرا SPRA يونيورسٽي انتظاميه کي ڇنڊ پٽيندي اهو چيوته هي پئسا جيڪي هيڪ HEC يونيورسٽي کي تعليمي سهولتن جي استحڪام لاءِ ڏنا هئا. ان پراجيڪٽ تحت شاگردن لاءِ هاسٽل سميت پنج بلاڪ تعمير ٿيڻا هئا ۽ انهن پنجن بلاڪن ۾ مختلف ڪم جنهن ۾ بجلي، رنگ، فرنيچر ۽ ٻيا جيڪي ڪم هئا تن جو الڳ الڳ ٽينڊر ڪرائي الڳ الڳ ٺيڪيدار کي ڏنا وڃن. پر يونيورسٽي انتظاميه انهن قانونن جي ابتڙ ٽينڊر شايع ڪرايو. عدالت سڳوري ۽ سپرا SPRA يونيورسٽي انتظاميه کي حڪم ڪيو ته انهن ڪمن جو الڳ ٽينڊر ڪرايو وڃي. عدالتي حڪمن جي ابتڙ شاهه عبدالطيف يونيورسٽي انتظاميه ٻيهر اهو ٽينڊر گڏيل ڪرائي ان ڳالهه جو ثبوت ڏنو آهي ته ڪرپشن ڪرڻ جي لاءِ ۽ پئسا ڦٻائڻ جي لاءِ ڪنهن به قانون کي ڪنهن به هنڌ ڪنهن به اداري ۾ ۽ ڪنهن به وقت ٽوڙي مروڙي سگهجي ٿو.

حيرت ان ڳالهه جي آهي ته 17 ملين يعني هڪ ڪروڙ ۽ ستر لک رپيا ٽينڊر ٿيندي ٿيندي رفو چڪر ٿي ويا آهن. پراجيڪٽ مطابق ٺهندڙ پنج بلاڪ به نه ٺهيا. صرف ڪاغذن جي خرچي ۾ سترنهن ملين رپيا کپايا ويا ۽ اهي به سپرا SPRA ۽ هاءِ ڪورٽ جي حڪمن جي باوجود. يونيورسٽي انتظاميه اهو ٻڌائي ته توهانکي پنج سو ملين جنهن ڪم جي لاءِ مليا اهو ڪم به نه ٿيو ۽ توهان ابتو سترنهن ملين کپائي ڇڏيا. جيڪي ڪٿي به ظاهر نه ٿا ٿين. ڀلا ان ڳالهه جي ڪهڙي ضرورت پئي جو هاءِ ڪورٽ ۽ سپرا جي جهلڻ باوجود يونيورسٽي انتظاميه الڳ الڳ ٽينڊر جي بجاءِ سڀني ڪمن جو مشترڪه يعني هڪ ئي ٽينڊر ڪرايو. جنهن سماجي اڳواڻ هاءِ ڪورٽ ۽ سپرا ۾ ان پراجيڪٽ جي رولڙي ۽ 17 ملين جي مبينا ڪرپشن جي خلاف سپرا ۽ هاءِ ڪورٽ ۾ اپليڪيشن داخل ڪرائي آهي. ان ۾ هن پاران اهو ڄاڻايو ويو آهي ته يونيورسٽي انتظاميه جنهن کي وڻي ٿو ان کي ٺيڪا ڏئي نوازڻ ۾ پوري آهي. قانون مطابق ڪرڻ جي لاءِ تيار نه آهن ۽ هاءِ ڪورٽ ۽ سپرا ۾ درخواست داخل ڪرڻ کانپوءِ هاءِ ڪورٽ ۽ سپرا جي منع نامي کان پوءِ به هنن 17 ملين صرف ڪاغذي ڪاروائي ۾ ختم ڪري ڇڏيا. سماجي اڳواڻ ڪورٽ جي حڪمن جي ڀڃڪڙي ڪرڻ تي پڻ درخواست داخل ڪرائي ڇڏي آهي. اهڙي درخواست جي پوئواري ڪندڙ خيرپور جي ناليواري ايڊووڪيٽ محمد دائود ڪُٻر چيو ته يونيورسٽي انتظاميه خيرپور جي عام ماڻهن جي سماجي اڳواڻن جي ڪنهن به لکيل پڙهيل ماڻهو جي يا ڪنهن ڪورٽ يا وس واري اداري جي ڪجهه به ٻڌڻ لاءِ تيار نه آهي. هو بس هڪڙي ئي ڳالهه تي بيٺا آهن ته اسان کي ڪرپشن ڪري پنهنجن من پسند ماڻهن جا پيٽ ڀرڻا آهن ۽ انهن ماڻهن کي فائدو ڏيڻو آهي جيڪي اسانجي ها ۾ ها ملائين ٿا.

يونيورسٽي انتظاميه جي اهڙي عمل خلاف خيرپور جا سماجي اڳواڻ خيرپور سڌاريو ڪميٽي جي اڳواڻ راحيل لاڙڪ، نوجوان اتحاد جي اڳواڻ شڪيل جانوري، نوجوان ترقي پسند فورم جي مرڪزي اڳواڻ عبدالستار مهراڻي، علم دوست ادبي دوست جي مرڪزي جنرل سيڪريٽري حفيظ عباسي ۽ ٻين سماجي اڳواڻن وزير اعليٰ سنڌ، وزير اعظم پاڪستان، نيب جي چيئرمين، سپريم ڪورٽ جي چيف جسٽس ۽ ٻين وس وارن کان مطالبو ڪندي چيو آهي ته شاهه عبدالطيف يونيورسٽي خيرپور ۾ ٿيندڙ اهڙي ڪرپشن تي خاموشي اختيار ڪرڻ بجاءِ انجي جوڳي جاچ ڪري ان ۾ ملوث ڪارين رڍن کي ڪيفر ڪردار تي پهچايو وڃي. هنن چيوته شاهه عبدالطيف يونيورسٽي ڪيترن ئي سالن کان نوجوانن کي سٺي تعليم ڏيندڙ ادارو آهي. عالمي ادارا انجي تعليم جي مطابق هن اداري کي ڪروڙين رپين جي فنڊنگ ڪري رهيا آهن ۽ ان فنڊنگ ۾ ان حد تائين ڪرپشن ٿيندي ته اڳتي هلي اهي ادارا فنڊنگ ڪرڻ ڇڏي ڏيندا ۽ هي اسانجو وڏو ادارو ڪرپشن ڪري پوئتي پئجي ويندو. وس وارا نوٽيس وٺي يونيورسٽي جي لاءِ آيل اهي پئسا ڪارين رڍين کان واپس ڪرائي شاگردن جي فلاح و بهبود تي خرچ ڪرائين جيئن اسانجا شاگرد بهترين سهولتن ۽ سٺي ماحول ۾ اعليٰ تعليم پرائي سگهن. يونيورسٽي انتظاميه جو موقف وٺڻ لاءِ پروفيسر تاج لاشاري سان رابطو ڪيوسين ته جواب ڏيندي هن چيوته يونيورسٽي ۾ ڪابه ڪرپشن نه پئي ٿئي. اها بس واويلا آهي. يونيورسٽي خلاف ڪو ٺيڪيدار پروپيگنڊه ڪري رهيو آهي.

********

 

ڪيٽي بندر واقعو ۽انتظاميه جي اڻويهه سئو اونڌهه واري سجاڳي

گذريل ڏينهن ٺٽي ضلعي سان تعلق رکندڙ ڪيٽي بندر جي ٻيٽ ۾ قائم ڳوٺ نبو جت ۾ گهر ۾ باهه لڳڻ سبب 7 ٻارڙن ۽ ٻن عورتن سميت 10 گهر جا ڀاتي سڙي فوت ٿي ويا. پيٽ گذر لاءِ سمنڊ جي ٻيٽ اندر قائم ڳوٺ نبو جت ۾ ان وقت واقعو پيش آيو سمورا گهر ڀاتي رات جي ماني کائي رهيا هئا. ڊيزل جو ڊرم چـُلهه مٿان ڪرڻ سبب اک ڇنڀ ۾ باهه ڪکائين گهر کي وڪوڙي وئي. باهه ايتري ته تيز هئي جو سمورن گهر ڀاتين کي ٻاهر نڪرڻ جو موقعو نه مليو ، جنهن سبب 4 مرد، 3 ٻارڙا ۽ 3 عورتون سڙي فوت ٿي ويون. باهه جي شعلن گهرن ۾ موجود نبو جت سندس پٽ شڪيل، حميد مير جت، عزيز مير جت، عورت شڪيلان جت، اسلام جت، عورت غازي خاتون، نينگري مسمي، نينگري لاڏان ۽ غلام رسول جت کي ساڙي ڪوئلو ڪري ڇڏيو. باهه لڳندي ئي ڳوٺ ۾ موجود ٻين رهواسين پنهنجي مدد پاڻ تحت ڪوششون ڪري غضب جي باهه تي ضابطو آڻي سڙي زخمي ٿيل حسين جت، مارل خاتون، عالم ۽ هڪ نينگري کي ٻاهر ڪڍيو . ڳوٺاڻن سڙي زخمي ٿيل چئني ڄڻن کي ڪراچي ڏانهن منتقل ڪيو، جن جي حالت به ڳڻتي جوڳي ٻڌائي پئي وڃي. ڳوٺاڻن جو چوڻ آهي ته انتظاميا کي ته اطلاع ڏنو آهي پر بروقت ڪو به عملدار ناهي پهتو . ڊي سي ٺٽي نديم الرحمان ميڊيا کي ٻڌايو ته واقعو سمنڊ اندر بِت ۾ ٿيو آهي جتي پهچڻ لاءِ 2 ڪلاڪ لڳي سگهن ٿا، تنهنڪري انتظاميا جلد پهچي نه سگهي پر متاثرن جي هر ممڪن مدد ڪئي ويندي، واقعي تي افسوس جواظهار ڪندي علائقي جي چونڊيل نمائندن پ پ اڳواڻ ۽ اڳوڻي ايم پي اي صادق ميمڻ ۽ اڳوڻي ايم پي اي غلام قادر پليجي چيو ته متاثر فوتين جي وارثن توڙي سڙي زخمين جي مڪمل مدد ڪئي ويندي. ڪيٽي بندر واقعي کي دردناڪ قرار ڏيندي چيو ته هن وقت سڙي زخمي ٿيلن جون زندگيون بچائڻ لاءِ قدم کنيا وڃن.اها حقيقت آهي ته قدرتي آفتون پڇي ناهن اينديون پر ڪنهن به آفت کي منهن ڏيڻ لاءِ انتظاميا جي ذميواري آهي ته متاثرن جي هر ممڪن مدد لاءِ اڳتي اچڻ گهرجي ته جيئن ڪنهن لاپرواهي سبب وڌيڪ جانيون ضايع نه ٿي سگهن.

سنڌ جي وڏي وزير سيد قائم علي شاهه ٺٽي ضلعي ۾ ڪيٽي بندر ۾ واقع ڳوٺ جي جهوپڙين ۾ لڳل باهه سبب هڪ ئي خاندا جي 10 ڀاتين جي فوت ٿيڻ تي گهري ڏک ۽ افسوس جو اظهار ڪندي چيو آهي ته ڪيٽي بندر ۾ انساني جانين جو ضايع ٿيڻ هڪ وڏو الميو آهي جنهن جو خال ڪڏهن به ڀرجي نٿو سگهي. وڏي وزير ڪيٽي بندر جي لاڳاپيل انتظاميا کي هدايت ڪئي ته هو ڄاڻايل جاءِ جو معائنو ڪري فوري طور تي رپورٽ پيش ڪرڻ جي هدايت ڪئي.ان کان علاوه هن جهوپڙين ۾ رهندڙن جي مدد لاءِ بهتر اپاءَ ورتا وڃن ۽ سڙي زخمي ٿيلن کي فوري طور تي سول اسپتال ڪراچي جي برنس وارڊ ۾ منتقل ڪيو وڃي ۽ انهن کي علاج جون بهتر سهولتون مهيا ڪيون وڃن ۽ ان ۾ ڪا به ڪسر نه ڇڏي وڃي.

چونڊيل نمائندن جي بقول ته آفتون پڇي ناهن اينديون سائين جن کي عرض آهي ته هي ته پاڻي اندر واقعو ٿيو آهي سڪي تي ٿيندڙ واقعن ۾ توهان وري ڪهڙا اڪ ڪارا ڪيا آهن، ڊي سي صاحب کي عرض آهي ته سائين جي بروقت امدادي ڪم نه ٿو ٿي سگهي ته بعد ۾ ڇا لاشن کي وڃي بچائيندا، هي ته ٻيٽ تي واقعو پيش آيو آهي پر مين شهرن ۾ به جيڪڏهن حادثا ٿين ٿا ته به انتظاميه پوليس جيان اصل مهل ٽاري ٺريل ماحول ۾ وڃي پنهنجا پر ڪڏائيندي آهي، دنيا چنڊ تي پهتي آهي پر اسان جو سسٽم اڃان به اڻويهه سئو اونڌهه ۾ پيو هلي، دنيا چنڊ تي پهتي اسان اڃان زمين کي نه ماپي سگهيا آهيون، هئڻ ته ائين گهرجي ته حادثن کان اڳ ان جو تدارڪ ڪيو وڃي پي جي ائين نٿو ٿي سگهي ته خدارا اهڙو سسٽم متعارف ڪرايو جو گهٽ ۾ گهٽ موقعي تي ته پهچي سگهجي.

 

ڪيٽي بندر ۾ گهر کي باهه، 3 ٻارڙن ۽ 3 عورتن سميت 10 ڄڻا سڙي فوت

ٺٽو (ڊ ر) ڪيٽي بندر جي ٻيٽ ۾ قائم ڳوٺ نبو جت ۾ گهر ۾ باهه لڳڻ سبب 7 ٻارڙن ۽ ٻن عورتن سميت 10 گهر جا ڀاتي سڙي فوت ٿي ويا. پيٽ گذر لاءِ سمنڊ جي ٻيٽ اندر قائم ڳوٺ نبو جت ۾ ان وقت واقعو پيش آيو ، جڏهن ته سمورا گهر ڀاتي رات جي ماني کائي رهيا هئا. ڊيزل جو ڊرم چـُلهه مٿان ڪرڻ سبب اک ڇنڀ ۾ باهه ڪکائين گهر کي وڪوڙي وئي. باهه ايتري ته تيز هئي جو سمورن گهر ڀاتين کي ٻاهر نڪرڻ جو موقعو نه مليو ، جنهن سبب 4 مرد، 3 ٻارڙا ۽ 3 عورتون سڙي فوت ٿي ويون. باهه جي شعلن گهرن ۾ موجود نبو جت سندس پٽ شڪيل، حميد مير جت، عزيز مير جت، عورت شڪيلان جت، اسلام جت، عورت غازي خاتون، نينگري مسمي، نينگري لاڏان ۽ غلام رسول جت کي ساڙي ڪوئلو ڪري ڇڏيو. باهه لڳندي ئي ڳوٺ ۾ موجود ٻين رهواسين پنهنجي مدد پاڻ تحت ڪوششون ڪري غضب جي باهه تي ضابطو آڻي سڙي زخمي ٿيل حسين جت، مارل خاتون، عالم ۽ هڪ نينگري کي ٻاهر ڪڍيو . ڳوٺاڻن سڙي زخمي ٿيل چئني ڄڻن کي ڪراچي ڏانهن منتقل ڪيو، جن جي حالت به ڳڻتي جوڳي ٻڌائي پئي وڃي. ڳوٺاڻن جو چوڻ آهي ته انتظاميا کي ته اطلاع ڏنو آهي پر بروقت ڪو به عملدار ناهي پهتو . ڊي سي ٺٽي نديم الرحمان ميڊيا کي ٻڌايو ته واقعو سمنڊ اندر بِت ۾ ٿيو آهي جتي پهچڻ لاءِ 2 ڪلاڪ لڳي سگهن ٿا، تنهنڪري انتظاميا جلد پهچي نه سگهي پر متاثرن جي هر ممڪن مدد ڪئي ويندي

 

سنڌ حڪومت مرد شماري ۾ وڌيڪ دير جي مخالفت ڪري ڇڏي

ڪراچي (اسٽاف رپورٽر):سنڌ جي وڏي وزير جي اطلاعات ۽ آرڪائيوز کاتي واري  صلاحڪار مولابخش چانڊيو پاران وفاقي حڪومت طرفان مارچ جي مهيني ۾ ٿيندڙ مردمشماري کي ممڪنه طور تي دير ڪرڻ تي افسوس جو اظهار ڪندي چيو ته مارچ ۾ ٿيندڙ مردمشماري ۾ وڌيڪ دير ناقابل برداشت عمل آهي. هن چيو ته گڏيل مفادات ڪائونسل جي فيصلي تحت وفاقي حڪومت مردمشماري کي مقرر وقت تي صاف ۽ شفاف ۽ منصفانه انداز ۾ ڪرائي وڃي، ڇو ته هر 10 سالن کانپوٰءِ مردمشماري آئيني تقاضو آهي جنهن ۾ پهريان ئي ڪافي دير ٿي چڪي آهي. هن چيو ته مردمشماري جي حوالي سان سنڌ صوبي ۽ بلوچستان صوبي  جي عوام ۾ خدشا ۽ تحفظات کي به دور ڪيو وڃي. هن چيو ته پيپلز پارٽي جي حڪومت گهرشماري 6 مهينن ۾ڪرائي هئي ان لاءِ 3 ڏينهن ۾ مردمشماري ڪيئن ممڪن آهي. هن چيو ته مردمشماري کان اڳ نادرا ذريعي جاري ڪيل شناختي ڪارڊز جي به تحقيقات ڪرائي وڃي ته جيئن نقلي شناختي ڪارڊن جي به نشاندهي ٿي وڃي. هن وڌيڪ چيو ته وفاقي خزاني واري وزير اسحاق ڊار جو هي چوڻ ته مارچ ۾ مردشماري نه ٿي ته آسمان نه ڪرندو هڪ غير سنجيده ۽ غير ذميدارڻه بيان آهي. هن چيو ته وفاقي حڪومت طرفان مردمشماري ۾ دير ڪرڻ، سي سي آءِ جو اجلاس نه گهرائڻ، وفاق ۽ صوبن وچ ۾ ٻين معاملن ۾ عدم دلچيسپي ۽ ٽال مٽول سان ڪم وٺڻ سان صوبن ۾ احساس محرومي جنم وٺندي. هن چيو ته وفاقي حڪومت طرفان مردمشماري ڪرائڻ جا انتظام مڪمل آهن ته پوءِ دير ڪرڻ وارا حربا ڇو استعمال ڪيا پيا وڃن. هن وڌيڪ چيو ته شماريات کاتي ۾ صوبن جي نمائندگي ڏئي جلد کان جلد تحفظات دور ڪيا وڃن.

 

پي آءِ اي ۾ ڪروڙين رپين جو نقصان ٿي رهيو آهي، پر حڪومت خاموش آهي: خورشيد شاهه

سکر (بيورو) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته پي آءِ اي ۾ ڪروڙين رپين جو نقصان ٿي رهيو آهي، پر حڪومت خاموش آهي، وزيراعظم جي زبان ۾ نرمي بدران سختي اچي وئي آهي.. سکر ۾ ميڊيا سان ڳالهائيندي خورشيد شاهه چيو ته پي آءِ اي بابت بل جلد بازي ۾ منظور ڪرايو ويو، هنن تجويز ڏني هئي ته گڏ ويهي معاملي کي حل ڪيووڃي، هُو وزيراعظم جو پارليامينٽ ۾ اچڻ جو انتظار ڪري رهيا آهن… خورشيد شاهه چيو ته اورينج لائين ٽرين منصوبي تي لڳايل پئسو سڄي پاڪستاني عوام جو آهي، هارين جي ترقي ۽ بيروزگاري جي خاتمي سان ئي ملڪ ترقي ڪندو. خورشيد شاهه چيو ته پي آءِ اي واري معاملي تي حڪومت ضد ڇڏي، ڪروڙين رپين جو نقصان ٿي رهيو آهي، وزيراعظم جي زبان ۾ نرمي بدران سختي اچي وئي آهي.